31.7.2009

MT

Il-Ġurnal Uffiċjali tal-Unjoni Ewropea

L 199/22

---

DEĊIŻJONI TAL-KUNSILL

tal-25 ta’ Ġunju 2009

dwar l-applikazzjoni provviżorja u l-konklużjoni tal-Ftehim bejn il-Komunità Ewropea u l-Konfederazzjoni Żvizzera dwar is-simplifikazzjoni tal-kontrolli u tal-formalitajiet fir-rigward tat-trasport ta' oġġetti kif ukoll dwar miżuri doganali ta' sigurtà

(2009/556/KE)

IL-KUNSILL TAL-UNJONI EWROPEA,

Wara li kkunsidra t-Trattat li jistabbilixxi l-Komunità Ewropea, u b'mod speċjali l-Artikolu 33 flimkien mal-ewwel sentenza tal-Artikolu 300(3) tiegħu,

Billi:

(1)

Il-Kunsill awtorizza lill-Kummissjoni fit-28 ta' Mejju 2007 biex tiftaħ negozjati mal-Konfederazzjoni Żvizzera bil-ħsieb li jkun negozjat ftehim li jemenda l-Ftehim bejn il-Komunità Ewropea u l-Konfederazzjoni Żvizzera tal-21 ta' Novembru 1990 dwar is-simplifikazzjoni tal-kontrolli u tal-formalitajiet waqt it-trasport tal-oġġetti (1) (minn hawn ′il quddiem imsejjaħ “il-Ftehim tal-1990”).

(2)	Il-Kummissjoni u l-Konfederazzjoni Żvizzera nnegozjaw l-emenda għall-Ftehim tal-1990 li effettivament tikkonsisti inter alia f'estensjoni tal-ambitu tiegħu ta' applikazzjoni għall-miżuri doganali ta' sigurtà. Is-sustanza tal-Ftehim tal-1990 teħtieġ li tkun inkorporata fi Ftehim ġdid ikkonsolidat.

(3)	Hu xieraq li jkun approvat il-Ftehim ġdid ikkonsolidat.

(4)

Sakemm jitwettqu l-proċeduri interni tal-Partijiet Kontraenti, il-Ftehim ġdid ikkonsolidat għandu japplika b'mod provviżorju mill-1 ta' Lulju 2009, data meta l-miżuri doganali ta' sigurtà introdotti fl-2005 u l-2006 rispettivament mill-emendi tal-Kodiċi Doganali (2) tal-komunità u d-Dispożizzjonijiet Implimentattivi (3) jsiru applikabbli.

(5)	Hu xieraq li tkun speċifikata r-rappreżentazzjoni tal-Komunità fi ħdan il-Kumitat Konġunt stabbilit taħt il-Ftehim ġdid ikkonsolidat u li jkunu ddeterminati l-proċeduri interni meħtieġa għall-iżgurar tal-funzjonament korrett ta' dak il-Ftehim,

IDDEĊIEDA KIF ĠEJ:

Artikolu 1

Il-Ftehim bejn il-Komunità Ewropea u l-Konfederazzjoni Żvizzera dwar is-simplifikazzjoni tal-kontrolli u tal-formalitajiet waqt it-trasport tal-oġġetti u l-miżuri doganali ta' sigurtà huwa approvat għan-nom tal-Komunità Ewropea.

It-test tal-Ftehim huwa mehmuż ma' din id-Deċiżjoni.

Artikolu 2

Il-President tal-Kunsill huwa awtorizzat biex jinnomina persuna jew persuni li jkollhom is-setgħa li jinnotifikaw lill-awtoritajiet tal-Konfederazzjoni Żvizzera bit-tlestija tal-proċeduri sabiex il-Komunità tapprova l-Ftehim (4).

Artikolu 3

Sakemm ikunu kompluti l-proċeduri meħtieġa għall-konklużjoni tiegħu, il-Ftehim hu applikat b'mod provviżorju mill-1 ta’ Lulju 2009.

Il-Kummissjoni hi awtorizzata biex tiftiehem għal data oħra għall-applikazzjoni provviżorja tal-Ftehim, skont id-dispożizzjonijiet previsti fl-Artikolu 3(3) tiegħu.

Artikolu 4

Il-Kummissjoni, megħjuna mir-rappreżentanti tal-Istati Membri, tirrappreżenta l-Komunità fi ħdan il-Kumitat Konġunt stabbilit mill-Artikolu 19 tal-Ftehim.

Artikolu 5

Il-pożizzjoni li għandha tiġi adottata milll-Komunità fi ħdan il-Kumitat Konġunt hi ddeterminata mill-Kunsill li jaġixxi b'maġġoranza kwalifikata fuq proposta mill-Kummissjoni.

Il-pożizzjoni tal-Komunità dwar il-kwistjonijiet li għalihom il-Kumitat Konġunt għandu setgħa ta' deċiżjoni skont l-Artikoli 19(4) u (5) u 21(2) fir-rigward tal-modifiki għall-Annessi I u II tal-Ftehim, għandha tiġi adottata mill-Kummissjoni.

Artikolu 6

Bil-ħsieb li tkun żgurata l-applikazzjoni tal-Artikolu 22(4) tal-Ftehim, il-Kummissjoni għandha tinnotifika lill-Konfederazzjoni Żvizzera bl-adozzjoni tal-atti Komunitarji li jikkostitwixxu żvilupp tad-dritt Komunitarju msemmi fil-kapitolu III u fl-Annessi I u II tal-Ftehim.

Il-Kummissjoni hi awtorizzata biex tieħu l-miżuri meħtieġa previsti fl-Artikoli 22 u 29 tal-Ftehim sabiex tiżgura l-ekwivalenza tal-miżuri doganali ta' sigurtà tal-Partijiet Kontraenti.

Jekk, sad-data tal-applikazzjoni tal-leġiżlazzjoni Komunitarja kkonċernata, il-Kumitat Konġunt ma wasalx għal deċiżjoni dwar emenda tal-Ftehim, u l-applikazzjoni provviżorja tad-dispożizzjonijiet ġodda ma tkunx possibbli, il-Kummissjoni għandha tinnotifika lill-Konfederazzjoni Żvizzera bis-sospensjoni tal-Kapitolu III tal-Ftehim skont l-Artikolu 29(2) tal-Ftehim.

Artikolu 7

Din id-Deċiżjoni għandha tiġi pubblikata f’Il-Ġurnal Uffiċjali tal-Unjoni Ewropea.

---

(1)  ĠU L 116, 8.5.1990, p. 19.

(2)  Ir-Regolament tal-Kunsill (KEE) Nru 2913/92 tat-12 ta’ Ottubru 1992 li jistabbilixxi l-Kodiċi Doganali Komunitarju (ĠU L 302, 19.10.1992, p. 1).

(3)  Ir-Regolament tal-Kummissjoni (KEE) Nru 2454/93 tat-2 ta' Lulju 1993 li jiffissa d-dispożizzjonijiet għall-implimentazzjoni tar-Regolament tal-Kunsill (KEE) Nru 2913/92 li jistabbilixxi l-Kodiċi Doganali Komunitarju (ĠU L 253, 11.10.1993, p. 1).

(4)  Id-data tad-dħul fis-seħħ tal-Ftehim se tiġi ppubblikata f’Il-Ġurnal Uffiċjali tal-Unjoni Ewropea mis-Segretarjat Ġenerali tal-Kunsill.

---

31.7.2009

MT

Il-Ġurnal Uffiċjali tal-Unjoni Ewropea

L 199/24

---

FTEHIM

bejn Il-Komunità Ewropea u l-Konfederazzjoni Żvizzera dwar is-simplifikazzjoni tal-kontrolli u tal-formalitajiet fir-rigward tat-trasport ta’ oġġetti kif ukoll dwar miżuri doganali ta’ sigurtà il-Komunità

IL-KOMUNITÀ EWROPEA

minn naħa waħda, u

L-KONFEDERAZZJONI ŻVIZZERA

min-naħa l-oħra,

minn hawn ’il quddiem imsejħa “l-Komunità” u “l-Iżvizzera” rispettivament u, konġuntement, “il-Partijiet Kontraenti”,

Wara li kkunsidraw il-Ftehim bejn il-Komunità Ekonomika Ewropea u l-Konfederazzjoni Żvizzera dwar is-simplifikazzjoni tal-kontrolli u tal-formalitajiet waqt it-trasport tal-oġġetti tal-21 ta’ Novembru 1990, minn hawn ’il quddiem imsejjaħ il-Ftehim tal-1990;

Filwaqt li kkunsidraw li hu xieraq li l-ambitu ta’ applikazzjoni tal-Ftehim tal-1990 ikun estiż għall-miżuri doganali ta’ sigurtà billi jkun miżjud kapitolu ġdid dwar dan is-suġġett;

Filwaqt li kkunsidraw li minħabba raġunijiet ta’ ċarezza u ta’ tisħiħ tas-siġurtà ġuridika, il-kontenut tal-Ftehim tal-1990 huwa inkorporat f’dan il-Ftehim li ser jieħu post il-Ftehim tal-1990;

Filwaqt li kkunsidraw il-Ftehim dwar Kummerċ Ħieles konkluż fit-22 ta’ Lulju 1972 bejn il-Komunità Ekonomika Ewropea u l-Konfederazzjoni Żvizzera;

Filwaqt li kkunsidraw id-dikjarazzjoni komuni adottata, fid-9 ta’ April 1984, mill-Ministri tal-pajjiżi tal-Assoċjazzjoni Ewropea ta’ kummerċ ħieles (EFTA) u l-Istati Membri tal-Komunità u mill-Kummissjoni tal-Komunitajiet Ewropej fil-Lussemburgu, kif ukoll id-dikjarazzjoni tal-Ministri tal-pajjiżi tal-EFTA u l-Ministri tal-Istati Membri tal-Komunità ta’ Brussell; tat-2 ta’ Frar 1988, maħsuba għall-ħolqien ta’ żona ekonomika Ewropea dinamika, ta’ benefiċċju għall-pajjiżhom;

Filwaqt li l-Partijiet Kontraenti rratifikaw il-Konvenzjoni Internazzjonali dwar l-Armonizzazzjoni tal-Kontrolli ta’ Merkanzija fil-Fruntieri;

Filwaqt li kkunsidraw il-ħtieġa li jinżamm il-livell eżistenti ta’ simplifikazzjoni tal-kontrolli u tal-formalitajiet waqt il-passaġġ tal-oġġetti fil-fruntieri bejn il-Komunità u l-Iżvizzera kif ukoll il-fluss tal-iskambji kummerċjali bejn iż-żewġ partijiet;

Filwaqt li kkunsidraw li tali faċilitazzjoni għandha tiżviluppa b’mod progressiv;

Filwaqt li kkunsidraw li l-kontrolli veterinarji u fitosanitarji huma mil-llum irregolati mill-Ftehim tal-21 ta’ Ġunju 1999 bejn il-Komunità Ewropea u l-Konfederazzjoni Żvizzera dwar il-kummerċ tal-prodotti agrikoli;

Filwaqt li jkun rikonoxxut li l-kundizzjonijiet ta’ eżerċizzju tal-kontrolli u tal-formalitajiet jistgħu jiġu armonizzati b’mod estensiv bla ma jkun ta’ ħsara għall-iskop, l-implimentazzjoni korretta u l-effettività tagħħom;

Filwaqt li kkunsidraw li l-ebda dispożizzjoni ta’ dan il-Ftehim ma tista tiġi interpretata li teżenta l-Partijiet Kontraenti mill-obligi taħt ftehimiet internazzjonali oħra,

Filwaqt li l-Partijiet Kontraenti jimpenjaw ruħhom biex jiggarantixxu livell ta’ sigurtà ekwivalenti fuq it-territorju doganali rispettiv tagħhom, permezz ta’ miżuri bbażati fuq il-leġiżlazzjoni fis-seħħ fil-Komunità;

Filwaqt li hu mixtieq li l-Iżvizzera tkun ikkonsultata dwar l-iżvilupp tar-regoli tal-Komunità relatati mal-miżuri doganali ta’ sigurtà, li hija tipparteċipa fix-xogħlijiet rilevanti tal-Kumitat tal-Kodiċi Doganali, stabbilit mill-Artikolu 247a tar-Regolament tal-Kunsill (KEE) Nru 2913/92 tat-12 ta’ Ottubru 1992 li jistabbilixxi l-Kodiċi Doganali Komunitarju, u li tiġi notifikata dwar l-implimentazzjoni ta’ dawn ir-regoli;

Filwaqt li l-Partijiet Kontraenti huma ddeterminati biex itejbu s-sigurtà fil-kummerċ tal-oġġetti li jidħlu jew joħorġu mit-territorju tagħhom mingħajr ma jfixklu l-fluss ta’ dan il-kummerċ;

Filwaqt li fl-interess tal-Partijiet Kontraenti, jeħtieġ li jiġu introdotti miżuri doganali ta’ sigurtà ekwivalenti waqt it-trasport tal-oġġetti li ġejjin jew sejrin f’pajjiżi terzi;

Filwaqt li kkunsidraw li dawn il-miżuri doganali ta’ sigurtà huma dwar id-dikjarazzjoni tad-data ta’ sigurtà relatati mal-oġġetti qabel id-dħul jew il-ħruġ tagħhom, il-ġestjoni tar-riskji fil-qasam tas-sigurtà u l-kontrolli doganali relatati kif ukoll l-attribuzzjoni ta’ status ta’ operatur ekonomiku awtorizzat fil-qasam tas-sigurtà rikonoxxut b’mod reċiproku;

Filwaqt li kkunsidraw li l-Iżvizzera għanda livell ta’ protezzjoni ta’ data ta’ natura personali xieraq;

Filwaqt li kkunsidraw li dan hu każ ta’ miżuri doganali ta’ sigurtà, hu xieraq li jkunu previsti miżuri ta’ bilanċ mill-ġdid xierqa, inkluż is-sospensjoni tad-dispożizzjonijiet ikkunċernati għall-każ fejn l-ekwivalenza tal-miżuri doganali ta’ sigurtà ma tkunx iktar żgurata;

IDDEĊIDEW LI JIKKONKLUDU DAN IL-FTEHIM:

KAPITOLU I

DISPOŻIZZJONIJIET ĠENERALI

Artikolu 1

Definizzjonijiet

Għall-għan ta’ dan il-Ftehim:

(a)

kontrolli: kull operazzjoni li biha d-dwana jew kull servizz ieħor ta’ kontroll jipproċedu għall-eżami fiżiku jew ispezzjoni viżwali, jew tal-mezz ta’ trasport, jew tal-oġġetti nfishom sabiex ikun żgurat li n-natura, l-orġini, l-istat, il-kwantità jew il-valur tagħhom ikunu konformi mad-data tad-dokumenti ppreżentati;

(b)	formalitajiet: kull formalità li għaliha l-amministrazzjoni tissottometti l-operatur u li tikkonsisti fil-preżentazzjoni jew l-eżami tad-dokumenti, taċ-ċertifikati li jakkumpanjaw l-oġġetti jew, ta’ data oħra, ikun x’ikun il-mezz jew l-appoġġ, dwar l-oġġetti jew il-mezzi ta’ trasport;

(c)

riskju: Il-probabbiltà li jseħħ, b’konnessjoni mad-dħul, mat-transitu, mat-trasferiment u mad-destinazzjoni patrikolari tal-oġġetti li jiċċirkolaw bejn it-territorju doganali ta’ wieħed mill-Partijiet Kontraenti u tal-pajjiżi terzi u l-presenza tal-oġġetti li mhix f’ċirkulazzjoni ħielsa fuq it-territorju ta’ wieħed mill-partijiet Kontraenti, avveniment li jikkostitwixxi periklu għas-sigurtà u l-iżgurar tal-Komunità, tal-Istati Membri jew tal-Iżvizzera, għas-saħħa pubblika, għall-ambjent jew għall-konsomaturi;

(d)

ġestjoni tar-riskji: Id-determinazzjoni sistematika tar-riskji u l-implimentazzjoni tal-miżuri kollha meħtieġa sabiex tiġi limitata l-espożizzjoni għar-riskji. Dan it-terminu jinkludi attivitajiet bħall-ġbir ta’ data u ta’ informazzjoni, l-analiżi u l-evalwazzjoni tar-riskji, il-preskrizzjoni u l-eżekuzzjoni tal-miżuri kif ukoll il-kontroll u l-evalwazzjoni regolari tal-proċess u r-riżultati tiegħu, fuq il-bażi ta’ sorsi u strateġiji mfissra mill-Komunità, l-Istati Membri tagħha jew l-Iżvizzera jew fuq livell internazzjonali.

Artikolu 2

Ambitu ta’ applikazzjoni

1.   Mingħajr ħsara għad-dispożizzjonijiet partikolari fis-seħħ fil-qafas tal-ftehimiet konklużi bejn il-Komunità u l-Iżvizzera, dan il-Ftehim japplika għall-kontrolli u l-formalitajiet dwar it-trasport tal-oġġetti msejħa biex jaqsmu fruntiera bejn l-Iżvizzera u l-Komunità, kif ukoll għall-miżuri doganali ta’ sigurtà li għandhom japplikaw għat-trasport tal-oġġetti li ġejjin minn jew sejrin f’pajjiżi terżi.

2.   Dan il-Ftehim ma japplikax għall-kontrolli lanqas għall-formalitajiet dwar id-dgħajjes u l-ajruplani bħala mezzi ta’ trasport; Madankollu l-Ftehim japplika għall-vetturi u għall-oġġetti li jiġu ttrasportati minn dawn il-mezzi ta’ trasport.

Artikolu 3

It-territorji koperti

1.   Dan il-Ftehim għandu japplika, min-naħa, għat-territorju doganali Komunitarju u, min-naħa oħra, għat-territorju doganali Żvizzeru u ż-żoni doganali tiegħu.

2.   Dan il-Ftehim għandu japplika fil-Prinċipat ta’ Liechtenstein safejn dan il-Prinċipat jibqa’ marbut mal-Iżvizzera bi trattat ta’ unjoni doganali.

KAPITOLU II

PROĊEDURI

Artikolu 4

Kontrolli fuq bażi ta’ każwalità u formalitajiet, minbarra l-kontrolli doganali ta’ sigurtà msemmija fil-Kapitolu III

1.   Mingħajr ħsara għad-dispożizzjonijiet speċifiċi ta’ dan il-Ftehim, il-Partijiet Kontraenti għandhom jieħdu l-miżuri meħtieġa sabiex:

—	il-kontrolli u l-formalitajiet varji previsti fl-Artikolu 2(1) iseħħu fl-inqas żmien meħtieġ u, jekk jista’ jkun, fl-istess post,

—	il-kontrolli jkunu mwettqa permezz ta’ kontrolli fuq bażi ta’ każwalità, ħlief f’ċirkostanzi ġġustifikati kif xieraq.

2.   Għall-applikazzjoni tal-paragrafu 1, it-tieni inċiż, il-bażi tal-kontroll fil-post, għandha tikkonsisti mill-kunsinji kollha li jgħaddu minn post ta’ fruntiera, ippreżentati f’uffiċċju doganali jew f’servizz ta’ kontroll ieħor matul il-perjodu mogħti, u mhux mill-oġġetti kollha li jikkostitwixxu kull kunsinja.

3.   Il-Partijiet Kontraenti jiffaċilitaw, fil-postijiet tat-tluq u tad-destinazzjoni tal-oġġetti, ir-rikors għall-proċeduri ssimplifikati u għall-użu tal-informatika u tat-telematika waqt l-esportazzjoni, it-tranżitu u l-importazzjoni tal-oġġetti.

4.   Il-Partijiet Kontraenti għandhom jagħmlu ħilithom biex jiddistribwixxu l-allokazzjoni tal-uffiċċju doganali, inkluż ġot-territorju tagħhom, b’mod li jkunu ikkunsidrati bl-aħjar mod il-ħtiġijiet tal-operaturi kummerċjali.

Artikolu 5

Delegazzjoni ta’ setgħat

Il-Partijiet Kontraenti jagħmlu b’tali mod li, b’delegazzjoni espliċita tal-awtoritajiet kompetenti u għall-kunsiderazzjoni ta’ dawn, wieħed mis-servizzi l-oħra rappreżentati u ta’ preferenza d-dwana jistgħu jwettqu kontrolli li għalihom dawn l-awtoritajiet huma responsabbli u, fejn dawn jikkonċernaw l-eżiġenza tad-dokumenti mitluba, l-eżami tal-validità u tal-awtentiċità ta’ dawn id-dokumenti u l-kontroll tal-identità tal-oġġetti ddikjarati f’dawn id-dokumenti. F’dan il-każ, l-awtoritajiet ikkunċernati għandhom jiżguraw il-provvediment tal-meżżi meħtieġa għal dawn il-kontrolli.

Artikolu 6

Rikonoxximent tal-kontrolli u tad-dokumenti

Għall-għanijiet tal-applikazzjoni ta’ dan il-Ftehim u mingħajr ħsara għall-possibbiltà li jkunu mwettqa kontrolli fuq bażi ta’ każwalità, il-Partijiet Kontraenti, fil-każ tal-importazzjoni jew tad-dħul bi transitu tal-oġġetti, għandhom jirrikonoxxu l-kontrolli mwettqa u d-dokumenti stabbiliti mill-awtoritajiet kompetenti tal-parti l-oħra Kontraenti, li jiżguraw li l-oġġetti jissodisfaw l-kundizzjonijiet previsti fil-leġiżlazzjoni tal-pajjiż tal-importazzjoni jew għall-kundizzjonijiet ekwivalenti fil-pajjiż tal-esportazzjoni.

Artikolu 7

Ħinijiet tal-postijiet tal-fruntieri

1.   Meta l-volum tat-traffiku jiġġustifikah, il-Partijiet Kontraenti jagħmlu b’tali mod li:

(a)

il-postijiet tal-fruntieri jkunu miftuħa, ħlief meta ċ-ċirkulazzjoni hi projbita, b’mod li jippermetti li: — il-passaġġ tal-fruntieri jkun żgurat erbgħa u għoxrin siegħa kuljum, bil-kontrolli u l-fomalitajiet korrespondenti, għall-oġġetti li tpoġġew taħt ir-reġim doganali ta’ transitu u l-mezzi ta’ trasport tagħhom, kif ukoll li l-vetturi jiċċirkulaw vojta, ħlief fil-każ fejn ikun meħtieġ kontroll maħsub biex jipprevjeni t-tixrid ta’ mard jew biex jipproteġi l-annimali, — il-kontrolli u l-formalitajiet relatati maċ-ċirkulazzjoni tal-mezzi ta’ trasport u ta’ oġġetti li ma jiċċirkulawx taħt reġim doganali ta’ transitu jistgħu jkunu mwettqa mit-Tnejn sal-Ġimgħa għal tul ta’ żmien ta’ inqas minn għaxar sigħat mingħar waqfien, u s-Sibt għal tul ta’ żmien ta’ sitt sigħat mingħar waqfien, ħlief jekk dawn il-ġranet ikunu vaganzi pubbliċi;

(b)	fil-każ tal-vetturi u l-oġġetti ttrasportati minn ajruplani, it-tul ta’ żmien imsemmi fil-punt a) tieni inċiż għandu jkun adattat b’mod illi jwieġeb għall-ħtiġijiet effettivi u, għal dan l-għan, ikun eventwalment maqsum jew estiż.

2.   Fil-każ meta diversi postijiet tal-fruntieri jinsabu fil-viċinanża immedjata tal-istess żona tal-fruntiera, il-Partijiet Kontraenti jistgħu jipprevedu Ftehim komuni, għal uħud minnhom, derogi fil-paragrafu 1, bil-kundizzjoni li l-postijiet l-oħra li jinsabu f’din iż-żona jistgħu b’mod effettiv jirrilaxxaw l-oġġetti u l-vetturi f’konformità mad-dispożizzjonijiet tal-imsemmi paragrafu.

3.   Għall-postijiet tal-fruntieri u l-uffiċċji doganali u s-servizzi msemmija fil-paragrafu 1, u fil-kundizzjonijiet stabbiliti mill-Partijiet Kontraenti, l-awtoritajiet kompetenti jipprevedu, fil-każijiet eċċezzjonali, il-possibbiltà li jkunu mwettqa l-kontrolli u l-formalitajiet barra l-ħinijiet ta’ ftuħ fuq talba speċifika u ġġustifikata, ippreżentata waqt il-ħinijiet ta’ ftuħ, u b’kundizzjoni li, fejn xieraq, tingħata remunerazzjoni tas-servizzi mogħtija.

Artikolu 8

Toroq ta’ passaġġ rapidu

Il-Partijiet Kontraenti jagħmlu ħilithom biex iwettqu fil-postijiet tal-fruntieri, kullimkien fejn dan jirriżulta teknikament possibbli u meta l-volum tat-traffiku jiġġustifikah, toroq ta’ passaġġ rapidu rriżervati għall-oġġetti li tpoġġew taħt reġim doganali ta’ transitu, bil-mezzi tat-trasport tagħhom, għall-vetturi li jiċċirkulaw vojta, kif ukoll kull oġġett li hu suġġett għall-kontrolli u formalitajiet li ma jeċċedux dawk mitluba għall-oġġetti li tpoġġew taħt reġim ta’ transitu.

KAPITOLU III

MIŻURI DOGANALI TA’ SIGURTÀ

Artikolu 9

Dispożizzjonijiet ġenerali dwar is-sigurtà

1.   Il-Partijiet Kontraenti jimpenjaw ruħhom biex jistabbilixxu u japplikaw għat-trasport tal-oġġetti li ġejjin minn jew sejrin f’pajjiżi terzi, il-miżuri doganali ta’ sigurtà mfissra f’dan il-Kapitolu u biex jiggarantixxu wkoll livell ta’ sigurtà ekwivalenti għall-fruntieri esterni tagħhom.

2.   Il-Partijiet Kontraenti ma japplikawx il-miżuri doganali ta’ sigurtà mfissra f’dan il-Kapitolu waqt it-trasport tal-oġġetti bejn it-territorji doganali tagħhom.

3.   Il-Partijiet Kontraenti għandhom jiddiskutu minn qabel għall-konklużjoni ta’ kull ftehim ma’ pajjiż terz fl-oqsma koperti minn dan il-Kapitolu, sabiex jigarantixxu l-koerenza ma’ dan il-ftehim, b’mod partikolari jekk il-ftehim maħsub jinkludi dispożizzjonijiet li jiddegoraw mill-miżuri doganali ta’ sigurtà mfissra f’dan il-Kapitolu.

Artikolu 10

Dikjarazzjonijiet qabel id-dħul u l-ħruġ tal-oġġetti

1.   Il-oġġetti introdotti fit-territorju doganali tal-Partijiet Kontraenti li ġejjin minn pajjiż terz għandhom ikunu suġġetti għal dikjarazzjoni ta’ dħul għall-għanijiet ta’ sigurtà (minn hawn ’il quddiem imsejħa “dikjarazzjoni sommarja ta’ dħul”), ħlief oġġetti trasportati b’mezzi ta’ trasport li jkunu biss fi transitu fl-ilmijiet territorjali jew fl-ispazju tal-ajru tat-territorju doganali mingħajr waqfien f’dan it-territorju.

2.   L-oġġetti li joħorġu mit-territorju doganali tal-Partijiet Kontraenti li sejrin f’pajjiż terz għandhom ikunu suġġetti għal dikjarazzjoni ta’ ħruġ għall-għanijiet ta’ sigurtà (minn hawn ’il quddiem imsejħa (“dikjarazzjoni sommarja ta’ ħruġ”), ħlief oġġetti trasportati b’mezzi ta’ trasport li jkunu biss fi transitu fl-ilmijiet territorjali jew fl-ispazju tal-ajru tat-territorju doganali mingħajr waqfien f’dan it-territorju.

3.   Id-dikjarazzjoni sommarja ta’ dħul jew ta’ ħruġ hi ddepożitata qabel l-introduzzjoni tal-oġġetti fit-territorju doganali tal-Partijiet Kontraenti jew mal-ħruġ tagħhom minn dak it-territorju.

4.   Il-preżentazzjoni tad-dikjarazzjonijiet ta’ dħul u ta’ ħruġ imsemmija fil-paragrafi 1 u 2 hi fakultattiva sal-31 ta’ Diċembru 2010 safejn miżuri tranżitorji li jidderogaw mill-obbligu li tali dikjarazzjonijiet ikunu ppreżentati, ikunu applikabbli fil-Komunità.

Meta, skont it-termini tas-subparagrafu 1, dikjarazzjoni sommarja ta’ dħul jew ta’ ħruġ ma tkunx iddepożitata, l-analiżi tar-riskju fil-qasam tas-sigurtà kif imsemmija fl-Artikolu 12 trid titwettaq mill-awtoritajiet doganali sal-iktar tard waqt il-preżentazzjoni tal-oġġetti fil-wasla jew fil-ħruġ fuq il-bażi tad-dikjarazzjonijiet doganali li jkopru dawn l-oġġetti jew kull informazzjoni oħra għad-dispożizzjoni tagħhom.

5.   Kull Parti Kontraenti tfisser il-persuni li huma mistennija li jiddepożitaw id-dikjarazzjoni sommarja ta’ dħul jew ta’ ħruġ kif ukoll l-awtoritajiet kompetenti biex jirċievu din id-dikjarazzjoni.

6.   L-Anness I ta’ dan il-Ftehim jistabbilixxi:

—	il-forma u l-kontenut tad-dikjarazzjoni sommarja ta’ dħul u ta’ ħruġ;

—	l-eċċezzjonijiet għad-depożitu tad-dikjarazzjoni sommarja ta’ dħul jew ta’ ħruġ;

—	il-post fejn għandha tiġi ddepożitata d-dikjarazzjoni sommarja ta’ dħul jew ta’ ħruġ;

—	iż-żmien li fih għandha tiġi ddepożitata id-dikjarazzjoni sommarja ta’ dħul jew ta’ ħruġ; u

—	id-dispożizzjonijiet kollha oħra meħtieġa għall-applikazzjoni ta’ dan l-Artikolu.

7.   Dikjarazzjoni doganali tista’ tkun użata bħala dikjarazzjoni sommarja ta’ dħul jew ta’ ħruġ bil-kundizzjoni li hi tissodisfa l-kundizzjonijiet stabbiliti għal din id-dikjarazzjoni sommarja.

Artikolu 11

Operatur ekonomiku awtorizzat

1.   Parti Kontraenti għandha tagħti, suġġett għall-kriterji stabbiliti fl-Anness II ta’ dan il-Ftehim, l-istatus ta’ “operatur ekonomiku awtorizzat” fil-qasam tas-sigurtà lil kull operatur ekonomiku stabbilit fit-territorju doganali tiegħu.

Madankollu jista’ jkun rinunċjat, għal ċerti kundizzjonijiet u għal kategoriji partikolari ta’ operaturi ekonomiċi awtorizzati, ir-rekwiżit dwar l-istabbiliment fit-territorju doganali tal-parti Kontraenti fejn issir l-applikazzjoni għal dan l-istatus, b’kunsiderazzjoni, b’mod partikolari, ta’ ftehimiet ma’ pajjiżi terzi. Barra minn hekk, kull parti Kontraenti tiddetermina jekk u għal liema kundizzjonijiet kumpanija tal-ajru jew marittima mhux stabbilita fit-territorja tagħha iżda li għandha uffiċċju reġjonali tistax tkun mogħtija dan l-istatus.

L-operaturi ekonomiċi awtorizzati għandhom jibbenefikaw minn faċilitazzjonijiet fir-rigward tal-kontrolli doganali fil-qasam tas-sigurtà.

Suġġett għar-regoli u l-kundizzjonijiet imsemmija fil-paragrafu 2, l-istatus ta’ operatur ekonomiku awtorizzat mogħti minn parti Kontraenti hu rikonoxxut mill-parti Kontraenti l-oħra, mingħajr ħsara għall-kontrolli doganali, b’mod partikolari minħabba l-implimentazzjoni tal-ftehimiet mal-pajjiżi terzi li jipprevedu mekkaniżmi ta’ rikonoxxenza reċiproka tal-istatus ta’ operatur ekonomiku awtorizzat.

2.   L-Anness I ta’ dan il-Ftehim jistabbilixxi:

—	ir-regoli relatati mal-għotja tal-istatus ta’ operatur ekonomiku awtorizzat, b’mod partikolari l-kriterji ta’ għotja ta’ dan l-istatus u l-kundizzjonijiet tal-implimentazzjoni ta’ dawn il-kriterji,

—	it-tip ta’ faċilitazzjoni li tista’ tingħata,

—	ir-regoli relatati mas-sospensjoni u mar-revoka tal-istatus ta’ operatur ekonomiku awtorizzat,

—	il-modalitajiet dwar l-iskambju bejn il-Partijiet Kontraenti ta’ informazzjoni dwar l-operaturi ekonomiċi awtorizzati,

—	kull dispożizzjoni oħra meħtieġa għall-applikazzjoni ta’ dan l-Artikolu.

Artikolu 12

Kontrolli doganali ta’ sigurtà u ġestjoni tar-riskji fil-qasam tas-sigurtà

1.   Il-kontrolli doganali ta’ sigurtà minbarra l-kontrolli mhux imħabbra jridu jkunu bbażati fuq analiżi ta’ riskji bl-użu tal-proċeduri tal-informatika.

2.   Kull parti Kontraenti għandha tfisser għal dan l-għan qafas ta’ ġestjoni ta’ riskji, kriterji ta’ riskji kif ukoll oqsma ta’ kontrolli doganali prijoritarji fil-qasam tas-sigurtà.

3.   Il-Partijiet Kontraenti jirrikonoxxu l-ekwivalenza tas-sistemi tagħhom ta’ ġestjoni ta’ riskji fil-qasam tas-sigurtà.

4.   Il-Partijiet Kontraenti jikkooperaw bil-ħsieb:

—	li jagħtu lil xulxin informazzjoni li tippermetti t-titjib u t-tisħiħ tal-analiżi tagħhom ta’ riskji u l-effiċjenza tal-kontrolli doganali fil-qasam tas-sigurtà, u

—	li jfissru fiż-żmien xieraq qafas komuni ta’ ġestjoni ta’ riskji, kriterji ta’ riskji komuni kif ukoll oqsma ta’ kontrolli prijoritarji komuni u li jistabbilixxu sistema elettronika għall-implimentazzjoni ta’ din il-ġestjoni komuni ta’ riskji.

5.   Il-Kumitat Konġunt jadotta kull dispożizzjoni meħtieġa għall-applikazzjoni ta’ dan l-Artikolu.

Artikolu 13

Sorveljanza tal-implimentazzjoni tal-miżuri doganali ta’ sigurtà

1.   Il-Kumitat Konġunt ifisser il-modalitajiet li permezz tagħhom il-Partijiet Kontraenti bi ħsiebhom jiżguraw is-sorveljanza tal-implimentazzjoni ta’ dan il-Kapitolu u jivverifikaw il-konformità ma’ dawn id-dispożizzjonijiet kif ukoll ma’ dawk tal-Annessi ta’ dan il-Ftehim.

2.   Is-sorveljanza msemmija fil-paragrafu 1 tista ssir permezz ta’

—	evalwazzjoni perjodika tal-implimentazzjoni ta’ dan il-Kapitolu, b’mod partikolari tal-ekwivalenza tal-miżuri doganali ta’ sigurtà,

—	eżami maħsub għat-titjib tal-applikazzjoni jew għall-emendament tad-dispożizzjonijiet sabiex l-għanijiet tagħha jkunu mwettqa b’mod aħjar.

—	l-organizzazzjoni ta’ laqgħat tematiċi bejn esperti taż-żewġ Partijiet Kontraenti u ta’ verifiki tal-proċeduri amministrattivi, anke permezz ta’ żjarat fil-post.

3.   Il-Kumitat Konġunt jissorvelja li l-miżuri meħuda għall-applikazzjoni ta’ dan l-Artikolu huma konformi mad-drittijiet tal-operaturi ekonomiċi kkunċernati.

Artikolu 14

Protezzjoni tas-sigriet professjonali u tad-data personali

L-informazzjoni mogħtija lil xulxin mill-Partijiet Kontraenti fil-qafas tal-miżuri stabbiliti f’dan il-Kapitolu tibbenefika mill-protezzjoni tas-sigriet professjonali u tal-protezzjoni tad-data personali kif imfissra mil-liġijiet applikabbli f’dan il-qasam fit-territorju tal-Parti Kontraenti li tirċevihom.

B’mod partikolari, din l-informazzjoni ma tistax tkun mogħtija lill-persuni oħrajn ħlief l-entitajiet kompetenti fil-Parti Kontraenti kkonċernata u lanqas ma tista’ tkun użata minn entitajiet ta’ din il-Parti għall-għanijiet oħra minn dawk previsti minn dan il-Ftehim.

KAPITOLU IV

KOOPERAZZJONI

Artikolu 15

Il-kollaborazzjoni bejn l-amministrazzjonijiet

1.   Sabiex jiffaċilitaw il-qsim tal-fruntieri, il-Partijiet Kontraenti għandhom jieħdu l-miżuri meħtieġa biex jiżviluppaw il-kollaborazzjoni kemm fuq livell nazzjonali kif ukoll reġjonali jew lokali bejn l-awtoritajiet responsabbli għall-organizzazzjoni tal-kontrolli u bejn is-servizzi differenti li jwettqu kontrolli u formalitajiet min-naħa għall-oħra ta’ dawn il-fruntieri.

2.   Il-Partijiet Kontraenti, kull parti kif jikkonċernha, jagħmlu b’tali mod li l-persuni li jipparteċipaw għall-skambju msemmi f’dan il-ftehim ikunu jistgħu jinfurmaw malajr l-awtoritajiet kompetenti dwar problemi eventwali li jiltaqgħu magħhom waqt il-passaġġ minn fruntiera għall-oħra.

3.   Il-kollaborazzjoni msemmija fil-paragrafu 1 tikkonċerna b’mod speċjali:

(a)	emenda tal-postijiet tal-fruntieri, b’mod li tkopri l-eżiġenzi tat-traffiku;

(b)	il-bidla tal-uffiċċji tal-fruntieri f’uffiċċji ta’ kontroll imqiegħda wieħed ħdejn l-ieħor, fil-każ fejn dan jirriżulta possibbli;

(c)	l-armonizzazzjoni tal-kompetenzi tal-postijiet tal-fruntieri kif ukoll tal-uffiċċji li jinsabu min-naħa għall-oħra tal-fruntiera;

(d)	ir-riċerka tas-soluzzjonijiet xierqa sabiex isolvu d-diffikultajiet eventwali komunikati.

4.   Il-Partijiet Kontraenti jikkooperaw sabiex jarmonizzaw il-ħinijiet ta’ intervent tad-diversi servizzi li jwettqu kontrolli u formalitajiet min-naħa għall-oħra tal-fruntiera.

Artikolu 16

Notifika ta’ kontrolli u formalitajiet ġodda, apparti l-kontrolli doganali ta’ sigurtà imsemmija fil-Kapitolu III

Meta parti Kontraenti bi ħsiebha tapplika kontroll ġdid jew formalità ġdida f’qasam ieħor minn dak irregolat mill-Kapitolu III, hi trid tinforma l-Parti Kontraenti l-oħra.

Il-Parti Kontraenti kkonċernata tissorvelja li l-miżuri meħuda sabiex tiffaċilita l-passaġġ fil-fruntieri ma jsirux inoperabbli minħabba l-applikazzjoni ta’ dawn il-kontrolli u formalitajiet ġodda,

Artikolu 17

Fluss tat-traffiku

1.   Il-Partijiet Kontraenti jieħdu l-miżuri meħtieġa sabiex jiggarantixxu li ż-żmien ta’ stennija kkawżat minħabba l-kontrolli u l-formalitajiet differenti ma jkunx iktar mit-tul ta’ żmien meħtieġ għall-eżekuzzjoni tajba tagħhom. Għal dan l-għan, huma jorganizzaw il-ħinijiet ta’ intervent tas-servizzi mitluba biex iwettqu l-kontrolli u l-formalitajiet, il-persunal disponibbli kif ukoll il-modalitajiet prattiċi tat-trattament tal-oġġetti u tad-dokumenti marbuta mal-eżekuzzjoni tal-kontrolli u l-formalitajiet, b’mod li fejn hu possibbli jkun imnaqqas iż-żmien ta’ stennija.

2.   L-awtoritajiet kompetenti tal-pajjiżi fit-territorju fejn saru perturbazzjonijiet serji dwar it-trasport tal-oġġetti ta’ natura li jikkompromettu l-għanijiet ta’ simplifikazzjoni u tal-aċċelerazzjoni tal-qsim tal-fruntieri għandhom jinfurmaw mingħajr dewmien l-awtoritajiet kompetenti tal-pajjiżi l-oħra kkunċernati b’dawn il-perturbazzjonijiet.

3.   L-awtoritajiet kompetenti ta’ kull pajjiż ikkunċernat għandhom jieħdu mingħajr dewmien miżuri xierqa sabiex jiggarantixxu jekk ikun possibbli l-fluss tat-traffiku. Il-miżuri huma nnotifikati lill-Kumitat Konġunt, li jiltaqa’ b’urġenza, fejn hu xieraq, fuq talba tal-Parti Kontraenti sabiex jiddiskuti dawn il-miżuri.

Artikolu 18

Għajnuna amministrattiva

1.   Sabiex ikun żgurat it-tħaddim tajjeb tal-kummerċ bejn il-Partijiet Kontraenti u jkun faċilitat it-tikxif ta’ kull irregolarità jew il-ksur tal-liġi, l-awtoritajiet doganali tal-pajjizi kkunċernati għandhom, fuq talba jew fejn jaħsbu li dan jista jkun ta’ interess għall-parti Kontraenti l-oħra, fuq inizzjattiva tagħhom, jipprovdu lill xulxin bl-informazzjoni (inkluż osservazzjonijiet u rapporti amministrattivi) ta’ interess għall-implimentazzjoni tajba ta’ dan il-Ftehim.

2.   L-għajnuna tista’ tkun sospiża jew irrifjutata, kollha jew parti minnha, meta l-pajjiż mitlub jikkonsidra li din l-għajnuna tista’ tkun ta’ ħsara għas-sigurtà, l-ordni pubbliku jew għall-interessi essenzjali oħra, jew li jista’ jikser sigriet industrijali, kummercjali jew professjonali.

3.   Kull deċiżjoni ta’ waqfien jew rifjut tal-għajnuna kif ukoll ir-raġuni ta’ din id-deciżjoni jridu jkunu notifikati lill-pajjiż ikkoncernat mingħajr dewmien.

4.   Jekk l-awtorità doganali ta’ pajjiż titlob għajnuna li hi stess ma tistax tipprovdi jekk tkun mitluba, hi għandha tindika dan l-element fit-talba tagħha. Is-segwitu li għandu jingħata lil tali talba għandu jkun mogħti bi prudenza mill-awtorità doganali lil min ġiet magħmula t-talba.

5.   Kull informazzjoni miksuba skont il-paragrafu 1 għandha tiġi użata biss għall-għanijiet ta’ dan il-Ftehim u tkun mogħtija l-istess protezzjoni mill-pajjiz li jirċeviha li tkun mogħtija għal raġunijiet tal-istess natura taħt il-liġi nazzjonali ta’ dan il-pajjiż. L-informazzjoni miksuba tista tiġi użata għal għanijiet oħra biss b’kunsens miktub tal-awtorità doganali li pprovdiet l-informazzjoni u suġġetta għal kull restrizzjoni stabbilita min dik l-awtorità.

KAPITOLU V

ENTITAJIET

Artikolu 19

umitat Konġunt

1.   Hu stabbilit Kumitat Konġunt li fih ikunu rappreżentati l-Partijiet Kontraenti.

2.   Il-Kumitat Konġunt ser jaġixxi bi ftehim reċiproku.

3.   Il-Kumitat Konġunt għandu jiltaqa’ skont il-ħtieġa u tal-inqas darba fis-sena. Kull parti Kontraenti tista’ titlob biex issir laqgħa.

4.   Il-kumitat konġunt jistabbilixxi l-liġijiet interni tiegħu li jinkludu, fost dispożizzjonijiet oħra, il-modalitajiet tas-sejħa tal-laqgħat, il-ħatra tal-President tiegħu u t-tifsira tal-mandat tal-President.

5.   Il-Kumitat Konġunt jista’ jiddeċiedi li jistabilixxi kull sottokumitat jew grupp ta’ ħidma li jista’ jgħinu fil-qadi ta’ dmirijietu.

Artikolu 20

Gruppi ta’ konsultazzjoni

1.   L-awtoritajiet kompetenti tal-pajjiżi kkunċernati jistgħu jistabbilixxu kull grupp ta’ konsultazzjoni responsabbli għat-trattament tal-mistoqsijiet ta’ ordni prattiku, tekniku jew ta’ organizzazzjoni fuq livell reġjonali jew lokali.

2.   Il-gruppi ta’ konsultazzjoni msemmija fil-paragrafu 1 għandhom jiltaqgħu, meta jkun meħtieġ, fuq talba tal-awtoritajiet kompetenti ta’ pajjiż. Il-Kumitat Konġunt hu infurmat b’mod regolari dwar il-ħidmiet tagħhom mill-Partijiet Kontraenti tagħhom.

Artikolu 21

Kompetenza tal-Kumitat Konġunt

1.   Il-Kumitat Konġunt hu responsabbli għall-ġestjoni u l-implimentazzjoni korretta ta’ dan il-Ftehim. Għal dan l-għan, hu jagħmel rakkomandazzjonijiet u jwaqqaf id-deċiżjonijiet.

2.   Permezz tad-deċiżjonijiet tiegħu, il-Kumitat Konġunt jista’ jemenda l-Kapitolu III u l-Annessi.

3.   Minbarra l-każijiet previsti b’mod espressiv f’dan il-Ftehim, hu jadotta permezz ta’ deċiżjoni l-miżuri ta’ applikazzjoni ta’ natura teknika u amministrattiva maħsuba biex jissimplifikaw il-kontrolli u l-formalitajiet.

4.   Id-deċiżjonijiet huma implimentati mill-Partijiet Kontraenti skont ir-regoli proprji tagħhom.

5.   Għall-għanijiet tal-implimentazzjoni korretta tal-Ftehim, il-Kumitat Konġunt hu infurmat b’mod regolari mill-Partijiet Kontraenti dwar l-esperjenza miksuba fl-applikazzjoni ta’ dan il-Ftehim u, fuq talba ta’ waħda minnhom, il-Partijiet Kontraenti għandhom jikkonsultaw lil xulxin fi ħdan il-Kumitat Konġunt.

Artikolu 22

Żvilupp tal-liġi

1.   Hekk kif il-Kummissjoni telabora leġiżlazzjoni ġdida f’qasam irregolat mill-Kapitolu III, hi titlob b’mod informali l-parir tal-esperti Żvizzeri, bl-istess mod li hi titlob il-parir tal-esperti tal-Istati Membri.

2.   Meta l-Kummissjoni Ewropea tagħti l-proposta tagħha lill-Istati Membri jew lill-Kunsill tal-Unjoni Ewropea, hi għandha tindirizza kopja lill-Iżvizzera.

Fuq talba ta’ waħda mill-Partijiet Kontraenti, skambju preliminari ta’ opinjonijiet jista’ jseħħ fi ħdan il-Kumitat Konġunt.

3.   Il-Partijiet Kontraenti jerġgħu jikkonsultaw ma’ xulxin, fuq talba ta’ waħda minnhom, fi ħdan il-Kumitat Konġunt waqt il-fażi qabel l-adozzjoni tal-Att Komunitarju fi proċess kontinwu ta’ informazzjoni u konsultazzjoni.

4.   L-emendi fil-Kapitolu III meħtieġa għall-kunsiderazzjoni tal-iżvilupp tal-leġiżlazzjoni Komunitarju rilevanti dwar l-oqsma koperti minn dak il-Kapitolu għandhom ikunu deċiżi malajr kemm jista’ jkun b’mod li jippermetti l-applikazzjoni tagħhom fl-istess ħin ta’ dawk introdotti fil-leġiżlazzjoni Komunitarja, skont il-proċeduri interni tal-Partijiet Kontraenti.

Jekk id-deċiżjoni ma tistax tiġi adottata b’mod li jippermetti l-applikazzjoni fl-istess ħin, l-emendi previsti fl-abozz ta’ deċiżjoni suġġett għall-approvazzjoni tal-Partijiet Kontraenti huma applikati b’mod provviżorju meta dan ikun possibbli, skont il-proċeduri interni tal-Partijiet Kontraenti.

5.   Il-Partijiet Kontraenti jikkooperaw matul il-fażi ta’ informazzjoni u ta’ konsultazzjoni sabiex jiffaċilitaw, fl-aħħar tal-proċess, it-teħid ta’ deċiżjoni fi ħdan il-Kumitat Konġunt.

Artikolu 23

Parteċipazzjoni fil-Kumitat tal-Kodiċi Doganali

Il-Komunità tiżgura lill-esperti Żvizzeri l-parteċipazzjoni, bħala osservaturi u għall-punti li huma ta’ interess għalihom, fil-laqgħat tal-Kumitat tal-Kodiċi Doganali li jgħin lill-Kummissjoni Ewropea fl-eżerċizzju tal-kompetenzi ta’ implimentazzjoni tagħha fl-oqsma koperti mill-Kapitolu III.

Artikolu 24

Soluzzjoni għan-nuqqas ta’ qbil

Mingħajr ħsara għad-dispożizzjonijiet tal-Artikolu 29, kull nuqqas ta’ qbil bejn il-Partijiet Kontraenti dwar l-interpretazzjoni jew l-applikazzjoni ta’ dan il-Ftehim hi suġġetta għall-Kumitat Konġunt li jfittex is-soluzzjoni ta’ ħbiberija.

Artikolu 25

Ftehimiet ma’ pajjiżi terzi

Il-Partijiet Kontraenti jaqblu li l-ftehimiet konklużi minn waħda minnhom ma’ pajjiż terz f’qasam kopert mill-Kapitolu III ma jistgħux joħolqu obbligi għall-Parti Kontraenti l-oħra, ħlief jekk il-Kumitat Konġunt jiddeċiedi mod ieħor.

KAPITOLU VI

DISPOŻIZZJONIJIET DIVERSI U FINALI

Artikolu 26

Faċilitajiet ta’ ħlas

Il-Partijiet Kontraenti jagħmlu b’tali mod li l-ammonti eventwalment meħtieġa waqt it-twettiq tal-kontrolli u l-formalitajiet fil-kummerċi jistgħu jkunu mħallsa wkoll taħt forma ta’ ċekkijiet bankarji internazzjonali garantiti jew ċertifikati, u jsiru fil-munita tal-pajjiż fejn dawn l-ammonti huma meħtieġa.

Artikolu 27

Implimentazzjoni tal-Ftehim

Kull Parti Kontraenti għandha twaqqaf il-miżuri xierqa sabiex tiżgura l-applikazzjoni effettiva u armonjuża tad-dispożizzjonijiet ta’ dan il-Ftehim, b’kunsiderazzjoni tal-ħtieġa li tiffaċilita l-passaġġ tal-oġġetti fil-fruntieri u li ssolvi, għas-sodisfazzjoni reċiproka, kwalunkwe diffikultà li tista’ tirriżulta mill-applikazzjoni ta’ dawk id-dispożizzjonijiet.

Artikolu 28

Reviżjoni

Jekk Parti Kontraenti tixtieq reviżjoni ta’ dan il-Ftehim, hi għanda tissottometti proposta għal dan l-għan lill-Parti Kontraenti l-oħra. Ir-reviżjoni ser tidħol fis-seħħ wara t-twettiq tal-proċeduri interni rispettivi tal-partijiet.

Artikolu 29

Miżuri ta’ bilanċ mill-ġdid

1.   Parti Kontraenti tista’, wara konsultazzjoni fi ħdan il-Kumitat Konġunt, tieħu miżuri xierqa ta’ bilanċ mill-ġdid, inkluż is-sospensjoni tal-applikazzjoni tad-dispożizzjonijiet tal-Kapitolu III ta’ dan il-Ftehim meta hi tinnota li l-Parti Kontraenti l-oħra ma tkunx konformi mal-kundizzjonijiet jew meta l-ekwivalenza tal-miżuri doganali ta’ sigurtà tal-Partijiet Kontraenti m’għadhiex żgurata.

Meta kull dewmien jirriskja li jagħmel ħsara għall-effiċjenza tal-miżuri doganali ta’ sigurtà, jistgħu jkunu mwaqqfa miżuri provviżorji mingħajr konsultazzjoni qabel, bil-kundizzjoni li l-konsultazzjonijiet ikunu impenjati minnufih wara t-teħid ta’ dawn id-deċiżjonijiet.

2.   Jekk l-ekwivalenza tal-miżuri doganali ta’ sigurtà tal-Partijiet Kontraenti m’għadhiex żgurata minħabba li l-emendi previsti fl-Artikolu 22(4) ta’ dan il-Ftehim ma ġewx deċiżi, Parti Kontraenti tista’ tissospendi l-applikazzjoni tad-dispożizzjonijiet tal-Kapitolu III mid-data tal-applikazzjoni tal-leġiżlazzjoni komunitarja kkonċernata, ħlief jekk il-Kumitat Konġunt, wara li jkun eżamina l-mezzi tal-manteniment tal-applikazzjoni tiegħu, jiddeċiedi mod ieħor.

3.   L-ambitu u t-tul ta’ żmien tal-miżuri msemmija iktar qabel għandhom ikunu limitati għal dak li huwa meħtieġ sabiex tiġi rimedjata s-sitwazzjoni u biex jiġi żgurat bilanċ tajjeb bejn id-drittijiet u l-obbligi li jirriżultaw minn dan il-Ftehim. Parti Kontraenti tista’ titlob lill-Kumitat Konġunt biex jipproċedi għall-konsultazzjonijiet fir-rigward tal-proporzjonalità ta’ dawn il-miżuri u, fejn hu xieraq, biex jiddeċiedi li jissottometti nuqqas ta’ qbil dwar dan is-suġġett lill-arbitraġġ skont il-proċedura prevista fl-anness III. L-ebda kwistjoni ta’ interpretazzjoni tad-dispożizzjonijiet ta’ dan il-Ftehim, identiċi mal-ftehimiet korrispondenti tal-liġi komunitarja, ma tkun tista’ tiġi rregolata f’dan il-qasam.

Artikolu 30

Projbizzjonijiet jew restrizzjonijiet fuq l-importazzjoni, l-esportazzjoni jew it-transitu ta’ oġġetti

Id-dispożizzjonijiet ta’ dan il-Ftehim mhumiex ostaklu għall-projbizzjonijiet jew restrizzjonijiet fuq l-importazzjoni, l-esportazzjoni jew it-transitu ta’ oġġetti stabbiliti mill-Partijiet Kontraenti jew mill-Istati Membri tal-Komunità u ġġustifikati minħabba raġunijiet ta’ ordni pubbliku, sigurtà pubblika jew moralità pubblika, il-protezzjoni tas-saħħa u tal-ħajja tan-nies, tal-annimali jew tal-pjanti, il-protezzjoni ta’ teżori nazzjonali li għandhom valur artistiku, storiku jew arkeoloġiku, jew il-protezzjoni ta’ proprjetà industrijali jew kummerċjali.

Artikolu 31

Terminazzjoni

Kull Parti Kontraenti tista ttemm dan il-Ftehim permezz ta’ notifika lill-Parti Kontraenti l-oħra. Dan il-Ftehim ma jibqax fis-seħħ tnax-il xahar wara d-data ta’ din in-notifika.

Artikolu 32

Annessi

L-Annessi ma’ dan il-Ftehim għandhom jiffurmaw parti integrali minnu.

Artikolu 33

Ratifika

1.   Dan il-Ftehim għandu jkun approvat mill-Partijiet Kontraenti skont il-proceduri interni tagħhom. Il-Ftehim għandu jidħol fis-seħħ fl-1 ta’ Lulju 2009, bil-kundizzjoni li l-Partijiet Kontraenti jkunu nnotifikaw lil xulxin qabel din id-data illi ġew ikkompletati l-proċeduri meħtieġa għal dan l-għan.

2.   Jekk dan il-Ftehim ma jidħolx fis-seħħ fl-1 ta’ Lulju 2009, hu ser jidħol fis-seħħ fil-jum wara d-data li fiha l-Partijiet Kontraenti jkunu nnotifikaw it-twettiq tal-proċeduri meħtieġa għal dan l-għan.

3.   Sakemm jitwettqu l-proċeduri msemmija fil-paragrafi 1 u 2, il-Partijiet Kontraenti għandhom japplikaw b’mod provviżorju dan il-Ftehim mill-1 ta’ Lulju 2009 jew f’data ulterjuri miftiehma benj il-Patrijiet Kontraenti.

4.   Mad-dħul fis-seħħ tiegħu, dan il-Ftehim jieħu post l-Ftehim bejn il-Komunità Ekonomika Ewropea u l-Konfederazzjoni Żvizzera dwar is-simplifikazzjoni tal-kontrolli u l-formalitajiiet waqt it-trasport ta’ oġġetti tal-21 ta’ Novembru 1990.

Artikolu 34

Lingwi

Dan il-Ftehim huwa mfassal duplikatament bil-lingwa Bulgara, Ċeka, Daniża, Estona, Finlandiża, Franċiża, Ġermaniża, Griega, Ingliża, Latvjana, Litwana, Maltija, Olandiża, Pollakka, Portugiża, Rumena, Slovakka, Slovena, Spanjola, Taljana, Ungeriża u Żvediża, b’kull wieħed minn dawk it-testi ugwalment awtentiku.

---

ANNESS I

DIKJARAZZJONIJIET SOMMARJI TA’ DĦUL U TA’ ĦRUĠ

Artikolu 1

Il-forma u l-kontenut tad-dikjarazzjoni sommarja ta’ dħul jew ta’ ħruġ

1.   Id-dikjarazzjoni sommarja ta’ dħul u ta’ ħruġ hi mwettqa permezz ta’ trażmissjoni bil-kompjuter. Huwa wkoll possibbli li jintużaw dokumenti kummerċjali, tal-port jew tat-trasport, bil-kundizzjoni li dawn ikollhom d-data meħtieġa.

2.   Id-dikjarazzjoni sommarja ta’ dħul u ta’ ħruġ għandha data prevista għal din id-dikjarazzjoni fl-Anness 30a tar-Regolament tal-Kummissjoni (KEE) Nru 2454/93 tat-2 ta’ Lulju 1993 li jiffissa d-dispożizzjonijiet għall-implimentazzjoni tar-Regolament tal-Kunsill (KEE) Nru 2913/92 li jistabbilixxi il-Kodiċi Doganali Komunitarju (1) (minn hawn ’il quddiem “ir-Regolament (KEE) Nru 2454/93”). Id-dikjarazzjoni għandha titlesta skont in-noti ta’ spjegazzjoni li jinsabu fl-imsemmi Anness 30a. Hi għandha tiġi awtentikata mill-persuna li tlestiha.

3.   L-awtoritajiet doganali għandhom jippermettu d-depożitu ta’ dikjarazzjoni sommarja ta’ dħul jew ta’ ħruġ stabbilita fuq karta jew fuq mezz ieħor f’wieħed miċ-ċirkostanzi li ġejjin biss:

(a)	meta s-sistema kompjuterizzata tal-awtoritajiet doganali ma tkunx qed taħdem;

(b)	meta l-applikazzjoni elettronika tal-persuna li qed tiddepożita d-dikjarazzjoni sommarja tad-dħul jew ta’ ħruġ ma tkunx qed taħdem;

Bil-kundizzjoni li huma japplikaw għal dawn id-dikjarazzjonijiet livell ta’ ġestjoni ta’ riskji ekwivalenti għal dak li hu applikat għad-dikjarazzjonijiet sommarji ta’ dħul jew ta’ ħruġ permezz ta’ trażmissjoni bil-kompjuter.

Id-dikjarazzjonijiet sommarji ta’ dħul jew ta’ ħruġ fuq karta għandhom ikunu ffirmati mill-persuna li stabbilixxithom. Huma għandhom ikunu akkumpanjati, fejn hu xieraq, ma’ listi ta’ tagħbija jew ta’ listi oħrajn xierqa u li jinkludu d-data msemmija fil-paragrafu 2.

4.   Kull Parti Kontraenti għandha tfisser il-kundizzjonijiet u l-modalitajiet li permezz tagħhom il-persuna mistennija li tiddepożita d-dikjarazzjoni sommarja ta’ dħul jew ta’ ħruġ hi awtorizzata li temenda waħda jew diversi data ta’ din id-dikjarazzjoni, wara li tkun ġiet iddepożitata.

Artikolu 2

l-eċċezzjonijiet għad-depożitu tad-dikjarazzjoni sommarja ta’ dħul jew ta’ ħruġ

1.   Dikjarazzjoni sommarja ta’ dħul jew ta’ ħruġ m’hijiex meħtieġa għal dawn l-oġġetti li ġejjin:

(a)	l-enerġija elettrika;

(b)	il-oġġetti li jidħlu jew joħorġu permezz ta’ pajpijiet;

(c)	l-ittri, kartolini u materjal stampat, inkluż fuq mezzi elettroniċi;

(d)	l-oġġetti ttrasportata skont ir-regoli tal-Unjoni Postali Universali;

(e)

l-oġġetti li għalihom hi awtorizzata dikjarazzjoni doganali verbali jew bi qsim sempliċi tal-fruntiera, skont id-dispożizzjonijiet stabbiliti mill-Partijiet Kontraenti minbarra pallets, kontenituri u l-mezzi ta’ trasport fit-toroq, bil-ferrovija, bl-ajru, fuq il-baħar u fix-xmajjar użati fil-qafas ta’ kuntratt ta’ trasport;

(f)	l-oġġetti li jinsabu fil-bagalji personali ta’ min jivjaġġa;

(g)	l-oġġetti koperti mill-carnets ATA u CPD;

(h)

l-oġġetti eżenti skont il-Konvenzjoni ta’ Vjenna dwar ir-Relazzjonijiet Diplomatiċi tat-18 ta’ April 1961, il-Konvenzjoni ta’ Vjenna dwar ir-Relazzjonijiet Konsulari tal-24 ta’ April 1963 jew konvenzjonijiet konsulari oħra, jew ukoll il-Konvenzjoni ta’ New York tas-16 ta’ Diċembru 1969 dwar il-Missjonijiet Speċjali;

(i)	l-armi u t-tagħmir militari introdotti fi jew maħruġin mit-territorju doganali ta’ Parti Kontraenti mill-awtoritajiet inkarigati mid-difiża militari ta’ Stat Membru jew tal-Iżvizzera, fit-trasport militari jew fit-trasport imwettaq għall-użu uniku mill-awtoritajiet militari;

(j)

l-oġġetti li ġejjin, introdotti fi jew maħruġin mit-territorju doganali ta’ Parti Kontraenti direttament fi jew minn pjattaformi ta’ tħaffir jew ta’ produzzjoni operati minn persuna stabbilita fit-territorju doganali tal-Partijiet Kontraenti: — oġġetti li kienu inkorporati f’tali pjattaformi, għall-għanijiet tal-kostruzzjoni, it-tiswija, il-manutenzjoni jew il-konverżjoni tagħhom; — oġġetti li kienu użati bħala tagħmir għal tali pjattaformi; fornimenti oħra użati jew ikkunsmati fuq dawn il-pjattaformi; u l-iskart mhux perikoluż prodott minn dawn il-pjattaformi;

(k)

l-oġġetti li jinsabu fil-kunsinji u li l-valur tagħhom ma jaqbiżx EUR 22 bil-kundizzjoni li l-awtoritajiet doganali jaċċettaw, flimkien ma’ qbil tal-operatur ekonomiku, li jwettqu analiżi ta’ riskji billi jużaw l-informazzjoni li tinsab fi, jew li hi pprovduta minn, sistema użata mill-operatur ekonomiku.

2.   Dikjarazzjoni sommarja ta’ dħul jew ta’ ħruġ mhix meħtieġa fil-każ previst minn ftehim internazzjonali bejn Parti Kontraenti u pajjiż terz fil-qasam tas-sigurtà, suġġetta għall-proċedura prevista fl-Artikolu 9(3) ta’ dan il-Ftehim.

3.   Dikjarazzjoni sommarja ta’ dħul jew ta’ ħruġ mhix meħtieġa fil-Komunità dwar l-oġġetti msemmija fl-Artikoli 181c, ittri i) u j), 592a, ittri i) u j) u 842a(2), ittra b) tar-Regolament (KEE) Nru 2454/93.

4.   Dikjarazzjoni sommarja ta’ ħruġ mhix meħtieġa fl-Iżvizzera għal:

—	l-ispare parts u maħsuba biex ikunu inkorporati fl-ajruplani għat-tiswija,

—	lubrifikanti u gaż meħtieġa għat-tħaddim tal-ajruplan, u

—	oġġetti tal-ikel maħsuba biex jittieklu fuq l-ajruplan,

li jkunu tpoġġew minn qabel fil-maħżen doganali li jinsab fi ħdan l-ajruporti Żvizzeri u li mbagħad ikunu trasferiti lejn l-ajruplani f’konformità mad-dispożizzjonijiet stabbiliti mill-Iżvizzera, sakemm dawn ma jkunux ta’ ħsara għal-livell ta’ sigurtà garantit minn dan il-Ftehim.

Artikolu 3

Il-Post fejn għandha tiġi ddepożitata d-dikjarazzjoni sommarja ta’ dħul jew ta’ ħruġ

1.   Id-dikjarazzjoni sommarja ta’ dħul hi ddepożitata fl-awtorità kompetenti tal-Parti Kontraenti fit-territorju doganali fejn kienu introdotti l-oġġetti li ġejjin minn pajjiżi terzi. Din l-awtorità tipproċedi għall-analiżi ta’ riskji minn data li hi inkluża f’din id-dikjarazzjoni u għall-kontrolli doganali li huma meqjusa meħtieġa fil-qasam tas-sigurtà, inkluż meta dawn l-oġġetti huma destinati għall-Parti Kontraenti l-oħra.

2.   Id-dikjarazzjoni sommarja ta’ ħruġ hi ddepożitata fl-awtorità kompetenti tal-parti Kontraenti fit-territorju doganali fejn kienu introdotti l-oġġetti li sejrin f’pajjiżi terzi. Madankollu, id-dikjarazzjoni doganali ta’ esportazzjoni użata bħala dikjarazzjoni sommarja ta’ ħruġ hi ddepożitata fl-awtorità kompetenti tal-parti Kontraenti fit-territorju doganali fejn kienu mwettqa l-formalitajiet ta’ esportazzjoni li sejrin f’pajjiżi terzi. L-awtorità kompetenti f’wieħed minn dawn il-każijiet għandha tipproċedi għall-analiżi ta’ riskji mid-data inkluża f’din id-dikjarazzjoni u għall-kontrolli doganali meqjusa meħtieġa fil-qasam tas-sigurtà.

3.   Meta l-oġġetti jitilqu mit-territorju doganali ta’ Parti Kontraenti u jmorru f’pajjiż terz billi jaqsmu t-territorju doganali tal-parti kuntrattanti l-oħra, id-data msemmija fl-Artikolu 1(2), hi mogħtija mill-awtorità kompetenti tal-ewwel Parti Kontraenti lill-awtorità kompetenti tat-tieni parti.

Madankollu, il-Kumitat Konġunt jista’ jiddetermina każijiet li fihom it-trażmissjoni ta’ din id-data mhix meħtieġa sakemm dan ma jkunx ta’ ħsara għal-livell ta’ sigurtà garantit minn dan il-Ftehim.

Il-Partijiet Kontraenti jagħmlu ħilithom biex ikunu konnessi u jużaw sistema komuni ta’ trażmissjoni ta’ data li jkollha l-informazzjoni meħtieġa għad-dikjarazzjoni sommarja ta’ ħruġ tal-oġġetti kkunċernati.

Fil-każ li l-Partijiet Kontraenti ma jkunux jistgħu jwettqu t-trażmissjoni msemmija fil-paragrafu 1 fid-data tal-applikazzjoni ta’ dan il-Ftehim, id-dikjarazzjoni sommarja ta’ ħruġ tal-oġġetti li jitilqu minn parti Kontraenti u li sejrin f’pajjiż terz billi jaqsmu t-territorju doganali tal-Parti Kontraenti l-oħra, minbarra t-traffiku tal-ajru dirett, hi ddepożitata biss fl-awtorità kompetenti ta’ din it-tieni Parti.

Artikolu 4

Iż-żmien tad-dikjarazzjoni sommarja ta’ dħul jew ta’ ħruġ;

1.   Iż-żmien għad-depożitu tad-dikjarazzjoni sommarja ta’ dħul jew ta’ ħruġ hu dak imsemmi fl-Artikoli 184a et 592b tar-Regolament (KEE) Nru 2454/93.

2.   B’deroga mal-paragrafu 1, kull Parti Kontraenti tista’ tiddeċiedi żmienijiet differenti:

—	fil-każ tat-traffiku imsemmi fl-Artikolu 3(3), maħsub biex jippermetti analiżi ta’ riskji affidabbli u li jinterċetta l-kunsinji sabiex jipproċedi għall-kontrolli doganali eventwali ta’ sigurtà relatati;

—	fil-każ ta’ ftehim internazzjonali bejn din il-Parti Kontraenti u pajjiż terz, suġġett għall-proċedura prevista fl-Artikolu 9(3) ta’ dan il-Ftehim.

---

(1)  ĠU L 253, 11.10.1993, p. 1.

---

ANNESS II

Operatur ekonomiku awtorizzat

TITOLU I

L-GĦOTJA TAL-ISTATUS TA’ OPERATUR EKNOMIKU AWTORIZZAT

Artikolu 1

Konsiderazzjonijiet Ġenerali

1.   Il-kriterji dwar l-għotja tal-istatus ta’ operatur ekonomiku awtorizzat għandhom jinkludu:

(a)	rekords sodisfaċenti fir-rigward tal-konformità mar-rekwiżiti doganali;

(b)	sistema effiċjenti ta’ ġestjoni ta’ reġistri kummerċjali u, fejn xieraq, reġistri ta’ trasport, li jippermettu t-twettiq ta’ kontrolli doganali ta’ sigurtà xierqa;

(c)	il-prova tas-solvibilità finanzjarja; u

(d)	normi xierqa ta’ sigurtà u sikurezza.

2.   Kull Parti Kontraenti tiddetermina l-proċedura tat-talba u tal-għotja tal-istatus ta’ operatur ekonomiku awtorizzat, kif ukoll l-effetti ġuridiċi ta’ dan l-istatus.

3.   Il-Partijiet Kontraenti għandhom jiżguraw li l-awtoritajiet doganali tagħhom jikkontrollaw il-konformità, permezz tal-operatur ekonomiku awtorizzat, tal-kundizzjonijiet u l-kriterji li għalih huma applikabbli u jipproċedu għall-eżami mill-ġdid tal-kundizzjonijiet u l-kriterji b’mod speċjali fil-każ ta’ emenda importanti tal-leġiżlazzjoni fil-qasam tal-eżistenza tal-elementi li jippermettu li jkun maħsub b’mod raġonevoli li l-operatur ekonomiku awtorizzat m’għadux iwettaq il-kundizzjonijiet applikabbli.

Artikolu 2

Rekords ta’ konformità

1.   Ir-rekords fir-rigward tal-konformità mar-rekwiżiti doganali għandhom jitqiesu bħala sodisfaċenti jekk, matul l-aħħar tliet snin qabel il-preżentazzjoni tat-talba, ma sar l-ebda ksur serju jew ma sarx ksur ripetut tar-regoli doganali minn kwalunkwe minn dawn il-persuni:

(a)	l-applikant;

(b)	il-persuni responsabbli tal-kumpanija tal-applikant jew li jeżerċitaw kontroll fuq il-ġestjoni tagħha;

(c)	fejn hu xieraq, ir-rappreżentant legali tal-applikant għall-kwistjonijiet doganali;

(d)	il-persuna responsabbli għal kwistjonijiet doganali fil-kumpanija tal-applikant.

2.   Ir-rekords fir-rigward tal-konformità mar-rekwiżiti doganali jistgħu jitqiesu sodisfaċenti jekk l-awtorità doganali kompetenti tqis dan il-ksur bħala wieħed ta’ importanza negliġibbli, meta mqabbel man-numru jew id-daqs tal-operazzjonijiet doganali, u ma joħolqux dubji dwar ir-rieda tajba tal-applikant.

3.   Jekk il-persuni li jeżerċitaw kontroll fuq il-kumpanija tal-applikant ikunu stabbiliti jew residenti f’pajjiż terz, l-awtoritajiet doganali għandhom jivvalutaw il-konformità tagħhom mar-rekwiżiti doganali fuq il-bażi ta’ reġistri u informazzjoni disponibbli.

4.   Jekk l-applikant kien stabbilit mill-inqas tliet snin, l-awtoritajiet doganali għandhom jivvalutaw il-konformità tiegħu mar-rekwiżiti doganali fuq il-bażi tar-reġistri u l-informazzjoni disponibbli.

Artikolu 3

Sistema effiċjenti tal-ġestjoni tar-reġistri kummerċjali u tat-trasport

Sabiex l-awtoritajiet doganali jkunu jistgħu jistabbilixxu li l-applikant għandu sistema effiċjenti tal-ġestjoni tar-reġistri kummerċjali u, fejn hu xieraq, dawk tat-trasport, l-applikant għandu jissodisfa dawn ir-rekwiżiti li ġejjin:

(a)	juża sistema ta’ kontabilità li hija kompatibbli mal-prinċipji tal-kontabilità aċċettati b’mod ġenerali u applikati fil-post fejn tinżamm il-kontabilità u li tiffaċilita l-kontroll doganali permezz ta’ verifiki;

(b)	jippermetti li l-awtorità doganali jkollha aċċess fiżiku jew elettroniku għar-reġistri doganali tiegħu u, fejn hu xieraq, għal dawk tat-trasport;

(c)	ikollu organizzazzjoni amministrattiva li tikkorrispondi mat-tip u d-daqs tal-impriża u li hija adattata għall-ġestjoni tal-fluss tal-oġġetti, u jkollu sistema ta’ kontroll intern li tkun kapaċi tidentifika t-tranżazzjonijiet illegali jew irregolari;

(d)	fejn hu xieraq, ikollu proċeduri sodisfaċenti ta’ ġestjoni tal-liċenzji u tal-awtorizzazzjonijiet ta’ importazzjoni u/jew ta’ esportazzjoni;

(e)	ikollu proċeduri sodisfaċenti tal-arkivjar tar-reġistri u tal-informazzjoni tal-impriża u tal-protezzjoni kontra t-telf tad-data;

(f)	jiżgura li l-impjegati jkunu konxji tal-ħtieġa li l-awtoritajiet doganali jkunu informati fil-każ ta’ diffikultajiet ta’ konformità mar-rekwiżiti u jistabbilixxu kuntatti xierqa biex jinfurmaw l-awtoritajiet doganali meta jseħħu sitwazzjonijiet bħal dawn;

(g)	ikun ħa miżuri adattati tas-sigurtà tat-teknoloġija tal-informazzjoni biex jipproteġi s-sistema tal-kompjuter tal-applikant minn indħil mhux awtorizzat u jiżgura d-dokumentazzjoni tal-applikant.

Artikolu 4

Solvibilità finanzjarja

1.   Għall-għanijiet ta’ dan l-Artikolu, is-soluzzjoni finanzjarja għandha tfisser sitwazzjoni finanzjarja tajba, li hija biżżejjed biex l-applikant ikun jista’ jissodisfa l-obbligi tiegħu, b’kunsiderazzjoni tal-karatteristiċi tat-tip tal-attività kummerċjali.

2.   Il-kundizzjoni dwar is-solvabilità finanzjarja tal-applikant hi meqjusa sodisfaċenti jekk din is-solvibilità tista’ tkun attestata għall-aħħar tliet snin.

3.   Jekk l-applikant ilu stabbilit mill-inqas tliet snin, is-solvabilità finanzjarja tiegħu għandha titqies fuq il-bażi tar-reġistri u tal-informazzjoni disponibbli.

Artikolu 5

Standards xierqa ta’ sigurtà u sikureza

1.   L-istandards ta’ sigurtà u sikurezza tal-applikant huma meqjusa bħala sodisfaċenti jekk dawn il-kundizzjonijiet li ġejjin huma sodisfatti:

(a)	il-bini użat fil-qafas tal-operazzjonijiet koperti miċ-ċertifikat ikunu mibnija minn materjal li jiflaħ għal attentati ta’ dħul illegali u jipprovdi protezzjoni kontra ndħil illegali;

(b)	l-eżistenza ta’ miżuri adattati ta’ kontroll kontra l-aċċess mhux awtorizzat f’żoni merkantili, il-mollijiet tat-tagħbija u ż-żoni tat-trasport għall-merkanzija;

(c)	il-miżuri dwar il-manutenzjoni tal-oġġetti jinkludu l-protezzjoni kontra l-introduzzjoni, is-sostituzzjoni jew it-telf ta’ materjal u l-bidla tal-unitajiet tal-merkanzija;

(d)	l-eżistenza, fejn hu xieraq, tal-proċeduri li jippermettu l-iżgurar tal-ġestjoni tal-liċenzji tal-importazzjoni u/jew tal-esportazzjoni marbuta mal-projbizzjonijiet jew mar-restrizzjonijiet u biex dawn l-oġġetti jingħarfu minn oġġetti oħra;

(e)	l-applikant ikun ħa miżuri li jippermettu l-identifikazzjoni preċiża tal-imsieħba kummerċjali tiegħu, b’mod li jiżgura l-katina loġistika internazzjonali;

(f)	l-applikant iwettaq, safejn tippermetti l-leġiżlazzjoni, stħarriġ ta’ sigurtà dwar impjegati eventwali futuri mitluba li jaħdmu f’pożizzjonijiet sensittivi fir-rigward tas-sigurtà; u jipproċedi għall-kontroll perjodiku tar-rekords tagħhom;

(g)	l-applikant jiżgura li l-persunal ikkonċernat jieħu sehem b’mod attiv fi programmi ta’ kuxjenza rigward il-kwistjonijiet ta’ sigurtà.

2.   Jekk l-applikant, stabbilit fil-Komunità jew fl-Iżvizzera, ikun detentur ta’ ċertifikat ta’ sigurtà u/jew tas-sikurezza rikonoxxut fuq livell internazzjonali, maħruġ fuq il-bażi ta’ konvenzjonijiet internazzjonali, ta’ ċertifikat tas-sigurtà u/jew tas-sikurezza Ewropew maħruġ fuq il-bażi tal-leġiżlazzjoni Komunitarja, ta’ standard internazzjonali tal-Organizzazzjoni Internazzjonali għall-Istandardizzazzjoni, jew ta’ standard Ewropew tal-entitajiet Ewropej għall-Istandardizzazzjoni, jew ta’ ċertifikat ieħor rikonoxxut, il-kriterji previsti fil-paragrafu 1 għandhom jitqiesu li ġew sodisfatti safejn il-kriterji għall-għotja ta’ dawn iċ-ċertifikati jkunu identiċi jew komparabbli ma’ dawk stabbiliti fir-Regolament preżenti.

TITOLU II

FAĊILITAZZJONIET MOGĦTIJA LILL-OPERATURI EKONOMIĊI AWTORIZZATI

Artikolu 6

L-awtoritajiet doganali jagħtu b’mod speċjali dawn il-faċilitazzjonijiet li ġejjin lill-operaturi ekonomiċi awtorizzati:

—

l-awtoritajiet doganali jistgħu jinfurmaw l-operatur ekonomiku awtorizzat, qabel ma l-oġġetti jaslu fuq it-territorju doganali jew joħorġu minn dan it-territorju, li l-kunsinja ġiet mgħażla għall-kontroll fiżiku wara analiżi ta’ riskji fir-rigward tas-sigurtà jew tas-sikurezza, sakemm din ma tkunx ta’ ħsara għall-kontroll li ser jitwettaq; l-awtoritajiet doganali jistgħu madankollu jipproċedu għall-kontroll fiżiku anke meta operatur ekonomiku awtorizzat ma kienx infurmat minn qabel;

—

l-operatur ekonomiku awtorizzat jista’ jiddepożita d-dikjarazzjonijiet sommarji ta’ dħul jew ta’ ħruġ suġġetti għar-rekwiżiti dwar id-data li trid tiġi indikata, imsemmija fl-Anness 30a tar-Regolament tal-Kummissjoni (KEE) Nru 2454/93 tat-2 ta’ Lulju 1993 li jiffissa d-dispożizzjonijiet għall-implimentazzjoni tar-Regolament tal-Kunsill (KEE) Nru 2913/92 li jistabbilixxi il-Kodiċi Doganali Komunitarju (1); madankollu, meta l-operatur ekonomiku awtorizzat ikun trasportatur, kummissarju tat-trasport jew kummissarju tad-dwana, hu ma jibbenefikax minn dawn ir-rekwiżiti mnaqqsa ħlief jekk hu implikat fl-importazzjoni jew l-esportazzjoni tal-oġġetti f’isem operatur ekonomiku awtorizzat;

—	l-operatur ekonomiku awtorizzat hu suġġett għal inqas kontrolli fiżiċi u dokumentarji minn operaturi ekonomiċi oħra; madankollu l-awtoritajiet doganali jistgħu jiddeċiedu mod ieħor sabiex iqisu theddida speċifika, jew obbligi ta’ kontroll stipulati f’leġiżlazzjoni oħra li mhumiex doganali;

—

fil-każ fejn l-awtorità doganali tiddeċiedi li tipproċedi għall-kontroll ta’ kunsinja koperta minn dikjarazzjoni sommarja ta’ dħul jew ta’ ħruġ iddepożitata minn operatur ekonomiku awtorizzat, dan il-kontroll hu mwettaq bi prijorità; Barra minn hekk, fuq talba tal-operatur ekonomiku awtorizzat u bi qbil mal-awtorità doganali, dan il-kontroll jista’ jkun imwettaq f’post ieħor minn dak fejn normalment l-awtorità twettaq il-kontrolli tagħha.

TITOLU III

IS-SOSPENSJONI U R-REVOKA TAL-ISTATUS TA’ OPERATUR EKNOMIKU AWTORIZZAT

Artikolu 7

Sospensjoni tal-istatus

1.   L-awtorità doganali li toħroġ iċ-ċertifikat għandha tissospendi l-istatus ta’ operatur ekonomiku awtorizzat fil-każijiet li ġejjin:

(a)	meta jinstab nuqqas ta’ konformità mal-kundizzjonijiet jew il-kriterji tal-għotja tal-istatus ta’ operatur ekonomiku awtorizzat;

(b)	meta l-awtoritajiet doganali jkollhom raġunijiet biżżejjed biex jaħsbu li twettaq att mill-operatur ekonomiku awtorizzat li jwassal għal proċedimenti f’qorti kriminali u li hu marbut ma’ ksur tar-regoli doganali;

(c)	meta l-operatur ekonomiku awtorizzat jitlob is-sospensjoni minħabba li jinsab temporanjament inkapaċi li jkun konformi mal-kundizzjonijiet jew mal-kriterji tal-għotja tal-istatus.

2.   Fil-każ imsemmi fil-punt (b) tal-ewwel subparagrafu, l-awtorità doganali tista’ tiddeċiedi biex ma tissospendix l-istatus ta’ operatur ekonomiku awtorizzat jekk tqis li l-ksur huwa wieħed ta’ importanza negliġibbli, meta mqabbel man-numru jew id-daqs tal-operazzjonijiet b’rabta doganali, u ma toħloqx dubji dwar ir-rieda tajba tal-operatur ekonomiku awtorizzat.

3.   Is-sospensjoni għandha tidħol fis-seħħ minnufih meta jkun hekk meħtieġ minħabba t-tip jew il-livell tat-theddida lis-sigurtà u lis-sikurezza taċ-ċittadini, lis-saħħa pubblika jew lill-ambjent.

4.   Is-sospensjoni m’għandhiex impatt fuq il-proċedura doganali li jkunu diġà bdew qabel id-data tas-sospensjoni u li jkunu għadhom għaddejjin.

5.   Kull parti Kontraenti għandha tistabbilixxi t-tul ta’ żmien tas-sospesjoni b’mod li jippermetti lill-operatur ekonomiku awtorizzat li jirregolarizza s-sitwazzjoni tiegħu.

6.   Meta l-operatur ekonomiku jkun ħa, għas-sodisfazzjoni tal-awtoritajiet doganali, il-miżuri meħtieġa sabiex ikun konformi mal-kundizzjonijiet u l-kriterji li għandhom ikunu rispettati minn kull operatur ekonomiku awtorizzat, l-awtorità doganali li toħroġ iċ-ċertifikat tannula s-sospensjoni.

Artikolu 8

Ir-revoka tal-istatus

1.   L-awtorità doganali li toħroġ iċ-ċertifikat għandha tirrevoka ċ-ċertifikat ta’ operatur ekonomiku awtorizzat fil-każijiet li ġejjin:

(a)	meta l-operatur ekonomiku awtorizzat iwettaq ksur serju tar-regoli doganali u ma hemmx dritt ulterjuri ta’ appell;

(b)	meta l-Operatur Eknomiku Awtorizzat jonqos milli jieħu l-miżuri meħtieġa matul il-perjodu tas-sospensjoni msemmi fl-Artikolu 7(5);

(c)	fuq talba tal-operatur ekonomiku awtorizzat.

2.   Madankollu, fil-każ imsemmi fil-punt (b), l-awtorità doganali tista’ tiddeċiedi li ma tirrevokax iċ-ċertifikat ta’ operatur ekonomiku awtorizzat jekk tqis li l-ksur ikun ta’ importanza negliġibbli, meta mqabbel man-numru jew id-daqs tal-operazzjonijiet doganali, u ma ħalaqx dubji dwar ir-rieda tajba tal-operatur ekonomiku awtorizzat.

3.   ir-revoka għandu jieħu effett mill-jum wara n-notifika tiegħu.

TITOLU IV

SKAMBJU TA’ INFORMAZZJONI

Artikolu 9

Il-Kummissjoni u l-awtorità kompetenti Żvizzera jagħtu lil xulxin b’mod regolari l-identità tal-operaturi ekonomiċi awtorizzati tagħhom fir-rigward tas-sigurtà billi jinkludu din l-informazzjoni li ġejja:

(a)	in-numru ta’ identifikazzjoni tal-Operatur (NIN - in-Numru ta’ Identità tan-Negozjant f’format kumpatibbli mal-leġiżlazzjoni RIOE – Reġistrazzjoni u Identifikazzjoni tal-Operatur Ekonomiku);

(b)	l-isem u l-indirizz tal-operatur ekonomiku awtorizzat;

(c)	in-numru tad-dokument li bih kien mogħti l-istatus ta’ operatur ekonomiku awtorizzat;

(d)	l-istatus attwali (għaddej bħalissa, sospiż, revokat);

(e)	il-perjodi ta’ emendi tal-istatus;

(f)	id-data meta ċ-ċertifikat jidħol fis-seħħ;

(g)	l-awtorità li ħarġet iċ-ċertifikat.

---

(1)  ĠU L 253, 11.10.1993, p. 1.

---

ANNESS III

PROĊEDURA TA’ ARBITRAĠĠ

1.	Jekk nuqqas ta’ qbil hu suġġett għall-arbitraġġ, huma maħtura tliet arbitri, sakemm il-Partijiet Kontraenti ma jiddeċiedux mod ieħor.

2.	Kull Parti Kontraenti taħtar arbitru fi żmien ta’ tletin jum.

3.

Iż-żewġ arbitri maħtura jinnominaw bi ftehim komuni arbitru anzjan li mhuwiex ġej minn Parti Kontraenti. Jekk l-arbitri ma jkunux jistgħu jiftehmu, fi żmien xahrejn wara l-ħatra tagħhom, huma jagħżlu l-arbitru anzjan minn lista ta’ seba’ persuni stabbilita mill-Kumitat Konġunt. Il-Kumitat Konġunt jistabbilixxi u jaġġorna din il-lista skont ir-regolament intern tiegħu.

4.	Sakemm il-Partijiet Kontraenti ma jiddeċidux mod ieħor, it-tribunal arbitrali jistabbilixxi hu stess ir-regoli tiegħu ta’ proċedura. Hu jieħu d-deċiżjonijiet b’maġġoranza.