32004R0707

Ir-Regolament tal-kummissjoni (KE) Nru 707/2004

tas-6 ta' April 2004

li jemenda ir-Regolament (KE) Nru 1725/2003 li jadotta ċerti "standards" internazzjonali ta' kontabilità skond ir-Regolament (KE) Nru 1606/2002 tal-Parlament Ewropew u tal-Kunsill

IL-KUMMISSJONI TAL-KOMUNITAJIET EWROPEJ

Wara li kunsidrat it-Trattat li jistabbilixxi il-Komunità Ewropea.

Wara li kunsidrat ir-Regolament (KE) Nru 1606/2002 tal-Parlament Ewropew u tal-Kunsill tal-10 ta' Lulju 2002 dwar l-applikazzjoni ta' l-istandards internazzjonali tal-kontabilità [1], u b'mod partikolari l-Artikolu 3(1) tiegħu,

Billi:

(1) Fid-29 ta' Settembru 2003 il-Kummissjoni adottat ir-Regolament (KE) Nru 1725/2003 [2], li japprova l-interpretazzjonijiet adottati mill-Kumitat Permanenti dwar l-Interpretazzjoni (SIC). Waħda minn dawn l-interpretazzjonijiet hija s-SIC-8 Applikazzjoni għall-Ewwel Darba tal-IASs bħala l-bażi primarja tal-kontabilità. Skond din l-interpretazzjoni, meta l-istandards internazzjonali tal-kontabilità (IASs) jiġu applikati b'mod sħiħ għall-ewwel darba bħala l-bażi primarja tal-kontabilità, l-prospetti finanzjarji ta' intrapriża għandhom jitħejjew u jiġu preżentati daqslikieku l-prospetti finanzjarji tagħha kienu jitħejjew minn dejjem skond l-istandards u l-interpretazzjonijiet fis-seħħ fiż-żmien ta' dik l-ewwel applikazzjoni. Bħala konsegwenza ta' dan, hija meħtieġa applikazzjoni retrospettiva fil-parti l-kbira ta' l-oqsma tal-kontabilità.

(2) Biex tiġi faċilitata t-transizzjoni għall-istandards internazzjonali tal-kontabilità u għall-istandards internazzjonali ta' rappurtaġġ finanzjarju (IAS/IFRSs), il-Bord ta' l-IStandards Internazzjonali tal-Kontabilità (IASB) deċieda fid-19 ta' Ġunju 2003 li jissostitwixxi s-SIC-8 bi IFRS 1: Adozzjoni għall-Ewwel Darba ta' l-IStandards Internazzjonali ta' Rappurtaġġ Finanzjarju. Skond l-IFRS 1, impriża li tapplika l-IASs għall-ewwel darba għandha tikkonforma ma' kull wieħed mill-IASs u Interpretazzjoni fis-seħħ fiż-żmien ta' dik l-ewwel applikazzjoni. Għalhekk, l-istess bħas-SIC-8, l-IFRS 1 jeħtieġ applikazzjoni retrospettiva fil-parti l-kbira ta' l-oqsma tal-kontabilità. Madankollu, l-IFRS 1 jagħti eżenzjonijiet limitati minn dik il-ħtieġa f'oqsma speċifikati għal raġunijiet prattiċi jew fejn l-ispejjeż involuti fil-ħarsien tiegħu ikunu x'aktarx jisbqu l-benefiċċju li jiksbu l-utenti ta' prospetti finanzjarji.

(3) L-IFRS 1 għandu jagħmilha possibbli li tul iż-żmien tinkiseb paragunabilità kemm fil-prospetti finanzjarji mħejjija skond l-IFRS ta' min jadottah għall-ewwel darba u kemm bejn il-prospetti finanzjarji ta' impriżi differenti li jadottaw l-IFRSs għall-ewwel darba f'data partikolari, għax kemm il-figuri kurrenti kif ukoll dawk komparattivi huma bażati fuq l-istess sett ta' standards eżistenti fil-waqt ta' l-applikazzjoni għall-ewwel darba ta' l-IAS. Li tintlaħaq paragunabilità bejn dawk li jadottaw għall-ewwel darba l-IFRSs u impriżi li diġa' japplikawhom huwa, izda, għan sekondarju, meta wieħed iqis il-fatt li n-numru ta' dawk li se jadottawhom għall-ewwel darba fl-2005 se jiżboq bil-kbir dak ta' bejn 200 u 300 kumpannija ta' l-UE li diġa' japplikaw l-IAS/IFRSs.

(4) Il-konsultazzjoni ma' l-esperti tekniċi f'dan il-qasam tikkonferma li l-istandards internazzjonali ta' rappurtaġġ finanzjarju jissodisfaw il-kriterji għall-adozzjoni stabbiliti fl-Artikolu 3 tar-Regolament (KE) Nru 1606/2002, u b'mod partikolari l-ħtieġa li dawn għandhom iwasslu għall-ġid pubbliku Ewropew.

(5) Ir-Regolament (KE) Nru 1725/2003 għandu għalhekk jiġi emendat kif meħtieġ.

(6) Il-miżura prevista f'dan ir-Regolament hi skond l-opinjoni tal-Kumitat Regolatorju tal-Kontabilità,

ADOTTAT DAN IR-REGOLAMENT:

Artikolu 1

Fl-Anness tar-Regolament (KE) Nru 1725/2003, is-SIC-8 Applikazzjoni għall-Ewwel Darba tal-IASs bħala l-bażi primarja tal-kontabilità qiegħed hawn ikun sostitwit bit-test preżenti fl-Anness ta' dan ir-Regolament.

Artikolu 2

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu fil-Ġurnal Uffiċjali ta' l-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussel, 6 ta' April 2004.

Ghall-Kummissjoni

Frederik Bolkestein

Membru tal-Kummissjoni

[1] ĠU L 243, tal-11.09.02, p. 1.

[2] ĠU L 261, tat-13.10.03, p. 1.

--------------------------------------------------

ANNESS

"IFRS 1- Adozzjoni għall-Ewwel Darba ta' l-Istandards Internazzjonali ta' Rappurtaġġ Finanzjarju

L-IStandard Internazzjonali ta' Rappurtaġġ Finanzjarju 1 Adozzjoni għall-Ewwel Darba ta' l-IStandards Internazzjonali ta' Rappurtaġġ Finanzjarju (IFRS 1) huwa stabbilit fil-paragrafi 1 sa 47 u fl-Appendiċi A-Ċ. Kull paragrafu huwa awtorevoli bl-istess mod. Il-paragrafi b'tipi grassi jiddikjaraw il-prinċipji prinċipali. It-termini mfissra fl-Appendiċi A huma indikati bil-korsiv meta jidhru għall-ewwel darba fl-IStandard. Id-definizzjonijiet ta' termini oħra jingħataw fil-Glossarju ta' l-IStandards Internazzjonali tar-Rappurtaġġ Finanzjarju. L-IFRS 1 għandu jinqara fil-kuntest ta' l-għan tiegħu u tal-Bażi għall-Konklużjonijiet, tad-Dħul għall-IStandards Internazzjonali ta' Rappurtaġġ Finanzjarju u tal-Kwadru għall-Preparazzjoni u l-Preżentazzjoni tal-Prospetti Finanzjarji. Dawn jipprovdu bażi għall-għażla u l-applikazzjoni ta' politika dwar il-kontabilità fin-nuqqas ta' gwidi espliċiti.

INTRODUZZJONI

Raġunijiet għall-ħruġ ta' l-IFRS

IN1. L-IFRS jissostitwixxi s-SIC-8 Applikazzjoni għall-Ewwel Darba ta' l-IASs bħala l-Bażi Primarja tal-Kontabilità. Il-Bord żviluppa dan l-IFRS biex jindirizza tħassib li:

(a) xi aspetti marbuta mal-ħtieġa li s-SIC-8 jingħata applikazzjoni retroattiva sħiħa ħolqot spejjeż li sebqu l-benefiċċji li x'aktarx kienu qegħdin jitgawdew mill-utenti tar-prospetti finanzjarji. Barra minn dan, għalkemm is-SIC-8 ma kienx jeħtieġ applikazzjoni retroattiva fejn din kienet tkun imprattikabbli, ma kienx iżda jispjega jekk min kien jadottah għall-ewwel darba kellux jinterpreta imprattikabilità bħala ostaklu kbir jew bħala ostaklu żgħir u ma kienx jispeċifika x'kellu jseħħ f'każijiet ta' imprattikabilità.

(b) Is-SIC-8 seta' jeħtieġ lil min jadottah għall-ewwel darba li japplika żewġ verżjonijiet differenti ta' Standard jekk verżjoni ġdida kellha tiġi introdotta tul il-perjodi inklużi fl-ewwel prospetti finanzjarji mħejjija skond l-IASs u l-verżjoni ġdida kienet tipprojbixxi applikazzjoni retroattiva.

(ċ) is-SIC-8 ma kienx jgħid b'mod ċar jekk min jadottah għall-ewwel darba kellux juża dak li sar magħruf wara fl-applikazzjoni retroattiva ta' deċiżjonijiet dwar rikonoxximent u valutazzjoni.

(d) kien hemm xi dubji dwar kif is-SIC-8 kien jinteraġixxi ma' dispożizzjonijiet transitorji speċifiċi preżenti fi Standards individwali.

Aspetti prinċipali ta' l-IFRS

IN2. L-IFRS japplika meta xi entità tadotta l-IFRSs għall-ewwel darba permezz ta' dikjarazzjoni espliċita u mingħajr ebda riserva ta' konformità ma' l-IFRSs.

IN3. B'mod ġenerali, l-IFRS jeħtieġ li entità tħares kull IFRS li jkun fis-seħħ fid-data ta' rappurtAġġ ta' l-ewwel prospetti finanzjarji tagħha mħejjija skond l-IFRS. B'mod partikolari, l-IFRS jeħtieġ li entità twettaq dan li ġej fir-rigward tal-karta tal-bilanċ tal-bidu mħejjija skond l-IFRS bħala l-bidu tal-kontabilità tagħha skond l-IFRSs:

(a) tirrikonoxxi kull attiv u passiv li r-rikonoxximent tiegħu huwa mitlub mill-IFRSs;

(b) ma tirrikonoxxix elementi bħala attiv jew passiv jekk l-IFRSs ma jippermettux dan ir-rikonoxximent;

(ċ) tirriklassifika elementi li kienet tirrikonoxxi bħala tip partikolari ta' attiv, passiv jew bħala parti tal-komponent tal-valur propjetarju skond il-GAAP preċedenti, imma li huma meqjusa bħala tip differenti ta' attiv, passiv jew parti differenti tal-komponent tal-valur propjetarju skond l-IFRSs; u

(d) tapplika l-IFRSs meta tivvaluta l-attiv u l-passiv kollu rikonoxxut.

IN4. L-IFRS jippermetti eżenzjonijiet limitati minn dawn il-ħtiġiet f'oqsma speċifikati fejn l-ispiża biex wieħed iħarishom tkun x'aktarx tisboq il-benefiċċji li jgawdu l-utenti tar-prospetti finanzjarji. L-IFRS jipprojbixxi wkoll l-applikazzjoni retroattiva ta' l-IFRSs f'xi oqsma, b'mod partikolari fejn l-applikazzjoni retroattiva tagħhom tkun teħtieġ li jsir ġudizzju mill-amministrazzjoni dwar kondizzjonijiet imgħoddija wara li r-riżultat ta' operazzjoni partikolari jkun diġà magħruf.

IN5. L-IFRS jeħtieġ li jkun hemm għoti ta' informazzjoni li juri kif it-transizzjoni mill-GAAP preċedenti għall-IFRSs affetwat il-pożizzjoni finanzjarja rappurtata, il-prestazzjoni finanzjarja kif ukoll id-dħul u l-ħruġ tal-flus ta' l-entità.

IN6. Entità hija mitluba li tapplika l-IFRS jekk l-ewwel prospetti finanzjarji tagħha mħejjija skond l-IFRS huma għal perjodu li jibda' nhar jew wara l-1 ta' Jannar 2004. Applikazzjoni aktar bikrija hija mħeġġa.

Tibdil minn ħtiġiet preċedenti

IN7. L-istess bħas-SIC-8, l-IFRS jeħtieġ applikazzjoni retroattiva fil-parti l-kbira ta' l-oqsma. B'differenza mas-SIC-8, l-IFRS:

(a) jinkludi eżenzjonijiet immirati biex jiġu evitati spejjeż li x'aktarx ikunu jeċċedu l-benefiċċji li jgawdu l-utenti tal-prospetti finanzjarji, u numru żgħir ta' eżenzjonijiet oħra li jingħataw għal raġunijiet prattiċi.

(b) jiċċara li entità għandha tapplika l-aħħar verżjoni ta' l-IFRSs.

(ċ) jiċċara kif l-istimi skond l-IFRSs ta' min jadottahom għall-ewwel darba huma konnessi ma' l-istimi li jkunu saru għall-istess data taħt il-GAAP preċedenti.

(d) jispeċifika li d-dispożizzjonijiet transitorji f'IFRSs oħra ma japplikawx għal min jadottahom għall-ewwel darba.

(e) jeħtieġ għoti ta' informazzjoni msaħħaħ dwar it-transizzjoni għall-IFRSs.

STANDARD INTERNAZZJONALI TA' RAPPURTAĠĠ FINANZJARJU 1

Adozzjoni għall-Ewwel Darba ta' l-IStandards Internazzjonali ta' Rappurtaġġ Finanzjarju

GĦAN

1. L-għan ta' dan l-IFRS huwa li jiżgura li l-ewwel prospetti finanzjarji ta' entità mħejjija skond l-IFRS, u r-rapporti finanzjarji proviżorji tagħha għal parti mill-perjodu kopert f'dawk il-prospetti finanzjarji, jkun fihom informazzjoni ta' kwalità għolja li:

(a) hi trasparenti għall-utenti u tkun paragunabbli għal perjodi kollha preżentati;

(b) tipprovdi punt ta' tluq adegwat għal kontabilità skond l-IStandards Internazzjonali ta' Rappurtaġġ Finanzjarju (IFRSs); u

(ċ) tista' titnissel bi spiża li ma tisboqx l-benefiċċji li jgawdu l-utenti.

KAMP TA APPLIKAZZJONI

2. Entità għandha tapplika dan l-IFRS fil-każ ta':

(a) l-ewwel prospetti finanzjarji tagħha mħejjija skond l-IFRS; u

(b) kull rapport finanzjarju proviżorju, jekk ikun hemm, li hija tippreżenta skond l-IAS 34 Rappurtaġġ Finanzjarju Proviżorju għal parti mill-perjodu kopert fl-ewwel prospetti finanzjarji tagħha mħejjija skond l-IFRS.

3. L-ewwel prospetti finanzjarji ta' entità mħejjija skond l-IFRS huma l-ewwel prospetti finanzjarji annwali li fihom l-entità tadotta l-IFRSs, permezz ta' dikjarazzjoni espliċita u mingħajr ebda riserva f'dawk il-prospetti finanzjarji ta' konformità ma' l-IFRSs. Prospetti finanzjarji skond l-IFRSs huwa l-ewwel prospetti finanzjarji ta' entità mħejjija skond l-IFRS jekk, per eżempju, l-entità:

(a) ippreżentat il-prospetti finanzjarji preċedenti tagħha l-aktar reċenti:

(i) skond ħtiġiet nazzjonali li m'humiex konsistenti ma' l-IFRSs f'kull aspett;

(ii) li huma konformi ma' l-IFRSs f'kull aspett, iżda il-prospetti finanzjarji ma kienx fihom dikjarazzjoni espliċita u mingħajr ebda riserva li kienu jikkonformaw ma' l-IFRSs;

(iii) li jkun fihom dikjarazzjoni espliċita ta' konformità ma' wħud mill-IFRSs, iżda mhux ma' l-IFRSs kollha;

(iv) skond kondizzjonijiet nazzjonali li huma inkonsistenti ma' l-IFRSs, bl-użu ta' xi IFRSs individwali biex jingħata rendikont ta' xi element li għalih ma kienux jeżistu ħtiġiet nazzjonali; jew

(v) skond ħtiġiet nazzjonali, bir-rikonċiljazzjoni ta' xi ammonti ma' l-ammonti determinati skond l-IFRSs;

(b) ħejjiet prospetti finanzjarji skond l-IFRSs għal użu intern biss, mingħajr ma' ġew imqiegħda għad-dispożizzjoni tas-sidien ta' l-entità jew ta' xi utenti esterni oħra;

(ċ) ħejjiet pakkett ta' rappurtaġġ skond l-IFRSs għal skopijiet ta' konsolidazzjoni mingħajr ma ħejjiet sett komplet ta' prospetti finanzjarji hekk kif definit f'IAS 1 Preżentazzjoni ta' Prospetti finanzjarji; jew

(d) ma preżentatx prospetti finanzjarji għal perjodi preċedenti.

4. Dan l-IFRS japplika għal meta entità tadotta għall-ewwel darba l-IFRSs. Ma japplikax meta, per eżempju, entità:

(a) tieqaf milli tkompli tippreżenta prospetti finanzjarji skond ħtiġiet nazzjonali, wara li tkun preċedentement ippreżentathom kif ukoll sett ieħor ta' prospetti finanzjarji li jkun fihom dikjarazzjoni espliċita u mingħajr ebda riserva ta' konformità ma' l-IFRSs;

(b) tkun ippreżentat prospetti finanzjarji s-sena ta' qabel skond ħtiġiet nazzjonali u dawk il-prospetti finanzjarji jkun fihom dikjarazzjoni espliċita u mingħajr ebda riserva ta' konformità ma' l-IFRSs; jew

(ċ) tkun ippreżentat prospetti finanzjarji fis-sena ta' qabel li jkun fihom dikjarazzjoni espliċita u mingħajr ebda riserva ta' konformità ma' l-IFRSs, ukoll jekk l-awdituri jkunu kwalifikaw ir-rapport ta' verifika tagħhom dwar dawk il-prospetti finanzjarji.

5. Dan l-IFRS ma japplikax għal bidliet fil-politika dwar il-kontabilità magħmula minn entità li diġa' tapplika l-IFRSs. Dawn il-bidliet huma s-suġġett ta':

(a) ħtiġiet dwar bidliet fil-politika dwar il-kontabilità f'IAS 8 Qligħ jew Telf Nett għall-Perjodu, Żbalji Fundamentali u Bidliet fil-Politika dwar il-Kontabilità; u

(b) ħtiġiet transitorji speċifici f'IFRSs oħra.

RIKONOXXIMENT U VALUTAZZJONI

Il-karta tal-bilanċ tal-bidu mħejjija skond l-IFRS

6. Entità għandha tħejji karta tal-bilanċ tal-bidu skond l-IFRS fid-data ta' transizzjoni għall-IFRSs. Dan huwa l-punt ta' tluq tal-kontabilità tagħha skond l-IFRSs. Entità m'għandiex għalfejn tippreżenta l-karta tal-bilanċ tal-bidu tagħha mħejjija skond l-IFRS fl-ewwel prospetti finanzjarji mħejjija skond l-IFRS.

Politika dwar il-kontabilità

7. Entità għandha tuża l-istess politika dwar il-kontabilità fil-karta tal-bilanċ tal-bidu tagħha mħejjija skond l-IFRS u matul il-perjodi kollha preżentati fl-ewwel prospetti finanzjarji mħejjija skond l-IFRS. Dik il-politika dwar il-kontabilità għandha tħares kull IFRS li jkun fis-seħħ fid-data ta' rappurtaġġ għall-ewwel prospetti finanzjarji tagħha mħejjija skond l-IFRS, ħlief kif speċifikat fil-paragrafi 13 sa 34.

8. Entità ma għandhiex tapplika verżjonijiet differenti ta' l-IFRSs li kienu fis-seħħ qabel. Entità tista' tapplika IFRS ġdid li jkun għadu m'huwiex obbligatorju jekk ikun permissibbli li jiġi applikat qabel.

Eżempju: Applikazzjoni konsistenti ta' l-aħħar verżjoni ta' l-IFRSs

SFOND

Id-data ta' rappurtaġġ ta' l-ewwel prospetti finanzjarji ta' entità A mħejjija skond l-IFRS hija l-31 ta' Diċembru 2005. Entità A tiddeċiedi li f'dawk il-prospetti finanzjarji tippreżenta informazzjoni komparattiva għal sena waħda biss (ara l-paragrafu 36). Għalhekk, id-data ta' transizzjoni tagħha għall-IFRSs hija l-bidu tal-kummerċ nhar l-1 ta' Jannar 2004 (jew, b'mod ekwivalenti, għeluq il-kummerċ nhar il-31 ta' Diċembru 2003). Entità A preżentat prospetti finanzjarji skond il-GAAP preċedenti tagħha ta' kull sena sa nhar il-31 ta' Diċembru kull sena sa, u inkluż, il-31 ta' Diċembru 2004.

APPLIKAZZJONI TA' ĦTIĠIET

Entità A hija mitluba li tapplika l-IFRSs effettivi għal perjodi li jispiċċaw nhar il-31 ta' Diċembru 2005 meta:

(a) tħejji l-karta tal-bilanċ tal-bidu tagħha skond l-IFRS sa nhar l-1ta' Jannar 2004; u

(b) tħejji u tippreżenta l-karta tal-bilanċ tagħha għall-31 ta' Diċembru 2005 (inklużi ammonti komparattivi għall-2004), prospett tad-dħul, prospett tal-bidliet fil-valur tal-propjetarju u fid-dħul u l-ħruġ ta' flus għal dik is-sena sal-31 ta' Diċembru 2005 (inklużi ammonti komparattivi għall-2004) u l-għoti ta' informazzjoni (inkluża informazzjoni komparattiva għas-sena 2004).

Jekk IFRS ġdid għadu m'huwiex obbligatorju imma ikun permess li jiġi applikat qabel, entità A tista', iżda mhix obbligata, li tapplika dak l-IFRS fl-ewwel prospetti finanzjarji tagħha mħejjija skond l-IFRS.

9. Id-dispożizzjonijiet transitorji f'IFRSs oħra japplikaw għal bidliet fil-politika dwar il-kontabilità magħmula minn entità li diġa' tuża l-IFRSs; dawn ma japplikawx għat-transizzjoni għall-IFRSs ta' min jadottahom għall-ewwel darba, ħlief kif speċifikat fil-paragrafi 72 sa 30.

10. Ħlief kif deskritt fil-paragrafi 13 sa 43, entità għandha, fil-karta tal-bilanċ tal-bidu tagħha mħejjija skond l-IFRS:

(a) tirrikonoxxi kull attiv u passiv li r-rikonoxximent tiegħu huwa mitlub mill-IFRSs;

(b) ma tirrikonoxxix elementi bħala attivi jew passivi jekk l-IFRSs ma jippermettux tali rikonoxximent;

(ċ) tirriklassifika elementi li taħt il-GAAP preċedenti kienet tagħraf bħala tip ta' attiv, passiv jew bħala parti tal-komponent tal-valur propjetarju, imma li skond l-IFRSs huma tip differenti ta' attiv, passiv jew parti differenti mill-komponent tal-valur propjetarju; u

(d) tapplika l-IFRSs fil-valutazzjoni ta' kull attiv u passiv rikonoxxut.

11. Il-politika dwar il-kontabilità li entità tuża fil-karta tal-bilanċ tal-bidu tagħha mħejjija skond l-IFRS tista' tvarja minn dik li hija użat mill-istess data fl-applikazzjoni tal-GAAP preċedenti tagħha. L-aġġustamenti li jirriżultaw jiġu minn fatti u operazzjonijiet li seħħew qabel id-data ta' transizzjoni għall-IFRSs. Għalhekk, entità għandha tirrikonoxxi dawk l-aġġustamenti direttament fil-qliegħ miżmum (jew, jekk ikun xieraq, f'xi kategorija oħra tal-valur propjetarju) dakinhar tad-data ta' transizzjoni għall-IFRSs.

12. Dan l-IFRS jistabbilixxi żewġ kategoriji ta' eċċezzjonijiet għall-prinċipju li l-karta tal-bilanċ tal-bidu ta' entità mħejjija skond l-IFRS għandha tħares kull IFRS:

(a) il-paragrafi 13 sa 25 jagħtu eżenzjonijiet minn xi ħtiġiet ta' IFRSs oħra.

(b) il-paragrafi 26 sa 34 jipprojbixxu l-applikazzjoni retroattiva ta' xi aspetti ta' IFRSs oħra.

Eżenzjonijiet minn IFRSs oħra

13. Entità tista' tagħżel li tuża waħda jew iktar mill-eżenzjonijiet li ġejjin:

(a) tagħqid ta' negozji (paragrafu 15);

(b) valur ġust jew rivalutazzjoni bħala l-valur preżunt (paragrafi 16 sa 19);

(ċ) benefiċċji ta' l-impjegati (paragrafu 20);

(d) differenzi kumulattivi fil-qlib (paragrafi 21 u 22);

(e) strumenti finanzjarji komposti (paragrafu 23); u

(f) attiv u passiv ta' kumpanniji sussidjarji, assoċjati u joint ventures (paragrafi 24 sa 25).

Entità m'għandiex tapplika dawn l-eżenzjonijiet b'analoġija ma' elementi oħra.

14. Xi eżenzjonijiet hawn taħt jirreferu għal valur ġust. L-IAS 22 Taqgħid ta' Negozji jispjega kif jiġi stabbilit il-valur ġust ta' attiv u passiv identifikabbli akkwistati f'taqgħid ta' negozju. Entità għandha tapplika dawk l-ispjegazzjonijiet meta tiġi biex tistabilixxi l-valuri ġusti skond dan l-IFRS, kemm-il darba xi IFRS ieħor ma jkollux gwida aktar speċifika dwar din id-determinazzjoni tal-valuri ġusti ta' l-attiv u passiv. Dawk il-valuri ġusti għandhom jirriflettu l-kondizzjonijiet li kienu jeżistu fid-data għal liema ġew determinati.

Shubija ta' negozji

15. Entità għandha tapplika l-ħtiġiet fl-Appendiċi B għall-ishubija flimkien ta' negozji li l-entità rikonoxxiet qabel id-data ta' transizzjoni għall-IFRSs.

Valur ġust jew rivalutazzjoni bħala valur preżunt

16. Entità tista' tagħżel li tivvaluta element ta' proprjetà, impjant u tagħmir fid-data ta' transizzjoni għall-IFRSs skond il-valur ġust tagħhom u tuża' dak il-valur ġust bħala l-valur preżunt tagħhom f'dik id-data.

17. Min jadottahom għall-ewwel darba jista' jagħżel li juża rivalutazzjoni ta' element ta' proprjetà, impjant u tagħmir magħmula skond il-GAAP preċedenti dakinhar ta', jew qabel, id-data ta' transizzjoni għall-IFRSs bħala l-valur preżunt fid-data tar-rivalutazzjoni, jekk ir-rivalutazzjoni kienet, fid-data tar-rivalutazzjoni, bejn wieħed u ieħor paragunabbli ma':

(a) il-valur ġust; jew

(b) il-valur jew il-valur deprezzat skond l-IFRSs, aġġustat biex jirrifletti, per eżempju, bidliet f'indiċi ġenerali jew speċifiku tal-prezzijiet.

18. L-għażliet fil-paragrafi 16 u 17 huma wkoll disponibbli għal:

(a) proprjetà ta' investiment, jekk entità tagħżel li tuża il-mudell tal-valur f'IAS 40 Proprjetà ta' Investiment; u

(b) beni immaterjali li jissoddisfaw:

(i) il-kriterji ta' rikonoxximent f'IAS 38 Beni immaterjali (inkluż valutazzjoni affidabbli tal-valur oriġinali); u

(ii) il-kriterji f'IAS 38 għar-rivalutazzjoni (inkluża l-eżistenza ta' suq attiv).

Entità m'għandiex tuża dawn l-għażliet għal xi attiv jew passiv ieħor.

19. Min jadottahom għall-ewwel darba jista' jkun stabbilixxa valur preżunt skond il-GAAP preċedenti għal xi attiv u passiv jew għall-attiv u l-passiv kollu tiegħu billi jkun ivvalutahom skond il-valur ġust tagħhom f'data waħda partikolari minħabba xi fatt bħal privatizzazzjoni jew offerta inizjali lill-pubbliku. Min ikun għamel hekk ikun jista' juża din il-valutazzjoni tal-valur ġust kawżata minn xi fatt bħala l-valur preżunt għall-IFRSs dakinhar ta' dik il-valutazzjoni.

Benefiċċji ta' Impjegati

20. Skond l-IAS 19 Benefiċċji ta' l-Impjegati, entità tista' tagħżel li tuża metodu ta' "kuridur" li ma jirrikonoxxix xi qligħ u telf attwarju. L-applikazzjoni retroattiva ta' dan il-metodu teħtieġ li entità taqsam il-qligħ u t-telf kumulattiv attwarju tagħha mill-bidu nett tal-pjan sad-data ta' transizzjoni għall-IFRSs f'porzjon rikonoxxut u porzjon mhux rikonoxxut. Iżda, min jadottahom għall-ewwel darba jista' jagħżel li jirrikonoxxi l-qligħ u t-telf kumulattiv attwarju kollu fid-data ta' transizzjoni għall-IFRSs, ukoll jekk juża l-metodu ta' kuridur għall-qligħ u telf attwarju magħmul aktar tard. Jekk min jadottahom għall-ewwel darba jagħmel din l-għażla, din għandha tapplika għall-pjanijiet kollha.

Differenzi kumulattivi f'taqlib

21. L-IAS 21 L-Effetti ta' Bidliet fir-Rati tal-Kambju jeħtieġ li entità:

(a) tikklassifika xi differenzi fil-qlib bħala komponent separat tal-valur propjetarju; u

(b) meta tiddisponi minn xi operazzjoni barranija, tittrasferixxi d-differenza kumulattiva fit-taqlib għal dik l-operazzjoni barranija (inklużi, jekk applikabbli, kull qligħ u telf riżultanti minn ilqugħ relattat) fil-prospett tad-dħul bħala parti mill-qligħ jew telf magħmul mad-disponiment.

22. Iżda, min jadottahom għall-ewwel darba m'għandux għalfejn iħares dawn il-ħtiġiet għad-differenzi kumulattivi fit-taqlib li kienu jeżistu fid-data ta' transizzjoni għall-IFRSs. Jekk min jadottahom għall-ewwel darba juża din l-eżenzjoni:

(a) id-differenzi kumulattivi fil-qlib għall-operazzjonijiet barranin kollha għandhom jitqiesu li huma żero fid-data ta' transizzjoni għall-IFRSs; u

(b) il-qligħ jew telf riżultanti minn disponiment sussegwenti ta' xi operazzjoni barranija għandu jeskludi d-differenzi fit-taqlib li kien hemm qabel id-data ta' transizzjoni għall-IFRSs u għandu jinkludi d-differenzi fit-taqlib magħmul wara.

Strumenti Finanzjarji Komposti

23. Strumenti Finanzjarji li jaqgħu taħt IAS 32: Għoti ta' informazzjoni u l-Preżentazzjoni jeħtieġu li entità taqsam strumenti finanzjarju komposti mill-bidunett f'passiv separat u f'dawk li huma parti tal-komponent tal-valur proprjetarju. Jekk il-komponent passiv m'għadux iktar dovut, l-applikazzjoni retrospettiva tal-IAS 32 tinvolvi s-separazzjoni f'żewġ porzjonijiet tal-valur proprjetarju. L-ewwel porzjon jikkonsisti fi qligħ miżmum u jirrappreżenta l-interess kumulattiv li jkun akkumula fuq il-komponent passiv. Il-porzjon l-ieħor jirrappreżenta il-parti oriġinali tal-valur propjetarju. Iżda, skond dan l-IFRS, min jadottahom għall-ewwel darba m'għandux għalfejn jissepara dawn iż-żewġ porzjonijiet jekk il-komponent tal-passiv m'għadux iktar dovut fid-data tat-transizzjoni għall-IFRSs.

Attiv u passiv ta' kumpanniji sussidjarji, assoċjati u joint ventures

24. Jekk xi kumpannija sussidjarja tadottahom għall-ewwel darba wara l-kumpannija omm tagħha, il-kumpannija sussidjarja għandha, fil-prospetti finanzjarji separati tagħha, tivvaluta l-attiv u l-passiv tagħha bħala jew:

(a) l-valuri kontabbli li suppost jiġu inklużi fil-prospetti finanzjarji konsolidati tal-kumpannija omm, bażati fuq id-data ta' transizzjoni tal-kumpannija omm għall-IFRSs, jekk ma' kien sar l-ebda aġġustament għall-proċeduri ta' konsolidazzjoni u għall-effetti ta' l-ishubija ta' negozji li fiha l-kumpannija omm akkwistat il-kumpannija sussidjarja; jew

(b) l-valuri kontabbli mitluba mill-bqija ta' dan l-IFRS, ibbażati fuq id-data ta' transizzjoni tal-kumpannija sussidjarja għall-IFRSs. Dawn il-valuri kontabbli jistgħu jvarjaw minn dawk deskritti f'(a):

(i) meta l-eżenzjonijiet f'dan l-IFRS jirriżultaw f'valutazzjonijiet li jiddependu fuq id-data ta' transizzjoni għall-IFRSs.

(ii) meta l-politika dwar il-kontabilità adottati mill-kumpannija sussidjarja fil-prospetti finanzjarji hi differenti minn dik adottati fil-prospetti finanzjarji konsolidati. Per eżempju, l-kumpannija sussidjarja tista' tuża t-trattament ibbażat fuq il-benchmarks f'IAS 16 Proprjetà, Impjant u Tagħmir, filwaqt li l-grupp jista' juża it-trattament alternattiv permess.

Għażla simili hija disponibbli għal assoċjat jew joint venture li jadottawhom għall-ewwel darba wara l-entità li għandha influwenza sinifikanti jew kontrol konġunt fuqha.

25. Iżda, jekk entità tadottahom għall-ewwel darba wara l-kumpannija sussidjarja tagħha (jew assoċjat jew joint venture) l-istess entità għandha, fil-prospetti finanzjarji konsolidati tagħha, tivvaluta l-attiv u passiv tal-kumpannija sussidjarja (jew assoċjat jew joint venture) fl-istess valuri kontabbli fil-prospetti finanzjarji separati tal-kumpannija sussidjarja (jew assoċjat jew joint venture), wara li jsiru l-aġġustamenti għall-konsolidazzjoni u aġġustamenti fil-kontijiet tal-valur proprjetarju u għall-effetti tal-kombinazzjoni ta' negozji li fiha l-entità tkun akkwistat il-kumpannija sussidjarja. Bl-istess mod, jekk kumpannija omm tadottahom għar-prospetti finanzjarji separati tagħha għall-ewwel darba qabel jew wara ma' tagħmel hekk għall-prospetti finanzjarji konsolidati tagħha, din għandha tivvaluta l-attiv u l-passiv tagħha fl-istess ammonti fiż-żewġ prospetti finanzjarji, ħlief fil-każ ta' aġġustamenti meħtieġa minħabba l-konsolidazzjoni.

Eċċezzjonijiet għall-applikazzjoni retroattiva ta' IFRSs oħra

26. Dan l-IFRS jipprojbixxi l-applikazzjoni retroattiva ta' xi aspetti ta' IFRSs oħra li għandhom x'jaqsmu ma':

(a) l-attiv u l-passiv finanzjarju li ma jibqax rikonoxxut bħala tali (paragrafu 27);

(b) il-kontabbilità dwar l-ilqugħ (paragrafi 28 sa 30); u

(ċ) l-estimi (paragrafi 31 sa 34).

Attiv u passiv finanzjarju li ma jibqax rikonoxxut bħala tali

27. Min jadottahom għall-ewwel darba għandu japplika l-ħtiġiet biex dawn ma jibqgħux rikonoxxuti bħala tali f'IAS 39 Strumenti Finanzjarji: Rikonoxximent u Valutazzjoni b'mod prospettiv mid-data effettiva ta' l-IAS 39. Fi kliem ieħor, jekk min jadottahom għall-ewwel darba ma baqax jirrikonoxxi bħala tali attiv jew passiv finanzjarju skond il-GAAP preċedenti tiegħu f'xi sena finanzjarja li tibda qabel l-1 ta' Jannar 2001, m'għandux jirrikonoxxi dak l-attiv u l-passiv skond l-IFRSs (kemm-il darba dawn ma jikkwalifikawx għar-rikonoxximent bħala riżultat ta' xi fatt jew operazzjoni li sseħħ wara). Iżda, min jadottahom għall-ewwel darba għandu:

(a) jirrikonoxxi kull derivattiv u interess ieħor, bħalma huma drittijiet ta' servizzi jew obbligi ta' servizzi, li nżammu wara l-operazzjoni li biha xi attiv jew passiv ma baqax rikonoxxut bħala tali u li jkunu għadhom jeżistu dakinhar fid-data ta' transizzjoni għall-IFRSs; u

(b) jikkonsolida kull entità mwaqqfa għal għanijiet partikolari (SPEs) li jikkontrolla fid-data ta' transizzjoni għall-IFRSs, ukoll jekk l-iSPEs kienu jeżistu qabel id-data ta' transizzjoni għall-IFRSs jew kellhom attiv finanzjarju jew passiv finanzjarju li ma kienx baqa' rikonoxxut bħala tali skond il-GAAP preċedenti.

Kontabilità dwar l-ilqugħ

28. Kif meħtieġ mill-IAS 39 Strumenti Finanzjarji: Rikonoxximent u Valutazzjoni, fid-data ta' transizzjoni għall-IFRSs, entità għandha:

(a) tivvaluta l-valur ġust ta' kull derivattiv; u

(b) telimina kull telf u qligħ differit li jirriżulta minn derivattivi li kienu ġew irrappurtati skond il-GAAP preċedenti daqslikieku kienu attiv jew passiv.

29. Entità m'għandhiex tirrifletti fil-karta tal-bilanċ tal-bidu tagħha mħejjija skond l-IFRS relazzjoni ta' l-ilqugħ ta' tip li ma jikkwalifikax bħala kontabilità dwar l-ilqugħ skond l-IAS 39 (per eżempju, ħafna relazzjonijiet ta' l-ilqugħ fejn l-istrument ta' l-ilqugħ huwa strument ta' flus kontanti jew id-dritt ta' għażla bil-miktub; fejn l-element ta' l-ilqugħ ikun f'pożizzjoni netta; jew fejn l-ilqugħ jagħmel tajjeb għar-riskju fl-imgħax ta' investiment li jrid jinżamm sad-data tal-maturità tiegħu). Iżda, jekk entità indikat pożizzjoni netta bħala element ta' l-ilqugħ skond il-GAAP preċedenti, hija tista' tinnomina element individwali f'dik il-pożizzjoni netta bħala oġġett ta' l-ilqugħ skond l-IFRSs, iżda dan ma tistax tagħmlu aktar tard minn dakinhar tad-data tal-passaġġ għall-IFRSs.

30. Entità għandha tapplika d-dispożizzjonijiet transitorji ta' l-IAS 39 għal kull relazzjoni ta' ilqugħ oħra li kienet teżisti dakinhar tad-data ta' transizzjoni għall-IFRSs.

Estimi

31. L-estimi ta' entità skond l-IFRSs fid-data ta' transizzjoni għall-IFRSs għandhom ikunu konsistenti ma' l-estimi li jkunu saru għall-istess data skond il-GAAP preċedenti (wara li jkunu saru l-aġġustamenti meħtieġa biex jirriflettu kull differenza fil-politika dwar il-kontabilità), sakemm ma jkunx hemm evidenza oġġettiva li dawk l-istimi kien fihom xi żball.

32. Entità tista' tirċievi informazzjoni wara d-data ta' transizzjoni għall-IFRSs dwar estimi li hija kienet għamlet skond il-GAAP preċedenti. Skond il-paragrafu 31, entità għandha titratta l-irċevuta ta' dik l-informazzjoni bl-istess mod ta' xi fatt li ma jeħtieġ ebda aġġustament wara d-data tal-karta tal-bilanċ skond l-IAS 10 Fatti Wara d-Data tal-Karta tal-Bilanċ. Per eżempju, nassumu li d-data ta' transizzjoni għall-IFRSs ta' entità hija l-1 ta' Jannar 2004 u li informazzjoni ġdida fil-15 ta' Lulju 2004 teħtieġ reviżjoni ta' l-istima magħmula skond il-GAAP preċedenti fil-31 ta' Diċembru 2003. L-entità m'għandiex tirrifletti dik l-informazzjoni ġdida fil-karta tal-bilanċ tal-bidu tagħha mħejjija skond l-IFRS (sakemm l-estimi ma jkollhomx bżonn ta' aġġustamenti għal xi differenzi fil-politika dwar il-kontabilità jew hemm evidenza oġġettiva li l-istimi kien fihom xi żball). Minflok, l-entità għandha tirrifletti dik l-informazzjoni ġdida fil-dikjarazzjoni tad-dħul (jew, jekk xieraq, f'xi bidliet oħra fil-valur propjetarju) għas-sena li tintemm fil-31 ta' Diċembru 2004.

33. Entità jista' jkollha l-bżonn tagħmel estimi skond l-IFRSs fid-data ta' transizzjoni għall-IFRSs li ma kienux meħtieġa f'dik id-data skond il-GAAP preċedenti. Biex tinkiseb konsistenza ma' l-IAS 10, dawk l-estimi skond l-IFRSs għandhom jirriflettu l-kondizzjonijiet li kienu jeżistu fid-data ta' transizzjoni għall-IFRSs. B'mod partikolari, l-estimi fid-data ta' transizzjoni għall-IFRSs ta' prezzijiet tas-suq, rati ta' imgħax jew ta' rati tal-kambju għandhom jirriflettu il-kondizzjonijiet tas-suq f'dik id-data.

34. Il-paragrafi 31 sa 33 japplikaw għall-karta tal-bilanċ tal-bidu mħejjija skond l-IFRS. Dawn japplikaw ukoll għal perjodu komparattiv ippreżentat fl-ewwel prospetti finanzjarji ta' entità mħejjija skond l-IFRS, f'liema każ kull referenza għad-data ta' transizzjoni għall-IFRSs għandha tkun sostitwita b'referenzi għal tmiem dak il-perjodu komparattiv.

PREŻENTAZZJONI U GĦOTI TA' INFORMAZZJONI

35. Dan l-IFRS ma jagħti ebda eżenzjoni mill-ħtiġiet ta' preżentazzjoni u għoti ta' informazzjoni f'IFRSs oħra.

Informazzjoni Komparattiva

36. Biex jitħares l-IAS 1 Preżentazzjoni ta' Prospetti finanzjarji, l-ewwel prospetti finanzjarji ta' entità mħejjija skond l-IFRS għandhom jinkludu informazzjoni komparattiva għal ta' l-inqas sena skond l-IFRSs.

37. Xi entitajiet jippreżentaw summarji storiċi ta' data magħżula għal perjodi ta' qabel l-ewwel perjodu li għalih jippreżentaw l-informazzjoni komparattiva sħiħa taħt l-IFRSs. Dan l-IFRS ma jeħtieġx taqsiriet bħal dawn biex ikun hemm konformità mal-ħtiġiet ta' rikonoxximent u ta' valutazzjoni tal-IFRSs. Barra minn dan, xi entitajiet jippreżentaw informazzjoni komparattiva skond il-GAAP preċedenti kif ukoll l-informazzjoni komparattiva mitluba mill-IAS 1. Fil-prospetti finanzjarji kollha li jkun fihom taqsiriet storiċi jew informazzjoni komparattiva skond il-GAAP preċedenti, entità għandha:

(a) tindika b'mod ċar li l-informazzjoni skond il-GAAP preċedenti bħala li ma kinitx imħejjija skond l-IFRSs; u

(b) turi n-natura ta' l-aġġustamenti prinċipali li jġibuha konformi ma' l-IFRSs. Entità m'għandhiex għalfejn tikkwantifika dawk l-aġġustamenti.

Spjegazzjoni tat-transizzjoni għall-IFRSs

38. Entità għandha tispjega kif it-transizzjoni mill-GAAP preċedenti għall-IFRSs affettwat il-pożizzjoni finanzjarja rappurtata tagħha, l-prestazzjoni finanzjarja tagħha u d-dħul u l-ħruġ tal-flus tagħha.

Rikonċiljazzjonijiet

39. Biex tkun konformi mal-paragrafu 38, l-ewwel prospetti finanzjarji ta' entità mħejjijin skond l-IFRS għandhom jinkludu:

(a) ir-rikonċiljazzjonijiet tal-valur proprjetarju tagħha hekk kif irrappurtata skond il-GAAP preċedenti mal-valur propjetarju tagħha skond l-IFRSs għaż-żewġ dati li ġejjin:

(i) id-data ta' transizzjoni għall-IFRSs; u

(ii) it-tmiem ta' l-aktar perjodu reċenti ppreżentat fil-prospetti finanzjarji l-aktar reċenti ta' entità skond il-GAAP preċedenti;

(b) ir-rikonċiljazzjoni tal-qligħ jew telf irrappurtat skond il-GAAP preċedenti għall-perjodu l-aktar reċenti fil-prospetti finanzjarji annwali ta' entità mal-qligħ jew telf tagħha skond l-IFRSs għall-istess perjodu; u

(ċ) jekk l-entità rikonoxxiet jew qalbet xi telf kawżat mit-tħassir għall-ewwel darba fit-tħejjija tal-karta tal-bilanċ tal-bidu tagħha skond l-IFRS, l-għoti ta' informazzjoni li kien ikun hemm bżonn skond l-IAS 36 Taħsir ta' l-Attiv kieku l-entità rikonoxxiet dak it-telf kawżat mit-tħassir jew it-taqlib magħmul fil-perjodu li jibda bid-data ta' transizzjoni għall-IFRSs.

40. Ir-rikonċiljazzjonijiet meħtieġa mill-paragrafu 39(a) u (b) għandhom jagħtu dettalji biżżejjed biex l-utenti jkunu jistgħu jifhmu l-aġġustamenti materjali magħmula lill-karta tal-bilanċ u lill-prospett tad-dħul. Jekk entità ppreżentat prospett tad-dħul u l-ħruġ tal-flus skond il-GAAP preċedenti tagħha, għandha tispjega ukoll l-aġġustamenti materjali magħmula lill-prospett tad-dħul u l-ħruġ tal-flus.

41. Jekk entità ssir konxja ta' xi żbalji magħmula skond il-GAAP preċedenti, ir-rikonċiljazzjonijiet mitluba mill-paragrafi 39(a) u (b) għandhom jiddistingwu l-korrezzjoni ta' dawk l-iżbalji minn bidliet fil-politika dwar il-kontabilità.

42. L-IAS 8 Qligħ jew Telf Net għall-Perjodu, Żbalji Fundamentali u Bidliet fil-Politika dwar il-Kontabilità ma jirrigwardax bidliet fil-politika dwar il-kontabilità li jseħħu meta entità tadotta l-IFRSs għall-ewwel darba. Għalhekk, il-ħtiġiet ta' l-IAS 8 biex ikunu żvelati l-bidliet fil-politika dwar il-kontabilità ma japplikawx għall-ewwel prospetti finanzjarji ta' entità mħejjija skond l-IFRS.

43. Jekk entità ma kinitx ippreżentat prospetti finanzjarji għal perjodi preċedenti, l-ewwel prospetti finanzjarji tagħha skond l-IFRS għandhom jiżvelaw dak il-fatt.

Użu tal-valur ġust bħala l-valur preżunt

44. Jekk entità tuża valur ġust fil-karta tal-bilanċ tal-bidu tagħha mħejjija skond l-IFRS bħala valur preżunt ta' xi element ta' proprjetà, impjant u tagħmir, proprjetà ta' investiment jew xi attiv intanġibbli (ara paragrafi 16 u 18), l-ewwel prospetti finanzjarji ta' entità mħejjija skond l-IFRS għandhom jiżvelaw, għal kull element f'linja tal-karta tal-bilanċ tal-bidu mħejjija skond l-IFRS:

(a) l-aggregat ta' dawk il-valuri ġusti; u

(b) l-aġġustament aggregat magħmul fil-valuri kontabbli rrappurtati skond il-GAAP preċedenti.

Rapporti Finanzjarji Proviżorji

45. Biex tkun konformi mal-paragrafu 38, jekk entità tippreżenta rapport finanzjarju temporanju skond l-IAS 34 Rappurtagg Finanzjarju Temporanju għal parti mill-perjodu kopert mill-ewwel prospetti finanzjarji tagħha mħejji skond l-IFRS, l-entità għandha tissoddisfa il-ħtiġiet li ġejjin minbarra l-ħtiġiet ta' l-IAS 34:

(a) Kull rapport finanzjarju temporanju ta' dan it-tip għandu, jekk l-entità tkun ippreżentat rapport finanzjarju temporanju għall-perjodu temporanju paragunabbli tas-sena finanzjarja immedjatament preċedenti, jinkludi r-rikonċiljazzjonijiet ta':

(i) il-valur propjetarju tagħha skond il-GAAP preċedenti fi tmiem tal-perjodu temporanju paragunabbli mal-valur propjetarju tagħha skond l-IFRSs f'dik id-data; u

(ii) il-qligħ jew it-telf tagħha skond il-GAAP preċedenti għall-perjodu temporanju paragunabbli (kurrenti u ta' sena mid-data) mal-qligħ jew telf tagħha skond l-IFRSs għal dak il-perjodu.

(b) Minbarra r-rikonċiljazzjonijiet mitluba minn (a), l-ewwel rapport finanzjarju temporanju ta' entità skond l-IAS 34 għal parti mill-perjodu kopert mill-ewwel prospetti finanzjarji tagħha mħejjija skond l-IFRS għandu jinkludi r-rikonċiljazzjonijiet deskritti fil-paragrafu 39(a) u (b) (supplimentati bid-dettalji mitluba mill-paragrafi 40 u 41) jew referenza inkroċjata għal xi dokument ippubblikat ieħor li jinkludi fih dawn ir-rikonċiljazzjonijiet.

46. L-IAS 34 jeħtieġ għoti ta' informazzjoni minimu, bażat fuq l-assunzjoni li l-utenti tar-rapport finanzjarju temporanju għandhom ukoll aċċess għall-aktar prospetti finanzjarji annwali reċenti. Iżda, l-IAS 34 jeħtieġ ukoll li entità tagħti informazzjoni fuq "kull fatt jew operazzjoni li hija materjali biex jinftiehem il-perjodu temporanju kurrenti". Għalhekk, jekk min adottah għall-ewwel darba ma tax, fl-iktar prospetti finanzjarji annwali reċenti skond il-GAAP preċedenti, informazzjoni materjali biex jinftiehem il-perjodu temporanju kurrenti, ir-rapport finanzjarju temporanju tiegħu għandu jagħti dik l-informazzjoni jew jinkludi referenza inkroċjata għal xi dokument ippubblikat ieħor li jinkludiha.

DATA EFFETTIVA

47. Entità għandha tapplika dan l-IFRS jekk l-ewwel prospetti finanzjarji tagħha mħejjija skond l-IFRS huma għal perjodu li jibda dakinhar ta' jew wara l-1 ta' Jannar 2004. Applikazzjoni aktar bikrija hija mħeġġa. Jekk l-ewwel prospetti finanzjarji ta' entità mħejjija skond l-IFRS huma għal perjodu li jibda qabel l-1 ta' Jannar 2004 u l-entità tapplika dan l-IFRS minflok is-SIC-8 Applikazzjoni għall-Ewwel Darba ta' l-IASs bħala l-Bażi Primarja għall-Kontabilità, hija għandha tiżvela dak il-fatt."

Appendiċi A

Termini Mfissra

Dan l-appendiċi huwa parti integrali mill-IFRS.

data ta' transizzjoni għall-IFRSs | Il-bidu ta' l-iktar perjodu reċenti li għalih entità tippreżenta l-informazzjoni komparattiva sħiħa taħt l-IFRSs fl-ewwel prospetti finanzjarji tagħha mħejji skond l-IFRS. |

valur preżunt | Ammont użat minflok il-valur jew il-valur deprezzata f'data partikolari. Id-deprezzament jew amortizzament sussegwenti jassumi li l-entità kienet inizjalment irrikonoxxiet l-attiv jew il-passiv fid-data partikolari u li l-valur tiegħu kien daqs il-valur preżunt. |

valur ġust | L-ammont li għalih jista' jiġi skambjat xi attiv, jew li bih jitħallas xi passiv, bejn partijiet li għandhom l-għarfien u r-rieda meħtieġa biex iwettqu operazzjoni bejniethom. |

l-ewwel prospetti finanzjarji mħejjija skond l-IFRS | L-ewwel prospetti finanzjarji annwali ta' entità li tadotta l-IStandards Internazzjonali għar-Rappurtaġġ Finanzjarju (IFRSs), permezz ta' dikjarazzjoni espliċita u mingħajr ebda riserva ta' konformità ma' l-IFRSs. |

min jadottahom għall-ewwel darba | Entità li tippreżenta l-ewwel prospetti finanzjarji tagħha skond l-IFRS. |

Standards Internazzjonali ta' Rappurtaġġ Finanzjarju (IFRSs) | L-IStandards u l-Interpretazzjonijiet adottati mill-Bord ta' l-Istandards Internazzjonali tal-Kontabilità (IASB). Dawn jinkludu: (a)l-IStandards Internazzjonali ta' Rappurtaġġ Finanzjarju;(b)l-IStandards Internazzjonali dwar il-Kontabilità; u(ċ)Interpretazzjonijiet li joriġinaw mill-Kumitat Internazzjonali għall-Interpretazzjoni ta' Rappurtaġġ Finanzjarji (IFRIC) jew mill-entita ta' qablu, l-Kumitat Permanenti ta' l-Interpretazzjonijiet (SIC), u adottati mill-IASB. |

il-karta tal-bilanċ tal-bidu mħejjija skond l-IFRS | Il-karta tal-bilanċ ta' entità (ippubblikata jew le) fid-data ta' transizzjoni għall-IFRSs. |

il-GAAP preċedenti | Il-bażi tal-kontabilità li min jadotta l-IFRS għall-ewwel darba kien uża eżatt qabel l-adozzjoni ta' l-IFRSs. |

data ta' rappurtaġġ | It-tmiem ta' l-aktar perjodu riċenti kopert minn prospetti finanzjarji jew minn rapport finanzjarju temporanju. |

Appendiċi B

Shubija ta' negozji

Dan l-appendiċi huwa parti integrali mill-IFRS.

B1. Min jadottahom għall-ewwel darba jista' jagħżel li ma japplikax l-IAS 22 Shubija ta' Negozji b'mod retroattiv għal shubija ta' negozji imgħoddija (shubija ta' negozji li seħħet qabel id-data ta' transizzjoni għall-IFRSs). Iżda, jekk min jadottahom għall-ewwel darba jerġa' jiddikkjara xi kombinazzjoni ta' negozji biex iħares l-IAS 22, għandu jerġa' hekk jiddikkjara kull kombinazzjoni ta' negozji li seħħet wara. Per eżempju, jekk min jadottahom għall-ewwel darba jagħżel li jerġa' jiddikjara kombinazzjoni ta' negozji li seħħet fit-30 ta' Ġunju 2002, għandu jerġa' jiddikjara l-ishubiji ta' negozji kollha li kienu seħħew bejn it-30 ta' Ġunju 2002 u d-data ta' transizzjoni għall-IFRSs.

B2. Jekk min jadottahom għall-ewwel darba ma japplikax l-IAS 22 b'mod retroattiv għal xi kombinazzjoni ta' negozji imgħoddija, dan ikollu il-konsegwenzi li ġejjin fuq dik il-kombinazzjoni ta' negozji:

(a) Min jadottahom għall-ewwel darba għandu jżomm l-istess klassifikazzjoni (bħala akkwist mill-akkwirent legali, akkwist bl-invers minn min seta' legalment jiddisponi minnu, jew bħala unjoni ta' interessi) bħal fil-prospetti finanzjarji preċedenti tiegħu skond il-GAAP.

(b) Min jadottahom għall-ewwel darba għandu jirrikonoxxi l-attiv u l-passiv kollu tiegħu fid-data ta' transizzjoni għall-IFRSs li kienu akkwistati jew assunti f'xi taħid ta' negozji imgħoddija, barra minn:

(i) xi attiv finanzjarju u passiv finanzjarju li ma kienx rikonoxxut bħala tali skond il-GAAP preċedenti (ara l-paragrafu 27); u

(ii) l-attiv, inkluż l-avvjament, u l-passiv li ma kinux rikonoxxuti fil-karta tal-bilanċ konsolidata ta' l-akkwirent skond il-GAAP preċedenti u li wkoll ma kinux jikkwalifikaw biex jiġu rikonoxxuti skond l-IFRSs fil-karta tal-bilanċ separata ta' min iddispona minnu (ara paragrafi B2(f) sa B2(i)).

Min jadottahom għall-ewwel darba għandu jirrikonoxxi kull bidla li tirriżulta billi jaġġusta il-qligħ miżmum (jew, jekk xieraq, xi kategorija oħra tal-valur proprjetarju), kemm-il darba l-bidla tirriżulta mir-rikonoxximent ta' xi beni immaterjali li qabel kien inkluż fl-avvjament (ara paragrafu B2(g)(i)).

(ċ) Min jadottahom għall-ewwel darba għandu jeskludi mill-karta tal-bilanċ tal-bidu tiegħu mħejjija skond l-IFRS kull element rikonoxxut skond il-GAAP preċedenti li ma jikkwalifikax biex jiġi rikonoxxut bħala attiv jew passiv skond l-IFRSs. Min jadottahom għall-ewwel darba għandu jagħti rendikont għal bidliet li seħħew kif ġej:

(i) min jadottahom għall-ewwel darba jista' jkun ikklassifika shubija ta' negozji mgħoddija bħala akkwist u rikonoxxa bħala attiv intanġibbli element li ma jikkwalifikax biex jiġi rikonoxxut bħala attiv skond l-IAS 38 Attiv Intanġibbli. Huwa għandu jerġa' jikklassifika dak l-element (u, jekk ikun hemm, it-taxxa diferita u l-interessi minoritarji relattati) bħala parti mill-avvjament (kemm-il darba l-valur ta' l-azjenda ma tnaqqasx direttament tal-komponent tal-valur propjetarju skond il-GAAP preċedenti, ara l-paragrafu B2(g)(i) u B2(i)).

(ii) min jadottahom għall-ewwel darba għandu jirrikonoxxi kull tibdil ieħor li jirriżulta fil-qligħ miżmum [1].

(d) IFRSs jeħtieġu l-valutazzjoni sussegwenti ta' xi attiv u passiv fuq bażi li m'hix ibbażata fuq il-valur oriġinali, bħalma huwa l-valur ġust. Min jadottahom għall-ewwel darba għandu jivvaluta dan l-attiv u l-passiv fuq dik il-bażi fil-karta tal-bilanċ tal-bidu tiegħu mħejjija skond l-IFRS, ukoll jekk kienu ġew akkwistati jew assunti fi shubija ta' negozji mgħoddija. Huwa għandu jirrikonoxxi kull tibdil li jirriżulta fl-valuri kontabbli billi jaġġusta l-qligħ miżmum (jew, jekk xieraq, xi kategorija oħra tal-valur proprjetarju), minflok l-avvjament.

(e) Immedjatament wara l-ishubija ta' negozji, l-valur kontabbli skond il-GAAP preċedenti għall-attiv akkwistat u għall-passiv assunt f'dik l-isubija ta' negozji għandhom jitqiesu bħala l-valur preżunt tagħhom skond l-IFRSs f'dik id-data. Jekk l-IFRSs jeħtieġu valutazzjoni fuq il-bażi tal-valur ta' dak l-attiv u ta' dak il-passiv f'data aktar ‘il bogħod, dak il-valur preżunt għandu jkun il-bażi tad-deprezzament jew ammotizzazzjoni magħmul fuq il-bażi tal-valur mid-data ta‘ l-ishubija ta' negozji.

(f) Jekk xi attiv akkwistat, jew xi passiv assunt, f'xi shubija ta' negozji mgħoddija ma kienx rikonoxxut skond il-GAAP preċedenti, ma għandhux valur preżunt ta' żero fil-karta tal-bilanċ tal-bidu mħejjija skond l-IFRS. Minflok, l-akkwirent għandu jirrikonoxxih u jivvalutah fil-karta tal-bilanċ ikkonsolidata tiegħu fuq il-bażi li l-IFRSs tapplika għall-karta tal-bilanċ separata ta' min iddispona minnu. Biex nispjegaw: jekk akkwirent ma kienx, skond il-GAAP preċedenti tiegħu, ikkapitalizza l-kirjiet finanzjarji akkwistati fl-ishubija ta' negozji mgħoddija, għandu jikkapitalizza dawk il-kirjiet fil-prospetti konsolidati tiegħu, l-istess bħalma kieku l-IAS 17 Kirjiet jeħtieġ li min iddispona minnhom jagħmel fil-karta tal-bilanċ tiegħu mħejjija skond l-IFRS. Bil-kontra, jekk xi attiv jew passiv kien inkluż fl-avvjament skond il-GAAP preċedenti imma kieku kien jigi rikonoxxut separatament skond l-IAS 22, dak l-attiv jew passiv jibqa' inkluż fl-avvjament kemm-il darba l-IFRSs ma jeħtieġux ir-rikonoxximent tiegħu fir-rendikonti separati ta' min iddispona minnu.

(g) Il-valur kontabbli ta' l-avvjament fil-karta tal-bilanċ tal-bidu mħejjija skond l-IFRS għandu jkun il-valur kontabbli tiegħu skond il-GAAP preċedenti fid-data ta' transizzjoni għall-IFRSs, wara li jsiru t-tliet aġġustamenti li ġejjin:

(i) Jekk mitlub mill-paragrafu B2(ċ)(i) hawn fuq, min jadottahom għall-ewwel darba għandu jżid lil-valur kontabbli ta' avvjament meta jirriklassifika xi element li kien irrikonoxxa bħala beni immaterjali skond il-GAAP preċedenti. Bl-istess mod, jekk il-paragrafu B2(f) jeħtieġ lil min jadottahom għall-ewwel darba li jirrikonoxxi xi beni immaterjali li kien inkluż fl-avvjament skond il-GAAP preċedenti, min jadottahom għall-ewwel darba għandu jnaqqas il-valur kontabbli fl-avvjament kif meħtieġ (u, jekk ikun applikabbli, jaġġusta t-taxxa diferita u l-interessi tal-minoranzi).

(ii) Kontinġenza li taffetwa l-ammont tal-prezz tax-xiri ta' l-ishubija ta' negozji imgħoddija tista' tkun ġiet rizolta qabel id-data ta' transizzjoni għall-IFRSs. Jekk tkun tista' ssir stima affidabbli ta' l-aġġustament ta' kontinġenza u l-pagament tagħha huwa probabbli, min jadottahom għall-ewwel darba għandu jaġġusta l-avvjament b'dak l-ammont. Bl-istess mod, min jadottahom għall-ewwel darba għandu jaġġusta l-valur kontabbli bħala l-avvjament jekk aġġustament ta' kontinġenza rikonoxxut qabel ma jistax jiġi valutat aktar b'mod ta' min joqgħod fuqu jew jekk il-ħlas tiegħu m'għadux probabbli.

(iii) Irripsettivament minn jekk hemmx xi indikazzjoni li l-avvjament jistax jkun imħassar, min jadottahom għall-ewwel darba għandu japplika l-IAS 36 Taħsir ta' l-Attiv biex jittestja l-avvjament għal xi tħassir fid-data ta' transizzjoni għall-IFRSs u fir-rikonoxximent ta' kull telf minħabba tħassir fil-qligħ miżmum (jew, jekk ikun hekk mitlub mill-IAS 36, fil-bqija riżultanti minn rivalutazzjoni). Il-test għat-tħassir għandu jibbaża fuq il-kondizzjonijiet preżenti fid-data ta' transizzjoni għall-IFRSs.

(h) Ebda aġġustament ieħor m'għandu jsir lill-valur kontabbli ta' avvjament fid-data ta' transizzjoni għall-IFRSs. Per eżempju, min jadottahom għall-ewwel darba m'għandux jerġa' jiddikjara l-valur kontabbli ta' avvjament:

(i) biex jeskludi r-riċerka u l-iżvilupp għaddejjin akkwistati f'dik l-ishubija ta' negozji (kemm-il darba l-beni immaterjali involut ma kienx jikkwalifika għar-rikonoxximent skond l-IAS 38 fil-karta tal-bilanċ separata tas-soċjetà akkwistata);

(ii) biex jaġġusta ammortizzazzjoni preċedenti ta' l-avvjament;

(iii) biex jitħassru aġġustamenti ta' l-avvjament li l-IAS 22 ma jippermettix, iżda li saru skond il-GAAP preċedenti minħabba aġġustamenti lill-attiv u lill-passiv bejn id-data tal-kombinazzjoni ta' negozji u d-data ta' transizzjoni għall-IFRSs.

(i) Jekk min jadottahom għall-ewwel darba kien irrikonoxxa l-avvjament skond il-GAAP preċedenti bħala tnaqqis tal-komponent tal-valur proprjetarju:

(i) m'għandux jirrikonoxxi dak l-avvjament fil-karta tal-bilanċ tal-bidu tiegħu mħejjija skond l-IFRS. Barra minn dan, dak l-avvjament m'għandux jiġi trasferit fil-prospett tad-dħul jekk huwa jiddisponi mill-kumpannija sussidjarja jew jekk l-investiment fil-kumpannija sussidjarja jitħassar;

(ii) aġġustamenti li jirriżultaw minn risoluzzjoni sussegwenti ta' kontingenza li taffetwa l-prezz tax-xiri għandhom jitqiesu bħala qligħ miżmum.

(j) Min jadottahom għall-ewwel darba seta' ma kienx ikkonsolida, skond il-GAAP preċedenti tiegħu, kumpannija sussidjarja akkwistata fi shubija ta' negozji (per eżempju, minħabba li l-kumpannija omm ma kinitx tqisha bħala kumpannija sussidjarja skond il-GAAP preċedenti jew ma kinitx lestiet prospetti finanzjarji konsolidati). Min jadottahom għall-ewwel darba għandu jaġġusta l-valuri kontabbli ta' l-attiv u passiv tal-kumpannija sussidjarja għall-ammonti li l-IFRSs ikunu jeħtieġu fil-karta tal-bilanċ separata tal-kumpannija sussidjarja. Il-valur preżunt ta' l-avvjament huwa daqs id-differenza fid-data ta' transizzjoni għall-IFRSs bejn:

(i) l-interess tal-kumpannija omm f'dawk l-valuri kontabbli aġġustati; u

(ii) il-valur ta' l-investiment tal-kumpannija omm fil-kumpannija sussidjarja preżenti fil-prospetti finanzjarji separati tagħha.

(k) Il-valutazzjoni ta' l-interessi tal-minoranzi u tat-taxxa diferita ssegwi mill-valutazzjoni ta' attiv u passiv oħra. Għalhekk, l-aġġustamenti ta' hawn fuq lill-attiv u lill-passiv rikonoxxuti jaffetwaw l-interessi tal-minoranzi u t-taxxa diferita.

B3. L-eżenzjoni għall-ishubija ta' negozji mgħoddija tapplika ukoll għal akkwisti, fl-imghoddi, ta' investimenti f'assoċjati jew ta' xi interess f'joint ventures.

B4. Barra minn dan, id-data magħżula fil-paragrafu B1 tapplika ukoll għal kull akkwist ieħor bħal dan.

Appendiċi Ċ

Emendi għal IFRSs oħra

L-emendi f'dan l-appendiċi japplikaw għal prospetti finanzjarji annwali li jkopru l-perjodi li jibdew dakinhar jew wara l-1 ta' Jannar 2004. Jekk entità tapplika dan l-IFRS għal xi perjodu aktar bikri, dawn l-emendi japplikaw għal dak il-perjodu bikri.

C1 Dan l-IFRS jieħu post is-SIC-8 Applikazzjoni għall-ewwel darba ta' l-IASs bħala l-Bażi Primarja tal-Kontabilità.

C2 Dan l-IFRS jemenda l-paragrafu 172(h) ta' l-IAS 39 Strumenti Finanzjarji: Rikonoxximent u Valutazzjoni biex jidher kif ġej:

"(h) jekk securitisation, trasferiment, jew xi operazzjoni oħra li permezz tagħha xi attiv jew passiv ma jibqax rikonoxxut bħala tali inbdiet qabel il-bidu tas-sena finanzjarja li fiha dan l-IStandard huwa applikat inizjalment, il-kontabilità ta' dik l-operazzjoni m'għandiex tinbidel retroattivament biex tħares il-ħtiġiet ta' dan l-IStandard. Iżda, dan ma jeżentax lil min jittrasferixxi mill-ħtiġiet:

(i) li jirrikonoxxi kull derivattiv jew interess ieħor, bħal drittijiet għal servizzi jew tal-qadi tal-passiv, miżmuma wara dik l-operazzjoni li jikkwalifikaw għar-rikonoxximent taħt dan l-IStandard jew xi IFRSs oħra; u

(ii) li jikkonsolida l-entitajiet ta' għanijiet speċjali kollha kontrollati minn min jittrasferixxi (ara s-SIC-12 Konsolidazzjoni-Entitajiet ta' Għanijiet Speċifiċi)."

[1] Tali bidliet jinkludu riklassifikazzjonijiet minn jew għal attiv intanġibbli jekk l-avvjament ta' azjenda ma kienx rikonoxxut bħala attiv taħt il-GAAP preċedenti bħala attiv. Dan iseħħ jekk taħt il-GAAP preċedenti, l-entità (a) naqqset l-avvjament direttament mill-valur propjetarju jew (b) ma trattatx il-kombinazzjoni ta' negozji bħala akkwist.

--------------------------------------------------