32002R2181

Ir-Regolament tal-Kummissjoni (KE) Nru 2181/2002

tas-6 ta’ Diċembru 2002

li jemenda r-Regolament (KE) Nru 1239/95 li jistabbilixxi regoli ta’ implimentazzjoni għall-applikazzjoni tar-Regolament tal-Kunsill (KE) Nru 2100/94 dwar proċeduri quddiem l-Uffiċċju tal-Komunità għall-Varjetajiet ta’ Pjanti

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jitstabbilixxi l-Komunità Ewropea,

Wara li kkunsidrat ir-Regolament tal-Kunsill (KE) Nru 2100/94 tas-27 ta’ Lulju 1994 dwar id-drittijiet fil-Komunità fuq varjetajiet ta’ pjanti [1], kif l-aħħar emendat mir- Regolament (KE) Nru 2506/95 [2], u b’mod partikolari l-Artikolu 114 tiegħu,

Billi:

(1) L-Uffiċċju tal-Komunità għall-Varjetajiet ta’ Pjanti (l-Uffiċċju) imwaqqaf bir-Regolament (KE) Nru 2100/94 jimplimenta u japplika l-iskema għall-ħarsien tad-drittijiet dwar il-varjetajiet tal-pjanti.

(2) Ir-regoli dwar l-azzjonijiet quddiem l-Uffiċċju huma mniżżla fir-Regolament tal-Kummissjoni (KE) Nru 1239/95 [3], kif emendat bir-Regolament (KE) Nru 448/96 [4]. L-Artikolu 27 ta’ dak ir-Regolament ħaseb biex rapporti dwar l-eżamijiet magħmula taħt ir-responsabbiltà ta’ l-awtorijiet ta’ Stat Membru jew pajjiż terz li huwa Membru ta’ l-Unjoni Internazzjonali dwar il-Ħarsien ta’ Varjetajiet Ġodda ta’ Pjanti (UPOV) jista’ jkun ikkunsidrat bażi suffiċjenti għal deċiżjoni. L-Artikolu 27 kien madankollu provvediment temporanju li ma baqax effettiv wara t-30 ta’ Ġunju 1998.

(3) L-intenzjoni li jiġi applikat l-Artikolu 27 tar-Regolament (KE) Nru 1239/95 fuq bażi temporanja biex jinbena sistema indipendenti tal-Komunità, bl-Uffiċċju jieħu ħsieb għall-eżami tekniku tal-varjetajiet sottomessi ma’ l-applikazzjoni għall-ħarsien tal-varjetà tal-pjanti. L-esperjenza ta’ l-Uffiċċju madankollu wera l-ħtieġa biex jiġu kkunsidrati rapporti oħra ta’ l-eżamijiet kif speċifikat fl-Artikolu 27.

(4) Il-maġġoranza tad-drittijiet dwar il-varjetajiet tal-pjanti fil-Komunità mogħtija wara t-30 ta’ Ġunju 1998 kienu bbażati fuq deċiżjonijiet f’ konsiderazzjoni ta’ l-ezamijiet tekniċi li saru taħt ir-risponsabbiltà ta’ awtoritajiet minbarra dan l-Uffiċċju, li pprovdew għotjiet f’suq kompetittiv ħafna.

(5) Għalhekk jeħtieġ li jiġu regolarizzati d-drawwiet ta’ l-Uffiċċju mill-1 ta’ Lulju 1998. Fl-istess ħin, il-possibiltà li jiġi applikat l-Artikolu 27 fil-ġejjieni għandha tibqa’ miftuħa. Ir-Regolament (KE) Nru1239/95 għandu għalhekk jiġi emendat b’effett mill-1 ta’ Lulju 1998.

(6) L-Uffiċċju tal-Kunsill Amministrattiv tal-Komunità Dwar il-Varjetajiet tal-Pjanti ġie ikkonsultat.

(7) Il-miżuri taħt dan ir-Regolament huma skond l-opinjoni tal-Kumitat Permanenti għad-Drittijiet dwar il-Varjetajiet tal-Pjanti,

ADOTTAT DAN IR-REGOLAMENT:

L-Artikolu 1

Ir-Regolament (KE) Nru 1239/95 huwa emendat kif ġej:

1. L-Artikolu 27 għandu jkun sostitwit b’dan li ġej:

"L-Artikolu 27

Rapporti oħra dwar l-eżamijiet

1. Rapport ta’ eżamijiet fuq ir-riżultati ta’ testijiet tekniċi li jkunu saru jew li jkunu għadhom isiru għal raġunijiet uffiċjali fi Stat Membru minn wieħed mill-uffiċċji responsabbli għall-ispeċi kkonċernati skond l-Artikolu 55(1) tar-Regolament Bażiku jista’ jkun ikkunsidrat mill-Uffiċċju li jikkostitwixxi bażi suffiċjenti għal deċiżjoni, jekk:

- il-materjal sottomess għal test tekniku jkun ikkonforma, fil-kwantità u fil-kwalità, ma’ kull standard stabbilit skond l-Artikolu 55(4) tar- Regolament Bażiku,

- it-test tekniku jkun sar b’mod konsistenti ma’ l-ispeċifikazzjonijiet tal-Kunsill Amministrattiv skond l-Artikolu 55(1) tar-Regolament Bażiku, u jkun sar skond il-linji gwida maħruġa għat-testijiet, fuq istruzzjonijiet ġenerali mogħtija, skond l-Artikolu 56(2) ta’ dak ir-Regolament u l-Artikoli 22 u 23 ta’ dan ir-Regolament,

- l-Uffiċċju kellu l-opportunità jimmonitorja l-mod kif ikun tmexxa l-eżami tekniku kkonċernat, u

- fejn ir-rapport finali mhuwiex immedjatament disponibbli, ir-rapporti temporanji dwar kull perijodu ta’ tkabbir ikunu sottomessi lill-Uffiċċju qabel ir-rapport ta’ l-eżami.

2. Fejn l-Uffiċċju ma jikkunsidrax li r-rapport ta’ l-eżami msemmi fil-paragrafu 1 jikkostitwixxi bażi suffiċjenti għal deċiżjoni, jista’ jsegwi l-proċedura taħt l-Artikolu 55 tar-Regolament, wara konsultazzjoni bejn l-applikant u l-Uffiċċju tat-testijiet ikkonċernat.

3. L-Uffiċċju u kull uffiċċju nazzjonali kompetenti dwar il-varjetà tal-pjanti fi Stat Membru għandu jagħti għajnuna amministrattiva lill-ieħor billi jqiegħed għad-dispożizzjoni tiegħu, jekk ikun mitlub, kwalunkwe rapporti ta’ testijiet fuq xi varjetà, għall-iskop li jiġi stmat il-karattru distintiv, l-uniformità u l-istabilità ta’ dik il-varjetà. Ammont speċifiku għandu jkun mitlub bħala ħlas mill-Uffiċċju jew uffiċċju nazzjonali kompetenti dwar il-varjetà tal-pjanti għas-sottomissjoni ta’ tali rapport, liema ammont ikun miftiehem bejn l-uffiċcji kkonċernati.

4. Rapport ta’ eżamijiet fuq ir-riżultati ta’ testijiet tekniċi li jkunu saru jew li jkunu għadhom isiru għal raġunijiet uffiċjali f’pajjiż terz li huwa Membru ta’ l-Unjoni Internazzjonali dwar il-Ħarsien ta’ Varjetajiet Ġodda ta’ Pjanti jista’ jkun ikkunsidrat mill-Uffiċċju li jikkostitwixxi bażi suffiċjenti għal deċiżjoni, jekk l-ezami tekniku jikkonforma mal-kondizzjonijiet imniżżla fi ftehim bil-miktub bejn l-Uffiċċju u l-awtorità kompetenti ta’ tali pajjiż terz. Dawn il-kondizzjonijiet għandhom għallanqas jinkludu:

- dawk relatati mal-materjal, kif imsemmi fil-paragrafu 1, l-ewwel inċiż,

- li t-test tekniku jkun tmexxa skond il-linji gwida maħruġa għat-testijiet, jew istruzzjonijiet ġenerali mogħtija, skond l-Artikolu 56(2) tar-Regolament Bażiku,

- li l-Uffiċċju kellu l-opportunità jistma kemm kienu adattati l-faċilitajiet biex imexxu test tekniku għall-ispeċi kkonċernata f’dak il-pajjiż terz u jimmonitorja t-tmexxija tat-test tekniku kkonċernat, u

- dawk relatati mad-disponibbilità ta’ rapporti, kif imniżżel fil-paragrafu 1, ir-raba’ inċiż."

2. Fl-Artikolu 95 it-tieni paragrafu huwa mħassar.

L-Artikolu 2

Dan ir-Regolament ghandu jidħol fis-seħħ fil-jum tal-pubblikazzjoni tiegħu fil-Ġurnal Uffiċjali tal-Komunitajiet Ewropej.

Għandu japplika mill-1 ta’ Lulju 1998.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussel, fis-6 ta’ Diċembru 2002.

Għall-Kummissjoni

David Byrne

Membru tal-Kummissjoni

[1] ĠU L 227, ta’ l-1.9.1994, p. 1.

[2] ĠU L 258, tat-28.10.1995, p. 3.

[3] ĠU L 121, ta’ l-1.6.1995, p. 37.

[4] ĠU L 62, tat-13.3.1996, p. 3.

--------------------------------------------------