31997D0545

ID-Deċiżjoni tal-Kummissjoni

tad-9 ta’ Lulju, 1997

dwar regolament tekniku komuni għall-ħtiġiet ġenerali ta’ konnessjoni għal Tagħmir Terminali ta’ Data (DTE) għall-konnessjoni ma’ Networks ta’ Data Pubbliċi bil-Kommutazzjoni tal-Pakkett (PSPDNs) li joffri interfaces tar-Rakkomandazzjoni CCITT X.25

(Test b’rilevanza għall-żEE)

(97/545/KE)

IL-KUMMISSJONI TAL-KOMUNITAJIET EWROPEW,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat id-Direttiva tal-Kunsill 91/263/KEE tad-29 ta’ April 1991 dwar l-approssimazzjoni tal-liġijiet ta’ l-Istati Membri rigward tagħmir terminali tat-telekomunikazzjoni, inkluż r-rikonoxximent reċiproku tal-konformità tagħhom [1], kif emendata bid-Direttiva 93/68/KEE [2], u partikolarment it-tieni inċiż ta’ l-Artikolu 6(2) ta’ din,

Billi l-Kummissjoni adottat il-miżura li tidentifika t-tip ta’ tagħmir terminali li għalih huwa meħtieġ regolament tekniku komuni, kif ukoll id-dikjarazzjoni ta’ l-iskop assoċjata magħha;

Billi għandhom ikunu adottati l-istandards armonizzati korrispondenti, jew partijiet minnhom, li jimplimentaw il-ħtiġiet essenzjali li għandhom jitbiddlu f’regolamenti tekniċi komuni;

Billi biex tkun żgurata l-kontinwità ta’ aċċess għal swieq għal manifatturi, huwa meħtieġ li jkunu stabbiliti disposizzjonijiet ta’ transizzjoni rigward tagħmir approvat skond id-Deċiżjoni tal-Kummissjoni 96/71/KE [3];

Billi d-Deċiżjoni 96/71/KE għandha tkun revokata b’effett mit-tmiem tal-perjodu ta’ transizzjoni;

Billi r-regolament tekniku komuni adottat f’din id-Deċiżjoni huwa bi qbil ma’ l-opinjoni ta’ ACTE,

ADOTTAT DIN ID-DEĊIŻJONI:

Artikolu 1

1. Din id-Deċiżjoni għandha tapplika għal tagħmir terminali ta’data maħsub għall-konnessjoni man-Networks ta’ Data Pubbliċi bil-Kommutazzjoni tal-Pakkett (PSPDNs) għall-interfaces tar-Rakkomandazzjoni CCITT X.25, f’rati ta’ sinjalizzazzjoni ta’ data sa 1920 kbit/s, li jużaw interfaces li joħorġu minn Rakkomandazzjonijiet X.21 u X.21 bis, u li jaqgħu fil-qasam ta’ l-applikazzjoni tal-istandard armonizzat identifikat fl-Artikolu 2(1).

2. Din id-Deċiżjoni tistabbilixxi regolament tekniku komuni li jkopri l-ħtiġiet ġenerali ta’ konnessjoni għal tagħmir terminali li għalih jirreferi l-paragrafu 1.

Artikolu 2

1. Ir-regolament tekniku komuni għandu jinkludi l-istandard armonizzat mħejji mill-korp rilevanti ta’ standardizzazzjoni li jimplimenta safejn ikunu applikabbli l-ħtiġiet essenzjali li għalihom jirreferi l-Artikolu 4(d) u (f) tad-Direttiva 91/263/KEE. Ir-riferenza għal-istandard hija mniżżla fl-Anness.

2. It-tagħmir terminali kopert b’din id-Deċiżjoni għandu jikkonforma mar-regolament tekniku komuni li għalih jirreferi l-paragrafu 1, għandu jilħaq il-ħtiġiet essenzjali li għalihom jirreferi l-Artikolu 4(a) u (b) tad-Direttiva 91/263/KEE, u għandu jilħaq il-ħtiġiet ta’ kull Direttiva oħra applikabbli, partikolarment id-Direttivi tal-Kunsill 73/23/KEE [4] u 89/336/KEE [5].

Artikolu 3

Il-Korpi Notifikati nominati biex iwettqu l-proċeduri li għalihom jirreferi l-Artikolu 9 tad-Direttiva 91/263/KEE għandhom, rigward tagħmir terminali kopert bl-Artikolu 1(1) ta’ din id-Deċiżjoni, jużaw jew jiżguraw l-użu tal-istandard armonizzat li għalih jirreferi l-Artikolu 2(1) l-iktar tard sa żmien sena min-notifika ta’ din id-Deċiżjoni.

Artikolu 4

1. Id-Deċiżjoni 96/71/KEE għandha tkun revokata b’effett mid-data sena wara n-notifika ta’ din id-Direttiva.

2. It-tagħmir terminali, approvat skond id-Direttiva 96/71/KE jista’ jkompli jitqiegħed fis-suq u jitħaddem basta iżda li approvazzjoni bħal din tingħata mhux iktar tard minn sena wara n-notifika ta’ din id-Deċiżjoni.

Artikolu 5

Din id-Deċiżjoni hija indirizzata lill-Istati Membri.

Magħmula fi Brussel, 9 ta’ Lulju, 1997.

Għall-Kummissjoni

Martin bangemann

Membru tal-Kummissjoni

[1] ĠU Nru L 128, tat-23.5.1991, p. 1.

[2] ĠU Nru L 220, tal-31.8.1993, p. 1.

[3] ĠU Nru L 13, tat-18.1.1996, p. 23.

[4] ĠU Nru L 77, tas-26.3.1973, p. 29.

[5] ĠU Nru L 139, tat-23.5.1989, p. 19.

--------------------------------------------------

L-ANNESS

Riferenza għall-istandard armonizzat applikabbli

L-istandard armonizzata li għaliha jirreferi l-Artikolu 2 tad-Deċiżjoni hi:

Ħtiġiet ta’ konnessjoni għal Tagħmir Terminali ta’ Data (DTE) għall-konnessjoni ma’ Networks ta’ Data Pubbliċi bil-Kommutazzjoni tal-Pakkett (PSPDNs) għall-interfaces tar-Rakkomandazzjoni CCITT X.25 f’rati ta’ sinjalizzazzjoni ta’ data sa 1920 kbit/s, li jużaw interfaces li joħorġu minn Rakkomandazzjonijiet X.21 u X.21 bis

ETSI

Istitut Ewropew għall-Istandards fit-Telekomunikazzjoni

Segretarjat ta’ ETSI

TBR 2 - Jannar 1997

(minbarra d-daħla)

Tagħrif addizzjonali

L-Istitut Ewropew għall-Istandards fit-Telekomunikazzjoni huwa rikonoxxut skond id-Direttiva tal-Kunsill 83/189/KEE [1]

L-istandard armonizzat li għalih hemm referenza hawn fuq kien prodott skond Mandat maħruġ fi qbil mal-proċeduri rilevanti tad-Direttiva tal-Kunsill 83/189/KEE.

It-test sħiħ tal-istandard armonizzat li għalih jirreferi hawn fuq jista’ jinkiseb mingħand:

L-Istitut Ewropew għall-Istandards fit-Telekomunikazzjoni 650, Route des Lucioles, F-06921 Sophia Antipolis Cedex. | Il-Kummisjoni Ewropea, DG XIII/A/2 - (BU 31, 1/7), Rue de la Loi/Wetstraat 200, B-1049 Brussel. |

[1] ĠU Nru L 109, tas-26.4.1983, p. 8.

--------------------------------------------------