(1)

Le Treoir 2004/71/CE ón gCoimisiún (2) áiríodh Pseudomonas chlororaphis tréithchineál MA 342 mar shubstaint ghníomhach in Iarscríbhinn I a ghabhann le Treoir 91/414/CEE ón gComhairle (3).

(2)

Maidir leis na substaintí gníomhacha a áirítear in Iarscríbhinn I a ghabhann le Treoir 91/414/CEE, meastar iad a bheith formheasta faoi Rialachán (CE) Uimh. 1107/2009 agus liostaítear iad i gCuid A den Iarscríbhinn a ghabhann le Rialachán Cur Chun Feidhme (AE) Uimh. 540/2011 ón gCoimisiún (4).

(3)

Formheas na substainte gníomhaí Pseudomonas chlororaphis tréithchineál MA 342, mar a leagtar amach i gCuid A den Iarscríbhinn a ghabhann le Rialachán Cur Chun Feidhme (AE) Uimh. 540/2011, rachaidh sé in éag an 30 Aibreán 2023.

(4)

Cuireadh isteach iarratas chuig an Ísiltír, an Ballstát is rapóirtéir, chun an formheas ar an tsubstaint ghníomhach Pseudomonas chlororaphis tréithchineál MA 342 a athnuachan, i gcomhréir le hAirteagal 1 de Rialachán Cur Chun Feidhme (AE) Uimh. 844/2012 ón gCoimisiún (5) laistigh den tréimhse ama dá bhforáiltear san Airteagal sin.

(5)

Chuir an t-iarratasóir isteach na sainchomhaid fhorlíontacha a cheanglaítear i gcomhréir le hAirteagal 6 de Rialachán Cur Chun Feidhme (AE) Uimh. 844/2012. Chinn an Ballstát is rapóirtéir an t-iarratas a bheith inghlactha.

(6)

D’ullmhaigh an Ísiltír dréacht-tuarascáil maidir le measúnú ar athnuachan i gcomhairle leis an Danmhairg, an Ballstát is comhrapóirtéir, agus chuir sí faoi bhráid an Údaráis Eorpaigh um Shábháilteacht Bia (“an tÚdarás”) agus faoi bhráid an Choimisiúin í an 11 Eanáir 2016. Ina dréacht-tuarascáil maidir le measúnú ar athnuachan, mhol an Ísiltír formheas Pseudomonas chlororaphis tréithchineál MA 342 a athnuachan.

(7)

Chuir an tÚdarás an sainchomhad achomair forlíontach ar fáil go poiblí. Scaip an tÚdarás an dréacht-tuarascáil maidir le measúnú ar athnuachan ar na hiarratasóirí agus ar na Ballstáit freisin chun barúlacha a fháil uathu agus sheol sé comhairliúchán poiblí ina leith. Chuir an tÚdarás na barúlacha a fuarthas ar aghaidh chuig an gCoimisiún.

(8)

An 9 Nollaig 2016, chuir an tÚdarás a chonclúid (6) in iúl don Choimisiún inar léiríodh go bhféadfaí coinne a bheith leis go gcomhlíonfaidh Pseudomonas chlororaphis tréithchineál MA 342 na critéir formheasa dá bhforáiltear in Airteagal 4 de Rialachán (CE) Uimh. 1107/2009.

(9)

Bunaithe ar an bplé a rinneadh ag an mBuanchoiste um Plandaí, Ainmhithe, Bia agus Beatha, d’iarr an Coimisiún ar an Údarás an 3 Feabhra 2020 comhairle eolaíoch a sholáthar maidir le hacmhainneacht trasghluaiseachta Pseudomonas chlororaphis tréithchineál MA 342 i bplandaí tar éis cóireáil síolta ar ghránaigh agus piseanna agus, más infheidhme, athbhreithniú a dhéanamh ar an measúnú ar an riosca do dhaoine a bhaineann leis an meitibilít 2, 3-dí-eapocsa-2,3-dédhíhidrea-riosocsain (DDR). Mar fhreagairt air sin, an 23 Meán Fómhair 2020, d’eisigh an tÚdarás ráiteas maidir le hacmhainneacht trasghluaiseachta Pseudomonas chlororaphis tréithchineál MA 342 i bplandaí tar éis cóireáil síolta ar ghránaigh agus piseanna agus measúnú ar an riosca do dhaoine (7).

(10)

Chuir an Coimisiún an tuarascáil athnuachana agus dréacht den Rialachán seo maidir le Pseudomonas chlororaphis tréithchineáil MA 342 faoi bhráid an Bhuanchoiste um Plandaí, Ainmhithe, Bia agus Beatha an 15 Deireadh Fómhair 2022 agus an 8 Nollaig 2022, faoi seach.

(11)

D’iarr an Coimisiún ar an iarratasóir a bharúlacha a chur isteach maidir le conclúid agus ráiteas an Údaráis agus, i gcomhréir leis an tríú fomhír d’Airteagal 14(1) de Rialachán Cur Chun Feidhme (AE) Uimh. 844/2012, a bharúlacha maidir leis an tuarascáil athnuachana. Chuir an t-iarratasóir a bharúlacha isteach, barúlacha a scrúdaíodh go cúramach agus a cuireadh san áireamh i gcás inarb iomchuí.

(12)

Maidir le húsáid ionadaíoch amháin nó níos mó a bhaintear as táirge cosanta plandaí amháin ar a laghad ina bhfuil an tsubstaint ghníomhach Pseudomonas chlororaphis tréithchineál MA 342, suíodh go gcomhlíontar na critéir formheasa dá bhforáiltear in Airteagal 4 de Rialachán (CE) Uimh. 1107/2009.

(13)

Dá bhrí sin, is iomchuí formheas Pseudomonas chlororaphis tréithchineál MA 342 a athnuachan. I gcomhréir le hAirteagal 14(1) de Rialachán (CE) Uimh. 1107/2009, arna léamh i gcomhar le hAirteagal 6 de, agus i bhfianaise an eolais eolaíoch reatha agus an eolais theicniúil reatha (8) agus thoradh an mheasúnaithe riosca, is gá, mar sin féin, coinníollacha áirithe a leagan síos. Go háirithe, is gá an srian atá ann cheana a choinneáil ar bun, is é sin srian maidir le Pseudomonas chlororaphis tréithchineál MA 342 a úsáid mar fhungaicíd le haghaidh cóiriú síolta in innealra cóirithe síolta iata, agus chuige sin amháin, agus uaschion na meitibilíte DDR i dtáirgí cosanta plandaí ina bhfuil Pseudomonas chlororaphis tréithchineál MA 342 a leagan síos.

(14)

Ina theannta sin, chun an mhuinín a mhéadú sa chonclúid gur diomaibhseach nó an-íseal atá an riosca do dhaoine agus don chomhshaol tar éis teagmháil le Pseudomonas chlororaphis tréithchineál MA 342, ba cheart don iarratasóir faisnéis dheimhnitheach a sholáthar a mhéid a bhaineann le sainaithint agus tréithriú Pseudomonas chlororaphis tréithchineál MA 342, an mheitibilít DDR agus an fhéidearthacht go dtarlódh aistriú géine i ndáil le frithsheasmhacht in aghaidh antaibheathach ó Pseudomonas chlororaphis tréithchineál MA 342 chuig miocrorgánaigh eile.

(15)

Dá bhrí sin, ba cheart Rialachán Cur Chun Feidhme (AE) Uimh. 540/2011 a leasú dá réir.

(16)

Le Rialachán Cur Chun Feidhme (AE) 2022/378 ón gCoimisiún (9) cuireadh síneadh leis an tréimhse formheasa le haghaidh Pseudomonas chlororaphis tréithchineál MA 342 go dtí an 30 Aibreán 2023 chun go bhféadfar an próiseas athnuachana a chur i gcrích sula rachaidh tréimhse formheasa na substainte gníomhaí sin in éag. Ós rud é go ndearnadh cinneadh maidir leis an athnuachan roimh dhul in éag na tréimhse formheasa sin ar cuireadh síneadh léi, áfach, ba cheart feidhm a bheith ag an Rialachán seo tráth is luaithe ná an dáta sin.

(17)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,