(1)

Le Rialachán (AE) 2018/1240, bunaítear an Córas Eorpach um Fhaisnéis agus Údarú Taistil (“ETIAS”) le haghaidh náisiúnaigh tríú tíortha atá díolmhaithe ón gceanglas maidir le víosa a fháil chun dul isteach agus fanacht ar chríoch na mBallstát.

(2)

De bhun Airteagal 47(1) de Rialachán (AE) 2018/1240, tá sé d’oibleagáid ar na húdaráis teorann atá inniúil chun seiceálacha teorann a dhéanamh ag pointí trasnaithe teorainneacha seachtracha i gcomhréir le Rialachán (AE) 2016/399 ó Pharlaimint na hEorpa agus ón gComhairle (2) Lárchóras ETIAS a cheadú trí úsáid a bhaint as na sonraí atá i gcrios meaisín-inléite an doiciméid. D’fhéadfadh sé, i ngeall ar chliseadh teicniúil a tharlódh laistigh d’aon chuid de Chóras Faisnéise ETIAS nó i ngeall ar chliseadh ar an mbonneagar teorann náisiúnta i mBallstát, go mbeadh imthosca ann nach bhféadfadh údarás teorann dul ar aghaidh leis an gceadú dá dtagraítear in Airteagal 47(1) de Rialachán (AE) 2018/1240.

(3)

Is é is cuspóir don Chinneadh seo bearta teagmhasacha samplacha a leagan síos, lena n-áirítear nósanna imeachta cúltaca a bheidh le leanúint ag na húdaráis teorann ag na teorainneacha seachtracha in imthosca nach bhféadfadh údarás teorann dul ar aghaidh le ceadú Lárchóras ETIAS.

(4)

Tá sé mar aidhm leis na bearta teagmhasacha samplacha iad a úsáid mar threoirlínte agus mar bhonn, agus iad curtha in oiriúint de réir mar is gá, do na Ballstáit a bpleananna teagmhasacha náisiúnta a fhorbairt agus a ghlacadh le haghaidh na gcásanna nach bhféadfadh údarás teorann dul ar aghaidh le ceadú Lárchóras ETIAS le linn dóibh seiceálacha teorann a dhéanamh ag pointí trasnaithe teorainneacha seachtracha i gcomhréir le Rialachán (AE) 2016/399.

(5)

Ba cheart go mbeadh an deis ag na húdarás teorann maolú sealadach a dhéanamh, i gcás cliseadh teicniúil, ar an oibleagáid Lárchóras ETIAS a cheadú, agus stádas na n-údaruithe taistil a fhíorú tríd an uirlis fíorúcháin dá dtagraítear in Airteagal 31 de Rialachán (AE) 2018/1240. Thairis sin, is gá inneachar na bhfógraí ó na húdarás teorann a leagan síos i gcás nach mbeidh sé indéanta ar chúiseanna teicniúla dul ar aghaidh le ceadú Lárchóras ETIAS i ngeall ar chliseadh ar an mbonneagar náisiúnta teorann i mBallstát.

(6)

Ós rud é go gcuireann Rialachán (AE) 2018/1240 le acquis Schengen, i gcomhréir le hAirteagal 4 de Phrótacal Uimh. 22 maidir le seasamh na Danmhairge, prótacal atá i gceangal leis an gConradh ar an Aontas Eorpach agus leis an gConradh ar Fheidhmiú an Aontais Eorpaigh, thug an Danmhairg fógra faoi chur chun feidhme Rialachán (AE) 2018/1240 ina dlí náisiúnta. Dá bhrí sin, tá an Cinneadh seo ina cheangal ar an Danmhairg.

(7)

Ní thagann an Cinneadh seo faoi raon feidhme na mbeart dá bhforáiltear i gCinneadh 2002/192/CE ón gComhairle (3). Is é atá ann forbairt ar fhorálacha acquis Schengen nach bhfuil Éire rannpháirteach iontu; dá bhrí sin, níl Éire rannpháirteach i nglacadh an Chinnidh seo agus níl sí faoi cheangal aige ná faoi réir a chur i bhfeidhm.

(8)

A mhéid a bhaineann leis an Íoslainn agus leis an Iorua, is é atá sa Chinneadh seo forbairt ar fhorálacha acquis Schengen de réir bhrí an Chomhaontaithe arna thabhairt i gcrích ag Comhairle an Aontais Eorpaigh agus Poblacht na hÍoslainne agus Ríocht na hIorua maidir le comhlachas an dá stát sin le acquis (4) Schengen a chur chun feidhme, a chur i bhfeidhm agus a fhorbairt, ar forálacha iad a thagann faoi réim an réimse dá dtagraítear in Airteagal 1, pointe A, de Chinneadh 1999/437/CE ón gComhairle (5).

(9)

A mhéid a bhaineann leis an Eilvéis, is é atá sa Chinneadh seo forbairt ar fhorálacha acquis Schengen de réir bhrí an Chomhaontaithe arna thabhairt i gcrích idir an tAontas Eorpach, an Comhphobal Eorpach agus Cónaidhm na hEilvéise maidir le comhlachas Chónaidhm na hEilvéise le acquis (6) Schengen a chur chun feidhme, a chur i bhfeidhm agus a fhorbairt, ar forálacha iad a thagann faoi réim an réimse dá dtagraítear in Airteagal 1, pointe A, de Chinneadh 1999/437/CE, arna léamh i gcomhar le hAirteagal 3 de Chinneadh 2008/146/CE ón gComhairle (7).

(10)

A mhéid a bhaineann le Lichtinstéin, is é atá sa Chinneadh seo forbairt ar fhorálacha acquis Schengen de réir bhrí an Phrótacail idir an tAontas Eorpach, an Comhphobal Eorpach, Cónaidhm na hEilvéise agus Prionsacht Lichtinstéin i ndáil le haontachas Phrionsacht Lichtinstéin leis an gComhaontú idir an tAontas Eorpach, an Comhphobal Eorpach agus Cónaidhm na hEilvéise maidir le comhlachas Chónaidhm na hEilvéise le acquis (8) Schengen a chur chun feidhme, a chur i bhfeidhm agus a fhorbairt, ar forálacha iad a thagann faoi réim an réimse dá dtagraítear in Airteagal 1, pointe A, de Chinneadh 1999/437/CE arna léamh i gcomhar le hAirteagal 3 de Chinneadh 2011/350/AE ón gComhairle (9).

(11)

A mhéid a bhaineann leis an gCipir, an Bhulgáir, an Rómáin agus an Chróit, is é atá sa Chinneadh seo gníomh atá ag cur le acquis Schengen nó atá gaolmhar leis ar bhealach eile, de réir bhrí Airteagal 3(1) d’Ionstraim Aontachais 2003, Airteagal 4(1) d’Ionstraim Aontachais 2005 agus Airteagal 4(1) d’Ionstraim Aontachais 2011 faoi seach.

(12)

Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42(1) de Rialachán (AE) 2018/1725 ó Pharlaimint na hEorpa agus ón gComhairle (10) agus thug sé a thuairim uaidh an 18 Feabhra 2022.

(13)

Tá na bearta dá bhforáiltear sa Chinneadh seo i gcomhréir le tuairim an Choiste um Theorainneacha Cliste (ETIAS),