(1)

Le Treoir 2001/95/CE ó Pharlaimint na hEorpa agus ón gComhairle (3), leagtar síos an ceanglas nach mór táirgí tomhaltais a bheith sábháilte agus nach mór d’údaráis um fhaireachas margaidh na mBallstát gníomhaíocht a dhéanamh i gcoinne táirgí contúirteacha agus faisnéis ina leith sin a mhalartú trí Chóras an Aontais um Mearfhaisnéis (RAPEX).

(2)

Is gá Treoir 2001/95/CE a athbhreithniú agus a thabhairt cothrom le dáta i bhfianaise na bhforbairtí a bhaineann le teicneolaíochtaí nua agus díol ar líne, chun comhsheasmhacht a áirithiú le forbairtí i reachtaíocht an Aontais um chomhchuibhiú agus sa reachtaíocht um chaighdeánú, chun a áirithiú go bhfeidhmeoidh aisghairmeacha táirgí ar mhaithe le sábháilteacht ar bhealach níos fearr, agus chun creat níos soiléire a áirithiú le haghaidh táirgí a bhfuil cuma bhia orthu, creat a rialaíodh go dtí seo le Treoir 87/357/CEE ón gComhairle (4). Ar mhaithe le soiléire, ba cheart Treoracha 2001/95/CE agus 87/357/EEC a aisghairm agus an Rialachán seo a chur ina n-ionad.

(3)

Is ionstraim iomchuí dlí é rialachán toisc go bhforchuirtear leis rialacha soiléire agus mionsonraithe nach féidir leis na Ballstáit a thrasuí ar bhealaí éagsúla. Trí rialachán a roghnú seachas treoir, is fearr is féidir an cuspóir a bhaint amach freisin maidir le comhleanúnachas a áirithiú le creat reachtach an fhaireachais margaidh le haghaidh táirgí a thagann faoi raon feidhme reachtaíocht an Aontais um chomhchuibhiú, i gcás ina bhfuil an ionstraim dlí is infheidhme ina rialachán freisin, eadhon Rialachán (AE) 2019/1020 ó Pharlaimint na hEorpa agus ón gComhairle (5). Ar deireadh, le rogha den sórt sin, laghdófar tuilleadh an t-ualach rialála trí rialacha maidir le sábháilteacht táirgí a chur i bhfeidhm go comhsheasmhach ar fud an Aontais.

(4)

Is é is aidhm don Rialachán seo rannchuidiú leis na cuspóirí dá dtagraítear in Airteagal 169 den Chonradh ar Fheidhmiú an Aontais Eorpaigh (CFAE) a ghnóthú. Go háirithe, ba cheart é a bheith d’aidhm aige sláinte agus sábháilteacht na dtomhaltóirí a áirithiú agus feidhmiú an mhargaidh inmheánaigh a áirithiú a mhéid a bhaineann le táirgí atá beartaithe do thomhaltóirí.

(5)

Ba cheart é a bheith d’aidhm ag an Rialachán seo tomhaltóirí agus a sábháilteacht a chosaint mar cheann de bhunphrionsabail chreat dlí an Aontais agus mar a chumhdaítear i gCairt um Chearta Bunúsacha an Aontais Eorpaigh (‘an Chairt’). Is féidir iarmhairtí an-diúltach a bheith ag táirgí contúirteacha do thomhaltóirí agus do shaoránaigh. Tá an ceart ag gach tomhaltóir, lena n-áirítear na tomhaltóirí is leochailí, amhail leanaí, daoine scothaosta nó daoine faoi mhíchumas, táirgí sábháilte a fháil. Ba cheart fáil a bheith ag tomhaltóirí ar mhodhanna leordhóthanacha chun an ceart sin a fhorfheidhmiú agus ba cheart fáil a bheith ag na Ballstáit ar ionstraimí agus bearta leormhaithe chun an Rialachán seo a fhorfheidhmiú.

(6)

D’ainneoin na bhforbairtí atá déanta ar reachtaíocht earnáilsonrach an Aontais um chomhchuibhiú a thugann aghaidh ar na gnéithe sábháilteachta de tháirgí sonracha nó catagóirí sonracha táirgí, níl sé indéanta go praiticiúil dlí an Aontais a ghlacadh i leith gach táirge tomhaltais atá ann cheana nó a d’fhéadfadh a bheith ann amach anseo. Fágann sin go bhfuil gá, dá bhrí sin, le creat reachtach leathan de chineál cothrománach chun bearnaí a líonadh agus chun forálacha i reachtaíocht earnáilsonrach an Aontais um chomhchuibhiú atá ann cheana nó a bheidh ann amach anseo a chomhlánú agus chun ardleibhéal cosanta tomhaltóirí a áirithiú i gcás nach bhfuil sin áirithe ar shlí eile leis an reachtaíocht sin, go háirithe d’fhonn ardleibhéal cosanta do shláinte agus sábháilteacht na dtomhaltóirí a bhaint amach, arna cheangal le hAirteagail 114 agus 169 CFAE.

(7)

San am céanna, maidir le táirgí atá faoi réir reachtaíocht an Aontais um chomhchuibhiú, reachtaíocht a bhaineann le hearnálacha sonracha, ba cheart raon feidhme chodanna éagsúla an Rialacháin seo a leagan amach go soiléir chun forálacha forluiteacha a sheachaint agus creat dlí soiléir a áirithiú.

(8)

Cé nár cheart feidhm a bheith ag cuid d’fhorálacha an Rialacháin seo, amhail formhór na n-oibleagáidí atá ar oibreoirí eacnamaíocha, maidir le táirgí a chumhdaítear le reachtaíocht an Aontais um chomhchuibhiú atá ann cheana, tá forálacha áirithe eile den Rialachán seo comhlántach le reachtaíocht an Aontais um chomhchuibhiú agus ba cheart, dá bhrí sin, feidhm a bheith acu maidir le táirgí den sórt sin. Go háirithe, an ceanglas maidir le sábháilteacht ghinearálta táirgí agus na forálacha a bhaineann leis sin, ba cheart feidhm a bheith acu maidir le táirgí tomhaltais a chumhdaítear le reachtaíocht an Aontais um chomhchuibhiú nuair nach gcumhdaítear cineálacha áirithe rioscaí leis an reachtaíocht sin de chuid an Aontais um chomhchuibhiú. Forálacha an Rialacháin seo a bhaineann le hoibleagáidí na soláthraithe margaí ar líne, le hoibleagáidí na n-oibreoirí eacnamaíocha i gcás tionóiscí, leis an gceart chun faisnéise agus chun leighis do thomhaltóirí agus leis na haisghairmeacha táirgí ar mhaithe le sábháilteacht, ba cheart feidhm a bheith ag na forálacha sin maidir le táirgí a chumhdaítear le reachtaíocht an Aontais um chomhchuibhiú a mhéid nach bhfuil aon fhorálacha sonracha ann a bhfuil an cuspóir céanna acu i reachtaíocht an Aontais um chomhchuibhiú den sórt sin. Ar an gcaoi chéanna, úsáidtear RAPEX cheana féin chun críocha reachtaíocht an Aontais um chomhchuibhiú, dá dtagraítear in Airteagal 20 de Rialachán (AE) 2019/1020: dá bhrí sin, ba cheart feidhm a bheith ag na forálacha sa Rialachán seo lena rialaítear Safety Gate agus a fheidhmiú maidir le táirgí a chumhdaítear le reachtaíocht an Aontais um chomhchuibhiú.

(9)

Táirgí atá ceaptha go heisiach i gcomhair úsáid ghairmiúil, ach a úsáidtear ina dhiaidh sin i margadh na dtomhaltóirí, ba cheart iad a bheith faoi réir an Rialacháin seo de bhrí go bhféadfaidís rioscaí a chothú do shláinte agus sábháilteacht na dtomhaltóirí nuair a dhéantar iad a úsáid faoi dhálaí atá measartha intuartha.

(10)

Tá táirgí íocshláinte faoi réir measúnú réamh-mhargaidh lena n-áirítear anailís riosca agus tairbhe. Ba cheart, dá bhrí sin, na táirgí sin a eisiamh ó raon feidhme an Rialacháin seo.

(11)

Le dlí an Aontais maidir le bia, beatha agus réimsí gaolmhara, bunaítear córas sonrach lena n-áirithítear sábháilteacht na dtáirgí a chumhdaítear leis an dlí sin. Go deimhin, tá creat dlí sonrach bunaithe le haghaidh táirgí bia agus beatha, go háirithe, le Rialachán (CE) Uimh. 178/2002 ó Pharlaimint na hEorpa agus ón gComhairle (6). Thairis sin, rialaítear táirgí bia agus beatha freisin le Rialachán (AE) 2017/625 ó Pharlaimint na hEorpa agus ón gComhairle (7), lena n-áirithítear cur chuige comhchuibhithe maidir le rialuithe oifigiúla chun comhlíonadh dlí beatha agus bia, rialacha sláinte ainmhithe agus leasa ainmhithe a fhíorú. Dá bhrí sin, ba cheart táirgí bia agus beatha a eisiamh ó raon feidhme an Rialacháin seo, cé is moite d’ábhair agus earraí a bheartaítear a bheith i dtadhall le bia a mhéid a bhaineann le rioscaí nach gcumhdaítear le Rialachán (CE) Uimh. 1935/2004 ó Pharlaimint na hEorpa agus ón gComhairle (8) ná le reachtaíocht eile a bhaineann go sonrach le bia agus nach gcumhdaítear léi ach rioscaí ceimiceacha agus bitheolaíocha a bhaineann le bia.

(12)

Tá plandaí beo faoi réir creat dlí sonrach, dá bhforáiltear, go háirithe, le Rialachán (AE) 2016/2031 ó Pharlaimint na hEorpa agus ón gComhairle (9) lena gcuirtear san áireamh sainiúlachtaí na dtáirgí sin chun sábháilteacht tomhaltóirí a áirithiú.

(13)

Is ábhair de bhunadh ainmhíoch nach n-itheann daoine iad seachtháirgí ainmhithe. Tá na táirgí sin, amhail beatha, faoi réir creat dlí sonrach, dá bhforáiltear, go háirithe, le Rialachán (CE) Uimh. 1069/2009 ó Pharlaimint na hEorpa agus ón gComhairle (10).

(14)

Tá táirgí cosanta plandaí, dá ngairtear lotnaidicídí freisin, faoi réir forálacha sonracha maidir lena n-údarú ar an leibhéal náisiúnta, bunaithe ar Rialachán (CE) Uimh. 1107/2009 ó Pharlaimint na hEorpa agus ón gComhairle (11), agus ba cheart, dá bhrí sin, iad a eisiamh ó raon feidhme an Rialacháin seo freisin.

(15)

Tá aerárthaí dá dtagraítear in Airteagal 2(3), pointe (d), de Rialachán (AE) 2018/1139 ó Pharlaimint na hEorpa agus ón gComhairle (12) faoi réir rialú rialála na mBallstát, i bhfianaise a riosca theoranta do shábháilteacht na heitlíochta sibhialta. Ba cheart, dá bhrí sin, na haerárthaí sin a eisiamh ó raon feidhme an Rialacháin seo.

(16)

Ba cheart feidhm a bheith ag na ceanglais a leagtar síos sa Rialachán seo maidir le táirgí athláimhe nó táirgí atá deisithe, athriochtaithe nó athchúrsáilte, a théann isteach arís sa slabhra soláthair le linn gníomhaíocht tráchtála, ach amháin i gcás na dtáirgí sin nach féidir leis an tomhaltóir a bheith ag súil go réasúnta leis go gcomhlíonfaidís na caighdeáin sábháilteachta úrscothacha, amhail táirgí a gcuirtear in iúl go follasach go bhfuil siad le deisiú nó le hathriochtú, nó a chuirtear ar fáil ar an margadh mar ítimí inbhailithe a bhfuil tábhacht stairiúil leo.

(17)

Níor cheart seirbhísí a chumhdach leis an Rialachán seo. Mar sin féin, chun sláinte agus sábháilteacht na dtomhaltóirí a chosaint, táirgí a sholáthraítear nó a chuirtear ar fáil do thomhaltóirí mar chuid de sholáthar seirbhísí, lena n-áirítear táirgí a nochtar tomhaltóirí go díreach dóibh agus seirbhís á soláthar, ba cheart do na táirgí sin teacht faoi raon feidhme an Rialacháin seo. Mar sin féin, maidir le trealamh a iompraíonn tomhaltóirí nó a dtaistealaíonn siad air i gcás ina bhfuil trealamh den sórt sin á oibriú go díreach ag soláthraí seirbhíse i gcomhthéacs seirbhís iompair, ba cheart é a eisiamh ó raon feidhme an Rialacháin seo toisc nach mór déileáil leis i gcomhar le sábháilteacht na seirbhíse arna soláthar.

(18)

Is catagóirí sonracha táirgí iad seandachtaí, amhail saothair ealaíne nó earraí bailitheoirí, nach féidir a bheith ag súil leis ina leith go gcomhlíonfaidh siad na ceanglais sábháilteachta a leagtar síos leis an Rialachán seo, agus dá bhrí sin ba cheart iad a eisiamh óna raon feidhme. Mar sin féin, chun cosc a chur ar tháirgí eile a mheas de dhearmad mar tháirgí a bhaineann leis na catagóirí sin, is gá a chur san áireamh gur táirgí a chruthaítear chun críoch ealaíne amháin iad saothair ealaíne, go bhfuil earraí bailitheoirí ina annamh a ndóthain agus ina ndíol spéise leordhóthanach ó thaobh na staire nó na heolaíochta de chun údar a thabhairt lena mbailiú agus lena gcaomhnú, agus go bhfuil aois urghnách ag seandachtaí, mura rud é gur saothair ealaíne nó earraí bailitheoirí iad cheana féin nó an dá rud. Agus measúnú á dhéanamh i dtaobh an seandacht, amhail saothar ealaíne nó earra bailitheoirí, é táirge, d’fhéadfaí Iarscríbhinn IX a ghabhann le Treoir 2006/112/CE ón gComhairle (13) a chur san áireamh.

(19)

Is é sainmhíniú na hEagraíochta Domhanda Sláinte ar ‘sláinte’ ná staid d’fholláine iomlán fhisiceach, intinne agus shóisialta, agus ní le heaspa galair nó éiglíochta amháin a bhaineann sí.

(20)

Ba cheart an ciandíol, lena n-áirítear díol ar líne, teacht faoi raon feidhme an Rialacháin seo freisin. Tá fás tagtha ar dhíol ar líne ar bhonn leanúnach comhsheasmhach, rud a chruthaigh samhlacha nua gnó, dúshláin nua maidir le sábháilteacht táirgí agus gníomhaithe nua sa mhargadh, amhail soláthraithe margaí ar líne.

(21)

I gcás táirge a tháirgtear lena dhíol ar líne nó trí mhodhanna eile ciandíolacháin, ba cheart a mheas go bhfuil an táirge curtha ar fáil ar an margadh má tá an tairiscint díolacháin dírithe ar thomhaltóirí san Aontas. I gcomhréir leis na rialacha is infheidhme de chuid an Aontais maidir leis an dlí idirnáisiúnta príobháideach, ba cheart anailís de réir an cháis a dhéanamh chun a shuí an bhfuil tairiscint spriocdhírithe ar thomhaltóirí san Aontas. Ba cheart a mheas go bhfuil tairiscint díolacháin spriocdhírithe ar thomhaltóirí san Aontas má dhíríonn an t-oibreoir eacnamaíoch ábhartha a chuid gníomhaíochtaí, trí aon mhodh, ar Bhallstát. Maidir leis na hanailísí de réir an cháis, ba cheart tosca ábhartha, amhail na limistéir gheografacha ar féidir seachadadh chucu, na teangacha atá ar fáil, a úsáidtear don tairiscint nó don ordú, modhanna íocaíochta, úsáid airgeadra an Bhallstáit nó ainm fearainn atá cláraithe i gceann de na Ballstáit a chur san áireamh. I gcás na ndíolachán ar líne, ní leor díreach go mbeadh comhéadan na n-oibreoirí eacnamaíocha nó na soláthraithe margaí ar líne inrochtana sa Bhallstát ina bhfuil an tomhaltóir bunaithe nó ina bhfuil sainchónaí air.

(22)

Faoin gceanglas sábháilteachta ginearálta a leagtar síos sa Rialachán seo, ba cheart oibleagáid a bheith ar oibreoirí eacnamaíocha gan ach táirgí sábháilte a chur ar an margadh. Ba cheart ardleibhéal sábháilteachta den sórt sin a bhaint amach go príomha trí dhearadh agus trí shainghnéithe an táirge, agus úsáid bheartaithe agus intuartha an táirge agus dálaí úsáide beartaithe agus intuartha an táirge á gcur san áireamh. Ba cheart na rioscaí atá fanta, más ann dóibh, a mhaolú trí bhíthin coimircí áirithe, amhail rabhaidh agus treoracha.

(23)

Ba cheart measúnú a dhéanamh ar shábháilteacht táirge agus aird á tabhairt ar ghnéithe ábhartha uile an táirge, go háirithe a shaintréithe, amhail na saintréithe fisiceacha, meicniúla agus ceimiceacha, agus leagan amach an táirge, chomh maith leis na riachtanais shonracha agus na rioscaí sonracha a bhaineann leis an táirge do chatagóirí áirithe tomhaltóirí ar dócha go n-úsáidfidh siad na táirgí, go háirithe leanaí, daoine scothaosta agus daoine faoi mhíchumas. Ar na rioscaí sin, is féidir riosca don chomhshaol a áireamh freisin sa mhéid go mbaineann riosca leis do shláinte agus sábháilteacht na dtomhaltóirí. Ba cheart a chur san áireamh sa mheasúnú sin an riosca don tsláinte a bhaineann le táirgí atá nasctha go digiteach, lena n-áirítear an riosca don mheabhairshláinte, go háirithe i gcás tomhaltóirí leochaileacha, go háirithe leanaí. Dá bhrí sin, agus measúnú á dhéanamh ar shábháilteacht na dtáirgí atá nasctha go digiteach ar dócha go mbeidh tionchar acu ar leanaí, ba cheart do mhonaróirí a áirithiú go gcomhlíonann na táirgí a chuireann siad ar fáil ar an margadh na caighdeáin is airde sábháilteachta, slándála agus príobháideachta trí dhearadh, ar mhaithe le leas leanaí. Thairis sin, má theastaíonn faisnéis shonrach chun táirgí a dhéanamh sábháilte do chatagóir áirithe daoine, ba cheart a chur san áireamh freisin sa mheasúnú ar shábháilteacht na dtáirgí an fhaisnéis sin a bheith ar fáil agus inrochtaineacht na faisnéise sin. Ba cheart measúnú a dhéanamh ar shábháilteacht na dtáirgí ar fad agus aird á tabhairt ar an ngá leis an táirge a bheith sábháilte le linn a shaolré ar fad.

(24)

Ítimí a nascann le hítimí eile nó le hítimí neamhleabaithe eile a mbíonn tionchar acu ar an gcaoi a n-oibríonn ítim eile, is féidir riosca a bheith ag baint leo do shábháilteacht an táirge. Ba cheart aird chuí a thabhairt ar an ngné sin mar bheith ina riosca féideartha. Na naisc agus an t-idirghaol a d’fhéadfadh a bheith ag ítim le hítimí seachtracha, níor cheart dóibh sábháilteacht na hítime sin a chur i mbaol.

(25)

D’fhéadfadh rioscaí nua a bheith ag baint le teicneolaíochtaí nua do shláinte agus sábháilteacht tomhaltóirí, nó d’fhéadfadh teicneolaíochtaí den sórt sin athrú a dhéanamh ar an gcaoi a bhféadfadh na rioscaí atá ann cheana teacht chun cinn, amhail idirghabháil sheachtrach chun an táirge a haiceáil nó a shaintréithe a athrú. D’fhéadfadh teicneolaíochtaí nua an táirge bunaidh a mhodhnú go substaintiúil, mar shampla trí nuashonruithe bogearraí, ar cheart iad a bheith faoi réir measúnú riosca nua más rud é go mbeadh tionchar ag an modhnú substaintiúil sin ar shábháilteacht an táirge.

(26)

Is féidir déileáil le rioscaí sonracha cibearshlándála a dhéanann difear do shábháilteacht tomhaltóirí, agus do phrótacail agus deimhniúcháin, trí bhíthin na reachtaíochta earnálaí. Ba cheart a áirithiú, áfach, i gcásanna nach bhfuil feidhm ag reachtaíocht earnálach den sórt sin, go gcuireann na hoibreoirí eacnamaíocha agus na húdaráis náisiúnta ábhartha rioscaí atá nasctha le teicneolaíochtaí nua san áireamh, agus na táirgí á ndearadh acu agus measúnú á dhéanamh acu orthu faoi seach, chun a áirithiú nach gcuirtear sábháilteacht an táirge i mbaol mar gheall ar athruithe a bheith déanta air.

(27)

Chun cur chun feidhme éifeachtach comhsheasmhach an cheanglais sábháilteachta ghinearálta a leagtar síos sa Rialachán seo a áirithiú, tá sé tábhachtach úsáid a bhaint as caighdeáin Eorpacha lena gcumhdaítear táirgí agus rioscaí áirithe. Caighdeáin Eorpacha a bhfuil tagairtí dóibh foilsithe i gcomhréir le Treoir 2001/95/CE, ba cheart dóibh leanúint de thoimhde a thabhairt go bhfuiltear i gcomhréir leis an gceanglas sábháilteachta ginearálta a leagtar síos sa Rialachán seo. Iarrataí ar chaighdeánú arna n-eisiúint ag an gCoimisiún i gcomhréir le Treoir 2001/95/CE, ba cheart iad a mheas ina n-iarrataí ar chaighdeánú arna n-eisiúint i gcomhréir leis an Rialachán seo. I gcás ina gcumhdaítear rioscaí éagsúla nó catagóirí riosca éagsúla leis an gcaighdeán céanna, thabharfadh comhréireacht táirge leis an gcuid den chaighdeán lena gcumhdaítear an riosca ábhartha nó an chatagóir riosca ábhartha toimhde sábháilteachta don táirge féin a mhéid a bhaineann leis an riosca ábhartha nó leis an gcatagóir riosca ábhartha.

(28)

I gcás ina sainaithníonn an Coimisiún go bhfuil gá le caighdeán Eorpach chun a áirithiú go gcomhlíonann táirgí áirithe an ceanglas sábháilteachta ginearálta a leagtar síos sa Rialachán seo, ba cheart dó forálacha ábhartha Rialachán (AE) Uimh. 1025/2012 ó Pharlaimint na hEorpa agus ón gComhairle (14) a chur i bhfeidhm chun a iarraidh ar eagraíocht Eorpach um chaighdeánú amháin nó níos mó caighdeán a dhréachtú nó a shainaithint, caighdeán a bheadh oiriúnach chun a áirithiú go nglactar leis go bhfuil táirgí a chomhlíonann an caighdeán sin sábháilte.

(29)

D’fhéadfadh rioscaí éagsúla a bheith ag baint le táirgí d’inscní éagsúla agus ba cheart é sin a chur san áireamh le gníomhaíochtaí caighdeánaithe chun neamhréitigh i dtéarmaí sábháilteachta a sheachaint agus, dá bhrí sin, bearna idir na hinscní maidir le sábháilteacht a sheachaint. Leagtar amach sa Dearbhú maidir le Caighdeáin Inscne-Fhreagrúla ó Choimisiún Eacnamaíochta na Náisiún Aontaithe don Eoraip roinnt gníomhaíochtaí ar cheart do chomhlachtaí náisiúnta um chaighdeáin agus d’eagraíochtaí forbartha caighdeán a áireamh ina bplean gníomhaíochta inscne maidir le caighdeáin inscne-fhreagrúla agus forbairt caighdeán, chun caighdeáin atá cothrom ó thaobh inscne de, ionadaíoch agus cuimsitheach a bhaint amach.

(30)

Mar aon le hoiriúnú Rialachán (AE) Uimh. 1025/2012, ba cheart nós imeachta sonrach a thabhairt isteach chun na ceanglais sábháilteachta shonracha a ghlacadh le cúnamh ón gCoiste speisialaithe dá bhforáiltear leis an Rialachán seo.

(31)

In éagmais caighdeán Eorpach, ba cheart do dhlí náisiúnta an Bhallstáit ina gcuirtear an táirge ar fáil ar an margadh lena leagtar síos ceanglais sláinte agus sábháilteachta dlí an Aontais a chomhlíonadh, go háirithe Airteagail 34 agus 36 CFAE.

(32)

Ba cheart oibleagáidí comhréireacha a bheith ar oibreoirí eacnamaíocha as sábháilteacht a dtáirgí, i ndáil leis an ról atá ag gach oibreoir sa slabhra soláthair, ionas go n-áirithítear ardleibhéal sábháilteachta do shláinte agus sábháilteacht na dtomhaltóirí, agus feidhmiú éifeachtúil an mhargaidh inmheánaigh á áirithiú ag an am céanna. Na hoibreoirí eacnamaíocha ar fad a mbíonn ról acu sa slabhra soláthair agus dáilte, ba cheart dóibh gach beart is iomchuí a dhéanamh chun a áirithiú nach gcuireann siad ar fáil ar an margadh ach táirgí atá sábháilte agus i gcomhréir leis an Rialachán seo. Is gá foráil a dhéanamh maidir le dáileadh soiléir agus comhréireach na n-oibleagáidí a chomhfhreagraíonn do ról gach oibreora sa phróiseas soláthair agus dáilte. Mar shampla, a mhéid a bhaineann leis an bhfíorú i dtaobh an ndearna an monaróir agus, i gcás inarb ábhartha, an t-allmhaireoir a n-oibleagáidí a chomhlíonadh, níor cheart a cheangal ar an dáileoir ach fíoruithe fíriciúla a dhéanamh seachas measúnú a dhéanamh ar an bhfaisnéis a sholáthair siad. Ina theannta sin, d’fhéadfadh na hoibreoirí eacnamaíocha an fhaisnéis faoi shainaithint an táirge agus na n-oibreoirí eacnamaíocha, agus treoracha agus faisnéis faoin tsábháilteacht, a sholáthar i bhfoirm dhigiteach trí bhíthin réitigh leictreonacha, amhail cód QR nó cód maitríse sonraí.

(33)

Ba cheart do mhonaróirí doiciméadacht theicniúil a tharraingt suas maidir leis na táirgí a chuireann siad ar an margadh, ar doiciméadacht í ar cheart an fhaisnéis is gá a bheith inti chun a chruthú go bhfuil na táirgí sin sábháilte. Ba cheart an doiciméadacht theicniúil a bheith bunaithe ar anailís riosca inmheánach arna déanamh ag an monaróir. Ba cheart an méid faisnéise atá le soláthar sa doiciméadacht theicniúil a bheith i gcomhréir le castacht an táirge agus leis na rioscaí a d’fhéadfadh a bheith ann arna sainaithint ag an monaróir. Go háirithe, ba cheart do mhonaróirí tuairisc ghinearálta a sholáthar ar an táirge agus ar na heilimintí is gá chun measúnú a dhéanamh ar a shábháilteacht. I gcás táirgí casta nó táirgí a bhféadfadh rioscaí a bheith ag baint leo, d’fhéadfadh go mbeadh tuairisc níos fairsinge ar an táirge de dhíth san fhaisnéis atá le soláthar. I gcásanna den sórt sin, ba cheart a chur san áireamh freisin anailís ar na rioscaí sin agus na modhanna teicniúla a glacadh chun na rioscaí a mhaolú nó chun deireadh a chur leo. I gcás ina gcomhlíonann an táirge caighdeáin Eorpacha nó eilimintí eile a chuirtear i bhfeidhm chun an ceanglas sábháilteachta ginearálta a leagtar síos sa Rialachán seo a chomhlíonadh, ba cheart liosta na gcaighdeán Eorpach ábhartha nó na n-eilimintí eile sin a léiriú freisin.

(34)

Maidir le haon duine nádúrtha nó dlítheanach a chuireann táirge ar an margadh faoina n-ainm nó a dtrádmharc féin nó a mhodhnaíonn an táirge go substaintiúil ar dhóigh a d’fhéadfadh difear a dhéanamh do chomhréireacht le ceanglais an Rialacháin seo, ba cheart a mheas gurb iadsan an monaróir agus ba cheart dóibh sin oibleagáidí an mhonaróra a ghlacadh chucu féin.

(35)

Modhnú a dhéantar ar tháirge, trí mhodhanna fisiciúla nó digiteacha, d’fhéadfadh go mbeadh tionchar aige ar chineál agus saintréithe an táirge ar bhealach nach raibh intuartha sa mheasúnú riosca tosaigh ar an táirge agus a d’fhéadfadh sábháilteacht an táirge a chur i mbaol. Ba cheart, dá bhrí sin, a mheas gur modhnú substaintiúil é modhnú den sórt sin agus, nuair nach ndéanann an tomhaltóir é nó nach ndéantar thar ceann an tomhaltóra é, ba cheart a mheas gur táirge nua ó mhonaróir eile é an táirge. Chun a áirithiú go gcomhlíontar an ceanglas ginearálta sábháilteachta a leagtar síos sa Rialachán seo, ba cheart an duine a dhéanann an modhnú substaintiúil sin a mheas mar an monaróir agus ba cheart don duine sin a bheith faoi réir na n-oibleagáidí céanna. Níor cheart feidhm a bheith ag an gceanglas sin ach amháin maidir leis an gcuid mhodhnaithe den táirge, ar choinníoll nach ndéanann an modhnú difear don táirge ina iomláine. Chun ualach neamhriachtanach díréireach a sheachaint, níor cheart a chur de cheangal ar an duine a bhfuil an modhnú substaintiúil á dhéanamh aige tástálacha a dhéanamh arís agus doiciméadacht nua a chur ar fáil i ndáil le gnéithe den táirge nach bhfuil tionchar ag an modhnú orthu. Ba cheart é a bheith faoin duine a dhéanann an modhnú substaintiúil a léiriú nach bhfuil tionchar ag an modhnú ar an táirge ina iomláine.

(36)

Nósanna imeachta inmheánacha um chomhréireacht, trína n-áirithíonn oibreoirí eacnamaíocha, go hinmheánach, go ndéantar a n-oibleagáidí a chomhlíonadh ar bhealach éifeachtach agus tapa agus na coinníollacha chun gníomhú go tráthúil i gcás táirge contúirteach, ba cheart do na hoibreoirí eacnamaíocha féin na nósanna imeachta sin a chur ar bun.

(37)

Chun cosc a chur ar tháirgí contúirteacha a chur ar an margadh, ba cheart é a bheith éigeantach d’oibreoirí eacnamaíocha próisis inmheánacha lena n-áirithítear comhlíonadh cheanglais ábhartha an Rialacháin seo a áireamh ina ngníomhaíochtaí táirgthe nó margaíochta. Ba cheart do na hoibreoirí eacnamaíocha féin próisis inmheánacha den sórt sin a chinneadh i ndáil lena ról sa slabhra soláthair agus le cineál na dtáirgí lena mbaineann agus is féidir na próisis sin a bheith bunaithe, mar shampla, ar nósanna imeachta eagraíochtúla, ar threoirlínte, ar chaighdeáin nó ar bhainisteoir ad hoc a cheapadh. Ba cheart gurb iad na hoibreoirí eacnamaíocha ábhartha, agus iadsan amháin, a bheadh freagrach as bunú agus formáid próiseas inmheánach den sórt sin.

(38)

Tá comhoibriú ó gach oibreoir eacnamaíoch agus gach soláthraí margaí ar líne leis na húdaráis um fhaireachas margaidh riachtanach chun deireadh a chur le rioscaí do na táirgí ábhartha a chuirtear ar fáil ar an margadh nó chun iad a mhaolú. Mar sin féin, ba cheart na hiarrataí a dhéanann údaráis um fhaireachas margaidh orthu a chur in oiriúint don ról atá acu sa slabhra soláthair agus i ndáil lena n-oibleagáidí dlíthiúla faoi seach.

(39)

Díol díreach a dhéanann oibreoirí eacnamaíocha atá bunaithe lasmuigh den Aontas trí bhealaí ar líne, is rud é sin a chuireann bac ar obair na n-údarás um fhaireachas margaidh agus iad ag dul i ngleic le táirgí contúirteacha san Aontas, toisc gur minic nach bhfuil oibreoirí eacnamaíocha bunaithe san Aontas ná nach bhfuil ionadaí dlíthiúil acu san Aontas. Dá bhrí sin, is gá a áirithiú go bhfuil cumhachtaí agus modhanna leormhaithe ag na húdaráis um fhaireachas margaidh chun dul i ngleic ar bhealach éifeachtach le díol na dtáirgí contúirteacha ar líne. Chun forfheidhmiú éifeachtach an Rialacháin seo a áirithiú, ba cheart an oibleagáid a leagtar amach in Airteagal 4(1), (2) agus (3) de Rialachán (AE) 2019/1020 a leathnú chuig táirgí nach dtagann faoi raon feidhme reachtaíocht an Aontais um chomhchuibhiú chun a áirithiú go bhfuil oibreoir eacnamaíoch freagrach bunaithe san Aontas, a gcuirtear de chúram air cúraimí maidir le táirgí den sórt sin, idirghabhálaí a sholáthar d’údaráis um fhaireachas margaidh agus, i gcás inarb iomchuí i ndáil leis na rioscaí a d’fhéadfadh a bheith ann a bhaineann le táirge, cúraimí sonracha a dhéanamh go tráthúil chun a áirithiú go bhfuil na táirgí sábháilte. Ba cheart a chur san áireamh sna cúraimí sonracha sin seiceálacha rialta maidir le comhlíonadh na doiciméadachta teicniúla, fhaisnéis an táirge agus an mhonaróra, treorach agus faisnéise sábháilteachta.

(40)

Sonraí teagmhála an oibreora eacnamaíoch atá bunaithe san Aontas agus atá freagrach as táirgí a thagann faoi raon feidhme an Rialacháin seo, ba cheart na sonraí teagmhála sin a léiriú i dteannta an táirge chun seiceálacha a éascú ar fud an tslabhra soláthair.

(41)

Chun go mbeidh oibreoirí eacnamaíocha ar fiontair bheaga agus mheánmhéide (FBManna) iad, lena n-áirítear micrifhiontair, in ann déileáil leis na hoibleagáidí nua a fhorchuirtear leis an Rialachán seo, ba cheart don Choimisiún treoirlínte praiticiúla agus treoir shaincheaptha a sholáthar, mar shampla bealach díreach le nascadh le saineolaithe i gcás ina bhfuil ceisteanna acu, agus an gá lena n-ualaí riaracháin a shimpliú agus a theorannú á chur san áireamh.

(42)

Trí shainaithint táirgí agus soláthar faisnéise faoin monaróir agus faoi oibreoirí eacnamaíocha ábhartha eile feadh an tslabhra soláthair ar fad a áirithiú, is fusa oibreoirí eacnamaíocha a shainaithint agus, i gcás inarb infheidhme, bearta ceartaitheacha éifeachtacha agus comhréireacha a dhéanamh i gcoinne táirgí contúirteacha, amhail aisghairmeacha spriocdhírithe. Ar an dóigh sin, áirithítear le sainaithint táirgí agus soláthar faisnéise faoin monaróir agus faoi oibreoirí eacnamaíocha ábhartha eile go bhfaigheann tomhaltóirí, lena n-áirítear daoine faoi mhíchumas, agus údaráis um fhaireachas margaidh faisnéis chruinn faoi tháirgí contúirteacha, rud a mhéadaíonn ar an muinín as an margadh agus a sheachnaíonn cur isteach neamhriachtanach ar thrádáil. Dá bhrí sin, ba cheart faisnéis a bheith ar tháirgí lenar féidir iad féin agus an monaróir agus, i gcás inarb infheidhme, an t-allmhaireoir agus oibreoirí eacnamaíocha ábhartha eile a shainaithint. D’fhéadfaí ceanglais den sórt sin a dhéanamh níos déine i gcás cineálacha áirithe táirgí, ar dócha riosca tromchúiseach a bheith ag baint leo do shláinte agus sábháilteacht na dtomhaltóirí, trí bhíthin córas bailithe agus stórála sonraí ionas gur féidir, anuas ar an táirge a shainaithint, a chomhpháirteanna nó na hoibreoirí eacnamaíocha a bhfuil baint acu lena shlabhra soláthair a shainaithint. Níor cheart gur dochar sin do na ceanglais faisnéise a leagtar síos le Treoir 2011/83/AE ó Pharlaimint na hEorpa agus ón gComhairle (15), a bhaineann le príomhthréithe na n-earraí, a mhéid is iomchuí don mheán agus do chineál na n-earraí. Ba cheart pictiúr a mheas mar ghrianghraf, mar léaráid nó mar eilimint phicteagrafach eile, rud a fhágann gur féidir táirge nó táirge ionchasach a shainaithint go héasca.

(43)

Trína áirithiú go dtugann monaróirí fógra faoi thionóiscí ar táirge a chuir siad ar fáil ar an margadh ba chúis leo, feabhsófar an fhaisnéis atá ar fáil d’údaráis um fhaireachas margaidh agus beifear in ann catagóirí táirgí a d’fhéadfadh a bheith contúirteach a shainaithint ar bhealach níos fearr. Tá rialacha maidir le dliteanas táirgí oibreoirí eacnamaíocha i leith táirgí lochtacha leagtha síos i ndlí sonrach an Aontais agus níor cheart, dá bhrí sin, a mheas gur admháil dliteanais i leith táirge lochtach iad fógraí den sórt sin agus bailiú sonraí den sórt sin ná gur deimhniú dliteanais é faoi dhlí ábhartha an Aontais nó faoin dlí ábhartha náisiúnta.

(44)

Chun a bheith in ann rioscaí nua atá ag teacht chun cinn agus treochtaí eile margaidh a bhaineann le sábháilteacht táirgí a bhrath go luath, ba cheart gach páirtí leasmhar, lena n-áirítear eagraíochtaí tomhaltóirí nó eagraíochtaí gnó, a spreagadh chun faisnéis atá ar fáil dóibh a chur in iúl d’údaráis um fhaireachas margaidh agus don Choimisiún chun sáruithe ar an Rialachán seo a bhrath agus a imscrúdú.

(45)

Tá ról ríthábhachtach ag soláthraithe margaí ar líne sa slabhra soláthair, rud a ligeann d’oibreoirí eacnamaíocha teacht ar líon níos mó tomhaltóirí, agus, dá bhrí sin, tá ról ríthábhachtach acu sa chóras sábháilteachta táirgí freisin.

(46)

Faoi na samhlacha gnó casta nua a bhaineann le díolacháin ar líne, is féidir leis an eintiteas céanna seirbhísí éagsúla a sholáthar. Ag brath ar chineál na seirbhísí a sholáthraítear do tháirge áirithe, is féidir leis an eintiteas céanna teacht faoi chatagóirí éagsúla samhlacha gnó faoin Rialachán seo. Nuair nach soláthraíonn eintiteas ach seirbhísí idirghabhála ar líne le haghaidh táirge áirithe, ní cháileodh sé ansin ach mar sholáthraí margaidh ar líne don táirge sin. I gcás ina soláthraíonn an t-eintiteas céanna seirbhísí margaidh ar líne chun táirge ar leith a dhíol agus go ngníomhaíonn sé freisin mar oibreoir eacnamaíoch faoin Rialachán seo, cháileodh sé freisin mar an t-oibreoir eacnamaíoch ábhartha. I gcás den sórt sin, bheadh ar an eintiteas i gceist, dá bhrí sin, na hoibleagáidí is infheidhme maidir leis an oibreoir eacnamaíoch ábhartha a chomhlíonadh. Mar shampla, má dháileann soláthraí an mhargaidh ar líne táirge freisin, ansin, maidir le díol an táirge a dáileadh, mheasfaí gur dáileoir é. Ar an gcaoi chéanna, dá ndíolfadh an t-eintiteas atá i gceist a tháirgí brandáilte féin, ghníomhódh sé mar mhonaróir agus bheadh air, dá bhrí sin, na ceanglais is infheidhme do mhonaróirí a chomhlíonadh. Chomh maith leis sin, is féidir le roinnt eintiteas cáiliú mar sholáthraithe seirbhíse próiseála orduithe má thairgeann siad seirbhísí próiseála orduithe. Ba ghá, dá bhrí sin, cásanna den sórt sin a mheasúnú ar bhonn cás ar chás.

(47)

I bhfianaise an róil thábhachtaigh atá ag soláthraithe margaí ar líne nuair a dhéantar díol táirgí a idirghabháil idir trádálaithe agus tomhaltóirí, ba cheart níos mó freagrachtaí a bheith ar ghníomhaithe den sórt sin maidir le dul i ngleic le díol táirgí contúirteacha ar líne. I dTreoir 2000/31/CE ó Pharlaimint na hEorpa agus ón gComhairle (16), cuirtear ar fáil an creat ginearálta le haghaidh ríomhthráchtála agus leagtar síos oibleagáidí áirithe le haghaidh ardáin ar líne. Le Rialachán (AE) 2022/2065 ó Pharlaimint na hEorpa agus ón gComhairle (17), rialaítear freagracht agus cuntasacht na soláthraithe seirbhísí idirghabhála ar líne i ndáil le hábhair neamhdhleathacha, lena n-áirítear táirgí contúirteacha. Tá feidhm ag an Rialachán sin gan dochar do na rialacha a leagtar síos le dlí an Aontais maidir le cosaint tomhaltóirí agus sábháilteacht táirgí. Dá réir sin, ag cur leis an gcreat dlí cothrománach a chuirtear ar fáil leis an Rialachán sin, ba cheart ceanglais shonracha a thabhairt isteach, ar ceanglais iad atá bunriachtanach chun dul i ngleic ar bhealach éifeachtach le díol táirgí contúirteacha ar líne, i gcomhréir le hAirteagal 2(4), pointe (f), den Rialachán sin. A mhéid a shonraítear sa Rialachán seo na ceanglais, i ndáil le sábháilteacht táirgí, atá le comhlíonadh ag soláthraithe margaí ar líne chun a áirithiú go gcomhlíontar forálacha áirithe de Rialachán (AE) 2022/2065, níor cheart do na ceanglais sin difear a dhéanamh do chur i bhfeidhm Rialachán (AE) 2022/2065, a leanann d’fheidhm a bheith aige maidir le soláthraithe margaí ar líne.

(48)

Leis an nGealltanas um Shábháilteacht Táirgí, a céad-síníodh in 2018 agus a chuaigh roinnt soláthraithe margaí ar líne ina bhun ó shin i leith, foráiltear maidir le roinnt gealltanas deonach maidir le sábháilteacht táirgí. Is léir go bhfuil fiúntas mór ag baint leis an nGealltanas um Shábháilteacht Táirgí chun feabhas a chur ar chosaint tomhaltóirí ar tháirgí contúirteacha a dhíoltar ar líne. Chun cosaint tomhaltóirí a neartú trí dhamáiste dá mbeatha, dá sláinte agus dá sábháilteacht a sheachaint agus chun iomaíocht chothrom a áirithiú sa mhargadh inmheánach, spreagtar soláthraithe margaí ar líne tabhairt faoi na gealltanais dheonacha sin chun cosc a chur ar liostáil táirgí contúirteacha a tarraingíodh siar cheana féin bheith ag teacht chun cinn arís. Trí úsáid a bhaint as teicneolaíochtaí agus próisis dhigiteacha agus trí na feabhsuithe ar chórais foláirimh, go háirithe an Tairseach Safety Gate, is féidir táirgí contúirteacha ar tugadh fógra ina leith a shainaithint go huathoibríoch agus foláireamh a thabhairt ina leith go huathoibríoch agus seiceálacha randamacha uathoibrithe a dhéanamh i gcoinne na Tairsí Safety Gate.

(49)

Ba cheart do sholáthraithe margaí ar líne gníomhú leis an gcúram is cuí i ndáil leis an ábhar a óstáiltear ar a gcomhéadain ar líne agus a bhaineann le sábháilteacht táirgí, i gcomhréir leis na hoibleagáidí sonracha a leagtar síos sa Rialachán seo. Dá réir sin, ba cheart oibleagáidí díchill chuí a leagan síos sa Rialachán seo do gach soláthraí margaí ar líne maidir leis an ábhar a óstáiltear ar a gcomhéadain ar líne a bhaineann le sábháilteacht táirgí.

(50)

Thairis sin, chun críocha an fhaireachais margaidh éifeachtaigh, ba cheart do sholáthraithe margaí ar líne clárú ar an Tairseach Safety Gate agus an fhaisnéis a bhaineann lena bpointe teagmhála aonair a léiriú sa Tairseach Safety Gate chun comhroinnt faisnéise faoi shaincheisteanna sábháilteachta táirgí a éascú. Ba cheart don Choimisiún a áirithiú go bhfuil an clárú éasca agus soláimhsithe don úsáideoir. D’fhéadfadh gurb ionann an pointe teagmhála aonair faoin Rialachán seo agus an pointe teagmhála faoi Airteagal 11 de Rialachán (AE) 2022/2065, gan an cuspóir a chur i mbaol arb é fadhbanna a bhaineann le sábháilteacht táirgí a láimhseáil ar bhealach tapa sonrach.

(51)

Ba cheart do sholáthraithe margaí ar líne pointe teagmhála aonair a ainmniú do thomhaltóirí. Ba cheart don phointe teagmhála aonair feidhmiú mar fhuinneog aonair do theachtaireachtaí ó thomhaltóirí maidir le saincheisteanna sábháilteachta táirgí, ar féidir iad a atreorú ansin chuig an aonad seirbhíse cuí i margadh ar líne. Níor cheart don mhéid sin cosc a chur ar phointí teagmhála breise le haghaidh seirbhísí sonracha a chur ar fáil do thomhaltóirí. D’fhéadfadh gurb ionann an pointe teagmhála aonair faoin Rialachán seo agus an pointe teagmhála faoi Airteagal 12 de Rialachán (AE) 2022/2065.

(52)

Ionas go mbeidh siad in ann a n-oibleagáidí faoin Rialachán seo a chomhlíonadh, go háirithe maidir le horduithe ó údaráis phoiblí a chomhlíonadh go tráthúil agus go héifeachtach, fógraí ó thríú páirtithe eile a phróiseáil, agus comhar le húdaráis um fhaireachas margaidh i gcomhthéacs bearta ceartaitheacha arna n-iarraidh sin, ba cheart sásra inmheánach a bheith ag soláthraithe margaí ar líne chun saincheisteanna a bhaineann le sábháilteacht táirgí a láimhseáil.

(53)

Le hAirteagal 14(4) de Rialachán (AE) 2019/1020, tugtar de chumhacht do na húdaráis um fhaireachas margaidh, i gcás nach bhfuil aon mhodh éifeachtach eile ar fáil chun deireadh a chur le riosca tromchúiseach, chun a cheangal go ndéanfaí ábhar a thagraíonn do na táirgí gaolmhara a bhaint de chomhéadan ar líne nó a cheangal go ndéanfaí rabhadh go follasach d’úsáideoirí deiridh nuair a dhéanann siad comhéadan ar líne a rochtain. Na cumhachtaí a thugtar do na húdaráis um fhaireachas margaidh le hAirteagal 14(4) de Rialachán (AE) 2019/1020, ba cheart feidhm a bheith acu maidir leis an Rialachán seo freisin. Ionas gur féidir faireachas éifeachtach ar an margadh a dhéanamh faoin Rialachán seo agus chun a sheachaint go mbeadh táirgí contúirteacha ar mhargadh an Aontais, ba cheart feidhm a bheith ag na cumhachtaí sin maidir le gach cás atá riachtanach agus comhréireach agus i gcás táirgí freisin a bhfuil riosca nach bhfuil chomh tromchúiseach sin ag baint leo. Tá sé ríthábhachtach go gcomhlíonann soláthraithe margaí ar líne orduithe den sórt sin mar ábhar práinne. Dá bhrí sin, ba cheart a thabhairt isteach leis an Rialachán seo teorainneacha ama ceangailteacha ina leith sin. Ba cheart na cumhachtaí sin a fheidhmiú i gcomhréir le hAirteagal 9 de Rialachán (AE) 2022/2065.

(54)

Le horduithe lena gceanglaítear ar sholáthraí margaidh ar líne freisin an t-ábhar comhionann go léir a thagraíonn don tairiscint ar tháirge contúirteach a shonraítear san ordú a bhaint dá chomhéadan ar líne, ba cheart na heilimintí a shainaithint lena gcinnfear soláthraí margaidh ar líne agus lena gceadófar dó tairiscintí comhionanna a bhaint, bunaithe ar an bhfaisnéis arna taispeáint ag na trádálaithe, a mhéid nach gceanglaítear ar sholáthraí margaidh ar líne measúnú neamhspleách a dhéanamh ar an ábhar sin.

(55)

I gcás nach bhfuil aimsitheoir aonfhoirmeach acmhainne cruinn (URL) ná, i gcás inar gá, faisnéis bhreise lenar féidir an t-ábhar a thagraíonn do thairiscint ar tháirge contúirteach a shainaithint san fhaisnéis ón gCóras Mear-Rabhaidh Safety Gate, ba cheart do sholáthraithe margaí ar líne, mar sin féin, an fhaisnéis a tarchuireadh a chur san áireamh, amhail aitheantóirí táirgí, nuair a bhíonn siad ar fáil, agus faisnéis inrianaitheachta eile, i gcomhthéacs aon bhearta arna nglacadh ag soláthraithe margaí ar líne ar a dtionscnamh féin a bhfuil sé d’aidhm acu rochtain ar thairiscintí den sórt sin ar tháirgí contúirteacha ar a gcomhéadan ar líne a bhrath, a shainaithint, a bhaint nó a dhíchumasú, i gcás inarb infheidhme. Mar sin féin, ba cheart an Tairseach Safety Gate a nuachóiriú agus a thabhairt cothrom le dáta chun é a dhéanamh níos éasca do sholáthraithe margaí ar líne táirgí neamhshábháilte a bhrath agus, leis an aidhm sin, ba cheart é a bheith indéanta forálacha an Rialacháin sin a chur chun feidhme maidir le hábhar a thagraíonn do thairiscint ar tháirge contúirteach a bhaint de chomhéadain ar líne trí chóras fógartha arna dhearadh agus arna fhorbairt laistigh den Tairseach Safety Gate.

(56)

Níor cheart do na hoibleagáidí a fhorchuirtear leis an Rialachán seo ar sholáthraithe margaí ar líne a bheith ina n-oibleagáid ghinearálta maidir le faireachán a dhéanamh ar an bhfaisnéis a tharchuireann nó a stórálann siad, ná níor cheart dóibh ceangal a chur ar sholáthraithe margaí ar líne fíorais nó imthosca a lorg go gníomhach lena léirítear gníomhaíocht neamhdhleathach, amhail díol táirgí contúirteacha ar líne. Mar sin féin, chun tairbhe a bhaint as an díolúine ó dhliteanas i leith seirbhísí óstála faoi Threoir 2000/31/CE agus faoi Rialachán (AE) 2022/2065, ba cheart do sholáthraithe margaí ar líne ábhar a thagraíonn do thairiscint ar tháirge contúirteach a bhaint dá gcomhéadain ar líne go tapa, tar éis dóibh eolas iarbhír a fháil nó, i gcás éilimh ar dhamáistí, nuair a thagann siad ar an eolas faoin ábhar a thagraíonn do thairiscint ar tháirge contúirteach, go háirithe i gcásanna inar cuireadh soláthraí an mhargaidh ar líne ar an eolas faoi fhíorais nó imthosca ar ar a mbonn ba cheart d’oibreoir eacnamaíoch dícheallach an neamhdhleathacht atá i gceist a shainaithint. Ba cheart do sholáthraithe margaí ar líne fógraí a phróiseáil a bhaineann le hábhar a thagraíonn do thairiscint ar tháirge contúirteach, fógraí a fhaightear i gcomhréir le hAirteagal 16 de Rialachán (AE) 2022/2065, laistigh de na tréimhsí ama breise a bhunaítear leis an Rialachán seo. Ina theannta sin, spreagtar soláthraithe margaí ar líne táirgí a bhfuil Tairseach Safety Gate acu a sheiceáil sula gcuireann siad ar a gcomhéadan iad.

(57)

Chun críocha Airteagal 22 de Rialachán (AE) 2022/2065, agus a mhéid a bhaineann le sábháilteacht táirgí a dhíoltar ar líne, ba cheart don Chomhordaitheoir Seirbhísí Digiteacha eagraíochtaí agus comhlachais tomhaltóirí a dhéanann ionadaíocht ar son leasanna tomhaltóirí agus geallsealbhóirí ábhartha eile go háirithe a mheas mar chomharthóirí iontaofa, arna iarraidh sin dóibh, ar choinníoll gur comhlíonadh na coinníollacha a leagtar amach san Airteagal sin.

(58)

Is rud ríthábhachtach í an inrianaitheacht táirgí chun faireachas margaidh éifeachtach a dhéanamh ar tháirgí contúirteacha agus chun bearta ceartaitheacha a dhéanamh. Ina theannta sin, ba cheart tomhaltóirí a chosaint ar tháirgí contúirteacha ar an gcaoi chéanna sna bealaí díolacháin as líne agus ar líne, lena n-áirítear agus iad ag ceannach táirgí ar mhargaí ar líne. D’fhonn cur le forálacha Rialachán (AE) 2022/2065 a bhaineann le hinrianaitheacht trádálaithe, níor cheart do sholáthraithe margaí ar líne ligean do thairiscint ar tháirge sonrach a bheith liostaithe ar a n-ardán mura rud é gur sholáthair an trádálaí an fhaisnéis ar fad a bhaineann le sábháilteacht agus inrianaitheacht táirgí mar a shonraítear sa Rialachán seo. Ba cheart faisnéis den sórt sin a thaispeáint in éineacht le liostáil an táirge ionas gur féidir le tomhaltóirí leas a bhaint as an bhfaisnéis chéanna a chuirtear ar fáil ar líne agus as líne. Mar sin féin, níor cheart do sholáthraithe margaí ar líne a bheith freagrach as iomláine, cruinneas agus beachtas na faisnéise féin a fhíorú, ós rud é gur ar an trádálaí ábhartha atá an oibleagáid inrianaitheacht táirgí a áirithiú.

(59)

Tá sé tábhachtach freisin go n-oibreodh soláthraithe margaí ar líne i ndlúthchomhar leis na húdaráis um fhaireachas margaidh, le trádálaithe agus leis na hoibreoirí eacnamaíocha ábhartha maidir le sábháilteacht táirgí. Le hAirteagal 7(2) de Rialachán (AE) 2019/1020, forchuirtear oibleagáid ar sholáthraithe seirbhíse sochaí faisnéise comhoibriú le húdaráis um fhaireachas margaidh i ndáil le táirgí a chumhdaítear leis an Rialachán sin. Dá bhrí sin, ba cheart an oibleagáid sin a leathnú chuig gach táirge tomhaltais. Mar shampla, tá na húdaráis um fhaireachas margaidh i gcónaí ag cur feabhas ar na huirlisí teicneolaíochta a úsáideann siad le haghaidh an fhaireachais margaidh ar líne chun táirgí contúirteacha a dhíoltar ar líne a shainaithint. Chun go mbeidh na huirlisí sin oibríochtúil, ba cheart do sholáthraithe margaí ar líne rochtain a thabhairt ar a gcomhéadain. Ina theannta sin, chun críoch na sábháilteachta táirgí, ba cheart an deis a bheith ag na húdaráis um fhaireachas margaidh freisin sonraí a chamchóipeáil ó chomhéadan ar líne ar iarraidh réasúnaithe a fháil i gcás bacainní teicniúla arna gcur i bhfeidhm ag soláthraithe margaí ar líne nó ag díoltóirí ar líne. Ba cheart do sholáthraithe margaí ar líne comhoibriú freisin maidir le haisghairmeacha táirgí agus maidir le tuairisciú tionóiscí.

(60)

An creat dlí le haghaidh faireachas margaidh ar tháirgí a chumhdaítear le reachtaíocht an Aontais um chomhchuibhiú agus a leagtar amach i Rialachán (AE) 2019/1020 agus an creat dlí maidir le faireachas margaidh ar tháirgí a chumhdaítear leis an Rialachán seo, ba cheart an dá chreat sin a bheith chomh comhleanúnach agus is féidir. Dá bhrí sin, tá sé riachtanach, a mhéid a bhaineann le gníomhaíochtaí faireachais margaidh, oibleagáidí, cumhachtaí, bearta, agus comhar i measc na n-údarás um fhaireachas margaidh, an dá thacar d’fhorálacha a ailíniú. Chun na críche sin, ba cheart feidhm a bheith ag Airteagal 10, Airteagal 11(1) go (7), Airteagail 12 go 15, Airteagal 16(1) go (5), Airteagail 18 agus 19 agus Airteagail 21 go 24 de Rialachán (AE) 2019/1020 freisin maidir le táirgí a chumhdaítear leis an Rialachán seo.

(61)

De bhun Rialachán (AE) Uimh. 952/2013 ó Pharlaimint na hEorpa agus ón gComhairle (18), cuirtear táirgí ó thríú tíortha a bheartaítear a chur ar fáil ar mhargadh an Aontais nó a bheartaítear lena n-úsáid phríobháideach nó lena dtomhailt phríobháideach laistigh de chríoch chustaim an Aontais faoin nós imeachta custaim darb ainm ‘scaoileadh i saorchúrsaíocht’. Is é is aidhm don nós imeachta sin na foirmiúlachtaí a leagtar síos i ndáil le hallmhairiú na n-earraí a chur i gcrích, lena n-áirítear forfheidhmiú na bhforálacha is infheidhme de dhlí an Aontais, ionas gur féidir na hearraí sin a chur ar fáil ar mhargadh an Aontais amhail aon táirge a dhéantar san Aontas. A mhéid a bhaineann le sábháilteacht tomhaltóirí, ceanglaítear ar na táirgí sin an Rialachán seo a chomhlíonadh agus, go háirithe, an ceanglas sábháilteachta ginearálta a leagtar síos sa Rialachán seo a chomhlíonadh.

(62)

Tá Caibidil VII de Rialachán (AE) 2019/1020, lena leagtar síos rialacha maidir le rialuithe ar tháirgí atá ag teacht isteach i margadh an Aontais, infheidhme go díreach cheana féin maidir le táirgí a chumhdaítear leis an Rialachán seo. Ba cheart do na húdaráis atá i gceannas ar na rialuithe sin iad a dhéanamh ar bhonn anailís riosca dá dtagraítear in Airteagail 46 agus 47 de Rialachán (AE) Uimh. 952/2013, na reachtaíochta cur chun feidhme agus na treorach comhfhreagraí. Dá bhrí sin, ní mhodhnaítear ar dhóigh ar bith leis an Rialachán seo Caibidil VII de Rialachán (AE) 2019/1020 ná an chaoi a n-eagraíonn na húdaráis atá i gceannas ar rialuithe ar tháirgí atá ag teacht isteach i margadh an Aontais iad féin nó a ndéanann siad a gcuid gníomhaíochtaí.

(63)

Ba cheart do na Ballstáit a áirithiú go bhfuil aon bhearta a dhéanann a n-údaráis inniúla faoin Rialachán seo faoi réir leigheasanna breithiúnacha éifeachtacha i gcomhréir le hAirteagal 47 den Chairt.

(64)

Ba cheart é a chur ar chumas na n-údarás náisiúnta na gníomhaíochtaí traidisiúnta faireachais margaidh atá dírithe ar shábháilteacht táirgí a chomhlánú le gníomhaíochtaí faireachais margaidh atá dírithe ar na nósanna imeachta inmheánacha um chomhréireacht arna gcur ar bun ag oibreoirí eacnamaíocha chun sábháilteacht táirgí a áirithiú. Ba cheart do na húdaráis um fhaireachas margaidh a bheith in ann a cheangal ar an monaróir a léiriú cé na táirgí eile a bhfuil an riosca céanna ag gabháil leo, ar táirgí iad a tháirgtear leis an nós imeachta céanna, a bhfuil na comhpháirteanna céanna iontu a mheastar a mbaineann riosca leo nó atá mar chuid den bhaisc tháirgthe chéanna.

(65)

Ba cheart do na Ballstáit a áirithiú freisin go bhfuil a ndóthain saineolais agus acmhainní ag na húdaráis um fhaireachas margaidh dá ngníomhaíochtaí forfheidhmiúcháin ar fad.

(66)

Ba cheart malartú faisnéise idir na Ballstáit agus an Coimisiún maidir le cur i bhfeidhm an Rialacháin seo a bhunú ar bhonn táscairí aschuir lena bhféadfaí éifeachtacht reachtaíocht an Aontais maidir le sábháilteacht táirgí a thomhas.

(67)

Ba cheart malartú faisnéise atá cruinn, éifeachtach agus tapa a bheith ann maidir le táirgí contúirteacha chun a áirithiú go ndéantar bearta iomchuí i ndáil leis na táirgí sin agus ar an gcaoi sin sláinte agus sábháilteacht na dtomhaltóirí a chosaint go hiomlán.

(68)

Ba cheart RAPEX a nuachóiriú chun gur féidir bearta ceartaitheacha níos éifeachtúla a dhéanamh ar fud an Aontais maidir le táirgí a bhfuil riosca ag baint leo, riosca a théann thar chríoch Ballstáit aonair. Is tráthúil an t-ainm giorraithe a athrú ó RAPEX go Safety Gate ar mhaithe le soiléireacht níos fearr agus for-rochtain níos fearr do thomhaltóirí. Tá trí ghné ag baint le Safety Gate: ar an gcéad dul síos, córas mear-rabhaidh maidir le táirgí contúirteacha neamhbhia trínar féidir le húdaráis náisiúnta agus leis an gCoimisiún faisnéis a mhalartú faoi tháirgí den sórt sin (an Córas Mear-Rabhaidh Safety Gate); ar an dara dul síos, tairseach ghréasáin chun an pobal a chur ar an eolas agus chun é a chur ar a gcumas gearáin a thíolacadh (an Tairseach Safety Gate); agus ar an tríú dul síos, tairseach ghréasáin lena gcuirtear ar chumas gnólachtaí a n-oibleagáid a chomhlíonadh maidir le húdaráis agus tomhaltóirí a chur ar an eolas faoi tháirgí contúirteacha agus faoi thionóiscí (Safety Buisness Gateway). Ba cheart comhéadain a bheith ann idir na heilimintí éagsúla de Safety Gate. Is é an Córas Mear-Rabhaidh Safety Gate an córas inmheánach trína ndéanann údaráis agus an Coimisiún faisnéis a mhalartú maidir le bearta a bhaineann le táirgí contúirteacha, agus ar féidir faisnéis rúnda a bheith ann. Ba cheart sliocht foláireamh a fhoilsiú ar an Tairseach Safety Gate chun an pobal a chur ar an eolas faoi tháirgí contúirteacha. Is é Safety Buisness Gateway an tairseach ghréasáin trína gcuireann gnólachtaí údaráis um fhaireachas margaidh na mBallstát ar an eolas faoi tháirgí contúirteacha agus faoi thionóiscí. Ba cheart don Choimisiún réiteach teicniúil a fhorbairt chun a áirithiú gur féidir an fhaisnéis arna hiontráil ag gnólachtaí in Safety Buisness Gateway atá ceaptha foláireamh a thabhairt do thomhaltóirí a chur ar fáil do thomhaltóirí ar an Tairseach Safety Gate gan moill mhíchuí. Ina theannta sin, ba cheart don Choimisiún comhéadan idir-inoibritheach a fhorbairt chun a chur ar chumas soláthraithe margaí ar líne a gcomhéadain a nascadh leis an Tairseach Safety Gate ar bhealach éasca, tapa agus iontaofa.

(69)

Ba cheart do na Ballstáit fógra a thabhairt sa Chóras Mear-Rabhaidh Safety Gate faoi bhearta ceartaitheacha éigeantacha agus deonacha lena gcuirtear cosc agus srian le táirge a d’fhéadfaí a mhargú, nó lena bhforchuirtear coinníollacha sonracha ar mhargú féideartha táirge den sórt sin, mar gheall ar riosca tromchúiseach do shláinte agus sábháilteacht na dtomhaltóirí nó, i gcás táirgí a chumhdaítear le Rialachán (AE) 2019/1020, do leasanna poiblí ábhartha eile de chuid úsáideoirí deiridh freisin.

(70)

Faoi Airteagal 34 de Rialachán (AE) 2019/1020, tá údaráis na mBallstát le fógra a thabhairt faoi bhearta a rinneadh i gcoinne táirgí a chumhdaítear leis an Rialachán sin, táirgí a bhfuil riosca nach bhfuil chomh tromchúiseach sin ag baint leo, agus an fógra sin a thabhairt tríd an gcóras faisnéise agus cumarsáide dá dtagraítear san Airteagal sin, ag an am céanna, d’fhéadfaí fógra a thabhairt faoi bhearta ceartaitheacha a rinneadh i gcoinne táirgí a chumhdaítear leis an Rialachán seo a bhfuil riosca nach bhfuil chomh tromchúiseach sin ag baint leo tríd an gCóras Mear-Rabhaidh Safety Gate. Ba cheart do na Ballstáit agus don Choimisiún faisnéis maidir le rioscaí tromchúiseacha do shláinte agus sábháilteacht na dtomhaltóirí a bhaineann le táirgí a chur ar fáil don phobal. Tá sé tráthúil do thomhaltóirí agus do ghnólachtaí gur sa Chóras Mear-Rabhaidh Safety Gate atá an fhaisnéis ar fad faoi bhearta ceartaitheacha a rinneadh i gcoinne táirgí a bhfuil riosca tromchúiseach ag baint leo, rud a fhágann gur féidir faisnéis ábhartha faoi tháirgí contúirteacha a chur ar fáil don phobal tríd an Tairseach Safety Gate. Tá sé tábhachtach a áirithiú go mbeidh an fhaisnéis sin ar fad ar fáil i dteanga oifigiúil nó i dteangacha oifigiúla Bhallstát cónaithe an tomhaltóra agus go scríobhtar ar bhealach soiléir intuigthe í. Dá bhrí sin, spreagtar na Ballstáit fógra a thabhairt sa Chóras Mear-Rabhaidh Safety Gate faoi na bearta ceartaitheacha ar fad a bhaineann le táirgí a mbaineann riosca do shláinte agus sábháilteacht na dtomhaltóirí leo.

(71)

I gcás nach mór fógra a thabhairt faoin bhfaisnéis sa chóras faisnéise agus cumarsáide i gcomhréir le Rialachán (AE) 2019/1020, is féidir fógraí den sórt sin a thíolacadh go díreach sa Chóras Mear-Rabhaidh Safety Gate nó is féidir iad a ghiniúint ón gcóras faisnéise agus cumarsáide le haghaidh faireachas margaidh dá bhforáiltear in Airteagal 34 de Rialachán (AE) 2019/1020. Chun na críche sin, ba cheart don Choimisiún an comhéadan a cuireadh ar bun le haghaidh aistriú faisnéise idir an córas faisnéise agus cumarsáide sin agus an Córas Mear-Rabhaidh Safety Gate a choinneáil ar bun agus a fhorbairt tuilleadh, chun iontráil dhúbailte sonraí a sheachaint agus chun aistriú den sórt sin a éascú.

(72)

Ba cheart don Choimisiún tairseach ghréasáin Safety Buisness Gateway a choinneáil ar bun agus a fhorbairt tuilleadh, rud a chuirfeadh ar chumas oibreoirí eacnamaíocha a n-oibleagáidí a chomhlíonadh maidir le húdaráis um fhaireachas margaidh agus tomhaltóirí a chur ar an eolas faoi tháirgí contúirteacha atá curtha ar fáil ar an margadh acu. Ba cheart go gcumasódh sé faisnéis a mhalartú go tapa agus go héifeachtúil idir oibreoirí eacnamaíocha agus údaráis náisiúnta, agus go n-éascódh sé d’oibreoirí eacnamaíocha faisnéis a chur ar fáil do thomhaltóirí.

(73)

D’fhéadfadh cásanna a bheith ann inar gá déileáil le riosca tromchúiseach ar leibhéal an Aontais nuair nach féidir an riosca a smachtú go sásúil trí bhearta arna nglacadh ag an mBallstát lena mbaineann nó trí aon nós imeachta eile faoi dhlí an Aontais. D’fhéadfadh sin a bheith i gceist go háirithe a mhéid a bhaineann le rioscaí nua atá ag teacht chun cinn nó iad sin a bhfuil tionchar acu ar thomhaltóirí leochaileacha. Ar an gcúis sin, ba cheart don Choimisiún a bheith in ann bearta a ghlacadh ar a thionscnamh féin nó arna iarraidh sin do na Ballstáit. Ba cheart bearta den sórt sin a chur in oiriúint do thromchúis agus práinn an cháis. Ina theannta sin, is gá foráil a dhéanamh maidir le sásra leormhaith trína bhféadfadh an Coimisiún bearta eatramhacha atá infheidhme láithreach a ghlacadh.

(74)

Tá cinneadh an riosca a bhaineann le táirge agus leibhéal an riosca sin bunaithe ar mheasúnú riosca arna dhéanamh ag na gníomhaithe ábhartha. Agus measúnú riosca den sórt sin á dhéanamh acu, d’fhéadfadh na Ballstáit torthaí éagsúla a bhaint amach a mhéid a bhaineann le riosca a bheith ann nó le leibhéal an riosca sin. D’fhéadfadh sé sin feidhmiú ceart an mhargaidh inmheánaigh agus cothrom iomaíochta do thomhaltóirí agus d’oibreoirí eacnamaíocha araon a chur i mbaol. Dá bhrí sin, ba cheart sásra a bhunú chun lamháil don Choimisiúin tuairim a thabhairt maidir leis an tsaincheist atá faoi dhíospóid.

(75)

Ba cheart don Choimisiún tuarascáil thréimhsiúil a tharraingt suas maidir le cur i bhfeidhm an tsásra faoi Airteagal 29, agus ba cheart an tuarascáil sin a thíolacadh do líonra Eorpach údaráis na mBallstát atá inniúil maidir le sábháilteacht táirgí faoin Rialachán seo (‘Líonra um Shábháilteacht Tomhaltóirí’). Ba cheart a shainaithint sa tuarascáil sin na príomhchritéir a chuireann na Ballstáit i bhfeidhm le haghaidh measúnú riosca agus a dtionchar ar an margadh inmheánach agus ar leibhéal comhionann cosanta do thomhaltóirí, agus é mar aidhm na Ballstáit agus an Coimisiúin a chur ar a gcumas na cineálacha cur chuige agus na critéir le haghaidh measúnú riosca a chomhchuibhiú.

(76)

Leis an Líonra um Shábháilteacht Tomhaltóirí, feabhsaítear an comhar idir na Ballstáit maidir le sábháilteacht táirgí a fhorfheidhmiú. Go háirithe, éascaítear leis gníomhaíochtaí malartaithe faisnéise, eagrú na ngníomhaíochtaí comhpháirteacha faireachais margaidh agus malartú saineolais agus an dea-chleachtas. Ba cheart dó rannchuidiú freisin le comhchuibhiú na modheolaíochtaí chun sonraí a bhailiú maidir le sábháilteacht táirgí, chomh maith le méadú ar an idir-inoibritheacht idir córais faisnéise réigiúnacha, earnálacha, náisiúnta agus Eorpacha le haghaidh sábháilteacht táirgí. Ba cheart ionadaíocht chuí a bheith ag an Líonra um Shábháilteacht Tomhaltóirí agus ba cheart dó páirt a ghlacadh i ngníomhaíochtaí comhordúcháin agus comhair de chuid Líonra an Aontais um Chomhlíonadh Táirgí dá bhforáiltear i Rialachán (AE) 2019/1020 nuair is gá comhordú a dhéanamh ar na gníomhaíochtaí a thagann faoi raon feidhme an dá Rialachán chun a n-éifeachtacht a áirithiú.

(77)

Chun comhleanúnachas an chreata dlí faireachais margaidh a chaomhnú agus, ag an am céanna, comhar éifeachtach a áirithiú idir an Líonra um Shábháilteacht Tomhaltóirí agus Líonra an Aontais um Chomhlíonadh Táirgí, atá dírithe ar chomhordú struchtúrtha agus comhar struchtúrtha idir údaráis forfheidhmiúcháin na mBallstát agus an Coimisiún dá bhforáiltear le Rialachán (AE) 2019/1020, is gá an Líonra um Shábháilteacht Tomhaltóirí a chomhlachú le Líonra an Aontais um Chomhlíonadh Táirgí sna gníomhaíochtaí dá dtagraítear in Airteagail 11, 12, 13 agus 21 de Rialachán (AE) 2019/1020.

(78)

Ba cheart d’údaráis um fhaireachas margaidh gníomhaíochtaí comhpháirteacha a dhéanamh le húdaráis nó eagraíochtaí eile a dhéanann ionadaíocht thar ceann oibreoirí eacnamaíocha nó tomhaltóirí, d’fhonn sábháilteacht táirgí a chur chun cinn agus táirgí contúirteacha a shainaithint, lena n-áirítear iad sin a thairgtear lena ndíol ar líne. Agus an méid sin á dhéanamh acu, ba cheart do na húdaráis um fhaireachas margaidh agus don Choimisiún a áirithiú, de réir mar is iomchuí, nach gcruthaítear staideanna a d’fhéadfadh an iomaíocht a shaobhadh nó difear a dhéanamh d’oibiachtúlacht, neamhspleáchas agus neamhchlaontacht na bpáirtithe mar gheall ar rogha na dtáirgí agus na dtáirgeoirí chomh maith leis na gníomhaíochtaí a dhéantar. Ba cheart do na húdaráis um fhaireachas margaidh na comhaontuithe maidir le gníomhaíochtaí comhpháirteacha a chur ar fáil don phobal a luaithe is féidir, ar choinníoll nach gcuireann foilsiú den sórt sin éifeachtacht na ngníomhaíochtaí atá le déanamh i mbaol.

(79)

Ba cheart don Choimisiún gníomhaíocht chomhpháirteach a eagrú, ar bhonn rialta, trínar cheart d’údaráis um fhaireachas margaidh cigireachtaí a dhéanamh ar tháirgí arna bhfáil faoi chéannacht cheilte ar líne nó as líne, go háirithe ar na táirgí sin is minice a dtugtar fógra fúthu laistigh den chóras Safety Gate.

(80)

Is é atá i gceist le gníomhaíochtaí rialaithe comhordaithe comhuaineacha (‘scuab-imscrúduithe’) gníomhaíochtaí forfheidhmiúcháin sonracha lena bhféadfaí sábháilteacht táirgí a fheabhsú tuilleadh agus ba cheart, dá bhrí sin, iad a dhéanamh chun sáruithe ar an Rialachán seo ar líne agus as líne a bhrath. Go háirithe, ba cheart scuab-imscrúduithe a dhéanamh i gcás ina dtugtar le tuiscint le treochtaí sa mhargadh, gearáin ó thomhaltóirí nó tásca eile gur minic a mheastar go mbaineann riosca tromchúiseach le táirgí áirithe nó catagóirí áirithe táirgí.

(81)

Ba cheart, mar riail ghinearálta, rochtain phoiblí ar an bhfaisnéis atá ar fáil do na húdaráis faoi shábháilteacht táirgí a áirithiú. Agus faisnéis faoi shábháilteacht táirgí á cur ar fáil don phobal, áfach, ba cheart rúndacht ghairmiúil, amhail dá dtagraítear in Airteagal 339 CFAE, a chosaint ar bhealach atá comhoiriúnach leis an ngá atá le héifeachtacht na ngníomhaíochtaí faireachais margaidh agus na mbeart cosanta a áirithiú.

(82)

Tá gearáin tábhachtach ó thaobh feasacht na n-údarás náisiúnta a ardú maidir le sábháilteacht agus éifeachtacht na ngníomhaíochtaí faireachais agus rialaithe a bhaineann le táirgí contúirteacha. Dá bhrí sin, ba cheart do na Ballstáit an deis a thabhairt do thomhaltóirí agus do pháirtithe leasmhara eile amhail comhlachais tomhaltóirí agus oibreoirí eacnamaíocha gearáin den sórt sin a thíolacadh.

(83)

Le comhéadan poiblí Chóras Mear-rabhaidh Safety Gate, an Tairseach Safety Gate, is féidir an pobal i gcoitinne, lena n-áirítear tomhaltóirí, oibreoirí eacnamaíocha agus soláthraithe margaí ar líne, a chur ar an eolas faoi bhearta ceartaitheacha a dhéantar i gcoinne táirgí contúirteacha atá ar mhargadh an Aontais. Le roinn ar leithligh den Tairseach Safety Gate, cuirtear ar chumas tomhaltóirí an Coimisiún a chur ar an eolas faoi tháirgí atá ar an margadh, ar táirgí iad a bhfuil riosca ag baint leo do shláinte agus sábháilteacht na dtomhaltóirí. I gcás inarb ábhartha, ba cheart don Choimisiún bearta leantacha leormhaithe a dhéanamh, go háirithe trí fhaisnéis den sórt sin a tharchur chuig na húdaráis náisiúnta lena mbaineann. Ba cheart rochtain éasca a bheith ag daoine faoi mhíchumas ar bhunachar sonraí agus suíomh gréasáin Safety Gate.

(84)

Tar éis cruinneas na faisnéise a fhaightear ó thomhaltóirí agus ó pháirtithe leasmhara eile a fhíorú, ba cheart don Choimisiún a áirithiú go ndéantar obair leantach iomchuí. Go háirithe, ba cheart don Choimisiún an fhaisnéis a chur ar aghaidh chuig na Ballstáit ábhartha ionas gur féidir leis an údarás inniúil um fhaireachas margaidh dul ar aghaidh de réir mar is iomchuí agus is gá. Tá sé tábhachtach go gcuirfí tomhaltóirí agus páirtithe leasmhara eile ar an eolas go cuí maidir le gníomhaíocht an Choimisiúin.

(85)

I gcás inar léir go bhfuil táirge a díoladh le tomhaltóirí cheana féin contúirteach, d’fhéadfadh sé gur ghá é a aisghairm chun tomhaltóirí san Aontas a chosaint. D’fhéadfadh sé nach mbeadh tomhaltóirí ar an eolas go bhfuil táirge aisghairthe acu. Chun cur le héifeachtacht i dtaca le haisghairm táirgí, tá sé tábhachtach, dá bhrí sin, teacht ar na tomhaltóirí lena mbaineann ar bhealach níos fearr. Is é teagmháil dhíreach an modh is éifeachtaí chun feasacht na dtomhaltóirí a mhéadú maidir le haisghairmeacha agus chun gníomhaíocht a spreagadh. Is é an bealach cumarsáide is fearr le tomhaltóirí é freisin ar fud gach grúpa tomhaltóirí. Chun sábháilteacht na dtomhaltóirí a áirithiú, tá sé tábhachtach iad a chur ar an eolas ar bhealach tapa iontaofa. Ba cheart d’oibreoirí eacnamaíocha agus, i gcás inarb infheidhme, do sholáthraithe margaí ar líne, dá bhrí sin, na sonraí custaiméirí atá ar fáil dóibh a úsáid chun tomhaltóirí a chur ar an eolas faoi aisghairmeacha agus rabhaidh shábháilteachta a bhaineann le táirgí a cheannaigh siad. Dá bhrí sin, tá gá le hoibleagáid dhlíthiúil chun é a chur de cheangal ar oibreoirí eacnamaíocha agus ar sholáthraithe margaí ar líne úsáid a bhaint as aon sonraí custaiméirí atá ar fáil dóibh cheana féin chun tomhaltóirí a chur ar an eolas faoi aisghairmeacha agus faoi rabhaidh shábháilteachta. I ndáil leis sin, ba cheart d’oibreoirí eacnamaíocha agus soláthraithe margaí ar líne a áirithiú gur féidir teagmháil dhíreach a dhéanamh le custaiméirí i gcás aisghairme nó rabhadh sábháilteachta a dhéanann difear dóibh trí bhíthin cláir dhílseachta do chustaiméirí agus córais cláraithe táirgí atá ann cheana, ar córais iad trína n-iarrtar ar chustaiméirí, tar éis dóibh táirge a cheannach, roinnt faisnéise amhail a n-ainm, a bhfaisnéis teagmhála, samhail an táirge nó an tsraithuimhir a chur in iúl don mhonaróir ar bhonn deonach. Fiú más amhlaidh go bhfuil aisghairmeacha dírithe ar thomhaltóirí, níor cheart cosc a chur ar oibreoirí eacnamaíocha agus ar sholáthraithe margaí ar líne gach custaiméir a chur ar an eolas faoi fhógra aisghairme táirge ná cosc a chur ar leigheasanna a thairiscint d’úsáideoirí deiridh eile. Ba cheart oibreoirí eacnamaíocha agus soláthraithe margaí ar líne a spreagadh chun gníomhaíochtaí den sórt sin a dhéanamh, go háirithe i gcás micrifhiontair agus fiontair bheaga a ghníomhaíonn ar nós tomhaltóirí.

(86)

Ba cheart tomhaltóirí a spreagadh chun táirgí a chlárú chun faisnéis a fháil faoi aisghairmeacha agus rabhaidh sábháilteachta. Ba cheart an chumhacht a thabhairt don Choimisiún gníomhartha cur chun feidhme a ghlacadh chun a shonrú, i gcás roinnt táirgí sonracha nó catagóirí sonracha táirgí, gur cheart an deis a bheith ag tomhaltóirí i gcónaí táirge a chlárú a cheannaigh siad chun fógra a fháil go díreach faoi aisghairm nó rabhadh sábháilteachta a bhaineann leis an táirge sin. Agus na táirgí sonracha nó catagóirí sonracha táirgí atá faoi réir an cheanglais sin á gcinneadh, ba cheart aird chuí a thabhairt ar shaolré na dtáirgí nó na gcatagóirí táirgí atá i gceist, agus ar na rioscaí a bhaineann leis na táirgí, ar mhinicíocht aisghairmeacha agus ar chatagóir úsáideoirí na dtáirgí, go háirithe tomhaltóirí leochaileacha.

(87)

Leanann an tríú cuid de thomhaltóirí de bheith ag úsáid táirgí contúirteacha d’ainneoin fógra aisghairme a bheith feicthe acu, go háirithe toisc go ndéantar fógraí aisghairme a dhréachtú ar bhealach casta nó go ndéantar an riosca atá i gceist a íoslaghdú leo. Dá bhrí sin, ba cheart don fhógra aisghairme a bheith soiléir, trédhearcach agus ba cheart dó tuairisc shoiléir a dhéanamh ar an riosca atá i gceist, agus aon téarma, nath nó eilimint eile a sheachaint más amhlaidh go bhféadfadh sé an tuiscint atá ag tomhaltóirí ar an riosca a laghdú. Ba cheart do thomhaltóirí a bheith in ann tuilleadh faisnéise a fháil freisin, más gá, trí uimhir theileafóin saor in aisce nó trí mhodh idirghníomhach eile.

(88)

Chun tomhaltóirí a spreagadh chun freagairt d’aisghairmeacha, tá sé tábhachtach freisin go ndéanfaí an ghníomhaíocht is gá do thomhaltóirí a dhéanamh chomh simplí agus is féidir agus go mbeadh na leigheasanna a thairgtear éifeachtach, saor ó chostas agus tráthúil. Le Treoir (AE) 2019/771 ó Pharlaimint na hEorpa agus ón gComhairle (19), cuirtear na leigheasanna conarthacha ar fáil do thomhaltóirí ar leigheasanna iad le haghaidh easpa comhréireachta i ndáil le hearraí fisiceacha, arb easpa í a bhí ann tráth an tseachadta agus a tháinig chun solais laistigh den tréimhse dhliteanais a leag na Ballstáit síos i gcomhréir le hAirteagal 10(3) den Treoir sin. Tá feidhm ag Airteagal 14 de Threoir (AE) 2019/770 ó Pharlaimint na hEorpa agus ón gComhairle (20) freisin maidir leis an meán inláimhsithe, amhail DVDanna, CDanna, méaróga USB agus cártaí cuimhne, a úsáidtear chun ábhar digiteach a iompar. Mar sin féin, le cásanna ina n-aisghairtear táirgí contúirteacha ón margadh, tugtar údar maith le tacar sonrach rialacha a bheith ann ar cheart iad a chur i bhfeidhm gan dochar do leigheasanna conarthacha toisc nach ionann a gcuspóirí. Cé go bhfuil sé d’aidhm ag leigheasanna conarthacha easpa comhréireachta na n-earraí leis an gconradh a leigheas, fónann na leigheasanna i gcás aisghairme chun a áirithiú go gcuirtear deireadh le táirgí contúirteacha ón margadh agus go bhfuil leigheas leormhaith ann don tomhaltóir. Mar thoradh air sin, tá difríochtaí móra idir an dá shraith leigheasanna féideartha: ar an gcéad dul síos, i gcás ina ndéantar táirge a aisghairm faoin Rialachán seo, níor cheart aon teorainn ama a bheith ann chun na leigheasanna a ghníomhachtú; ar an dara dul síos, ba cheart an tomhaltóir a bheith i dteideal leigheasanna a iarraidh ar an oibreoir eacnamaíoch ábhartha, rud nach gá a bheith i gceist i gcás an trádálaí. Thairis sin, i gcás aisghairme, níor cheart go mbeadh ar an tomhaltóir a chruthú go bhfuil an táirge contúirteach.

(89)

I bhfianaise chuspóirí éagsúla na leigheasanna a chuirtear ar fáil i gcás ina ndéantar táirge contúirteach a aisghairm agus i bhfianaise leigheasanna ar neamh-chomhréireacht earraí leis an gconradh, ba cheart do thomhaltóirí an córas a chomhfhreagraíonn don chás ábhartha a úsáid. Mar shampla, má fhaigheann an tomhaltóir fógra aisghairme ina bhfuil tuairisc ar na leigheasanna atá ar fáil don tomhaltóir, ba cheart don tomhaltóir gníomhú de réir na dtreoracha san fhógra aisghairme. Mar sin féin, níor cheart an deis a bhaint de nó di leigheasanna a iarraidh ón díoltóir bunaithe ar neamh-chomhréireacht na n-earraí contúirteacha leis an gconradh.

(90)

A luaithe atá leigheas curtha ar fáil don tomhaltóir mar bheart leantach ar aisghairm, ní fhéadfadh an tomhaltóir a bheith i dteideal leigheas ar neamh-chomhréireacht an earra leis an gconradh ar chúiseanna a bhaineann leis an táirge a bheith contúirteach toisc nach ann don neamh-chomhréireacht a thuilleadh. Ar an gcaoi chéanna, i gcás ina n-agraíonn an tomhaltóir cearta an tomhaltóra leigheas a fháil faoi Threoir (AE) 2019/770 nó (AE) 2019/771, níl an tomhaltóir i dteideal leigheas a fháil faoin Rialachán seo le haghaidh na saincheiste sábháilteachta céanna. Mar sin féin, mura gcomhlíontar ceanglais comhréireachta eile maidir leis an earra céanna, bheadh an díoltóir fós faoi dhliteanas neamh-chomhréireacht an earra leis an gconradh fiú má cuireadh leigheas ar fáil don tomhaltóir tar éis táirge contúirteach a aisghairm.

(91)

Ba cheart d’oibreoirí eacnamaíocha a thionscnaíonn aisghairm táirge dhá rogha ar a laghad a thairiscint do thomhaltóirí idir an táirge aisghairthe a dheisiú nó a athsholáthar nó aisíocaíocht leormhaith a dhéanamh ar luach an táirge, ach amháin i gcás ina bhfuil sé dodhéanta nó díréireach. Trí rogha a thabhairt do thomhaltóirí idir leigheasanna, is féidir éifeachtacht aisghairme a fheabhsú. Ina theannta sin, ba cheart dreasachtaí, amhail lascainí nó dearbháin, a chur chun cinn chun tomhaltóirí a spreagadh chun páirt a ghlacadh in aisghairm chun éifeachtacht na n-aisghairmeacha a mhéadú. Níor cheart a mheas gur leigheas féideartha é deisiú an táirge ach amháin más féidir sábháilteacht an táirge deisithe a áirithiú. Ba cheart méid na haisíocaíochta a bheith comhionann ar a laghad leis an bpraghas a d’íoc an tomhaltóir, gan dochar do chúiteamh breise dá bhforáiltear i ndlíthe náisiúnta. I gcás nach bhfuil cruthúnas ar an bpraghas a íocadh ar fáil, ba cheart aisíocaíocht leormhaith ar luach an táirge aisghairthe a sholáthar fós. I gcás ina n-aisghairtear an meán inláimhsithe le haghaidh ábhar digiteach de réir bhrí Airteagal 2, pointe (1), de Threoir (AE) 2019/770, ba cheart a chumhdach leis an aisíocaíocht na suimeanna uile arna n-íoc ag an tomhaltóir faoin gconradh, dá bhforáiltear in Airteagal 16(1) den Treoir sin. Níor cheart gur dochar aon leigheas do cheart na dtomhaltóirí chun damáistí a fháil faoin dlí náisiúnta.

(92)

Níor cheart do leigheasanna a thairgtear i gcás aisghairm táirge ar mhaithe le sábháilteacht ualach iomarcach a chur ar thomhaltóirí ná iad a chur i mbaol. Má bhaineann diúscairt an táirge aisghairthe leis an leigheas freisin, ba cheart an diúscairt sin a dhéanamh agus aird chuí á tabhairt ar na cuspóirí comhshaoil agus inbhuanaithe arna socrú ar leibhéal an Aontais agus ar an leibhéal náisiúnta. Ina theannta sin, níor cheart a mheas gur leigheas féideartha é deisiú ag tomhaltóirí ach amháin más féidir leis an tomhaltóir é a dhéanamh go héasca agus go sábháilte, mar shampla trí cheallra a athsholáthar nó trí iallacha rófhada a ghearradh ar bhall éadaigh do leanaí nuair a fhoráiltear dó sin san fhógra aisghairme. Thairis sin, níor cheart gur dochar an deisiú ag an tomhaltóir do chearta tomhaltóirí faoi Threoracha (AE) 2019/770 agus (AE) 2019/771. Dá bhrí sin, i gcásanna den sórt sin, níor cheart d’oibreoirí eacnamaíocha iallach a chur ar thomhaltóirí táirge contúirteach a dheisiú.

(93)

Leis an Rialachán seo, ba cheart oibreoirí eacnamaíocha agus soláthraithe margaí ar líne a spreagadh freisin chun meabhráin tuisceana dheonacha a dhéanamh le húdaráis inniúla, leis an gCoimisiún nó le heagraíochtaí a dhéanann ionadaíocht ar thomhaltóirí nó ar oibreoirí eacnamaíocha gealltanais dheonacha a bhaineann le sábháilteacht táirgí a dhéanamh, gealltanais a théann níos faide ná na hoibleagáidí dlíthiúla a leagtar síos i ndlí an Aontais.

(94)

Ba cheart tomhaltóirí a bheith i dteideal a gcearta a fhorfheidhmiú i ndáil leis na hoibleagáidí a fhorchuirtear ar oibreoirí eacnamaíocha nó ar sholáthraithe margaí ar líne faoin Rialachán seo trí chaingne ionadaíocha i gcomhréir le Treoir (AE) 2020/1828 ó Pharlaimint na hEorpa agus ón gComhairle (21). Chun na críche sin, ba cheart foráil a dhéanamh leis an Rialachán seo go bhfuil feidhm ag Treoir (AE) 2020/1828 maidir leis na caingne ionadaíocha a bhaineann le sáruithe ar an Rialachán seo a dhéanann díobháil do chomhleasanna tomhaltóirí nó ar féidir leo díobháil a dhéanamh dóibh. Ba cheart, dá bhrí sin, Iarscríbhinn I a ghabhann leis an Treoir sin a leasú dá réir. Is faoi na Ballstáit atá sé a áirithiú go léirítear an leasú ina mbearta trasuite arna nglacadh i gcomhréir leis an Treoir sin, cé nach bhfuil glacadh na mbeart trasuite náisiúnta i ndáil leis an méid sin mar choinníoll i dtaca le hinfheidhmeacht na Treorach sin maidir leis na caingne ionadaíochta sin. Maidir le hinfheidhmeacht na Treorach sin ar na caingne ionadaíocha a thugtar i gcoinne sáruithe a dhéanann oibreoirí eacnamaíocha nó soláthraithe margaí ar líne ar fhorálacha an Rialacháin seo a dhéanann díobháil do chomhleasanna tomhaltóirí nó ar féidir leo díobháil a dhéanamh dóibh, ba cheart don infheidhmeacht sin tosú ó dháta chur i bhfeidhm an Rialacháin seo. Go dtí an dáta sin, ba cheart do thomhaltóirí a bheith in ann brath ar infheidhmeacht Threoir (AE) 2020/1828 i gcomhréir le pointe 8 d’Iarscríbhinn I a ghabhann leis an Treoir sin.

(95)

Ba cheart don Aontas a bheith in ann comhoibriú le húdaráis rialála tríú tíortha nó eagraíochtaí idirnáisiúnta agus faisnéis a bhaineann le sábháilteacht táirgí a mhalartú leo faoi chuimsiú comhaontuithe arna dtabhairt i gcrích idir an tAontas agus tríú tíortha nó eagraíochtaí idirnáisiúnta nó faoi chuimsiú socruithe arna dtabhairt i gcrích idir an Coimisiún agus údaráis tríú tíortha nó eagraíochtaí idirnáisiúnta, agus freisin d’fhonn cúrsaíocht táirgí contúirteacha ar an margadh a chosc. Le comhar den sórt sin agus le malartú faisnéise den sórt sin, ba cheart rialacha an Aontais maidir le rúndacht agus cosaint sonraí pearsanta a urramú. Níor cheart sonraí pearsanta a aistriú ach a mhéid is gá malartú den sórt sin chun sláinte nó sábháilteacht tomhaltóirí a chosaint, agus chun na críche sin amháin.

(96)

Ba cheart malartú córasach faisnéise idir an Coimisiún agus tríú tíortha nó eagraíochtaí idirnáisiúnta faoi shábháilteacht táirgí tomhaltais agus faoi bhearta coisctheacha, sriantacha agus ceartaitheacha a bheith bunaithe ar chómhalartacht, lena mbaineann malartú faisnéise atá coibhéiseach ach nach gá gurb ionann é ar mhaithe lena chéile. D’fhéadfadh sé gurb é a bheadh i gceist le malartú faisnéise le tríú tír a tháirgeann earraí atá ceaptha chuig margadh an Aontais faisnéis roghnaithe a sheoladh ón gCóras Mear-Rabhaidh Safety Gate faoi tháirgí de thionscnamh an tríú tír sin. Mar mhalairt air sin, d’fhéadfadh an tríú tír sin faisnéis a sheoladh faoi na bearta leantacha a rinneadh ar bhonn na bhfógraí a fuarthas. Le comhar den sórt sin, d’fhéadfaí rannchuidiú leis an gcuspóir stop a chur le táirgí contúirteacha ag an bhfoinse agus cosc a chur orthu margadh an Aontais a bhaint amach.

(97)

Chun oibreoirí eacnamaíocha agus, i gcás inarb infheidhme, soláthraithe margaí ar líne a dhíspreagadh go héifeachtach ionas nach gcuirfidh siad táirgí contúirteacha ar an margadh, ba cheart do na pionóis a bheith in oiriúint don chineál sáraithe, don leas a d’fhéadadh an t-oibreoir eacnamaíoch nó soláthraí margadh ar líne a bhaint as, agus do chineál agus tromchúis na díobhála a bhain don tomhaltóir. Ba cheart na pionóis a bheith éifeachtach, comhréireach agus athchomhairleach.

(98)

Agus pionóis á ngearradh, ba cheart aird chuí a thabhairt ar chineál, tromchúis agus fad an tsáraithe atá i gceist. Ba cheart forchur na bpionós a bheith comhréireach agus i gcomhréir le dlí an Aontais agus an dlí náisiúnta, lena n-áirítear na coimircí nós imeachta is infheidhme agus prionsabail Chairt um Chearta Bunúsacha an Aontais Eorpaigh.

(99)

Chun ardleibhéal a chothabháil maidir le sláinte agus sábháilteacht na dtomhaltóirí, ba cheart an chumhacht chun gníomhartha a ghlacadh i gcomhréir le hAirteagal 290 CFAE a tharmligean chuig an gCoimisiún i dtaca le sainaithint agus inrianaitheacht táirgí a d’fhéadfadh a bheith ina riosca tromchúiseach do shláinte agus sábháilteacht na dtomhaltóirí agus i dtaca le feidhmiú an Chórais Mear-Rabhaidh Safety Gate, go háirithe chun na rialacha mionsonraithe agus na nósanna imeachta a ghlacadh maidir le malartú faisnéise maidir le bearta a chuirtear in iúl tríd an gCóras Mear-Rabhaidh Safety Gate agus critéir chun measúnú a dhéanamh ar an leibhéal riosca. Tá sé tábhachtach, go háirithe, go rachadh an Coimisiún i mbun comhairliúcháin iomchuí le linn a chuid oibre ullmhúcháin, lena n-áirítear ar leibhéal na saineolaithe, agus go ndéanfaí na comhairliúcháin sin i gcomhréir leis na prionsabail a leagtar síos i gComhaontú Idirinstitiúideach an 13 Aibreán 2016 maidir le Reachtóireacht Níos Fearr (22). Go sonrach, chun rannpháirtíocht chomhionann in ullmhú na ngníomhartha tarmligthe a áirithiú, faigheann Parlaimint na hEorpa agus an Chomhairle na doiciméid uile ag an am céanna leis na saineolaithe sna Ballstáit, agus bíonn rochtain chórasach ag a gcuid saineolaithe ar chruinnithe ghrúpaí saineolaithe an Choimisiúin a bhíonn ag déileáil le hullmhú na ngníomhartha tarmligthe.

(100)

Chun coinníollacha aonfhoirmeacha a áirithiú maidir leis an Rialachán seo a chur chun feidhme, ba cheart cumhachtaí cur chun feidhme a thabhairt don Choimisiún chun na ceanglais sábháilteachta shonracha a ghlacadh, chun na táscairí aischuir a chinneadh ar ina leith sin is gá do na Ballstáit sonraí a bhaineann le cur chun feidhme an Rialacháin seo a chur in iúl; chun cúraimí agus róil na bpointí teagmhála náisiúnta aonair a shonrú; chun bearta a ghlacadh a mhéid a bhaineann le gníomhaíocht an Aontais i gcoinne táirgí a bhfuil riosca tromchúiseach ag baint leo; chun na rialacha mionsonraithe a ghlacadh maidir le faisnéis a bheith á seoladh ag tomhaltóirí sa Tairseach Safety Gate; chun cur chun feidhme an chomhéadain idir-inoibrithigh ar an Tairseach Safety Gate a shonrú; chun na ceanglais a leagan amach maidir le táirgí a chlárú chun críoch a bhaineann le haisghairm táirgí ar mhaithe le sábháilteacht; agus chun an teimpléad le haghaidh fógra aisghairme a ghlacadh. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (23).

(101)

Ba cheart don Choimisiún gníomhartha cur chun feidhme atá infheidhme láithreach a ghlacadh, i gcásanna cuí-réasúnaithe agus nuair is gá sin, i ndáil le sláinte agus sábháilteacht na dtomhaltóirí, ar mhórchúiseanna práinne.

(102)

Ba cheart don Choimisiún meastóireacht a dhéanamh ar chur chun feidhme na bpionós a leagtar síos faoin Rialachán seo a mhéid a bhaineann lena n-éifeachtacht agus a n-éifeachtaí díspreagthacha, agus, i gcás inarb iomchuí, togra reachtach a ghlacadh i ndáil lena bhforfheidhmiú.

(103)

Ba cheart forálacha áirithe de Rialachán (AE) Uimh. 1025/2012 a leasú chun sainiúlachtaí an Rialacháin seo a chur san áireamh, agus go háirithe an gá atá ann leis na ceanglais sábháilteachta shonracha faoin Rialachán seo a chinneadh sula seoltar an iarraidh chuig an eagraíocht Eorpach um chaighdeánú.

(104)

Is díol conspóide é an léirmhíniú a d’fhéadfaí a bhaint as Treoir 87/357/CEE, lena gcumhdaítear táirgí tomhaltais nach bia-ábhar iad ach a bhfuil an chuma orthu gurb ea, agus a bhféadfaí iad a thabhairt in amhlachas bia-ábhair sa chaoi go bhféadfadh tomhaltóirí, go háirithe leanaí, iad a chur ina mbéal, iad a dhúil nó iad a ionghabháil, rud a d’fhéadfadh a bheith ina chúis, mar shampla, le plúchadh, nimhiú, nó polladh nó bac ar chonair an díleá. Thairis sin, glacadh an Treoir sin tráth a bhí an creat dlí le haghaidh sábháilteacht táirgí tomhaltais an-teoranta ó thaobh raon feidhme de. Ar na cúiseanna sin, ba cheart Treoir 87/357/CEE a aisghairm agus an Rialachán seo a chur ina hionad, go háirithe forálacha an Rialacháin seo lena n-áirithítear, tar éis measúnú riosca, gur cheart a mheas gur táirgí contúirteacha iad táirgí a d’fhéadfadh a bheith díobhálach nuair a chuirtear sa bhéal iad, nuair a dhéantar iad a dhúil nó a ionghabháil agus a bhféadfaí iad a thabhairt in amhlachas bia-ábhair i ngeall ar a gcruth, boladh, dath, cuma, pacáistiú, lipéadú, toirt, méid nó saintréithe eile. Agus a meastóireacht á déanamh acu, ba cheart do na húdaráis um fhaireachas margaidh a chur san áireamh, mar atá curtha san áireamh ag Cúirt Bhreithiúnais an Aontais Eorpaigh, inter alia, nach gá a léiriú trí shonraí oibiachtúla agus réasúnaithe go bhféadfadh rioscaí amhail plúchadh, nimhiú, nó polladh nó bac ar chonair an díleá, a bheith i gceist le táirgí a bhfuil cuma bhia orthu a chur sa bhéal, a dhúil nó a ionghabháil. Mar sin féin, ba cheart do na húdaráis náisiúnta inniúla measúnú a dhéanamh ar bhonn cás ar chás an bhfuil na táirgí sin contúirteach agus réasúnú a thabhairt i leith an mheasúnaithe sin.

(105)

Chun a dóthain ama a thabhairt d’oibreoirí eacnamaíocha agus do sholáthraithe margaí ar líne oiriúnú do cheanglais an Rialacháin seo, lena n-áirítear ceanglais faisnéise, is gá foráil a dhéanamh d’idirthréimhse leordhóthanach tar éis dháta theacht i bhfeidhm an Rialacháin seo ar lena linn is féidir táirgí a chumhdaítear le Treoir 2001/95/CE atá i gcomhréir leis an Treoir sin a chur ar an margadh fós. Dá bhrí sin, níor cheart do na Ballstáit bac a chur ar tháirgí den sórt sin a chur ar fáil ar an margadh, lena n-áirítear tairiscintí lena ndíol.

(106)

Ós rud é nach féidir leis na Ballstáit cuspóir an Rialacháin seo, eadhon feabhas a chur ar fheidhmiú an mhargaidh inmheánaigh agus ardleibhéal cosanta tomhaltóirí á sholáthar san am céanna, a ghnóthú go leordhóthanach i bhfianaise an ghá atá ann le hardleibhéal comhair agus gníomhaíochta comhleanúnaí idir údaráis inniúla na mBallstát agus le sásra chun faisnéis a mhalartú go tapa agus go héifeachtúil faoi tháirgí contúirteacha san Aontas, ach gur fearr is féidir, de bharr chineál uile-Aontais na faidhbe, é a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta mar a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun an cuspóir sin a ghnóthú.

(107)

Más gá sonraí pearsanta a phróiseáil chun críocha an Rialacháin seo, ba cheart próiseáil den sórt sin a dhéanamh i gcomhréir le dlí an Aontais maidir le cosaint sonraí pearsanta. Tá aon phróiseáil sonraí pearsanta faoin Rialachán seo faoi réir Rialacháin (AE) 2016/679 (24) agus (AE) 2018/1725 (25) agus Threoir 2002/58/CE (26) ó Pharlaimint na hEorpa agus ón gComhairle, de réir mar is infheidhme. I gcás ina dtuairiscíonn tomhaltóirí táirge sa Tairseach Safety Gate, níor cheart a stóráil ach na sonraí pearsanta sin atá riachtanach chun an táirge contúirteach a thuairisciú agus ar feadh tréimhse nach faide ná 5 bliana tar éis sonraí den sórt sin a iontráil. Níor cheart do mhonaróirí ná d’allmhaireoirí an clár de ghearáin ó thomhaltóirí a choimeád ach amháin fad is gá chun críoch an Rialacháin seo. Ba cheart do mhonaróirí agus d’allmhaireoirí, nuair is daoine nádúrtha iad, a n-ainmneacha a nochtadh chun a áirithiú go bhfuil an tomhaltóir in ann an táirge a shainaithint chun críche inrianaitheachta.

(108)

Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42 de Rialachán (AE) 2018/1725,