A.

de bhrí gur bunaíodh an Comhghnóthas ECSEL (an “Comhghnóthas”) an 6 Bealtaine 2014 le Rialachán (AE) Uimh. 561/2014 ón gComhairle (1), a tháinig i bhfeidhm an 27 Meitheamh 2014, ar feadh tréimhse go dtí an 31 Nollaig 2024, chun teacht in ionad agus i gcomharbas ar Chomhghnóthais ARTEMIS agus ENIAC;

B.

de bhrí gurb iad an tAontas, na Ballstáit agus, ar bhonn deonach, na tíortha comhlacaithe (na tíortha rannpháirteacha) agus cumainn na gcomhaltaí príobháideacha (na comhaltaí príobháideacha) a dhéanann ionadaíocht ar a gcomhchuideachtaí agus ar eagraíochtaí eile atá gníomhach i réimse na gcomhpháirteanna agus na gcóras leictreonacha san Aontas na comhaltaí den Chomhghnóthas;

C.

de bhrí go bhfuil na ranníocaíochtaí leis an gComhghnóthas do thréimhse iomlán an chláir Fís 2020 cothrom le suas go dtí EUR 1 184 874 000 ón Aontas (lena n-áirítear leithreasuithe CSTE) le haghaidh costais riaracháin agus oibríochta, ar a laghad EUR 1 170 000 000 ó na stáit rannpháirteacha le haghaidh na gcostas oibríochta agus i gcomhréir le ranníocaíocht airgeadais an Aontais, agus ar a laghad EUR 1 657 500 000 ó na comhaltaí príobháideacha;

1.

ag tabhairt dá haire go bhfuair an Chúirt Iniúchóirí (“an Chúirt”) ina tuarascáil (“tuarascáil na Cúirte”), go gcuirtear i láthair go cothrom i gcuntais bhliantúla an Chomhghnóthais, ar gach slí ábharach, staid airgeadais an Chomhghnóthais an 31 Nollaig 2020, torthaí a chuid oibríochtaí, a shreafaí airgid, agus na hathruithe ar ghlansócmhainní don bhliain a tháinig chun deiridh ansin, i gcomhréir lena rialachán airgeadais agus leis na rialacha cuntasaíochta arna nglacadh ag oifigeach cuntasaíochta an Choimisiúin; ag tabhairt dá haire, thairis sin, go bhfuil na bun-idirbhearta a ghabhann leis na cuntais dlíthiúil agus rialta, ar gach slí ábharach;

2.

ag tabhairt dá haire, i mbuiséad iomlán an Chomhghnóthais atá ar fáil don bhliain 2020, lena n-áirítear leithreasuithe neamhúsáidte ó bhlianta roimhe sin arna n-iontráil an athuair, ioncaim shannta agus ath-leithdháiltí don bhliain ina dhiaidh sin, go n-áirítear EUR 218 342 000 do leithreasuithe faoi chomhair gealltanas agus EUR 215 849 000 do leithreasuithe faoi chomhair íocaíochtaí, agus gurb ionann an ráta úsáide agus 99,59 % do leithreasuithe faoi chomhair gealltanas agus 88,63 % do leithreasuithe faoi chomhair íocaíochtaí;

3.

ag tabhairt dá haire, ón dtuarascáil ón gCúirt, ag deireadh 2020, go ndearna an tAontas ranníocaíocht EUR 573 197 000 chun gníomhaíochtaí an Seachtú Clár Réime de chuid an Chomhghnóthais a chómhaoiniú, amhail a aistríodh ó na Comhghnóthais ARTEMIS agus ENIAC i mí an Mheithimh 2014, agus EUR 10 390 000 breise chun na costais riaracháin ghaolmhara a chómhaoiniú);

4.

ag tabhairt dá haire gurbh ionann an gealltanas carntha do ghníomhaíochtaí an Seachtú Clár Réime arna glacadh ar láimh ag an gComhghnóthas i Meitheamh 2014 agus EUR 447 342 072 (EUR 101 425 148 ó ARTEMIS agus EUR 345 916 924 ó ENIAC) a raibh thart ar EUR 58 000 000 saortha ag an gComhghnóthas (thart ar EUR 16 800 000 ó ARTEMIS agus EUR 41 200 000 ó ENIAC) agus a raibh EUR 386 767 877 íoctha aige (EUR 83 822 121 ó ARTEMIS agus EUR 302 945 756 ó ENIAC) i ndeireadh 2020; ag tabhairt dá haire, thairis sin, nach mór, dá bhrí sin, EUR 2 544 641 (EUR 768 150 ó ARTEMIS agus EUR 1 776 491 ó ENIAC) a íoc fós sna blianta atá le teacht;

5.

ag tabhairt dá haire, ina theannta sin, ón tuarascáil ón gCúirt, maidir le buiséad íocaíochta 2020 an Chomhghnóthais a bhí ar fáil do thionscadail an Seachtú Clár Réime (EUR 20 317 158), gurbh ionann an ráta cur chun feidhme do leithreasuithe faoi chomhair íocaíochtaí agus 70 %;

6.

ag tabhairt dá haire go dtarraingíonn an Chúirt aird sa tuarascáil uaithi ar an bhfíoras, i rialacháin bhunaidh réamhtheachtaithe an Chomhghnóthais, ARTEMIS agus ENIAC, gur foráladh go dtacaítear lena ngníomhaíochtaí taighde agus nuálaíochta faoin Seachtú Clár Réime trí ranníocaíochtaí airgeadais ó na stáit rannpháirteacha, arb ionann iad agus ar a laghad 1,8 oiread de ranníocaíocht airgeadais oibríochtúil an Aontais, a íocfar le rannpháirtithe sa tionscadal, agus trí ranníocaíochtaí comhchineáil ó chomhaltaí príobháideacha, atá cothrom le méid ranníocaíocht na gcomhaltaí poiblí ar a laghad; á chur in iúl gurb oth léi nach nochtann cuntais bhliantúla shealadacha 2020 an Chomhghnóthais ná a tuarascáil ar bhainistíocht bhuiséadach agus airgeadais 2020 na meastacháin seo a leanas ar na ranníocaíochtaí airgeadais ó na Stáit Rannpháirteacha le tionscadail an Seachtú Clár Réime de chuid ARTEMIS agus ENIAC ná na ranníocaíochtaí comhchineáil arna ndéanamh ag eagraíochtaí taighde agus forbartha a ghlacann páirt i dtionscadail an Seachtú Clár Réime de chuid ARTEMIS agus ENIAC; ag tabhairt dá haire gur thug an Comhghnóthas freagra, murab ionann agus Fís 2020, nach ndearnadh riamh foráil, i rialacháin an Seachtú Clár Réime dá réamhtheachtaithe, maidir le tuairisciú den sórt sin ná nár ceanglaíodh amhlaidh a dhéanamh, agus, nuair a bhí ARTEMIS agus ENIAC ann, tar éis pléití le AS BUDG, go ndearnadh an cinneadh gan an fhaisnéis sin a áireamh sna cuntais bhliantúla; á iarraidh ar an gComhghnóthas tuairisc a thabhairt don údarás um urscaoileadh i ndáil leis sin;

7.

ag tabhairt dá haire, ó thuarascáil na Cúirte, maidir le cur chun feidhme bhuiséad an chláir Fís 2020, go gceanglaítear ar na Stáit Rannpháirteacha ranníocaíochtaí airgeadais a dhéanamh arb ionann iad agus ar a laghad EUR 1 170 000 le gníomhaíochtaí oibríochta an Chomhghnóthais agus, i ndeireadh 2020, go ndearna na Stáit Rannpáirteacha a ghlac páirt sna glaonna ar thograí 2014-2019 gealltanais chonarthacha a shíniú a bhí cothrom le EUR 936 588 004 agus gur dhearbhaigh siad ranníocaíochtaí airgeadais arbh ionann iad agus EUR 374 748 810 san iomlán (nó 40 % de na ranníocaíochtaí iomlána a gealladh), a d’íoc siad go díreach le tairbhithe thionscadail an chláir Fís 2020 ar thacaigh siad leo; ag tabhairt dá haire, thairis sin, go raibh difríocht idir méid na ranníocaíochta airgeadais ó na stáit rannpháirteacha agus méid ranníocaíocht airgeadais an Aontais ag deireadh na bliana 2020 mar gheall ar an bhfíoras nach n-aithníonn agus nach dtuairiscíonn an chuid is mó de na Stáit Rannpháirteacha a gcostais don Chomhghnóthas ach ar chur i gcrích thionscadail an chláir Fís 2020 a dtacaíonn siad leo;

8.

ag tabhairt dá haire ó thuarascáil na Cúirte, nach féidir leis an gComhghnóthas méid iarbhír ranníocaíochtaí comhchineáil chomhaltaí an tionscail a ríomh ach tar éis dó ranníocaíochtaí na Stát Rannpháirteach ag deireadh an chláir a bhailíochtú; ag tabhairt dá haire, dá bhrí sin, go ndéanann an Comhghnóthas meastachán ar ranníocaíochtaí comhchineáil chomhaltaí an tionscail bunaithe ar mhodheolaíocht ‘pro-rata temporis’ arna glacadh ag a Bhord Rialaithe; ag tabhairt dá haire gurb é sin an chúis gurbh ionann méid na ranníocaíochtaí tionscail comhchineáil agus EUR 896 524 611 ag deireadh 2020, ar méid measta é nach bhfuil bailíochtaithe go fóill, i gcomparáid le méid na ranníocaíochtaí tionscail comhchineáil bailíochtaithe arb ionann iad agus EUR 180 275 376; ag tabhairt dá haire, ina theannta sin, bunaithe ar na sonraí tionscadail maidir leis na glaonna ar thograí 2014-2019 arna ndéanamh ag an gComhghnóthas faoi chuimse an chláir Fís 2020, gurbh ionann oibleagáidí gaolmhara chomhaltaí an tionscail i leith ranníocaíochtaí comhchineáil agus EUR 1 384 176 208 an 31 Nollaig 2020;

9.

ag tabhairt dá haire go bhfuil nósanna imeachta éagsúla ann ó Chomhghnóthas go chéile maidir le ríomh na ranníocaíochtaí comhchineáil agus á iarraidh go ndéanfaí iad a chomhchuibhiú;

10.

ag tabhairt dá haire, maidir le buiséad 2020 an Chomhghnóthais a bheidh ar fáil do thionscadail an chláir Fís 2020, gurbh ionann na rátaí cur chun feidhme le haghaidh leithreasuithe faoi chomhair oibleagáidí agus leithreasuithe faoi chomhair íocaíochtaí agus 100 % agus 91 % faoi seach;

11.

ag tabhairt dá haire, ó thuarascáil na Cúirte, in 2020, gur athghníomhachtaigh an Comhghnóthas EUR 57 259 000 de leithreasuithe neamhúsáidte faoi chomhair íocaíochtaí sa bhuiséad oibríochtúil le haghaidh ghníomhaíochtaí an chláir Fís 2020; ag tabhairt dá haire, áfach, nár fhéad an Comhghnóthas ach EUR 39 981 000 (nó 70 %) de na leithreasuithe athghníomhachtaithe a úsáid roimh leithreasuithe na bliana a úsáid; ag tabhairt dá haire gur thug an Comhghnóthas freagra go raibh uainiú an athghníomhachtaithe le linn ráithe 3 2020 lastall de rún agus rialú an Chomhghnóthais mar gheall ar iarraidh ghaolmhar a bhí ar feitheamh nár údaraíodh go dtí tús mhí Mheán Fómhair 2020 agus, mar sin féin, nuair a rinneadh an t-athghníomhú, go ndearnadh gach íocaíocht trí leithreasuithe tosaíochta athghníomhachtaithe, i gcomhréir lena rialacha airgeadais, agus, thairis sin, go bhfuil an Comhghnóthas tiomanta d’aon leithreasuithe neamhúsáidte a athghníomhachtú laistigh de 3 bliana airgeadais agus do thús áite a thabhairt dá n-úsáid de réir a rialacha airgeadais agus measann sé, faoi dheireadh 2021, go ndéanfar aon leithreasuithe oibríochtúla faoi chomhair íocaíochtaí atá fágtha a athghníomhachtú agus a úsáid; á iarraidh ar an gComhghnóthas tuairisc a thabhairt don údarás um urscaoileadh i ndáil leis sin;

12.

ag tabhairt dá haire go n-úsáideann an Comhghnóthas eochairtháscairí feidhmíochta comhchoiteanna de chuid an chláir Fís 2020 chun faireachán a dhéanamh ar fheidhmíocht agus ar shaincheisteanna tras-earnála, chomh maith le heochairtháscairí feidhmíochta a bhaineann go sonrach leis an gComhghnóthas;

13.

ag tabhairt dá haire gurbh é 2020 an uair dheireanach a sheol an Comhghnóthas glaonna ar thograí, eadhon dhá Ghníomhaíocht Taighde agus Nuálaíochta (RIA), Gníomhaíocht Nuálaíochta (IA) amháin agus Gníomhaíocht Comhordaithe agus Tacaíochta (CSA) amháin, ar cuireadh 44 thogra incháilithe isteach ina leith agus faoi dheireadh, gur tugadh cistiú d’ocht RIA, do shé IA agus do thograí CSA; ag tabhairt dá haire gur ann do phunainn tionscadal domhanda, ina bhfuil 96 thionscadal; ag tabhairt dá haire, thairis sin, gur ann do thrí thionscnamh tí solais: Mobility.E, Industry4.E agus Health.E, lena ndéantar comhar laistigh de chomhphobal ECS, agus idir an comhphobal agus úsáideoirí teicneolaíochta, comhlachtaí cinnteoireachta, agus an tsochaí a chur chun cinn ionas go mbeidh fíorthionchar níos tapúla ag teicneolaíochtaí agus nuálaíochtaí ar ghnó, ar an ngeilleagar agus ar thomhaltóirí;

14.

ag tabhairt dá haire, maidir le cothromaíocht inscne i dtionscadail an Chomhghnóthais, go léirítear i dtuarascáil bhliantúil 2020 ar ghníomhaíochtaí líon iomlán na mban agus na bhfear atá rannpháirteach i dtionscadail agus gurb ionann agus 19 % líon iomlán na mban atá rannpháirteach i dtionscadail ó ghlaonna 2014-2018, a bhfuil baint ag 66 % díobh le gníomhaíochtaí taighde agus a bhfuil baint ag 34 % díobh le gníomhaíochtaí neamhthaighde, agus go bhfuil baint le taighde ag 80 % den 81 % eile, ar fir iad, agus go bhfuil baint ag 20 % díobh le gníomhaíochtaí neamhthaighde;

15.

ag tabhairt dá haire gur fhostaigh an Comhghnóthas 29 mball foirne an 31 Nollaig 2020, lena n-áirítear gníomhairí sealadacha agus gníomhairí ar conradh agus saineolaithe náisiúnta ar iasacht; ag tabhairt dá haire gur sheol an Comhghnóthas nós imeachta earcaíochta nua i mí Mheán Fómhair 2020 do phost an chúntóra airgeadais/riaracháin; ag tabhairt dá haire, thairis sin gur ghlac Bord Rialaithe an Chomhghnóthais, i mí Bhealtaine 2020, sraith nua rialacha cur chun feidhme do na rialacháin foirne;

16.

ag tabhairt dá haire, agus é ina chúis bhuartha di, gur ann do dhúshláin a bhaineann le paindéim COVID-19 d’fhostaithe, go háirithe agus dálaí maireachtála éagsúla á gcur san áireamh, an easpa rochtana ar spás oifige agus na héifeachtaí a d’fhéadfadh a bheith ag an leithlisiú; á iarraidh ar an gComhghnóthas díriú ar dhea-bhail na bhfostaithe, ar bhainistiú struis agus ar chothromaíocht oibre agus saoil; á iarraidh ar bhainistíocht an Chomhghnóthais a áirithiú go bhfuil struchtúir tacaíochta iomchuí i bhfeidhm chun dea-bhail shíceolaíoch na foirne a áirithiú;

17.

ag tabhairt dá haire, ó thuarascáil na Cúirte, nach bhfuil sé i gceist ag an gComhghnóthas modúil uile an ardáin soláthair a úsáid mar gheall ar líon íseal na nósanna imeachta ardluacha soláthair atá ann; á iarraidh ar an gComhghnóthas, mar sin féin, i gcomhréir leis an bprionsabal maidir le malartú aonair leictreonach sonraí, dá bhforáiltear sa Rialachán Airgeadais, a bheith páirteach i réiteach ríomhsholáthair an Choimisiúin chun an iomaíocht a áirithiú ar an mbonn is leithne is féidir; ag tabhairt dá haire gur bhain an Comhghnóthas an úsáid ba mhó ab fhéidir úsáid as na comhaontuithe éagsúla ar leibhéal seirbhíse a tugadh i gcrích cheana féin leis na seirbhísí ábhartha de chuid an Choimisiúin agus lena chomhaltaí príobháideacha agus gur bhain sé úsáid as creatchonarthaí idirinstitiúideacha agus, in 2020, gur reáchtáil an Comhghnóthas fíor-bheagán nósanna imeachta soláthair, go príomha do chonarthaí ar luach íseal, agus ceann amháin chun tús a chur an athuair leis an iomaíocht;

18.

ag tabhairt dá haire gur aistrigh an Comhghnóthas, le linn 2020, chuig córas prionsabalbhunaithe chun a creat rialaithe inmheánach (ICF) a ailíniú leis an gcreat rialaithe athbhreithnithe arna ghlacadh ag an gCoimisiún; ag tabhairt dá haire, ón tuarascáil maidir le hobair leantach ar urscaoileadh 2019, gur glacadh ICF athbhreithnithe le cinneadh ón mBord Rialaithe i mí Lúnasa 2020 agus, faoi dheireadh na bliana sin, go ndearna an Comhghnóthas a chéad fhéin-mheasúnú; ag tabhairt dá haire, ina theannta sin, go ndearnadh measúnú riosca sonrach maidir le COVID-19 in 2020; ag tabhairt dá haire, ina theannta sin, gur glacadh rialacha airgeadais athbhreithnithe an Chomhghnóthais i Márta 2020;

19.

ag tabhairt dá haire, ón tuarascáil ón gCúirt, gur lean comhaontuithe riaracháin arna dtabhairt i gcrích ag na Comhghnóthais ARTEMIS agus ENIAC leis na húdaráis náisiúnta um chistiú (NFAnna) d’fheidhm a bheith acu ó chumascadh na comhghnóthais sin chun an Comhghnóthas a chruthú; ag tabhairt dá haire, faoi na comhaontuithe sin, gur bhrath straitéisí iniúchóireachta ex-post ARTEMIS agus ENIAC go mór ar NFAnna chun iniúchadh a dhéanamh ar éilimh ar chostais tionscadal, agus gur ghlac an Comhghnóthas céimeanna chun measúnú a dhéanamh ar chur chun feidhme iniúchtaí ex-post arna ndéanamh ag NFAnna agus go bhfuair sé ráitis i scríbhinn ó NFAnna ina ndearbhaítear go soláthraítear urrús réasúnach le cur chun feidhme a nósanna imeachta náisiúnta maidir le dlíthiúlacht agus rialtacht a n-idirbheart;

20.

ag tabhairt dá haire, thairis sin, ó thuarascáil na Cúirte, mar gheall ar an éagsúlacht shuntasach atá ann idir na modheolaíochtaí agus na nósanna imeachta arna n-úsáid ag údaráis cistithe náisiúnta na Stát Rannpháirteach, nach féidir leis an gComhghnóthas aon ráta earráide ualaithe iontaofa ná ráta earráide iarmhar a ríomh i leith íocaíochtaí leis an Seachtú Clár Réime; ag tabhairt a haire, i gcás thionscadail an Seachtú Clár Réime, gurbh ionann na híocaíochtaí a rinne an Comhghnóthas in 2020 agus EUR 14 287 435 (i gcomparáid le EUR 20 305 796 in 2019), arbh ionann iad agus 7,7 % (i gcomparáid le 11,2 % in 2019) d’iomlán na n-íocaíochtaí oibríochtúla a rinne an Comhghnóthas in 2020; ag tabhairt dá haire, maidir leis na híocaíochtaí sin, gur chuir an Chúirt an ráta earráidí iarmharacha i bhfeidhm arna bhunú ag Ard-Stiúrthóireacht an Taighde agus na Nuálaíochta don Seachtú Clár Réime ina iomláine, arbh ionann agus 3,51 % é; ag tabhairt dá haire gur thug an Comhghnóthas freagra gur ghlac sé céimeanna chun dul i ngleic leis an toradh athfhillteach sin agus á mheas go bhfuil na bearta sin (ráitis bliantúla NFA i scríbhinn) leormhaith, rud a dhearbhaíonn an t-údarás buiséadach, agus go ndearnadh foráil i rialacháin bhunaidh na gComhghnóthas “go bhféadfaidh Ballstáit ARTEMIS/ENIAC aon seiceálacha agus iniúchtaí eile a dhéanamh i measc fhaighteoirí a gcistithe náisiúnta a mheasann siad is gá agus cuirfidh siad na torthaí in iúl do Chomhghnóthas ARTEMIS/ENIAC”;

21.

ag tabhairt dá haire, ina theannta sin, ón tuarascáil ón gCúirt, i bhfianaise cheatadán íseal na n-íocaíochtaí leis an Seachtú Clár Réime in 2020 (thart ar 8,6 %) go meastar go bhfuil an ráta earráidí iarmharacha d’íocaíochtaí oibríochtúla an Chomhghnóthais san iomlán in 2020 níos ísle ná an tairseach ábharthachta;

22.

ag tabhairt dá haire, ón tuarascáil ón gCúirt, go ndéanann Comhsheirbhís Iniúchóireachta an Choimisiúin (CAS) iniúchtaí ex-post ar chaiteachas agus, bunaithe ar na torthaí iniúchta a bhí ar fáil ag deireadh 2020, gur thuairiscigh an Comhghnóthas ráta earráide ionadaíoch 2,86 % agus ráta earráidí iarmharacha 1,25 % i leith an chláir Fís 2020; ag tabhairt dá haire gur mheas an Coimisiún ina thogra le haghaidh rialachán maidir leis an gclár Fís 2020 gurb é an aidhm dheiridh atá leis an leibhéal earráidí iarmharacha tráth a dhúnfar na cláir tar éis do thionchar airgeadais na n-iniúchtaí agus na mbeart ceartúcháin agus aisghabhála uile a bheith curtha san áireamh ná leibhéal a bhaint amach atá chomh gar agus is féidir do 2 %;

23.

ag tabhairt dá haire go ndearna an Chúirt iniúchadh ar íocaíochtaí a rinneadh in 2020 leis an gclár Fís Eorpach, arna sampláil go randamach, ar leibhéal na dtairbhithe deiridh chun comhthacú leis na rátaí earráide iniúchóireachta ex-post; ag tabhairt dá haire gur nocht na hiniúchtaí mionsonraithe sin go raibh earráidí sistéamacha ann i gcás amháin arbh ionann iad agus níos mó ná 1 % de na costais iniúchóireachta a bhaineann le ríomh na gcostas foirne dearbhaithe agus sa dara cás, gur dhearbhaigh an tairbhí costais dhíreacha i ndáil le seirbhísí a cheannach ó thairbhí eile, a bhí mar chuid de chuibhreannas tionscadal nár sholáthar an tairbhe réasúnú a raibh údar cuí leis ina leith, ná fianaise gur áirithigh an próiseas soláthair an luach airgid is fearr; ag tabhairt dá haire gur thug an Comhghnóthas freagra gur thug sé aghaidh ar na torthaí arna sainaithint leis na tairbhithe faoi seach; á iarraidh ar an gComhghnóthas tuairisc a thabhairt don údarás um urscaoileadh i dtaca leis sin;

24.

ag cur béim ar an bhfíoras, i dtuarascáil bhliantúil na Cúirte ar Chomhghnóthais AE do 2020, go bhfuair an Chúirt earráidí córasacha leanúnacha sna costais phearsanra a bhí dearbhaithe ag tairbhithe, go háirithe i gcás FBManna agus tairbhithe nua; ag tabhairt dá haire go ndearnadh earráidí den sórt sin a thuairisciú go rialta freisin sna hiniúchtaí ex post ar CAS agus ar a iniúchóirí ar conradh; ag tabhairt chun suntais, ar leathanach 39 den tuarascáil sin, gur réamhchoinníoll é cuíchóiriú rialacha Fhís 2020 maidir le costais phearsanra a dhearbhú agus úsáid níos leithne a bhaint as roghanna costais simplithe le haghaidh clár réime taighde a bheidh ann amach anseo, ar mhaithe le rátaí earráide a chobhsú go leibhéal níos ísle ná an leibhéal ábharthachta; ag spreagadh an Chomhghnóthais neartú a dhéanamh ar a chórais rialaithe inmheánaigh i bhfianaise gur gnách le FBManna agus tairbhithe nua níos mó earráidí a dhéanamh;

25.

ag tabhairt dá haire go ndearna an tSeirbhís um Iniúchóireacht Inmheánach sa Choimisiún iniúchadh ar chur chun feidhme agus cur i gcrích chomhaontú deontais an chláir Fís 2020, lenar tháinig sí ar an gconclúid gur chuir an Comhghnóthas córas rialaithe inmheánach éifeachtúil agus éifeachtach ar bun ar an iomlán i ndáil leis sin, agus gur thug sé dhá mholadh thábhachtacha maidir le faireachán ar chomhlíonadh lena ngabhann ceanglais scaipthe, saothraithe agus cumarsáide, agus maidir le próisis agus nósanna imeachta; ag tabhairt dá haire gur tháinig an tSeirbhís um Iniúchóireacht Inmheánach ar an gconclúid, i mí Eanáir 2021, gur cuireadh na moltaí chun feidhme go leormhaith agus go héifeachtach.