(1)

Le Rialachán (AE) Uimh. 142/2011 ón gCoimisiún (2), leagtar síos bearta cur chun feidhme le haghaidh na rialacha maidir le sláinte an phobail agus le haghaidh shláinte ainmhithe maidir le seachtháirgí ainmhithe agus táirgí díorthaithe atá leagtha síos i Rialachán (CE) Uimh. 1069/2009, lena n-áirítear deimhnithe sláinte samplacha agus an liosta de thríú tíortha atá údaraithe chun coinsíneachtaí seachtháirgí ainmhithe agus táirgí díorthaithe a allmhairiú isteach san Aontas agus a chur ar idirthuras tríd.

(2)

Go háirithe, leagtar amach i gCaibidil II d’Iarscríbhinn XIV a ghabhann le Rialachán (AE) Uimh. 142/2011 na ceanglais shonracha maidir le coinsíneachtaí seachtháirgí ainmhithe agus táirgí díorthaithe atá le húsáid lasmuigh den slabhra beathaithe d’ainmhithe saothraithe, seachas ainmhithe fionnaidh, a allmhairiú isteach san Aontas agus a chur ar idirthuras tríd. Tá de cheangal ar choinsíneachtaí den sórt sin na rialacha a leagtar amach i dTábla 2 de Roinn 1 den Chaibidil sin inter alia a chomhlíonadh.

(3)

Go sonrach, leagtar amach i ró 14 de Thábla 2, inter alia, an liosta de thríú tíortha atá údaraithe le coinsíneachtaí seachtháirgí ainmhithe agus táirgí díorthaithe le haghaidh úsáidí lasmuigh den slabhra beathaithe a allmhairiú isteach san Aontas agus a chur ar idirthuras tríd, lena n-áirítear coinsíneachtaí fionnaidh chun táirgí díorthaithe a mhonarú, ábhair chatagóir 3, dá dtagraítear in Airteagal 10, pointe (n), de Rialachán (CE) Uimh. 1069/2009. D’iarr Ballstáit áirithe go leasófaí ró 14 de Thábla 2 chun liosta de thríú tíortha atá údaraithe le fionnadh a allmhairiú isteach san Aontas a chur san áireamh chun táirgí díorthaithe a mhonarú. Níl aon liosta ann de thríú tíortha atá údaraithe chun táirgí ainmhithe fionnaidh a allmhairiú isteach san Aontas, ach leagtar amach i Rialachán Cur Chun Feidhme (AE) 2021/404 (3) ón gCoimisiún liosta de thríú tíortha, de thríú críocha nó de chriosanna díobh, atá údaraithe le coinsíneachtaí d’fheoil úr ainmhithe crúbacha a thabhairt isteach san Aontas. Tar éis meastóireacht a dhéanamh ar an iarratas ó na Ballstáit, is iomchuí liosta a áireamh de thríú tíortha ónar féidir fionnadh a allmhairiú isteach san Aontas i ró 14 de Thábla 2, fionnadh chun táirgí díorthaithe a mhonarú. Na tríú tíortha óna n-údaraítear feoil úr na gcrúbach a thabhairt isteach san Aontas, ós tíortha iad a thugann leibhéal ard rialuithe oifigiúla agus cosanta do shláinte an phobail agus do shláinte na n-ainmhithe, is tráthúil fionnadh a allmhairiú ó na tríú tíortha chun táirgí díorthaithe sin a mhonarú.

(4)

Dá bhrí sin, ba cheart Iarscríbhinn XIV a ghabhann le Rialachán (AE) Uimh. 142/2011 a leasú dá réir.

(5)

Mar aon leis sin, i gCaibidil 3(F) agus i gCaibidil 8 d’Iarscríbhinn XV a ghabhann le Rialachán (AE) Uimh. 142/2011, leagtar amach deimhnithe sláinte samplacha d’allmhairí seachtháirgí ainmhithe agus de tháirgí díorthaithe a thugtar isteach san Aontas, nó a chuirtear ar idirthuras tríd, chun bia peataí a mhonarú chomh maith le hallmhairí a úsáidtear lasmuigh den slabhra beathaithe nó mar shamplaí trádála faoi seach. I measc nithe eile, cuimsíonn na deimhnithe sláinte samplacha sin an ceanglas go gcaithfí na hainmhithe óna ndíorthaítear seachtháirgí ainmhithe a choinneáil ar aon ghabháltas amháin ar feadh 40 lá roimh a marú. Ó thaobh sláinte ainmhithe de, áirithíonn tréimhse chónaithe réamh-mharaithe 40 lá den sórt sin sábháilteacht na seachtháirgí ainmhithe neamhphróiseáilte nuair a allmhairítear isteach san Aontas iad. Tír a bheith glan ar an ngalar crúb agus béil gan aon vacsaíniú a dhéanamh inti, sin é an stádas sláinte ainmhithe is fónta de réir chaighdeáin na hEagraíochta Domhanda um Shláinte Ainmhithe (OIE), agus tríú tíortha a bhfuil an stádas sláinte ainmhithe sin acu, is tíortha iad atá údaraithe chun coinsíneachtaí feola úire a allmhairiú isteach san Aontas agus a iompar tríd gan tréimhse chónaithe 40 lá den sórt sin, ar choinníoll go gcomhlíonann siad gach ceanglas eile i leith sláinte ainmhithe. Tríú tíortha áirithe atá saor ón ngalar crúb agus béil gan aon vacsaíniú a chleachtadh, is amhlaidh a d’iarr siad ar an gCoimisiún iad a údarú chun seachtháirgí ainmhithe neamhphróiseáilte a allmhairiú isteach san Aontas gan an tréimhse chónaithe 40 lá a bheith i gceist roimh ré. Na coinníollacha sláinte ainmhithe maidir le hallmhairiú seachtháirgí ainmhithe, is coinníollacha iad ba cheart a ailíniú le ceanglais sláinte ainmhithe maidir le feoil úr a thabhairt isteach san Aontas, coinníollacha a leagtar síos i Rialachán Cur Chun Feidhme (AE) 2021/404 ón gCoimisiún.

(6)

Dá bhrí sin, na deimhnithe sláinte samplacha do sheachtháirgí ainmhithe chun bia peataí a mhonarú, rud atá leagtha amach i gCaibidil 3(F) d’Iarscríbhinn XV a ghabhann le Rialachán (AE) Uimh. 142/2011, agus do sheachtháirgí ainmhithe atá le húsáid chun críocha lasmuigh den slabhra beathaithe nó le haghaidh samplaí trádála, rud a leagtar amach i gCaibidil 8 d’Iarscríbhinn XV a ghabhann leis an Rialachán sin, is deimhnithe iad ba cheart a leasú dá réir sin.

(7)

Rud eile, is éard a fhoráiltear i gCaibidil V d’Iarscríbhinn VIII a ghabhann le Rialachán (AE) Uimh. 142/2011 go ndéanfar táirgí díorthaithe ó ábhar Chatagóir 1 nó ó ábhar Chatagóir 2 a bhuanmharcáil le marcóir ceimiceach chun a ligean isteach sa slabhra beatha a chosc, sin agus chun rialuithe oifigiúla beatha a áirithiú. Níl aon ghá marcáil a dhéanamh le marcóir ceimiceach i gcás na saillte leáite i gCatagóir 3. Dá bhrí sin, an fhoclaíocht earráideach sa deimhniú sláinte samplach atá leagtha amach i gCaibidil 10(B) d’Iarscríbhinn XV a ghabhann leis an Rialachán sin, is foclaíocht í is éigean a cheartú i gcás allmhairí saillte leáite nach bhfuil ceaptha mar bhia don duine, allmhairí atá le húsáid lasmuigh den slabhra beathaithe, nó a bhfuil sé beartaithe iad a sheoladh chuig an Aontas nó a n-iompar tríd.

(8)

Dá bhrí sin, ba cheart Iarscríbhinn XV a ghabhann le Rialachán (AE) Uimh. 142/2011 a leasú dá réir.

(9)

Ar mhaithe le cur isteach ar thrádáil a sheachaint, ba cheart foráil leis an Rialachán seo d’idirthréimhse inar cheart leanúint ag glacadh leis na tráchtearraí lena mbaineann na leasuithe a rinneadh ar Rialachán (AE) Uimh. 142/2011 leis an Rialachán seo maidir le hallmhairiú isteach san Aontas agus ar idirthuras tríd an Aontas, ar choinníoll go gcomhlíonann na tráchtearraí sin na ceanglais a leagtar síos i Rialachán (AE) Uimh. 142/2011 roimh na leasuithe a rinneadh leis an Rialachán seo.

(10)

Na bearta dá bhforáiltear sa Rialachán seo, is bearta iad atá i gcomhréir leis an tuairim ón mBuanchoiste um Plandaí, Ainmhithe, Bia agus Beatha,