EUR-Lex Access to European Union law
This document is an excerpt from the EUR-Lex website
Document 32021R0956
Commission Implementing Regulation (EU) 2021/956 of 31 May 2021 concerning the classification of certain goods in the Combined Nomenclature
Rialachán Cur Chun Feidhme (AE) 2021/956 ón gCoimisiún an 31 Bealtaine 2021 maidir le haicmiú earraí áirithe san Ainmníocht Chomhcheangailte
Rialachán Cur Chun Feidhme (AE) 2021/956 ón gCoimisiún an 31 Bealtaine 2021 maidir le haicmiú earraí áirithe san Ainmníocht Chomhcheangailte
C/2021/4030
IO L 211, 15.6.2021, p. 45–47
(BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)
In force
15.6.2021 |
GA |
Iris Oifigiúil an Aontais Eorpaigh |
L 211/45 |
RIALACHÁN CUR CHUN FEIDHME (AE) 2021/956 ÓN gCOIMISIÚN
an 31 Bealtaine 2021
maidir le haicmiú earraí áirithe san Ainmníocht Chomhcheangailte
TÁ AN COIMISIÚN EORPACH,
Ag féachaint don Chonradh ar Fheidhmiú an Aontais Eorpaigh,
Ag féachaint do Rialachán (AE) Uimh. 952/2013 ó Pharlaimint na hEorpa agus ón gComhairle an 9 Deireadh Fómhair 2013 lena leagtar síos Cód Custaim an Aontais (1), agus go háirithe Airteagal 57(4) agus Airteagal 58(2) de,
De bharr an mhéid seo a leanas:
(1) |
Chun a áirithiú go gcuirtear an Ainmníocht Chomhcheangailte atá i gceangal le Rialachán (CEE) Uimh. 2658/87 ón gComhairle (2) i bhfeidhm go haonfhoirmeach, is gá bearta a ghlacadh maidir le haicmiú na n-earraí dá dtagraítear san Iarscríbhinn a ghabhann leis an Rialachán seo. |
(2) |
Le Rialachán (CEE) Uimh. 2658/87, leagadh síos na rialacha ginearálta maidir le léirmhíniú na hAinmníochta Comhcheangailte. Tá feidhm ag na rialacha sin freisin maidir le haon ainmníocht eile atá bunaithe go hiomlán uirthi nó a bhfuil cuid di bunaithe uirthi nó a chuireann breis foranna léi agus a bhunaítear le forálacha sonracha de chuid an Aontais, d’fhonn bearta taraife agus bearta eile i ndáil le trádáil in earraí a chur i bhfeidhm. |
(3) |
De bhun na rialacha ginearálta sin, na hearraí a bhfuil tuairisc orthu i gcolún (1) den tábla a leagtar amach san Iarscríbhinn, is earraí iad ba cheart a aicmiú faoin gcód AC a luaitear i gcolún (2), de bhua na gcúiseanna a leagtar amach i gcolún (3) den tábla sin. |
(4) |
Maidir le faisnéis taraife cheangailteach arna heisiúint i leith na n-earraí a bhaineann leis an Rialachán seo, ar faisnéis í nach bhfuil i gcomhréir leis an Rialachán seo, is iomchuí foráil a dhéanamh go bhféadfaidh an sealbhóir, ar feadh tréimhse áirithe, leanúint ag agairt na faisnéise sin i gcomhréir le hAirteagal 34(9) de Rialachán (AE) Uimh. 952/2013. Is tréimhse trí mhí ba cheart a bheith sa tréimhse sin. |
(5) |
Na bearta dá bhforáiltear sa Rialachán seo, is bearta iad atá i gcomhréir leis an tuairim ón gCoiste um an gCód Custaim, |
TAR ÉIS AN RIALACHÁN SEO A GHLACADH:
Airteagal 1
Na hearraí a bhfuil tuairisc orthu i gcolún (1) den tábla a leagtar amach san Iarscríbhinn, aicmeofar iad faoi chuimsiú na hAinmníochta Comhcheangailte faoin gcód AC a luaitear i gcolún (2) den tábla sin.
Airteagal 2
Faisnéis taraife cheangailteach nach bhfuil i gcomhréir leis an Rialachán seo, is faisnéis í is féidir a agairt fós i gcomhréir le hAirteagal 34(9) de Rialachán (AE) Uimh. 952/2013 go ceann tréimhse trí mhí ó dháta theacht i bhfeidhm an Rialacháin seo.
Airteagal 3
Tiocfaidh an Rialachán seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.
Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.
Arna dhéanamh sa Bhruiséil, 31 Bealtaine 2021.
Thar ceann an Choimisiúin,
Ar son an Uachtaráin,
Gerassimos THOMAS
An tArd-Stiúrthóir
Ard-Stiúrthóireacht an Chánachais agus an Aontais Chustaim
(1) IO L 269, 10.10.2013, lch. 1.
(2) Rialachán (CEE) Uimh. 2658/87 ón gComhairle an 23 Iúil 1987 maidir leis an ainmníocht taraife agus staidrimh agus leis an gComhtharaif Chustaim (IO L 256, 7.9.1987, lch. 1).
IARSCRÍBHINN
Tuairisc ar na hearraí |
Aicmiú (Cód AC) |
Cúiseanna |
(1) |
(2) |
(3) |
Earra modúlach a bhfuil airíonna ionsúite fuaime agus inslithe fuaime aige (dá ngairtear “córas ‘Seomra i seomra’”). Ina riocht cóimeáilte, tá sé timpeall 3 m ar leithead, idir 2 agus 6 m ar fad agus 2,3 m ar airde, agus tá na ballaí timpeall 40 mm ar tiús. Is éard atá ann fráma ciúbach atá déanta as alúmanam, é ceangailte le chéile le sraith de choirnéil agus de phainéil mhiotail a chuirtear ar thaobhanna agus ar bharr an struchtúir. Is éard atá i ngach painéal, fuaimchiseal clóite poileistir atá déanta as fabraic dhódhíonach, ar thaobh amháin, agus bord cáithníní adhmaid lannaithe ar an taobh eile. Stuáiltear an taobh istigh den phainéal le holann charraige (100 kg/m3 ar dlús). As painéil phoileistir agus as giarsaí taca alúmanaim atá an tsíleáil déanta. Tá feistithe ar an earra, freisin, doras, fuinneoga, córas soilsithe LED agus córas aerála. Ní thugann an t-earra aon chosaint ar an aimsir, agus dá réir sin, is mar dhéantús ar leith atá le tógáil laistigh d’fhoirgneamh críochnaithe atá ann cheana a dearadh é. Cuirtear ar an margadh é mar earra a bhfuiltear lena úsáid in oifigí plean oscailte chun limistéar iata chun plé faoi rún a dhéanamh, nó chun spás ciúin a chruthú. Féach an íomhá (*1) |
7610 90 90 |
Cinntear an t-aicmiú le rialacha ginearálta 1, 2(a), 3(b) agus 6 maidir le léirmhíniú na hAinmníochta Comhcheangailte agus le foclaíocht na gcód AC 7610 , 7610 90 agus 7610 90 90 . Eisiatar an t-earra óna aicmiú faoi cheannteideal 9406 toisc nach “foirgneamh réamhdhéanta” neamhspleách iomlán nó neamhiomlán é ós rud é nach féidir a mheas gur tithíocht, cóiríocht láithreáin tógála ná foirgneamh dá samhail é (féach nóta 4 a ghabhann le Caibidil 94 agus Nótaí Míniúcháin an Chórais Chomhchuibhithe a ghabhann le ceannteideal 9406 ). Níl sé oiriúnach lena úsáid lasmuigh toisc nach meastar é a bheith síondíonach. An t-earra atá ann, is déantús ar leith é atá le tógáil laistigh d’fhoirgneamh críochnaithe atá ann cheana. Is táirge ilchodach é an t-earra arb é comhpháirt a struchtúir (fráma alúmanaim) is saintréith dó. Dá bhrí sin, is de réir an ábhair as a bhfuil an chomhpháirt sin déanta atá sé le haicmiú. Dá thoradh sin, is faoi chód AC 7610 90 90 atá an t-earra le haicmiú, faoi struchtúir alúmanaim eile. |
(*1) Is le faisnéis a thabhairt, agus lena aghaidh sin amháin, atá an íomhá anseo.