L-aġenda tal-UE għal regolamentazzjoni aħjar

PUNTI EWLENIN

L-aġenda għal regolamentazzjoni aħjar tibni fuq proċeduri u proċessi eżistenti biex itejbu l-liġi u t-tfassil tal-politika tal-UE, inklużi:

• valutazzjonijiet tal-impatt;
• evalwazzjonijiet;
• konsultazzjonijiet pubbliċi (permezz tal-portal Semma’ Leħnek), u
• il-programm dwar l-Idoneità u l-Prestazzjoni tar-Regolamentazzjoni (REFIT) li għandu tabella ta’ valutazzjoni biex iżżomm rekord tal-inizjattivi kollha biex ittejjeb il-leġiżlazzjoni.

Speċifikament, l-aġenda tipprovdi għal dawn li ġejjin:

• Aktar ftuħ u trasparenza permezz ta’ konsultazzjoni pubblika aktar estensiva u spjegazzjonijiet aħjar tal-liġijiet u tal-politiki proposti;
• Skrutinju aktar mill-qrib tal-liġijiet u l-politiki eżistenti, pereżempju, permezz tat-twaqqif ta’ Bord tal-Iskrutinju Regolatorju indipendenti sabiex jevalwa l-kwalità tal-valutazzjonijiet tal-impatt u jivverifika l-evalwazzjonijiet ta’ liġijiet eżistenti;
• Ftehim interistituzzjonali bejn il-Parlament Ewropew u l-Kunsill tal-Unjoni Ewropea u l-Kummissjoni li tipprova tassikura li l-partijiet kollha jilleġiżlaw aħjar, pereżempju billi jipprijoritizzaw inizjattivi li jtejbu liġijiet eżistenti u jagħmlu valutazzjonijiet tal-impatt ta’ kull emenda sostanzjali mressqa mill-Parlament jew il-Kunsill għall-proposti tal-Kummissjoni.
• Evalwazzjoni aħjar tal-leġiżlazzjoni eżistenti, notevolment permezz tal-programm REFIT. Permezz ta’ REFIT, l-UE tivvaluta l-leġiżlazzjoni tal-UE adottata sabiex tagħmilha aktar effettiva u effiċjenti mingħajr ma tikkomprometti l-għanijiet tal-politika. Matul iż-żmien, REFIT saret iktar fil-mira, u tħares lejn l-iktar sorsi serji ta’ ineffiċjenza u piżijiet mhux bżonnjużi, u huma inkorporati aħjar fil-proċess tat-teħid ta’ deċiżjonijiet tal-Kummissjoni. Meta jkun possibbli, hi tikkwantifika s-simplifikazzjoni u l-potenzjal tat-tnaqqis tal-piż, u teżamina wkoll il-piżijiet possibbli li jistgħu jirriżultaw minn leġiżlazzjoni ġdida.
• Il-ħolqien tal-pjattaforma REFIT (li l-mandat tagħha kien sostitwit fl-2020, mill-Pjattaforma Fit for Future) li twaqqfet biex tagħti parir lil Kummissjoni dwar kif tagħmel ir-regolamenti tal-UE iktar effiċjenti u effettivi waqt li tnaqqas il-piżijiet, mingħajr ma timmina l-objettivi tal-politika.
• Azzjoni biex jitnaqqsu l-piżijiet f’oqsma bħal akkwist pubbliku, pereżempju permezz tal-ħolqien ta’ formola standard għall-ġbir ta’ data għan-negozji ż-żgħar u ta’ daqs medju minflok id-dokumentazzjoni kumplessa attwali għall-akkwisti;
• Implimentazzjoni aħjar tal-liġijiet tal-UE permezz ta’ iktar kooperazzjoni mal-Istati Membri tal-UE dwar modi kif tiġi żgurata l-konformità magħhom.

Komunikazzjoni 2021, linji gwida u sett ta’ għodda

• Wara li għamlet inventarju tal-aġenda tagħha għal regolamentazzjoni aħjar fl-2019, il-Kummissjoni adottat komunikazzjoni fl-2021 u pproponiet titjib għall-proċessi tar-regolamentazzjoni biex tgħin tindirizza sfidi sew kurrenti kif ukoll futuri.
• Il-komunikazzjoni tenfasizza l-importanza ta’ kooperazzjoni bejn l-istituzzjonijiet tal-UE u mal-Istati Membri u l-partijiet ikkonċernati, inklużi sħab soċjali, negozji u s-soċjetà ċivili. Hi tenfasizza wkoll il-bżonn li ddaħħal l-għanijiet ta’ żvilupp sostenibbli tan-Nazzjonijiet Uniti u li tindirizza s-sostenibbilità u tintegra prospettiva strateġika ikbar (pereżempju billi tissorvelja xejriet mega fl-oqsma ekoloġiċi, diġitali, ġeopolitiċi u soċjoekonomiċi) fit-tfassil tal-politika.
• Biex tassumi l-aspetti mqajma fil-komunikazzjoni, il-Kummissjoni ħarġet linji gwida riveduti u ħolqot sett ta’ għodda biex tassisti d-dipartimenti tagħha meta jippreparaw inizjattivi u proposti ġodda u meta jiġġestjonaw u jevalwaw miżuri eżistenti.