Regoli tal-proċeduri tal-Qorti Ġenerali tal-UE

PUNTI EWLENIN

Flimkien mal-Qorti tal-Ġustizzja, il-Qorti Ġenerali hija waħda mill-qrati tal-Unjoni Ewropea (UE) li jiffurmaw il-Qorti tal-Ġustizzja tal-Unjoni Ewropea. L-għan tagħhom huwa li jiżguraw interpretazzjoni u applikazzjoni uniformi tad-liġi tal-UE.

Ġuriżdizzjoni

Il-Qorti Ġenerali għandha ġuriżdizzjoni li tiddeċiedi fuq:

• kawżi mressqa minn individwi u kumpaniji kontra l-istituzzjonijiet tal-UE li huma indirizzati lilhom jew li jaffettwawhom direttament u individwalment, inkluż:
  • kawżi dwar relazzjonijiet ta’ impjiegi bejn l-istituzzjonijiet tal-UE u l-persunal tagħhom;
  • azzjonijiet relatati mad-drittijiet tal-proprjetà intellettwali;
• azzjonijiet miġjuba mill-Istati Membri tal-UE kontra l-Kummissjoni Ewropea;
• azzjonijiet miġjuba mill-Istati Membri kontra ċertu azzjonijiet tal-Kunsill tal-Unjoni Ewropea;
• azzjonijiet li jfittxu kumpens għall-ħsara kkawżata minn istituzzjonijiet jew korpi tal-UE; u
• talbiet, mill-1 ta’ Ottubru 2024, għal deċiżjonijiet preliminari fis-sitt oqsma li ġejjin:
  • is-sistema komuni ta’ taxxa fuq il-valur miżjud,
  • dazji tas-sisa,
  • il-Kodiċi Doganali tal-Unjoni,
  • il-klassifikazzjoni tat-tariffi tal-merkanzija taħt in-Nomenklatura Magħquda;
  • il-kumpens u l-assistenza għall-passiġġieri li s-servizzi tat-trasport tagħhom jiġu ttardjati jew ikkanċellati jew li ma jitħallewx jitilgħu abbord, u
  • l-iskema tal-UE għall-iskambju ta’ kwoti tal-emissjonijiet;

Organizzazzjoni tal-Qorti Ġenerali

Kompożizzjoni

Il-Qorti Ġenerali hija magħmula minn żewġ mħallfin minn kull Stat Membru. L-imħallfin jeleġġu wieħed minn fosthom bħala president u viċi president għal perjodu ta’ tliet snin. L-imħallfin għandhom jeżerċitaw il-funzjonijiet tagħhom b’mod imparzjali u indipendenti. F’każijiet eċċezzjonali, imħallef jista’ jingħata l-irwol ta’ avukat ġenerali¹ (AG). L-imħallfin jappuntaw reġistrar² għal terminu ta’ sitt snin.

Kostituzzjoni tal-mmamar

Kawżi miġjuba quddiem il-QortiĠenerali jinstemgħu f’seduti tal-kamra minn tliet jew ħames imħallfin, jew, f’xi kawżi, minn imħallef wieħed. L-imħallfin jeleġġu presidenti tal-kmamar. Għal kull kawża, imħallef wieħed jinħatar bħala mħallef-rapporteur (li jipprepara l-abbozz inizjali tas-sentenza). Il-Qorti Ġenerali tista’ wkoll tiltaqa’ bħala Awla Manja (15-il imħallef), meta meħtieġ minħabba l-kumplessità jew l-importanza legali ta’ kawża.

Ir-regoli ġew emendati fl-2023, parzjalment biex jiġi żgurat li l-ispeċjalizzazzjoni parzjali tal-awli deċiżi mill-Qorti Ġenerali ma ssirx superfluwa meta l-kompożizzjoni tal-kmamar tinbidel kull tliet snin.

B’riżultat tal-emenda tal-2024 għar-regoli, hemm dispożizzjoni għall-ħolqien ta’ Awla Intermedjarja bejn il-kmamar ta’ ħames imħallfin u l-Awla Manja bi 15-il imħallef. Din għandha disa’ mħallfin u hija prreseduta mill-Viċi President tal-Qorti Ġenerali.

Talbiet għal deċiżjonijiet preliminari se jiġu assenjati lil kmamar b’responsabbiltà partikolari għas-smigħ u d-determinazzjoni ta’ dawk il-każijiet. Dawn se jkollhom ħames imħallfin, mingħajr preġudizzju għall-possibbiltà li jirreferuhom għal formolazzjoni oħra tal-qorti, jekk il-kumplessità u l-importanza tal-kawża jimmeritaw dawn. Il-Qorti Ġenerali se tkun megħjuna minn AG wieħed jew aktar sabiex jiġu indirizzati t-talbiet għal deċiżjoni preliminari. Bħal fil-każ ta’ proċedimenti fil-Qorti tal-Ġustizzja, l-imħallfin li ntalbu jwettqu d-doveri ta’ AG f’każijiet ta’ deċiżjoni preliminari, u dawk mitluba jissostitwixxuhom jekk ma jitħallewx jaġixxu, jiġu eletti mill-Qorti Ġenerali u jassistu l-formazzjoni tal-qorti kompetenti fil-każijiet kollha ta’ deċiżjoni preliminari. Ir-regoli jinkludu proċeduri għall-elezzjoni tal-AGs, id-deżinjazzjoni tagħhom għall-iskop li jittrattaw talbiet għal deċiżjoni preliminari u t-twettiq tal-kompiti tagħhom.

Deliberazzjonijiet tal-Qorti Ġenerali

Il-Qorti Ġenerali tiddelibera fil-privat. Wara dawn id-diskussjonijiet, l-imħallfin jagħtu sentenza waħda.

Il-lingwa

L-applikant jista’ jagħżel waħda mill-24 lingwa uffiċjali tal-UE għall-kawża. Din il-lingwa tintuża fl-argumenti miktuba u orali mill-partijiet u fil-komunikazzjonijiet tal-Qorti Ġenerali mal-partijiet.

Meta applikazzjoni sottomessa minn istituzzjoni tikkonċerna klawżola f’kuntratt konkluż minn jew f’isem l-UE, kemm jekk dak il-kuntratt ikun irregolat mil-liġi pubblika jew privata, skont l-Artikolu 272 tat-Trattat dwar il-Funzjonament tal-Unjoni Ewropea, il-lingwa tal-kawża għandha tkun il-lingwa tal-kuntratt. Meta dak il-kuntratt ikun tfassal f’aktar minn lingwa waħda, l-applikant jista’ jagħżel bejniethom.

Id-drittijiet u l-obbligi tal-aġent u l-avukati

Aġenti (li jirrappreżentaw lill-Istati Membri jew istituzzjoni tal-UE) u avukati jgawdu l-immunità fir-rigward tal-kliem li jgħidu jew jiktbu rigward il-kawża. Karti u dokumenti relatati mal-proċedura ma jistgħux jiġu mfittxija jew sekwestrati.

L-avukati għandhom jipproduċu ċertifikat tal-awtorizzazzjoni tagħhom biex jipprattikaw f’qorti ta’ Stat Membru.

Proċedura

Il-proċess jista’ jinkludi xi wħud jew il-passi kollha elenkati hawn taħt:

• Il-fażi bil-miktub (skambju ta’ sottomissjonijiet bejn il-partijiet).
  • Applikazzjoni bil-miktub minn avukat jew minn aġent u mibgħuta lir-Reġistru³ tiftaħ il-proċedura. Il-punti ewlenin tal-azzjonijiet huma ppubblikati f’komunikazzjoni, bil-lingwi uffiċjali kollha, fil-Ġurnal Uffiċjali tal-Unjoni Ewropea.
  • ir-Reġistru jinnotifika lir-rikorrent fuq il-konvenut li jkollu xahrejn biex jippreżenta difiża.
  • F’azzjonijiet diretti, fil-prinċipju, ir-rikorrent jista’ jissottometti tweġiba f’limitu ta’ żmien, li l-konvenut jista’ jirrispondi għaliha b’kontroreplika.
• Hemm regoli speċifiċi għat-trattament ta’ informazzjoni jew dokumenti kunfidenzjali dwar is-sigurtà tal-UE jew ta’ dak l-Istat Membru jew l-imġiba tar-relazzjonijiet internazzjonali tagħhom.
• Meta parti tikkunsidra li l-identità tagħha ma għandhiex issir pubblika, hija tista’ titlob lill-Qorti Ġenerali biex tanonimizza l-kawża relevanti, kompletament jew parzjalment.
• Il-Qorti Ġenerali tista’ tiddeċiedi li tħalli barra:
  • l-ismijiet ta’ persuni fiżiċi, kemm jekk partijiet jew partijiet terzi, u kwalunkwe data personali oħra ta’ dawk il-persuni fiżiċi msemmija fid-dokumenti u l-informazzjoni li tirrigwarda każ u li l-pubbliku jkollu aċċess għalihom; u
  • data għajr id-data personali ta’ persuni fiżiċi msemmija f’dokumenti u informazzjoni li l-pubbliku għandu aċċess għalihom jekk ikun hemm raġunijiet leġittimi għaliex dik id-data ma għandhiex tkun żvelata pubblikament.
• Kwalunkwe persuna li tista’ tagħti prova ta’ interess legali fir-riżultat ta’ kawża sottomessa lill-Qorti, kif ukoll l-istituzzjonijiet tal-Istati Membri, tista’ tintervjeni fil-proċeduri. Il-persuna tista’ tissottometti dikjarazzjoni li tappoġġa jew tirrifjuta s-sottomissjonijiet ta’ waħda mill-partijiet, li għaliha l-partijiet jistgħu jirrispondu.
• Fażi orali.
  • Fuq it-talba ta’ waħda mill-partijiet, jew fuq l-inizjattiva tagħha stess, il-Qorti Ġenerali tista’ tiddeċiedi li tlaqqa’ seduta. Matul is-seduta, l-imħallfin jistgħu jagħmlu mistoqsijiet lir-rappreżentanti tal-partijiet. L-imħallfin imbagħad jiddeliberaw fuq il-bażi tal-abbozz tas-sentenza mħejji mill-Imħallef-rapporteur u s-sentenza tingħata fil-pubbliku.
  • Tista’ tingħata għajnuna legali biex tkopri l-ispejjeż tar-rappreżentazzjoni legali quddiem il-Qorti Ġenerali.
• Proċedura mħaffa (aċċellerata).
  • Din il-proċedura tippermetti lill-Qorti Ġenerali tiddeċiedi malajr fuq is-sustanza ta’ tilwim f’kawżi meqjusa li huma ta’ urġenza partikolari. Il-proċedura aċċellerata tista’ tintalab mill-applikant jew mill-konvenut. Il-Qorti Ġenerali tista’ wkoll tiddeċiedi fuq l-inizjattiva tagħha stess.

Sospensjoni jew miżuri interim oħra

• Proċedura quddiem il-Qorti Ġenerali ma tissosspendix l-att ikkontestat. Madankollu, il-Qorti Ġenerali tista’ tordna sospensjoni jew tordna miżuri interim oħrajn jekk ċerti kundizzjonijiet ma jiġux issodisfati. L-ordni hija provviżorja u ma tippreġudikax id-deċiżjoni tal-Qorti Ġenerali fil-proċeduri ewlenin.

Litigazzjoni relatata mad-drittijiet tal-proprjetà intellettwali

• Din it-tip ta’ litigazzjoni tikkonċerna azzjonijiet miġjuba kontra d-deċiżjonijiet tal-Uffiċċju tal-Proprjetà Intellettwali tal-Unjoni Ewropea fuq l-applikazzjoni tad-drittijiet tal-proprjetà intellettwali u kontra d-deċiżjoni tal-Uffiċċju tal-Varjetà ta’ Pjanti fil-Komunità relata mal-protezzjoni tad-drittijiet tal-varjetà tal-pjanti.
• Ir-regoli tal-proċedura jistipulaw proċeduri dwar il-partijiet fil-proċedura, l-applikazzjoni u t-tweġibiet.
• Il-partijiet interessati għajr l-applikanti jistgħu jintervjenu waqt il-proċedura u jkollhom l-istess drittijiet bħall-partijiet ewlenin.

Mekkaniżmu tal-kawża pilota u seduti konġunti

Fejn żewġ każijiet jew aktar pendenti quddiem il-Qorti Ġenerali jqajmu l-istess kwistjoni tal-liġi, u l-Qorti tixtieq tevita li dawk il-każijiet jiġu ttrattati b’mod parallel, wieħed jew aktar mill-każijiet jista’ jkollhom dewmien, fl-istennija tar-riżultat tal-każ li, fosthom, huwa l-aktar adattat għall-eżami ta’ dik il-kwistjoni, li hija identifikata bħala l-każ pilota.

Seduti konġunti ta’ żewġ każijiet jew aktar simili jistgħu jiġu organizzati biex jippermettu li ċerti każijiet jiġu ttrattati b’mod aktar effiċjenti.

Il-parteċipazzjoni f’seduta ta’ smigħ permezz ta’ vidjokonferenza

Meta s-saħħa, is-sigurtà jew raġunijiet serji oħra jimpedixxu lir-rappreżentant ta’ parti milli jipparteċipa f’seduta personalment, jistgħu, fuq talba, jiġu awtorizzati li jieħdu sehem fis-smigħ permezz ta’ vidjokonferenza.

Xandira

Is-smigħ jista’ jiġi mxandar. Meta l-Qorti Ġenerali tkun beħsiebha tagħmel dan, ir-Reġistru għandu jinforma lill-partijiet ikkonċernati. Parti li tqis li s-smigħ ma għandux ikun imxandar għandha tinforma lill-Qorti Ġenerali dwar dan mill-aktar fis possibbli, u għandha tistabbilixxi fid-dettall iċ-ċirkostanzi li jiġġustifikaw deċiżjoni għaliex ma għandux jixxandar is-smigħ. Il-Qorti Ġenerali għandha tiddeċiedi fuq dik it-talba malajr kemm jista’ jkun.

Regoli tal-prattiki għall-implimentazzjoni tar-regoli ta’ proċedura

Dawn jispjegaw, fid-dettall u jissupplimentaw ċerti dispożizzjonijiet tar-regoli ta’ proċedura. Ħafna mir-regoli tal-prattika għandhom x’jaqsmu ma’ aspetti bħall-preżentazzjoni ta’ dokumenti u oġġetti proċedurali, mal-preżentazzjoni u t-traduzzjoni tagħhom u mal-interpretazzjoni tagħhom fis-seduti.

Mill-2015, dawn ġew emendati bosta drabi, l-aktar reċenti fl-2024, biex jissupplimentaw jew jadattaw għar-regoli l-ġodda rigward il-protezzjoni tad-data personali, it-trattament kunfidenzjali ta’ ċerta data f’azzjonijiet diretti, is-sottomissjoni ta’ dokumenti proċedurali u l-annessi u l-parteċipazzjoni tagħhom fis-seduti, inkluż permezz ta’ vidjokonferenza.