Arranġamenti ġenerali għad-dazju tas-sisa (mill-2023)

PUNTI EWLENIN

Id-direttiva:

• tapplika għat-territorju tal-UE u għall-Irlanda ta’ Fuq fuq bażi tal-Protokoll tal-Irlanda ta’ Fuql għall-Ftehim ta’ Ħruġ tar-Renju Unit;
• tikkonferma li dawn li ġejjin mhumiex ittrattati bħala pajjiżi mhux tal-UE skont ir-regoli ta’ moviment ta’ oġġetti soġġetti għas-sisa:
  • Monaco,
  • San Marino,
  • il-bażijiet sovrani tar-Renju Unit ta’ Akrotiri u Dhekelia f’Ċipru,
  • l-Isle of Man,
  • Jungholz u Mittelberg (Kleines Walsertal);
• ma tapplikax għat-territorji li ġejjin li huma parti mill-unjoni doganali tal-UE:
  • il-Gżejjer Kanarji,
  • it-territorji Franċiżi ekstra-Ewropej,
  • il-Gżejjer Åland,
  • iċ-Channel Islands,
  • il-gżira ta’ Heligoland,
  • it-territorju ta’ Büsingen,
  • Ceuta,
  • Melilla,
  • Livigno.

Id-direttiva tistabbilixxi r-regoli ġenerali li japplikaw meta l-oġġetti jkunu taħt arranġament ta’ sospensjoni tad-dazju.

• “Arranġament ta’ sospensjoni tad-dazju” huwa arranġament tat-taxxa applikata għall-produzzjoni, għall-ipproċessar, għaż-żamma jew għall-moviment ta’ oġġetti soġġetti għas-sisa li taħthom id-dazju tas-sisa huwa sospiż.
• Oġġetti soġġetti għas-sisa għandu jitħallsilhom id-dazju meta sseħħ xi waħda minn dawn li ġejjin fl-UE:
  • produzzjoni jew estrazzjoni;
  • importazzjoni, legali jew illegali.
• Id-dazju tas-sisa ssir taxxabbli fiż-żmien meta, u fi Stat Membru fejn, l-oġġetti soġġetti għas-sisa jiġu rilaxxati għall-konsum.

Id-direttiva tistabbilixxi r-regoli ġenerali li japplikaw meta l-oġġetti soġġetti għas-sisa, wara li jkunu ġew rilaxxati għall-konsum fi Stat Membru wieħed, jitmexxew għal Stat Membru ieħor għal raġunijiet kummerċjali. F’dawn il-każijiet, l-oġġetti soġġetti għas-sisa jistgħu biss jiġu mmexxija minn speditur irreġistratt¹ lil destinatarju reġistrat².

• Oġġetti rilaxxati għall-konsum tfisser:
  • it-tluq ta’ oġġetti soġġetti għas-sisa minn arranġament ta’ sospensjoni tad-dazju;
  • iż-żamma jew il-ħżin ta’ oġġetti soġġetti għas-sisa barra arranġament ta’ sospensjoni tad-dazju fejn id-dazju tas-sisa ma jkunx ġie impost skont id-dispożizzjonijiet applikabbli tal-liġi tal-UE u l-leġiżlazzjoni nazzjonali;
  • iI-qerda totali jew it-telf ta’ oġġetti soġġetti għas-sisa taħt arranġament ta’ sospensjoni tad-dazju;
  • l-importazzjoni ta’ oġġetti soġġetti għas-sisa, sakemm dawn jitpoġġew taħt arranġament ta’ sospensjoni tad-dazju immedjatament fuq l-importazzjoni.
• Persuni soġġetti li jħallsu d-dazju huma:
  • detenturi tal-maħżen awtorizzati³, li għandhom jilħqu ċertu kundizzjonijiet biex jiġu rikonoxxuti;
  • destinatarju reġistrat⁴;
  • kwalunkwe persuna oħra li tirrilaxxa l-oġġetti.
• Id-dazju li jiġi applikat huwa dak li japplika fl-Istat Membru meta l-oġġetti jiġu rilaxxati għall-konsum.
• Kull Stat Membru jiddetermina r-regoli tiegħu stess fuq il-produzzjoni, l-ipproċessar, iż-żamma u l-ħażna ta’ oġġetti soġġetti għas-sisa.
• Il-produzzjoni, l-ipproċessar, iż-żamma u l-ħażna ta’ oġġetti soġġetti għas-sisa, meta d-dazju ma tħallasx, ser iseħħ f’maħżen tat-taxxa.

Oġġetti soġġetti għas-sisa huma eżentati mid-dazju u jeħtieġ li jiġu akkumpanjati minn ċertifikat ta’ eżenzjoni meta jintużaw għal:

• għanijiet diplomatiċi u konsulari;
• organizzazzjonijiet internazzjonali;
• forzi armati tal-Istati Membri tal-UE jew tan-NATO ħlief jekk dawn ikunu fil-ġurisdizzoni tagħhom stess;
• forzi armati tar-Renju Unit stazzjonati f’Ċipru;
• konsum taħt ftehim ma’ pajjiżi mhux tal-UE jew ma’ organizzazzjonijiet internazzjonali.

Passiġġieri li qed jivvjaġġaw lejn pajjiż mhux tal-UE bl-ajru jew bil-baħar ma jħallsux dazju fuq oġġetti soġġetti għas-sisa li nxtraw għal użu personali abbord jew fi ħwienet bla taxxa.

Regoli fuq il-moviment ta’ oġġetti ta’ merkanzija soġġetti għas-sisa taħt sospensjoni tad-dazji⁵ jistabbilixxu dan li ġej.

• Iħallu l-oġġetti jitmexxew minn maħżen tat-taxxa, jew minn fejn huma importati, għal maħżen ieħor, għal destinatarju reġistrat jew għal punt ta’ ħruġ tal-UE.
• Dawn jeħtieġu:
  • numru uniku tad-dazju tas-sisa li jidentifika l-ispeditur reġistrat⁶ jew destinatarju;
  • garanzija valida fl-UE kollha mill-kustodju tal-maħżen awtorizzat li qed jibgħat, jew mill-ispeditur reġistrat, biex ikopri kwalunkwe riskji (minbarra għal prodotti ta’ enerġija mmexxija permezz ta’ pajplajn fiss);
  • dokument amministrattiv elettroniku ta’ akkumpanjament jew dokument ta’ riżerva⁷ li jkun fih l-istess data jekk is-sistema kompjuterizzata ma tkunx disponibbli.
• Huma jipprovdu arranġamenti speċjali, u jħallu li l-kunsinni jinqasmu fi tnejn jew f’iktar partijiet għal prodotti tal-enerġija trasportati bil-baħar jew b’passaġġ fuq l-ilma ntern.
• Dawn jispeċifikaw il-bidu u t-tmiem ta’ perjodu ta’ tmexxija u l-formalitajiet fid-destinazzjoni.
• Dawn joffru proċeduri simplifikati għal oġġetti li qed jitmexxew biss fi Stat Membru wieħed jew fuq bażi frekwenti u regolari bejn tnejn jew iktar Stati Membri.

Destinatarji reġistrati:

• ma jistgħux jipproduċu, jipproċessaw, iżommu, jaħżnu jew jibgħatu merkanzija taħt arranġament ta’ sospensjoni tad-dazju;
• għandhom:
  • jiggarantixxu pagament ta’ dazju qabel ma jintbgħatu l-oġġetti,
  • idaħħlu l-oġġetti fil-kontijiet tagħhom meta jaslu,
  • jaqblu li jsiru verifiki biex jassiguraw ir-riċeviment tal-oġġetti.

Ir-regoli fuq individwi privati li jittrasportaw oġġetti soġġetti għas-sisa għall-użu tagħhom stess minn Stat Membru wieħed għal ieħor jistipulaw dan li ġej.

• Id-dazju jitħallas fejn l-oġġetti ġew mixtrija.
• L-Istati Membri jiddeterminaw “l-użu tagħhom stess” skont testijiet bħal:
  • l-istat kummerċjali tal-individwu;
  • il-post fejn l-oġġetti jkunu qed jinżammu jew it-tip ta’ trasport użat;
  • id-dokumentazzjoni relatata ma’, jew in-natura jew il-kwantità tal-oġġetti.
• L-awtoritajiet nazzjonali jistgħu jistipulaw il-livelli gwida għall-kwantità bħala forma ta’ evidenza, imma dawn ma jistgħux ikunu inqas mill-ammonti li ġejjin għal ċerti prodotti.
  • tabakk: 800 sigarett, 400 sigarru żgħir, 200 sigarru, 1 kg tabakk tat-tipjip.
  • alkoħol: 10 l spirti, 20 l prodotti intermedjarji, 90 l inbid, 110 l birra.

Ir-regoli fuq l-oġġetti soġġetti għas-sisa rilaxxati għall-konsum fi Stat Membru wieħed u trasportati kummerċjalment lejn Stat Membru ieħor huma kif ġejjin.

• Id-dazju jitħalles fil-pajjiż tad-destinazzjoni.
• Id-destinatarju reġistrat:
  • huwa responsabbli għad-dazju;
  • jipprovdi garanzija li tkopri n-nuqqas ta’ ħlas possibbli qabel mal-oġġetti jintbgħatu;
  • jaqbel ma’ kawlunkwe verifika;
  • jirrapporta fi żmien ħamest ijiem mir-riċeviment tal-oġġetti.
• Dokument elettroniku għal amministrazzjoni simplifikata, jew dokument ta’ riżerva li jkollu l-istess data, jeħtieġ li jakkumpanja l-kunsinna.
• Proċeduri simplifikati jistgħu jintużaw għal oġġetti soġġetti għas-sisa li jimxu bejn żewġ Stati Membri jew iktar.

Regoli dwarbejgħ transkonfinali mill-bogħod jeħtieġu li d-dazju jitħallas fil-pajjiż tad-desintazzjoni.

Id-dazju tas-sisa:

• ma jitħallasx jekk l-oġġetti li ntbagħtu għal Stat Membru ieħor ġew totalment meqruda jew mitlufa b’mod irrimedjabbli minħabba ċirkustanzi imprevedibbli, force majeure jew permezz ta’ ordni minn dak l-Istat Membru;
• jitħallas,, għal oġġetti li ntbagħtu minn Stat Membru wieħed għal ieħor, fl-Istat Membru fejn seħħet irregolarità.

L-Istati Membri jistgħu:

• jeħtieġu li l-oġġetti soġġetti għas-sisa jġorru marki tat-taxxa jew marki ta’ identifikazzjoni nazzjonali għal raġunijiet fiskali;
• jeżentaw lil produtturi żgħar tal-inbid, li jipproduċu inqas minn 1 000 hl fis-sena, mill-ħafna regoli u rekwiżiti dwar tmexxija u monitoraġġ;
• iżommu regoli nazzjonali fuq imħażen tad-dgħajjes u tal-ajruplani sakemm il-miżuri tal-UE jiġu adottati;
• japplikaw arranġamenti speċjali għal oġġetti użati fil-bini jew fil-manutenzjoni ta’ pont transfruntier.

Il-Kummissjoni Ewropea tissottometti rapport lill-Parlament Ewropew u lill-Kunsill tal-Unjoni Ewropea kull 5 snin — l-ewwel sal-iktar tard 3 snin wara l-applikazjoni tad-direttiva — dwar l-implimentazzjoni tal-leġiżlazzjoni.

Id-direttiva tagħti s-setgħa lill-Kummissjoni biex tadotta dan li ġej.

(a) Atti delegati biex jistabbilixxu limiti komuni ta’ telf parzjali minħabba n-natura tal-prodotti, l-istruttura u l-kontenut tad-dokument elettroniku amministrattiv u dokument ta’ riżerva u dawk tad-dokument elettroniku ta’ amministrazzjoni simplifikata u dokument ta’ riżerva.

Ir-Regolament Delegat (UE) 2022/1636, applikabbli mit-13 ta’ Frar 2023:

• jistabbilixxi limitu ta’ telf parzjali komuni 0 % għat-tabakk manifatturat, li jaqa’ fil-kamp ta’ applikazzjoni tad-Direttiva 2011/64/UE;
• iħassar ir-Regolamenti ta’ Implimentazzjoni 684/2009 u 3649/92 mid-data tal-applikazzjoni tiegħu.

(b) atti ta’ implimentazzjoni biex jiġu stabbiliti r-regoli u l-proċeduri għall-iskambju tad-dokument elettroniku amministrattiv u dokument ta’ riżerva, u d-dokument elettroniku għal amministrazzjoni simplifikata u dokument ta’ riżerva, u biex tiġi stabbilita l-forma li għandha tintuża għaċ-ċertifikat tal-eżenzjoni.

Ir-Regolament ta’ Implimentazzjoni (UE) 2022/1637, japplika wkoll mit-13 ta’ Frar 2023:

• jistabbilixxi l-formola ta’ ċertifikat tal-eżenzjoni għal oġġetti soġġetti għas-sisa minn Stat Membru għal ieħor, meta l-Istati Membri jeżentaw il-ħlas tad-dazju tas-sisa;
• jissostitwixxi r-Regolament (KE) Nru 31/96.

Id-direttiva:

• tirrevedi u tissostitwixxi d-Direttivi 2008/118/KE (ara s-sommarju) u 2010/12/UE mit-13 ta’ Frar 2023;
• hija relatata mill-qrib mad-Deċiżjoni (UE) 2020/263 dwar il-kompjuterizzazzjoni tal-moviment u tas-sorveljanza ta’ oġġetti soġġetti għas-sisa.