Straitéis slándála aontais AE

PRÍOMHPHOINTÍ

Is saincheist í an tslándáil a théann i bhfeidhm ar gach réimse den saol. Ar an gcúis sin, tá cinneadh déanta ag an Aontas cur chuige iomlánaíoch a ghlacadh i leith na slándála. Soláthraítear leis an teachtaireacht seo creat foriomlán chun tacú le beartais náisiúnta trí bhagairtí atá ag teacht chun cinn a réamh-mheas agus aghaidh a thabhairt orthu, bíodh siad ar líne/as líne, digiteach/fisiceach nó inmheánach/seachtrach.

Leagtar amach sa straitéis ceithre thosaíocht straitéiseacha ar leibhéal an Aontais.

1. Timpeallacht slándála atá sábháilte don todhchaí a chinntiú do dhaoine aonair

   Ní mór do na bonneagair chriticiúla¹ as a mbainimid úsáid inár saol laethúil a bheith sábháilte agus athléimneach agus caithfear na teicneolaíochtaí a mbímid ag brath orthu a chosaint ar chibearshlándáil níos sofaisticiúla, cibé acu ón taobh istigh nó lasmuigh den Aontas.

   I measc na bpríomhghníomhaíochtaí a bheidh le déanamh beidh:

   • reachtaíocht an Aontais maidir le bonneagair chriticiúla (Treoir 2008/114/CE — féach an achoimre) agus maidir le córais faisnéise líonra a neartú (Treoir (AE) 2016/1148 — féach an achoimre);
   • athléimneacht oibríochta na hearnála airgeadais a mhéadú;
   • straitéis chibearshlándála an Aontais agus comh-chibearaonad AE a chruthú;
   • comhar níos láidre a spreagadh maidir le spásanna poiblí a chosaint agus an cleachtas is fearr maidir le mí-úsáid drón a roinnt.
2. Aghaidh a thabhairt ar bhagairtí atá ag teacht chun cinn

   Clúdaítear leis an tosaíocht seo gnéithe amhail cibearchoireacht (e.g. goid aitheantais nó goid sonraí gnó), ábhar mídhleathach ar líne (mí-úsáid ghnéasach leanaí nó gríosú chun fuatha nó sceimhlitheoireacht) agus bagairtí hibrideacha (teaglaim de ghníomhaíochtaí traidisiúnta/neamhghnácha míleata/neamh-mhíleata).

   Moltar sa straitéis sraith gníomhartha, mar shampla a chinntiú go gcuirtear reachtaíocht chibearchoireachta i bhfeidhm agus go bhfuil sí oiriúnach don fheidhm, athbhreithniú a dhéanamh ar phrótacal oibríochta an Aontais chun cur i gcoinne bagairtí hibrideacha agus straitéis níos éifeachtaí a dhréachtú i gcoinne mí-úsáid ghnéasach leanaí.

3. Eorpaigh a chosaint ar sceimhlitheoireacht agus ar choireacht eagraithe

   Leis an straitéis cuirtear béim ar an mbealach a chosnaíonn an sceimhlitheoireacht agus an radacachas saol daoine agus ar an mbealach a ndéanann sí an tsochaí a dhíchobhsú agus ar an bhfíric go bhfuil an choireacht eagraithe freagrach as caillteanais eacnamaíocha idir EUR 218 agus EUR 282 bhilliún gach bliain.

   I measc na bpríomhghníomhaíochtaí a bheidh le déanamh beidh:

   • clár oibre frithsceimhlitheoireachta agus tionscnaimh frithradacaithe níos láidre a fhorbairt;
   • níos mó comhair le tíortha neamh-AE agus eagraíochtaí idirnáisiúnta;
   • clár oibre i gcoinne coireacht eagraithe agus plean gníomhaíochta i gcoinne smuigléireacht imirceach;
   • clár oibre agus plean gníomhaíochta 2021-2025 i leith drugaí;
   • Plean gníomhaíochta 2020-2025 an Aontais maidir le gáinneáil arm tine;
   • athbhreithniú a dhéanamh ar an reachtaíocht maidir le reo agus coigistiú sócmhainní (Rialachán (AE) 2018/1805 — féach an achoimre), maidir le hoifigí gnóthaithe sócmhainní (Cinneadh 2007/845/CGB — féach an achoimre) agus maidir le coireacht chomhshaoil (Treoir 2008/99/CE — féach an achoimre).
4. Éiceachóras láidir slándála Eorpach a fhorbairt

   Tosaíocht chomhchoiteann do rialtais AE, údaráis forfheidhmithe dlí, gnóthais, eagraíochtaí neamhrialtasacha agus daoine aonair is ea an choireacht a chomhrac agus an ceartas a chur chun cinn trí chomhoibriú níos dlúithe agus faisnéis a roinnt. Ciallaíonn sé sin a chinntiú go bhfuil teorainneacha seachtracha an Aontais láidir chun slándáil a sholáthar don phobal agus do limistéar Schengen ina bhfuil saorthaisteal. Ciallaíonn sé freisin infheistíocht a dhéanamh i dtaighde slándála agus i nuálaíocht i dteicneolaíochtaí nua agus i dteicnící chun bagairtí a chomhrac agus a thuar, agus i scileanna agus in ardú feasachta ionas go n-ullmhófar gnóthais, lucht riaracháin agus daoine aonair níos fearr.

   I measc na mbeart a d’fhéadfaí a dhéanamh chun éiceachóras slándála Eorpach níos láidre a fhorbairt tá:

   • “cód comhair póilíní” féideartha an Aontais agus comhar póilíní in am géarchéime;
   • sainordú níos láidre do Europol;
   • Eurojust níos láidre a dhéanann údaráis bhreithiúnacha agus forfheidhmithe dlí a nascadh;
   • athbhreithniú ar an réamhthreoir maidir le faisnéis do phaisinéirí (Treoir 2004/82/CE — féach an achoimre);
   • comhar níos láidre idir an tAontas agus Interpol.

   Maidir leis an gCoimisiún Eorpach:

   • chuir sé trí thionscnamh shonracha i láthair, ag an am céanna leis an straitéis, chun a haidhmeanna a chur chun feidhme:
     • straitéis an Aontais maidir le troid níos éifeachtaí i gcoinne mí-úsáid leanaí,
     • clár oibre agus plean gníomhaíochta nua an Aontais maidir le drugaí,
     • Plean gníomhaíochta AE maidir le gáinneáil arm tine;
   • tuairisceoidh sé go rialta ar an dul chun cinn a rinneadh do Pharlaimint na hEorpa agus don Chomhairle, a thacaigh le tosaíochtaí na straitéise cheana féin, agus le páirtithe leasmhara.