This document is an excerpt from the EUR-Lex website
Document 52012DC0746
COMMUNICATION FROM THE COMMISSION TO THE EUROPEAN PARLIAMENT, THE COUNCIL, THE EUROPEAN ECONOMIC AND SOCIAL COMMITTEE AND THE COMMITTEE OF THE REGIONS EU Regulatory Fitness
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI Idoneità Regolatorja tal-UE
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI Idoneità Regolatorja tal-UE
/* COM/2012/0746 final */
KOMUNIKAZZJONI TAL-KUMMISSJONI LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI EWROPEW U LILL-KUMITAT TAR-REĠJUNI Idoneità Regolatorja tal-UE /* COM/2012/0746 final */
KOMUNIKAZZJONI TAL-KUMMISSJONI
LILL-PARLAMENT EWROPEW, LILL-KUNSILL, LILL-KUMITAT EKONOMIKU U SOĊJALI
EWROPEW U LILL-KUMITAT TAR-REĠJUNI Idoneità Regolatorja tal-UE 1. Regolamentazzjoni
intelliġenti: Ir-reazzjoni għall-Imperattiv Ekonomiku Il-leġiżlazzjoni tal-UE hi essenzjali
biex jintlaħqu l-għanijiet tat-Trattat tal-UE u biex tistabbilixxi
l-kondizzjonijiet għal tkabbir intelliġenti, sostenibbli u
inklużiv, li jkun ta’ benefiċċju għaċ-ċittadini,
in-negozji u l-ħaddiema. Il-Kummissjoni, l-istituzzjonijiet l-oħra
Ewropej u l-Istati Membri għandhom ir-responsabbiltà komuni li jilħqu
dawn l-għanijiet. Il-kriżi
ekonomika u finanzjarja żvelat is-siwi f’xi oqsma ta’ nuqqas ta’ azzjoni u
leġiżlazzjoni u eżekuzzjoni fjakki. Din qanqlet sejħa
għal governanza ekonomika u regolamentazzjoni finanzjarja msaħħa
fil-livell tal-UE. Fl-istess waqt, il-kriżi ġibdet l-attenzjoni fuq
l-ispejjeż tal-leġiżlazzjoni tal-UE u l-isfidi
tal-implimentazzjoni u l-eżekuzzjoni tal-liġijiet li diġà
qegħdin fil-kotba statutorji. L-amministrazzjonijiet nazzjonali, li
diġà qegħdin taħt pressjoni, isibuha diffiċli biex
ilaħħqu mat-traspożizzjoni u l-applikazzjoni
tal-leġiżlazzjoni tal-UE. In-negozji u ċ-ċittadini qed
iqajmu tħassib dwar il-kumplessità u l-piż amministrattiv
tal-liġijiet. Il-Kunsill Ewropew sejjaħ għal aktar sforzi biex
jitnaqqas il-piż regolatorju ġenerali fl-UE u fuq il-livell
nazzjonali. Il-Kummissjoni qiegħda tirrispondi għal
dawn il-preokkupazzjonijiet. Minn meta fasslet inizjattivi ġodda sentejn
ilu[1], hija
kkonsolidat is-sistema tagħha tal-valutazzjoni tal-impatt. Il-mira ta’ 25%
stabbilita fil-Programm ta' Azzjoni għat-Tnaqqis tal-Piżijiet
Amministrattivi ntlaħqet u inqabżet. Il-leġiżlazzjoni
ġiet issimplifikata u kkodifikata. Il-Parlament Ewropew u l-Kunsill qed
jeżaminaw proposti sinjifikanti ta' simplifikazzjoni f'bosta oqsma ta'
politika. Pereżempju, il-Kummissjoni pproponiet aġenda ta’
simplifikazzjoni ambizzjuża li tkopri l-Qafas Mutiannwali Finanzjarju li
jmiss[2].
Il-Kummissjoni ilha tapplika l-prinċipju "L-Ewwel Aħseb
fiż-Żgħir" u qed tuża s-sett sħiħ
tal-istrumenti regolatorji (minn konsultazzjonijiet u valutazzjoni tal-impatt
imsaħħa għal monitoraġġ ta' implimentazzjoni
speċifika) biex ir-regolament tal-UE jiġi adottat
għall-ħtiġijiet tal-mikrointrapriżi[3]. Tnedew
evalwazzjonijiet pilota ta’ politika (‘kontrolli tal-idoneità’)[4]. Qed
jiġu riżolti ħafna problemi dwar l-applikazzjoni korretta
tal-leġiżlazzjoni tal-UE mingħajr il-bżonn li wieħed
jirrikorri għal proċeduri formali ta' ksur. Il-pubbliku qed jiġi
kkonsultat sistematikament dwar l-inizjattivi tal-politika. Il-Kummissjoni se tibqa’ għaddejja b’dawn
l-attivitajiet u tinsab determinata li tissodisfa l-għanijiet ta’ politika
bi spiża minima, tikseb il-benefiċċji li tista' ġġib
biss il-leġiżlazzjoni tal-UE u telimina kull piż regolatorju
mhux meħtieġ. Se tkompli ssaħħaħ l-għodod
regolatorji tagħha u tapplikahom sistematikament fil-firxa kollha
tal-attivitajiet regolatorji tagħha. Il-Kummissjoni se żżid
ukoll l-implimentazzjoni u l-infurzar tagħha b'kooperazzjoni mill-qrib
mal-istituzzjonijiet l-oħra Ewropej u l-Istati Membri. Se tikkombina bosta
inizjattivi li għaddejjin bħalissa fi Programm dwar l-Idoneità u
l-Prestazzjoni tar-Regolamentazzjoni (Regulatory Fitness and Performance
Programme (REFIT)) immirat lejn l-eliminazzjoni ta’ kostijiet regolatorji mhux
meħtieġa (jiġifieri piż) u tiżgura li l-korp
tal-leġiżlazzjoni tal-UE jibqa' idoneu. Il-Kummissjoni ma temminx li l-iffissar ta' miri
globali u/jew formuli kwantitattivi għal ġestjoni tal-ġabra
tal-leġiżlazzjoni se jipproduċu r-riżultati mixtieqa. Dan
jirrikjedi approċċ aktar mirqum b'valutazzjoni tal-vantaġġi
u żvantaġġi reali — u jiġi identifikat jekk huma jkunux
relatati direttament mal-leġiżlazzjoni tal-UE jew
mal-implimentazzjoni tal-għażliet magħmula mill-Istati Membri.
Approċċ bħal dan jista' jagħmilha possibbli biex ikun hemm
iffukar aktar preċiż fuq it-tnaqqis tal-ispejjeż u fuq it-titjib
regolatorju u jkun aktar addattat għall-ispeċifiċitajiet
tat-tfassil tal-politika tal-UE. Fit-tisħiħ tal-approċċ
tagħha għal Regolamentazzjoni Intelliġenti, il-Kummissjoni bniet
fuq kontributi mill-Parlament Ewropew[5],
il-Kumitat tar-Reġjuni[6],
konsultazzjoni pubblika[7],
il-Bord tal-Valutazzjoni tal-Impatt[8],
ix-xogħol ta' Gruppi ta' Livell Għoli ta' Esperti Regolatorji Nazzjonali
u fuq Piżijiet Amministrattivi, u r-“Rakkomandazzjoni dwar Politika
Regolatorja u Governanza ” tal-2012 tal-OECD[9]. 2. Programm dwar l-Idoneità u
l-Prestazzjoni Regolatorja Is-sitwazzjoni ekonomika attwali titlob li
l-leġiżlazzjoni tal-UE tkun saħansitra aktar effikaċi u
effiċjenti fl-ilħuq tal-objettivi tal-politika pubblika: turi valur
miżjud ċar, twassal il-benefiċċji sħaħ bl-anqas
spejjeż filwaqt li tirrispetta l-prinċipji tas-sussidjarjetà u
l-proporzjonalità. Ir-riżultat finali għandu jkun qafas regolatorju
sempliċi, ċar, stabbli u prevedibbli għan-negozji,
għall-ħaddiema u ċ-ċittadini. Sabiex toqrob lejn dan l-għan, il-Kummissjoni
se tniedi Programm dwar l-Idoneità u l-Prestazzjoni tar-Regolamentazzjoni
(REFIT) li jibni fuq l-esperjenza fl-evalwazzjoni u tnaqqis tal-piż
amministrattiv. REFIT se jidentifika l-piżijiet, l-inkonsistenzi,
il-lakuni u l-miżuri ineffikaċi. Se tingħata attenzjoni
lill-piż regolatorju possibbli relatat ma' kif il-leġiżlazzjoni
tal-UE hija implimentata fuq livell nazzjonali u subnazzjonali[10]. Permezz
ta’ REFIT, il-Kummissjoni se tidentifika, tevalwa, tadotta, u tissorvelja
l-implimentazzjoni ta’ inizjattivi, li se jirriżultaw fi tnaqqis jew
simplifikazzjoni sinifikanti tal-kost regolatorju. Il-programm REFIT jibni fuq approċċ usa'
lejn politika ta’ evalwazzjoni misjuqa permezz ta’ ‘kontrolli tal-idoneità’
imnedija sa mill-2010[11].
L-esperjenza s’issa turi l-ħtieġa ta’ qafas komuni biex jitwettqu
dawn il-valutazzjonijiet — biex jintwera kif dawn jaqgħu taħt
l-għan globali biex tiġi żgurata regolamentazzjoni
intelliġenti u l-eliminar tal-piżijiet, biex jiġu involuti
l-livelli kollha tal-gvern u biex tiġi ffaċilitata
l-parteċipazzjoni wiesgħa tal-partijiet interessati. Il-proċess REFIT se jibda
b'eżerċizzju ta’ mmappjar biex jidentifika l-oqsma regolatorji u
l-atti leġiżlattivi bl-akbar potenzjal għas-simplifikazzjoni
tar-regoli u t-tnaqqis tal-kost regolatorju għan-negozji u
għaċ-ċittadini mingħajr ma jiġu preġudikati
l-objettivi tal-politika pubblika. Normalment, l-immappjar se jipponta lejn
oqsma fejn hija meħtieġa aktar evalwazzjoni, inkluż
tal-vantaġġi u l-iżvantaġġi. Dawn l-evalwazzjonijiet
se jivvalutaw ukoll jekk miri kwantitattivi għat-tnaqqis tal-piżijiet
għandhomx jiġu eżaminati fil-qasam ikkonċernat b’rabta
mar-responsabbiltajiet tal-UE u tal-Istati Membri rispettivament. Fejn
l-immappjar jipprovdi biżżejjed evidenza li turi li tkun
meħtieġa aktar azzjoni immedjata, jiġi mniedi proċess ta'
valutazzjoni tal-impatt għall-proposti. Il-partijiet interessati se jkunu
infurmati matul il-proċess kollu u l-opinjonijiet tagħhom se jkunu
essenzjali għal prijoritizzazzjoni tal-attivitajiet. Il-programm REFIT se jiġi implimentat b'mod
trasparenti. B’konformità mal-politika "l-ewwel evalwa",
fil-prinċipju, il-Kummissjoni mhix se teżamina proposti f'oqsma
tal-leġiżlazzjoni eżistenti sakemm ma jkunx sar immappjar
regolatorju u xogħol ta’ evalwazzjoni xieraq sussegwenti. L-ippjanar se
jkun pubbliku. L-evalwazzjonijiet REFIT se jkunu pubblikament issenjalati
fil-pjanijiet ta’ evalwazzjoni multiannwali imsaħħa mill-2014 ’il
quddiem. Anness iddedikat fil-programm ta’ ħidma tal-Kummissjoni se
jelenka l-inizjattivi ppjanati kollha tar-REFIT li jibdew mill-programm ta'
ħidma tal-2014 Se titwaqqaf sistema ta’ rintraċċar (Scoreboard)
biex tevalwa l-progress ta’ proposti permezz tal-istituzzjonijiet tal-UE u
fl-istadju ta' implimentazzjoni. Oqsma possibbli għall-ippjanar
tal-evalwazzjoni REFIT se jiġu wkoll minn attivitajiet li jkunu diġà
għaddejjin jew li huma ppjanati. Dawn jinkludu r-riżultati ta'
konsultazzjoni madwar l-UE kollha tal-SMEs dwar dak li huma jikkunsidraw
bħala l-Aktar Għaxar regolamenti tal-UE li huma ta’ piż u
r-riżultati kontinwi tal-‘kontrolli tal-idoneità’ u xogħol ieħor
ta’ evalwazzjoni regolatorja[12].
Il-programm kontinwu ta’ simplifikazzjoni u x-xogħol fuq it-tnaqqis
tal-piżijiet regolatorji għan-negozji żgħar se jkunu wkoll
immedjatament amalgamati fil-programm il-ġdid. Indikazzjonijiet ulterjuri
se jiġu pprovduti permezz tat-tmiem tal-valutazzjonijiet dwar il-politika
tal-ilma ħelu, l-informazzjoni u l-konsultazzjoni tal-ħaddiema
fil-qasam soċjali, l-approvazzjoni tat-tip tal-vetturi bil-mutur u
l-politika interna tas-suq tal-avjazzjoni u l-leġiżlazzjoni
tal-katina alimentari. L-eżami tal-leġiżlazzjoni dwar l-iskart,
is-settur tal-bejgħ għall-konsum, is-saħħa u s-sigurtà fuq
il-post tax-xogħol, l-irfinar taż-żejt, l-aluminju u prodotti
industrijali oħra huma wkoll diġà ippjanati. Fl-aħħar nett, REFIT se jinkludi segwitu
għall-Programm għat-Tnaqqis tal-Piżijiet Amministrattivi (ABR) —
ABR Plus. Il-Programme 2007 kellu l-għan li jnaqqas il-piż fuq
in-negozji li jirriżulta mil-leġiżlazzjoni tal-UE b’25 %
sal-2012. Dan kopra madwar 80 % tas-sorsi ewlenin tal-piż
amministrattiv. Il-Kummissjoni marret lil hinn mill-mira billi ppreżentat
proposti sabiex tnaqqas il-piżijiet amministrattivi b'iktar minn 30%,
filwaqt li l-miżuri li kienu daqs 25% ġew adottati
mill-koleġiżlaturi. Ir-riżultati dettaljati tal-Programm ta'
Azzjoni huma ppreżentati fid-Dokument ta’ Ħidma tal-Persunal li jakkumpanja
dan id-dokument[13].
Mhux se jimmaterjalizzaw benefiċċji
sakemm l-ABR ma jkunx implimentat b'suċċess. L-ABR Plus għalhekk
se jiffoka fuq is-segwitu fl-Istati Membri. L-Istati Membri se jintlabu
jirrapportaw sal-31 ta’ Diċembru 2013 dwar kif għandhom jimplimentaw
miżuri ABR. Il-Grupp ta' Livell Għoli dwar il-Piż Amministrattiv
se jkun inkarigat li jassisti u jagħti pariri dwar dan is-segwitu, jqabbel
ir-riżultati stmati mal-estimi tal-bidu u l-iffaċilitar tal-iskambju
tal-aħjar prassi bejn l-Istati Membri. Se jkun inkarigat ukoll li jsegwi
man-negozji u l-Istati Membri, l-implimentazzjoni mill-Istati Membri
tal-miżuri tal-UE li jnaqqsu l-piż amministrattiv bla bżonn
partikolarment għan-negozji żgħar. Għalhekk il-mandat
tal-Grupp ta’ Livell Għoli qed jiġi estiż sa tmiem it-terminu
tal-kariga tal-Kummissjoni preżenti. 3. Għodod ta’
Regolamentazzjoni Intelliġenti: Norqmu l-Prestazzjoni Il-Kummissjoni tuża numru ta' għodod
differenti fil-politika tagħha tar-Regolamentazzjoni Intelliġenti.
Dawn qegħdin kontinwament jiġu mtejba. 3.1. Valutazzjoni tal-impatt Is-sistema tal-valutazzjoni tal-impatt (IA)
tal-Kummissjoni ġiet iġġudikata bħala tal-ogħla klassi[14] —
tivvaluta b’mod trasparenti l-alternattivi politiki leġiżlattivi u
mhux leġiżlattivi billi tqabbel kemm il-benefiċċji u kif
ukoll il-kostijiet potenzjali f'termini ekonomiċi, soċjali u
ambjentali. Is-sistema hi komprensiva, trasparenti u soġġetta
għal skrutinju indipendenti[15].
L-IAs isiru għall-proposti kollha b’impatti diretti sinifikanti.
Fl-aħħar sentejn, inħarġet gwida operazzjonali biex
jiġu analizzati l-impatti fuq id-drittijiet fundamentali[16],
il-kompetittività[17]
u fuq il-mikrointrapriżi[18].
Skrutinju indipendenti mill-Bord għall-Valutazzjoni tal-Impatt (IAB)[19] itejjeb
il-kwalità tar-rapport u jkun hemm bżonn fil-prinċipju l-opinjoni
pożittiva mill-IAB qabel ma proposta tkun tista' titressaq quddiem
il-Kummissjoni għal deċiżjoni. L-iskrutinju tal-IAB
issaħħaħ permezz ta’ bidliet immirati fil-mandat u r-regoli ta'
proċedura tiegħu[20].
Jekk jistax isir IA jew le, huwa ddikjarat fil-pjanijiet direzzjonali li
huma disponibbli pubblikament[21].
L-IAs kif ukoll l-opinjonijiet tal-BVI huma disponibbli pubblikament.
Mit-twaqqif tal-IAB fl-2006, inħarġu aktar minn 700 opinjoni.
Il-ħolqien ta' Direttorat ġdid għall-Valutazzjoni tal-Impatt
fil-Parlament Ewropew qed iżid fil-livell estern ulterjuri ta’ skrutinju u
kontroll tal-kwalità. Il-biċċa l-kira ta’ dawk li wieġbu
għall-konsultazzjoni tal-partijiet interessati tappoġġja
l-approċċ integrat tal-Kummissjoni. L-aktar suġġerimenti
frekwenti biex tinkiseb kwalità ogħla b'mod aktar konsistenti jinkludu:
sforz akbar biex wieħed jikkwantifika l-impatti, preżentazzjoni aktar
ċara tar-riżultati ewlenin, il-konsultazzjoni dwar l-abbozz
tal-valutazzjonijiet tal-impatt, membri esterni tal-IAB u rekwiżit
vinkolanti għal opinjonijiet pożittivi tal-IAB. L-evidenza u l-istudji eżistenti juru li
l-istruttura attwali qed twassal għal riżultati b’mod
effiċjenti. Skont studju mill-Parlament Ewropew[22],
‘is-sistema tal-UE hija kumparattivament żviluppata sew b’kontrolli u
bilanċi interni u esterni’ u ‘hemm kunsens ġenerali li l-IAB
jikkontribwixxi għal titjib fil-kwalità tal-IAs’. Skont analiżi
tas-CEPS/l-Università ta' Exeter[23]
il-kwantifikazzjoni tal-kostijiet u l-benefiċċji hija frekwenti, jew
aktar ta' spiss, milli f’sistemi oħra. Fl-ebda sistema l-opinjoni ta'
korpi ta’ skrutinju indipendenti ma hi vinkolanti fuq dawk li jieħdu
d-deċiżjonijiet politiċi. Il-Kummissjoni għalhekk tqis li
la l-membri esterni tal-IAB u lanqas l-opinjonijiet vinkolanti tal-IAB ma huma
meħtieġa u li huma ma jkunux kompatibbli mad-dritt proprju ta'
inizjattiva, mar-rwoli istituzzjonali tal-Parlament Ewropew u tal-Kunsill u
r-responsabbiltà lejn il-pubbliku ġenerali. Rigward l-appelli għall-konsultazzjonijiet
dwar l-abbozzi tar-rapport tal-IA, wieħed għandu jinnota li
l-Kummissjoni diġà titlob li l-partijiet interessati jkunu kkonsultati fuq
l-aspetti ewlenin kollha tal-valutazzjoni tal-impatt u qed jiġi ppjanat
titjib ulteruri f'dawn il-konsultazzjonijiet. Normalment il-konsultazzjoni ssir
fi stadju bikri tal-proċess tal-valutazzjoni tal-impatt biex
l-imsieħba interessati jkunu f’pożizzjoni li jinfluwenzaw l-inkwadrar
tal-problemi u l-għażla tal-opzjonijiet fil-proċess. Jekk
il-konsultazzjoni sseħħ darba biss fuq l-abbozzi tal-IA,
l-alternattivi jkunu diġà ġew identifikati, u jitnaqqas l-ambitu
tas-suġġerimenti bis-sens mill-partijiet interessati. Jekk isiru
żewġ konsultazzjonijiet, iċ-ċiklu ta' politika jkun
terġa' itwal. Barra minn hekk, ir-rapporti tal-IA li jakkumpanjaw il-proposti
tal-Kummissjoni huma pubbliċi. Dan ifisser li l-partijiet interessati
jistgħu wkoll jagħtu l-opinjonijiet tagħhom matul
il-proċess leġiżlattiv. Madankollu, għad hemm lok biex tkompli
tittejjeb il-kwalità u ċ-ċarezza tar-rapporti tal-IA u jiġu sfruttati
aħjar il-proċessi tal-IA għar-REFIT. Il-Kummissjoni se tkompli
ttejjeb il-valutazzjoni ex ante tal-kostijiet u l-benefiċċji.
Dan se jinkludi wkoll sinteżi standardizzata ta’ żewġ paġni
fir-rapporti tal-IA biex tkun iffaċilitata l-identifikazzjoni rapida
tar-riżultati ewlenin tal-valutazzjoni tal-impatt, inkluż l-istima
tal-kostijiet u l-benefiċċji. Ser tirrevedi u taġġorna
l-linji gwida tal-IA fl-2014 wara konsultazzjoni pubblika. 3.2. Evalwazzjoni L-evalwazzjoni hija parti integrali mill-isforz tal-Kummissjoni
biex timmassimizza l-benefiċċji u timminimizza l-kost tal-politiki
tal-UE, kif diġà kien enfasizzat fil-Komunikazzjoni tal-2010
Regolamentazzjoni Intelliġenti. It-tisħiħ tal-evalwazzjoni ta’
miżuri regolatorji tal-UE imur id f’id ma’ żieda fl-attenzjoni lejn
l-evalwazzjoni tal-programmi finanzjarji. L-Artikolu 318 tat-Trattat dwar
il-Funzjonament tal-UE (TFUE) introduċa rekwiżit ġdid biex
il-Kummissjoni tissottometti lill-Parlament Ewropew u lill-Kunsill rapport ta'
valutazzjoni tal-finanzi tal-Unjoni bbażat fuq ir-riżultati miksuba. Il-Kummissjoni qiegħda ssaħħaħ
is-sistema tagħha ta’ evalwazzjoni u tapplika l-prinċipju tagħha
‘l-ewwel evalwa’. Is-sehem ta' proposti sinifikanti fil-Programm ta’ Ħidma
tal-Kummissjoni appoġġjat minn evalwazzjonijiet disponibbli jew
kontinwi żdied minn 32% għal 44% bejn l-2011 u l-2012. Diversi kwistjonijiet ġew ippreżentati
fi sforz biex wieħed isaħħaħ l-evalwazzjonijiet u
fit-tweġibiet tal-konsultazzjoni pubblika. L-evalwazzjonijiet
tradizzjonalment eżaminaw il-programmi ta' finanzjament individwali jew
atti leġiżlattivi, b’inqas attenzjoni għal-evalwazzjoni ta’
oqsma wiesa' ta’ leġiżlazzjoni u kwistjonijiet ta’ rilevanza
għall-oqmsa kollha. Hemm ukoll il-kwistjoni tal-ipprogrammar b’impatti
kemm tal-programmi u tal-politiki li jkunu jistgħu jitkejlu biss wara
ħafna snin mill-bidu tagħhom. Bil-ħsieb li tittejjeb ir-relevanza politika
u s-sjieda tar-riżultati tal-evalwazzjoni, il-Kummissjoni qiegħda
teżamina s-sistema ta' evalwazzjoni tagħha u se tistabbilixxi qafas
rivedut għall-politika u l-evalwazzjoni tal-programm fl-2013.
L-approċċ il-ġdid se jeżamina kif ir-riżultati ta’
evalwazzjoni jistgħu jkunu ankrati aħjar fiċ-ċiklu
tal-iżvilupp ta’ politika. Il-proċess tal-evalwazzjoni jista’
jiġi mfassal flimkien mal-politika nnifisha b'monitoraġġ u
rrappurtar aħjar. Hemm lok għal iktar trasparenza fl-ippjanar u
involviment akbar tal-partijiet interessati. Tista’ tiġi kkunsidrata
eżami ta’ tmiem il-kariga tal-Kummissjoni bbażata fuq
ir-riżultati tal-evalwazzjoni. Il-linji gwida tal-evalwazzjoni, inkluża
gwida dwar l-evalwazzjonijiet skont ir-REFIT, se jiġu riveduti wara
konsultazzjoni pubblika. Fl-aħħar, minħabba l-importanza
tal-implimentazzjoni għal effikaċja u effiċjenza regolatorja,
l-approċċ il-ġdid se jniedi wkoll fuq bażi pilota
evalwazzjonijiet konġunti mal-Istati Membri interessati. Il-Grupp ta’
Livell Għoli ta' Esperti Regolatorji Nazzjonali se jkun
imħeġġeġ biex jagħti parir dwar dan
l-approċċ pilota u dwar il-mezzi ta' involviment tal-Istati Membri.
Il-mandat tal-Grupp ta’ Livell Għoli qed jiġi estiż sa tmiem
it-terminu tal-kariga tal-Kummissjoni preżenti sabiex jipprovdi pariri u
skambju tal-aħjar prassi dwar l-attivitajiet tar-Regolamentazzjoni
Intelliġenti. Barra minn hekk, il-Kummissjoni qed teżamina
kif tista’ tfassal mill-ġdid u ttejjeb ir-rapport tal-Artikolu 318
tat-TFUE. Hemm bżonn metodu affidabbli ta’ rrappurtar annwali fuq
ir-riżultati miksuba li jislet mill-oqfsa ta’ valutazzjoni skont l-Oqfsa
Finanzjarji Pluriennali attwali u dawk futuri u minn dejta ta’
monitoraġġ mill-istrumenti ta' rrappurtar annwali tal-Kummissjoni[24]. 3.3. Konsultazzjoni
maċ-ċittadini u l-partijiet interessati Li ċ-ċittadini u l-partijiet interessati
jingħataw widen hu fundamentali għal regolamentazzjoni
intelliġenti fl-istadji kollha taċ-ċiklu ta’ politika.
Il-Kummissjoni għandha varjetà ta’ mezzi stipulati fit-Trattati u
dokumenti ta' politika biex tinteraġixxi ma' partijiet interessati[25].
Ġabra wiesgħa ta' għodod — minn pjanijiet direzzjonali sa
konsultazzjonijiet pubbliċi immirati – huma disponibbli
għall-Kummissjoni biex tiddjaloga mal-partijiet interessati f'diversi
stadji. Mill-bidu tal-2012, il-Kummissjoni
saħħet il-vuċi ta’ partijiet interessati billi estendiet
il-perjodu minimu għall-konsultazzjoni pubblika minn tmien
ġimgħat għal tnax-il ġimgħa[26]. Ukoll,
l-SMEs u l-mikrokumpaniji diġà semmgħu leħinhom direttament dwar
il-problemi u t-tħassib tagħhom f’konferenzi ddedikati organizzati
fl-Istati Membri. Ġie iffinalizzat eżami ta’ politika ta’
konsultazzjoni u r-riżultati tagħha qed jiġu ppreżentati
fid-Dokument ta’ Ħidma tal-Persunal li qed jakkumpanja dan id-dokument[27]. Il-Kummissjoni tikkonsulta b’mod wiesa’,
tirrispetta l-prinċipji tal-ftuħ u t-trasparenza u ssegwi l-istandards
minimi li b’mod ġenerali huma rrikonoxxuti bħala xierqa, tirrispondi
għall-aħjar prattika internazzjonali u normalment huma rrispettati.
Matul l-aħħar tliet snin, intalbu l-fehmiet tal-partijiet interessati
permezz ta' iktar minn 300 konsultazzjoni miftuħa ppubblikati fuq is-sit
tal-internet ‘Il-vuċi tiegħek fl-Ewropa’. Ir-rapporti kollha
tal-valutazzjoni tal-impatt li tlestew matul l-istess perjodu kienu
jistrieħu fuq konsultazzjonijiet estensivi, miftuħa u mmirati. F'disgħa
minn għaxar konsultazzjonijiet miftuħa, il-perjodu minimu ġie
rispettat. L-eżami kkonferma l-validità tal-politika u
l-għodod ta’ konsultazzjoni tal-Kummissjoni, kif ukoll il-progress
fl-implimentazzjoni miksuba matul is-snin. Madankollu, l-eżami u
l-opinjonijiet tal-partijiet interessati ġibdu l-attenzjoni lejn oqsma
fejn jista’ jsir aktar titjib fl-implimentazzjoni. Il-konsultazzjonijiet mhux
dejjem isaqsu l-mistoqsijiet adatti fil-ħin opportun u xi drabi jonqsu
milli jilħqu dawk li huma direttament affettwati li ma jistgħux dejjem
jiġu indirizzati fil-lingwi nattivi tagħhom. Id-Dokument ta’
Ħidma tal-Persunal li qed jakkumpanja dan id-dokument jagħti
d-dettalji tal-miżuri ppjanati biex jiġu indirizzati dawn
il-kwistjonijiet. Il-Kummissjoni se testendi l-medda ta'
konsultazzjonijiet billi tippubblika kalendarju kontinwu ta' konsultazzjonijiet
ppjanati fuq is-sit tal-internet "Il-Vuċi Tiegħek
fl-Ewropa", biex timmobilizza aħjar il-kanali ta' komunikazzjoni
tal-Istati Membri, billi tesplora l-użu ta' għodod innovattivi ta'
konsultazzjoni, billi ttejjeb il-kwalità tar-rispons u billi teżamina jekk
id-dokumenti ta' konsultazzjoni u tat-taqsiriet jistgħux ikunu tradotti
b’mod aktar wiesa' fil-limiti baġitarji eżistenti. Se
taġġorna u tiċċara wkoll l-istandards minimi billi tinkludi
kriterji operazzjonali aktar ċari. Fl-aħħar, biex trawwem
kwalità mtejba, se jissaħħaħ il-kontroll intern u
l-mekkaniżmi ta’ appoġġ (bħal linji gwida u libreriji
tal-aħjar prattika). Flimkien, dawn il-miżuri se jippermettu
konsultazzjonijiet pubbliċi biex jiġu appoġġjati aħjar
il-fażijiet kollha tal-proċessi tal-evalwazzjoni, tal-valutazzjoni
tal-impatt u tat-teħid ta' deċiżjonijiet. 4. Governanza
tar-Regolamentazzjoni intelliġenti: It-titjib tal-Implimentazzjoni Il-leġiżlazzjoni tal-UE ma tistax taqdi
l-iskop tagħha jekk ma tkux implimentata u eżegwita b'mod
effikaċi. Perspettiva ta’ implimentazzjoni hija essenzjali fil-punti
kollha fiċ-ċiklu tal-politika. Barra minn hekk, il-progress
fl-implimentazzjoni se jkun fattur ewlieni fl-evalwazzjoni tal-idoneità regolatorja. 4.1. Titjib tal-implimentazzjoni
tal-leġiżlazzjoni tal-UE L-Istati Membri jerfgħu r-responsabbiltà
primarja għall-implimentazzjoni tal-leġiżlazzjoni tal-UE.
Il-Kummissjoni tappoġġjahom permezz ta' varjetà ta' miżuri:
pjanijiet ta’ implimentazzjoni li jidentifikaw l-isfidi prinċipali
tal-implimentazzjoni u jissuġġerixxu miżuri ta'
appoġġ, mekkaniżmi għas-soluzzjoni tal-problemi
bħall-EU Pilot[28]
u skambji tal-aħjar prassi (pereżempju r-Rapport tal-aħjar
prassi tal-Grupp ta’ Livell Għoli dwar il-Piżijiet Amministrattivi)[29]. Ittejbu
wkoll id-djalogu interistituzzjonali u t-trasparenza[30]. Il-Kummissjoni se tkompli tissorvelja l-progress
fl-implimentazzjoni ta' oqsma ewlenin tal-leġiżlazzjoni tal-UE, u
tiffoka fuq oqsma prijoritarji identifikati tas-suq uniku[31]. Se
tieħu approċċ aktar sistematiku u approċċ ibbażat
fuq ir-riskju għall-valutazzjoni tal-konformità li se
ssaħħaħ il-verifika tal-konformità u tipprovdi kontribut
prezzjuż għall-evalwazzjoni ex post. Il-Kummissjoni se
tħejji wkoll pjanijiet ta’ implimentazzjoni għal Direttivi fuq
bażi iktar sistematika u tapplika l-użu ta’ dati ta’ bidu komuni
għar-regolamenti tal-UE u deċiżjonijiet li jaffettwaw in-negozju
aktar fil-wisa'. Fl-aħħar, il-Kummissjoni se tagħmel l-almu
kollu tagħha biex tiżgura li jiġi pprovdut ħin xieraq bejn
id-data tal-adozzjoni u dak tat-traspożizzjoni. 4.2. Leġiżlazzjoni li
tkun iktar ċara u iktar aċċessibbli Il-ġestjoni tal-kwalità
tal-leġiżlazzjoni tfisser ukoll li jkun żgurat li tkun
ċara, aċċessibbli u faċli biex wieħed jikkonforma
magħha kemm jista' jkun. Se jkomplu l-isforzi kontinwi għal dan
l-għan. Dawn jinkludu s-simplifikazzjoni,
il-kodifikazzjoni, ir-riformulzzjoni u l-konsolidazzjoni ta' testi legali kif
ukoll tnaqqis tal-volum tal-leġiżlazzjoni billi jitħassru
d-dispożizzjonijiet li m'għadhomx jintużaw. Sa mill-2005, il-Kummissjoni approvat 640
inizjattiva mmirati lejn is-simplifikazzjoni, il-kodifikar jew tfassil
mill-ġdid. Aktar minn 4 450 att legali
ġew revokati, li minnhom 1750 bħala riżultat ta’ kodifikazzjoni
u riformulazzjoni. Ir-regolamenti u
d-direttivi emendati kollha kif ukoll għażla ta’
deċiżjonijiet ġew ikkonsolidati fil-lingwi kollha tradotti
oriġinarjament u huma disponibbli permezz tas-sit tal-internet tal-EUR-LEX L-aċċess elettroniku għall-korp
sħiħ tal-leġiżlazzjoni tal-UE qed tiġi mtejba wkoll: il-portal il-ġdid e-Justice tnieda fl-2011 u
l-Portal Komuni l-ġdid tal-EUR-LEX se jsir operattiv onlajn fl-2013.
Fl-2011, il-Kummissjoni pproponiet li tagħti effett ġuridiku
lill-pubblikazzjoni elettronika ta' Il-Ġurnal Uffiċjali[32]. Fl-aħħar, il-Kummissjoni se tkompli
bl-isforzi tagħha biex ittejjeb il-kwalità tal-abbozzar biex jigu
żgurati testi aktar konċiżi u aktar faċli biex jinqaraw. Dawn il-miżuri se jappoġġjaw
l-evalwazzjoni integrata ta’ oqsma ta’politika, jiffaċilitaw
konsultazzjoni pubblika u jgħinu lill-amministrazzjonijiet nazzjonali
fit-traspożizzjoni u l-implimentazzjoni. 5. Regolamentazzjoni
intelliġenti: missjoni kondiviża 5.1. Il-Parlament Ewropew,
il-Kunsill u l-entitajiet konsultattivi Fil-Komunikazzjoni tagħha tal-2010,
il-Kummissjoni stiednet lill-Parlament Ewropew u lill-Kunsill biex jagħmlu
użu aħjar tal-valutazzjonijiet tal-impatt fil-proċessi
tat-teħid ta’ deċiżjonijiet tagħhom u biex janalizzaw l-impatti
meta jiddiskutu kwalunkwe emendi sostantivi skont l-impenji tagħhom skont
il-Ftehim Interistituzzjonali dwar tfassil aħjar tal-liġijiet. Il-Kummissjoni tinnota li sa issa sar biss
progress limitat fir-rigward tal-analiżi tal-impatti ta’ emendi
sostanzjali. Madankollu, il-Kummisjoni hi sodisfatta
bl-istabbiliment ta' direttorat ġdid għall-Valutazzjoni tal-Impatt
fil-Parlament Ewropew. Il-Kummissjoni tappoġġja l-prattika tajba ta’
uħud mill-Kumitati li jrendu l-valutazzjoni tal-impatt tal-Kummissjoni
l-punt ta’ tluq għal ħidma ta’ analiżi ulterjuri mill-Parlament
Ewropew. Dan għandu jiżgura komparabbiltà mal-approċċ
tal-valutazzjoni tal-impatt tal-Kummissjoni stess biex jiġi evitat
duplikazzjoni tal-isforzi. Il-Kunsill ma stabbilixxiex uffiċċju ta’
valutazzjoni tal-impatt. Il-Kummissjoni tikkunsidra li tista’ tuża aktar
il-valutazzjonijiet tal-impatt fil-proċessi tat-teħid
tad-deċiżjonijiet, pereżempju billi tikkunsidra
bis-sħiħ il-valutazzjonijiet tal-impatt tal-Kummissjoni meta jibda
x-xogħol fuq il-proposti li jakkumpanjaw. Il-Kummissjoni se tkompli twieġeb b’mod
kostruttiv għal talbiet biex tespandi fuq l-aspetti tal-valutazzjonijiet
tal-impatt u/jew biex taqsam l-informazzjoni u l-metodoloġija tagħha
fuq bażi ta' każ b'każ. Hija tistieden liż-żewġ
Istituzzjonijiet biex jiffokaw fuq it-twettiq, sabiex proporzjon aktar
sinifikanti tal-emendi li jagħmlu jkunu bbenefikaw direttament
mill-analiżi tal-impatt ibbażat fuq l-evidenza. Il-Kummissjoni hi sodisfatta wkoll
bl-appoġġ u l-approvazzjoni tal-Istituzzjonijiet ta’ ħidmietha
biex tnaqqas u timminimizza l-piż amministrattiv u regolatorju u
tistedinhom biex jappoġġjaw il-proposti ta’ simplifikazzjoni li qed
jiġu diskussi u japprovaw u jappoġġjaw il-programm REFIT. Fl-aħħarnett, il-Kummissjoni hi
sodisfatta bl-appoġġ tal-Kumitat Ekonomiku u Soċjali u
tal-Kumitat tar-Reġjuni. Il-pjattaformi u n-netwerks tagħhom
jistgħu jkunu għajn importanti ta’ informazzjoni fit-tħejjija
tal-evalwazzjonijiet u l-valutazzjonijiet tal-impatt. 5.2. L-Istati Membri Il-kooperazzjoni bejn il-Kummissjoni u l-Istati
Membri hija kruċjali jekk il-leġiżlazzjoni tal-UE trid
tissodisfa l-benefiċċji kollha tagħha b'kost minimu
għaċ-ċittadini, il-ħaddiema u l-intrapriżi.
Is-saħħa tal-kapaċità amministrattiva nazzjonali u l-kwalità
regolatorja nazzjonali għandhom impatt dirett fuq jekk l-għanijiet
tal-politika pubblika tal-UE jistgħux jintlaħqu fil-prattika.
Il-kontributi tal-amministrazzjonijiet tal-Istati Membri u tal-istituzzjonijiet
huma ta’ importanza kritika fit-tfassil u l-evalwazzjoni
tal-leġiżlazzjoni tal-UE. Fit-traspożizzjoni u
l-implimentazzjoni tal-leġiżlazzjoni tal-UE, inkluż ir-regoli li
jirregolaw l-attivitajiet iffinanzjati mill-baġit tal-UE, l-Istati Membri
huma responsabbli li jiżguraw li l-qafas regolatorju tagħhom huwa
ċar u–aċċessibbli. Il-Parlamenti Nazzjonali għandhom rwol
ewlieni li jikkontrollaw li l-prinċipju tas-sussidjarjetà jkun applikat
b’mod korrett. Il-Kummissjoni tħeġġeġ
lill-awtoritajiet tal-Istati Membri sabiex jipparteċipaw b’mod iktar attiv
fil-konsultazzjonijiet u l-evalwazzjonijiet pubbliċi tagħha,
inkluż billi jiġu mobilizzati n-netwerks dedikati nazzjonali
tagħhom, sabiex itejbu l-bażi ta’ evidenza għat-tfassil
tal-politika. Tenfasizza li, f'dan il-kuntest, rispons kmieni mill-Istati
Membri huwa fundamentali għal analiżi robusta tas-sussidjarjetà. Il-Kummissjoni tenfasizza wkoll li l-valutazzjoni
tal-impatt nazzjonali tista’ tkun utli biex tgħin id-diskussjonijiet
fil-Kunsill fuq it-tibdiliet tal-proposti tiegħu u biex tgħin
lill-Istati Membri fi kwistjonijiet ta' traspożizzjoni u eżekuzzjoni. Il-Kummissjoni tistieden l-Istati Membri biex
jiżguraw it-twettiq effettiv fil-livell nazzjonali ta’ inizjattivi li
għaddejjin bħalissa biex jitnaqqas il-piż amministrattiv, u biex
iqisu r-rakkomandazzjonijiet tar-rapport ta’ Frar 2012 dwar l-aħjar
prattiki, biex jimplimentaw il-leġiżlazzjoni tal-UE bl-eħfef mod
u biex jipparteċipaw b’mod attiv fl-iskambju ta' informazzjoni fuq metodi
effiċjenti tal-implimentazzjoni tar-regolamentazzjoni tal-UE[33].
Tistedinhom ukoll biex jieħdu vantaġġ sħiħ
tal-possibbiltajiet ta’ simplifikazzjoni offruti permezz
tal-leġiżlazzjoni tal-UE u biex ikunu żgurati
ċ-ċarezza u l-aċċessibbiltà tar-regoli nazzjonali li
jittrasponu l-leġiżlazzjoni tal-UE. Fl-aħħar, il-Kummissjoni tenfasizza
l-importanza ta' amministrazzjoni pubblika effiċjenti għal
transpożizzjoni, l-implimentazzjoni u l-eżekuzzjoni f’waqthom
tal-leġiżlazzjoni tal-UE. 6. Konklużjonijiet Biex tiggarantixxi l-kwalità regolatorja tal-UE,
il-leġiżlazzjoni tal-UE u r-regoli nazzjonali li jimplimentawha, trid
tkun mmaniġġjata b'mod li tkompli tilħaq l-objettivi tagħha
ta' politika pubblika b'mod effiċjenti. L-oqfsa regolatorji jridu jkunu
idonei u jibqgħu hekk anki meta jiżvolġu l-problemi,
jitfaċċaw soluzzjonijiet ġodda u jinbidlu l-prijoritajiet
politiċi. Għal dan il-għan, il-Kummissjoni se tidentifika
l-ispejjeż bla bżonn u oqsma għat-titjib fl-effikaċja
bħala parti integrali u permanenti fit-tfassil tal-politika tagħha u
tal-ipprogrammar fil-firxa kollha tal-leġiżlazzjoni tal-UE. [1] COM(2010) 543
‘Regolamentazzjoni Intelliġenti fl-UE’. [2] Ara
COM(2011)500 ‘Baġit għall-Ewropa 2020’, Regolament (EU, Euratom) Nru
966/2012 u COM(2012) 42 ‘Aġenda ta' Simplifikazzjoni għall-QFM
2014-2020’. [3] COM (2011) 803 "L-imminimizzar tat-tagħbija
regolatorja għall-SMEs” - Fil-bidu tal-2013, il-Kummissjoni se
tippreżenta l-ewwel rapport ta' progress u valutazzjoni li jiffukaw b’mod
partikolari fuq il-prijoritajiet identifikati min-negozji żgħar
fil-konferenzi li jkunu saru fi Stati Membri u f'konsultazzjonijiet madwar l-UE
kollha sa tmiem l-2012. [4] http://ec.europa.eu/dgs/secretariat_general/evaluation/docs/fitness_check_en.pdf. [5] Rapport dwar it-18-il rapport dwar
leġiżlazzjoni aħjar u rapport dwar it-28 rapport annwali dwar
il-monitoraġġ tal-implimentazzjoni tal-leġiżlazzjoni
tal-UE. [6] Opinjoni tal-Kumitat tar-Reġjuni dwar
“Regolamentazzjoni Intelliġenti” 2012/C 9/04. [7] http://ec.europa.eu/governance/better_regulation/smart_regulation/consultation_2012/docs/consultation_mt.pdf. [8] SEC(2012) 101 ‘Rapport tal-Bord
tal-Valutazzjoni tal-Impatt għall-2011’. [9] http://www.oecd.org/gov/regulatorypolicy/49990817.pdf. [10] Hu stmat li l-piż amministrattiv miżjud matul
l-implimentazzjoni tal-leġizlazjzoni tal-UE fuq livell nazzjonali jkun ta'
madwar terz tat-total. [11] Dwar il-politika tal-UE dwar l-ilma ħelu fil-qasam
tal-ambjent, dwar l-informazzjoni u l-konsultazzjoni tal-ħaddiema
fil-qasam soċjali, dwar l-approvazzjoni tat-tip ta’ vetturi bil-mutur, fuq
il-leġiżlazzjoni tal-katina alimentari u fuq il-politika interna
tas-suq tal-avjazzjoni. [12] Notevolment ir-riżultati diġà disponibbli
għall-kostruzzjoni, in-negozju u sservizzi turistiċi. [13] SWD(2012) 422 ‘Reviżjoni tal-Politika ta’
Konsultazzjoni tal-Kummissjoni’. [14] OECD 2011 ‘Sostenibbiltà fil-Valutazzjonijiet tal-Impatt —
Reviżjoni ta' Sistemi ta’ Valutazzjonijiet tal-Impatt f'għadd ta'
pajjiżi tal-OECD u l-Kummissjoni Ewropea ”, il-Parlament Ewropew 2011,
"Studju komparattiv dwar l-għan, l-ambitu u l-proċeduri ta'
valutazzjonijiet tal-impatt imwettqa fl-Istati Membri tal-UE ”,
CEPS/l-Università ta' Exeter 2012, “Il-Kwalità Regolatorja fil-Kummissjoni
Ewropea u r-Renju Unit: Mistoqsijiet qodma u sejbiet ġodda”. [15] Ir-rapport
tal-Qorti Ewrpopea tal-Awdituri N° 3/2010 “Valutazzjoni tal-Impatt
fl-Istituzzjonijiet tal-EU: dawn jappoġġjaw it-teħid
tad-deċiżjonijiet?”. [16] http://ec.europa.eu/governance/impact/key_docs/docs/sec_2011_0567_en.pdf. [17] http://ec.europa.eu/governance/impact/key_docs/docs/sec_2012_0091_en.pdf. [18] http://ec.europa.eu/governance/impact/key_docs/docs/meg_guidelines.pdf. [19] http://ec.europa.eu/governance/impact/iab/iab_en.htm. [20] http://ec.europa.eu/governance/impact/iab/members_en.htm. [21] http://ec.europa.eu/governance/impact/planned_ia/planned_ia_en.htm. [22] Ara n-nota ta’ qiegħ
il-paġna 14. [23] Ara CEPS/l-Università ta’ Exeter 2012
fin-nota 14. [24] Jiġifieri: l-Ippjanar Strateġiku tal-Kummissjoni
u fiċ-Ċiklu tal-Ipprogrammar — Ir-rapporti tal-Attività Annwali,
Dikjarazzjoni Annwali tal-Baġit, eċċ. [25] Ara SWD(2012) 422.. [26] http://europa.eu/rapid/pressReleasesAction.do?reference=IP/12/1&format=HTML&aged=0&language=EN&guiLanguage=en . [27] SWD(2012) 423 “Programm ta’ Azzjoni għat-Tnaqqis
tat-Tagħbija Amministrattiva tal-UE – Rapport Finali”. [28] http://ec.europa.eu/eu_law/infringements/application_monitoring_en.htm. [29] http://ec.europa.eu/dgs/secretariat_general/admin_burden/best_practice_report/docs/bp_report_signature_en.pdf. [30] Ara ĠU L304/47 u ĠU
C369/14. [31] Ara COM (2012) 259 “Governanza
aħjar tas-suq uniku”. [32] COM(2011)
162 “Proposta għal Regolament tal-Kunsill dwar pubblikazzjoni elettronika
ta' Il-Ġurnal Uffiċjali tal-Unjoni Ewropea”. [33] http://ec.europa.eu/dgs/secretariat_general/admin_burden/best_practice_report/best_practice_report_en.htm