This document is an excerpt from the EUR-Lex website
Document 52020AE0994
Opinion of the European Economic and Social Committee on ‘Communication from the Commission to the European Parliament, the Council, the European Economic and Social Committee and the Committee of the Regions – A From Farm to Fork Strategy for a fair, healthy and environmentally-friendly food system’ (COM(2020) 381)
Opinjoni tal-Kumitat Ekonomiku u Soċjali Ewropew dwar “Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — Strateġija ‘Mill-Għalqa sal-Platt’ għal sistema tal-ikel ġusta, tajba għas-saħħa u favur l-ambjent” [COM(2020) 381 final]
Opinjoni tal-Kumitat Ekonomiku u Soċjali Ewropew dwar “Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — Strateġija ‘Mill-Għalqa sal-Platt’ għal sistema tal-ikel ġusta, tajba għas-saħħa u favur l-ambjent” [COM(2020) 381 final]
EESC 2020/00994
ĠU C 429, 11.12.2020, p. 268–275
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
11.12.2020 |
MT |
Il-Ġurnal Uffiċjali tal-Unjoni Ewropea |
C 429/268 |
Opinjoni tal-Kumitat Ekonomiku u Soċjali Ewropew dwar “Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — Strateġija ‘Mill-Għalqa sal-Platt’ għal sistema tal-ikel ġusta, tajba għas-saħħa u favur l-ambjent”
[COM(2020) 381 final]
(2020/C 429/34)
Relatur: |
Peter SCHMIDT (DE-II) |
Korelatur: |
Jarmila DUBRAVSKÁ (SK-I) |
Konsultazzjoni |
Kummissjoni, 17.6.2020 |
Bażi legali |
Artikolu 304 tat-Trattat dwar il-Funzjonament tal-Unjoni Ewropea |
Sezzjoni kompetenti |
Sezzjoni għall-Agrikoltura, l-Iżvilupp Rurali u l-Ambjent |
Adottata fis-sezzjoni |
8.7.2020 |
Adottata fil-plenarja |
16.9.2020 |
Sessjoni plenarja Nru |
554 |
Riżultat tal-votazzjoni (favur/kontra/astensjonijiet) |
208/4/7 |
1. Konklużjonijiet u rakkomandazzjonijiet
1.1 |
Il-Komunikazzjoni dwar “Strateġija ‘Mill-Għalqa sal-Platt’ għal sistema tal-ikel ġusta, tajba għas-saħħa u favur l-ambjent” għandha l-għan li ssaħħaħ is-sostenibbiltà ekonomika, ambjentali u soċjali tas-sistemi tal-ikel. Il-kriżi tal-COVID-19 ittestjat b’suċċess is-saħħa u r-reżiljenza tas-sistema agroalimentari tal-Ewropa, u għalhekk tat prova tas-sigurtà tal-provvista tal-ikel fl-UE, iżda wriet ukoll li l-ikel “mill-għalqa sal-platt” ma jistax jitqies bħala ċert. Għandha tinħataf bħala opportunità biex tingħata forma ġdida lid-dinamiċi tal-katina tal-provvista u biex ikun hemm titjib fit-tul għall-produtturi, għall-proċessuri u għall-bejjiegħa bl-imnut. |
1.2 |
Skont il-KESE, politika komprensiva dwar l-ikel fl-UE għandha tipprovdi: i) sostenibbiltà ekonomika, ambjentali u soċjokulturali; ii) integrazzjoni bejn is-setturi, l-oqsma ta' politika u l-livelli ta' governanza; iii) proċessi inklużivi ta' teħid ta' deċiżjonijiet; u iv) taħlita ta' miżuri obbligatorji (regolamenti u taxxi) u inċentivi (premiums tal-prezzijiet, aċċess għall-kreditu, riżorsi u assigurazzjoni) maħsuba biex iħaffu t-tranżizzjoni lejn sistemi sostenibbli tal-ikel. L-istrateġija proposta ma tirriflettix biżżejjed dawk l-għanijiet. |
1.3 |
Il-baġit għall-PAK ma għandux jitnaqqas jew jinżamm fil-livell attwali, iżda għandu jiżdied b’konformità ma’ dawk l-objettivi. It-tnaqqis fil-finanzjament għall-iżvilupp rurali jista' jkun detrimentali, minħabba li fih uħud mill-aktar għodod rilevanti sabiex tiġi appoġġjata t-tranżizzjoni. Filwaqt li l-EUR 15-il biljun addizzjonali proposti taħt il-pakkett ta’ rkupru mill-COVID-19 huma milqugħa u meħtieġa, dawn bl-ebda mod ma jissostitwixxu l-impenji fit-tul. |
1.4 |
L-approvazzjoni tal-Pjani Strateġiċi tal-PAK għandha tkun kondizzjonali fuq l-adozzjoni mill-Istati Membri ta' pjani komprensivi biex jissawwar mill-ġdid l-ambjent tal-ikel li jgħaqqdu l-inċentivi għall-produzzjoni ta' ikel tajjeb għas-saħħa u sostenibbli bil-ħolqien ta' swieq ġodda għal dawk il-prodotti. |
1.5 |
Il-prezzijiet ġusti tal-ikel (li jirriflettu l-ispiża reali tal-produzzjoni għall-ambjent u għas-soċjetà) huma l-uniku mod kif jistgħu jinkisbu sistemi sostenibbli tal-ikel fit-tul. L-UE u l-Istati Membri għandhom jieħdu azzjoni biex jiżguraw li l-prezzijiet mal-ħruġ mill-azjendi agrikoli jibqgħu ogħla mill-ispejjeż tal-produzzjoni u li d-dieti tajbin għas-saħħa jsiru aktar aċċessibbli faċilment. Sabiex jagħmlu dan, se jkun meħtieġ li jużaw il-firxa sħiħa ta' għodod ta' governanza pubblika, minn miżuri fiskali ibsin għal approċċi bbażati fuq l-informazzjoni biex l-ispejjeż veri jsiru viżibbli. |
1.6 |
L-importazzjonijiet irħas spiss jimplikaw spejjeż soċjali u ambjentali għolja fil-pajjiżi terzi. Mingħajr bidliet fil-politiki kummerċjali tal-UE, l-objettivi tal-Istrateġija ma jintlaħqux. Il-Kumitat iħeġġeġ lill-UE biex tiżgura reċiproċità reali tal-istandards fil-ftehimiet ta’ kummerċ preferenzjali. |
1.7 |
L-Istrateġija tonqos milli tindirizza l-ġestjoni sostenibbli tal-art u l-aċċess għall-art. Din hija ommissjoni kbira minħabba li tirrappreżenta wieħed mill-ostakli ewlenin għat-tiġdid tal-popolazzjoni tal-biedja, li mingħajrha l-bażi tal-UE għal biedja sostenibbli u produttiva tintilef. |
1.8 |
Għandha ssir valutazzjoni tal-impatt għall-modi differenti kif tinkiseb kull mira stabbilita fl-istrateġija, filwaqt li titqies is-sitwazzjoni attwali f’kull Stat Membru. |
1.9 |
Għandha tiġi esplorata l-għażla ta' Kunsill Ewropew għall-Politika dwar l-Ikel, kif imressqa f'opinjonijiet preċedenti tal-KESE (inkluża l-vijabbiltà finanzjarja tiegħu). Il-kunsilli għall-politika dwar l-ikel diġà jeżistu fil-livell lokali, u jlaqqgħu flimkien diversi atturi fis-sistema tal-ikel minn qasam speċifiku sabiex isolvu l-isfidi, jerġgħu jgħaqqdu l-bliet mal-produzzjoni tal-ikel fir-reġjuni tal-madwar u jiżguraw governanza effettiva tal-politiki lokali u reġjonali dwar l-ikel. |
2. Introduzzjoni
2.1 |
Il-Komunikazzjoni tal-Kummissjoni Ewropea dwar “Strateġija ‘Mill-Għalqa sal-Platt’ għal sistema tal-ikel ġusta, tajba għas-saħħa u favur l-ambjent” hija komponent ewlieni tal-Patt Ekoloġiku Ewropew. Hija għandha l-għan li tikkontribwixxi għall-aġenda tal-Ewropa dwar it-tibdil fil-klima, tipproteġi l-ambjent u tippreserva l-bijodiversità, tiżgura l-pożizzjoni tal-bdiewa u tas-sajjieda fil-katina tal-valur, tinkoraġġixxi l-konsum sostenibbli tal-ikel u tippromovi ikel affordabbli u tajjeb għas-saħħa għal kulħadd mingħajr ma tikkomprometti s-sikurezza, il-kwalità u l-affordabbiltà tal-ikel. Din hija l-ewwel strateġija tal-UE li tiddikjara li tinkludi l-katina alimentari fl-intier tagħha. |
2.2 |
Il-kriżi tal-COVID-19 għamlitha aktar urġenti minn qatt qabel li tiżdied ir-reżiljenza tas-sistemi tal-ikel globali u tal-UE, li se jkomplu jiġu ttestjati mix-xokkijiet futuri, mit-tibdil fil-klima sat-tifqigħat ta' mard ġodda u nuqqas ta' ħaddiema (1). Il-kriżi ssottolinjat il-fatt li l-kisba tal-ikel “mill-għalqa sal-platt” ma tistax titqies bħala ħaġa ovvja u ċerta u wriet l-interkonnettività tal-atturi u tal-attivitajiet fl-agrikoltura u fis-sistema tal-ikel kollha. Din tirrikjedi miżuri ta' appoġġ għall-kriżijiet, kif ukoll passi li jiżguraw l-irkupru u l-bini mill-ġdid fuq medda ta' żmien itwal. Il-Komunikazzjoni “Mill-Għalqa sal-Platt” u l-Istrateġija tal-UE dwar il-Bijodiversità ġustament jirrikonoxxu l-ħtieġa li tinbena r-reżiljenza wara l-COVID billi tissaħħaħ is-sostenibbiltà ekonomika, ambjentali u soċjali tas-sistemi tal-ikel. Issa huwa kruċjali li dawn l-istrateġiji jinbidlu f'azzjonijiet sinifikanti u f'waqthom. |
2.3 |
Il-bdiewa madwar l-UE diġà ħadu passi biex iżidu s-sostenibbiltà u jkomplu jtejbu l-istandards. Il-bdiewa u l-ħaddiema tas-sistema tal-ikel (fl-agrikoltura, l-ipproċessar u d-distribuzzjoni) kienu fuq il-front tal-kriżi tal-COVID-19 u assiguraw provvista tal-ikel mingħajr interruzzjoni għaċ-ċittadini Ewropej; dawn sistematikament jiffaċċjaw ir-riskji, filwaqt li jżommu sehem baxx tal-valur miżjud fis-sistema tal-ikel. Fi kwalunkwe każ, anke fil-futur, il-bdiewa ser ikunu neċessarjament mistennija li jagħmlu sforzi akbar milli kien il-każ s’issa sabiex jibnu s-sostenibbiltà u r-reżiljenza. Minħabba s-sitwazzjoni ekonomika diffiċli li issa jsibu ruħhom fiha l-maġġoranza l-kbira tal-bdiewa, bidliet fundamentali bħal dawn jistgħu jseħħu biss jekk jiġu stabbiliti l-inċentivi politiċi u ekonomiċi xierqa; il-KESE ma jqisx li l-proposti ta’ riforma tal-PAK tinkludi miżuri effettivi f’dan is-sens. Huwa għalhekk imperattiv li jiġi żgurat li jkun hemm kundizzjonijiet konsiderevolment aħjar fis-seħħ sabiex l-ikel prodott lokalment u b'mod sostenibbli fl-UE (2) jkun kompetittiv fir-rigward tal-importazzjonijiet, u mhux biss sabiex l-ispejjeż u l-benefiċċji tat-tranżizzjoni jiġu kondiviżi b'mod ekwu (bejn gruppi soċjali, setturi u reġjuni differenti, kif ukoll bejn il-ġenerazzjonijiet preżenti u dawk futuri), iżda wkoll sabiex il-fondi jimmiraw l-appoġġ għall-biedja sostenibbli. L-Istrateġija “Mill-Għalqa sal-Platt” trid tinħataf bħala opportunità sabiex tinbidel b'mod fundamentali d-dinamika tal-katina tal-provvista u jitwassal titjib fit-tul fl-introjti u l-għajxien tal-bdiewa. Il-Kumitat itenni li l-Patt Ekoloġiku Ewropew irid ikun Patt Ekoloġiku u Soċjali fil-komponenti kollha tiegħu. |
2.4 |
F’dak li jirrigwarda l-importazzjonijiet ta’ prodotti agrikoli mhux ipproċessati u ta’ prodotti tal-ikel, il-KESE kien jistenna li l-istrateġija “Mill-għalqa sal-platt” tagħmel dikjarazzjoni ċara simili għal dik li għamlet il-Kummissjoni fit-tħabbir ta’ aġġustament tal-karbonju fil-fruntiera għall-prodotti industrijali, peress li l-bdiewa tagħna (u l-konsumaturi) għandhom ikunu protetti mill-importazzjonijiet li ma jissodisfawx il-kriterji Ewropej ta’ sostenibbiltà. Dan huwa aktar u aktar minnu peress li joħroġ biċ-ċar li l-istandards attwali tagħna jeħtieġ li jogħlew. Iżda f’dan ir-rigward l-istrateġija “Mill-Għalqa sal-Platt” tfalli għalkollox. |
2.5 |
Il-KESE jilqa' b'sodisfazzjon il-pubblikazzjoni tal-Istrateġija “Mill-Għalqa sal-Platt”, li tirrappreżenta opportunità kruċjali biex jintlaħqu l-għanijiet deskritti hawn fuq. F'din l-Opinjoni, il-Kumitat jidentifika xi lakuni fil-Komunikazzjoni u l-Pjan ta' Azzjoni dwar l-Istrateġija “Mill-Għalqa sal-Platt” (fir-rigward tal-ambizzjonijiet tal-Patt Ekoloġiku Ewropew u l-proposti tal-Kumitat stess għal politika komprensiva dwar l-ikel (3)) u jipprovdi gwida dwar kif l-Istrateġija “Mill-Għalqa sal-Platt” tista' titmexxa 'l quddiem u tissarraf fi pjan direzzjonali effettiv għat-tranżizzjoni. |
3. Is-sisien ta' Strateġija effettiva “Mill-Għalqa sal-Platt”: governanza, responsabbiltà, objettivi u riżorsi
3.1 |
Il-KESE ilu mill-2016 jappella li tiġi żviluppata politika komprensiva dwar l-ikel fl-UE, bil-għan li jiġu pprovduti dieti tajbin għas-saħħa minn sistemi sostenibbli tal-ikel, jgħaqqdu l-agrikoltura ma' servizzi tan-nutrizzjoni u tal-ekosistema u jiġu żgurati ktajjen ta' provvista li jipproteġu s-saħħa pubblika għas-soċjetà Ewropea kollha (4). Koalizzjoni wiesgħa tas-soċjetà ċivili ngħaqdet ukoll biex tiżviluppa b'mod konġunt pjan ta' azzjoni dettaljat ta' “Politika Komuni dwar l-Ikel” għall-UE, fi proċess ta' tliet snin immexxi minn IPES-Food (5). |
3.2 |
F'konformità mar-rakkomandazzjonijiet fit-testi msemmija hawn fuq, il-politika komprensiva dwar l-ikel fl-UE għandha tipprovdi: i) sostenibbiltà ekonomika, ambjentali u soċjokulturali; ii) integrazzjoni bejn is-setturi, l-oqsma ta' politika u l-livelli ta' governanza; iii) proċessi inklużivi ta' teħid ta' deċiżjonijiet; u iv) taħlita ta' miżuri obbligatorji (regolamenti u taxxi) u inċentivi (premiums tal-prezzijiet, aċċess għall-kreditu, riżorsi u assigurazzjoni) maħsuba biex iħaffu t-tranżizzjoni lejn sistemi sostenibbli tal-ikel. Din għandha taċċellera l-iżvilupp ta' ekonomija ċirkolari u tnaqqas l-impatt ambjentali tas-setturi tal-ipproċessar tal-ikel u tal-bejgħ bl-imnut billi tieħu azzjoni fuq it-trasport, il-ħażna, l-imballaġġ u l-ħela tal-ikel. Din għandha tkun attrezzata wkoll biex tindirizza s-sitwazzjoni ġdida wara l-COVID-19, b'mod partikolari l-ħtieġa li tittejjeb il-ġestjoni tal-kriżi u jissaħħu l-kundizzjonijiet tax-xogħol sikuri u ġusti tul il-katina kollha. |
3.3 |
Filwaqt li l-Komunikazzjoni u l-Pjan ta' Azzjoni dwar l-Istrateġija “Mill-Għalqa sal-Platt” jidentifikaw ħafna għodod rilevanti, huma ma għandhomx mekkaniżmi ta' governanza effettivi. L-ewwel nett, l-azzjonijiet iridu jinġabru taħt sett ta' objettivi ġenerali u orjentati lejn il-miri li jiddeskrivu s-sistemi tal-ikel li l-UE qed tittama li timplimenta fuq terminu medju u twil (6). Minflok jindirizzaw partijiet speċifiċi tal-katina, dawn l-objettivi jridu jkunu trasversali (7). Dan huwa essenzjali sabiex: i) tiġi enfasizzata l-ħtieġa ta' approċċi tal-katina kollha u kondiviżjoni ġusta tal-ispejjeż biex jiġu indirizzati l-isfidi fl-agrikoltura; ii) ikunu jistgħu jiġu prijoritizzati soluzzjonijiet differenti u jiġi evitat approċċ “à la carte”, fejn jiġu inklużi soluzzjonijiet inkompatibbli; iii) ikun żgurat li jiġu introdotti miżuri alternattivi (b'effetti ekwivalenti) f'każ li l-azzjonijiet ippjanati inizjalment jiġu ttardjati jew imxekkla; iv) jiġi żgurat li l-miri kwantitattivi u kwalitattivi jkunu akkumpanjati mill-ġabra sħiħa ta' miżuri meħtieġa biex jintlaħqu (u li b'hekk dawn ikunu fattibbli), u jiżdiedu aktar miri jekk ikunu meħtieġa biex jintlaħaq l-objettiv iddikjarat; u v) tiġi pprovduta bażi robusta biex tiżgura l-allinjament ta' politiki settorjali differenti (eż. il-PAK, il-kummerċ, l-ambjent, l-iżvilupp tas-saħħa u s-sikurezza alimentari) mal-Istrateġija “Mill-Għalqa sal-Platt”. |
3.4 |
Sabiex tkun effettiva, l-Istrateġija “Mill-Għalqa sal-Platt” għandha tkun akkumpanjata minn qafas ċar b'miri, indikaturi u mekkaniżmu ta' monitoraġġ robust, iżda mingħajr ma tiżdied il-burokrazija. Il-KESE diġà rrakkomanda li tiġi żviluppata tabella ta' valutazzjoni tal-ikel sostenibbli tal-UE, li tippermetti li l-isfidi tas-sistema tal-ikel jiġu indirizzati permezz ta' approċċ pluriennali, biex b'hekk jiġi promoss l-allinjament tal-politiki f'livelli differenti ta' governanza. It-tabella ta' valutazzjoni tipprovdi indikaturi u b'hekk tinkoraġġixxi u tissorvelja l-progress lejn l-ilħuq tal-miri li ġew stabbiliti (8). |
3.5 |
Strateġija effettiva “Mill-Għalqa sal-Platt” għandha tnaqqas l-esternalitajiet għaljin mill-agrikoltura u tiżgura li l-bdiewa kollha jiġu remunerati b'mod ġust mis-swieq; għalhekk, hija se tkun kosteffettiva fuq medda ta' żmien itwal. Madankollu, it-tranżizzjoni għal sistemi tal-ikel sostenibbli u kompetittivi tirrikjedi investiment urġenti. B'mod partikolari, huma meħtieġa sforzi kbar u investiment kapitali biex jinkisbu l-livelli ta' azzjonijiet klimatiċi u ambjentali identifikati fil-Patt Ekoloġiku Ewropew u biex jgħinu lill-bdiewa jimplimentaw approċċi sostenibbli. Dawn il-miri ma jistgħux jintlaħqu jekk il-flussi ta' finanzjament ewlenin jiġu interrotti. It-tnaqqis fil-finanzjament għall-iżvilupp rurali jista' jkun detrimentali, minħabba li fih uħud mill-aktar għodod rilevanti sabiex tiġi appoġġjata t-tranżizzjoni, kif innotat fil-Komunikazzjoni dwar l-Istrateġija “Mill-Għalqa sal-Platt”. Il-Kumitat itenni wkoll l-importanza li jiġu allokati EUR 10 biljun għar-riċerka dwar l-agrikoltura, l-iżvilupp rurali u l-bijoekonomija, kif previst mill-Kummissjoni Ewropea fil-proposti tagħha għall-Qafas Finanzjarju Pluriennali (QFP) 2021-2027. Filwaqt li l-EUR 15-il biljun addizzjonali għall-iżvilupp rurali u r-riċerka agroalimentari proposti taħt il-pakkett ta’ rkupru mill-COVID-19 huma milqugħa u meħtieġa, dawn bl-ebda mod ma jissostitwixxu l-impenji fit-tul. |
3.6 |
Firxa wiesgħa ta' partijiet interessati fis-sistemi tal-ikel għandhom rwol x'jaqdu fis-sorveljanza tal-iżvilupp u l-implimentazzjoni tal-Istrateġija “Mill-Għalqa sal-Platt”. Filwaqt li l-kooperazzjoni mtejba bejn il-korpi eżistenti għandha tiġi prijoritizzata, ser tkun meħtieġa struttura ta' governanza ddedikata b'diversi partijiet interessati. Fl-esplorazzjoni tal-għażliet, għandu jiġi żgurat li l-istruttura ta' governanza l-ġdida: i) tadotta approċċi demokratiċi u inklużivi f'konformità mal-aħjar prattika fil-korpi attwali, b'mod partikolari l-Pjattaforma b'diversi Partijiet Interessati dwar l-SDGs; ii) ikollha mandat ċar li tinkludi l-kunsiderazzjoni ta' kemm politiki settorjali bħall-PAK huma allinjati tajjeb mal-Istrateġija “Mill-Għalqa sal-Platt”; u iii) tinkludi rappreżentanza b'saħħitha u diversa tal-gruppi tal-biedja, tas-soċjetà ċivili (inklużi organizzazzjonijiet fil-livell taċ-ċittadini, kif ukoll dawk nazzjonali u tal-UE) u tal-atturi fil-katina tal-provvista. Trid tiġi evitata s-sitwazzjoni fejn l-interessi agrikoli jinvolvu ruħhom biss fil-PAK, u s-soċjetà ċivili biss fl-Istrateġija “Mill-Għalqa sal-Platt”: it-tensjonijiet iridu jiġu kkonfrontati u għandu jintlaħaq qbil fuq it-triq għat-tranżizzjoni mill-atturi kollha. |
3.7 |
Għandha tiġi esplorata l-għażla ta' “Kunsill Ewropew għall-Politika dwar l-Ikel” (9), kif imressqa f'opinjonijiet preċedenti tal-KESE (inkluża l-vijabbiltà finanzjarja tagħha). Il-Kunsill Ewropew għall-Politika dwar l-Ikel għandu jiġi kkonsultat dwar l-implimentazzjoni tal-Istrateġija “Mill-Għalqa sal-Platt”. Dan għandu jinħoloq kemm jista’ jkun malajr. Il-kunsilli għall-politika dwar l-ikel diġà jeżistu fil-livell lokali, u jlaqqgħu flimkien diversi atturi fis-sistema tal-ikel minn madwar territorju sabiex isolvu l-isfidi, jerġgħu jgħaqqdu l-bliet mal-produzzjoni tal-ikel fir-reġjuni tal-madwar u jiżguraw governanza effettiva tal-politiki lokali u reġjonali dwar l-ikel (10). Kif uriet il-kriżi tal-COVID-19, il-ktajjen tal-provvista reżiljenti jiddependu fuq azzjoni effettiva fil-livell lokali, fejn is-soċjetà ċivili tista' taħdem mal-imsieħba statali u kummerċjali biex timla l-lakuni fil-forniment tal-ikel (11). Kunsill Ewropew għall-Politika dwar l-Ikel jaċċellera l-allinjament tal-politiki fil-livelli lokali, nazzjonali u tal-UE (jiġifieri governanza fuq bosta livelli). Dan ilaqqa' flimkien rappreżentanti tal-kunsilli lokali għall-politika dwar l-ikel u partijiet interessati mis-soċjetà ċivili u tul il-katina tal-provvista kollha (inklużi bdiewa, ħaddiema u konsumaturi), sabiex jipprovdu pjattaforma għall-partijiet interessati biex jitgħallmu minn xulxin permezz tal-kondiviżjoni ta' prattika tajba; jiżguraw li jiġu kkunsidrati l-perspettivi kollha mid-diversi setturi; u jidentifikaw l-ostakoli għall-promozzjoni ta' ikel sostenibbli fil-livell lokali. |
4. Oqsma ewlenin fejn hija meħtieġa aktar azzjoni
4.1 Dieti tajbin għas-saħħa u sostenibbli
4.1.1 |
Id-dieti tajbin għas-saħħa u sostenibbli jirrappreżentaw pilastru ewlieni ta' politika komprensiva dwar l-ikel, minħabba li aħna għandna bżonn urġenti li norjentaw mill-ġdid id-dieti tagħna biex intejbu – is-saħħa tal-ekosistemi u tal-pubbliku, kif ukoll il-vitalità tat-territorji rurali (12). Il-Komunikazzjoni dwar l-Istrateġija “Mill-Għalqa sal-Platt” tirrikonoxxi l-ħtieġa li jiġi żgurat li l-għażliet tajbin għas-saħħa u sostenibbli jkunu l-aktar għażliet faċli għall-konsumaturi (jiġifieri disponibbli ħafna u affordabbli għal kulħadd), u tirrikonoxxi li l-“ambjenti tal-ikel” isawru l-għażliet tan-nies. |
4.1.2 |
L-Istrateġija “Mill-Għalqa sal-Platt” tista’ toffri opportunità unika biex jissawru mill-ġdid l-ambjenti tal-ikel, u din tirrikjedi għadd ta' politiki differenti li jkunu allinjati min-naħa tal-provvista u tad-domanda, u fil-livell lokali, nazzjonali u tal-UE, inklużi passi li: i) jindirizzaw il-kummerċjalizzazzjoni u r-reklamar ta' dieti mhux tajbin għas-saħħa permezz ta' azzjoni regolatorja; ii) jiżguraw informazzjoni faċli biex tintuża, affidabbli u indipendenti dwar in-nutrizzjoni tal-konsumaturi; iii) jintroduċu politiki ta' pprezzar tal-ikel tajjeb għas-saħħa; iv) jappoġġjaw l-akkwist pubbliku ta' ikel sostenibbli; v) jixprunaw il-formulazzjoni (mill-ġdid) tal-prodotti; vi) joħolqu ambjenti tal-bejgħ bl-imnut, tar-ristoranti, urbani u skolastiċi tajbin għas-saħħa; u vii) jinvestu fl-edukazzjoni tal-konsumaturi. Dawn il-passi jridu jkunu kkomplementati minn politiki soċjali li jiżguraw li l-gruppi żvantaġġjati u b’introjtu baxx ikollhom aċċess akbar għal dieti tajbin għas-saħħa u sostenibbli. |
4.1.3 |
Madankollu, il-Komunikazzjoni u l-Pjan ta' Azzjoni dwar l-Istrateġija “Mill-Għalqa sal-Platt” jonqsu milli jiddeskrivu azzjoni komprensiva f'dawn l-oqsma ta' politika u jistrieħu fuq kodiċi ta' mġiba, wegħdiet u għodod oħrajn ta' awtoregolazzjoni (13) li s'issa wrew li mhumiex effettivi. Il-pjan tal-Kummissjoni Ewropea li tagħmel rakkomandazzjonijiet lill-Istati Membri (fil-mandat tal-Pjani Strateġiċi tal-PAK) dwar kif jintlaħqu l-objettivi tal-PAK u tal-Istrateġija “Mill-Għalqa sal-Platt”, inklużi objettivi tas-saħħa, huwa milqugħ b'sodisfazzjon. Madankollu, l-azzjoni fuq id-dieti ma tistax tkun fakultattiva. L-approvazzjoni tal-Pjani Strateġiċi tal-PAK għandha tkun kondizzjonali fuq l-adozzjoni mill-Istati Membri ta' pjani komprensivi biex jissawwar mill-ġdid l-ambjent tal-ikel li jgħaqqdu l-inċentivi għall-produzzjoni ta' ikel tajjeb għas-saħħa u sostenibbli bil-ħolqien ta' swieq ġodda għal dawk il-prodotti. Dan għandu jkun ukoll konformi mal-impenn tal-Kummissjoni li tippromovi l-produzzjoni u l-konsum ta' ikel organiku. |
4.1.4 |
Fir-rigward tal-għoti ta' informazzjoni u gwida affidabbli dwar in-nutrizzjoni, il-KESE talab li jiġu żviluppati Linji Gwida ġodda dwar Dieti Sostenibbli, li jqisu d-differenzi kulturali u ġeografiċi bejn u fi ħdan l-Istati Membri. Il-Linji Gwida dwar Dieti Sostenibbli jgħinu sabiex tinħoloq direzzjoni aktar ċara għall-azjendi agrikoli, il-proċessuri, il-bejjiegħa bl-imnut u l-industrija tal-forniment tal-ikel, u s-sistema agroalimentari tibbenefika minn qafas ġdid biex tipproduċi, tipproċessa, tiddistribwixxi u tbiegħ ikel aktar tajjeb għas-saħħa u aktar sostenibbli bi prezz aktar ġust (14). |
4.2 Katina tal-provvista tal-ikel ġusta bi prezzijiet ġusti
4.2.1 |
Il-KESE diġà ħeġġeġ projbizzjoni fuq il-Prattiki Kummerċjali Inġusti (Unfair Trading Practices – UTPs) (15). Il-katina tal-provvista tal-ikel hija partikolarment vulnerabbli għall-UTPs, minħabba żbilanċi qawwija bejn operaturi żgħar u kbar u bejn produtturi b’impenji fit-tul u negozjanti aktar flessibbli. Approċċ regolatorju u qafas leġislattiv b’mekkaniżmi ta’ infurzar effettivi u robusti huma l-mod kif il-UTPs jistgħu jiġu indirizzati b’mod effettiv fil-livell tal-UE. |
4.2.2 |
Il-Komunikazzjoni dwar l-Istrateġija “Mill-Għalqa sal-Platt” tirrikonoxxi ġustament ix-xogħol essenzjali li jsir mill-bdiewa u mill-ħaddiema tul il-katina alimentari (inklużi dawk li jaħdmu f'kundizzjonijiet prekarji) u l-ħtieġa li jiġu żgurati s-saħħa u s-sikurezza tagħhom f'konformità mal-impenji taħt il-Pilastru Ewropew tad-Drittijiet Soċjali. Madankollu, il-Kumitat jiddispjaċih li dan mhuwiex akkumpanjat minn passi konkreti fil-Pjan ta' Azzjoni. Barra minn hekk, il-KESE jiddispjaċih għan-nuqqas ta' rabta ta' kundizzjonijiet ġusti ma' prezzijiet ġusti tal-ikel, u jqis li l-prezzijiet ġusti tal-ikel (li jirriflettu l-ispiża vera tal-produzzjoni għall-ambjent u għas-soċjetà) huma l-uniku mod kif jinkisbu sistemi tal-ikel sostenibbli u ekwi fit-tul. Bħalissa, il-proċessuri tal-bejgħ bl-imnut u multinazzjonali kbar qed ikollhom l-ogħla profitti filwaqt li l-prezzijiet mal-ħruġ mill-azjendi agrikoli huma baxxi wisq biex jiggarantixxu l-għajxien tal-bdiewa u kundizzjonijiet tax-xogħol deċenti, u ħafna drabi lanqas biss ikopru l-ispejjeż tal-produzzjoni. Is-sehem tal-valur tal-katina alimentari tal-UE li jmur għand il-bdiewa naqas minn 31 % fl-1995 għal 24 % fl-2005 (16), u aktar reċenti kien stmat għal madwar 21 % (17). Il-kompressjoni tal-prezzijiet mal-ħruġ mill-azjendi agrikoli tħalliet isseħħ, abbażi ta' interpretazzjoni stretta tad-dritt tal-kompetizzjoni tal-UE, li biha l-benessri tal-konsumaturi jitqabbel mal-aktar prezz baxx possibbli. Dan irid jinbidel, inkluż fit-Trattati tal-UE. |
4.2.3 |
Fil-mandat tal-Istrateġija “Mill-Għalqa sal-Platt”, l-UE u l-Istati Membri għandhom jieħdu azzjoni komprensiva biex jiżguraw li l-prezzijiet mal-ħruġ mill-azjendi agrikoli jibqgħu ogħla mill-ispejjeż tal-produzzjoni, kif ukoll li d-dieti tajbin għas-saħħa u sostenibbli jsiru relattivament aktar affordabbli u disponibbli. Sabiex jagħmlu dan, se jkun meħtieġ li jużaw il-firxa sħiħa ta' għodod ta' governanza pubblika, minn miżuri fiskali ibsin għal approċċi bbażati fuq l-informazzjoni biex l-ispejjeż veri jsiru viżibbli, abbażi tal-aħjar metodoloġiji emerġenti għall-kontabbiltà vera tal-ispejjeż (18). Il-KESE jtenni l-importanza tal-investiment fl-edukazzjoni dwar dieti sostenibbli sa minn età bikrija, sabiex iż-żgħażagħ ikunu megħjuna japprezzaw il-valur tal-ikel u prezzijiet ġusti. Trid tingħata attenzjoni speċjali lill-gruppi vulnerabbli, speċjalment lill-anzjani u lill-popolazzjonijiet b'introjtu baxx. Għandhom jiġu esplorati wkoll forom ġodda ta' tikkettar li juru s-sehem tal-valur li jmur għand il-bdiewa. Il-passi kollha li jaffettwaw il-prezzijiet għandhom ikunu ssekwenzjati bir-reqqa biex jiġi evitat ċaqliq rapidu, u jkunu akkumpanjati mill-monitoraġġ tal-impatti fuq il-familji b'introjtu baxx (19) sabiex jiġi żgurat li l-aċċess tagħhom għal dieti tajbin għas-saħħa jiżdied, u mhux jonqos, bħala riżultat tal-interventi ta' politika. |
4.2.4 |
Is-swieq tal-bdiewa, l-Agrikoltura Appoġġjata mill-Komunità (CSA), il-kooperattivi tal-konsumaturi u inizjattivi oħrajn ta' katina tal-provvista qasira jipprovdu possibbiltà kruċjali għall-bdiewa biex iżidu l-valur miżjud u jirċievu prezzijiet ġusti, b'mod partikolari għal dawk li jipprattikaw il-biedja organika jew li japplikaw metodi oħrajn favur l-ambjent li mhumiex koperti b'tikketta. L-awtoritajiet lokali u reġjonali spiss ikunu involuti, billi jimplimentaw sistemi lokali ta’ governanza alimentari li jlaqqgħu flimkien id-diversi atturi kkonċernati u, b'mod partikolari, irawmu l-użu ta’ prodotti lokali fil-forniment tal-ikel tal-massa. Il-KESE jiddeplora li l-Opinjonijiet preċedenti tiegħu ma ġewx segwiti mill-Kummissjoni f’dan ir-rigward. |
4.2.5 |
Din il-lokalizzazzjoni mill-ġdid trawwem l-impjiegi u d-dinamiżmu lokali. Dan iżid ukoll ir-reżiljenza, kif muri mir-reazzjoni għall-COVID-19 fil-livelli kollha tal-katina tal-provvista (produtturi, proċessuri u bejjiegħa bl-imnut). Iż-żoni rurali huma eżempju wieħed ta' dominju fejn il-kooperattivi tal-konsumaturi ġeneralment ikunu l-aħħar operatur tan-negozju li jifdal. Għall-konsumaturi, il-ktajjen tal-provvista qosra joffru sors ta' prodotti friski ta' kwalità għolja li huma arrikkiti mill-istorja u mir-relazzjonijiet umani involuti, u jaġixxu biex jistimulaw l-interess u jedukaw lin-nies dwar il-valur tal-ikel, kif ukoll il-bini mill-ġdid tal-fiduċja fis-sistemi tal-ikel (20). L-inizjattivi kooperattivi bbażati fuq is-solidarjetà għandhom ukoll rwol ewlieni fl-iżvilupp ta' materjali edukattivi għall-iskejjel u sensibilizzazzjoni qawwija biex jiġu miġġielda l-ħela tal-ikel u l-obeżità, speċjalment fost it-tfal. Filwaqt li l-benefiċċji tal-ktajjen tal-provvista qosra huma rikonoxxuti fil-Komunikazzjoni dwar l-Istrateġija “Mill-Għalqa sal-Platt”, huma meħtieġa azzjonijiet konkreti u allokazzjonijiet ta' finanzjament (inkluż fil-pjani strateġiċi tal-PAK) biex dawn il-ktajjen jiġu żviluppati aktar u jitneħħew l-ostakli kollha sabiex huma jiffjorixxu fl-UE kollha. |
4.3 It-tisħiħ tad-dimensjoni esterna tal-Istrateġija “Mill-Għalqa sal-Platt”
4.3.1 |
Mingħajr bidliet fil-politiki kummerċjali tal-UE, l-objettivi tal-Istrateġija “Mill-Għalqa sal-Platt” ma jintlaħqux. Il-Komunikazzjoni u l-Pjan ta' Azzjoni dwar l-Istrateġija “Mill-Għalqa sal-Platt” jinkludu passi importanti biex jissaħħu d-dispożizzjonijiet tas-sostenibbiltà tal-Ftehimiet ta' Kummerċ Ħieles (FTAs) bilaterali tal-UE u l-infurzar ta' dawk ir-regoli. Madankollu, kif innotat mill-awtoritajiet Franċiżi u Netherlandiżi (21), jista' jsir aktar biex tiġi żgurata l-konformità mal-ftehimiet internazzjonali u biex jiġu ssemplifikati l-proċeduri għan-notifika u t-teħid ta' azzjoni fuq il-ksur tal-impenji tas-sostenibbiltà. Barra minn hekk, il-Kumitat iħeġġeġ lill-UE biex tiżgura r-reċiproċità vera tal-istandards fi ftehimiet ta' kummerċ preferenzjali, b'mod partikolari rigward il-benessri, is-sostenibbiltà u t-traċċabbiltà mill-għalqa sal-platt, abbażi u bl-integrazzjoni ta' dak li nkiseb f'xi dispożizzjonijiet bilaterali reċenti (22). Taxxa fuq il-Karbonju fil-Fruntieri, kif awtorizzata fl-Ittra ta' Missjoni lill-Viċi President Eżekuttiv nominat għall-Patt Ekoloġiku Ewropew (23), tibqa' essenzjali biex tipprevjeni li l-bdiewa u l-kumpaniji tal-ikel tal-UE jispiċċaw ikollhom iwaqqgħu l-prezzijiet minħabba l-importazzjonijiet minn pajjiżi li jonqsu milli jieħdu l-mitigazzjoni tal-klima bis-serjetà. Is-silenzju fuq it-taxxa fuq il-karbonju fil-fruntieri, l-ipprezzar tal-karbonju u l-monitoraġġ tal-gassijiet serra tal-importazzjonijiet huwa għalhekk ta' dispjaċir u jimmina serjament l-ambizzjonijiet tal-Istrateġija “Mill-Għalqa sal-Platt” u tal-Patt Ekoloġiku. |
4.3.2 |
Il-Komunikazzjoni dwar l-Istrateġija “Mill-Għalqa sal-Platt” tonqos milli tirrikonoxxi l-impatt tal-esportazzjonijiet tal-UE fuq il-produtturi fuq skala żgħira fil-pajjiżi li qed jiżviluppaw, jew ir-rwol tal-kumpaniji multinazzjonali bbażati fl-UE biex jikkontribwixxu għal prattiki mhux sostenibbli madwar id-dinja. Il-kapaċitajiet ġodda ta' infurzar iridu l-ewwel u qabel kollox ikunu diretti lejn kumpaniji bbażati fl-UE, li jridu jkunu responsabbli biex jiżguraw li l-ktajjen tal-provvista tagħhom ikunu ħielsa minn deforestazzjoni, ħtif tal-art u ksur tad-drittijiet. Għalhekk, il-KESE jilqa' b'sodisfazzjon l-impenn tal-Kummissarju għall-Ġustizzja Reynders li jintroduċi rekwiżiti vinkolanti dwar id-Drittijiet tal-Bniedem u d-Diliġenza Dovuta Ambjentali għall-kumpaniji tal-UE, u jitlob li jiġu kkunsidrati miżuri addizzjonali speċifiċi għas-settur fil-mandat tal-Istrateġija “Mill-Għalqa sal-Platt”. Kif innotat mill-Parlament Ewropew (24), l-obbligi ta' diliġenza dovuta huma partikolarment urġenti għall-operaturi fil-ktajjen tal-provvista ta' “komoditajiet b'riskju għall-foresti” (eż. ċanga, sojja, żejt tal-palm). |
4.3.3 |
L-aktar importanti, l-Istrateġija “Mill-Għalqa sal-Platt” tonqos milli tirrikonoxxi ċ-ċirkolarità tas-swieq globali agrikoli u l-influwenza reċiproka li l-volumi nnegozjati għandhom fuq il-pajjiżi li jimportaw u dawk li jesportaw. Hija tirrappreżenta opportunità kruċjali biex jerġgħu jiġu stabbiliti l-objettivi esterni tal-UE, f'konformità mal-ambizzjonijiet tal-Komunikazzjoni tal-Kummissjoni Ewropea dwar “Kummerċ għal Kulħadd” (25). Din ir-riflessjoni fit-tul hija nieqsa mill-Komunikazzjoni dwar l-Istrateġija “Mill-Għalqa sal-Platt”. L-FTAs ikomplu jixprunaw it-tkabbir mhux sostenibbli fil-konsum, b'impatt ambjentali enormi f'pajjiżi terzi – b'mod partikolari d-deforestazzjoni (26). Huwa meħtieġ li tiġi kkontestata l-espansjoni kontinwa tal-volumi tal-kummerċ bħala l-għan aħħari tal-politika tal-UE (b'mod partikolari fis-setturi b'emissjonijiet għolja ta' gassijiet serra u fis-setturi strateġiċi li jirrikjedu diversità ta' ktajjen b'saħħithom wara l-COVID-19). Huwa essenzjali wkoll li jinstabu modi ġodda ta' kif jogħlew l-istandards, jiġu promossi prattiki sostenibbli u jiġi żgurat li jkunu jistgħu jiġu sfruttati opportunitajiet ġodda għal produzzjoni sostenibbli minn bdiewa fuq skala żgħira fl-UE u fil-pajjiżi li qed jiżviluppaw. Dawn ir-riflessjonijiet għandhom jiġu segwiti f'fora multilaterali bħall-Kumitat tan-NU dwar is-Sigurtà Alimentari Dinjija (CFS) u l-Codex Alimentarius, aktar milli jkunu limitati għal negozjati bilaterali, fejn il-parteċipazzjoni tal-bdiewa u tas-soċjetà ċivili tkun limitata, l-iżbilanċi tal-poter ikunu sinifikanti u l-liberalizzazzjoni tal-kummerċ tibqa' l-għan aħħari. Il-qafas leġislattiv ippjanat dwar is-sistemi tal-ikel sostenibbli jista' jipprovdi punt ta' tluq. L-ewwel u qabel kollox, huwa jrid iservi biex jistabbilixxi definizzjoni ċara tas-sistemi tal-ikel sostenibbli, f'konformità mad-definizzjonijiet tal-UE eżistenti ta' sostenibbiltà ambjentali (27). |
4.4 L-appoġġ lill-bdiewa fit-tranżizzjoni għal sistemi agroekoloġiċi reżiljenti u diversi
4.4.1 |
Il-Komunikazzjoni dwar l-Istrateġija “Mill-Għalqa sal-Platt” u l-Istrateġija għall-Bijodiversità jinkludu passi kruċjali għall-bini mill-ġdid u l-ħarsien tal-ħamrija u tas-sistemi agroekoloġiċi, b'mod partikolari l-miri għaż-żona agrikola b'karatteristiċi ta' pajsaġġ b'diversità għolja (10 %) u għall-art taħt biedja organika (25 %). Madankollu, għandha tiġi kkunsidrata l-pożizzjoni inizjali ta’ Stati Membri differenti. Il-Komunikazzjoni dwar l-Istrateġija “Mill-Għalqa sal-Platt” tonqos milli tindirizza l-ġestjoni sostenibbli tal-art u l-aċċess għall-art. Din hija ommissjoni kbira minħabba li tirrappreżenta wieħed mill-ostakli ewlenin għat-tiġdid tal-popolazzjoni tal-biedja, li mingħajrha l-bażi tal-UE għal biedja sostenibbli u produttiva tintilef. Il-KESE ppropona qafas tal-UE mmirat biex jipproteġi l-art agrikola fl-Istati Membri li hija siewja għall-produzzjoni tal-ikel (28). Madankollu, dawn l-għanijiet ta’ min ifaħħarhom ikunu jeħtieġu appoġġ finanzjarju adegwat li huwa nieqes fil-proposti baġitarji attwali. Bl-istess mod, il-Komunikazzjoni ma tagħtix gwida dwar kif id-domanda għall-prodotti organiċi għandha tiżdied aktar. Il-mira għall-karatteristiċi tal-pajsaġġ ser tkun għalja ħafna biex xi bdiewa jindirizzawhom. Il-KESE jappella għal valutazzjoni tal-impatt dwar l-implimentazzjoni ta’ dan l-għan. |
4.4.2 |
Il-KESE jqis li l-agroekoloġija hija l-orizzont li lejh għandha taħdem l-agrikoltura Ewropea (29), li tirrikjedi bidla paradigmatika li tkompli tibni d-diversità fil-livelli kollha (l-ispeċijiet, l-azjendi agrikoli, il-pajsaġġi u l-għajxien). Bħala xjenza, teknika u moviment soċjali, l-agroekoloġija tħares lejn is-sistema tal-ikel fl-intier tagħha u tfittex li tqarreb lill-produtturi lejn l-ambjent tagħhom billi tissalvagwardja u anki tirrestawra l-kumplessità u l-ġid tas-sistema agrikola, ekoloġika u soċjali. Madankollu, il-Komunikazzjoni dwar l-Istrateġija “Mill-Għalqa sal-Platt” għadha tittratta l-agroekoloġija bħala għażla niċċa, li għandha tiġi appoġġjata, fost għażliet oħrajn, permezz ta' politiki ta' riċerka u skemi ekoloġiċi tal-PAK. Għalhekk, hija tonqos milli tidentifika l-ħtieġa li titfassal mill-ġdid u tiġi ddiversifikata mill-ġdid l-agrikoltura madwar l-UE, minkejja l-ħtieġa li sseħħ bidla bħal din sabiex jintlaħqu l-miri u l-għanijiet iddikjarati tal-Istrateġija “Mill-Għalqa sal-Platt” u tal-Istrateġija għall-Bijodiversità (inklużi l-miri li jirrigwardjaw it-tnaqqis tal-pestiċidi, tal-fertilizzanti u tal-antibijotiċi). |
4.4.3 |
Il-KESE jinsisti wkoll li, apparti l-iżvilupp tal-biedja organika deskritta hawn fuq, jiġu analizzati b’aktar reqqa u promossi prattiki oħra ta’ kultivazzjoni li jżidu l-bijodiversità u jnaqqsu l-użu tal-inputs. Dan jista’ jinkludi wkoll il-promozzjoni tal-biedja bi preċiżjoni, fejn għandu jiġi kkunsidrat il-kost kapitali għoli, li ħafna azjendi agrikoli żgħar u ta’ daqs medju ma jistgħux iġarrbu waħedhom. Il-potenzjal ta’ metodi ta’ biedja favur ir-riżorsi, il-ħamrija u l-ambjent jista' jiġi realizzat permezz tal-integrazzjoni tad-data dwar il-ħamrija, il-fertilizzant, il-pestiċida u l-produzzjoni, li tirrikjedi aċċess aħjar għad-data li tinsab fil-bażijiet ta' data nazzjonali, aktar mobbiltà u aktar faċilità biex tintuża, eċċ. L-użu tat-teknoloġiji tal-informazzjoni u tal-komunikazzjoni għandu jiġi promoss. |
4.4.4 |
Fid-dawl tal-COVID-19, huwa aktar urġenti minn qatt qabel li s-settur tal-bhejjem jiġi ristrutturat b’mod li jitnaqqsu l-vulnerabbiltajiet tiegħu u l-impatt tiegħu fuq il-ħaddiema, l-ambjent u l-benessri tal-annimali. Madankollu, l-Istrateġija “Mill-Għalqa sal-Platt” assolutament ma tindirizzax din l-isfida Ikollha tfassal u tinkludi passi biex biex tnaqqas id-dipendenza fuq l-għalf tal-proteini importati u biex terġa' tintegra l-bhejjem fis-sistemi agroekoloġiċi mħalltin. Fl-Ewropa, pereżempju, ilna s-snin nifilosofizzaw fil-livell politiku dwar “Strateġija Ewropea dwar il-proteini”, iżda qatt ma seħħ xejn. L-istrateġija “Mill-Għalqa sal-Platt” toffri wkoll ftit wisq dispożizzjonijiet li ħafna minnhom mhumiex vinkolanti. Barra minn hekk, tonqos milli tikkunsidra xi jfisser il-prinċipju tant imfaħħar tal-ekonomija ċirkolari għall-agrikoltura Ewropea. Il-KESE jistaqsi, fost l-oħrajn, kif il-kwantitajiet kbar ta’ importazzjonijiet ta’ għalf minn, pereżempju, l-Amerika t’Isfel, li hija koresponsabbli għad-deforestazzjoni fatali tal-foresti tropikali, huma kompatibbli mal-prinċipju ċirkolari. |
4.4.5 |
Il-Komunikazzjoni dwar l-Istrateġija “Mill-Għalqa sal-Platt” ma tipprovdix biżżejjed dettalji dwar kif il-bdiewa se jiġu appoġġjati fl-adozzjoni ta' prattiki ġodda. Filwaqt li l-pagamenti bbażati fuq it-tranżizzjoni taħt l-ekoskemi jkunu jirrikjedu finanzjament kbir sabiex jintlaħqu l-ambizzjonijiet ġodda, il-funzjoni ta' appoġġ għall-introjtu tal-pagamenti tal-PAK hija vitali u se tibqa' hekk għas-snin li ġejjin, anki jekk jittieħdu passi biex jiġi żgurat li l-prezzijiet tal-ikel ikunu jirriflettu l-ispejjeż veri (ara 4.2). Is-servizzi ta' konsulenza se jkunu jeħtieġu riżorsi xierqa biex jakkumpanjaw lill-bdiewa fiċ-ċaqliq kbir fil-produzzjoni. Jekk iridu jintlaħqu l-objettivi tal-Patt Ekoloġiku Ewropew u tal-F2F, il-baġit għall-PAK ma għandux jitnaqqas jew jinżamm fil-livell attwali, iżda għandu jiżdied b’konformità ma’ dawk l-objettivi. L-ispejjeż relatati mal-objettivi tal-Patt Ekoloġiku Ewropew imorru ferm lil hinn mill-perjodu ta' programmazzjoni attwali. Għandu jiġi ċċarat x'se jkunu t-talbiet finanzjarji fuq il-baġits nazzjonali futuri sabiex jiġu ssodisfati l-azzjonijiet tal-Patt Ekoloġiku Ewropew u jintlaħqu l-miri/l-indikaturi tal-Patt Ekoloġiku Ewropew. |
4.4.6 |
Il-Komunikazzjoni dwar l-Istrateġija “Mill-Għalqa sal-Platt” tinnota ġustament il-ħtieġa li jitqiesu l-punti tat-tluq differenti tal-Istati Membri. Il-prattiki jvarjaw ħafna f'termini tal-intensità tal-azjenda agrikola għal kull ettaru, id-densità tal-ħażna għal kull ettaru, l-użu ta' pestiċidi, fertilizzanti u antibijotiċi għal kull ettaru u għal kull annimal, u l-benessri tal-annimali. Għandha ssir valutazzjoni tal-impatt għal kull mira stabbilita fil-Patt Ekoloġiku Ewropew u fl-Istrateġija F2F, billi titqies is-sitwazzjoni attwali differenti fl-Istati Membri. Madankollu, il-KESE jissottolinja wkoll il-ħtieġa ta' kundizzjonijiet ekwi bejn l-Istati Membri u jitlob aktar ċarezza dwar kif ir-riskju ta' standards diverġenti se jiġi indirizzat permezz tal-implimentazzjoni tal-Istrateġija “Mill-Għalqa sal-Platt” u tal-pjani strateġiċi tal-PAK, u f'liema perjodi ta' żmien. Il-Kumitat huwa tal-fehma li għandhom japplikaw approċċi mfassla apposta għall-ħeffa tat-tranżizzjoni, iżda mhux għall-miri u l-għanijiet finali li għandhom jintlaħqu. |
Brussell, is-16 ta’ Settembru 2020.
Luca JAHIER
Il-President tal-Kumitat Ekonomiku u Soċjali Ewropew
(1) Il-COVID-19 u l-kriżi fis-sistemi tal-ikel: Sintomi, kawżi u soluzzjonijiet potenzjali. Komunikat minn IPES-Food, April 2020.
(2) “Fuq in-naħa tal-provvista, biex politika tal-ikel Ewropea komprensiva tkun tassew rilevanti għall-konsumaturi Ewropej, huwa essenzjali li l-ikel prodott b’mod sostenibbli fl-UE jkun kompetittiv. Dan ifisser li s-settur agroalimentari Ewropew huwa kapaċi jwassal l-ikel għall-konsumaturi bi prezzijiet li jinkludu spejjeż żejda għal kriterji bħalma huma s-sostenibbiltà, il-benessri tal-annimali, is-sikurezza alimentari u n-nutrizzjoni, iżda wkoll redditu ġust lill-bdiewa, u fl-istess ħin iżomm il-pożizzjoni tiegħu bħala l-għażla ppreferuta għall-parti l-kbira tal-konsumaturi.” Opinjoni dwar “Il-kontribut tas-soċjetà ċivili għall-iżvilupp ta' politika komprensiva dwar l-ikel fl-UE”, punt 5.8 (ĠU C 129, 11.04.2018, p. 18).
(3) ĠU C 129, 11.4.2018, p. 18.
(4) Ara n-nota ta’ qiegħ il-paġna 3.
(5) IPES-Food, Towards a Common Food Policy for the European Union (Lejn Politika Komuni dwar l-Ikel għall-Unjoni Ewropea), Brussell, IPES Food, 2019.
(6) L-objettivi speċifiċi ta' rilevanza għal strateġija komprensiva, u t-tipi ta' azzjonijiet meħtieġa biex dawn jintlaħqu, huma spjegati fid-dettall hawn taħt, abbażi tal-Opinjonijiet żviluppati mill-KESE.
(7) Eċċezzjoni waħda fl-Istrateġija “Mill-Għalqa sal-Platt” hija r-referenza għall-kisba ta' “dieti tajbin għas-saħħa u sostenibbli”; filwaqt li dan l-objettiv huwa orjentat lejn il-miri, huwa ppożizzjonat bħala imperattiv tal-konsumatur aktar milli jenfasizza l-ħtieġa li jiġi indirizzat tul il-katina kollha.
(8) Ara n-nota ta’ qiegħ il-paġna 3.
(9) Dan il-korp ġdid jiffunzjona bħala pjattaforma ospitata minn istituzzjonijiet eżistenti.
(10) Il-proċessi li jerġgħu jgħaqqdu l-bliet maż-żoni tal-produzzjoni tal-ikel fil-viċin tagħhom jinsabu għaddejjin f'ħafna postijiet (eż. Milan fl-Italja, Montpellier fi Franza, Ghent, Brussell u Liège fil-Belġju u Toronto fil-Kanada) u x'aktarx li jaċċelleraw wara l-COVID-19.
(11) COVID-19 and the crisis in food systems: Symptoms, causes, and potential solutions (Il-COVID-19 u l-kriżi fis-sistemi tal-ikel: Sintomi, kawżi u soluzzjonijiet potenzjali). Komunikat minn IPES-Food, April 2020.
(12) ĠU C 190, 5.6.2019, p. 9.
(13) Il-Komunikazzjoni dwar l-Istrateġija “Mill-Għalqa sal-Platt” tiddikjara li l-Kummissjoni Ewropea se “titlob lill-kumpaniji u lill-organizzazzjonijiet tal-ikel jimpenjaw ruħhom biex jieħdu azzjonijiet konkreti dwar is-saħħa u s-sostenibbiltà”.
(14) Ara n-nota ta’ qiegħ il-paġna 12.
(15) ĠU C 440, 6.12.2018, p. 165.
(16) Il-Parlament Ewropew, Rapport dwar id-dħul ġust għall-bdiewa: Katina tal-provvista alimentari fl-Ewropa li taħdem aħjar, 2009/2237(INI), 2009, https://www.europarl.europa.eu/sides/getDoc.do?type=REPORT&reference=A7-2010-0225&language=MT
(17) Il-Parlament Ewropew, “Parliamentary questions – Answer given by Mr. Hogan on behalf of the Commission” (Mistoqsijiet Parlamentari – Tweġiba mogħtija mis-Sur Hogan f'isem il-Kummissjoni), is-27 ta' Frar 2015, http://www.europarl.europa.eu/doceo/document/E-8-2015-000521-ASW_EN.html?redirect
(18) http://www.fao.org/nr/sustainability/full-cost-accounting/
(19) Ara n-nota ta’ qiegħ il-paġna 12.
(20) ĠU C 353, 18.10.2019, p. 65.
(21) Dokument informali mill-awtoritajiet tan-Netherlands u ta' Franza dwar il-kummerċ, l-effetti ekonomiċi soċjali u l-iżvilupp sostenibbli.
(22) Pereżempju, l-aċċess mingħajr dazju għas-swieq tal-UE għall-bajd sar kundizzjonali fuq l-allinjament mal-istandards tal-UE dwar il-benessri tat-tiġieġ għall-ewwel darba fl-FTA bejn l-UE u l-Mercosur: https://www.theguardian.com/environment/2019/oct/02/eu-imposes-hen-welfare-standards-on-egg-imports-for-first-time.
(23) https://ec.europa.eu/commission/sites/beta-political/files/mission-letter-frans-timmermans-2019_en.pdf?fbclid=IwAR3MP8zmxW1jBVJhtBUtP2PKkEct5ibFjKVJTCoaxgRX6thxcdsylXhTPIk
(24) Il-Parlament Ewropew, Riżoluzzjoni tal-Parlament Ewropew tal-11 ta' Settembru 2018 dwar il-ġestjoni trasparenti u responsabbli tar-riżorsi naturali fil-pajjiżi li qed jiżviluppaw: il-każ tal-foresti, 2018/2003(INI).
(25) https://trade.ec.europa.eu/doclib/docs/2015/october/tradoc_153846.pdf
(26) https://ec.europa.eu/environment/forests/impact_deforestation.htm
(27) Din id-definizzjoni tista' tibni fuq u tallinja mad-definizzjoni ta' sostenibbiltà ambjentali minquxa fil-pjan ta' azzjoni tal-Kummissjoni Ewropea dwar il-finanzjament tat-tkabbir sostenibbli.
(28) L-użu tal-art għall-produzzjoni tal-ikel sostenibbli u s-servizzi tal-ekosistema (ĠU C 81, 2.3.2018, p. 72).
(29) Ara n-nota ta’ qiegħ il-paġna 20.