IL-KUMMISSJONI EWROPEA

Brussell, 4.12.2017

COM(2017) 728 final

KOMUNIKAZZJONI TAL-KUMMISSJONI LILL-PARLAMENT EWROPEW U LILL-KUNSILL EMPTY

Rappurtar dwar is-segwitu tal-Istrateġija tal-UE dwar l-Eradikazzjoni tat-traffikar tal-bnedmin u identifikazzjoni ta' azzjonijiet konkreti oħra

I. Introduzzjoni

It-traffikar tal-bnedmin għadu forma ta’ kriminalità serja u organizzata profitabbli ħafna, ipprojbita b’mod espliċitu fil-Karta tad-Drittijiet Fundamentali tal-Unjoni Ewropea 1 . Wara kull vittma hemm esperjenzi u tbatija devastanti li jridu jiġu rikonoxxuti u indirizzati b’mod xieraq, u aktar importanti minn hekk, evitati. Minħabba l-ħsara kkawżata lill-vittmi, jenħtieġ li l-prevenzjoni tkun wieħed mill-pedamenti tal-azzjoni tal-UE kontra t-traffikar. Din il-Komunikazzjoni tistabbilixxi l-azzjonijiet ewlenin li jenħtieġ li jkunu intensifikati mill-Kummissjoni u mill-Istati Membri, inkluż il-kooperazzjoni ma’ aġenziji tal-UE, mas-soċjetà ċivili, ma’ pajjiżi li mhumiex fl-UE u mal-organizzazzjonijiet u l-korpi rilevanti l-oħrajn kollha.

Huwa ċar li hemm ferm aktar vittmi minn dawk koperti miċ-ċifri uffiċjali. Ir-reat għandu dimensjoni tal-ġeneru ovvja. It-traffikar għal sfruttament sesswali, li jinvolvi l-aktar lin-nisa u l-bniet bħala vittmi, huwa rrappurtat konsistentement bħala l-forma prevalenti 2 .

Xprunat minn qligħ konsiderevoli 3 u interazzjoni ferm kumplessa tal-provvista u tad-domanda, it-traffikar jinvolvi katina kumplessa ta’ atturi li huma involuti konxjament jew le. Il-ħoloq f’din il-katina jridu jitkissru sabiex ir-reat jiġi eradikat. L-awturi u dawk li jabbużaw jisfruttaw il-vulnerabbiltajiet tan-nies, aggravati minn fatturi bħalma huma l-faqar, id-diskriminazzjoni, l-inugwaljanza bejn is-sessi, il-vjolenza tal-irġiel fuq in-nisa, in-nuqqas ta’ aċċess għall-edukazzjoni, il-kunflitti, il-gwerer, it-tibdil fil-klima, id-degradazzjoni ambjentali u d-diżastri naturali, għal skopijiet ta’ sfruttament sesswali jew għax-xogħol, biex jittallbu, għal attivitajiet kriminali u aktar.

Billi l-modus operandi tat-traffikanti qed jevolvi l-ħin kollu, l-UE teħtieġ li tindirizza r-rabtiet bejn it-traffikar tal-bnedmin u reati oħrajn, inkluż il-faċilitazzjoni ta’ dħul klandestin ta’ persuni, it-terroriżmu, il-korruzzjoni, it-traffikar tad-drogi, iċ-ċiberkriminalità u l-isfruttament sesswali onlajn, il-produzzjoni ta’ materjal li jinvolvi l-abbuż sesswali tat-tfal, il-kriminalità finanzjarja, il-frodi tad-dokumenti, il-frodi tal-karti tal-kreditu, u l-frodi tal-benefiċċji 4 . 

Kif inhu ssottolinjat fl-Aġenda Ewropea dwar il-Migrazzjoni, l-Aġenda Ewropea dwar is-Sigurtà 5 u strumenti ta’ politika tal-UE oħra 6 , l-UE tibqa’ impenjata li tipprevjeni u tiġġieled it-traffikar tal-bnedmin u tħares id-drittijiet tal-vittmi, filwaqt li tqis b’mod partikolari l-vulnerabbiltajiet tan-nisa u t-tfal traffikati. Barra minn hekk, it-traffikar tal-bnedmin huwa qasam ta’ prijorità fost it-theddid ta’ kriminalità fiċ-Ċiklu tal-Politika tal-UE dwar il-Kriminalità Internazzjonali Organizzata u Serja 2018-2021 7 . Barra minn hekk, l-impenn politiku biex tissaħħaħ l-azzjoni tal-UE kontra t-traffikar tal-bnedmin, fl-UE u madwar id-dinja, huwa appoġġat mill-Istrateġija Globali dwar il-Politika Estera u ta’ Sigurtà tal-Unjoni Ewropea (Global Strategy on the European Union’s Foreign and Security Policy, EUGS) u mill-istrateġiji u l-pjanijiet ta’ azzjoni rilevanti tal-UE 8 u r-riżoluzzjonijiet tal-Parlament Ewropew 9 . Jeżisti wkoll appoġġ qawwi mis-soċjetà ċivili 10 . 

F’dawn l-aħħar ftit snin, l-Unjoni Ewropea stabbilixxiet qafas legali u ta’ politika komprensiv u konsistenti għall-ġlieda kontra t-traffikar tal-bnedmin. Dan ikopri l-oqsma politiċi kollha tal-UE relatati mat-traffikar tal-bnedmin inkluż il-finanzjament u r-riċerka. Id-Direttiva 2011/36/UE 11 dwar il-prevenzjoni u l-ġlieda kontra t-traffikar tal-bnedmin u l-protezzjoni tal-vittmi tiegħu (“id-Direttiva”) tistabbilixxi l-qafas legali. Il-Kummissjoni qed tkompli timmonitorja l-implimentazzjoni tad-Direttiva 12 mill-Istati Membri u tirrapporta dwar il-progress.

L-istrateġija tal-UE dwar l-Eradikazzjoni tat-traffikar tal-bnedmin 13 (“l-Istrateġija”) kienet l-istrument ewlieni għall-iżvilupp, il-koordinazzjoni u l-implimentazzjoni tal-azzjoni tal-UE f’dan il-qasam. L-azzjonijiet li l-Istrateġija telenka taħt ħames prijoritajiet ewlenin rigward il-prevenzjoni, il-prosekuzzjoni, il-protezzjoni tal-vittmi, is-sħubiji, u t-titjib tal-għarfien ġew implimentati 14 .

Globalment, madankollu, il-kuntest soċjopolitiku nbidel b’mod sinifikanti minn mindu ġew adottati l-Istrateġija u d-Direttiva. L-impatt ekonomiku u soċjali tal-kriżi finanzjarja globali, il-kriżi tal-migrazzjoni u t-theddid għas-sigurtà minn gruppi ta’ kriminalità organizzata jkomplu jiggravaw il-vulnerabilitajiet, u għalhekk jeħtieġu miżuri aktar b’saħħithom kemm fil-livell nazzjonali kif ukoll f’dak tal-UE. Dawn il-miżuri jridu jkomplu jsegwu approċċ ibbażat fuq id-drittijiet tal-bniedem, speċifiku għall-ġeneru u sensittiv għat-tfal, u l-bżonnijiet ta’ implimentazzjoni tagħhom jenħtieġ li jkunu kkoordinati fl-UE u esternament, kif ukoll fl-oqsma differenti ta’ politika.

Waqt li tibni fuq l-Istrateġija u l-isforzi li għaddejjin biex id-Direttiva tiġi implimentata b’mod sħiħ, din il-Komunikazzjoni tipproponi sett ta’ prijoritajiet immirati biex iżidu l-isforzi tal-UE għall-prevenzjoni tat-traffikar tal-bnedmin. Hija tiffoka fuq it-tfixkil tal-mudell kummerċjali li t-traffikar tal-bnedmin jiddependi fuqu, it-titjib tal-aċċess tal-vittmi għad-drittijiet, u l-iżgurar li miżuri interni u esterni tal-UE jipprovdu rispons koordinat u konsistenti.

II. Prijoritajiet imsaħħa għall-intensifikar tal-azzjoni tal-UE għall-prevenzjoni tat-traffikar tan-nies

Fuq il-bażi tal-implimentazzjoni li għaddejja tal-Istrateġija, ir-riżultati taż-żewġ rapporti skont l-Artikolu 23 tad-Direttiva 15 u ħidma ta’ koordinazzjoni u skambji estensivi ma’ firxa ta’ partijiet ikkonċernati 16 , u sabiex tissaħħaħ l-azzjoni tal-UE, ġew identifikati tliet prijoritajiet fil-mira:

·L-intensifikar tal-ġlieda kontra n-netwerks tal-kriminalità organizzata inkluż permezz tat-tfixkil tal-mudell kummerċjali u tal-katina tat-traffikar;

·Li jiġi pprovdut aċċess aħjar għad-drittijiet għall-vittmi tat-traffikar, u biex dawn id-drittijiet jiġu rrealizzati;

·Li jiġi intensifikat rispons koordinat u konsolidat, kemm fl-UE kif ukoll barra minnha.

A. Tfixkil tal-mudell tan-negozju u tal-katina tat-traffikar

Il-profitti minn swieq leċiti u illeċiti u d-domanda għall-oġġetti u s-servizzi pprovduti minn vittmi tat-traffikar tal-bnedmin għadhom għoljin kull fejn hija prevalenti kultura ta’ impunità kemm għall-awturi kif ukoll għall-utenti. L-analiżi fir-“Rapport tal-Utenti” tal-Kummissjoni, li tivvaluta l-impatt tal-leġiżlazzjoni nazzjonali rilevanti eżistenti, tiżvela pajsaġġ legali varjat fl-UE. Il-liġi nazzjonali tonqos milli tikkontribwixxi b’mod effettiv biex tiskoraġġixxi d-domanda għal servizzi li huma l-oġġetti tal-isfruttament tat-traffikar tal-bnedmin.

Azzjoni ewlenija

L-insegwiment tal-flus tul il-katina tat-traffikar huwa kruċjali biex it-traffikar tal-bnedmin jinbidel f’reat “b’riskju għoli u b’redditu baxx”. Dan jista’ jsir billi jiġu intensifikati l-investigazzjonijiet u l-prosekuzzjonijiet u jiġu ffaċilitati investigazzjonijiet finanzjarji proattivi u ggwidati mill-intelliġenza, l-irkupru tal-assi, l-iffriżar u l-konfiska tal-profitti. Se tiġi promossa kooperazzjoni iktar mill-qrib għal dan il-għan. Din se tinkludi l-bini tal-kapaċità bejn l-awtoritajiet nazzjonali, inkluż f’pajjiżi li mhumiex fl-UE, u se titwettaq permezz ta’ netwerks xierqa bħalma huma t-Task Force tal-Azzjoni Finanzjarja, 17 u bl-appoġġ tal-aġenziji tal-UE.

Li tiġi skoraġġita d-domanda għal kull forma ta’ sfruttament, inkluż permezz tal-ġestjoni responsabbli tal-katini tal-valur globali, huwa kruċjali f’dan ir-rigward. Kif rifless fl-Istrateġija Kummerċjali tal-UE 18 u fil-Konklużjonijiet tal-Kunsill dwar Katini tal-Valur Mondjali Responsabbli tal-12 ta’ Mejju 2016, l-UE ħadet azzjoni f’diversi oqsma ta’ politika, 19 kemm fid-dimensjoni interna kif ukoll f’dik esterna, sabiex tiżgura l-katini tal-provvista u tal-valur mingħajr t-traffikar tal-bnedmin, inkluż fis-settur tal-ħwejjeġ 20 . L-għan ta’ din l-azzjoni jinkludi l-implimentazzjoni tal-leġiżlazzjoni dwar ir-rappurtar mhux finanzjarju u l-akkwist pubbliku 21 , l-istrumenti tal-kummerċ u miżuri speċifiċi għas-settur. Huwa jinkludi wkoll miżuri li jħeġġu lill-kumpaniji biex jiżguraw, billi jadottaw u japplikaw il-kodiċijiet ta’ kondotta u l-mekkaniżmi ta’ rappurtar / trasparenza, li l-katini tal-provvista u tal-valur tagħhom ma jkunu jinvolvu l-ebda traffikar 22 .

Azzjonijiet ewlenin

B. Provvista ta' aċċess aħjar lill-vittmi għad-drittijiet u t-twettiq tad-drittijiet tagħhom;

L-UE għandha qafas leġiżlattiv u operattiv biex tgħin, tappoġġa u tipproteġi l-vittmi tat-traffikar tal-bnedmin. Il-Kummissjoni ppubblikat “Id-drittijiet tal-UE għall-vittmi tat-traffikar tal-bnedmin” 23 fil-lingwi uffiċjali kollha tal-UE. Dan id-dokument jagħti ħarsa ġenerali komprensiva u prattika lejn id-drittijiet tal-vittmi, ibbażata fuq il-Karta tad-Drittijiet Fundamentali tal-Unjoni Ewropea, il-leġiżlazzjoni tal-UE u l-każistika tal-Qorti Ewropea tad-Drittijiet tal-Bniedem.

L-identifikazzjoni tal-vittmi b’mod effiċjenti u fi stadju bikri huwa l-ewwel pass sabiex jiġi żgurat li huma jiġu meqjusin bħala “detenturi tad-drittijiet”, ikollhom aċċess għad-drittijiet tagħhom u jkunu jistgħu jeżerċitawhom b’mod effettiv, li jinkludi li jirċievu assistenza u protezzjoni xierqa. Kif ġie konkluż fir-“Rapport tat-Traspożizzjoni”, l-awtoritajiet nazzjonali għamlu sforzi sostanzjali biex idaħħlu d-Direttiva fil-liġi nazzjonali, iżda għad hemm lok sinifikanti għal titjib, b’mod partikolari fir-rigward tal-miżuri ta’ protezzjoni u ta’ appoġġ 24 . Aċċess inadegwat għall-informazzjoni dwar id-drittijiet tal-vittmi u mekkaniżmi ta’ riferiment nazzjonali u transnazzjonali ineffettivi, flimkien ma’ nuqqas li jiġu identifikati dawk kollha li huma vittmi tat-traffikar (inklużi dawk fi flussi migratorji mħallta) jkomplu jfixklu lill-vittmi tat-traffikar tal-bnedmin milli jkunu jistgħu effettivament jibbenefikaw mid-drittijiet li huma intitolati għalihom 25 . 

Għal dan il-għan, il-Kummissjoni se tkompli tappoġġa lill-prattikanti u lill-awtoritajiet fl-Istati Membri tal-UE. Il-bini tal-kapaċitajiet u t-tixrid tal-aħjar prattika għall-identifikazzjoni tal-vittmi, u l-enfasi fuq li jiġi garantit l-aċċess u li jingħataw assistenza u rimedji effettivi xierqa speċifiċi għall-ġeneru u għat-tfal, huma aspetti kruċjali tal-isforzi kollha fil-livell tal-UE. Dawn l-isforzi jinkludu l-iżvilupp ta’ għarfien espert fl-aġenziji tal-UE u li jsir użu minnu, u l-promozzjoni ta’ korsijiet ta’ taħriġ dwar l-identifikazzjoni tal-vittmi għall-gwardji tal-fruntieri, għall-awtoritajiet tal-infurzar tal-liġi, għall-uffiċjali tal-asil u l-immigrazzjoni, għall-ħaddiema taċ-ċentri tal-akkoljenza, għall-persunal konsulari u tal-UE, għat-tuturi għat-tfal mhux akkumpanjati, kif ukoll għall-awtoritajiet b’kompetenzi f’dan il-qasam li x’aktarx jiġu f’kuntatt ma’ vittmi ta’ traffikar. 26 Għal din ir-raġuni, il-Kummissjoni se tappoġġa miżuri mfassla biex itejbu l-identifikazzjoni u r-riferiment nazzjonali u transnazzjonali tal-vittmi. Hija se tippromwovi wkoll il-kooperazzjoni bejn il-pajjiżi tal-oriġini, tat-tranżitu u tad-destinazzjoni, kif ukoll mas-soċjetà ċivili u mal-organizzazzjonijiet internazzjonali, biex jiġi żgurat li l-vittmi jiġu identifikati minn kmieni.

Barra minn hekk, il-Kummissjoni se tappoġġa lill-Istati Membri sabiex jipprovdu protezzjoni komprensiva u aċċessibbli u jgħinu l-integrazzjoni tal-vittmi tat-traffikar, waqt li jieħdu kont tal-ħtiġijiet speċifiċi ta’ kull ġeneru. Se tissorvelja u tagħti pariri wkoll dwar l-implimentazzjoni ta’ servizzi li jkunu sensittivi għat-tfal fil-livell nazzjonali - inkluż il-kura, is-saħħa u l-edukazzjoni għall-vittmi tat-traffikar - b’kunsiderazzjoni għall-ġeneru, l-età u l-ħtiġijiet partikolari tat-tifel jew tifla individwali. Fl-aħħar nett, se tippromwovi l-implimentazzjoni tal-“10 Prinċipji tal-UE għall-Ġestjoni Integrata tas-Sistemi għall-Protezzjoni tat-Tfal” (‘10 EU Principles for Integrated Child Protection Systems’) 27 .

Azzjonijiet ewlenin

C. Intensifikar ta' rispons koordinat u konsolidat, kemm fl-UE kif ukoll barra minnha

L-UE se tieħu passi ulterjuri biex ittejjeb il-koordinazzjoni tal-aspetti interni u esterni tal-politika tal-UE kontra t-traffikar. It-traffikar tal-bnedmin huwa spiss marbut ma’ tipi oħra ta’ reati, inklużi reati tranżnazzjonali. Il-Kummissjoni se tkompli tinkoraġġixxi lill-awtoritajiet nazzjonali u lill-aġenziji tal-UE biex jindirizzaw it-traffikar bħala forma ta’ reat organizzat li ma jiqafx fuq il-fruntieri nazzjonali jew tal-UE, u tikkoopera ma’ pajjiżi li mhumiex fl-UE.

Il-koordinatur tal-UE Kontra t-Traffikar jikkontribwixxi għal rispons ikkoordinat u kkonsolidat tal-Unjoni kontra t-traffikar tal-bnedmin. F’dan il-kuntest, il-koordinatur, jippromwovi kooperazzjoni aktar mill-qrib fil-livell tal-UE fost l-organizzazzjonijiet, l-entitajiet u l-individwi li jipparteċipaw f’netwerks, b’mod partikolari fin-Netwerk tal-UE tar-Relaturi Nazzjonali u Mekkaniżmi Ekwivalenti dwar it-traffikar tal-bnedmin; il-Pjattaforma tas-Soċjetà Ċivili tal-UE kontra t-traffikar tal-bnedmin; u l-punti ta’ kuntatt fl-aġenziji tal-UE għall-Ġustizzja u l-Affarijiet Interni 28 mal-Grupp ta’ Koordinazzjoni dwar it-Traffikar tal-Bnedmin. Aġenziji oħra impenjati li jindirizzaw it-traffikar tal-bnedmin u pjattaformi u netwerks rilevanti oħra fil-livell tal-UE huma inklużi wkoll.

F’kooperazzjoni mas-Servizz Ewropew għall-Azzjoni Esterna, il-Kummissjoni se tkompli tiżgura li angolu ta’ kontra t-traffikar jiġi inkluż b’mod sistematiku fl-aspetti kollha tar-relazzjonijiet tagħha ma’ pajjiżi li mhumiex fl-UE u f’kull qasam ta’ politika rilevanti, inklużi d-drittijiet tal-bniedem, is-sigurtà u l-kriminalità organizzata, u l-ugwaljanza bejn is-sessi. Se tiżgura wkoll li l-impenji dwar it-traffikar tal-bnedmin stabbiliti fid-Dikjarazzjoni ta’ New York 29 jiġu implimentati u jgħinu biex jingħata l-forma tiegħu l-Patt Globali dwar il-Migrazzjoni permezz ta’ kooperazzjoni politika u operazzjonali. Dan se jsir billi tiġi promossa kooperazzjoni bilaterali u reġjonali msaħħa mas-sħab rilevanti u organizzazzjonijiet oħra inkluż permezz ta’ finanzjament immirat skont l-istrumenti rilevanti.

L-atturi rilevanti fl-UE u f’pajjiżi terzi se jiġu mħeġġa biex jindirizzaw kwistjonijiet li jinkludu l-protezzjoni tal-vittmi u l-integrazzjoni mill-ġdid fis-soċjetà, fl-inizjattivi tagħhom fuq il-prevenzjoni, l-edukazzjoni u postijiet ta’ kenn, u biex jindirizzaw is-sitwazzjoni ta’ nisa, tfal u gruppi oħra vulnerabbli, inklużi r-Roma. Il-Kummissjoni se tappoġġahom f’dawn l-isforzi.

Se jingħata wkoll appoġġ lil pajjiżi mhux tal-UE li jikkooperaw mal-UE biex jimplimentaw ir-riformi fis-settur tas-sigurtà u jistabbilixxu l-istat tad-dritt fit-territorju tagħhom, bil-għan tal-prevenzjoni u l-indirizzar tat-traffikar tal-bnedmin u l-bini ta’ infurzar tal-liġi u prosekuzzjoni b’saħħithom.

Barra minn hekk, l-UE se żżid l-azzjoni esterna tagħha mmirata lejn organizzazzjonijiet kriminali involuti fit-traffikar tal-bnedmin. Dan jinkludi azzjoni meħuda skont il-mandati tal-missjonijiet u l-operazzjonijiet tal-Politika ta’ Sigurtà u ta’ Difiża Komuni, li jinvolvu wkoll pajjiżi prijoritarji, inkluż għal attivitajiet ta’ kontra t-terroriżmu fil-Lvant Nofsani, fl-Afrika ta’ Fuq u fil-Balkani tal-Punent.

Azzjonijiet ewlenin

III. Prijoritajiet trażversali għall-intensifikar tal-azzjoni tal-UE għall-prevenzjoni tat-traffikar tan-nies

Minbarra t-tliet prijoritajiet speċifiċi, żewġ prijoritajiet trażversali ġew identifikati biex ikomplu jwessgħu l-bażi tal-għarfien u jtejbu l-fehim ta’ dan il-fenomenu kumpless, u jipprovdu finanzjament xieraq b’appoġġ għal inizjattivi u proġetti kontra t-traffikar.

Il-fehim tan-natura, l-iskala u l-ispejjeż ta’ dan ir-reat huwa essenzjali biex tiġi żgurata azzjoni xierqa fil-livell tal-UE biex jiġi evitat dan il-fenomenu. Riċerka, statistika affidabbli u komprensivi huma kruċjali fl-identifikazzjoni u l-indirizzar ta’ xejriet, fl-iżvilupp ta’ politika bbażata fuq l-evidenza, u fil-kejl tal-impatt ta’ inizjattivi individwali. Bl-implimentazzjoni tal-Istrateġija, inġabret fil-livell tal-UE dejta bażika tajba dwar it-traffikar tal-bnedmin, iżda din teħtieġ li tiġi żviluppata aktar. Il-Kummissjoni se tkompli tiżviluppa metodoloġiji tal-ġbir tad-dejta biex tipproduċi statistika kumparabbli dwar it-traffikar tal-bnedmin fl-UE. Se tagħmel ukoll ħidma ta’ segwitu għall-istħarriġ madwar l-UE kollha dwar id-disponibilità ta’ dejta dwar it-traffikar tal-bnedmin f’pajjiżi tal-UE li sar fl-2017. It-tnedija ta’ kampanja kontra t-traffikar madwar l-UE kollha se tgħin biex titqajjem kuxjenza u jittejjeb l-għarfien tan-natura, tal-implikazzjonijiet u tal-kumplessità ta’ dan ir-reat.

L-UE se tkompli tappoġġa wkoll azzjonijiet kontra t-traffikar permezz ta’ flussi multipli ta’ finanzjament, 32 kemm fl-UE kif ukoll f’postijiet oħra. Fl-appoġġ ta’ finanzjament tagħha, il-Kummissjoni se tagħti prijorità lil azzjoni li tissodisfa l-ħtiġijiet speċifiċi ta’ persuni f’sitwazzjonijiet vulnerabbli, inklużi vittmi tat-traffikar għal sfruttament sesswali, fil-kuntest tal-ġlieda kontra kull forma ta’ vjolenza kontra n-nisa u t-tfal, inkluż f’sitwazzjonijiet ta’ emerġenza, u ż-żamma tat-tfal fl-iskola.

Azzjonijiet trażversali għal bażi ta’ għarfien soda

Azzjonijiet trażversali li jappoġġaw il-prijoritajiet kontra t-traffikar f’pajjiżi tal-UE u f’pajjiżi li mhumiex tal-UE

IV. Konklużjoni

Sar progress sostanzjali fil-konsolidazzjoni tal-ħidma tal-UE kontra t-traffikar tal-bnedmin. Madankollu, peress li dan il-fenomenu kompla jevolvi, l-azzjoni tal-UE biex tiġġieled it-traffikar tal-bnedmin, kemm fl-UE kif ukoll lil hinn minnha, teħtieġ li tiġi intensifikata. Din il-Komunikazzjoni għalhekk tidentifika sett ta’ prijoritajiet trażversali għal reazzjoni iktar b’saħħitha, li għandha tiġi segwita mill-awtoritajiet u l-organizzazzjonijiet rilevanti kollha b’mod aktar koordinat u konsolidat sa minn tmiem l-2017. L-Istati Membri jenħtieġ li jużaw l-għodod ambizzjużi kollha disponibbli għalihom biex jimplimentaw il-miżuri miftiehma fil-livell tal-UE mingħajr dewmien. Il-Kummissjoni se tissorvelja l-progress dwar l-azzjoni stipulata f’din il-Komunikazzjoni u tirrapporta dwar il-progress lill-Parlament Ewropew u lill-Kunsill sa tmiem l-2018.

(1)

     L-Artikolu 5 tal-Karta tad-Drittijiet Fundamentali tal-Unjoni Ewropea, l-Art. 79 TFUE u l-Art. 83 TFUE.

(2)

     Skont id-dejta tal-Kummissjoni, 67 % tal-vittmi tat-traffikar irreġistrati fl-UE huma vittmi ta’ sfruttament sesswali (95 % minnhom huma nisa jew bniet), segwit mill-isfruttament tax-xogħol (21 % tal-vittmi) u forom oħra ta’ sfruttament (12 %). Dan huwa konsistenti max-xejriet identifikati minn organizzazzjonijiet reġjonali u internazzjonali.

(3)

     Il-profitt annwali minn kull forma ta’ traffikar tal-bnedmin huwa stmat li jilħaq l-EUR 29,4 biljun globalment (ir-Report on Trafficking in Human Beings, Financial Business Model (Rapport dwar it-Traffikar tal-Bnedmin, Mudell Kummerċjali Finanzjarju) tal-Europol (2015).

(4)

     COM(2016) 267 final; COM(2017) 195 final; L-Internet Organised Crime Threat Assessment (il-Valutazzjoni tat-Theddida tal-Kriminalità Organizzata fuq l-Internet) (IOCTA) 2016, l-EU Serious and Organised Crime Threat Assessment (il-Valutazzjoni tat-Theddida tal-Kriminalità Serja u Organizzata tal-UE) (SOCTA) 2017 u s-Situation Report, Trafficking in Human Beings in the EU (ir-Rapport tas-Sitwazzjoni, it-Traffikar tal-Bnedmin fl-UE) (2016) tal-Europol.

(5)

     L-Aġenda Ewropea dwar il-Migrazzjoni, COM(2015) 240 final; L-Aġenda Ewropea dwar is-Sigurtà COM(2015) 185 final.

(6)

     Il-Komunikazzjoni tal-Kummissjoni dwar “Ewropa Miftuħa u Sikura: Kif Nagħmluha Realtà” (COM(2014)154 final); Il-Komunikazzjoni tal-Kummissjoni dwar il-protezzjoni tat-tfal migranti (COM(2017)211); kif ukoll relatati mal-Istrateġija tal-UE dwar id-Drogi (COM(2017) 195 final); Rapporti ta’ Progress tal-Unjoni tas-Sigurtà (COM(2017) 213 final, SWD(2017) 278 final, COM(2017) 407 final.

(7)

     Il-konklużjonijiet tal-Kunsill li jistabbilixxu l-prijoritajiet tal-UE għall-ġlieda kontra l-kriminalità internazzjonali organizzata u serja bejn l-2018 u l-2021, 7704/17.Ara wkoll, l-EU Serious and Organised Crime Threat Assessment (Valutazzjoni tat-Theddida tal-Kriminalità Serja u Organizzata tal-UE) (Europol, 2017).

(8)

     Il-Pjan ta’ Azzjoni tad-Drittijiet tal-Bniedem u d-Demokrazija; il-qafas għall-attivitajiet tal-UE dwar l-ugwaljanza bejn is-sessi u t-tisħiħ tal-pożizzjoni tan-nisa fir-relazzjonijiet esterni tal-UE għall-2016-2020; l-Impenn Strateġiku dwar l-Ugwaljanza bejn is-Sessi; l-Istrateġija tal-UE dwar ir-Responsabbiltà Soċjali Korporattiva u l-Kunsens Ewropew ġdid dwar l-Iżvilupp.

(9)

     Ir-riżoluzzjonijiet tal-Parlament Ewropew dwar l-implimentazzjoni tad-Direttiva 2011/36/UE (P8 TA(2016)0227) u dwar il-ġlieda kontra t-traffikar tal-bnedmin fir-relazzjonijiet esterni tal-UE (P8 TA(2016)0300). Ara wkoll l-10 messaġġi ewlenin tal-Kumitat FEMM tal-PE lill-Kummissjoni Ewropea, FEMM/8/09 816 (it-3 ta’ Mejju 2017).

(10)

     Kif espress fil-laqgħat regolari tal-Pjattaforma tas-Soċjetà Ċivili tal-UE kontra t-traffikar tal-bnedmin, f’avvenimenti pubbliċi u f’għadd kbir ta’ sottomissjonijiet lill-Kummissjoni.

(11)

     Id-Direttiva 2011/36/UE dwar il-prevenzjoni u l-ġlieda kontra t-traffikar tal-bnedmin u l-protezzjoni tal-vittmi tiegħu, ĠU L-101, 15.04.2011, p. 1.

(12)

     COM(2016) 722 final (Ir-rapport tat-“Traspożizzjoni”), COM(2016) 719 final (“Ir-rapport tal-utenti”), adottat fit-2.12.2016.

(13)

     COM(2012)286 final.

(14)

     Għal ħarsa ġenerali: Daqqa t’għajn lejn l-azzjoni tal-UE kontra t-traffikar: https://ec.europa.eu/anti-trafficking/publications/eu-anti-trafficking-action-2012-2016-glance_en .

(15)

     Ir-rapport tat-“Traspożizzjoni” u r-rapport tal-“Utenti”.

(16)

     In-Netwerk tal-UE tar-Relaturi Nazzjonali u Mekkaniżmi Ekwivalenti dwar it-traffikar tal-bnedmin; Il-Pjattaforma tas-Soċjetà Ċivili tal-UE kontra t-traffikar tal-bnedmin; L-aġenziji tal-Ġustizzja u l-Affarijiet Interni tal-UE; l-istituzzjonijiet tal-UE; organizzazzjonijiet internazzjonali.

(17)

     Il-kooperazzjoni se tinkludi attivitajiet imwettqa fil-kuntest tal-applikazzjoni tar-Raba’ Direttiva Kontra l-Ħasil tal-Flus u fl-oqsma ta’ attività tal-Pjattaforma tal-UE tal-Unitajiet tal-Intelliġenza Finanzjarja, l-Assoċjazzjoni tal-Kontabilisti Forensiċi tal-Infurzar tal-Liġi u n-Netwerk.

(18)

     Il-Komunikazzjoni tal-Kummissjoni “Kummerċ għal kulħadd - Lejn politika aktar responsabbli għall-kummerċ u l-investiment” COM(2015)497; Rapport dwar l-Implimentazzjoni tal-Istrateġija tal-Politika Kummerċjali għal Kulħadd It-Twettiq ta' Politika Kummerċjali Progressiva li Tisfrutta b’Mod Għaqli l-Globalizzazzjoni COM(2017)491.

(19)

     Dawn jinkludu: it-trasparenza, il-kundizzjonijiet tal-impjiegi u tax-xogħol, l-ambjent u t-tibdil fil-klima, id-djalogu soċjali, l-akkwist pubbliku, il-kummerċ, il-kooperazzjoni għall-iżvilupp u r-relazzjonijiet internazzjonali.

(20)

     Għal aktar informazzjoni, ara; https://ec.europa.eu/europeaid/sites/devco/files/overview-garment-related-activities_en.pdf .

(21)

     Id-Direttiva 2014/24/UE dwar l-akkwist pubbliku u li tħassar id-Direttiva 2004/18/KE tinkludi b’mod espliċitu t-traffikar tal-bnedmin bħala raġuni ta’ esklużjoni skont l-Artikolu 57.

(22)

     L-Artikolu 57 tad-Direttiva 2014/24/UE dwar l-akkwist pubbliku u li tħassar id-Direttiva 2004/18/KE ssemmi b’mod espliċitu t-traffikar tal-bnedmin bħala raġuni għall-esklużjoni.

(23)

     “Id-drittijiet tal-UE għall-vittmi tat-traffikar tal-bnedmin”, disponibbli fuq: Https://ec.europa.eu/anti-trafficking/sites/antitrafficking/files/eu_rights_of_victims_of_trafficking_mt_1.pdf .

(24)

     Ir-Rapport tat-Traspożizzjoni jirreferi għal miżuri speċifiċi għall-protezzjoni tat-tfal, il-preżunzjoni tat-tfulija u l-valutazzjoni tal-età tal-minorenni, il-protezzjoni qabel u waqt il-proċedimenti kriminali, l-aċċess għall-assistenza bla kundizzjonijiet, il-kumpens, l-assenza ta’ kastigi, l-assistenza u l-appoġġ għall-membri tal-familja tal-vittma minorenni.

(25)

     Rapport dwar il-Progress li sar fil-ġlieda kontra t-traffikar tal-bnedmin, COM(2016) 267 final (ir-“Rapport dwar il-progress”).

(26)

     Il-Manwal għall-ipproċessar tal-applikazzjonijiet tal-viża u l-modifika ta’ viżi maħruġa diġà jagħmel rakkomandazzjonijiet dwar l-aħjar prattika fl-ipproċessar tal-applikazzjonijiet sottomessi f’isem minorenni, sabiex jiġi żgurat li ma jkun hemm l-ebda raġuni biex wieħed jissuspetta t-traffikar tat-tfal jew l-abbuż tat-tfal (C(2010) 1620 final).

(27)

     Disponibbli hawn: http://ec.europa.eu/justice/fundamental-rights/files/rights_child/10_principles_for_integrated_child_protection_systems.pdf .

(28)

     Is-Seba’ Aġenziji tal-UE għall-Ġustizzja u l-Affarijiet Interni ħarġu impenn konġunt li jindirizzaw it-traffikar tal-bnedmin fl-2011.

(29)

     Ir-riżoluzzjoni 71/1 adottata mill-Assemblea Ġenerali fid-19 ta’ Settembru 2016, id-Dikjarazzjoni ta’ New York għar-Refuġjati u l-Migranti.

(30)

     Kunsens Ewropew ġdid dwar l-Iżvilupp: “Id-dinja tagħna, id-dinjità tagħna, il-ġejjieni tagħna”, 2017/C 210/01.

(31)

     L-inizjattiva hija appoġġata minn baġit ta’ EUR 500 m.

(32)

     Studju dwar ir-Rieżami Komprensiv tal-Politika tal-Proġetti ta’ Kontra t-Traffikar iffinanzjati mill-Kummissjoni Ewropea (2016), disponibbli fuq: https://ec.europa.eu/anti-trafficking/publications/comprehensive-policy-review-anti-trafficking-projects_en . Bejn l-2004 u l-2015, il-Kummissjoni ffinanzjat direttament 321 proġett kontra t-traffikar b’total ta’ EUR 158,5 m. Dan is-sett ta’ dejta ma jinkludix il-flus allokati b’rispons għall-kriżi tal-migrazzjoni.