52014DC0561

WERREJ

1............ PROĊEDURA TAL-BAĠIT. 3

2............ QAGĦDA FINANZJARJA U ĠESTJONI TAL-APPROPRJAZZJONIJIET. 6

3............ L-IMPLIMENTAZZJONI TAL-BAĠIT TAL-FAEG 2013. 8

4............ KUMMENTI DWAR L-IMPLIMENTAZZJONI TAL-BAĠIT TAL-FAEG GĦALL-2013  9

5............ IMPLIMENTAZZJONI TAD-DĦUL ASSENJAT. 11

6............ ANALIŻI SKONT IT-TIP TA’ NEFQA.. 12

Anness 1 Anness 2 Anness 3 Anness 4-I Anness 4-II Anness 5 Anness 6 || Proċedura tal-baġit għall-Approprjazzjonijiet tal-FAEG tal-2013 Il-parti tal-baġit tal-FAEG fil-baġit tal-UE mill-2007 sal-2013 Analiżi tal-eżekuzzjoni tal-baġit tal-FAEG – Sena finanzjarja 2013 Analiżi tal-eżekuzzjoni tal-baġit tal-FAEG – Sena finanzjarja 2013. Dħul assenjat. C4 Analiżi tal-eżekuzzjoni tal-baġit tal-FAEG – Sena finanzjarja 2013. Dħul assenjat. C5 Eżekuzzjoni tal-baġit tal-FAEG skont l-oġġett u skont l-Istat Membru – Sena finanzjarja 2013 Evoluzzjoni tal-analiżi tan-nefqa tal-FAEG fis-snin finanzjarji mill-2007 sal-2013

Nota: Ma' dan ir-rapport huwa mehmuż Dokument ta’ Ħidma dettaljat tal-Kummissjoni. It-test sħiħ ta’ dan id-Dokument ta’ Ħidma (bl-Ingliż) u t-tabelli annessi (bl-Ingliż) se jkunu disponibbli wkoll fuq is-sit tal-internet Europa tad-DĠ Agrikoltura (http://ec.europa.eu/agriculture/cap-funding/financial-reports/eagf/index_en.htm).

1.           PROĊEDURA TAL-BAĠIT[1]

1.1.        Proċedura tal-baġit 2013

Fuq il-bażi tal-Abbozz tal-Baġit (DB) inizjali 2013, inkluż l-Ittra ta’ Emenda relatata miegħu, iż-2 fergħat tal-Awtorità Baġitarja (il-Kunsill u l-Parlament Ewropew) ma setgħux jilħqu qbil dwar pożizzjoni komuni rigward il-baġit ġenerali tal-Unjoni Ewropea għall-2013 b’konformità mal-Artikolu 314, il-paragrafi 4 sa 7 tat-TFUE. Għaldaqstant, fit-23.11.2012 il-Kummissjoni ppreżentat DB 2013 ġdid skont l-Artikolu 314, il-paragrafu 8 tat-TFUE, li permezz tiegħu tagħmel ħilitha biex tirrikonċilja l-pożizzjonijiet taż-żewġ fergħat. Il-baġit 2013 fl-aħħar ġie adottat wara li ġie kkunsidrat kompromess li ntlaħaq bejn il-Parlament Ewropew u l-Kunsill fir-rigward ta' diversi elementi.

1.2.        L-Abbozz tal-Baġit inizjali 2013 u l-Ittra ta’ Emenda 1/2013

L-Abbozz tal-Baġit inizjali 2013 ġie adottat mill-Kummissjoni u ġie propost lill-Awtorità Baġitarja fil-15.04.2012. L-approprjazzjonijiet ta’ impenn proposti għall-Fond Agrikolu Ewropew ta' Garanzija (FAEG) iffinanzjat fl-Intestatura 2 tal-Qafas Finanzjarju 2007-2013, jammontaw għal EUR 44 130.3 miljun.

Il-Kunsill u l-Parlament Ewropew adottaw il-pożizzjoni tagħhom fir-rigward tal-Abbozz tal-Baġit inizjali 2013 fil-25.07.2012 u t-23.10.2012 rispettivament, u naqqsu l-approprjazzjonijiet ta’ impenn għall-FAEG bi EUR 335 miljun u bi EUR 43.8 miljun rispettivament.

Fid-19.10.2012, il-Kummissjoni adottat l-Ittra ta’ Emenda (AL) Nru 1 għad-DB 2013, u stabbilixxiet ir-rekwiżiti tal-approprjazzjonijiet ta' impenn għall-FAEG għal EUR 29.8 miljun inqas milli huma fl-Abbozz tal-Baġit.

1.3.        Adozzjoni tal-Baġit 2013

Fit-23.11.2012 il-Kummissjoni ppreżentat Abbozz ġdid tal-Baġit 2013, u stabbilixxiet ir-rekwiżiti tal-approprjazzjonijiet ta' impenn għall-FAEG għal EUR 44 056.5 miljun. Wara l-preżentazzjoni ta’ dan l-Abbozz ġdid tal-Baġit 2013, fit-28 u d-29 ta’ Novembru 2012 saru diskussjonijiet intensivi bejn it-3 partijiet (il-Kummissjoni, il-Kunsill u l-Parlament Ewropew). Il-Kunsill qabel mal-pakkett ta’ kompromess fis-6 ta’ Diċembru 2012. Fl-aħħar, il-baġit tal-2013 ġie adottat mill-Parlament Ewropew fit-12 ta’ Diċembru 2012. Il-baġit kien jinkludi approprjazzjonijiet ta' impenn u approprjazzjonijiet ta' pagament kif ġej:

– Approprjazzjonijiet ta' impenn ta' EUR 43 654.7 miljun u approprjazzjonijiet ta' pagament ta' EUR 43 660 miljun għal miżuri tas-suq u għajnuniet diretti agrikoli (qasam ta' politika 05 - Agrikoltura u Żvilupp Rurali).

– Approprjazzjonijiet ta' impenn ta' EUR 274.7 miljun u approprjazzjonijiet ta' pagament ta' EUR 247.3 miljun għal miżuri veterinarji u fitosanitarji (qasam ta' politika 17 - Saħħa u Ħarsien tal-Konsumaturi).

– Approprjazzjonijiet ta' impenn ta' EUR 27.2 miljun u approprjazzjonijiet ta' pagament ta' EUR 26.9 miljun rispettivament għas-swieq tas-sajd (qasam ta' politika 11 - Affarijiet Marittimi u Sajd).

L-ammont totali tal-approprjazzjonijiet ta' impenn fil-baġit għall-FAEG kien EUR 43 956.5 miljun u l-approprjazzjonijiet ta' pagament tiegħu ammontaw għal EUR 43 934.2 miljun. Id-differenza bejn l-approprjazzjonijiet ta' impenn u l-approprjazzjonijiet ta' pagament tirriżulta mill-fatt li, għal ċerti miżuri li huma implimentati direttament mill-Kummissjoni, jintużaw approprjazzjonijiet differenzjati. Dawn il-miżuri għandhom x’jaqsmu prinċipalment mal-promozzjoni tal-prodotti agrikoli, mal-istrateġija politika u l-miżuri ta’ koordinazzjoni għall-agrikoltura kif ukoll mas-sajd u mal-miżuri veterinarji u fitosanitarji.

B'mod speċifiku, mill-approprjazzjonijiet ta' impenn tal-FAEG ivvutati għall-qasam ta' politika 05 li jammontaw għal EUR 43 654.7 miljun, EUR 2 771.4 miljun kienu previsti għal miżuri tas-suq fil-kapitolu 05 02, EUR 40 931.9 miljun kienu previsti għal għajnuniet diretti fil-kapitolu 05 03, - EUR 84.9 miljun kienu previsti għall-awditjar tan-nefqa agrikola fil-kapitolu 05 07, u EUR 27.3 miljun għall-istrateġija u l-koordinazzjoni ta' politika fil-kapitolu 05 08. 

Ara l-Anness 1 għal aktar dettalji.

1.4.        Dħul assenjat lill-FAEG[2]

Skont l-Artikolu 34 tar-Regolament tal-Kunsill (KE) Nru 1290/2005 dwar il-finanzjament tal-Politika Agrikola Komuni, id-dħul li joriġina mill-korrezzjonijiet finanzjarji skont id-deċiżjonijiet tal-approvazzjoni tal-konformità, minn irregolaritajiet u mill-imposta fuq il-ħalib, huwa indikat bħala dħul assenjat għall-finanzjament tan-nefqa tal-FAEG. Skont dawn ir-regoli, id-dħul assenjat jista’ jintuża biex ikopri l-finanzjament ta’ kwalunkwe nefqa tal-FAEG. F’każ li xi parti minn dan id-dħul ma tintużax, din il-parti tingħadda awtomatikament għas-sena tal-baġit ta’ wara.

Fiż-żmien li ġie stabbilit il-baġit għall-2013, saret stima ta' dan id-dħul għall-ammont li kien mistenni li jinġabar matul is-sena tal-baġit 2013, kif ukoll għall-ammont li kien mistenni jiġi riportat mis-sena tal-baġit 2012 għall-2013. Din l-istima kienet tammonta għal EUR 1 533 miljun, u tqieset meta l-Awtorità tal-Baġit adottat il-baġit għall-2013. B’mod speċifiku:

– Id-dħul mill-korrezzjonijiet ta' wara l-approvazzjoni tal-konformità u mill-irregolaritajiet ġie stmat EUR 389 miljun u EUR 161 miljun rispettivament filwaqt li d-dħul mill-imposta tal-ħalib ġie stmat EUR 78 miljun. B’hekk, l-ammont ta’ dħul assenjat li mistenni jinġabar matul is-sena tal-baġit 2013 ġie stmat EUR 628 miljun.

– L-ammont ta’ d-dħul assenjat li mistenni jiġi riportat mis-sena tal-baġit 2012 għall-2013 ġie stmat EUR 905 miljun.

Fil-baġit tal-2013, il-Kummissjoni allokat dan id-dħul, li oriġinarjament kien ġie stmat EUR 1 533 miljun, għal żewġ skemi. B’mod speċifiku:

– EUR 500 miljun ġew assenjati għall-fondi operattivi għall-organizzazzjonijiet tal-produtturi fis-settur tal-frott u l-ħaxix, u

– EUR 1 033 miljun ġew assenjati għall-iskema ta' pagament uniku (għajnuniet diretti).

Għal dawn iż-żewġ skemi, l-Awtorità tal-Baġit eventwalment ivvutat għal approprjazzjonijiet li jammontaw għal EUR 267 miljun u għal EUR 30 635 miljun rispettivament, skont il-proposti tal-Kummissjoni. L-ammont totali tal-approprjazzjonijiet ivvutati u tad-dħul assenjat imsemmi hawn fuq jikkorrispondi għal stima totali tal-approprjazzjonijiet disponibbli ta’ EUR 767 miljun għall-fondi operattivi tal-organizzazzjonijiet tal-produtturi fis-settur tal-frott u tal-ħaxix, u ta’ EUR 31 668 miljun għall-iskema ta’ pagament uniku.

1.5.        Il-parti tal-baġit tal-FAEG fil-baġit totali tal-UE

Il-parti finali tal-baġit tal-FAEG (approprjazzjonijiet ta' impenn) fil-baġit totali tal-UE għal kull sena tal-perjodu 2007-2013 tidher fl-Anness 2.

2.           QAGĦDA FINANZJARJA U ĠESTJONI TAL-APPROPRJAZZJONIJIET

2.1.        Ġestjoni tal-approprjazzjonijiet

2.1.1.     Approprjazzjonijiet disponibbli għas-sena finanzjarja 2013

F’EUR ||

Taqsima tan-nefqa tal- baġit (1) || Approprjazzjonijiet ta' impenn || Approprjazzjonijiet ta' pagament || It-taqsima tad-dħul tal-baġit (AR) (2) || Tbassir

1. Approprjazzjonijiet inizjali tal-FAEG, li minnhom || 43 956 548 610 || 43 934 188 711 || 1. Approvazzjoni tal-konformità || 389 000 000

1a. Approprjazzjonijiet tal-ġestjoni kondiviża || 43 610 600 000 || 43 610 600 000 || 2. Irregolaritajiet || 161 000 000

1b. Approprjazzjonijiet tal-ġestjoni diretta (3) || 345 948 610 || 323 588 711 || 3. Imposta addizzjonali mill-produtturi tal-ħalib || 78 000 000

2. Baġit ta' Emenda || || || Tbassir totali ta’ AR || 628 000 000

3. Trasferimenti lejn/mill-FAEG matul is-sena || -7 944 450 || -12 869 715 || ||

4. Approprjazzjonijiet finali tal-FAEG, li minnhom || 43 948 604 160 || 43 921 318 996 || ||

4 a. Approprjazzjonijiet tal-ġestjoni kondiviża || 43 610 250 000 || 43 610 250 000 || ||

4b. Approprjazzjonijiet tal-ġestjoni diretta || 338 354 160 || 311 068 996 || ||

(1)    L-approprjazzjonijiet li ddaħħlu fil-baġit 2013 wara li jitnaqqas id-dħul assenjat li mistenni jinġabar fl-2013, kif ukoll id-dħul assenjat li mistenni jiġi ttrasferit mill-2012 għall-2013 skont l-Artikolu 14 tar-Regolament (UE, EURATOM) Nru 966/2012. (2)    AR: Dħul assenjat li għandu jinġabar. Ma hemm l-ebda ammont ta’ dħul li ddaħħal fil-linja tad-dħul (p.m.)[3], iżda l-ammont tal-previżjoni huwa indikat fir-rimarki dwar il-baġit. (3)    79 % tal-approprjazzjonijiet ta' impenn għandhom x’jaqsmu man-nefqa għal miżuri veterinarji u fitosanitarji fil-qasam ta’ politika 17 – Saħħa u Ħarsien tal-Konsumaturi. Il-bqija għandhom x’jaqsmu man-nefqa għall-istrateġija u koordinazzjoni ta’ politika fil-qasam ta’ politika 05 – Agrikoltura u Żvilupp Rurali (13 %), u mas-swieq tas-sajd fil-qasam ta’ politika 11 – Affarijiet Marittimi u Sajd (8 %).

2.1.2.     Eżekuzzjoni baġitarja tal-approprjazzjonijiet disponibbli għas-sena finanzjarja 2013

F’EUR

|| Eżekuzzjoni tal-approprjazzjonijiet ta' impenn || Eżekuzzjoni tal-approprjazzjonijiet ta' pagament

Ġestjoni kondiviża (1) || 44 961 909 263.95 || 44 961 909 263.95

Nefqa taħt ġestjoni diretta || 340 229 347.87 || 312 088 996.62

Total || 45 302 138 611.82 || 45 273 998 260.57

 (1) Ammonti impenjati. Impenji u pagamenti mingħajr id-dħul assenjat riċevut għall-ġestjoni kondiviża: EUR 44 132 955 071.43.

Għas-sena finanzjarja 2013, l-ammont proprju tal-approprjazzjonijiet ta’ impenn li ntużaw jammonta għal EUR 45 302 138 611.82 filwaqt li dak għall-approprjazzjonijiet ta’ pagament jammonta għal EUR 45 273 998 260.57.

2.1.3.     Eżekuzzjoni tal-baġit tal-approprjazzjonijiet ivvutati – Nefqa tal-ġestjoni diretta li għamlet il-Kummissjoni

F’EUR ||

Nefqa tal-ġestjoni diretta || Approprjazzjonijiet ta' impenn || Impenji ikkanċellati || Approprjazzjonijiet ta' pagament || Riport għall-2014 (2)

Approprjazzjonijiet (C1) (1) || 338 354 160.00 || - || 311 068 995.90 || -

Eżekuzzjoni (C1) || 332 522 151.49 || - || 292 180 573.98 || 13 121 493.82

Approprjazzjonijiet imħassra || 5 832 008.51 || - || 3 911 831.14 || -

(1) C1 jirreferi għall-approprjazzjonijiet tal-baġit ivvutati. Dan l-ammont jinkludi trasferimenti lejn / mill-FAEG: EUR -7 594 450.00 għal approprjazzjonijiet ta’ impenn u EUR -12 519 715.10 għal approprjazzjonijiet ta’ pagament (2) Approprjazzjonijiet mhux differenzjati biss jiġu riportati għall-2014 Għal partiti tal-baġit fit-titoli 11 u 17, l-ammonti li fadal mill-eżekuzzjoni tal-2013 ġew riportati f’partiti tal-baġit li jaqgħu fl-intestatura finanzjarja 2 (mhux FEAG) u fl-intestatura finanzjarja 3 rispettivament.

Fil-baġit tal-2013 kienu previsti approprjazzjonijiet ta’ impenn ta’ EUR 338.4 miljun għan-nefqa tal-ġestjoni diretta. Fl-2013 ġie impenjat ammont ta’ EUR 332.5 miljun. Il-bilanċ ta’ dawn l-approprjazzjonijiet, EUR 5.8 miljun, ġie ikkanċellat. 79 % tal-approprjazzjonijiet ta' impenn jikkonċernaw il-qasam ta' politika 17 - Nefqa għal miżuri sanitarji u fitosanitarji. Il-bqija għandhom x'jaqsmu mal-qasam ta’ politika 05 – Agrikoltura u Żvilupp Rurali (13 %) u l-qasam ta’ politika 11 – Sajd (8 %).

Il-parti l-kbira tal-approprjazzjonijiet ta' impenn tal-FAEG għan-nefqa tal-ġestjoni diretta tal-Kummissjoni huma approprjazzjonijiet differenzjati. Ir-riport awtomatiku għall-2014, li jirrigwarda biss approprjazzjonijiet mhux differenzjati, jammonta għal EUR 13.1 miljun.

2.2.        Pagamenti ta’ kull xahar

2.2.1.     Pagamenti ta' kull xahar lill-Istati Membri bil-ġestjoni kondiviża

2.2.1.1.  Pagamenti ta’ kull xahar għall-provvediment tan-nefqa

Ir-Regolament tal-Kunsill (KE) Nru 1290/2005 tal-21 ta’ Ġunju 2005 dwar il-finanzjament tal-Politika Agrikola Komuni[4], fl-Artikolu 15 jistipula li “il-Kummissjoni għandha tagħmel pagamenti ta’ kull xahar ... għan-nefqa effettwata mill-aġenziji tal-pagamenti akkreditati tal-Istati Membri matul ix-xahar ta’ referenza”. Il-pagamenti ta’ kull xahar għandhom isiru lil kull Stat Membru mhux aktar tard mit-tielet jum tax-xogħol tat-tieni xahar wara dak li fih tkun saret in-nefqa.

Il-pagamenti ta’ kull xahar huma rimborż tan-nefqa netta (wara t-tnaqqis tad-dħul) li tkun diġà saret, u jkunu disponibbli abbażi tad-dikjarazzjonijiet ta’ kull xahar mibgħuta mill-Istati Membri[5]. L-aġġornament tan-nefqa u tad-dħul li jsir kull xahar fil-kotba huwa suġġett għal kontrolli u korrezzjonijiet abbażi tad-dikjarazzjoni dettaljata[6]. Barra minn hekk, dawn il-pagamenti jsiru finali wara l-verifika tal-Kummissjoni skont il-proċedura tal-approvazzjoni tal-kontabilità tal-kontijiet.

Il-pagamenti magħmula mill-Istati Membri mis-16.10.2012 sal-15.10.2013 huma koperti mis-sistema ta’ pagamenti ta’ kull xahar. Il-pagamenti li jifdal isiru direttament mill-Kummissjoni għal għadd limitat ta’ miżuri.

Għas-sena finanzjarja 2013, l-ammont nett totali tal-pagamenti ta' kull xahar imwettqa, wara t-tnaqqis tal-approvazzjoni u korrezzjonijiet oħra, kien EUR 44 132 955 071.43.

2.2.1.2.  Deċiżjonijiet dwar il-pagamenti ta’ kull xahar għall-2013

Għas-sena finanzjarja 2013, il-Kummissjoni adottat tnax-il deċiżjoni dwar il-pagamenti ta’ kull xahar. Barra minn hekk, deċiżjoni addizzjonali dwar pagamenti ta' kull xahar, li taġġusta dawk li ngħataw diġà għan-nefqa totali li saret matul is-sena, ġiet adottata f’Diċembru 2013.

3.           L-IMPLIMENTAZZJONI TAL-BAĠIT TAL-FAEG 2013

3.1.        L-użu tal-approprjazzjonijiet tal-baġit tal-FAEG

L-implimentazzjoni tal-baġit ammontat għal EUR 45 302.1 miljun. Din in-nefqa ġiet iffinanzjata mill-approprjazzjonijiet inizjali tal-baġit, u bl-użu tad-dħul assenjat lill-qasam ta’ politika 05 – Agrikoltura u Żvilupp Rurali, magħmul mill-ammont kollu ta' EUR 1 245.6 miljun riportat mill-2012 u minn parti mid-dħul assenjat miġbur fl-2013 li jammonta għal EUR 118.7 miljun minn total ta' EUR 829 miljun. 

Fil-qasam ta’ politika 05 – Agrikoltura u Żvilupp Rurali, in-nefqa għal miżuri tas-suq ammontat għal EUR 3 193.2 miljun, u għall-għajnuniet diretti ammontat għal EUR 41 658.3 miljun. In-nefqa mġarrba għal ċerti miżuri tas-suq u għajnuniet diretti qabżet l-approprjazzjonijiet ivvotati tal-baġit, u kienet parzjalment koperta bi trasferimenti ta’ approprjazzjonijiet minn partiti oħra tal-baġit, u parzjalment mid-dħul li kien assenjat lill-baġit tal-FAEG. 

Barra minn hekk, l-ammont totali ta’ implimentazzjoni msemmi qabel jinkludi nefqa għall-qasam ta' politika 11 - Miżuri tas-suq tas-sajd ta' EUR 32.2 miljun (approprjazzjonijiet ta' impenn), kif ukoll nefqa li tammonta għal EUR 265.9 miljun għall-qasam ta’ politika 17 - Miżuri veterinarji u fitosanitarji (approprjazzjonijiet ta' impenn).

Għal dettalji dwar l-implimentazzjoni tal-baġit skont il-qasam ta’ politika tista' tara l-Anness 3.

L-Anness 5 jagħti tqassim tan-nefqa għall-miżuri tas-suq, il-pagamenti diretti u l-awditjar tan-nefqa agrikola, skont l-oġġett u skont l-Istat Membru.

4.           KUMMENTI DWAR L-IMPLIMENTAZZJONI TAL-BAĠIT TAL-FAEG GĦALL-2013

Hawn isfel jidher kummentarju fil-qosor dwar l-implimentazzjoni tal-approprjazzjonijiet tal-baġit tal-FAEG għall-2013, kif ukoll dwar l-użu tad-dħul assenjat disponibbli fl-2013, ibbażat fuq dettalji ppreżentati fl-Anness 3.

4.1.        Kapitolu 05 02: Interventi fis-swieq agrikoli

4.1.1.     Daħla

Il-pagamenti totali għal dan il-kapitolu tal-baġit jammontaw għal EUR 3 193.2 miljun, u ġew iffinanzjati mill-approprjazzjonijiet ivvutati tal-baġit li jammontaw għal EUR 2 771.4 miljun, bi dħul assenjat li jammonta għal EUR 532.5 miljun li ntuża biex tiġi koperta n-nefqa mġarrba fis-settur tal-frott u l-ħaxix (NB: Id-dettalji għal dan is-settur jidhru fil-punt 4.1.3 hawn isfel) u minn trasferimenti ta’ approprjazzjonijiet minn partijiet oħra tal-baġit tal-FAEG, li jammontaw għal EUR 162.7 miljun. Il-bilanċ tad-dħul assenjat li jifdal miġbur fl-2013, li jammonta għal EUR 710.2 miljun, ġie riportat għall-2014. Fil-partiti bl-approprjazzjonijiet tal-baġit li nefqu inqas milli mistenni, l-approprjazzjonijiet disponibbli ġew trasferiti għal partiti oħra tal-baġit sabiex ikopru n-nefqa addizzjonali skont kif meħtieġ.

4.1.2.     Programmi tal-ikel

L-infiq nieqes tal-approprjazzjonijiet previsti fil-baġit tal-2013 għall-programmi tal-ikel jammonta għal EUR 8.5 miljun, u jirriżulta mill-fatt li Stat Membru wieħed iltaqa’ ma’ diffikultajiet fl-implimentazzjoni tal-programm tiegħu lejn tmiem is-sena baġitarja. Ta’ min jinnota li l-2013 kienet l-aħħar sena ta' implimentazzjoni ta’ programmi tal-ikel fi ħdan l-FAEG.   

4.1.3.     Frott u ħxejjex 

In-nefqa għal dan is-settur tammonta għal EUR 1 138.1 miljun, u l-implimentazzjoni eċċessiva tiegħu kienet primarjament dovuta għan-nefqa mġarrba mill-Istati Membri għall-għajnuna lill-gruppi ta’ produtturi għar-rikonoxximent preliminari.

Fir-rigward tal-fondi operattivi għall-organizzazzjonijiet tal-produtturi, li għandhom l-għan li jiffinanzjaw il-programmi tagħhom ta' titjib fil-kwalità tal-produzzjoni, promozzjoni u kummerċjalizzazzjoni, il-ħtiġijiet totali kkalkulati biex tiġi koperta n-nefqa mbassra li mistennija jġarrbu l-Istati Membri kkonċernati jammontaw għal EUR 767 miljun. Minn dan l-ammont totali, l-Awtorità tal-Baġit tat l-approprjazzjonijiet li kienu jammontaw għal EUR 267 miljun minħabba li qieset id-dħul stmat li jammonta għal EUR 500 miljun li kien ġie assenjat għall-finanzjament ta' din l-iskema fil-baġit tal-2013. Eventwalment, l-Istati Membri ġarrbu pagamenti li jammontaw għal EUR 726.8 miljun, u li kienu ammonti inqas meta mqabbla mal-approprjazzjonijiet disponibbli tal-baġit, l-aktar minħabba li naqsu l-pagamenti tat-tieni ħlas parzjali tal-pjanijiet approvati fl-2012, peress li xi Stati Membri kienu għamlu stima eċċessiva fit-tbassir tal-infiq tagħhom. 

In-nefqa mġarrba mill-Istati Membri għall-għajnuna lil gruppi ta’ produtturi għal rikonoxximent preliminari qabżet l-approprjazzjonijiet tal-baġit b’madwar EUR 90.4 miljun, minħabba l-għadd kbir ta’ gruppi ta' produtturi li daħlu f'din l-iskema f’ċerti Stati Membri.  

Fil-baġit għall-2013 għall-Iskema tal-Frott għall-Iskejjel kien hemm eżekuzzjoni nieqsa ta' madwar EUR 23.3 miljun, prinċipalment minħabba li ċerti Stati Membri ġarrbu nefqa li kienet inqas mill-allokazzjoni baġitarja tagħhom għas-sena skolastika 2011/12. Rigward is-sena skolastika 2012/2013 li bdiet fl-01/08/2013, in-nefqa mġarrba mill-Istati Membri sa tmiem is-sena tal-baġit 2013 kienet dik prevista fil-baġit tal-2013.

4.1.4.     Il-prodotti tas-settur tal-vitikultura

Is-settur tal-inbid ġie riformat, sa mis-sena baġitarja 2009. Attwalment, il-miżura prinċipali li tħalliet f’dan is-settur hija l-programmi nazzjonali ta’ appoġġ għall-inbid. Għall-miżuri l-oħra kollha, il-baġit 2013 kien jinkludi approprjazzjonijiet maħsuba biex ikopru l-bilanċi stmati ta’ pagamenti li għadhom pendenti.

Rigward il-programmi nazzjonali ta’ appoġġ, erba’ Stati Membri ġarrbu nefqa kemxejn aktar baxxa meta mqabbla mal-ammonti previsti fil-programmi tagħhom. Madankollu, il-programmi l-oħra kollha previsti f'din l-iskema ġew implimentati bis-sħiħ, u dan irriżulta f'implimentazzjoni globali ta' aktar minn 98.1 % tal-approprjazzjonijiet previsti tal-2013.

Barra minn hekk, għall-iskema tal-qlugħ tad-dwieli li ntemmet fl-2011, l-Istati Membri ġarrbu nefqa ferm iżgħar għall-ħlas ta’ bilanċi li għadhom pendenti, u dan wassal għal nefqa inqas b’madwar EUR 4.6 miljun tal-approprjazzjonijiet tal-baġit. 

4.1.5.     Ħalib u prodotti tal-ħalib

Matul is-sena baġitarja ma nxtara f'intervent l-ebda butir jew trab tal-ħalib xkumat.

Fir-rigward tal-għajnuna għall-ħżin privat għall-butir, l-approprjazzjonijiet previsti fil-baġit tal-2013 jammontaw għal EUR 9 miljun filwaqt li n-nefqa mġarrba tammonta għal EUR 7.1 miljun minħabba ż-żmien medju iqsar tal-ħżin għall-kwantitajiet ikkonċernati ta’ butir.  

Fir-rigward tal-ħalib għall-iskejjel, il-kwantitajiet imqassma mill-Istati Membri kkonċernati kważi kollha kienu aktar baxxi mill-kwantitajiet miżmuma fil-baġit tal-2013, u dan wassal għal nuqqas ta' eżekuzzjoni tal-approprjazzjonijiet korrispondenti ta' madwar EUR 10.8 miljun.

4.1.6.     Ċanga u vitella

In-nefqa għal dan is-settur tammonta għal EUR 6.5 miljun għal pagamenti ta’ rifużjonijiet għaċ-ċanga u l-vitella u għal annimali ħajjin, meta mqabbla mal-approprjazzjonijiet ta’ EUR 7.1 miljun tal-baġit tal-2013 għal dawn il-pagamenti, u dan wassal għal nuqqas globali ta' eżekuzzjoni ta’ madwar EUR 0.6 miljun.  

4.2.        Kapitolu 05 03: Għajnuniet diretti

L-approprjazzjonijiet ivvutati għal dan il-kapitolu tal-baġit tal-2013 jammontaw għal EUR 40 931.9 miljun, filwaqt li l-pagamenti diretti jammontaw għal madwar EUR 41 658.3 miljun. Parti mill-iskema ta’ pagament uniku kienet diġà prevista li tiġi ffinanzjata minn dħul assenjat, u għalhekk dan wassal għall-implimentazzjoni eċċessiva li kienet koperta parzjalment minn dan id-dħul u parzjalment minn trasferimenti ta' approprjazzjonijiet ivvotati minn partiti oħrajn tal-baġit.

4.3.        Kapitolu 05 07: Awditjar tan-nefqa agrikola

4.3.1.     Artiklu 05 07 01: Kontroll tan-nefqa agrikola

Dan l-Artikolu jinvolvi l-miżuri li ttieħdu sabiex jissaħħu l-mezzi ta’ kontroll fuq il-post u biex jittejbu s-sistemi ta’ verifika sabiex jiġi limitat ir-riskju ta’ frodi u ta' irregolaritajiet b’dannu għall-baġit tal-Unjoni. Dan jinkludi wkoll l-ammonti kreditati fil-baġit tal-FAEG permezz tal-korrezzjonijiet ibbażati fuq il-proċedura tal-approvazzjoni tal-kontabilità u fuq il-proċedura dwar it-tnaqqis/sospensjoni ta’ pagamenti akkont bil-quddiem.

L-Unjoni Ewropea ffinanzjat miżuri b'mod dirett, l-aktar għax-xiri ta’ immaġnijiet bis-satellita fi ħdan il-qafas tas-Sistema Integrata ta’ Amministrazzjoni u Kontroll (IACS) billi impenjat l-ammont kollu ta’ EUR 6.8 miljun previst fil-baġit tal-2013 għal miżuri ta' monitoraġġ u ta' prevenzjoni - Pagamenti diretti mill-Unjoni Ewropea.

Rigward l-approvazzjoni tal-kontabilità tal-kontijiet tas-snin preċedenti, u għall-kuntrarju tal-korrezzjonijiet negattivi mistennija, il-Kummissjoni għamlet korrezzjonijiet ġenerali pożittivi fl-ammonti tal-Istati Membri għal madwar EUR 3.4 miljun, inkluż il-korrezzjonijiet negattivi imposti fuq l-Istati Membri mill-penali għax jinqabżu l-iskadenzi tal-pagamenti. Il-baġit tal-2013 kien jinkludi approprjazzjonijiet li jammontaw għal – EUR 200 miljun għall-approvazzjoni negattiva ta’ korrezzjonijiet tal-kontijiet. Il-Kummissjoni għalqet dan il-kont bit-trasferiment ta’ approprjazzjonijiet ivvotati li jammontaw għal EUR 203.6 miljun minn partiti oħra tal-baġit.

Fir-rigward tal-approvazzjoni tal-konformità tal-kontijiet tas-snin preċedenti, l-Awtorità tal-Baġit kienet tat approprjazzjonijiet li jammontaw għal EUR 108.3 miljun fir-rigward tal-korrezzjonijiet pożittivi tal-approvazzjoni tal-konformità tas-snin preċedenti f'din il-partita. Madankollu, fl-2013 il-Kummissjoni ħadet deċiżjonijiet li jinvolvu korrezzjonijiet pożittivi ta’ madwar EUR 109.1 miljun favur l-Istati Membri. L-infiq żejjed ta’ EUR 0.8 miljun li jirriżulta kien iffinanzjat bi trasferiment minn partiti oħra tal-baġit.

5.           IMPLIMENTAZZJONI TAD-DĦUL ASSENJAT

5.1.        Dħul assenjat lill-FAEG

Id-dħul assenjat li fil-fatt ġie ttrasferit mill-2012 għall-2013 jammonta għal EUR 1 245.6 miljun, inkluż il-bilanċ tar-Ristrutturar tas-Settur taz-Zokkor, u dan intuża kompletament għall-finanzjament tan-nefqa tas-sena baġitarja 2013, skont l-Artikolu 14 tar-Regolament Finanzjarju. Kif juri l-Anness 4-II, dan l-ammont ikopri n-nefqa ta’ EUR 143.5 miljun għall-fondi operattivi għall-organizzazzjonijiet tal-produtturi fis-settur tal-frott u l-ħxejjex, u n-nefqa ta’ EUR 1 102.2 miljun għall-iskema ta’ pagament uniku.

Rigward dak li għandu x'jaqsam mad-dħul assenjat miġbur fl-2013, l-Anness 4-I juri li dan id-dħul jammonta għal madwar EUR 829 miljun, u li dan joriġina minn:

– Il-korrezzjonijiet tal-proċedura tal-approvazzjoni tal-konformità li tammonta għal madwar EUR 593.6 miljun.

– Id-dħul minn irregolaritajiet li jammonta għal madwar EUR 155.1 miljun.

– Il-ġbir tal-imposti tal-ħalib li jammonta għal madwar EUR 80.2 miljun.

Parti mid-dħul assenjat miġbur fl-2013 li jammonta għal EUR 118.7 miljun intuża fi żmien is-sena finanzjarja sabiex ikopri n-nefqa mġarrba għall-fondi operattivi għall-organizzazzjonijiet tal-produtturi fis-settur tal-frott u l-ħxejjex.

Il-bilanċ tad-dħul assenjat miġbur fl-2013, li jammonta għal EUR 710.2 miljun, ġie ttrasferit awtomatikament fil-baġit tal-2014 sabiex jiffinanzja l-ħtiġijiet baġitarji ta’ dik is-sena.

Għad-dettalji tista' tara l-Annessi 4-I u 4-II.

6.           ANALIŻI SKONT IT-TIP TA’ NEFQA

In-nefqa totali tal-FAEG tammonta għal EUR 45 302.1 miljun. Minn hawn 'il quddiem, din in-nefqa hija mqassma skont il-kategoriji ewlenin tar-rappurtar, flimkien mal-perċentwali li dawn jirrappreżentaw fin-nefqa totali tal-FAEG għall-2013:

Ħżin

In-nefqa għall-ħżin tammonta għal EUR 25.1 miljun, jiġifieri 0.06 % tan-nefqa totali. Dan l-ammont jirrappreżenta l-aktar in-nefqa mġarrba għall-ħżin privat tal-butir u taż-żejt taż-żebbuġa.

Rifużjonijiet fuq l-esportazzjoni

In-nefqa għar-rifużjonijiet ta’ l-esportazzjoni tammonta għal EUR 62.4 miljun, jiġifieri 0.1 % tan-nefqa totali, u din kienet tirrigwarda prinċipalment iċ-ċanga, it-tjur, il-laħam tal-majjal u l-prodotti li mhumiex inklużi fl-Anness I.

Miżuri oħra tas-suq

Flimkien mal-ħżin u r-rifużjonijiet tal-esportazzjoni, in-nefqa għal miżuri oħra tas-suq tammonta għal EUR 3 217.2 miljun, jiġifieri 7.1 % tat-total tas-sena. Din il-kategorija tkopri n-nefqa li hija prinċipalment relatata mal-programmi tal-ikel, iż-żejt taż-żebbuġa, il-frott u l-ħxejjex, l-inbid, il-pjanti tessili, il-POSEI u l-ħaxixa tal-imrar, il-ħalib u l-prodotti tal-ħalib, iċ-ċanga u l-vitella, il-laħam tal-majjal u t-trobbija tan-naħal. Din in-nefqa tinkorpora ammonti minuri oħra u tinkludi l-korrezzjonijiet li ġejjin mill-approvazzjoni tal-kontabilità.

Pagamenti diretti

In-nefqa għall-pagamenti diretti tammonta għal EUR 41 658.3 miljun, jiġifieri 92 % tat-total.

Nefqa tal-ġestjoni diretta

Din in-nefqa, li tammonta għal EUR 340.2 miljun, (f'approprjazzjonijiet ta' impenn), jiġifieri 0.8 % tat-total, tħallset direttament mill-Kummissjoni u tkopri l-aktar in-nefqa relatata ma’ miżuri veterinarji u fitosanitarji, kif ukoll mal-kontabilità tal-azjendi agrikoli, sondaġġi dwar l-istrutturi tal-azjendi agrikoli, informazzjoni dwar il-PAK, eċċ.

Żvilupp rurali b'dik li kienet il-Garanzija tal-FAEGG

Ma tista' ssir l-ebda approprjazzjoni ta’ impenn għal dawn il-programmi. L-Istati Membri issa qed jagħlqu dawn il-programmi u qed jirkupraw ammonti li ma tħallsux meta suppost. L-ammont finali nett irkuprat f'dan l-Artikolu jammonta għal madwar EUR 1 miljun.

L-evoluzzjoni ta’ din l-analiżi skont it-tip ta’ nefqa għall-perjodu 2007-2013 hija ppreżentata fl-Anness 6.

[1]               Din il-proċedura hija ppreżentata fl-Anness 1.

[2]               Dawn l-ammonti mhumiex miktuba fil-linji tad-dħul tal-baġit (oġġett 670 għad-dħul assejnat lill-FAEG), iżda huma msemmija fil-kummenti baġitarji ta' dan l-oġġett.

[3]               p.m.: “pour mémoire”.

[4]               ĠU L 209, 11.8.2005, p. 1.

[5]               Dawn id-dikjarazzjonijiet tan-nefqa ta' kull xahar jiġu trażmessi mill-Istati Membri permezz tad-dikjarazzjoni tal-10 jum tax-xahar N+1.

[6]               Id-dikjarazzjonijiet dettaljati jiġu trażmessi kull xahar mill-Istati Membri (permezz tat-tabella 104) fl-20 jum tax-xahar N+1.