6.3.2014   

MT

Il-Ġurnal Uffiċjali tal-Unjoni Ewropea

C 67/68

1.1

Il-KESE jilqa' b'sodisfazzjon il-proposta għal Direttiva (1) li temenda d-Direttiva 2011/16/UE fir-rigward tal-iskambju awtomatiku obbligatorju ta' informazzjoni fil-qasam tat-tassazzjoni (AEOI) u jemmen li tirrappreżenta pass importanti 'l quddiem fl-implimentazzjoni tal-pjan ta' azzjoni biex tissaħħaħ il-ġlieda kontra l-frodi fiskali u l-evażjoni tat-taxxa (2).

1.2

Fil-fehma tal-Kumitat din il-proposta ma tistax titqies b'mod separat mill-inizjattivi u żviluppi oħra, Ewropej u internazzjonali, li jippromovu skambju aħjar ta' informazzjoni bejn amministrazzjonijiet fiskali. Fost oħrajn nistgħu nsemmul-estensjoni ta d-Direttiva Ewropea dwar it-tfaddil tal-2005, ir-regolament FATCA, fejn għadd ta' pajjiżi Ewropej qed jippruvaw jilħqu ftehim mal-Istati Uniti biex, fost affarijiet oħra, iħarsu drittijiethom, u d-Direttiva eżistenti għall-iskambju awtomatiku tal-informazzjoni, li qed isir sforz biex tiġi estiża.

1.3

Peress li l-Istati Membri jitilfu biljuni ta' Euro kull sena bħala riżultat tal-frodi fiskali u l-evażjoni tat-taxxa, il-KESE jqis li l-proposta tal-Kummissjoni biex jitħaffef il-proċess ta' implimentazzjoni ta' ċerti dispożizzjonijiet tad-Direttiva 2011/16/UE dwar l-AEOI hija ġustifikata.

1.4

Il-Kummissjoni tipproponi li jiżdiedu ħames kategoriji oħra ta' dħul li jkunu suġġetti għall-AEOI. Il-KESE jaqbel li dawn il-kategoriji l-ġodda ta' dħul għandhom jiġu inklużi peress li hemm possibbiltà akbar li jintlaqtu mill-frodi fiskali minn dawk li diġà jinsabu fid-Direttiva.

1.5

Peress li l-evażjoni tat-taxxa u l-frodi fiskali huma kwistjonijiet globali, ma jistgħux jiġu miġġielda biss fi ħdan l-UE. Għalhekk, il-KESE jħeġġeġ lill-Kummissjoni u lill-Istati Membri biex isaħħu l-isforzi tagħhom ta' negozjar, fl-OECD u korpi dinija oħra, biex tiġi promossa l-AEOI bħala standard internazzjonali.

1.6

Il-KESE jħeġġeġ b'mod partikolari lill-Istati Membri biex jiżguraw li l-istandard futur għall-AEOI jqis ir-rekwiżiti legali, l-esperjenza u l-għarfien espert tal-UE f'dan il-qasam. Jistieden lill-Istati Membri jadottaw pożizzjoni koordinata biex jilħqu dan sabiex il-pożizzjoni Ewropea fid-dibattiti internazzjonali tissaħħaħ.

1.7

Fir-rigward tal-inizjattivi internazzjonali u Ewropej, il-Kumitat huwa tal-fehma wkoll li għandu jsir sforz biex ikun hemm sitwazzjoni b'kundizzjonijiet indaqs bejn l-ikbar għadd possibbli ta' pajjiżi, sabiex kemm jista' jkun jiġu evitati l-iżvantaġġi ekonomiċi potenzjali u ta' tip ieħor għall-Unjon.

1.8

Il-KESE huwa tal-fehma li għal finijiet ta' semplifikazzjoni u effiċjenza, u mil-lat tal-iffrankar tal-ispejjeż, u bħala benefiċċju għal kulħadd, għandu jsir sforz biex is-sistemi differenti ta' skambju ta' informazzjoni li jappartjenu għal kull waħda mill-inizjattivi jiġu armonizzati u jsiru sistema waħda. Dan għandu jsir talinqas fil-livell Ewropew. B'mod ġenerali r-regoli bażiċi applikabbli għandhom ikunu ċari u proporzjonali fir-rigward tal-għanijiet li qed isir sforz għalihom.

1.9

Il-KESE jappella lill-Istati Membri biex jiżguraw li r-riżorsi umani, teknoloġiċi u finanzjarji meħtieġa għall-implimentazzjoni b'suċċess tal-AEOI jkunu disponibbli, minħabba fil-kumplessità u l-volum tal-informazzjoni li jkunu suġġetti għat-trasferiment bejn l-Istati Membri mill-2015. It-taħriġ tal-uffiċjali li se jkunu responsabbli għall-iskambju tal-informazzjoni jrid ikun prijorità.

1.10

Biex l-istrumenti l-ġodda għall-ġlieda kontra l-vjolazzjonijiet fiskali jkunu effikaċi, il-KESE jemmen li kemm il-Kummissjoni kif ukoll l-Istati Membri jridu jżidu l-isforzi tagħhom biex jissemplifikaw u jarmonizzaw il-leġislazzjoni tat-taxxa tagħhom.

2.1

Fid-dawl taż-żieda fil-frodi fiskali u l-evażjoni tat-taxxa f'dawn l-aħħar snin, u l-impatt gravi li għandhom fuq id-dħul mit-taxxa tal-Istati Membri, li qed ittellifhom bijuni ta' Euro fis-sena, il-Kummissjoni fasslet din il-proposta għal Direttiva li temenda ċerti dispożizzjonijiet tad-Direttiva 2011/16/UE rigward l-iskambju awtomatiku obligatorju tal-informazzjoni fil-qasam tal-informazzjoni.

2.2

L-għan tal-proposta tal-Kummissjoni huwa li tespandi l-ambitu tal-AEOI fl-UE lil hinn minn dak li hu previst fis-sistema attwali.

2.3

Il-Kummissjoni qed tipproponi li temenda l-Artikolu 8 tad-Direttiva biex tintroduċi kategoriji ġodda ta' dħul li jiġu soġġetti għall-AEOI, filwaqt li titneħħa r-referenza għal-livell limitu li taħtu Stat Membru jista' jagħżel li ma jirċevix informazzjoni minn Stat Membru ieħor, u tħaffef l-implimentazzjoni tad-dispożizzjonijiet tad-Direttiva attwali dwar l-estensjoni tal-iskambju awtomatiku tal-informazzjoni.

2.4

Il-kategoriji l-ġodda ta' dħul li għandhom jiġu soġġetti għall-AEOI huma: dividendi, qligħ kapitali, kwalunkwe introjtu ieħor iġġenerat fir-rigward tal-assi miżmuma f'kont finanzjarju, kwalunkwe ammont li fir-rigward tiegħu l-istituzzjoni finanzjarja hija l-obbligant, inkluż kwalunkwe ħlasijiet ta' fidi, u bilanċi tal-kontijiet. L-Istati Membri ser ikollhom jibagħtu informazzjoni dwar dan id-dħul mill-2015.

2.5

Fid-dawl tal-konsultazzjonijiet mal-Istati Membri, il-Kummissjoni tipproponi li jitneħħa l-livell limitu li taħtu l-Istati Membri bħalissa jistgħu jagħżlu li ma jirċevux tip partikolari ta' informazzjoni, filwaqt li tindika li dan m'huwiex prattiku u li l-Istati Membri jaqblu li dan għandu jitneħħa.

2.6

Għall-kategoriji l-ġodda ta' dħul li jkunu suġġetti għall-AEOI, il-Kummissjoni ma żżommx il-kundizzjoni ta' disponibbiltà tal-informazzjoni li bħalissa hemm għall-kategoriji ta' dħul imsemmija f'Artikolu 8(1). Dan l-approċċ iħaffef l-estensjoni u l-implimentazzjoni tal-iskambju awtomatiku obbligatorju tal-informazzjoni.

2.7

Il-proposta tal-Kummissjoni hija konformi mal-inizjattiva ta' xi Stati Membri li jikkonkludu ftehimiet mal-Istati Uniti b'rabta mal-Att FATCA - Foreign Account Tax Compliance Act (Konformità Fiskali tal-Kontijiet Barranin), biex b'hekk jiġu obbligati jipprovdu kooperazzjoni aktar estiża b'konformità mal-Artikolu 19 tad-Direttiva dwar il-Kooperazzjoni Amministrattiva mal-Istati Membri l-oħra.

3.1

Din il-proposta għal Direttiva hija waħda mill-miżuri fil-pjan ta' azzjoni (3) biex tissaħħaħ il-ġlieda kontra l-frodi fiskali u l-evażjoni tat-taxxa mressqa mill-Kummissjoni fl-aħħar tal-2012 fuq talba tal-Kunsill Ewropew. Fl-Opinjoni tiegħu (4), il-KESE laqgħa l-preżentazzjoni tal-pjan u esprima l-appoġġ tiegħu għall-Kummissjoni fil-ġlieda kontra dawn il-prattiki li jolqtu s-suq intern.

3.2

L-Istati Membri jitilfu biljuni ta' Euro kull sena bħala riżultat tal-frodi fiskali u l-evażjoni tat-taxxa. Peress li huma jnaqqru mill-bażi tat-taxxa u b'hekk jobbligaw lill-Istati Membri jżidu t-taxxi, il-Kumitat jemmen li l-frodi fiskali (5) u l-evażjoni tat-taxxa (6), barra milli huma illegali, huma prattiki immorali li jolqtu b'mod sinifikanti t-tħaddim tas-suq intern u jgħawġu l-ġustizzja tas-sistemi fiskali fir-rigward ta' dawk li jħallsu t-taxxa.

3.3

Il-frodi fiskali u l-evażjoni tat-taxxa huma kwistjonijiet globali. Għalhekk, miżuri li jiġġielduhom fi ħdan is-suq intern għandhom jissaħħu bi ftehimiet mal-OECD, il-G8, il-G20 u korpi oħra, biex jiżviluppaw l-AEOI bħala standard internazzjonali. Il-KESE jilqa' b'sodisfazzjon l-isforzi ta' xi Stati Membri li diġà laħqu ftehimiet mal-Istati Uniti b'rabta mal-FATCA. B'konformità mal-Artikolu 19 tad-Direttiva dwar il-Kooperazzjoni Amministrattiva, dawn ser jagħtu lill-Istati Membri l-għażla ta' kooperazzjoni aktar mifruxa fil-qasam tal-iskambju awtomatiku tal-informazzjoni. Madankollu, il-KESE jilqa' l-fatt li l-proposta għall-iskambju obbligatorju u estiż tal-informazzjoni toffri lill-Istati Membri bażi legali tal-UE uniformi li tiggarantixxi ċertezza legali u kundizzjonijiet ekwi kemm għall-awtoritajiet kompetenti kif ukoll għall-operaturi ekonomiċi. Il-KESE jqis ukoll li huwa importanti li l-istandard globali futur għall-iskambju awtomatiku tal-informazzjoni għandu jqis ir-rekwiżiti legali, l-esperjenza u l-għarfien espert tal-UE f'dan il-qasam.

3.4

Jista' jirriżulta li l-kumplessità kbira tas-sistemi fiskali tal-Istati Membri u differenzi kbar bejniethom ikunu ostakli kbar fl-implimentazzjoni tal-AEOI. Il-KESE jemmen li, biex jiġi żgurat li l-istrumenti l-ġodda għall-ġlieda kontra l-frodi fiskali u l-evażjoni tat-taxxa jaħdmu b'mod effiċjenti u effikaċi, il-Kummissjoni u l-Istati Membri għandhom iżidu l-isforzi tagħhom biex jissemplifikaw u jarmonizzaw il-leġislazzjoni fiskali.

4.1

Fil-proposta għal Direttiva, il-Kummissjonit tixtieq iddaħħal ħames kategoriji ġodda ta' dħul fl-AEOI: dividendi, qligħ kapitali, kwalunkwe introjtu ieħor iġġenerat fir-rigward tal-assi miżmuma f'kont finanzjarju, kwalunkwe ammont li fir-rigward tiegħu l-istituzzjoni finanzjarja hija l-obbligant, inkluż kwalunkwe ħlasijiet ta' fidi, u bilanċi tal-kontijiet. Il-KESE jaqbel li dawn il-kategoriji l-ġodda għandhom jiġu inklużi peress li, minħabba t-tip u l-iskala tagħhom, hemm possibbiltà akbar li jintlaqtu mill-frodi fiskali minn dawk li diġà jinsabu fid-Direttiva.

4.2

Għall-kategoriji l-ġodda ta' dħul li jkunu suġġetti għall-iskambju awtomatiku tal-informazzjoni, il-Kummissjoni ma żżommx il-kundizzjoni tad-disponibbiltà tal-informazzjoni. Għal dawn il-kategoriji ta' dħul, l-Istati Membri ser ikollhom iressqu d-data reġistrata mis-sena tat-taxxa 2014. Il-KESE jilqa' b'sodisfazzjon il-proposta tal-Kummissjoni, li ser tħaffef l-implimentazzjoni tal-AEOI stabbilita fid-Direttiva 2011/16/UE.

4.3

L-iskambju awtomatiku tal-informazzjoni dwar it-taxxa jirrikjedi li ammont sinifikanti ta' informazzjoni jasal għand kull Stat Membru mill-Istati Membri l-oħra kollha. Il-KESE jappella lill-Istati Membri biex jiżguraw li jkollhom ir-riżorsi umani, teknoloġiċi u finanzjarji meħtieġa biex jimplimentaw l-AEOI mill-2015.

4.4

Minħabba l-kumplessità tad-data li trid tiġi soġġetta għas-sistema tal-AEOI, il-KESE jappella lill-Istati Membri biex jipprovdu taħriġ lill-uffiċjali li se jkunu jaħdmu b'din is-sistema biex jiżguraw li taħdem b'mod effiċjenti.

4.5

Fil-proposta għal Direttiva, il-Kummissjoni m'għamlet l-ebda bidla għall-kundizzjoni ta' disponibbiltà tal-informazzjoni b'rabta mal-kategoriji tad-dħul imsemmija f'Artikolu 8(1) tad-Direttiva 2011/16/UE. Il-KESE jirrakkomanda li l-Istati Membri jagħmlu sforz biex jiżguraw li din id-data tkun tista' tinġabar mill-2017, meta, b'konformità mad-dispożizzjonijiet attwali tad-Direttiva, din għandha tiddaħħal fis-sistema tal-AEOI.