EUR-Lex Access to European Union law
This document is an excerpt from the EUR-Lex website
Document 52008AE0994
Opinion of the European Economic and Social Committee on the Communication from the Commission to the European Parliament, the Council, the European Economic and Social Committee and the Committee of the Regions — Improving quality and productivity at work: Community strategy 2007-2012 on health and safety at work COM(2007) 62 final
Opinjoni tal-Kumitat Ekonomiku u Soċjali Ewropew dwar il-Komunikazzjoni mill-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — Intejbu l-kwalità u l-produttività fuq ix-xogħol: strateġija Komunitarja 2007-2012 għas-saħħa u s-siġurtà fuq il-post tax-xogħol COM(2007) 62 finali
Opinjoni tal-Kumitat Ekonomiku u Soċjali Ewropew dwar il-Komunikazzjoni mill-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — Intejbu l-kwalità u l-produttività fuq ix-xogħol: strateġija Komunitarja 2007-2012 għas-saħħa u s-siġurtà fuq il-post tax-xogħol COM(2007) 62 finali
ĠU C 224, 30.8.2008, p. 88–94
(BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)
30.8.2008 |
MT |
Il-Ġurnal Uffiċjali ta’ l-Unjoni Ewropea |
C 224/88 |
Opinjoni tal-Kumitat Ekonomiku u Soċjali Ewropew dwar il-Komunikazzjoni mill-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — Intejbu l-kwalità u l-produttività fuq ix-xogħol: strateġija Komunitarja 2007-2012 għas-saħħa u s-siġurtà fuq il-post tax-xogħol
COM(2007) 62 finali
(2008/C 224/21)
Nhar il-21 ta' Frar 2007, il-Kummissjoni Ewropea iddeċidiet, b'konformità ma' l-Artikolu 262 tat-Trattat li jistabbilixxi l-Komunità Ewropea, li tikkonsulta lill-Kumitat Ekonomiku u Soċjali Ewropew dwar
Il-Komunikazzjoni mill-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni: Intejbu l-kwalità u l-produttività fuq ix-xogħol — strateġija Komunitarja 2007-2012 għas-saħħa u s-siġurtà fuq il-post tax-xogħol
Is-Sezzjoni Speċjalizzata għax-Xogħol, l-Affarijiet Soċjali u ċ-Ċittadinanza, inkarigata sabiex tipprepara l-ħidma tal-Kumitat dwar is-suġġett, adottat l-opinjoni tagħha nhar is-7 ta' Mejju 2008. Ir-rapporteur kienet is-Sinjura Cser.
Matul l-445 sessjoni plenarja tiegħu li nżammet fit-28 u d-29 ta' Mejju 2008 (seduta tad-29 ta' Mejju), il-Kumitat Ekonomiku u Soċjali Ewropew adotta din l-opinjoni b'80 vot favur, 20 vot kontra u 8 astensjonijiet.
1. Sinteżi
1.1 |
L-objettivi ta' l-istrateġija mġedda ta' Lisbona dwar iż-żieda fil-produttività u l-kompetittività jistgħu jintlaħqu biss jekk bħala ħaddiema, iċ-ċittadini Ewropej jkunu jistgħu jaħdmu f'kondizzjonijiet ta' saħħa u sigurtà adegwati. Il-leġislazzjoni Komunitarja u l-miżuri nazzjonali flimkien jiggarantixxu s-saħħa u s-sigurtà ta' l-impjegati fuq il-post tax-xogħol. Dan hu dak li l-istrateġija Komunitarja 2007-2012 għas-saħħa u s-sigurtà għandha twettaq fil-prattika. |
1.2 |
Is-saħħa u s-sigurtà fuq il-post tax-xogħol għandhom jitqiesu bħala fattur ewlieni għat-tkabbir ekonomiku u l-produttività. Dan il-qasam jeħtieġ spejjeż konsiderevoli u t-telliefa m'humiex biss l-intrapriżi u l-ħaddiema iżda s-soċjetà kollha. Dawn l-ispejjeż għandhom jiġu analizzati aħjar. Huwa importanti li dan iseħħ ħalli jintwera kemm in-nuqqas ta' sigurtà fuq il-post tax-xogħol u ambjent tax-xogħol ħażin jiġu jiswew lill-partijiet ikkonċernati, u li minħabba f'hekk tonqos il-produttività. |
1.3 |
Il-KESE jilqa' b'sodisfazzjon l-objettiv li l-aċċidenti fuq il-post tax-xogħol jitnaqqsu b'25 %; Ikun għaqli li jiġi stabbilit objettiv komparabbli għat-tnaqqis tal-mard relatat max-xogħol. Għandha tingħata attenzjoni speċjali lit-tipi ta' kanċer marbuta max-xogħol. Għandu jiġi introdott, ivverifikat u aġġustat pjan ta' azzjoni speċifiku, b'objettivi miżurabbliu kredibbli u b'mekkaniżmi ta' rappurtaġġ komparattivi. |
1.4 |
Id-drittijiet ta' l-impjegati għandhom jiġu rispettati u applikati b'mod effettiv, filwaqt li jitqiesu forom ġodda ta' impjieg, u l-ħtieġa li jiġi assigurat li l-leġislazzjoni u, għaldaqstant, l-ispezzjoni, jkopru l-impjegati kollha, hu x'inhu t-tip ta' xogħol jew il-forma ta' l-impjieg. Jekk dan ma jseħħx, ikun sar ksur tad-drittijiet fundamentali. |
1.5 |
Il-KESE jappoġġja l-implimentazzjoni adattata tal-leġislazzjoni Komunitarja, partikularment permezz tat-tfassil u l-implimentazzjoni ta' strateġiji nazzjonali. |
1.6 |
Il-gruppi mmirati prijoritarji — il-ħaddiema b'diżabilità, in-nisa, il-ħaddiema anzjani, il-ħaddiema żgħażagħ u l-ħaddiema migranti — jeħtieġu regolamentazzjoni, politiki u appoġġ speċifiċi. |
1.7 |
Biex l-istrateġija tiġi implimentata u ssorveljata, jinħtieġu standards minimi speċifiċi dwar in-numru ta' spetturi tax-xogħol biex jiġu assigurati spezzjonijiet u kontrolli nazzjonali u Komunitarji effettivi u uniformi (1). |
1.8 |
Il-persunal tal-Kumitat ta' Livell Għoli għall-Eżaminar tax-Xogħol (SLIC — Senior Labour Inspectors Committee) u ta' l-awtoritajiet Ewropej u nazzjonali rilevanti m'għandux jitnaqqas, iżda jiżdied biex jirrifletti n-numru tal-ħaddiema u l-popolazzjoni fl-UE wara t-tkabbir. |
1.9 |
L-Istati Membri għandhom jippromovu d-djalogu soċjali fil-livell Komunitarju, nazzjonali, lokali u tal-post tax-xogħol, billi dan huwa strument essenzjali biex jassigura s-saħħa u s-sigurtà fuq il-post tax-xogħol għall-impjegati individwali. |
1.10 |
Jinħtieġ li l-kooperazzjoni bejn l-Istati Membri tissaħħaħ. B'mod partikulari, il-politika baġitarja ta' l-UE għandha tinkludi d-dispożizzjonijiet meħtieġa sabiex, fil-prattika, tiggarantixxi implimentazzjoni sistematika u effettiva ta' l-istrateġija Komunitarja għas-saħħa u s-sigurtà fuq il-post tax-xogħol. |
1.11 |
Jinħtieġ li jinħolqu programmni ta' taħriġ u jissaħħu dawk eżistenti permezz tal-koordinazzjoni tal-politiki Komunitarji biex tiġi żviluppata kultura tal-prevenzjoni tar-riskju, bl-appoġġ ta' l-esperjenza lokali, reġjonali u nazzjonali, filwaqt li titqies il-prevenzjoni tar-riskju fil-programmi edukattivi — sa mill-iskola materna u inklużi t-taħriġ bażiku u vokazzjonali — filwaqt li jiġi assigurat li ssir koordinazzjoni mal-politiki fil-qasam tas-saħħa pubblika. |
1.12 |
Il-kultura tas-saħħa u s-sigurtà fuq il-post tax-xogħol u l-korpi tas-saħħa u s-sigurtà u l-persuni inkarigati mis-saħħa u s-sigurtà fuq il-post tax-xogħol huma kruċjali biex il-miżuri ta' prevenzjoni jirnexxu. Huwa importanti li jiġi assigurat li t-taħriġ dwar is-saħħa u s-sigurtà fuq il-post tax-xogħol ikun aġġornat. Il-gruppi li l-aktar li għandhom ikunu kkonċernati huma s-superjuri u l-persunal inkarigat mis-saħħa u s-sigurtà. Dawn għandhom jirċievu taħriġ adegwat, għandu jingħatalhom biżżejjed ħin biex iħaddmu r-responsabilitajiet tagħhom fil-qasam tas-saħħa u s-sigurtà u jingħataw l-opportunità biex jinfluwenzaw, fost oħrajn, l-iżvilupp tal-proċessi tax-xogħol. F'dan ir-rigward, l-imsieħba soċjali għandhom rwol ewlieni x'jaqdu biex jilħqu ftehimiet u jwettquhom fil-prattika fuq il-post tax-xogħol. |
1.13 |
L-SMEs, li jimpjegaw aktar minn 80 % tal-ħaddiema, għandhom żvantaġġ sproporzjonat fir-rigward tar-riżorsi u l-possibbiltajiet finanzjarji. Dawn l-intrapriżi huma vulnerabbli ħafna u għandhom bżonn ta' appoġġ speċifiku, bil-kondizzjoni li jimpenjaw ruħhom sabiex jirrispettaw id-djalogu soċjali u l-ftehim soċjali dwar is-saħħa u s-sigurtà fuq il-post tax-xogħol. |
1.14 |
L-organizzazzjoni ġdida tax-xogħol, il-bidliet rapidi li jseħħu u t-teknoloġiji ġodda jġibu magħhom riskji ġodda, li jeħtieġu reazzjoni fil-livell Komunitarju. Skond il-Kumitat Xjentifiku dwar il-Limiti ta' Espożizzjoni Okkupazzjonali għas-Sustanzi Kimiċi, għandhom jiġu adottati limiti ta' espożizzjoni bbażati fuq kriterji marbuta mas-saħħa. Il-Kumitat jilqa' b'sodisfazzjon il-fatt li l-imsieħba soċjali ikkontribwixxew b'mod essenzjali għat-titjib tas-saħħa mentali tal-ħaddiema, permezz tal-ftehimiet tagħhom dwar it-tensjoni, il-vjolenza u l-fastidju fuq il-post tax-xogħol; dawn il-ftehimiet għandhom jiġu implimentati fil-livell nazzjonali. |
1.15 |
Ir-responsabbiltà soċjali korporattiva, bħala metodu ta' min ifaħħarha, iżda m'għandhiex tieħu post ir-regoli legali attwali u futuri. |
1.16 |
Il-problemi li ġew immirati mill-politiki Komunitarji ma jistgħux jissolvew fit-territorju ta' l-UE biss, partikularment fid-dawl tal-globalizzazzjoni. Biex l-objettivi ta' l-UE jintlaħqu fil-livell internazzjonali, hemm bżonn ta' globalizzazzjoni li tkun ġusta u xogħol deċenti għall-impjegati. L-istituzzjonijiet ta' l-UE għandhom jinkoraġġixxu lill-Istati Membri jirratifikaw il-konvenzjonijiet ta' l-ILO (l-Organizzazzjoni Dinjija tax-Xogħol). |
2. Kummenti ġenerali
2.1 |
Fil-kuntest ta' l-istrateġija ta' Lisbona, l-Istati Membri rrikonoxxew il-kontribut siewi li għamlu l-politiki marbuta mas-saħħa u s-sigurtà fuq il-post tax-xogħol għat-tkabbir ekonomiku u l-impjiegi (2). It-titjib tas-saħħa u s-sigurtà fuq il-post tax-xogħol jagħmel parti mill-mudell soċjali Ewropew. Il-passat kien ikkaratterizzat mill-ħtieġa li tintradd lura l-fiduċja liċ-ċittadini Ewropej (3). |
2.2 |
Politika soċjali li tkun ambizzjuża u sensittiva mhux biss għandha tikkontribwixxi għal produttività u kompetittività akbar iżda għandha tippromovi wkoll il-koeżjoni soċjali, u b'hekk tassigura armonija soċjali u stabbiltà politika, li mingħajrhom ma jistax ikun hemm żvilupp sostenibbli. Fi kliem ieħor, il-politika soċjali hija fattur li jinfluwenza l-produttività (4) Għaldaqstant, is-saħħa u s-sigurtà fuq il-post tax-xogħol m'humiex l-iskopijiet aħħarija fihom infushom; fuq perijodu fit-tul, l-infiq b'rabta mal-qasam tas-saħħa u s-sigurtà mhux biss se jiġi rkuprat iżda jista' jkollu impatt definittivamentpożittiv fuq il-prestazzjoni ekonomika. |
2.3 |
Il-kondizzjonijiet tax-xogħol huma partikularment importanti għas-saħħa, meta nqisu li l-adulti jqattgħu terz minn ħajjithom fuq il-post tax-xogħol. Ambjent tax-xogħol perikoluż u ta' ħsara għas-saħħa jfisser bejn 3 u 5 % tal-PGD. Il-prevenzjoni, l-infiq pubbliku b'rabta mas-saħħa u l-infiq b'rabta mas-saħħa fuq il-post tax-xogħol ghandhom jiġu kkunsidrati bħala investiment. Fid-dawl tat-tibdil demografiku għandu jitqies l-iżvilupp sostenibbli (5), għax l-Ewropa teħtieġ aktar investiment u aktar impjiegi li jiggarantixxu s-saħħa ta' l-individwu. |
2.4 |
Il-qafas globali b'rabta mas-saħħa u s-sigurtà fuq il-post tax-xogħol għandu jibqa' jiġi żviluppat u implimentat korrettament fl-UE kollha, b'tali mod li jiġu inklużi wkoll il-gruppi vulnerabbli li għad m'humiex koperti b'mod adegwat, li jiltaqgħu ma' għadd ta' diffikultajiet biex iħaddmu d-drittijiet tagħhom fil-qasam tas-sigurtà fuq il-post tax-xogħol, li jinkludu, b'mod partikulari, lil dawk b'impjieg prekarju u li jaħdmu f'ambjent espost għal-periklu jew dawk li qegħdin f'riskju li jitilfu l-impjieg biex min jimpjegahom jakkwista vantaġġ kompetittiv għal perijodu qasir. |
2.5 |
Il-promozzjoni tas-saħħa u s-sigurtà fuq il-post tax-xogħol u l-garanzija kontinwa tagħhom hija waħda mill-kondizzjonijiet għall-preservazzjoni u l-ħarsien ta' saħħet l-impjegati. Dan huwa l-aktar approċċ effikaċi mil-lat kost-effettiv. Wieħed mill-istrumenti ewlenin f'dan il-qasam huwa l-prevenzjoni, li huwa l-approċċ li joffri l-aħjar redditu fuq l-investiment, kif ukoll l-approċċ l-aktar effikaċi f'termini ta' profittabilità. Il-preżenza ta' strateġija ta' prevenzjoni u standards adegwati ta' protezzjoni fil-postijiet tax-xogħol kollha tippermetti lis-sistemi ewlenin tal-kura tas-saħħa u dawk soċjali li jammortizzaw l-ispejjeż u li jiffrankaw ammonti ta' flus sostanzjali, u jagħtu kontribut siewi wkoll fir-rigward tal-primjums imħallsa mill-intrapriżi għall-assigurazzjoni kontra l-aċċidenti jew spejjeż oħra marbuta b'mod dirett jew indirett ma' l-effetti ta' l-aċċidenti fuq il-post tax-xogħol. Il-kwalità tas-servizzi preventivi, it-taħriġ dwar is-saħħa u s-sigurtà tal-ħaddiema, it-titjib tal-kwalità u l-effikaċja ta' l-istandards ta' sigurtà, it-twettiq ta' spezzjonijiet professjonali u kontinwi u l-kooperazzjoni ma' l-imsieħba soċjali huma elementi essenzjali u interdipendenti għall-ħolqien ta' ambjent li jiggarantixxi s-saħħa u s-sigurtà fuq il-post tax-xogħol. |
2.6 |
Il-programm PROGRESS jistqarr li l-objettiv ewlieni tal-politika soċjali Ewropea huwa t-titjib kontinwu tal-kondizzjonijiet tax-xogħol, li jingħata widen lill-ħaddiema u r-rappreżentanti tagħhom u li jiġu involuti fit-teħid tad-deċiżjonijiet. Dan it-tip ta' djalogu fil-livell Komunitarju fis-setturi kollha għandu jiggarantixxi drittijiet ugwali fl-Istati Membri kollha. Il-ftehim kollu li ntlaħaq b'rabta mad-djalogu soċjali (per eżempju dwar it-teleworking, il-ġlieda kontra l-vjolenza fil-post tax-xogħol u t-tensjoni fuq il-post tax-xogħol) għandu jkun ikkonsolidat u segwit minn miżuri effettivi, hu x'inhu t-tip ta' xogħol jew il-forma ta' l-impjieg. Fil-każ ta' l-impjegati fis-settur pubbliku, minkejja l-preżenza tad-djalogu soċjali, l-inugwaljanza hija mxerrda ħafna, mhux biss fil-leġislazzjoni iżda wkoll fil-prattika. Wieħed mill-aspetti istituzzjonali speċifiċi tad-djalogu soċjali huwa x-xogħol li jwettaq ir-rappreżentant permanenti tal-ħaddiema marbut mas-sorveljanza u l-ġestjoni sistematiċi tar-riskji marbuta mas-saħħa u s-sigurtà fuq il-post tax-xogħol. |
2.7 |
Il-KESE jirrakkomanda li l-Istati Membri jieħdu miżuri serji dwar il-penalizzazzjoni tal-ksur tar-regoli u li janalizzaw l-infiq li jsir b'rabta mas-saħħa u s-sigurtà fuq il-post tax-xogħol, meta wieħed iqis li l-konsegwenzi ta' l-aċċidenti u l-mard fuq il-post tax-xogħol huma ta' piż għas-soċjetà kollha u li jaffettwaw ukoll il-produttività u, għaldaqstant, il-kompetittività. |
2.8 |
Minkejja li, ġeneralment, kien hemm titjib fis-saħħa u s-sigurtà fuq il-post tax-xogħol f'dawn l-aħħar snin, kemm fin-numru, kif ukoll fil-gravità ta' l-aċċidenti u l-mard fuq il-post tax-xogħol, ir-riskji marbuta max-xogħol ma tnaqqsux b'mod uniformi. Fil-każ ta' ċerti setturi, ċerti kategoriji ta' ħaddiema u ċerti tipi ta' intrapriżi s-sitwazzjoni għadha preokkupanti, u ċ-ċifri huma ħafna aktar mill-medja (6). Il-valutazzjoni tindika li l-programmi nazzjonali ma jqisux ċerti gruppi vulnerabbli, per eżempju l-ħaddiema indipendenti “foloz”. Jinħtieġ li dan jinbidel. |
2.9 |
Għalkemm l-istrateġija preċedenti wasslet biex tinħoloq kultura tal-prevenzjoni, din m'hijiex daqshekk imxerrda. L-SMEs b'mod partikulari għandhom jibbenefikaw aktar minn appoġġ finanzjarju regolari, bil-kondizzjoni li jimpenjaw ruħhom li jirrispettaw il-ftehim soċjali dwar is-saħħa u s-sigurtà fuq il-post tax-xogħol. |
2.10 |
Fir-rigward ta' l-ispezzjonijiet, il-KESE jitlob li jiġi enfasizzat li l-intrapriżi wkoll għandhom l-obbligu li jwettqu kontrolli interni minn rajhom. |
2.11 |
Biex il-politika u l-leġislazzjoni Komunitarji jiġu implimentati fil-livell nazzjonali u biex ikunu effettivi, jinħtieġ li l-applikazzjoni u s-sorveljanza tagħhom ikunu assigurati. Il-KESE jilqa' b'sodisfazzjon il-fatt li l-Istati Membri jipproduċu rapporti regolari dwar l-implimentazzjoni tad-direttivi. |
2.12 |
Il-KESE jappoġġja l-proposta tal-Kummissjoni Ewropea dwar l-istatistika Komunitarja tas-saħħa pubblika u s-saħħa u s-sigurtà fuq ix-xogħol (COM(2007) 46 finali), u jerġa' jisħaq fuq l-importanza ta' definizzjonijiet u sistemi ta' rikonoxxenza komuni (7). Għandu jkun hemm leġislazzjoni uniformi biex tkun tista' tinġabar data adattata u differenzjata sabiex ikunu jistgħu jinħolqu standards u koeffiċjenti. |
3. Kummenti speċifiċi
3.1 |
Il-komunikazzjoni tal-Kummissjoni stabbilixxiet li l-objettiv għall-perijodu 2007-2012 huwa t-titjib tal-kwalità tax-xogħol u l-produttività għandu jkun il-bażi ta' l-istrateġija Komunitarja dwar is-saħħa u s-sigurtà fuq il-post tax-xogħol — li hija msejsa fuq l-istrateġija Komunitarja għall-perijodu 2002-2006 li hija bbażata fuq id-direttiva qafas 89/391/KEE. |
3.2 |
Tħejja rapport ta' evalwazzjoni dwar l-implimentazzjoni u l-impatt ta' l-objettivi stabbiliti mill-istrateġija għall-perijodu 2002-2006 (8). Matul dan il-perijodu, ingħaqdu 10 Stati Membri ġodda fl-UE. Fin-nuqqas ta' kwalunkwe statistika u informazzjoni, is-sitwazzjoni fl-għaxar Stati Membri l-ġodda ma kenitx inkluża f'din l-evalwazzjoni, u barraminhekk l-istrateġija l-ġdida tħejjiet fuq il-bażi taċ-ċifri ta' l-1999. Għalhekk il-KESE huwa ferm diżappuntat li, għalkemm l-Istati Membri l-ġodda waslu nofs triq ta' l-istrateġija, il-Kummissjoni ma ħatfitx l-opportunità biex tħejji programm kontinwu (rolling basis) u tadatta l-istrateġija b'mod adegwat. |
3.3 |
Hija ħaġa pożittiva li l-istrateġija Komunitarja stabbilixxiet objettiv li l-aċċidenti jitnaqqsu b'25 %; biex dan iseħħ, jinħtieġ pjan ta' azzjoni speċifiku b'objettivi miżurabbli, indikaturi u b'mekkaniżmi ta' rappurtaġġ kredibbli u komparattivi, kif ukoll mekkaniżmi ta' sorveljanza. Għandhom jitqiesu wkoll il-kawżi interni li jipprovokaw l-aċċidenti fuq il-post tax-xogħol, bħal per eżempju x-xogħol taħt pressjoni u xogħol li jkollu jitlesta f'qasir żmien, u l-kawżi esterni minħabba negliġenza, fejn din stess tista tkun ikkaġunata minn tensjoni fil-ħajja privata. Minbarra l-aċċidenti fuq il-post tax-xogħol, huwa importanti wkoll li jiġu indirizzati l-każijiet ta' mard marbut max-xogħol, li huma ferm akbar fin-numru. L-ewwel pass lejn il-prevenzjoni għandu jkun li l-mard marbut max-xogħol jiġi rikonoxxut u li l-kunċett ta' dan it-tip ta' mard jiġi estiż. Jekk il-kawżi tad-diversi każijiet ta' mard ikunu magħrufa f'waqthom, ikun possibbli li jittieħdu l-miżuri neċessarji biex jiġu eliminati. Għalhekk, in-numru tal-persuni impjegati f'ambjent tax-xogħol perikoluż m'għandux jeċċedi ċifra speċifika, li tkun stabbilita minn qabel, għaliex dan għandu impatt deċiżiv fuq in-numru tal-każijiet ta' mard marbut max-xogħol fil-ġejjieni; dan in-numru għandu jiġi kwantifikat ukoll. |
3.4 Leġislazzjoni u sorveljanza
3.4.1 |
Il-KESE jisħaq fuq il-bżonn ta' strateġija bilanċjata fil-qasam tas-saħħa u s-sigurtà, li tinkorpora miżuri leġislattivi u mhux leġislattivi, skond liema jkunu l-aktar effettivi mil-lat ta' l-implimentazzjoni. Din l-istrateġija tkun partikularment utli biex tixħet dawl fuq il-kondizzjonijiet tax-xogħol li nbidlu. L-impatt ta' dawn il-bidliet fuq is-saħħa u s-sigurtà għandu jiġi kkunsidrat b'mod regolari. Tajjeb jiġi analizzat jekk ikunx għaqli li jiġu żviluppati miżuri adattati, fuq il-bażi tar-riċerka, bħala reazzjoni għat-tibdil esponenzjali u mifrux tal-kondizzjonijiet tax-xogħol, u b'mod partikulari l-fatt li x-xogħol irid isir aktar malajr u huwa aktar intensiv. Il-KESE jixtieq jiġbed l-attenzjoni fuq il-fatt li l-ħaddiema kollha għandhom l-istess drittijiet u li dawn id-drittijiet għandhom jiġu rispettati fil-livell ta' l-UE u anke ta' l-Istati Membri. |
3.4.2 |
Waqt li l-istrateġija l-ġdida tkun qed tiġi implimentata, iż-żgħażagħ, il-ħaddiema migranti, in-nisa, il-ħaddiema anzjani u l-persuni b'diżabilità jeħtieġu regolamentazzjoni u politika ta' appoġġ speċifiċi, peress li dawn huma l-gruppi li l-aktar li huma esposti għar-riskji, l-aċċidenti fuq il-post tax-xogħol u l-mard marbut max-xogħol. In-nuqqas ta' taħriġ, taħriġ mill-ġdid u informazzjoni, in-nuqqas ta' tagħrif u ta' linji ta' gwida għall-impjegati l-ġodda kif ukoll in-nuqqas ta' kompetenzi lingwistiċi adegwati kollha jikkostitwixxu riskji. Fil-każ tal-ħaddiema migranti, il-kompetenzi lingwistiċi huma fattur importanti għall-prevenzjoni u l-informazzjoni, u jinħtieġ li t-trattament ugwali jiġi assigurat. |
3.4.3 |
Il-koordinazzjoni u s-sorveljanza tad-direttivi jesiġu fondi u persunal adegwati. Iżda minkejja t-tkabbir ta' l-2004, huwa ppjanat li jitnaqqas il-persunal tal-Kumitat ta' Livell Għoli għall-Eżaminar tax-Xogħol (SLIC). Il-persunal m'għandux jitnaqqas; l-istess jgħodd għan-numru tar-rappreżentanti fi ħdan il-kumitat. Barraminhekk, 26 persuna biss jaħdmu fi ħdan l-awtorità tal-Kummissjoni Ewropea, u 4 -5 minnhom huma inkarigati mill-implimentazzjoni tal-leġislazzjoni. Din is-sitwazzjoni diġà kienet kritikata f'opinjoni tal-KESE, fl-2002, meta kien hemm 15-il Stat Membru, filwaqt li bħalissa hemm 27. Huwa assolutament neċessarju li dan il-qasam jiġi żviluppat. Lanqas m'għandu jitħalla jkun hemm tnaqqis fin-numru ta' spetturi fil-livell ta' l-Istati Membri. |
3.4.4 |
L-objettiv ewlieni għandu jkun ir-rispett għal-leġislazzjoni u l-protezzjoni tal-ħaddiema. L-ispezzjonijiet mill-awtoritajiet kompetenti għandhom jiżdiedu, kemm fir-rigward ta' l-obbligi ta' min iħaddem fil-qasam tas-saħħa u s-sigurtà, kif ukoll fir-rigward ta' dawk ta' l-impjegati. Barraminhekk jinħtieġ li, permezz tat-tagħlim, it-taħriġ u qafas regolatorju aktar aċċessibbli, il-kultura tas-saħħa u s-sigurtà fuq il-post tax-xogħol tkun aktar imxerrda. |
3.4.5 |
L-ispettorati nazzjonali tax-xogħol jistgħu jaqdu rwol pożittiv mhux biss billi jissorveljaw ir-regoli tas-sigurtà fuq il-post tax-xogħol iżda billi jagħtu pariri u jipprovdu servizz ta' konsulenza lill-impjegati. Jinħtieġu fondi adegwati biex jiġi assigurat li l-ispettorati nazzjonali tax-xogħol ikunu indipendenti u effettivi. |
3.4.6 |
Fl-2002, il-Kumitat ta' Livell Għoli għall-Eżaminar tax-Xogħol (SLIC) diġà kien iddeċieda li jtejjeb l-effikaċja ta' l-ispezzjonijiet fuq il-post tax-xogħol, minħabba li wieħed mill-istrumenti ewlenin huwa l-iżvilupp ta' indikaturi li jippermettu l-evalwazzjoni tal-kwalità ta' l-ispezzjonijiet. Il-KESE appoġġja din id-deċiżjoni f'opinjoni preċedenti (9). Il-KESE jaqbel mal-konklużjonijiet tas-SLIC u jappoġġja l-proposti tiegħu, u għalhekk jiddispjaċih li dawn tħallew barra mill-istrateġija. |
3.5 Implimentazzjoni u strateġiji nazzjonali
3.5.1 |
Id-djalogu soċjali dwar is-saħħa u s-sigurtà fuq il-post tax-xogħol għandu jitħeġġeġ; miżuri fil-livell Ewropew żviluppati mill-imsieħba soċjali huma meħtieġa wkoll. Il-pajjiżi kandidati għandhom jirċievu appoġġ — inkluż appoġġ finanzjarju — permezz tal-fondi soċjali ta' l-UE, u ta' relazzjonijiet imsejsa fuq il-ġemellaġġ bejn l-Istati Membri l-ġodda u l-antiki. Fil-każ tal-pajjiżi kandidati jew tal-pajjiżi kandidati potenzjali, it-traspożizzjoni tal-leġislazzjoni u t-tisħiħ ta' l-ispezzjonijiet fuq il-post tax-xogħol diġà bdew. |
3.5.2 |
It-tobba u l-professjonisti fil-qasam tas-saħħa huma konxji mill-identifikazzjoni tal-fenomeni kkaġunati mill-kondizzjonijiet tax-xogħol, imma għandna nikkunsidraw l-ispejjeż fil-qasam tas-saħħa li ġeneralment ikunu kbar ħafna. L-ispejjeż marbuta mal-prevenzjoni tal-mard m'għandhomx jerfgħuhom l-impjegati għax inkella ħafna minnhom jibdew jittraskuraw il-mard tagħhom minħabba raġunijiet finanzjarji; dan jista' jwassal għal spejjeż ta' kura aktar għoljin. Fil-qafas tal-promozzjoni tas-saħħa u s-sigurtà fuq il-post tax-xogħol, uħud minn dawk li jħaddmu jipproponu sensiela sħiħa ta' miżuri li jkunu ħejjew bi sħab mal-ħaddiema tagħhom u li jikkontribwixxu għal stil ta' ħajja li jippromovi saħħet il-ħaddiema, per eżempju programmi ta' screening b'xejn, programmi kontra t-tipjip, l-għoti ta' pariri dwar tip ta' ikel tajjeb għal saħħet il-bniedem, l-isport jew saħansitra l-prevenzjoni tat-tensjoni fuq il-post tax-xogħol (10). Fil-livell tal-post tax-xogħol, il-programmi tas-saħħa pubblika jistgħu jaqdu rwol pożittiv fil-promozzjoni ta' saħħet il-ħaddiema. |
3.5.3 |
L-istrateġija titlob li jittieħdu miżuri sostanzjali bl-għan li l-ħaddiema esklużi mis-suq tax-xogħol minħabba mard jew diżabilità marbuta max-xogħol jiġu riabilitati u integrati mill-ġdid b'mod aħjar. Il-KESE jaqbel ma' l-ideat tal-Kummissjoni, iżda l-politika Komunitarja ma ggarantietx il-kondizzjonijiet finanzjarji neċessarji biex dan iseħħ. |
3.5.4 |
Il-KESE huwa ta' l-istess fehma tal-Kummissjoni Ewropea li, fir-rigward ta' l-integrazzjoni tal-kwistjonijiet marbuta mas-saħħa u s-sigurtà fuq il-post tax-xogħol f'politiki speċifiċi ta' l-UE, għad jonqos ħafna xi jsir, per eżempju, biex jitfasslu miżuri b'kooperazzjoni mas-sistemi tas-saħħa pubblika. |
3.5.5 |
Il-KESE jappoġġja l-ħidma tal-grupp magħmul minn għadd ta' entitajiet organizzativi fi ħdan id-Direttorat Generali għall-Impjiegi, l-Affarijiet Soċjali u l-Opportunitajiet Indaqs (DĠ EMPL), biex jinħolqu sinerġiji u jinkisbu riżultati konkreti. |
3.6 Prevenzjoni, edukazzjoni u taħriġ
3.6.1 |
L-iżvilupp tal-ħarsien tas-saħħa u s-sigurtà fuq il-post tax-xogħol fil-livell ta' l-Istati Membri huwa parti integrali mill-kultura ġenerali tas-saħħa. Huwa wkoll fl-interess ta' l-Istati Membri. Barraminhekk, huwa fl-interess ta' l-impjegati li jipparteċipaw b'mod kontinwu fit-tagħlim u t-taħriġ; dan huwa saħansitra obbligu tagħhom. Sakemm min iħaddem jirrispetta l-obbligu li jinforma lill-impjegati kontinwament u jikkoopera, ikun qiegħed jaqdi rwol ewlieni fit-tiswir u l-iżvilupp tal-kultura nazzjonali. Il-kuntratti kollettivi tax-xogħol jikkostitwixxu wkoll strument essenzjali hawnhekk. |
3.6.2 |
Il-KESE jfakkar lill-Istati Membri u l-imsieħba soċjali fl-importanza tal-prevenzjoni, it-tagħlim u t-taħriġ, u tar-responsabblitajiet tagħhom f'dan il-qasam. Il-kwistjonijiet b'rabta mas-saħħa u s-sigurtà għandhom jiġu inklużi jew promossi fl-iskejjel materni, l-iskejjel primarji, it-taħriġ vokazzjonali, l-edukazzjoni terzjarja u t-tagħlim ta' l-adulti, kif ukoll fil-programmi ta' taħriġ addizzjonali. |
3.6.3 |
L-edukazzjoni, it-taħriġ u t-taħriġ permanenti għandhom iqisu l-ħtiġijiet tad-diversi gruppi. Il-KESE jilqa' bi pjaċir il-fatt li l-istrateġija l-ġdida u l-kunċett tal-prevenzjoni jqisu t-tagħlim tul il-ħajja. |
3.6.4 |
B'mod ġenerali, is-saħħa u s-sigurtà fuq il-post tax-xogħol ma jiġux ikkunsidrati fl-edukazzjoni primarja jew fil-kuntest tat-taħriġ mill-ġdid, u għalhekk il-KESE jilqa' bi pjaċir il-fatt li t-tagħlim tul il-ħajja ġie inkluż fl-istrateġija l-ġdida u fil-kunċett tal-prevenzjoni. |
3.6.5 |
Fil-każ ta' postijiet tax-xogħol partikularment perikolużi, fejn l-aktar li jkun hemm aċċidenti u mard marbut max-xogħol, il-KESE jirrakkomanda li l-istrateġiji nazzjonali jagħtu attenzjoni partikulari lir-riskji ġodda meta jkunu qed jiġu identifikati jew ipprevenuti l-perikli. Ikun utli ħafna wkoll li jinħolqu reġistri b'data settorjali. |
3.6.6 |
Il-Kumitat huwa tal-fehma li l-mard ikkawżat mis-sustanzi karċinoġeniċi fuq il-post tax-xogħol jikkostitwixxi problema serja ħafna. Matul is-sena 2006 biss, ġew iddijanjostikati 2.3 miljun każ ta' kanċer fil-25 Stat Membru ta' l-UE, li jfisser li dawn huma l-kawża prinċipali ta' mwiet bikrija. Huwa stmat li madwar 9,6 % ta' l-imwiet kollha kkawżati mill-kanċer għandhom rabta mal-kondizzjonijiet tax-xogħol (11). |
3.6.7 |
Il-KESE huwa tal-fehma li hemm bżonn li tiġi żviluppata kultura ġenerali tas-saħħa, bl-għan li l-ħaddiema jkunu aktar konxji tal-kwistjonijiet marbuta mas-saħħa. Biex dan iseħħ, jinħtieġ li mhux biss tingħata għajnuna lil min iħaddem, iżda hemm bżonn ukoll li dawn jirċievu appoġġ fil-livell Komunitarju u nazzjonali, u li l-ħaddiema jiġu mgħallma d-drittijiet tagħhom f'dan il-qasam, skond ir-regoli differenti fil-liġi internazzjonali (ILO), Komunitarja (UE) u nazzjonali. |
3.6.8 |
Fil-livell Komunitarju u nazzjonali, jinħtieġ li l-politika ta' prevenzjoni tiġi żviluppata b'mod proattiv u li tingħata r-riżorsi adegwati fir-rigward ta' baġit/sigurtà soċjali. Għal kultura ta' prevenzjoni msaħħa, jinħtieġ li jiġi żviluppat approċċ globali u preventiv. Għandu jiġi assigurat li l-ħaddiema kollha jkollhom aċċess għat-taħriġ ħalli b'hekk il-vulnerabbiltà ta' ċerti gruppi titnaqqas. Fid-dawl tal-fatt li l-forom tax-xogħol jinbidlu, dan l-element huwa partikularment importanti għall-impjegati li, bla ma jaħtu, ma jirċievu l-ebda taħriġ fil-qasam tas-sigurtà tal-ħaddiema, l-ebda eżami mediku fuq il-post tax-xogħol, l-ebda prevenzjoni u l-ebda sorveljanza. |
3.6.9 |
Il-KESE jirrakkomanda li tingħata attenzjoni partikulari lill-impatt tal-mezzi tal-komunikazzjoni tal-massa sabiex il-pubbliku jkun infurmat aħjar dwar il-ħtieġa li r-regoli dwar is-sigurtà u l-protezzjoni tas-saħħa fuq il-post tax-xogħol jiġu rispettati. Għandu jsir użu aktar għaqli mill-kampanji tal-Kummissjoni Ewropea, ta' l-Aġenzija Ewropea għas-Sigurtà u s-Saħħa fuq il-Post tax-Xogħol, ta' l-ILO u t-trejdunjins (per eżempju l-jum internazzjonali biex jiġu kkommemorati l-ħaddiema mejtin jew imweġġa', eċċ. (International Commemoration Day for Dead and Injured Workers)). |
3.7 Riskji ġodda
3.7.1 |
Il-KESE jissuġġerixxi li jiġu użati metodi xjentifiċi fl-evalwazzjoni tar-riskji ġodda marbuta max-xogħol, bħat-tensjoni fuq il-post tax-xogħol jew kondizzjonijiet ġodda ibsin ħafna. L-impatt psikosoċjali u fiżiku ta' l-oqsma u l-kondizzjonijiet ġodda tax-xogħol fuq il-ħaddiema għandhom jiġu analizzati permezz ta' metodi xjentifiċi u, għaldaqstant, għandhom jitfasslu indikaturi/indiċi ġodda. |
3.7.2 |
Il-KESE huwa ta' l-istess fehma tal-Kummissjoni — l-impjegati huma mistennija jkollhom imġiba li tixhed li huma aktar konxji ta' saħħithom. Madankollu, dan ma jistax jiġri fin-nuqqas tal-kondizzjonijiet neċessarji. Il-kuntratti prekarji jew għal tul ta' żmien fiss, il-ħin verament imqatta' fuq il-post tax-xogħol u t-tensjoni kontinwa minħabba l-biża' li jintilef l-impjieg, in-nuqqas ta' għarfien u ta' informazzjoni dwar id-drittijiet tal-ħaddiema u s-sitwazzjoni żvantaġġuża tal-ħaddiema migranti meta jużaw is-servizzi tal-kura tas-saħħa huma fost il-problemi li jxekklu l-atteġġjamenti tajbin. |
3.7.3 |
Fil-kuntest ta' l-istrateġija li fasslet għall-benesseri fuq il-post tax-xogħol, l-UE għadha ma wettqitx il-kompiti mistennija minnha biex toħloq post tax-xogħol mingħajr tensjoni u mingħajr konsegwenzi negattivi għas-saħħa mentali, bħad-dipressjoni. Il-KESE huwa diżappuntat minħabba dan u jitlob lill-Kummissjoni Ewropea tħejji rakkomandazzjonijiet konkreti. |
3.8 Il-ħarsien tas-saħħa fil-livell internazzjonali
3.8.1 |
L-UE m'hijiex responsabbli biss għall-kondizzjonijiet tax-xogħol taċ-ċittadini tagħha, iżda wkoll għall-kondizzjonijiet tax-xogħol taċ-ċittadini li jgħixu barra l-fruntieri tagħha. Kif stqarret l-istrateġija preċedenti, ir-rispett tad-drittijiet fundamentali tax-xogħol għandu jitqies fl-kummerċ estern u fil-politika ta' żvilupp, anke jekk, f'dawn l-oqsma, jista' jkun hemm ċerti kunflitti mal-prinċipju tal-libertà tas-suq (12). |
3.8.2 |
Fil-qasam tal-politika internazzjonali, l-adozzjoni tar-regolamenti/rakkomandazzjonijiet ta' l-ILO għandi tkun inkuraġġuta, l-istess bħalma għandhom jiġu inkuraġġuti l-kisbiet ta' l-UE, bħar-REACH. Għandhom jiġu żviluppati politiki u leġislazzjoni dwar it-tnaqqis tal-periklu u l-mard ikkawżat mill-asbestos, mis-sustanzi karċinoġeniċi u s-silikon. |
3.8.3 |
Fil-qadi ta' l-Istat jew tas-servizzi pubbliċi, l-Istati Membri għandhom jagħtu eżempju billi jipprivileġġaw l-intrapriżi li jirrispettaw id-dispożizzjonijiet dwar is-saħħa u s-sigurtà fuq il-post tax-xogħol għall-benefiċċju tal-ħaddiema (kif kien rakkomandat fl-istrateġija għall-perijodu 2002-2006 dwar is-saħħa u s-sigurtà fuq il-post tax-xogħol). |
3.8.4 |
L-Istati Membri ta' l-UE kollha għandhom jintalbu jirratifikaw il-konvenzjonijiet attwali ta' l-ILO. |
Brussell, id-29 ta' Mejju 2008.
Il-President
tal-Kumitat Ekonomiku u Soċjali Ewropew
Dimitris DIMITRIADIS
(1) Hemm bżonn ta' mill-inqas spettur wieħed għal kull 10 000 impjegat (f'ħafna Stati Membri ta' l-UE, il-proporzjon huwa inqas).
(2) Ara l-opinjoni tal-KESE tas-26.9.2007 dwar “Il-promozzjoni tal-produttività sostenibbli fuq il-post tax-xogħol fl-Ewropa”, rapporteur: is-Sinjura Kurki (ĠU C 10, 15.1.2008). http://eur-lex.europa.eu/LexUriServ/LexUriServ.do?uri=OJ:C:2008:010:0072:0079:MT:PDF
(3) Ara COM(2005) 33 finali u l-Konklużjonijiet tal-Kunsill Ewropew ta' Marzu 2007, http://www.consilium.europa.eu/ueDocs/cms_Data/docs/pressData/MT/ec/93148.pdf
(4) Kif stqarret Anne-Marie Sigmund f'“Il-Mudell Soċjali Ewropew”, 26-27 ta' Ġunju 2006, konferenza konġunta tal-KESE u l-ILO.
(5) Ara ILO: Demographic change — Facts, Scenarios and Policy Responses (Tibdil demografiku — fatti, xenarji u reazzjonijiet politiċi) (April 2008) (mhux disponibbli bil-Malti).
(6) Fis-settur tal-bini, ir-rata ta' l-aċċidenti hija darbtejn akbar mill-medja. Iċ-ċifri fis-settur tas-servizzi kull ma jmur għandhom it-tendenza li jogħlew, u din is-sitwazzjoni teħtieġ analiżi aktar bir-reqqa; l-għadd ta' inċidenti fis-setturi tal-kura tas-saħħa u l-edukazzjoni qed jikber ukoll. Dawn l-aċċidenti huma prinċipalment relatati mal-vjolenza, tensjoni u problemi muskolo-skeletali.
(7) Ara l-opinjoni tal-KESE tal-25.10.2007 dwar “Il-proposta għal Regolament tal-Parlament Ewropew u tal-Kunsil dwar l-istatistika Komunitarja tas-saħħa pubblika u s-saħħa u s-sigurtà fuq ix-xogħol”, rapporteur: is-Sur Retureau (ĠU C 44, 16.2.2008). http://eur-lex.europa.eu/LexUriServ/LexUriServ.do?uri=OJ:C:2008:044:0103:0105:MT:PDF
(8) SEC(2007) 214.
(9) Ara l-opinjoni tal-KESE tas-17.7.2002 dwar “Il-Komunikazzjoni mill-Kummissjoni — Nadattaw għat-tibdil fix-xogħol u s-soċjetà: strateġija Komunitarja ġdida dwar is-saħħa u s-sigurtà fuq il-post tax-xogħol (2002-2006)”, rapporteur: is-Sur Etty (ĠU C 241, 7.10.2002) (mhux disponibbli bil-Malti). http://eur-lex.europa.eu/LexUriServ/LexUriServ.do?uri=OJ:C:2002:241:0100:0103:EN:PDF .
(10) Link għan-netwerk Ewropew għas-saħħa fuq il-post tax-xogħol: http://www.enwhp.org/index.php?id=4.
(11) Studju ta' Hämäläinen P., Takala J. għall-ILO.
http://osha.europa.eu/OSH_world_day/occupational_cancer/view?searchterm=occupational %20cancer
(12) Ara Dr. Jukka Takala, PE 390.606v01-00.
APPENDIĊI
għall-opinjoni tal-Kumitat Ekonomiku u Soċjali Ewropew
L-emendi li jidhru hawn taħt ġew rifjutati, għalkemm ġabu mill-inqas kwart tal-voti mixħuta:
Punt 2.4
“Diġà nħoloq Il-qafas globali b'rabta mas-saħħa u s-sigurtà fuq il-post tax-xogħol li għandu jibqa' jiġi żviluppat u implimentat applikat u ssorveljat korrettament fl-UE kollha, . Dan jirrigwarda b'mod partikulari b'tali mod li jiġ u inklużi wkoll il lil-gruppi vulnerabbli li għad m'humiex koperti b'mod adegwat, li jiltaqgħu ma' għadd ta' diffikultajiet biex iħaddmu d-drittijiet tagħhom fil-qasam tas-sigurtà fuq il-post tax-xogħol, li jinkludu, b'mod partikulari, lil dawk b'impjieg prekarju u lil dawk li jaħdmu f'ambjent espost għall-periklu jew dawk li qegħdin f'riskju li jitilfu l-impjieg biex min jimpjegahom jakkwista vantaġġ kompetittiv għal perijodu qasir.”
Raġuni
Evidenti.
Riżultat
Favur: 41 Kontra: 45 Astensjonijiet: 10
Punt 3.3
“Hija ħaġa pożittiva li l-istrateġija Komunitarja stabbilixxiet objettiv li l-aċċidenti jitnaqqsu b'25 %; biex dan iseħħ, jenħtieġ pjan ta' azzjoni speċifiku b'objettivi miżurabbli, indikaturi u b'mekkaniżmi ta' rappurtaġġ kredibbli u komparattivi, kif ukoll mekkaniżmi ta' sorveljanza. Għandhom jitqiesu wkoll il-kawżi interni li jipprovokaw l-aċċidenti fuq il-post tax-xogħol, bħal per eżempju x-xogħol taħt pressjoni u xogħol li jkollu jitlesta f'qasir żmien, u l-kawżi esterni minħabba negliġenza, fejn din stess tista tkun ikkaġunata minn tensjoni fil-ħajja privata. Minbarra l-aċċidenti fuq il-post tax-xogħol, huwa importanti wkoll li jiġu indirizzati l-każijiet ta' mard marbut max-xogħol, li huma ferm akbar fin-numru. L-ewwel pass lejn il-prevenzjoni għandu jkun li l-mard marbut max-xogħol jiġi rikonoxxut u li l-kunċett ta'” mard professjonali “jiġ i estiż. Jekk il-kawżi tad-diversi każijiet ta' mard ikunu magħrufa f'waqthom, ikun possibbli li jittieħdu l-miżuri neċessarji biex jiġu eliminati. Għalhekk, in-numru tal-persuni impjegati f'ambjent tax-xogħol perikoluż m'għandux jeċċedi ċifra speċifika, li tkun stabbilita minn qabel, għaliex dan għandu impatt deċiżiv fuq in-numru tal-każijiet ta' mard marbut max-xogħol fil-ġejjieni; dan in-numru għandu jiġi kwantifikat ukoll.”
Raġuni
Evidenti.
Riżultat
Favur: 46 Kontra: 48 Astensjonijiet: 12