(1)

Il-Ftehim ta’ Stabilizzazzjoni u Assoċjazzjoni bejn il-Komunitajiet Ewropej u l-Istati Membri tagħhom, minn naħa waħda, u l-Bożnija-Ħerzegovina, min-naħa l-oħra (“il-Ftehim”) ġie konkluż mill-Unjoni permezz tad-Deċiżjoni tal-Kunsill u tal-Kummissjoni (UE, Euratom) 2015/998 (1) u daħal fis-seħħ fl-1 ta’ Ġunju 2015.

(2)

Skont l-Artikolu 117 tal-Ftehim, il-Kunsill ta’ Stabbilizzazzjoni u ta’ Assoċjazzjoni, stabbilit skont l-Artikolu 115 tal-Ftehim (il-“Kunsill ta’ Stabbilizzazzjoni u ta’ Assoċjazzjoni”) jista’ jieħu deċiżjonijiet fil-kamp ta’ applikazzjoni tal-Ftehim. Skont l-Artikolu 4 tal-Protokoll 2 tal-Ftehim, il-Kunsill ta’ Stabbilizzazzjoni u ta’ Assoċjazzjoni jista’ jiddeċiedi li jemenda d-dispożizzjonijiet ta’ dak il-Protokoll.

(3)

Fil-laqgħa tiegħu li jmiss, il-Kunsill ta’ Stabbilizzazzjoni u ta’ Assoċjazzjoni għandu jieħu deċiżjoni dwar emenda tal-Protokoll 2 tal-Ftehim.

(4)

Jixraq li tiġi stabbilita l-pożizzjoni li għandha tiġi adottata f’isem l-Unjoni fi ħdan il-Kunsill ta’ Stabbilizzazzjoni u ta’ Assoċjazzjoni, peress li d-deċiżjoni tal-Kunsill ta’ Stabbilizzazzjoni u ta’ Assoċjazzjoni ser ikollha effetti legali.

(5)

Il-Konvenzjoni Reġjonali dwar ir-regoli preferenzjali tal-oriġini pan-Ewro-Mediterranji (“il-Konvenzjoni”) ġiet konkluża mill-Unjoni bid-Deċiżjoni tal-Kunsill 2013/94/UE (2) u daħlet fis-seħħ fir-rigward tal-Unjoni fl-1 ta’ Mejju 2012. Permezz tad-Deċiżjoni (UE) 2019/2198 (3), il-Kunsill appoġġa l-emenda tal-Konvenzjoni li tipprevedi sett ġdid ta’ regoli tal-oriġini modernizzati u aktar flessibbli (l-“emenda tal-Konvenzjoni”). L-emenda tal-Konvenzjoni ser tidħol fis-seħħ fl-1 ta’ Jannar 2025.

(6)

Fil-laqgħa teknika li saret fi Brussell fil-5 ta’ Frar 2020, il-maġġoranza tal-Partijiet Kontraenti għall-Konvenzjoni qablu li jimplimentaw sett alternattiv ta’ regoli tal-oriġini, abbażi tal-emenda tal-Konvenzjoni fuq bażi tranżitorja u bilaterali (ir-“Regoli tranżitorji”). Ir-Regoli tranżitorji japplikaw b’mod parallel mar-regoli tal-Konvenzjoni, sakemm tidħol fis-seħħ l-emenda tal-Konvenzjoni.

(7)

L-applikazzjoni tar-Regoli tranżitorji tiżgura l-adattament tal-flussi kummerċjali u l-prattiki doganali sakemm tidħol fis-seħħ l-emenda tal-Konvenzjoni.

(8)

Mill-1 ta’ Settembru 2021, daħal fis-seħħ għadd ta’ protokolli bilaterali dwar ir-regoli tal-oriġini fost diversi Partijiet Kontraenti għall-Konvenzjoni (4) li jagħmlu applikabbli r-Regoli tranżitorji. Fir-rigward tal-Bożnija-Ħerzegovina, il-Protokoll 2 tal-Ftehim ġie sostitwit minn Protokoll 2 ġdid bid-Deċiżjoni Nru 1/2023 tal-Kunsill ta’ Stabbilizzazzjoni u ta’ Assoċjazzjoni UE-Bożnija-Ħerzegovina (5). Ir-Regoli tranżitorji huma stabbiliti fl-Appendiċi A ta’ dak il-Protokoll 2 ġdid.

(9)

L-objettiv tar-Regoli tranżitorji huwa li jipprevedu regoli inqas stretti, li jagħmluha aktar faċli għall-oġġetti biex tikkwalifika għal status oriġinarju preferenzjali.. Peress li r-Regoli tranżitorji huma, b’mod ġenerali, inqas strettiminn dawk tal-Konvenzjoni, l-oġġetti li jissodisfaw ir-regoli tal-oriġini stabbiliti fil-Konvenzjoni jistgħu jikkwalifikaw ukoll bħala li joriġinaw skont ir-Regoli tranżitorji, bl-eċċezzjoni ta’ ċerti prodotti agrikoli kklassifikati fil-Kapitoli 2, 4 sa 15 u 16 (ħlief għall-prodotti tas-sajd ipproċessati) u l-Kapitoli 17 sa 24 tas-Sistema Armonizzata għad-Deskrizzjoni u Kodifikazzjoni ta’ Merkanzija. Ir-Regoli tranżitorji huma applikabbli b’mod parallel mar-regoli tal-oriġini stabbiliti fil-Konvenzjoni, u b’hekk joħolqu żewġ żoni distinti ta’ akkumulazzjoni tal-oriġini. F’dak il-kuntest, jista’ jiġri li l-oġġetti jaqgħu taħt iż-żewġ settijiet ta’ regoli tal-oriġini simultanjament. Skont il-prinċipju tal-permeabbiltà fl-Artikolu 21(1), il-punt (d), tal-Appendiċi A tal-Protokoll 2 tal-Ftehim (“permeabbiltà”), l-oġġetti li jkunu kisbu status oriġinarju skont sett wieħed ta’ regoli tal-oriġini jistgħu jitqiesu wkoll bħala li joriġinaw skont is-sett l-ieħor ta’ regoli tal-oriġini. Sabiex tiġi ffaċilitata l-applikazzjoni tal-permeabbiltà bejn il-Konvenzjoni u r-Regoli tranżitorji, jenħtieġ li l-Artikolu 8 tal-Appendiċi A tal-Protokoll 2 tal-Ftehim jiġi emendat.

(10)

Għalhekk, jenħtieġ li l-pożizzjoni tal-Unjoni fi ħdan il-Kunsill ta’ Stabbilizzazzjoni u ta’ Assoċjazzjoni tkun ibbażata fuq l-abbozz ta’ deċiżjoni mehmuż,