(1)

Abbażi ta’ valutazzjoni preliminari tar-riskji, ir-Regolament ta’ Implimentazzjoni tal-Kummissjoni (UE) 2018/2019 (2) jistabbilixxi lista ta’ pjanti, prodotti mill-pjanti u oġġetti oħra ta’ riskju għoli.

(2)

Wara valutazzjoni preliminari, fir-Regolament ta’ Implimentazzjoni (UE) 2018/2019 ġew elenkati proviżorjament 34 ġeneru u speċi waħda ta’ pjanti għat-tħawwil li joriġinaw minn pajjiżi terzi, bħala pjanti ta’ riskju għoli. Wieħed mill-ġeneri elenkati huwa Malus Mill.

(3)

Ir-Regolament ta’ Implimentazzjoni tal-Kummissjoni (UE) 2020/1213 (3) jistabbilixxi l-miżuri fitosanitarji għall-introduzzjoni fit-territorju tal-Unjoni ta’ ċerti pjanti, prodotti mill-pjanti u oġġetti oħra li tneħħew mill-Anness tar-Regolament ta’ Implimentazzjoni (UE) 2018/2019, iżda r-riskji fitosanitarji tagħhom għadhom ma ġewx ivvalutati bis-sħiħ. Dan għaliex wieħed jew aktar mill-pesti li jgħixu f’dawk il-pjanti għadhom mhumiex inklużi fil-lista tal-pesti tal-kwarantina fl-Unjoni tar-Regolament ta’ Implimentazzjoni tal-Kummissjoni (UE) 2019/2072 (4), iżda jistgħu jissodisfaw il-kundizzjonijiet biex jiġu inklużi wara valutazzjoni tar-riskji sħiħa oħra.

(4)

Fis-17 ta’ Settembru 2021, ir-Renju Unit (5) ressaq talba lill-Kummissjoni għall-esportazzjoni lejn l-Unjoni ta’ dan li ġej: tilqim u rimi bl-għejun mingħajr weraq tal-Malus domestica li ma jkollux aktar minn sena; pjanti għat-tħawwil tal-Malus domestica ta’ mhux aktar minn 7 snin, inattivi, bl-għeruq mikxufin mingħajr weraq; u pjanti għat-tħawwil tal-Malus domestica ta’ mhux aktar minn 7 snin f’materjal għat-tkabbir (“il-pjanti rilevanti”). Dik it-talba kienet sostnuta mid-dossier tekniku rilevanti.

(5)

Fid-29 ta’ Marzu 2023, l-Awtorità Ewropea dwar is-Sigurtà fl-Ikel (“l-Awtorità”) adottat opinjoni xjentifika fir-rigward tal-valutazzjoni tar-riskji tal-pjanti rilevanti li joriġinaw mir-Renju Unit (6). L-Awtorità identifikat lil Colletotrichum aenigma, Meloidogyne mali, Eulecanium excrescens, Takahashia japonica, il-virus tar-ringspot tat-tabakk, il-virus tar-ringspot tat-tadam u Erwinia amylovora bħala pesti rilevanti għal dawn il-pjanti.

(6)

L-Awtorità evalwat il-miżuri ta’ mitigazzjoni tar-riskji deskritti fid-dossier għal Colletotrichum aenigma, Meloidogyne mali, Eulecanium excrescens, Takahashia japonica, il-virus tar-ringspot tat-tabakk, u l-virus tar-ringspot tat-tadam, u stmat il-probabbiltà li l-“pjanti rilevanti” jkunu ħielsa minn dawk il-pesti. Ikkonkludiet li l-probabbiltà li “l-pjanti rilevanti” jkunu ħielsa minn dawk il-pesti hija għolja. Fir-rigward tal-Erwinia amylovora, l-Awtorità evalwat jekk ir-rekwiżiti speċjali għall-introduzzjoni u l-moviment fiż-żoni protetti speċifikati, elenkati fil-punt 9 tal-Anness X tar-Regolament ta’ Implimentazzjoni tal-Kummissjoni (UE) 2019/2072, tal-pjanti Malus Mill., għajr il-frott u ż-żrieragħ, humiex issodisfati. Ikkonkludiet li r-Renju Unit jissodisfa dawk ir-rekwiżiti speċjali.

(7)

Abbażi ta’ dik l-opinjoni, huwa kkunsidrat li r-riskju fitosanitarju mill-introduzzjoni fit-territorju tal-Unjoni tal-pjanti rilevanti jitnaqqas għal livell aċċettabbli, dment li jiġu applikati miżuri xierqa li jindirizzaw ir-riskju ta’ pesti relatati ma’ dawk il-pjanti.

(8)

Il-miżuri deskritti mir-Renju Unit fid-dossier tekniku huma kkunsidrati suffiċjenti biex ir-riskju mill-introduzzjoni fit-territorju tal-Unjoni tal-pjanti rilevanti jitnaqqas għal livell aċċettabbli. Għalhekk, jenħtieġ li dawk il-miżuri jiġu adottati bħala rekwiżiti fitosanitarji għall-importazzjoni biex tiġi żgurata l-protezzjoni fitosanitarja tat-territorju tal-Unjoni mill-introduzzjoni tal-pjanti rilevanti fih.

(9)

Konsegwentement, il-pjanti rilevanti jenħtieġ li ma jibqgħux jitqiesu bħala pjanti ta’ riskju għoli.

(10)

Għalhekk jenħtieġ li r-Regolament ta’ Implimentazzjoni (UE) 2018/2019 jiġi emendat kif xieraq.

(11)

L-Erwinia amylovora hu elenkat bħala pest ta’ kwarantina f’żona protetta, għal ċerti żoni protetti, u bħala pest irregolat mhux ta’ kwarantina fl-Unjoni għall-bqija tat-territorju tal-Unjoni, fl-Annessi III u IV tar-Regolament ta’ Implimentazzjoni (UE) 2019/2072 rispettivament. Hemm fis-seħħ rekwiżiti speċjali fil-punt 9 tal-Anness X ta’ dak ir-Regolament, biex jipprevjenu d-dħul u t-tixrid tal-pest fiż-żoni protetti speċifikati. Il-virus tar-ringspot tat-tabakk, u l-virus tar-ringspot tat-tadam huma elenkati bħala pesti ta’ kwarantina fl-Unjoni fl-Anness II tar-Regolament ta’ Implimentazzjoni (UE) 2019/2072.

(12)

Colletotrichum aenigma, Eulecanium excrescens, Takahashia japonica għadhom mhumiex inklużi fil-lista ta’ pesti ta’ kwarantina fl-Unjoni tar-Regolament ta’ Implimentazzjoni (UE) 2019/2072. Jeħtieġ li ssir disponibbli l-valutazzjoni tar-riskji kompluta dwar dawk il-pesti, sabiex jiġi stabbilit jekk dawk il-pesti jissodisfawx il-kundizzjonijiet biex jiġu elenkati fl-Anness II tar-Regolament ta’ Implimentazzjoni (UE) 2019/2072 u biex il-pjanti rilevanti, li joriġinaw mir-Renju Unit, jiġu elenkati fl-Anness VII ta’ dak ir-Regolament, flimkien mal-miżuri rispettivi.

(13)

Għalhekk jenħtieġ li r-Regolament ta’ Implimentazzjoni (UE) 2020/1213 jiġi emendat kif xieraq.

(14)

Meloidogyne mali mhuwiex inkluż fil-lista tal-pesti tal-kwarantina fl-Unjoni. Analiżi tar-riskju ta’ pesti għal dak il-pest ġiet ippubblikata mill-Organizzazzjoni Ewropea u Mediterranja għall-Protezzjoni tal-Pjanti (EPPO) f’Settembru 2017 (7). Abbażi ta’ diskussjonijiet mal-Istati Membri, ġie konkluż li l-pest ma jenħtieġx li jiġi rregolat bħala pest ta’ kwarantina fl-Unjoni u lanqas bħala pest irregolat mhux ta’ kwarantina fl-Unjoni, minħabba li għalkemm il-pest kien preżenti f’ċerti Stati Membri għal żmien twil mingħajr miżuri ta’ kontroll uffiċjali, l-impatt tiegħu f’dawk l-Istati Membri huwa meqjus baxx. Għal dawn ir-raġunijiet, ma huma meħtieġa l-ebda rekwiżiti tal-importazzjoni fir-rigward ta’ dak il-pest.

(15)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,