(1)

L-Anness I tar-Regolament tal-Implimentazzjoni tal-Kummissjoni (UE) Nru 2021/2325 (2) jistabbilixxi l-lista ta’ pajjiżi terzi li s-sistemi ta’ produzzjoni u l-miżuri ta’ kontroll tagħhom għall-produzzjoni organika ta’ prodotti agrikoli huma rikonoxxuti bħala ekwivalenti għal dawk stabbiliti fir-Regolament tal-Kunsill (KE) Nru 834/2007 (3).

(2)

L-Indja infurmat lill-Kummissjoni li l-awtorità kompetenti tagħha rtirat l-akkreditazzjoni tal-korpi ta’ kontroll “APOF Organic Certification Agency” (AOCA-IN-ORG-002), “Bhumaatha Organic Certification Bureau” (BOCB-IN-ORG-034), “Karnataka State Organic Certification Agency” (IN-ORG-027), u ssospendiet l-akkreditazzjoni tal-korp ta’ kontroll “Faircert Certification Services Pvt Ltd” (IN-ORG-023).

(3)

Il-Ġappun informa lill-Kummissjoni li l-awtorità kompetenti tiegħu rtirat l-akkreditazzjoni tal-korpi ta’ kontroll “Japan Grain Inspection Association” (JP-BIO-039) u “OCIA Japan” (JP-BIO-008).

(4)

Il-Ġappun informa lill-Kummissjoni li l-awtorità kompetenti tiegħu rrikonoxxiet il-korp ta’ kontroll “Japan Association for Inspection and Investigation of Food Including Fats and Oils” (JP-BIO-042).

(5)

Ir-Repubblika tal-Korea talbet lill-Kummissjoni biex tirrikonoxxi, apparti l-Ministeru tal-Agrikoltura, l-Ikel u l-Affarijiet Rurali, is-Servizz Nazzjonali ta’ Ġestjoni tal-Kwalità tal-Prodotti Agrikoli bħala awtorità kompetenti.

(6)

L-Anness II tar-Regolament ta’ Implimentazzjoni (UE) 2021/2325 jistabbilixxi l-lista tal-awtoritajiet ta’ kontroll u tal-korpi ta’ kontroll rikonoxxuti għall-fini ta’ ekwivalenza, u li huma kompetenti biex iwettqu l-kontrolli u joħorġu ċ-ċertifikati f’pajjiżi terzi. Fid-dawl ta’ informazzjoni u talbiet ġodda li rċeviet il-Kummissjoni mill-adozzjoni tar-Regolament ta’ Implimentazzjoni (UE) 2021/2325, jenħtieġ li jsiru ċerti bidliet f’dik il-lista.

(7)

Il-Kummissjoni rċeviet talba mingħand “Albinspekt bio.inspecta” biex tirtira r-rikonoxximent tagħha għall-pajjiżi terzi kollha li hija rikonoxxuta għalihom, minħabba l-fużjoni tagħha ma’ “Bio.inspecta AG”.

(8)

Għadd ta’ kunsinni ta’ prodotti importati mill-Indja u mill-Eġittu ċċertifikati bħala organiċi minn “Biocert International Pvt Ltd”, ġew ikkontaminati bi prodotti u sustanzi mhux permessi fil-produzzjoni organika u/jew fil-produzzjoni konvenzjonali fl-Unjoni, inkluż l-ossidu tal-etilen (ETO), li huwa karċinoġeniku, mutaġeniku u tossiku għar-riproduzzjoni. Dan irriżulta f’għadd ta’ notifiki fis-Sistema ta’ Informazzjoni dwar il-Biedja Organika (OFIS). Il-livelli ta’ kontaminazzjoni misjuba fil-kunsinni normalment jaqbżu l-livelli massimi ta’ residwi għall-ETO stabbiliti bir-Regolament (KE) Nru 396/2005 tal-Parlament Ewropew u tal-Kunsill (4).

(9)

Barra minn hekk, “Biocert International Pvt Ltd” naqset milli turi li l-prodotti organiċi importati taħt il-kontroll tagħha ġew prodotti f’konformità mar-regoli tal-produzzjoni u soġġetti għal arranġamenti ta’ kontroll ekwivalenti għal dawk stabbiliti fir-Regolament (KE) Nru 834/2007 u fir-Regolamenti tal-Kummissjoni (KE) Nru 889/2008 (5) u (KE) Nru 1235/2008 (6).

(10)

Biocert naqset ukoll milli turi li l-operaturi kollha kkontrollati minn “Biocert International Pvt Ltd” kienu soġġetti għal miżuri ta’ kontroll ta’ effettività ekwivalenti u li tali miżuri ta’ kontroll ġew applikati b’mod permanenti u effettiv f’konformità mal-Artikolu 33(1)(b) tar-Regolament (KE) Nru 834/2007.

(11)

Barra minn hekk, “Biocert International Pvt Ltd” naqset milli tieħu miżuri korrettivi adegwati b’reazzjoni għall-irregolaritajiet u għall-ksur osservati.

(12)

Fl-aħħar nett, il-korp ta’ akkreditazzjoni IOAS informa lill-Kummissjoni dwar l-irtirar tal-akkreditazzjoni ISO/IEC 17065 tiegħu ta’ “Biocert International Pvt Ltd” għall-kategoriji kollha tal-prodotti u fil-pajjiżi terzi kollha li għalihom kienet akkreditata minħabba nuqqas ta’ konformità mas-sanzjonijiet preċedenti, biex jieħu l-azzjonijiet speċifikati meħtieġa u biex isolvi n-nuqqasijiet ta’ konformità.

(13)

Għal kull waħda mir-raġunijiet stabbiliti fil-premessi (8)-(12) hawn fuq, u f’konformità mal-Artikolu 4(1)(d)(v) u (vii) tar-Regolament Delegat tal-Kummissjoni (UE) 2021/1342 (7), jenħtieġ li “Biocert International Pvt Ltd” tiġi rtirata mil-lista tal-awtoritajiet ta’ kontroll u tal-korpi ta’ kontroll stabbiliti fl-Anness II tar-Regolament ta’ Implimentazzjoni (UE) 2021/2325.

(14)

“Ecogruppo Italia” infurmat lill-Kummissjoni dwar il-bidla fl-indirizz tagħha.

(15)

Il-Kummissjoni rċeviet talba mingħand “Indocert” biex jiġi rtirat ir-rikonoxximent tagħha għall-Kambodja.

(16)

Il-Kummissjoni rċeviet talba mingħand “Kiwa BCS Öko-Garantie GmbH” biex tirtira r-rikonoxximent tagħha għall-Albanija, il-Bangladesh, il-Belarussja, il-Bhutan, Kuba, l-Etjopja, il-Guinea-Bissau, l-Indja, l-Iran, il-Kosovo, il-Mongolja, in-Nepal u l-Pakistan. Barra minn hekk, “Kiwa BCS Öko-Garantie GmbH” infurmat lill-Kummissjoni dwar il-bidla fl-indirizz tal-Internet tagħha.

(17)

“Organic Standard” infurmat lill-Kummissjoni dwar il-bidla fl-indirizz tal-Internet tagħha.

(18)

Għaldaqstant, jenħtieġ li r-Regolament ta’ Implimentazzjoni (UE) 2021/2325 jiġi emendat skont dan.

(19)

Il-miżuri previsti f’dan ir-Regolament f’konformità mal-opinjoni tal-Kumitat għall-Produzzjoni Organika,