(1)

Skont l-Artikolu 8a tad-Direttiva 2013/36/UE, id-ditti tal-investiment li jissodisfaw il-kundizzjonijiet stabbiliti fil-punt (1)(b) tal-Artikolu 4(1) tar-Regolament (UE) Nru 575/2013 tal-Parlament Ewropew u tal-Kunsill (2) jenħtieġ li japplikaw għal awtorizzazzjoni bħala istituzzjonijiet ta’ kreditu. Dawk l-impriżi għandhom jipprovdu biżżejjed informazzjoni lill-awtoritajiet kompetenti sabiex ikunu jistgħu jwettqu valutazzjoni komprensiva tal-istituzzjonijiet ta’ kreditu applikanti.

(2)

Il-lista ta’ informazzjoni li għandha tiġi pprovduta f’applikazzjoni minn entitajiet li jfittxu li jiksbu l-awtorizzazzjoni msemmija fl-Artikolu 8a tad-Direttiva 2013/36/UE għandha tiġi speċifikata f’regolament. Jenħtieġ li tali informazzjoni tinkludi d-dettalji ta’ identifikazzjoni u l-informazzjoni storika tal-istituzzjoni ta’ kreditu applikanti, inklużi l-liċenzjar eżistenti tagħha, l-attivitajiet proposti, is-sitwazzjoni finanzjarja attwali, il-programm ta’ operazzjonijiet, u l-kapital inizjali.

(3)

Sabiex jiġu żgurati l-konsistenza u l-armonizzazzjoni tal-informazzjoni tal-awtorizzazzjoni meħtieġa għall-istituzzjonijiet ta’ kreditu applikanti, dan ir-Regolament jenħtieġ li jirreferi għar-Regolament Delegat tal-Kummissjoni (UE) 2022/2580 (3) dwar l-informazzjoni li għandha tiġi pprovduta għall-awtorizzazzjoni tal-istituzzjonijiet ta’ kreditu, ir-rekwiżiti applikabbli għall-azzjonisti u l-membri b’parteċipazzjonijiet kwalifikanti u l-ostakli li jistgħu jipprevjenu l-eżerċizzju effettiv tal-funzjonijiet superviżorji u jenħtieġ li jkollhom l-għan li jespandu l-kamp ta’ applikazzjoni tiegħu għad-ditti tal-investiment li jikklassifikaw bħala istituzzjonijiet ta’ kreditu.

(4)

L-Artikolu 4(1) tar-Regolament (UE) Nru 575/2013 jidentifika tip ta’ istituzzjonijiet ta’ kreditu li jieħdu depożiti jew fondi ripagabbli oħra mill-pubbliku u jagħtu krediti f’isimhom stess u ieħor li huwa dak kopert mill-kamp ta’ applikazzjoni ta’ dan ir-Regolament. B’mod differenti, l-istituzzjonijiet ta’ kreditu li n-negozju tagħhom jinkludi t-teħid ta’ depożiti jew fondi ripagabbli oħra mill-pubbliku u l-għoti ta’ krediti f’isimhom stess jenħtieġ li jsegwu r-rekwiżiti tar-Regolament Delegat (UE) 2022/2580.

(5)

Il-lista ta’ rekwiżiti ta’ informazzjoni pprovduta f’dan ir-Regolament għall-istituzzjonijiet ta’ kreditu applikanti jenħtieġ li tqis l-ispeċifiċitajiet tal-mudell tan-negozju tad-ditti tal-investiment u kwalunkwe liċenzja preċedenti mogħtija minn awtorità kompetenti.

(6)

L-awtoritajiet kompetenti jista’ jkollhom bżonn jespandu l-informazzjoni mitluba sabiex ikunu f’pożizzjoni li jivvalutaw bir-reqqa l-istituzzjoni ta’ kreditu applikanti, filwaqt li jqisu l-firxa ta’ mudelli ta’ negozju u forom legali differenti li l-istituzzjonijiet applikanti jistgħu jieħdu. Dan ir-Regolament għandu jippermetti lill-awtoritajiet kompetenti jitolbu informazzjoni addizzjonali minn ditta tal-investiment meta jivvalutaw l-applikazzjoni għal istituzzjoni ta’ kreditu.

(7)

L-awtorità kompetenti tista’ tikkunsidra li tirrinunzja xi rekwiżiti ta’ informazzjoni fid-dawl tad-daqs, in-natura, l-iskala u l-kumplessità tal-attivitajiet tal-istituzzjoni ta’ kreditu applikanti kkonċernata, u b’kont meħud tal-prinċipju tal-proporzjonalità u l-piż tal-implimentazzjoni fuq l-istituzzjonijiet. Madankollu, dan m’għandux jikkomprometti l-possibbiltà li titwettaq valutazzjoni komprensiva tal-applikazzjoni għal istituzzjoni ta’ kreditu.

(8)

Dan ir-Regolament huwa msejjes fuq l-abbozz ta’ standards tekniċi regolatorji ppreżentat mill-Awtorità Bankarja Ewropea (EBA) lill-Kummissjoni.

(9)

L-EBA wettqet konsultazzjonijiet pubbliċi miftuħa dwar l-abbozz tal-istandards tekniċi regolatorji li fuqu huwa bbażat dan ir-Regolament, analizzat il-kostijiet u l-benefiċċji potenzjali relatati u talbet il-parir tal-Grupp tal-Partijiet Bankarji Interessati stabbilit f’konformità mal-Artikolu 37 tar-Regolament (UE) Nru 1093/2010 tal-Parlament Ewropew u tal-Kunsill (4).