Access to European Union law
<a href="https://eur-lex.europa.eu/content/help/eurlex-content/experimental-features.html" target="_blank">More about the experimental features corner</a>
Choose the experimental features you want to try
EUR-Lex
Access to European Union law

This document is an excerpt from the EUR-Lex website

You are here
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search

Document 32022R2300

Regolament Delegat tal-Kummissjoni (UE) 2022/2300 tat-30 ta’ Awwissu 2022 li jissupplimenta r-Regolament (UE) 2021/847 tal-Parlament Ewropew u tal-Kunsill b’dispożizzjonijiet dwar l-istabbiliment ta’ qafas ta’ monitoraġġ u ta’ evalwazzjoni għall-programm Fiscalis għall-kooperazzjoni fil-qasam tat-tassazzjoni

C/2022/6102

ĠU L 305, 25.11.2022, p. 1–4 (BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)

Legal status of the document In force

ELI: http://data.europa.eu/eli/reg_del/2022/2300/oj

25.11.2022   

MT

Il-Ġurnal Uffiċjali tal-Unjoni Ewropea

L 305/1

REGOLAMENT DELEGAT TAL-KUMMISSJONI (UE) 2022/2300

tat-30 ta’ Awwissu 2022

li jissupplimenta r-Regolament (UE) 2021/847 tal-Parlament Ewropew u tal-Kunsill b’dispożizzjonijiet dwar l-istabbiliment ta’ qafas ta’ monitoraġġ u ta’ evalwazzjoni għall-programm Fiscalis għall-kooperazzjoni fil-qasam tat-tassazzjoni

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) 2021/847 tal-Parlament Ewropew u tal-Kunsill tal-20 ta’ Mejju 2021 li jistabbilixxi l-programm “Fiscalis” għall-kooperazzjoni fil-qasam tat-tassazzjoni u li jħassar ir-Regolament (UE) Nru 1286/2013 (1), u b’mod partikolari l-Artikolu 14(2) tiegħu,

Billi:

(1)

L-indikaturi għar-rapportardwar il-progress tal-programm Fiscalis kif stabbilit bir-Regolament (UE) 2021/847 (“il-Programm”) lejn il-kisba tal-objettivi speċifiċi stabbiliti fl-Artikolu 3(2) ta’ dak ir-Regolament huma elenkati fl-Anness II tar-Regolament.

(2)

Għalkemm l-indikaturi elenkati fl-Anness II tar-Regolament (UE) 2021/847 huma adattati għall-fini ta’ monitoraġġ annwali tal-prestazzjoni, ma jippermettux monitoraġġ u evalwazzjoni komprensivi tal-attivitajiet u tar-riżultati tal-Programm fil-kisba tal-objettivi speċifiċi tiegħu. Għalhekk, jenħtieġ li jiġu stabbiliti indikaturi addizzjonali bħala parti mill-qafas ta’ monitoraġġ u ta’ evalwazzjoni. Jenħtieġ li dawk l-indikaturi addizzjonali jkejlu l-outputs, ir-riżultati u l-impatti tal-Programm.

(3)

Biex jiġi żgurat li d-data għall-monitoraġġ u għall-evalwazzjoni tal-Programm tinġabar b’mod effiċjenti, b’mod effettiv u fil-ħin, jenħtieġ li jiġu imposti rekwiżiti ta’ rapportar proporzjonati biex jiġi evitat ir-rapportar doppju u jittaffa l-piż amministrattiv.

(4)

Sabiex jiġi żgurat allinjament mal-bidu tal-perjodu ta’ rapportar marbut mal-qafas ta’ monitoraġġ u ta’ evalwazzjoni tal-Programm, jenħtieġ li dan ir-Regolament Delegat japplika b’mod retroattiv, mill-1 ta’ Jannar 2022,

ADOTTAT DAN IR-REGOLAMENT:

Artikolu 1

Indikaturi tal-qafas ta’ monitoraġġ u ta’ evalwazzjoni u r-rekwiżiti ta’ rapportar

1.   Meta jiġi mmonitorjat u evalwat il-Programm f’konformità mal-Artikoli 14 u 15 tar-Regolament (UE) 2021/847, l-indikaturi li ġejjin għandhom jintużaw bħala parti mill-qafas ta’ monitoraġġ u ta’ evalwazzjoni:

(a)

l-indikaturi stabbiliti fl-Anness II tar-Regolament (UE) 2021/847;

(b)

l-indikaturi stabbiliti fl-Anness ta’ dan ir-Regolament, li jkejlu l-outputs, ir-riżultati u l-impatti tal-Programm.

2.   L-indikaturi msemmija fil-paragrafu 1 għandhom jitkejlu kull sena, għajr l-indikaturi tal-impatt imsemmija fil-punti (1)(a) u (3) tal-Anness ta’ dan ir-Regolament li għandhom jitkejlu kull sentejn u bħala parti mill-evalwazzjonijiet interim u finali, f’konformità mal-Artikolu 15 tar-Regolament (UE) 2021/847.

3.   Meta meħtieġ mill-Kummissjoni, ir-riċevituri tal-fondi tal-Programm għandhom jipprovdu lill-Kummissjoni bid-data u l-informazzjoni relatati mal-indikaturi msemmija fil-paragrafu 1, li huma rilevanti għall-fini li jikkontribwixxu għall-qafas ta’ monitoraġġ u ta’ evalwazzjoni.

Artikolu 2

Dħul fis-seħħ u applikazzjoni

Dan ir-Regolament għandu jidħol fis-seħħ fit-tielet jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Għandu japplika mill-1 ta’ Jannar 2022.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, it-30 ta’ Awwissu 2022.

Għall-Kummissjoni

Il-President

Ursula VON DER LEYEN

(1)   ĠU L 188, 28.5.2021, p. 1.

ANNESS

Lista ta’ indikaturi addizzjonali fir-rigward tal-qafas ta’ monitoraġġ u ta’ evalwazzjoni tal-Programm Fiscalis imsemmi fl-Artikoli 14 u 15 tar-Regolament (UE) 2021/847

A.   Indikaturi tal-output

(1)

Żvilupp tal-komponenti komuni tas-Sistemi Elettroniċi Ewropej (EES):

(a)

in-numru ta’ proġetti tat-teknoloġija tal-informazzjoni (IT) fil-fażi tal-bidu;

(b)

in-numru ta’ proġetti tal-IT fil-fażi tal-eżekuzzjoni;

(c)

il-proporzjon tal-proġetti tal-IT li l-kost reali tagħhom huwa kif ippjanat;

(d)

il-proporzjon tal-proġetti tal-IT bi status “ekoloġiku” f’konformità mar-rekwiżiti previsti fil-Pjan Strateġiku Pluriennali dwar it-Tassazzjoni (MASP-T).

(2)

Twettiq tal-komponenti komuni tal-EES:

(a)

in-numru ta’ proġetti tal-IT rilaxxati għall-produzzjoni kif meħtieġ skont id-dritt tal-Unjoni;

(b)

il-proporzjon tal-komponenti komuni tal-EES imwettqa skont l-iskeda ta’ żmien tal-MASP-T;

(c)

in-numru ta’ reviżjonijiet li saru fl-iskedi ta’ żmien għat-twettiq tal-komponenti komuni tal-EES.

(3)

Affidabbiltà tal-EES (il-kapaċità tan-Network Komuni ta’ Komunikazzjoni).

(4)

Affidabbiltà tas-servizzi ta’ appoġġ tal-IT:

(a)

il-proporzjon tal-biljetti ta’ “inċidenti” riżolti fil-ħin;

(b)

is-sodisfazzjon tal-utent bis-servizzi ta’ appoġġ ipprovduti.

(5)

Livell ta’ appoġġ għall-bini tal-kapaċità pprovdut permezz ta’ azzjonijiet kollaborattivi (kwalità tal-azzjonijiet kollaborattivi).

(6)

Grad ta’ sensibilizzazzjoni dwar il-Programmi.

B.   Indikaturi tar-riżultati:

(1)

Livell ta’ koerenza tal-leġiżlazzjoni u l-politika tat-tassazzjoni u l-implimentazzjoni tagħhom (il-kontribut tal-komponenti komuni l-ġodda tal-EES għall-faċilitazzjoni ta’ implimentazzjoni koerenti tad-dritt u l-politika tal-Unjoni).

(2)

Użu tal-EES ewlenin li għandhom l-għan li jżidu l-interkonnettività u l-iskambju ta’ informazzjoni (in-numru ta’ messaġġi skambjati minn sistema għal sistema).

(3)

Livell ta’ kooperazzjoni operazzjonali bejn l-awtoritajiet nazzjonali:

(a)

il-kontribut tal-komponenti komuni l-ġodda tal-EES għall-faċilitazzjoni tal-kooperazzjoni operazzjonali bejn l-awtoritajiet nazzjonali;

(b)

in-numru ta’ utenti attivi fuq il-pjattaforma ta’ kollaborazzjoni online;

(c)

in-numru ta’ interazzjonijiet fuq il-pjattaforma kollaborattiva;

(d)

is-sodisfazzjon tal-utenti bil-pjattaforma ta’ kollaborazzjoni online.

(4)

Prestazzjoni operazzjonali tal-awtoritajiet nazzjonali:

(a)

il-kontribut tal-komponenti komuni l-ġodda tal-EES għat-titjib tal-prestazzjoni operazzjonali tal-awtoritajiet nazzjonali;

(b)

il-kontribut tal-outputs tal-azzjonijiet kollaborattivi u ta’ kompetenza umana għat-titjib tal-prestazzjoni operazzjonali tal-awtoritajiet nazzjonali.

C.   Indikaturi tal-impatt

(1)

Evoluzzjoni tal-protezzjoni tal-interessi finanzjarji u ekonomiċi tal-Unjoni u tal-Istati Membri:

(a)

id-diskrepanza stmata fit-taxxa fuq il-valur miżjud;

(b)

il-kontribut tal-kooperazzjoni amministrattiva għall-protezzjoni tal-interessi finanzjarji tal-Istati Membri.

(2)

Kontribut għat-tisħiħ tal-funzjonament tas-suq intern (numru ta’ każijiet ta’ qabel il-ksur u ta’ ksur b’rabta mat-tassazzjoni).

(3)

Evoluzzjoni tal-kompetittività tal-Unjoni u tal-kompetizzjoni ġusta fi ħdan l-Unjoni (il-mili minn qabel tad-dikjarazzjonijiet jew tal-valutazzjonijiet tat-taxxa).
Top