(1)

Abbażi ta’ valutazzjoni preliminari tar-riskju, ir-Regolament ta’ Implimentazzjoni tal-Kummissjoni (UE) 2018/2019 (2) jistabbilixxi lista ta’ pjanti, prodotti tal-pjanti u oġġetti oħra ta’ riskju għoli.

(2)

Ir-Regolament ta’ Implimentazzjoni tal-Kummissjoni (UE) 2018/2018 (3) jistabbilixxi regoli speċifiċi dwar il-proċedura li għandha tiġi segwita sabiex issir il-valutazzjoni tar-riskju msemmija fl-Artikolu 42(4) tar-Regolament (UE) 2016/2031 għall-pjanti, il-prodotti tal-pjanti u oġġetti oħra ta’ riskju għoli.

(3)

Wara valutazzjoni preliminari, fl-Anness tar-Regolament ta’ Implimentazzjoni (UE) 2018/2019 iddaħħlu 34 ġeneru u speċi waħda ta’ pjanti għat-tħawwil li joriġinaw mill-pajjiżi terzi kollha, bħala pjanti ta’ riskju għoli. Dak l-Anness jinkludi l-ġeneru Jasminum L.

(4)

Il-lista ta’ pjanti, prodotti mill-pjanti jew oġġetti oħra, imneħħija mill-Anness tar-Regolament ta’ Implimentazzjoni (UE) 2018/2019 u li jistgħu jiġu introdotti jew imċaqilqa fit-territorju tal-Unjoni biss jekk jiġu ssodisfati rekwiżiti speċjali, hija prevista fir-Regolament ta’ Implimentazzjoni tal-Kummissjoni (UE) 2020/1213 (4).

(5)

Fl-4 ta’ Diċembru 2019, l-Uganda ressqet talba lill-Kummissjoni għall-esportazzjoni lejn l-Unjoni ta’ biċċiet bla għeruq ta’ Jasminum polyanthum Franchet. Dik it-talba kienet sostnuta mid-dossier tekniku rilevanti.

(6)

Fil-31 ta’ Marzu 2022, l-Awtorità Ewropea dwar is-Sigurtà fl-Ikel (“l-Awtorità”) adottat opinjoni xjentifika dwar il-valutazzjoni tar-riskju ta’ komodità tal-biċċiet mingħajr għeruq ta’ Jasminum polyanthum Franchet mill-Uganda (5). L-Awtorità identifikat lil Bemisia tabaci (popolazzjonijiet mhux Ewropej), Coccus viridis, Diaphania indica, Pulvinaria psidii, Scirtothrips dorsalis u Selenaspidus articulatus bħala pesti relevanti għal dawk il-pjanti għat-tħawwil.

(7)

L-Awtorità evalwat il-miżuri ta’ mitigazzjoni tar-riskju deskritti fid-dossier għal Bemisia tabaci (popolazzjonijiet mhux Ewropej), Coccus viridis, Diaphania indica, Pulvinaria psidii, Scirtothrips dorsalis u Selenaspidus articulatus u stmat il-probabbiltà tal-ħelsien tal-komodità minn dawk il-pesti.

(8)

Abbażi ta’ dik l-opinjoni, huwa kkunsidrat li r-riskju fitosanitarju mill-introduzzjoni fit-territorju tal-Unjoni ta’ biċċiet mingħajr għeruq ta’ Jasminum polynathum Franchet li joriġinaw mill-Uganda, tnaqqas għal livell aċċettabbli, dment li jiġu applikati miżuri ta’ mitigazzjoni xierqa li jindirizzaw ir-riskju ta’ pesti relatati ma’ dawk il-pjanti għat-tħawwil. B’konsegwenza ta’ dan, jenħtieġ li l-biċċiet mingħajr għeruq ta’ Jasminum polyanthum Franchet li joriġinaw mill-Uganda ma jibqgħux jitqiesu bħala pjanti ta’ riskju għoli.

(9)

Għalhekk, jenħtieġ li l-Anness tar-Regolament ta’ Implimentazzjoni (UE) 2018/2019 jiġi emendat skont dan.

(10)

Il-miżuri deskritti mill-Uganda fid-dossier huma kkunsidrati suffiċjenti biex ir-riskju mill-introduzzjoni tal-komodità fit-territorju tal-Unjoni jitnaqqas għal livell aċċettabbli. Għalhekk, jenħtieġ li dawk il-miżuri jiġu adottati bħala rekwiżiti fitosanitarji għall-importazzjoni biex tiġi żgurata l-protezzjoni fitosanitarja tat-territorju tal-Unjoni mill-introduzzjoni ta’ dik il-komodità fih.

(11)

Bemisia tabaci (popolazzjonijiet mhux Ewropej) u Scirtothrips dorsalis huma elenkati bħala pesti ta’ kwarantina fl-Unjoni fl-Anness II tar-Regolament ta’ Implimentazzjoni tal-Kummissjoni (UE) 2019/2072 (6). Coccus viridis, Pulvinaria psidii u Selenaspidus articulatus għadhom mhumiex inklużi fil-lista ta’ pesti ta’ kwarantina fl-Unjoni, iżda jistgħu jissodisfaw il-kundizzjonijiet biex jiġu inklużi ladarba tkun twettqet valutazzjoni tar-riskju kompluta.

(12)

Għalhekk jenħtieġ li l-Anness tar-Regolament ta’ Implimentazzjoni (UE) 2020/1213 jiġi emendat skont dan.

(13)

L-opinjoni tal-Awtorità tindika li s’issa ma hemm l-ebda rekord ta’ Dijaphania indica assoċjata ma’ Jasminium polyanthum Franchet bħala ospitant. Għal din ir-raġuni, ma huma meħtieġa l-ebda rekwiżiti tal-importazzjoni fir-rigward ta’ dak il-pest.

(14)

Ir-Regolament ta’ Implimentazzjoni (UE) 2021/419 (7) emenda r-Regolament ta’ Implimentazzjoni (UE) 2018/2019 billi speċifika li huwa pprojbit li fl-Unjoni jiġu introdotti pjanti għat-tħawwil ta’ Jasminum L., għajr biċċiet mingħajr għeruq ta’ pjanti għat-tħawwil ta’ Jasminum polyanthum Franchet li joriġinaw mill-Iżrael. L-Anness tar-Regolament ta’ Implimentazzjoni (UE) 2020/1213 ġie emendat biex jinkludi r-rekwiżiti fitosanitarji tal-importazzjoni meħtieġa biex jiġi żgurat li r-riskju mill-introduzzjoni ta’ dawk il-pjanti għat-tħawwil fl-Unjoni mill-Iżrael ikun aċċettabbli. Dawk ir-rekwiżiti fitosanitarji inkludew b’mod żbaljat miżuri dwar il-pest tal-kwarantina fl-Unjoni Scirtothrips dorsalis. Billi, skont l-Artikolu 5(1) tar-Regolament (UE) 2016/2031, għall-pesti tal-kwarantina fl-Unjoni huma pprojbiti l-introduzzjoni, iċ-ċaqliq jew iż-żamma, il-multiplikazzjoni jew ir-rilaxx tagħhom fit-territorju tal-Unjoni, ma kienx meħtieġ li jiġu inklużi miżuri għal Scirtothrips dorsalis fl-Anness tar-Regolament ta’ Implimentazzjoni (UE) 2020/1213.

(15)

Għalhekk, l-Anness tar-Regolament ta’ Implimentazzjoni (UE) 2020/1213 jenħtieġ li jiġi kkoreġut skont dan.

(16)

Sabiex ikun hemm konformità mal-obbligi tal-Unjoni li jirriżultaw mill-ftehim tal-Organizzazzjoni Dinjija tal-Kummerċ dwar l-applikazzjoni ta’ miżuri sanitarji u fitosanitarji (8), l-importazzjoni tal-biċċiet mingħajr għeruq ta’ Jasminum polyanthum Franchet mill-Uganda jenħtieġ li tissokta fl-iqsar żmien possibbli. Għalhekk, jenħtieġ li dan ir-Regolament jidħol fis-seħħ fit-tielet jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

(17)

Il-miżuri previsti f’dan ir-Regolament huma konformi mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,