(1)

Id-Direttiva (UE) 2021/338 tal-Parlament Ewropew u tal-Kunsill (2) tistabbilixxi emendi fl-Artikolu 57 tad-Direttiva 2014/65/UE fir-rigward tal-kontrolli tal-ġestjoni tal-pożizzjonijiet.

(2)

F’konformità ma’ dawk l-emendi għall-Artikolu 57 tad-Direttiva 2014/65/UE, iċ-ċentri tan-negozjar li jinnegozjaw derivattivi ta’ komoditajiet irid ikollhom fis-seħħ u jridu japplikaw kontrolli effettivi tal-ġestjoni tal-pożizzjonijiet biex jipprevjenu u jindirizzaw in-negozjar diżordinat, jappoġġaw kundizzjonijiet ta’ pprezzar u saldu ordnati u jiżguraw l-effiċjenza tas-swieq.

(3)

Kontrolli effettivi tal-ġestjoni tal-pożizzjonijiet jinkludu pereżempju arranġamenti legali biex tinkiseb u tintuża data ta’ detenturi ta’ pożizzjoni finali u impriżi prinċipali kif ukoll arranġamenti tekniċi, bħal rapporti u metriċi biex jinħoloq, pereżempju dashboard tal-pożizzjoni. Għalhekk, kontrolli effettivi tal-ġestjoni tal-pożizzjonijiet jenħtieġ li jkunu marbutin mill-qrib mal-monitoraġġ kontinwu miċ-ċentru tan-negozjar u jiddependu fuqu.

(4)

Sabiex jiġi żgurat li l-proċess tal-iskoperta tal-prezzijiet ma jkunx influwenzat b’mod mhux xieraq mill-eżistenza ta’ pożizzjoni u sabiex tiġi identifikata l-akkumulazzjoni ta’ konċentrazzjonijiet ta’ pożizzjonijiet li jistgħu jirriżultaw f’distorsjoni tal-prezzijiet, manipulazzjoni tas-suq jew prattiki ta’ negozjar abbużivi oħra, iċ-ċentri tan-negozjar jenħtieġ li jkunu konxji minn pożizzjonijiet kbar miżmuma minn detenturi ta’ pożizzjoni finali u minn impriżi prinċipali f’derivattivi ta’ komoditajiet saldati fiżikament u r-raġunijiet għaż-żamma ta’ dawk il-pożizzjonijiet. Peress li l-provvista reali tal-komodità fiżika sottostanti hija ristretta għal provvista finita, derivattivi ta’ komoditajiet saldati fiżikament huma aktar suxxettibbli għal prattiki ta’ negozjar diżordinati bħal għafis tas-suq jew trekkin tas-suq fejn il-kontropartijiet jagħmlu użu minn pożizzjoni dominanti biex iżommu l-prezz ta’ derivattiv ta’ komodità, jew tal-komodità sottostanti, f’livell artifiċjali. Għalhekk, jenħtieġ li jiġu identifikati l-pożizzjonijiet kbar f’derivattivi ta’ komoditajiet li jiġu saldati fiżikament mid-disinn kif ukoll f’dawk id-derivattivi ta’ komoditajiet li jistgħu jiġu saldati fiżikament fuq l-għażla tax-xerrej jew tal-bejjiegħ.

(5)

Id-determinazzjoni ta’ x’jikkostitwixxi pożizzjoni kbira jenħtieġ li ssir miċ-ċentri tan-negozjar filwaqt li jitqiesu d-daqs u l-kompożizzjoni tas-suq inkwistjoni. Għal dak il-għan, iċ-ċentri tan-negozjar jenħtieġ li jistabbilixxu kriterji kwalitattivi jew kwantitattivi li jintużaw biex jidentifikaw skoperturi kbar bħal dawn u jenħtieġ li jkollhom fis-seħħ proċeduri biex jidentifikaw il-pożizzjonijiet kollha miżmuma minn kwalunkwe persuna li taqbeż dawn il-livelli ta’ akkontabbiltà predeterminati. Il-kriterji kwantitattivi u kwalitattivi jistgħu jkunu, fost l-oħrajn, id-daqs tal-interess miftuħ totali fid-derivattiv ta’ komodità, is-sehem tal-pożizzjoni tad-detentur tal-pożizzjoni, il-volatilità tas-swieq u l-karatteristiċi tas-suq tal-komoditajiet sottostanti. Meta jinqabżu dawn il-livelli, iċ-ċentru tan-negozjar jenħtieġ li jipprova jifhem ir-raġuni għall-akkumulazzjoni ta’ dik il-pożizzjoni kbira. Għal dak il-għan, iċ-ċentru tan-negozjar jenħtieġ li jivvaluta jekk jeħtiġlux jitlob informazzjoni addizzjonali mill-persuna li jkollha dik il-pożizzjoni kbira, filwaqt li jqis b’mod partikolari kemm il-pożizzjonijiet miżmuma minn dik il-persuna jaqbżu l-livelli ta’ akkontabbiltà u l-punt sa fejn jinqabżu l-livelli tal-akkontabbiltà. Tali informazzjoni tista’ tinkludi, fost l-oħrajn, pożizzjonijiet fi prodotti relatati, ir-raġuni ekonomika għall-pożizzjoni miftuħa u l-attività f’suq tal-komoditajiet sottostanti relatat. Abbażi tal-informazzjoni diġà disponibbli jew miġbura permezz ta’ talba għal informazzjoni, iċ-ċentru tan-negozjar jenħtieġ li jieħu azzjonijiet xierqa meta meħtieġ.

(6)

Huwa importanti li l-livelli ta’ akkontabbiltà stabbiliti jibqgħu adegwati u effettivi biex jaqdu l-iskop maħsub tagħhom u li l-awtorità kompetenti tkun infurmata dwar il-metodoloġija użata għall-istabbiliment u l-aġġornament ta’ dawk il-livelli ta’ akkontabbiltà.

(7)

Dan ir-Regolament huwa bbażat fuq l-abbozz tal-istandards tekniċi regolatorji ppreżentati lill-Kummissjoni mill-Awtorità Ewropea tat-Titoli u s-Swieq.

(8)

L-Awtorità Ewropea tat-Titoli u s-Swieq wettqet konsultazzjonijiet pubbliċi miftuħa dwar l-abbozz tal-istandards tekniċi regolatorji li fuqu huwa bbażat dan ir-Regolament, analizzat il-kostijiet u l-benefiċċji potenzjali relatati u talbet il-parir tal-Grupp tal-Partijiet Interessati tat-Titoli u s-Swieq stabbilit skont l-Artikolu 37 tar-Regolament (UE) Nru 1095/2010 tal-Parlament Ewropew u tal-Kunsill (3)