EUR-Lex Access to European Union law
This document is an excerpt from the EUR-Lex website
Document 32022R1011
Commission Delegated Regulation (EU) 2022/1011 of 10 March 2022 supplementing Regulation (EU) No 575/2013 of the European Parliament and of the Council with regard to regulatory technical standards specifying how to determine the indirect exposures to a client arising from derivatives and credit derivatives contracts where the contract was not directly entered into with the client but the underlying debt or equity instrument was issued by that client (Text with EEA relevance)
Regolament Delegat tal-Kummissjoni (UE) 2022/1011 tal-10 ta’ Marzu 2022 li jissupplimenta r-Regolament (UE) Nru 575/2013 tal-Parlament Ewropew u tal-Kunsill fir-rigward tal-istandards tekniċi regolatorji li jispeċifikaw kif jiġu ddeterminati l-iskoperturi indiretti għal klijent li jirriżultaw minn kuntratti ta’ derivattivi u derivattivi ta’ kreditu meta l-kuntratt ma jkunx sar direttament mal-klijent iżda l-istrument sottostanti ta’ dejn jew ekwità jkun inħareġ minn dak il-klijent (Test b’rilevanza għaż-ŻEE)
Regolament Delegat tal-Kummissjoni (UE) 2022/1011 tal-10 ta’ Marzu 2022 li jissupplimenta r-Regolament (UE) Nru 575/2013 tal-Parlament Ewropew u tal-Kunsill fir-rigward tal-istandards tekniċi regolatorji li jispeċifikaw kif jiġu ddeterminati l-iskoperturi indiretti għal klijent li jirriżultaw minn kuntratti ta’ derivattivi u derivattivi ta’ kreditu meta l-kuntratt ma jkunx sar direttament mal-klijent iżda l-istrument sottostanti ta’ dejn jew ekwità jkun inħareġ minn dak il-klijent (Test b’rilevanza għaż-ŻEE)
C/2022/1377
ĠU L 170, 28.6.2022, p. 22–26
(BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)
In force
|
28.6.2022 |
MT |
Il-Ġurnal Uffiċjali tal-Unjoni Ewropea |
L 170/22 |
REGOLAMENT DELEGAT TAL-KUMMISSJONI (UE) 2022/1011
tal-10 ta’ Marzu 2022
li jissupplimenta r-Regolament (UE) Nru 575/2013 tal-Parlament Ewropew u tal-Kunsill fir-rigward tal-istandards tekniċi regolatorji li jispeċifikaw kif jiġu ddeterminati l-iskoperturi indiretti għal klijent li jirriżultaw minn kuntratti ta’ derivattivi u derivattivi ta’ kreditu meta l-kuntratt ma jkunx sar direttament mal-klijent iżda l-istrument sottostanti ta’ dejn jew ekwità jkun inħareġ minn dak il-klijent
(Test b’rilevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) Nru 575/2013 tal-Parlament Ewropew u tal-Kunsill tas-26 ta’ Ġunju 2013 dwar ir-rekwiżiti prudenzjali għall-istituzzjonijiet ta’ kreditu u d-ditti tal-investiment u li jemenda r-Regolament (UE) Nru 648/2012 (1), u b’mod partikolari l-Artikolu 390(9), it-tielet subparagrafu, tiegħu,
Billi:
|
(1) |
Id-determinazzjoni tal-valuri tal-iskopertura indiretta għal klijent li jirriżultaw minn kuntratti tad-derivattivi u tad-derivattivi tal-kreditu għal finijiet ta’ skoperturi kbar jenħtieġ li tkun differenti mill-metodu ta’ kalkolu tal-valur tal-iskopertura użat għar-rekwiżiti kapitali bbażati fuq ir-riskju stabbiliti fir-Regolament (UE) Nru 575/2013 minħabba li inadempjenza tal-istrument sottostanti tista’ twassal għal profitt minflok telf. Il-valur tal-iskopertura indiretta għandu għalhekk ikun dipendenti fuq it-telf (jiġifieri l-valur tal-iskopertura pożittiv) jew il-qligħ (jiġifieri l-valur tal-iskopertura negattiv) li jirriżulta minn inadempjenza potenzjali tal-istrument sottostanti tagħha. Skont ir-reġim tal-iskoperturi l-kbar stabbilit fil-Parti Erbgħa tar-Regolament (UE) Nru 575/2013, fil-każ ta’ skoperturi fil-portafoll tan-negozjar, l-istituzzjonijiet jistgħu jpaċu pożizzjonijiet pożittivi u negattivi fl-istess strumenti finanzjarji, jew, taħt ċerti kundizzjonijiet, fi strumenti finanzjarji differenti, maħruġa minn klijent partikolari. L-iskopertura netta kumplessiva għal klijent individwali titqies biss jekk tkun pożittiva. Bl-istess mod, l-iskopertura netta kumplessiva għal klijent partikolari, wara l-inklużjoni tal-iskoperturi indiretti għal dak il-klijent li jirriżultaw minn kuntratti ta’ derivattivi jew derivattivi ta’ kreditu allokati lill-portafoll tan-negozjar, għandha titqies biss jekk tkun pożittiva. Sabiex jiġi evitat kwalunkwe tpaċija ta’ kwalunkwe skopertura indiretta li tirriżulta minn kuntratti derivattivi jew derivattivi ta’ kreditu allokati lill-portafoll mhux tan-negozjar, kwalunkwe valur ta’ skopertura indiretta negattiv li jirriżulta minn dawk il-pożizzjonijiet għandu jiġi stabbilit għal żero. |
|
(2) |
Sabiex jiġi żgurat li r-riskju ta’ inadempjenza jinqabad b’mod xieraq, il-valur tal-iskopertura indiretta tal-opzjonijiet, irrispettivament minn jekk jiġix allokat lill-portafoll tan-negozjar jew lill-portafoll mhux tan-negozjar, għandu għalhekk jiddependi fuq il-bidliet fil-prezzijiet tal-opzjonijiet li jirriżultaw minn inadempjenza tal-istrument sottostanti rispettiv, eż. il-valur tas-suq tal-opzjoni għal opzjonijiet “eżerċitabbli” u l-valur tas-suq tal-opzjoni nieqes il-prezz tal-eżerċitar tagħha għall-opzjonijiet “put”. |
|
(3) |
L-għan tad-derivattivi ta’ kreditu huwa li jittrasferixxu r-riskju tal-kreditu fir-rigward tal-mutwatarji mingħajr ma jittrasferixxu l-assi nfushom. Ir-rwol li għandhom l-istituzzjonijiet bħala bejjiegħ tal-protezzjoni jew xerrej tal-protezzjoni u t-tip ta’ derivattiv tal-kreditu li jidħlu fih għandhom jitqiesu għad-determinazzjoni tal-valur tal-iskopertura indiretta tal-istrument sottostanti. L-iskopertura indiretta għandha għalhekk tkun ugwali għall-valur tas-suq tal-kuntratt tad-derivattivi ta’ kreditu, li għandu jiġi aġġustat bl-ammont dovut jew mistenni li jiġi riċevut mill-kontroparti fil-każ ta’ inadempjenza tal-emittent tal-istrument ta’ dejn sottostanti. |
|
(4) |
Għal tipi oħra ta’ kuntratti tad-derivattivi li jikkostitwixxu taħlita ta’ pożizzjonijiet twal u qosra, sabiex jiġi żgurat li r-riskju ta’ inadempjenza preċiż jinqabad, l-istituzzjonijiet għandhom jiddekomponu dawk il-kuntratti tad-derivattivi f’komponenti individwali tat-tranżazzjonijiet. Huma biss il-komponenti b’riskju ta’ inadempjenza, fejn l-istituzzjonijiet għandhom riskju ta’ telf fil-każ ta’ inadempjenza, li għandhom ikunu rilevanti għall-kalkolu tal-valur tal-iskopertura indiretta li jirriżulta minn dawk il-kuntratti tad-derivattivi. Madankollu, meta l-istituzzjonijiet ma jkunux jistgħu japplikaw dik il-metodoloġija, u jiżguraw trattament konservattiv, jenħtieġ li jitħallew jiddeterminaw il-valur tal-iskopertura indiretta tal-istrumenti sottostanti bħala t-telf massimu li jistgħu jġarrbu wara l-inadempjenza tal-emittent tas-sottostanti li għalih jirreferi d-derivattiv. |
|
(5) |
Id-derivattivi jistgħu jinkitbu fuq strumenti li għandhom ismijiet ta’ referenza sottostanti multipli. Għal dawk id-derivattivi multisottostanti, fejn istituzzjoni tista’ tħares lejn l-ismijiet ta’ referenza sottostanti, u biex tiżgura li jintuża l-aktar metodu preċiż, il-valur tal-iskopertura indiretta għandu jiġi kkalkulat billi titqies il-varjazzjoni fil-prezz tad-derivattiv f’każ ta’ inadempjenza ta’ kull wieħed mill-ismijiet ta’ referenza sottostanti fl-istrument multisottostanti. Sabiex tiġi żgurata l-konsistenza mal-qafas ta’ skoperturi kbar applikabbli għal tranżazzjonijiet fejn ikun hemm skopertura għal assi sottostanti, l-Artikolu 6(1) u (2) tar-Regolament Delegat tal-Kummissjoni (UE) Nru 1187/2014 (2) jenħtieġ li japplika biex jassenja l-iskoperturi lill-klijent identifikat, klijent separat jew klijent mhux magħruf. F’każijiet fejn l-istituzzjonijiet ma jkunux jistgħu japplikaw approċċ ta’ trasparenza jew fejn approċċ ta’ trasparenza għal derivattiv b’ismijiet ta’ referenza multipli jkun ta’ piż żejjed għalihom, u biex jiżguraw trattament konservattiv, l-istituzzjonijiet għandhom jikkalkulaw il-valur tal-iskopertura indiretta billi jħarsu lejn il-varjazzjoni tal-prezz tad-derivattiv fil-każ ta’ inadempjenza ta’ dawk l-ismijiet ta’ referenza sottostanti kollha. Bl-istess mod, sabiex tiġi żgurata l-konsistenza mal-qafas tal-iskoperturi l-kbar applikabbli għal tranżazzjonijiet fejn ikun hemm skopertura għal assi sottostanti, jenħtieġ li l-Artikolu 6(3) tar-Regolament Delegat (UE) Nru 1187/2014 japplika biex jassenja l-iskopertura lil klijent separat jew klijent mhux magħruf. Fil-każijiet kollha fejn l-istrumenti sottostanti jiġu assenjati lill-klijent mhux magħruf, sabiex jiġi evitat ir-riskju li l-valuri negattivi ta’ skopertura indiretta jiġu paċuti b’valuri ta’ skopertura indiretta pożittivi, l-istituzzjonijiet għandhom jistabbilixxu għal żero kwalunkwe valur negattiv ta’ skopertura indiretta. |
|
(6) |
Dan ir-Regolament huwa bbażat fuq l-abbozz tal-istandards tekniċi regolatorji ppreżentat lill-Kummissjoni mill-Awtorità Bankarja Ewropea. |
|
(7) |
L-Awtorità Bankarja Ewropea wettqet konsultazzjonijiet pubbliċi miftuħin dwar l-abbozz tal-istandards tekniċi regolatorji li dan ir-Regolament huwa bbażat fuqhom, analizzat l-ispejjeż u l-benefiċċji potenzjali relatati u talbet il-parir tal-Grupp tal-Partijiet Bankarji Interessati stabbilit f’konformità mal-Artikolu 37 tar-Regolament (UE) Nru 1093/2010 tal-Parlament Ewropew u tal-Kunsill (3), |
ADOTTAT DAN IR-REGOLAMENT:
Artikolu 1
Regoli ġenerali għad-determinazzjoni tal-valur tal-iskopertura indiretta għal klijent li jirriżulta minn kuntratti tad-derivattivi u tad-derivattivi tal-kreditu
1. L-istituzzjonijiet għandhom jikkalkulaw il-valur tal-iskopertura indiretta għal klijent li jirriżulta minn kuntratti tad-derivattivi elenkati fl-Anness II tar-Regolament (UE) Nru 575/2013 u kuntratti tad-derivattivi ta’ kreditu, meta l-kuntratti tad-derivattivi ma jkunux daħlu fihom direttament ma’ dak il-klijent iżda l-istrument sottostanti ta’ dejn jew ekwità jkun inħareġ minn dak il-klijent, skont il-metodoloġija stabbilita fl-Artikoli 2 sa 5 ta’ dan ir-Regolament.
2. B’deroga mill-paragrafu 1, meta l-istrumenti sottostanti jkunu inklużi f’indiċi ta’ swap ta’ dejn, ekwità jew kreditu jew impriża ta’ investiment kollettiv, jew fejn il-kuntratti tad-derivattivi jkollhom ismijiet ta’ referenza sottostanti multipli, l-istituzzjonijiet għandhom jikkalkulaw il-valuri tal-iskopertura indiretta għal klijent li jirriżulta mill-kuntratti tad-derivattivi msemmija fil-paragrafu 1 u l-kontribuzzjoni ta’ dik l-iskopertura għall-iskopertura għal klijent skont il-metodoloġija stabbilita fl-Artikolu 6.
3. Meta l-kuntratti tad-derivattivi u tad-derivattivi tal-kreditu msemmija fil-paragrafu 1 jiġu allokati lill-portafoll tan-negozjar, wara l-kalkolu tal-valuri tal-iskopertura indiretta għal klijent li jirriżultaw minn dawk il-kuntratti, l-istituzzjonijiet għandhom jinkludu dawk il-valuri tal-iskopertura fl-iskoperturi għal dak il-klijent fil-portafoll tan-negozjar. Wara l-aggregazzjoni, l-iskoperturi netti negattivi għall-klijent għandhom jiġu stabbiliti għal żero.
4. B’deroga mill-paragrafi 1 u 2, meta l-kuntratti tad-derivattivi u tad-derivattivi ta’ kreditu msemmija fil-paragrafu 1 jiġu allokati lill-portafoll mhux tan-negozjar u fejn, wara l-kalkolu tal-valuri tal-iskopertura indiretta għal klijent li jirriżultaw minn dawk il-kuntratti, l-iskoperturi indiretti jkollhom valur negattiv, l-istituzzjonijiet għandhom jistabbilixxu għal żero dawk il-valuri tal-iskoperturi qabel ma jgħodduhom għall-iskoperturi għal dak il-klijent.
Artikolu 2
Allokazzjoni tal-iskoperturi indiretti għal kategoriji ta’ kuntratti tad-derivattivi
L-istituzzjonijiet għandhom jallokaw l-iskoperturi indiretti msemmija fl-Artikolu 1(1) għal waħda mill-kategoriji ta’ kuntratti tad-derivattivi li ġejjin:
|
(a) |
opzjonijiet fuq strumenti ta’ dejn u ekwità; |
|
(b) |
kuntratti ta’ derivattivi ta’ kreditu; |
|
(c) |
il-kuntratti derivattivi l-oħra kollha elenkati fl-Anness II tar-Regolament (UE) Nru 575/2013 li għandhom bħala assi sottostanti strument ta’ dejn jew ekwità u li mhumiex inklużi fil-kategoriji msemmija fil-punti (a) jew (b) ta’ dan il-paragrafu. |
Artikolu 3
Kalkolu tal-valur tal-iskopertura indiretta għal opzjonijiet fuq strumenti ta’ dejn u ekwità
1. Soġġett għall-paragrafi 2, 3 u 4 ta’ dan l-Artikolu, l-istituzzjonijiet għandhom jikkalkulaw il-valur tal-iskopertura indiretta għall-opzjonijiet imsemmija fl-Artikolu 2, il-punt (a), bħala s-somma tal-valur tas-suq attwali tal-opzjoni u l-ammont dovut lill-kontroparti tal-opzjoni bħala riżultat ta’ inadempjenza potenzjali tal-emittent tal-istrument sottostanti mnaqqas bl-ammont dovut lill-istituzzjoni minn dik il-kontroparti f’dak il-każ.
2. Għall-opzjonijiet eżerċitabbli, il-valur tal-iskopertura indiretta għandu jkun ugwali għall-valur tas-suq tal-opzjoni. Għal pożizzjoni twila f’opzjoni eżerċitabbli, il-valur tal-iskopertura indiretta għandu jkun pożittiv filwaqt li għal pożizzjoni qasira f’opzjoni eżerċitabbli, il-valur tal-iskopertura indiretta għandu jkun negattiv.
3. Għall-opzjonijiet put, il-valur tal-iskopertura indiretta għandu jkun ugwali għad-differenza bejn il-valur tas-suq tal-opzjoni u l-prezz tal-eżerċitar tagħha. Għal pożizzjoni qasira f’opzjoni put, il-valur tal-iskopertura indiretta għandu jkun pożittiv filwaqt li għal pożizzjoni twila f’opzjoni put, il-valur tal-iskopertura indiretta għandu jkun negattiv.
4. B’deroga mill-paragrafu 3, għal opzjonijiet put li ma għandhomx prezz tal-eżerċitar disponibbli fid-data tat-tranżazzjoni, iżda fi stadju aktar tard, l-istituzzjonijiet għandhom jużaw il-prezz tal-eżerċitar immudellat mistenni użat għall-kalkolu tal-valur ġust tal-opzjoni.
5. Meta l-valur tas-suq ta’ pożizzjoni ma jkunx disponibbli f’data partikolari, l-istituzzjonijiet għandhom jieħdu valur ġust għall-pożizzjoni f’dik id-data. Meta la l-valur tas-suq u lanqas il-valur ġust ta’ opzjoni ma jkunu disponibbli f’data partikolari, l-istituzzjonijiet għandhom jieħdu l-valur tas-suq jew il-valur ġust l-aktar reċenti. Meta la l-valur tas-suq u lanqas il-valur ġust ta’ opzjoni ma jkunu disponibbli fl-ebda data, l-istituzzjonijiet għandhom jieħdu l-valur li bih titkejjel l-opzjoni skont il-qafas kontabilistiku applikabbli.
Artikolu 4
Kalkolu tal-valuri tal-iskopertura indiretta għal kuntratti tad-derivattivi tal-kreditu
1. Il-valur tal-iskopertura indiretta għal klijent li jirriżulta minn kuntratti tad-derivattivi ta’ kreditu msemmija fl-Artikolu 2, il-punt (b), għandu jkun ugwali għas-somma tal-valur tas-suq attwali tal-kuntratt tad-derivattivi ta’ kreditu u l-ammont dovut lill-kontroparti tal-kuntratt tad-derivattivi ta’ kreditu bħala riżultat ta’ inadempjenza potenzjali tal-emittent tal-istrument sottostanti mnaqqas bl-ammont dovut lill-istituzzjoni minn dik il-kontroparti f’dak il-każ.
2. Meta l-valur tas-suq tad-derivattiv ta’ kreditu ma jkunx disponibbli f’data partikolari, l-istituzzjonijiet għandhom jieħdu l-valur ġust tad-derivattiv ta’ kreditu f’dik id-data. Meta la l-valur tas-suq, u lanqas il-valur ġust tad-derivattiv ta’ kreditu ma jkunu disponibbli f’data partikolari, l-istituzzjonijiet għandhom jieħdu l-valur tas-suq jew il-valur ġust l-aktar reċenti. Meta la l-valur tas-suq u lanqas il-valur ġust ta’ kuntratt tad-derivattivi ta’ kreditu ma jkunu disponibbli fi kwalunkwe data, l-istituzzjonijiet għandhom jieħdu l-valur li bih il-kuntratt tad-derivattivi ta’ kreditu jitkejjel skont il-qafas kontabilistiku applikabbli.
Artikolu 5
Kalkolu tal-valur tal-iskopertura indiretta għal kuntratti tad-derivattivi oħrajn elenkati fl-Anness II tar-Regolament (UE) Nru 575/2013
1. Meta jikkalkulaw il-valur tal-iskopertura indiretta għal klijent li jirriżulta minn kuntratti tad-derivattivi oħra msemmija fl-Artikolu 2, il-punt (c), inklużi swaps, futuri jew forwards, l-istituzzjonijiet għandhom jiddekomponu l-komponenti multipli tat-tranżazzjonijiet tagħhom f’komponenti individwali tat-tranżazzjonijiet.
2. Għall-komponenti tat-tranżazzjonijiet imsemmija fil-paragrafu 1 li jinvolvu riskju ta’ inadempjenza tal-emittent tal-istrument sottostanti, l-istituzzjonijiet għandhom jikkalkulaw il-valur tal-iskopertura indiretta tagħhom daqslikieku kienu pożizzjonijiet f’dawk il-komponenti.
3. Meta istituzzjoni ma tkunx tista’ tapplika t-trattament previst fil-paragrafi 1 u 2, hija għandha tiddetermina l-valur tal-iskopertura indiretta lejn l-emittent tal-istrumenti sottostanti bħala t-telf massimu li l-istituzzjoni ġġarrab minn inadempjenza potenzjali tal-emittent tal-istrumenti sottostanti li għalihom jirreferi l-kuntratt tad-derivattivi.
Artikolu 6
Kalkolu tal-valuri tal-iskopertura indiretta li jirriżultaw minn kuntratti tad-derivattivi b’multisottostanti
1. Meta jiddeterminaw il-valur tal-iskopertura indiretta għal klijent li jirriżulta minn kuntratti tad-derivattivi miktuba fuq indiċi ta’ dejn, ekwità jew swap ta’ inadempjenza tal-kreditu jew impriża ta’ investiment kollettiv, jew b’ismijiet ta’ referenza multisottostanti, l-istituzzjonijiet għandhom iħarsu lejn l-istrumenti sottostanti individwali kollha u jikkalkulaw il-valuri tal-iskopertura indiretti bħala l-varjazzjoni fil-prezz tal-kuntratt tad-derivattivi fil-każ ta’ inadempjenza ta’ kull wieħed mill-ismijiet ta’ referenza sottostanti. L-istituzzjonijiet għandhom jassenjaw kull valur tal-iskopertura indiretta jew lil klijent identifikat, klijent separat jew klijent mhux magħruf, kif stabbilit fl-Artikolu 6(1) u (2) tar-Regolament Delegat (UE) Nru 1187/2014.
2. Meta istituzzjoni ma tkunx tista’ tfittex l-istrumenti sottostanti individwali kollha tal-kuntratt tad-derivattivi kif previst fil-paragrafu 1 jew meta jkun ta’ piż żejjed għall-istituzzjoni li tagħmel dan, hija għandha:
|
(a) |
tħares lejn dawk l-istrumenti sottostanti individwali fejn l-istituzzjoni tkun tista’ tagħmel dan jew fejn ma jkunx ta’ piż bla bżonn għall-istituzzjoni li tagħmel dan u tikkalkula l-valur tal-iskopertura indiretta skont il-paragrafu 1; |
|
(b) |
għal dawk l-istrumenti sottostanti fejn l-istituzzjoni ma tkunx tista’ tfittex jew fejn ikun ta’ piż bla bżonn għal istituzzjoni li tagħmel dan, tikkalkula l-valur tal-iskopertura indiretta billi tħares lejn il-varjazzjoni tal-prezz tal-kuntratt tad-derivattivi fil-każ ta’ inadempjenza ta’ dawk l-ismijiet ta’ referenza sottostanti kollha. |
Il-valur tal-iskopertura indiretta msemmi fil-punt (b) tal-ewwel subparagrafu ta’ dan il-paragrafu għandu jiġi assenjat jew għat-tranżazzjoni derivattiva bħala klijent separat jew għall-klijent mhux magħruf, kif stabbilit fl-Artikolu 6(3) tar-Regolament Delegat (UE) Nru 1187/2014.
3. B’deroga mill-paragrafi 1 u 2 ta’ dan l-Artikolu, fejn il-valuri tal-iskopertura indiretta għandhom jiġu assenjati lill-klijent mhux magħruf, kif stabbilit fl-Artikolu 6(2) u (3) tar-Regolament Delegat tal-Kummissjoni (UE) Nru 1187/2014, u fejn il-valuri tal-iskopertura indiretta jkunu negattivi, l-istituzzjoni għandha tistabbilixxi għal żero dawk il-valuri tal-iskoperturi indiretti qabel tgħoddhom mal-iskoperturi għall-klijent mhux magħruf.
Artikolu 7
Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, l-10 ta’ Marzu 2022.
Għall-Kummissjoni
Il-President
Ursula VON DER LEYEN
(1) ĠU L 176, 27.6.2013, p. 1.
(2) Ir-Regolament Delegat tal-Kummissjoni (UE) Nru 1187/2014 tat-2 ta’ Ottubru 2014 li jissupplimenta r-Regolament (UE) Nru 575/2013 tal-Parlament Ewropew u tal-Kunsill rigward standards tekniċi regolatorji għad-determinazzjoni tal-iskopertura ġenerali għal klijent jew grupp ta’ klijenti relatati fir-rigward ta’ tranżazzjonijiet ma’ assi sottostanti (ĠU L 324, 7.11.2014, p. 1).
(3) Ir-Regolament (UE) Nru 1093/2010 tal-Parlament Ewropew u tal-Kunsill tal-24 ta’ Novembru 2010 li jistabbilixxi Awtorità Superviżorja Ewropea (Awtorità Bankarja Ewropea), u li jemenda d-Deċiżjoni Nru 716/2009/KE u jħassar id-Deċiżjoni tal-Kummissjoni 2009/78/KE (ĠU L 331, 15.12.2010, p. 12).