(1)

Skont l-Artikolu 10 tar-Regolament ta’ Implimentazzjoni (UE) 2019/317, l-Istati Membri għandhom ifasslu, fil-livell nazzjonali jew fil-livell ta’ blokok ta’ spazju tal-ajru funzjonali (“FABs”), miri vinkolanti tal-prestazzjoni għal kull perjodu referenzjarju tal-iskema tal-prestazzjoni għas-servizzi tan-navigazzjoni bl-ajru u għall-funzjonijiet tan-network. Dawk il-miri tal-prestazzjoni għandhom ikunu konsistenti mal-miri għall-Unjoni kollha adottati mill-Kummissjoni għall-perjodu referenzjarju kkonċernat.

(2)

Il-miri tal-prestazzjoni għall-Unjoni kollha għat-tielet perjodu referenzjarju (“RP3”) ġew oriġinarjament stabbiliti fid-Deċiżjoni ta’ Implimentazzjoni tal-Kummissjoni (UE) 2019/903 (4). Peress li dawk il-miri tal-prestazzjoni għall-Unjoni kollha u l-abbozz tal-pjanijiet tal-prestazzjoni għall-RP3 ġew ippreżentati sussegwentement f’Ottubru 2019 mill-Istati Membri u mill-Iżvizzera qabel it-tifqigħa tal-pandemija tal-COVID-19 f’Marzu 2020, ma qisux it-tnaqqis konsiderevoli fit-traffiku tal-ajru minħabba l-miżuri meħuda mill-Istati Membri u minn pajjiżi terzi sabiex irażżnu l-pandemija.

(3)

B’rispons għall-impatt tal-pandemija tal-COVID-19 fuq il-forniment ta’ servizzi tan-navigazzjoni bl-ajru, fir-Regolament ta’ Implimentazzjoni tal-Kummissjoni (UE) 2020/1627 (5) ġew stabbiliti miżuri eċċezzjonali għall-RP3, li jidderogaw mid-dispożizzjonijiet tar-Regolament ta’ Implimentazzjoni (UE) 2019/317. Fit-2 ta’ Ġunju 2021, il-Kummissjoni adottat id-Deċiżjoni ta’ Implimentazzjoni (UE) 2021/891 (6) li tistabbilixxi miri tal-prestazzjoni riveduti għall-Unjoni kollha għall-RP3. Fuq dik il-bażi, f’Ottubru 2021, l-Istati Membri u l-Iżvizzera ppreżentaw lill-Kummissjoni abbozzi tal-pjanijiet tal-prestazzjoni li fihom miri tal-prestazzjoni riveduti għall-RP3.

(4)

Id-Deċiżjoni ta’ Implimentazzjoni tal-Kummissjoni (UE) 2022/780 (7) analizzat ċerti miri tal-prestazzjoni li jinsabu fl-abbozz tal-pjan tal-prestazzjoni għall-RP3 ippreżentat mill-Iżvizzera, stabbilit b’mod konġunt fil-livell tal-Blokk tal-Ispazju tal-Ajru Funzjonali tal-Ewropa Ċentrali (“FABEC”), flimkien mal-Belġju, mal-Ġermanja, ma’ Franza, mal-Lussemburgu u man-Netherlands (“l-Istati Membri li huma parti mill-FABEC”). Il-Kummissjoni sabet li l-miri tal-prestazzjoni tal-kosteffiċjenza għaż-żona tal-imposti en route bejn il-Belġju u l-Lussemburgu ma kinux konsistenti mal-miri tal-prestazzjoni għall-Unjoni kollha u ħarġet rakkomandazzjonijiet għar-reviżjoni ta’ dawk il-miri.

(5)

B’rispons għall-gwerra ta’ aggressjoni tar-Russja kontra l-Ukrajna, li bdiet fl-24 ta’ Frar 2022, l-Unjoni imponiet miżuri restrittivi li jipprojbixxu lit-trasportaturi tal-ajru Russi, lil kwalunkwe inġenju tal-ajru rreġistrat fir-Russja u lil kwalunkwe inġenju tal-ajru mhux irreġistrat fir-Russja li huwa proprjetà ta’ jew mikri b’lokazzjoni, jew inkella li huwa kkontrollat minn kwalunkwe persuna, entità jew korp fiżiku jew ġuridiku Russu milli jillandja fi u jitlaq minn, jew itir fuq it-territorju tal-Unjoni. Dawk il-miżuri restrittivi u l-kontromiżuri adottati mir-Russja wasslu għal bidliet fit-traffiku tal-ajru fl-ispazju tal-ajru Ewropew. Ċerti Stati Membri ġew affettwati serjament mill-bidliet fl-għadd ta’ titjiriet li jgħaddu minn fuq l-ispazju tal-ajru taħt ir-responsabbiltà tagħhom. Madankollu, fil-livell tal-Unjoni kollha, l-impatt osservat fuq l-għadd ta’ titjiriet kien limitat b’kuntrast mat-tnaqqis qawwi tat-traffiku tal-ajru madwar l-Ewropa li rriżulta mit-tifqigħa tal-pandemija tal-COVID-19.

(6)

Fit-13 ta’ Lulju 2022, l-Iżvizzera, flimkien mal-Istati Membri li huma parti mill-FABEC, ippreżentat abbozz rivedut tal-pjan tal-prestazzjoni tal-FABEC għall-RP3 (“abbozz rivedut tal-pjan tal-prestazzjoni tal-FABEC”) għall-valutazzjoni mill-Kummissjoni.

(7)

Il-korp ta’ analiżi tal-prestazzjoni, li jassisti lill-Kummissjoni fl-implimentazzjoni tal-iskema ta’ prestazzjoni skont l-Artikolu 11(2) tar-Regolament (KE) Nru 549/2004, ippreżenta rapport lill-Kummissjoni li fih il-parir tiegħu dwar il-valutazzjoni tal-abbozz rivedut tal-pjan tal-prestazzjoni tal-FABEC.

(8)

F’konformità mal-Artikolu 15(1) tar-Regolament ta’ Implimentazzjoni (UE) 2019/317, il-Kummissjoni vvalutat il-konsistenza tal-miri tal-prestazzjoni tal-FAB li hemm fl-abbozz rivedut tal-pjan tal-prestazzjoni tal-FABEC abbażi tal-kriterji ta’ valutazzjoni stabbiliti fil-punt 1 tal-Anness IV ta’ dak ir-Regolament ta’ Implimentazzjoni, u qieset iċ-ċirkostanzi lokali. Fir-rigward ta’ kull qasam ewlieni tal-prestazzjoni u l-miri tal-prestazzjoni relatati, il-Kummissjoni kkomplementat il-valutazzjoni tagħha billi rrieżaminat l-elementi stabbiliti fil-punt 2 tal-Anness IV ta’ dak ir-Regolament ta’ Implimentazzjoni.

(9)

Il-previżjoni tat-traffiku bażi tal-Eurocontrol STATFOR ippubblikata f’Ġunju 2022 tqis it-tibdil fiċ-ċirkostanzi msemmija fil-premessa (5). Abbażi ta’ dik il-previżjoni, il-Kummissjoni tinnota li l-Iżvizzera u l-Istati Membri li huma parti mill-FABEC mhumiex previsti li jesperjenzaw bidliet kbar fil-flussi tat-traffiku tal-ajru matul l-RP3 bħala riżultat tal-gwerra tar-Russja fl-Ukrajna. Għalhekk, dawk iċ-ċirkostanzi mibdula ma għandhomx impatt dirett fuq il-miri tal-prestazzjoni li jinsabu fl-abbozz rivedut tal-pjan tal-prestazzjoni tal-FABEC jew fuq il-valutazzjoni ta’ dawk il-miri fir-rigward tal-konsistenza tagħhom mal-miri tal-prestazzjoni għall-Unjoni kollha.

(10)

Abbażi tal-valutazzjoni msemmija fil-premessa (8), il-Kummissjoni sabet li l-miri tal-prestazzjoni direttament applikabbli għall-fornituri tas-servizzi tan-navigazzjoni bl-ajru li joperaw fl-ispazju tal-ajru tal-Iżvizzera huma konsistenti mal-miri tal-prestazzjoni għall-Unjoni kollha. Għaldaqstant, ma ġiet stabbilita l-ebda sejba relatata f’din id-Deċiżjoni.

(11)

Madankollu, fid-Deċiżjoni (UE) 2022/2255 (8) tagħha, il-Kummissjoni kkonkludiet, fir-rigward tal-abbozz rivedut tal-pjan tal-prestazzjoni tal-FABEC, li l-miri tal-prestazzjoni tal-kosteffiċjenza proposti għaż-żona tal-imposti en route bejn il-Belġju u l-Lussemburgu għadhom iqajmu dubji dwar il-konsistenza tagħhom mal-miri tal-prestazzjoni għall-Unjoni kollha. Għalhekk, il-Kummissjoni ddeċidiet li tibda l-eżami ddettaljat stabbilit fl-Artikolu 15(3) tar-Regolament ta’ Implimentazzjoni (UE) 2019/317 fir-rigward ta’ dawk il-miri tal-prestazzjoni.

(12)

Għalhekk, jenħtieġ li l-Iżvizzera tiġi nnotifikata li l-Kummissjoni se tibda l-eżami ddettaljat stabbilit fl-Artikolu 15(3) tar-Regolament ta’ Implimentazzjoni (UE) 2019/317 fir-rigward tal-miri tal-prestazzjoni msemmija fil-premessa (11), li jinsabu fl-abbozz rivedut tal-pjan tal-prestazzjoni tal-FABEC adottat b’mod konġunt mill-Istati Membri li huma parti mill-FABEC u mill-Iżvizzera,