Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 32022D0706

Deċiżjoni ta’ Implimentazzjoni tal-Kummissjoni (UE) 2022/706 tal-5 ta’ Mejju 2022 li tistabbilixxi r-regoli għall-applikazzjoni tad-Deċiżjoni 1313/2013/UE tal-Parlament Ewropew u tal-Kunsill, fir-rigward ta’ kriterji u proċeduri għar-rikonoxximent ta’ impenn fit-tul u kontribuzzjonijiet straordinarji għall-Mekkaniżmu tal-Unjoni għall-Protezzjoni Ċivili (notifikata bid-dokument C(2022) 2884) (Test b’rilevanza għaż-ŻEE)

C/2022/2884

ĠU L 132, 6.5.2022, p. 102–106 (BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)

Legal status of the document In force

ELI: http://data.europa.eu/eli/dec_impl/2022/706/oj

6.5.2022   

MT

Il-Ġurnal Uffiċjali tal-Unjoni Ewropea

L 132/102

DEĊIŻJONI TA’ IMPLIMENTAZZJONI TAL-KUMMISSJONI (UE) 2022/706

tal-5 ta’ Mejju 2022

li tistabbilixxi r-regoli għall-applikazzjoni tad-Deċiżjoni 1313/2013/UE tal-Parlament Ewropew u tal-Kunsill, fir-rigward ta’ kriterji u proċeduri għar-rikonoxximent ta’ impenn fit-tul u kontribuzzjonijiet straordinarji għall-Mekkaniżmu tal-Unjoni għall-Protezzjoni Ċivili

(notifikata bid-dokument C(2022) 2884)

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat id-Deċiżjoni Nru 1313/2013/UE tal-Parlament Ewropew u tal-Kunsill tas-17 ta’ Diċembru 2013 dwar Mekkaniżmu tal-Unjoni għall-Protezzjoni Ċivili (1), u b’mod partikolari l-Artikolu 32(1), il-punt (hb) tagħha,

Billi:

(1)

Sabiex tirrikonoxxi u tonora l-impenn fit-tul u l-kontribuzzjonijiet straordinarji għall-Mekkaniżmu tal-Unjoni għall-Protezzjoni Ċivili (“il-Mekkaniżmu tal-Unjoni”), id-Deċiżjoni 1313/2013/UE tipprevedi li l-Kummissjoni tista’ tagħti medalji lir-riċevituri rilevanti.

(2)

Sabiex jingħataw tali medalji tal-Mekkaniżmu tal-Unjoni (“medalji tal-UCPM”), jenħtieġ li l-Kummissjoni tistabbilixxi l-kriterji u l-proċeduri għar-rikonoxximent tal-impenn fit-tul u tal-kontribuzzjonijiet straordinarji għall-Mekkaniżmu tal-Unjoni.

(3)

Minħabba l-approċċ transsettorjali tal-assistenza pprovduta permezz tal-Mekkaniżmu tal-Unjoni, il-medalji tal-UCPM jenħtieġ li jingħataw lill-ċittadini tal-Unjoni u ta’ pajjiżi terzi, inkluż il-persunal tal-protezzjoni ċivili, il-persunal tal-ġestjoni tad-diżastri, il-persunal militari tal-Istati Membri, jew il-persunal ta’ awtoritajiet jew korpi rilevanti oħra għall-kontribuzzjonijiet mogħtija lill-Mekkaniżmu tal-Unjoni. Il-medalji tal-UCPM jistgħu jingħataw lil persuni jew moduli fiżiċi, inklużi timijiet ta’ intervent, timijiet ta’ assistenza teknika u appoġġ (“TAST”), u kapaċitajiet oħra ta’ rispons irreġistrati fis-Sistema Komuni ta’ Komunikazzjoni u Informazzjoni f’Każ ta’ Emerġenza (“CECIS”).

(4)

Sabiex jiġu koperti l-attivitajiet taċ-ċiklu kollu tal-ġestjoni tad-diżastri, il-kamp ta’ applikazzjoni materjali tar-rikonoxximent u l-onorar tal-impenn fit-tul u l-kontribuzzjonijiet straordinarji għall-Mekkaniżmu tal-Unjoni jenħtieġ li jinkludi azzjonijiet ta’ prevenzjoni, tħejjija u rispons.

(5)

F’konformità mal-Artikolu 20a(3) tad-Deċiżjoni 1313/2013/UE, jenħtieġ li l-Kummissjoni tagħti żewġ tipi ta’ medalji tal-UCPM: midalja għal impenn fit-tul u midalja għal kontribut straordinarju. Huwa għalhekk meħtieġ li jiġu definiti l-kriterji ta’ eliġibbiltà għall-għoti ta’ kull tip ta’ midalja.

(6)

Peress li l-medalji tal-UCPM ġew introdotti fil-Mekkaniżmu tal-Unjoni bid-Deċiżjoni (UE) 2019/420 tal-Parlament Ewropew u tal-Kunsill (2), il-perjodu li għandu jitqies għad-determinazzjoni tal-eliġibbiltà ta’ riċevituri potenzjali ta’ medalji tal-UCPM jenħtieġ li jiġi stabbilit b’kont meħud tad-data tal-adozzjoni tagħhom, li hija l-21 ta’ Marzu 2019.

(7)

Il-Kummissjoni u l-Istati Membri għandhom ikunu intitolati li jinnominaw riċevituri potenzjali. Sabiex jiġu evalwati riċevituri potenzjali, kwalunkwe nomina bħal din għandha tiġi vvalutata minn Bord tal-Għotja, li għandu jikkonsisti mir-rappreżentanti tal-Kummissjoni. Il-Bord tal-Għotja għandu jiltaqa’ biex jagħmel rakkomandazzjonijiet lill-Kummissjoni biex tiddeċiedi dwar il-medalji tal-UCPM.

(8)

Sabiex ir-riċevituri jingħataw omaġġ b’mod xieraq, il-medalji tal-UCPM jenħtieġ li jingħataw f’ċerimonja formali, bħall-Forum Ewropew għall-Protezzjoni Ċivili jew ċerimonji formali oħra fuq bażi ad hoc.

(9)

Sabiex tiġi żgurata l-inklużjoni u tiġi promossa l-ugwaljanza, jenħtieġ li jitqiesu l-bilanċ bejn il-ġeneri u d-distribuzzjoni ġeografika meta jiġi deċiż li jingħataw medalji tal-UCPM.

(10)

Sabiex tiġi żgurata t-trasparenza, jenħtieġ li l-Kummissjoni żżomm reġistru ta’ medalji tal-UCPM mogħtija.

(11)

Il-miżuri previsti f’din id-Deċiżjoni huma f’konformità mal-opinjoni tal-Kumitat tal-Protezzjoni Ċivili msemmi fl-Artikolu 33(1) tad-Deċiżjoni Nru 1313/2013/UE,

ADOTTAT DIN ID-DEĊIŻJONI:

Artikolu 1

Suġġett

Din id-Deċiżjoni tistabbilixxi l-kriterji u l-proċeduri għall-għoti ta’ medalji tal-Mekkaniżmu tal-Unjoni għall-Protezzjoni Ċivili (“medalji tal-UCPM”) sabiex jiġu rikonoxxuti u onorati l-impenn u l-kontribuzzjonijiet straordinarji fit-tul għall-Mekkaniżmu tal-Unjoni għall-Protezzjoni Ċivili (“Mekkaniżmu tal-Unjoni”).

Artikolu 2

Definizzjonijiet

Għall-iskopijiet ta’ din id-Deċiżjoni, japplikaw id-definizzjonijiet li ġejjin:

(1)

“persuna ta’ karattru tajjeb” tfisser persuna li tkun ħielsa minn kwalunkwe kundanna kriminali preċedenti;

(2)

“kuraġġ eċċezzjonali” tfisser kuraġġ eċċezzjonali jew reżistenza kuraġġuża ogħla mill-aspettattivi filwaqt li dan jintwera fl-azzjoni;

(3)

“kisba meritevoli straordinarja” tfisser livell għoli ħafna ta’ twettiq, li jmur lil hinn minn dak li huwa normali jew tas-soltu.

Artikolu 3

Tipi ta’ medalji tal-UCPM

1.   Il-Kummissjoni għandha tagħti ż-żewġ tipi ta’ medalji tal-UCPM li ġejjin:

(a)

midalja għal impenn fit-tul;

(b)

midalja għal kontribuzzjoni straordinarja.

2.   Dawk li jirċievu l-midalji ma għandhom ikunu intitolati għall-ebda benefiċċju finanzjarju.

3.   Il-medalji tal-UCPM ma għandhomx jingħataw aktar minn darba għal kull tip lill-istess persuna fiżika, l-istess moduli, timijiet ta’ intervent, TAST jew kapaċitajiet oħra ta’ reazzjoni. Dawn jistgħu jingħataw ukoll wara l-mewt.

Artikolu 4

Eliġibbiltà

1.   Il-medalji tal-UCPM jistgħu jingħataw lill-persuni fiżiċi li ġejjin għall-kontribuzzjoni tagħhom għall-Mekkaniżmu tal-Unjoni:

(a)

membri tal-persunal tal-protezzjoni ċivili u tal-ġestjoni tad-diżastri tal-Istati Membri jew tal-Istati parteċipanti fil-Mekkaniżmu tal-Unjoni;

(b)

membri ta’ awtoritajiet, entitajiet jew korpi oħra li jikkontribwixxu għall-azzjonijiet taħt il-Mekkaniżmu tal-Unjoni;

(c)

ċittadini tal-Unjoni jew ċittadini ta’ pajjiżi terzi.

Dawk il-persuni fiżiċi għandhom ikunu ta’ karattru tajjeb.

2.   Il-medalji tal-UCPM jistgħu jingħataw lill-persuni fiżiċi li ġejjin għall-kontribuzzjoni tagħhom għall-Mekkaniżmu tal-Unjoni:

(a)

moduli stabbiliti skont id-Deċiżjoni 1313/2013/UE;

(b)

timijiet ta’ intervent kif definiti fl-Artikolu 2(4) tad-Deċiżjoni ta’ Implimentazzjoni tal-Kummissjoni 2014/762/UE (3);

(c)

timijiet ta’ assistenza teknika u appoġġ (“TAST”) kif definiti fl-Artikolu 2(5) tad-Deċiżjoni ta’ Implimentazzjoni 2014/762/UE;

(d)

kapaċitajiet oħra ta’ reazzjoni kif imsemmi fl-Artikolu 9(4) tad-Deċiżjoni Nru 1313/2013/UE.

Dawk l-entitajiet għandhom ikunu rreġistrati fis-Sistema Komuni ta’ Komunikazzjoni u Informazzjoni f’każ ta’ Emerġenza (CECIS).

3.   Il-persunal tal-Unjoni soġġett għar-Regolamenti tal-Persunal għall-Uffiċjali tal-Unjoni Ewropea u l-Kondizzjonijiet tal-Impjieg applikabbli għall-Aġenti l-Oħra tal-Unjoni, stabbiliti fir-Regolament tal-Kunsill (KEE, Euratom, KEFA) Nru 259/68 (4) ma għandux ikun eliġibbli għall-medalji tal-UCPM.

Artikolu 5

Perjodu ta’ eliġibbiltà

Il-perjodu ta’ eliġibbiltà għall-għoti ta’ medalji tal-UCPM għandu jibda fil-21 ta’ Marzu 2019.

Artikolu 6

Midalja għal impenn fit-tul

Il-midalja tal-UCPM għal impenn fit-tul tista’ tingħata lir-riċevituri eliġibbli msemmija fl-Artikolu 4(1) u (2) li jissodisfaw waħda mill-kundizzjonijiet li ġejjin:

(a)

ikunu ġew skjerati f’mill-inqas tliet okkażjonijiet f’operazzjonijiet ta’ rispons taħt il-Mekkaniżmu tal-Unjoni;

(b)

ikunu wrew impenn professjonali fit-tul għal azzjonijiet ta’ prevenzjoni jew tħejjija taħt il-Mekkaniżmu tal-Unjoni. Il-perjodi ta’ żmien iddedikati mir-riċevituri eliġibbli kkonċernati għal tali azzjonijiet għandhom jittieħdu bħala rikonoxximent tal-impenn tagħhom.

Artikolu 7

Midalja għal kontribuzzjonijiet straordinarji.

Il-medalja tal-UCPM għal kontribuzzjoni straordinarja tista’ tingħata lir-riċevituri eliġibbli msemmija fl-Artikolu 4(1) u (2) li jissodisfaw waħda mill-kundizzjonijiet li ġejjin:

(a)

ikunu wrew att ta’ qlubija eċċezzjonali, kisba meritevoli straordinarja jew attività lil hinn minn dak li jista’ jkun raġonevolment mistenni matul operazzjoni ta’ rispons taħt il-Mekkaniżmu tal-Unjoni;

(b)

ikunu kkontribwew kisba meritevoli straordinarja għall-iżvilupp tal-Mekkaniżmu tal-Unjoni b’mod ġenerali.

Artikolu 8

Nomina

1.   Il-Kummissjoni u l-Istati Membri jistgħu jippreżentaw nomini lill-Bord tal-Għotja għall-għoti ta’:

(a)

medalji tal-UCPM għal impenn fit-tul ibbażat fuq il-kriterji stabbiliti fl-Artikolu 6;

(b)

medalji tal-UCPM għal kontribuzzjoni straordinarja abbażi tal-kriterji stabbiliti fl-Artikolu 7.

2.   Il-Kummissjoni, permezz taċ-Ċentru ta’ Koordinazzjoni tar-Reazzjoni f’każ ta’ Emerġenza, għandha tirrevedi b’mod regolari n-nomini u tirrapporta lill-Bordijiet tal-Għotjiet meta jiġu ssodisfati l-kriterji msemmija fl-Artikolu 6.

Artikolu 9

Bord ta’ Għotja u deċiżjoni ta’ għoti

1.   Għandu jiġi stabbilit Bord ta’ Għotja biex jirrevedi n-nomini ppreżentati mill-Kummissjoni jew mill-Istati Membri skont l-Artikolu 8 jagħmel rakkomandazzjonijiet lill-Kummissjoni fir-rigward tal-għoti tal-medalji tal-UCPM.

2.   Il-Bord tal-Għotja għandu jkun magħmul minn tliet rappreżentanti tal-Kummissjoni.

3.   Il-Kummissjoni għandha tlaqqa’ l-Bord tal-Għotja mill-inqas xahar qabel ma ssir iċ-ċerimonja msemmija fl-Artikolu 11(1).

Il-Bord tal-Għotja għandu jqis il-bilanċ bejn is-sessi u d-distribuzzjoni ġeografika meta jiddeċiedi dwar l-għoti tal-medalji tal-UCPM.

Artikolu 10

Ir-revoka u r-rinunzja tal-medalji tal-UCPM mogħtija

1.   Il-Kummissjoni għandha tirrevoka kwalunkwe medalja tal-UCPM mogħtija fil-każ ta’ kundanna kriminali, jew kwalunkwe azzjoni li tkun diżonorabbli jew li tista’ tagħmel ħsara lill-interessi tal-Unjoni.

2.   Ir-riċevituri għandhom jirriżervaw id-dritt li jirrinunzjaw għall-midalja tal-UCPM mogħtija.

Artikolu 11

Iċ-ċerimonja tal-għoti tal-medalji tal-UCPM

1.   Il-medalji tal-UCPM għandhom jingħataw fil-Forum Ewropew għall-Protezzjoni Ċivili, jew fejn xieraq, f’ċerimonji formali fuq bażi ad hoc.

2.   Il-medalji tal-UCPM għandhom jingħataw lir-riċevituri jew lir-rappreżentanti tagħhom minn rappreżentant tal-Kummissjoni.

3.   Meta r-riċevitur tal-midalja tal-UCPM ikun modulu, tim ta’ intervenzjoni, TAST jew kapaċità oħra ta’ rispons, il-midalja tal-UCPM għandha tingħata lill-mexxej tat-tim jew lir-rappreżentant tiegħu li jirċeviha f’isem il-modulu, it-tim ta’ intervenzjoni, it-TAST jew kapaċità oħra ta’ rispons rispettivi.

Artikolu 12

Diżinn u reġistru pubbliku online

1.   Il-Kummissjoni għandha tiddetermina d-disinn u l-mudell tal-medalji tal-UCPM.

2.   Il-Kummissjoni għandha żżomm reġistru pubbliku online tar-riċevituri ta’ medalji tal-UCPM.

Artikolu 13

Ilbies tal-midalji tal-UCPM

L-ilbies tal-medalji tal-UCPM għandu jkun irregolat mir-regolamenti rilevanti tal-Istat riċevitur.

Artikolu 14

Destinatarji

Din id-Deċiżjoni hija indirizzata lill-Istati Membri.

Magħmul fi Brussell, il-5 ta’ Mejju 2022.

Għall-Kummissjoni

Janez LENARČIČ

Membru tal-Kummissjoni

(1)  ĠU L 347, 20.12.2013, p. 924.

(2)  Id-Deċiżjoni (UE) 2019/420 tal-Parlament Ewropew u tal-Kunsill tat-13 ta’ Marzu 2019 li temenda d-Deċiżjoni Nru 1313/2013/UE dwar Mekkaniżmu tal-Unjoni għall-Protezzjoni Ċivili (ĠU L 77 I, 20.3.2019, p. 1).

(3)  Id-Deċiżjoni ta’ Implimentazzjoni tal-Kummissjoni 2014/762/UE tas-16 ta’ Ottubru 2014 li tistabbilixxi r-regoli għall-implimentazzjoni tad-Deċiżjoni Nru 1313/2013/UE tal-Parlament Ewropew u tal-Kunsill dwar Mekkaniżmu tal-Unjoni għall-Protezzjoni Ċivili u li tħassar id-Deċiżjonijiet tal-Kummissjoni 2004/277/KE, Euratom u 2007/606/KE, Euratom (ĠU L 320, 6.11.2014, p. 1).

(4)  Ir-Regolament tal-Kunsill (KEE, Euratom, KEFA) Nru 259/68 tad-29 ta' Frar 1968 li jistabbilixxi r-Regolamenti tal-Persunal tal-uffiċjali u l-kondizzjonijiet ta' impjieg ta' uffiċjali oħra tal-Komunitajiet Ewropej u li jistabbilixxi miżuri temporanji applikabbli għall-Uffiċjali tal-Kummissjoni (ĠU L 56, 4.3.1968, p. 1).

Top