(1)

Ir-Regolament (UE) 2019/818, flimkien mar-Regolament (UE) 2019/817 tal-Parlament Ewropew u tal-Kunsill (2), jistabbilixxi qafas biex tiġi żgurata l-interoperabbiltà bejn is-sistemi ta’ informazzjoni tal-UE fil-qasam tal-fruntieri, il-viża, il-kooperazzjoni tal-pulizija u ġudizzjarja, l-ażil u l-migrazzjoni.

(2)

Sabiex tittejjeb il-kwalità tad-data u jiġu armonizzati r-rekwiżiti tal-kwalità, huwa meħtieġ li jiġu stabbiliti d-dettalji tal-mekkaniżmi u l-proċeduri awtomatizzati għall-kontroll tal-kwalità tad-data, l-indikaturi komuni tal-kwalità tad-data u l-istandards minimi tal-kwalità għad-data mdaħħla u maħżuna fis-sistemi ta’ informazzjoni sottostanti tal-UE, is-servizz kondiviż ta’ tqabbil bijometriku u r-repożitorju komuni ta’ informazzjoni dwar l-identità.

(3)

Jenħtieġ li dawk il-miżuri jiġu implimentati u vvalutati mill-Aġenzija tal-Unjoni Ewropea għat-Tmexxija Operattiva tas-Sistemi tal-IT Fuq Skala Kbira fl-Ispazju ta’ Libertà, Sigurtà u Ġustizzja (eu-LISA) filwaqt li jitqiesu d-dispożizzjonijiet speċifiċi stabbiliti għal kull sistema ta’ informazzjoni tal-UE u l-komponent tal-interoperabbiltà. Biex twettaq dawn il-kompiti, jenħtieġ li l-eu-LISA tingħata pariri minn esperti mill-Kummissjoni, mill-Istati Membri u mill-aġenziji tal-Unjoni li jużaw is-sistemi ta’ informazzjoni u l-komponenti tal-interoperabbiltà tal-UE.

(4)

Jenħtieġ li l-mekkaniżmi u l-proċeduri għall-kontroll tal-kwalità tad-data jiddeterminaw il-konformità tad-data tal-input mar-regoli tal-imblukkar u dawk mhux vinkolanti applikabbli għas-sistemi ta’ informazzjoni sottostanti tal-UE, għas-servizz kondiviż ta’ tqabbil bijometriku u għar-repożitorju komuni ta’ informazzjoni dwar l-identità. L-eu-LISA jenħtieġ li tkun responsabbli biex tiżgura li r-regoli dwar il-kwalità tad-data jibqgħu xierqa biex jintlaħqu l-objettivi tas-sistemi ta’ informazzjoni tal-UE u tal-komponenti tal-interoperabbiltà.

(5)

Għal kull indikatur tal-kontroll tal-kwalità, jenħtieġ li l-eu-LISA tiddetermina u tivvaluta l-adegwatezza tal-istandard minimu ta’ kwalità indispensabbli għall-ħżin tad-data fis-sistemi ta’ informazzjoni tal-UE u fil-komponenti tal-interoperabbiltà. Jenħtieġ li l-istandards tal-kwalità tad-data jippermettu l-identifikazzjoni awtomatika ta’ sottomissjonijiet ta’ data apparentement inkorretti jew inkonsistenti, sabiex l-Istat Membru ta’ oriġini jkun jista’ jivverifika d-data u jwettaq kwalunkwe azzjoni ta’ rimedju meħtieġa.

(6)

Jenħtieġ li l-mekkaniżmi tat-tindif u tal-identifikazzjoni tal-problemi tad-data jiġu stabbiliti sabiex jivverifikaw b’mod regolari l-validità u l-konformità tad-data maħżuna fis-sistemi ta’ informazzjoni sottostanti tal-UE u l-komponenti tal-interoperabbiltà mal-istandards tal-kwalità tad-data.

(7)

Jenħtieġ li l-eu-LISA tiżgura kapaċità ta’ monitoraġġ ċentrali għall-kwalità tad-data u għall-produzzjoni ta’ rapporti dwar il-kwalità tad-data fuq bażi regolari lill-Istati Membri. Jenħtieġ li dawn ir-rapporti jiġu prodotti mir-repożitorju ċentrali għar-rapportar u għall-istatistika skont l-Artikolu 39(1) tar-Regolament (UE) 2019/818 u r-regoli stabbiliti fir-Regolament Delegat tal-Kummissjoni 2021/2222 (3).

(8)

Billi r-Regolament (UE) 2019/818 jibni fuq l-acquis ta’ Schengen, skont l-Artikolu 4 tal-Protokoll Nru 22 dwar il-Pożizzjoni tad-Danimarka, anness mat-Trattat dwar l-Unjoni Ewropea u mat-Trattat dwar il-Funzjonament tal-Unjoni Ewropea, id-Danimarka nnotifikat l-implimentazzjoni tar-Regolament (UE) 2019/818 fid-dritt nazzjonali tagħha. Għaldaqstant hija marbuta b’dan ir-Regolament.

(9)

Dan ir-Regolament jikkostitwixxi żvilupp tad-dispożizzjonijiet tal-acquis ta’ Schengen li fihom l-Irlanda ma tiħux sehem (4). Għaldaqstant l-Irlanda mhix qed tieħu sehem fl-adozzjoni ta’ dan ir-Regolament u mhix marbuta bih jew suġġetta għall-applikazzjoni tiegħu.

(10)

Fir-rigward tal-Iżlanda u n-Norveġja, dan ir-Regolament jikkostitwixxi żvilupp tad-dispożizzjonijiet tal-acquis ta’ Schengen fis-sens tal-Ftehim konkluż mill-Kunsill tal-Unjoni Ewropea u r-Repubblika tal-Iżlanda u r-Renju tan-Norveġja dwar l-assoċjazzjoni ta’ dawn iż-żewġ Stati mal-implimentazzjoni, l-applikazzjoni u l-iżvilupp tal-acquis ta’ Schengen (5), li jaqgħu fil-qasam imsemmi fl-Artikolu 1, punt A, tad-Deċiżjoni tal-Kunsill 1999/437/KE (6).

(11)

Fir-rigward tal-Iżvizzera, dan ir-Regolament jikkostitwixxi żvilupp tad-dispożizzjonijiet tal-acquis ta’ Schengen, fis-sens tal-Ftehim bejn l-Unjoni Ewropea, il-Komunità Ewropea u l-Konfederazzjoni Żvizzera dwar l-assoċjazzjoni tal-Konfederazzjoni Żvizzera mal-implimentazzjoni, l-applikazzjoni u l-iżvilupp tal-acquis ta’ Schengen (7) li jaqgħu fil-qasam imsemmi fl-Artikolu 1, punt A, tad-Deċiżjoni tal-Kunsill 1999/437/KE moqri flimkien mal-Artikolu 3 tad-Deċiżjoni tal-Kunsill 2008/146/KE (8).

(12)

Fir-rigward tal-Liechtenstein, dan ir-Regolament jikkostitwixxi żvilupp tad-dispożizzjonijiet tal-acquis ta’ Schengen fis-sens tal-Protokoll bejn l-Unjoni Ewropea, il-Komunità Ewropea, il-Konfederazzjoni Żvizzera u l-Prinċipat tal-Liechtenstein dwar l-adeżjoni tal-Prinċipat tal-Liechtenstein mal-Ftehim bejn l-Unjoni Ewropea, il-Komunità Ewropea u l-Konfederazzjoni Żvizzera dwar l-assoċjazzjoni tal-Konfederazzjoni Żvizzera mal-implimentazzjoni, l-applikazzjoni u l-iżvilupp tal-acquis ta’ Schengen (9), li jaqgħu fil-qasam imsemmi fl-Artikolu 1, punt A, tad-Deċiżjoni tal-Kunsill 1999/437/KE, moqri flimkien mal-Artikolu 3 tad-Deċiżjoni tal-Kunsill 2011/350/UE (10).

(13)

Fir-rigward ta’ Ċipru, il-Bulgarija, ir-Rumanija u l-Kroazja, dan ir-Regolament jikkostitwixxi att li jibni fuq l-acquis ta’ Schengen, jew huwa marbut mod ieħor miegħu, skont it-tifsira, rispettivament, tal-Artikolu 3(1) tal-Att ta’ Adeżjoni tal-2003, l-Artikolu 4(1) tal-Att ta’ Adeżjoni tal-2005 u l-Artikolu 4(1) tal-Att ta’ Adeżjoni tal-2011.

(14)

Il-Kontrollur Ewropew għall-Protezzjoni tad-Data ġie kkonsultat f’konformità mal-Artikolu 42(1) tar-Regolament (UE) 2018/1725 tal-Parlament Ewropew u tal-Kunsill (11) u ta opinjoni fit-30 ta’ April 2021.

(15)

Il-miżuri previsti f’dan ir-Regolament huma skont l-opinjoni tal-Kumitat dwar l-Interoperabbiltà,

(a)

“data tal-input” tfisser data, soġġetta għal verifiki tal-kwalità tad-data għall-fini li tinħażen f’sistema ta’ informazzjoni jew komponent tal-interoperabbiltà tal-UE msemmija fl-Artikolu 37(1) tar-Regolament (UE) 2019/818;

(b)

“mekkaniżmu tat-tindif tad-data” tfisser mekkaniżmu li jwettaq kontrolli sabiex jiżgura t-tħassir skedat tad-data maħżuna f’sistema ta’ informazzjoni jew komponent tal-interoperabbiltà tal-UE f’konformità mad-dritt tal-Unjoni;

(c)

“mekkaniżmu ta’ detezzjoni tal-problemi” tfisser mekkaniżmu li jwettaq kontrolli sabiex jidentifika data li ma tissodisfax ir-regoli jew l-istandards tal-kwalità tad-data;

(d)

“regoli tal-imblukkar” tfisser regoli jew sett ta’ regoli li jkejlu l-grad sa fejn id-data tal-input tkun konformi ma’ rekwiżiti tad-data definiti li jikkundizzjonaw il-ħżin jew l-użu tagħha jew it-tnejn li huma. Dawn jinkludu wkoll regoli dwar il-kwalità tad-data li jirregolaw kull sistema ta’ informazzjoni tal-UE li jridu jiġu osservati qabel ma d-data tkun tista’ tiddaħħal fis-sistema. Id-data tal-input li ma tikkonformax ma’ regola tal-imblukkar tiġi rrifjutata milli tiddaħħal u tinħażen fis-sistema ta’ informazzjoni u fil-komponent tal-interoperabbiltà tal-UE;

(e)

“regoli mhux vinkolanti” tfisser regoli jew sett ta’ regoli li jkejlu l-grad sa fejn id-data tal-input tkun konformi mar-rekwiżiti tad-data definiti li jikkundizzjonaw ir-rilevanza tagħha jew l-aħjar użu tagħha jew it-tnejn li huma. Regoli mhux vinkolanti ma għandhomx jipprevjenu d-dħul u l-ħżin ta’ data tal-input mhux konformi. Dawn jinkludu wkoll regoli dwar il-kwalità tad-data li jirregolaw kull sistema ta’ informazzjoni tal-UE li għandhom jiġu segwiti qabel ma d-data tkun tista’ tiddaħħal fis-sistema. Id-data tal-input li ma tikkonformax ma’ regola mhux vinkolanti għandha tiddaħħal fis-sistema ta’ informazzjoni tal-UE jew il-komponent tal-interoperabbiltà b’indikaturavviż jew messaġġ ta’ twissija dwar problema fil-kwalità tad-data.