(1)

Il-Komunità Ewropea tal-Enerġija Atomika, skont l-Artikolu 2 tat-Trattat li jistabbiliha (“it-Trattat”), għandha tiżgura li l-utenti kollha fil-Komunità jirċievu provvista regolari u ekwa ta’ minerali u fjuwils nukleari, permezz ta’ politika komuni ta’ provvista bbażata fuq il-prinċipju ta’ aċċess ugwali għas-sorsi tal-provvista.

(2)

Fl-interess tal-politika komuni tal-provvista, ġiet stabbilita Aġenzija Fornitriċi (“l-Aġenzija” jew l-“Aġenzija Fornitriċi tal-Euratom”) permezz tal-Kapitolu 6 tat-Trattat.

(3)

Is-sigurtà tal-provvista tal-enerġija, li hija l-għan prinċipali tal-Aġenzija, hija objettiv ewlieni tal-politika tal-Unjoni dwar l-enerġija, skont l-Artikolu 194 tat-Trattat dwar il-Funzjonament tal-Unjoni Ewropea. Dan ġie affermat mill-ġdid fil-Komunikazzjoni tal-Kummissjoni dwar l-Istrateġija Ewropea għas-Sigurtà tal-Enerġija (3), adottata fl-2014 u approvata mill-Kunsill.

(4)

F’konformità mal-Artikolu 60 (6) tat-Trattat, ir-regoli tal-Aġenzija, li għandhom jeħtieġu l-approvazzjoni mill-Kummissjoni, għandhom jistabbilixxu l-mod li bih id-domanda għandha tiġi bilanċjata kontra l-provvista.

(5)

Ir-Regoli tal-Aġenzija fis-seħħ ġew adottati fl-1960 (4) u ġew emendati parzjalment fl-1975 (5).

(6)

Sa mis-snin 70, l-iżvilupp ta’ teknoloġiji u prodotti ġodda taċ-ċiklu tal-fjuwil, kif ukoll id-dehra ta’ atturi ġodda tas-suq (partikolarment, l-intermedjarji) u ta’ prattiki kummerċjali ġodda affettwaw b’mod sostanzjali r-rwol tal-Aġenzija fis-sigurtà tal-provvista nukleari. Fl-istess ħin, l-għadd ta’ atturi fis-suq żdied b’mod konsiderevoli.

(7)

L-istatuti tal-Aġenzija, stabbiliti fl-2008, saħħew ir-rwol tagħha fil-monitoraġġ tas-suq u fl-għoti ta’ għarfien espert, ta’ informazzjoni u ta’ pariri rilevanti lill-Komunità, u b’hekk issaħħet il-ħtieġa li l-Aġenzija jkollha għarfien sħiħ u aġġornat tas-suq tal-materjali u s-servizzi nukleari, inkluż tax-xejriet tas-suq dinji.

(8)

Bħala konsegwenza tal-iżviluppi ta’ hawn fuq, ir-Regoli tal-1960/1975 tal-Aġenzija ma għadhomx jippermettu lill-Aġenzija Fornitriċi tal-Euratom tirreaġixxi għall-iżviluppi fis-suq nukleari u jistgħu jipperikolaw il-kapaċità tal-Aġenzija li twettaq il-missjoni tagħha.

(9)

Jeħtieġ li jiġu adattati sabiex tissaħħaħ iċ-ċertezza legali għall-industrija, l-Istati Membri u l-Kummissjoni Ewropea, u biex l-Aġenzija tkun tista’ tiżgura l-ġbir xieraq tad-data għall-Osservatorju tas-Suq tagħha.

(10)

Skont l-Artikolu 55 tat-Trattat, l-Aġenzija hija intitolata li tirċievi l-informazzjoni kollha li teħtieġ biex tkun tista’ teżerċita d-dritt tagħha tal-għażla u d-dritt esklussiv tagħha li tikkonkludi kuntratti ta’ provvista.

(11)

Fit-twettiq tal-kompiti tagħha, l-Aġenzija taġixxi skont il-prinċipji ta’ nondiskriminazzjoni u ta’ aċċess ugwali għas-sorsi ta’ provvista.

(12)

Il-proċeduri għall-ibbilanċjar tad-domanda kontra l-provvista għandhom jiġu stabbiliti b’tali mod li jkun possibbli li jiġu ssodisfati l-ħtiġijiet f’diversi sitwazzjonijiet ta’ provvista.

(13)

Huwa xieraq li jinżamm il-kuntrattar dirett bejn l-utenti, il-produtturi u l-intermedjarji, dment li tiġi żgurata l-provvista regolari ta’ materjali nukleari lill-utenti Komunitarji.

(14)

Fid-dawl ta’ dan il-kunsiderazzjonijiet, l-Aġenzija ħadet l-inizjattiva li taġġorna r-Regoli tagħha, b’kooperazzjoni mal-partijiet ikkonċernati tagħha. Il-Kumitat Konsultattiv tal-Aġenzija, imlaqqa’ u kkonsultat kif xieraq fit-13 ta’ Mejju 2016, ta opinjoni favorevoli dwar ir-Regoli l-ġodda.

(15)

Skont l-Istatuti tal-Aġenzija, ir-Regoli tagħha għandhom jiġu adottati b’deċiżjoni tad-Direttur Ġenerali tal-Aġenzija, li teħtieġ l-approvazzjoni tal-Kummissjoni.

(16)

Għal raġunijiet ta’ ċarezza, ir-Regoli attwali tal-Aġenzija jenħtieġ li jitħassru mad-dħul fis-seħħ ta’ dawk ġodda.

(17)

Huwa għalhekk xieraq li jiġu adottati r-Regoli annessi ma’ din id-Deċiżjoni u, mad-dħul fis-seħħ tagħhom, jitħassru r-Regoli tal-Aġenzija attwalment fis-seħħ,