This document is an excerpt from the EUR-Lex website
Document 32019D0120
Commission Implementing Decision (EU) 2019/120 of 24 January 2019 amending Council Directive 2008/90/EC as regards the extension of the derogation relating to import conditions for fruit plant propagating material and fruit plants intended for fruit production from third countries (notified under document C(2019) 254)
Deċiżjoni ta' Implimentazzjoni tal-Kummissjoni (UE) 2019/120 tal-24 ta' Jannar 2019 li temenda d-Direttiva tal-Kunsill 2008/90/KE fir-rigward tal-estensjoni tad-deroga dwar il-kondizzjonijiet tal-importazzjoni tal-materjal tal-propagazzjoni tal-pjanti tal-frott u tal-pjanti tal-frott maħsuba għall-produzzjoni tal-frott minn pajjiżi terzi (notifikata bid-dokument C(2019) 254)
Deċiżjoni ta' Implimentazzjoni tal-Kummissjoni (UE) 2019/120 tal-24 ta' Jannar 2019 li temenda d-Direttiva tal-Kunsill 2008/90/KE fir-rigward tal-estensjoni tad-deroga dwar il-kondizzjonijiet tal-importazzjoni tal-materjal tal-propagazzjoni tal-pjanti tal-frott u tal-pjanti tal-frott maħsuba għall-produzzjoni tal-frott minn pajjiżi terzi (notifikata bid-dokument C(2019) 254)
C/2019/254
ĠU L 24, 28.1.2019, p. 27–28
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
In force
28.1.2019 |
MT |
Il-Ġurnal Uffiċjali tal-Unjoni Ewropea |
L 24/27 |
DEĊIŻJONI TA' IMPLIMENTAZZJONI TAL-KUMMISSJONI (UE) 2019/120
tal-24 ta' Jannar 2019
li temenda d-Direttiva tal-Kunsill 2008/90/KE fir-rigward tal-estensjoni tad-deroga dwar il-kondizzjonijiet tal-importazzjoni tal-materjal tal-propagazzjoni tal-pjanti tal-frott u tal-pjanti tal-frott maħsuba għall-produzzjoni tal-frott minn pajjiżi terzi
(notifikata bid-dokument C(2019) 254)
IL-KUMMISSJONI EWROPEA,
Wara li kkunsidrat dwar il-Funzjonament tal-Unjoni Ewropea,
Wara li kkunsidrat id-Direttiva tal-Kunsill 2008/90/KE tad-29 ta' Settembru 2008 dwar il-kummerċjalizzazzjoni tal-materjal tal-propagazzjoni tal-pjanti tal-frott u tal-pjanti tal-frott maħsuba għall-produzzjoni tal-frott (1), u b'mod partikolari it-tieni subparagrafu tal-Artikolu 12(2) tiegħu,
Billi:
(1) |
L-Artikolu 12(1) tad-Direttiva 2008/90/KE jirrikjedi lill-Kummissjoni li tiddeċiedi jekk il-materjal tal-propagazzjoni u l-pjanti tal-frott prodotti f'pajjiż terz u li joffru l-istess garanziji rigward l-obbligi tal-fornitur, l-identità, il-karatteristiċi, is-saħħa tal-pjanti, il-mezz tat-tkabbir, l-imballaġġ, l-arranġamenti għall-ispezzjoni, l-immarkar u l-issiġillar humiex ekwivalenti f'dawn l-aspetti kollha għall-materjal tal-propagazzjoni tal-pjanti tal-frott u l-pjanti tal-frott prodotti fl-Unjoni u li jħarsu l-ħtiġijiet u l-kondizzjonijiet ta' dik id-Direttiva. L-Artikolu 12(2) tad-Direttiva 2008/90/KE jipprovdi għal deroga li tippermetti lill-Istati Membri, fl-istennija ta' din id-deċiżjoni, li japplikaw il-kundizzjonijiet għall-importazzjoni ta' materjal ta' propagazzjoni u pjanti tal-frott li ta' mill-inqas huma ekwivalenti għal dawk li japplikaw għall-materjal tal-propagazzjoni tal-pjanti tal-frott u l-pjanti tal-frott prodotti fl-Unjoni. |
(2) |
Din id-deroga ngħatat sal-31 ta' Diċembru 2018. Għalhekk l-Istati Membri jistgħu japplikaw kondizzjonijiet ekwivalenti għad-Direttivi ta' Implimentazzjoni tal-Kummissjoni 2014/96/UE (2), 2014/97/UE (3) u 2014/98/UE (4). |
(3) |
L-informazzjoni disponibbli attwalment dwar il-kondizzjonijiet li japplikaw f'pajjiżi terzi għadha mhijiex biżżejjed biex tħalli lill-Kummissjoni tadotta xi deċiżjoni bħal din dwar xi pajjiż terz f'dan l-istadju. |
(4) |
Sabiex ix-xejriet tal-kummerċ ma jiġux imħarbta, l-Istati Membri jenħtieġ li jkomplu jibbenefikaw minn dik id-deroga. |
(5) |
Mill-14 ta' Diċembru 2019, ir-regoli tas-saħħa tal-pjanti ġodda stabbiliti fir-Regolament (UE) 2016/2031 tal-Parlament Ewropew u tal-Kunsill (5) se japplikaw. Skont dawk ir-regoli ġodda, il-pesti li bħalissa huma elenkati fid-Direttiva ta' Implimentazzjoni 2014/98/UE kif ukoll rekwiżiti tas-saħħa għal materjal ta' propagazzjoni se jaqgħu fil-kamp ta' applikazzjoni ta' dak ir-Regolament. Għalhekk huwa xieraq li jitħalla perjodu biżżejjed taż-żmien biex tiġi vvalutata l-konformità ta' pajjiżi terzi mar-regoli il-ġodda dwar is-saħħa tal-pjanti stabbiliti fir-Regolament (UE) 2016/2031 u l-leġiżlazzjoni ta' implimentazzjoni tiegħu. |
(6) |
Il-perjodu ta' applikazzjoni tad-deroga stipulat fl-Artikolu 12(2) tad-Direttiva 2008/90/KE jenħtieġ li għalhekk jiġi estiż sal-31 ta' Diċembru 2022. |
(7) |
Għalhekk, jenħtieġ li d-Direttiva 2008/90/KE tiġi emendata skont dan: |
(8) |
Il-miżuri li għalihom qed isiru provvedimenti f'din id-Deċiżjoni huma skont l-opinjoni tat-taqsima tal-Materjal tal-Propagazzjoni u l-Pjanti tal-Ġeneri u l-Ispeċi tal-Frott tal-Kumitat Permanenti dwar il-Pjanti, l-Annimali, l-Ikel u l-Għalf, |
ADOTTAT DIN ID-DEĊIŻJONI:
Artikolu 1
Fl-ewwel subparagrafu tal-Artikolu 12(2) tad-Direttiva 2008/90/KE, id-data “31 ta' Diċembru 2018” tinbidel bil-“31 ta' Diċembru 2022”.
Artikolu 2
Din id-Deċiżjoni hija indirizzata lill-Istati Membri.
Magħmul fi Brussell, l-24 ta' Jannar 2019.
Għall-Kummissjoni
Vytenis ANDRIUKAITIS
Membru tal-Kummissjoni
(1) ĠU L 267, 8.10.2008, p. 8.
(2) Id-Direttiva ta' Implimentazzjoni tal-Kummissjoni 2014/96/UE tal-15 ta' Ottubru 2014 dwar ir-rekwiżiti għat-tikkettar, is-siġillar u l-imballaġġar ta' materjal tal-propagazzjoni tal-pjanti tal-frott u ta' pjanti tal-frott maħsuba għall-produzzjoni tal-frott, li jaqgħu fl-ambitu tad-Direttiva tal-Kunsill 2008/90/KE (ĠU L 298, 16.10.2014, p. 12).
(3) Id-Direttiva ta' Implimentazzjoni tal-Kummissjoni 2014/97/UE tal-15 ta' Ottubru 2014 li timplimenta d-Direttiva tal-Kunsill 2008/90/KE fir-rigward tar-reġistrazzjoni ta' fornituri u ta' varjetajiet u l-lista komuni ta' varjetajiet (ĠU L 298, 16.10.2014, p. 16).
(4) Id-Direttiva ta' Implimentazzjoni tal-Kummissjoni 2014/98/UE tal-15 ta' Ottubru 2014 li timplimenta d-Direttiva tal-Kunsill 2008/90/KE fir-rigward ta' rekwiżiti speċifiċi għall-ġeneru u l-ispeċi tal-pjanti tal-frott imsemmija fl-Anness I tagħha, rekwiżiti speċifiċi li għandhom jiġu ssodisfati mill-fornituri u regoli dettaljati dwar l-ispezzjonijiet uffiċjali (ĠU L 298, 16.10.2014, p. 22).
(5) Ir-Regolament (UE) 2016/2031 tal-Parlament Ewropew u tal-Kunsill tas-26 ta' Ottubru 2016 dwar il-miżuri protettivi kontra pesti tal-pjanti, li jemenda r-Regolamenti (UE) Nru 228/2013, (UE) Nru 652/2014 u (UE) Nru 1143/2014 tal-Parlament Ewropew u tal-Kunsill u li jħassar id-Direttivi tal-Kunsill 69/464/KEE, 74/647/KEE, 93/85/KEE, 98/57/KE, 2000/29/KE, 2006/91/KE u 2007/33/KE (ĠU L 317, 23.11.2016, p. 4).