(1)

Skont ir-Regolament (UE) Nru 305/2011, l-istandards armonizzati previsti fl-Artikolu 17 għandhom jissodisfaw ir-rekwiżiti tas-sistema armonizzata stabbiliti f'dan ir-Regolament jew permezz tiegħu.

(2)

F'Lulju 2013, il-Kumitat Ewropew għall-Istandardizzazzjoni (CEN) adotta l-istandard armonizzat EN 14342:2013 “Pavimentar tal-injam: Karatteristiċi, evalwazzjoni ta' konformità u mmarkar”. Ir-referenza tal-istandard ġiet ippubblikata sussegwentement f'Il-Ġurnal Uffiċjali tal-Unjoni Ewropea (2).

(3)

Fil-21 ta' Awwissu 2015, il-Ġermanja nediet oġġezzjoni formali fir-rigward tal-istandard armonizzat EN 14342:2013. L-oġġezzjoni formali rreferiet għall-Klawsola 4.4 ta' dak l-istandard, rigward il-metodi u l-kriterji ta' valutazzjoni għal ċerti sustanzi perikolużi, u talbet għat-tneħħija tar-referenza tal-istandard minn Il-Ġurnal Uffiċjali tal-Unjoni Ewropea jew, inkella, restrizzjoni li teskludi l-Klawsola 4.4 ta' dak l-istandard mill-kamp ta' applikazzjoni ta' dik ir-referenza.

(4)

Skont il-Ġermanja, dak l-istandard ma fihx metodi armonizzati għall-valutazzjoni tal-prestazzjoni tal-prodotti għall-bini inkwistjoni b'rabta mar-rilaxx ta' karatteristika essenzjali ta' sustanzi perikolużi oħrajn. Fil-fatt, il-Klawsola 4.4. tal-istandard jiddikjara li l-verifika u dikjarazzjoni dwar ir-rilaxx jew il-kontenut ta' sustanzi perikolużi oħra minn dawk trattati fi klawsoli oħra tal-istandard għandha ssir b'kont meħud tad-dispożizzjonijiet nazzjonali fil-post tal-użu.

(5)

Il-Ġermanja kkunsidrat li dan in-nuqqas jikkostitwixxi ksur tal-Artikolu 17(3) tar-Regolament (UE) Nru 305/2011, minħabba li l-istandard inkwistjoni ma ssodisfax għalkollox ir-rekwiżiti stabbiliti fil-mandat rilevanti kif previst fl-Artikolu 18.

(6)

Barra minn hekk, il-Ġermanja enfasizzat l-importanza ta' trattament xieraq tar-rilaxxi ta' sustanzi perikolużi oħrajn bħal dawn, b'mod partikolari l-komposti organiċi volatili (KOV), fi ħdan l-istandards armonizzati b'mod partikolari għall-prodotti inkwistjoni b'bażi tal-injam.

(7)

Għal dawn ir-raġunijiet, il-Ġermanja talbet għat-tneħħija tar-referenza ta' dak l-istandard, jew inkella għar-restrizzjoni tagħha billi tiġi eskluża l-Klawsola 4.4 mill-kamp ta' applikazzjoni tiegħu, sabiex l-Istati Membri jkunu jistgħu jadottaw dispożizzjonijiet nazzjonali għall-valutazzjoni tal-prestazzjoni b'rabta mal-karatteristika essenzjali inkwistjoni, fir-rigward tar-rilaxx ta' sustanzi perikolużi oħrajn.

(8)

Meta tiġi vvalutata l-ammissibilità tat-talbiet imressqa, jenħtieġ li jiġi ddikjarat li jekk it-talba alternattiva tal-Ġermanja kellha tinftiehem li tikkostitwixxi talba separata bl-għan li l-Istati Membri jkunu jistgħu jimplimentaw dispożizzjonijiet nazzjonali li jistabbilixxu rekwiżiti addizzjonali, talba bħal din ma kinitx tiffoka fuq il-kontenut ta' EN 14342:2013, u għaldaqstant jenħtieġ li titqies inammissibbli. Madankollu, minħabba li l-kliem tat-talba b'mod ċar qed jirreferi direttament għar-restrizzjoni tal-kamp ta' applikazzjoni tar-referenza ta' dak l-istandard, jenħtieġ li d-dikjarazzjonijiet tal-Ġermanja dwar il-konsegwenzi ta' restrizzjoni bħal din jitqiesu biss bħala partijiet tal-argumentazzjoni mogħtija fi ħdan l-oġġezzjoni formali u għaldaqstant ma jitqisux separati.

(9)

Skont l-Artikolu 17(3) tar-Regolament (UE) Nru 305/2011, l-istandards armonizzati għandhom jipprovdu l-metodi u l-kriterji għall-valutazzjoni tal-prestazzjoni tal-prodotti koperti minnhom fir-rigward tal-karatteristiċi essenzjali tagħhom. Kif affermat il-Ġermanja, il-Klawsola 4.4 ta' EN 14342:2013 tippreżenta biss referenza għar-rekwiżiti nazzjonali fis-seħħ. F'dan ir-rigward, EN 14342:2013 mhuwiex konformi mar-rekwiżiti stabbiliti fl-Artikolu 17(3) tar-Regolament (UE) Nru 305/2011.

(10)

Barra minn hekk, il-ġurisprudenza tal-Qorti tal-Ġustizzja (3) tindika li l-Istati Membri mhumiex intitolati jimplimentaw id-dispożizzjonijiet nazzjonali għall-valutazzjoni tal-prestazzjoni b'rabta ma' kwalunkwe karatteristika essenzjali lil hinn minn dak li hemm fl-istandards armonizzati, fir-rigward tal-kummerċjalizzazzjoni jew l-użu tal-prodotti għall-bini koperti minnhom. Għalhekk, il-kontenut ta' EN 14342:2013 huwa wkoll f'kunflitt ma' dawk il-prinċipji.

(11)

Għaldaqstant u fid-dawl tal-fatt li r-Regolamenti huma applikabbli direttament, jenħtieġ li l-Klawsola 4.4 ta' EN 14342:2013 ma tiġix applikata, irrispettivament mill-eżitu ta' din il-proċedura ta' oġġezzjoni formali.

(12)

Madankollu, minħabba li l-ġurisprudenza tal-Qorti tal-Ġustizzja (4) tikkonferma n-natura eżawrjenti tas-sistema armonizzata stabbilita fir-Regolament (UE) Nru 305/2011 jew permezz tiegħu, l-invalidità tal-Klawsola 4.4 ta' EN 14342:2013 ma timplikax li l-Istati Membri jistgħu jadottaw dispożizzjonijiet nazzjonali għall-valutazzjoni tal-prestazzjoni fir-rigward tal-karatteristika essenzjali tas-sustanzi perikolużi, fir-rigward tar-rilaxx ta' karatteristika essenzjali ta' sustanzi perikolużi oħrajn.

(13)

Abbażi tal-kontenut ta' EN 14342:2013 kif ukoll tal-informazzjoni ppreżentata mill-Ġermanja, mill-Istati Membri l-oħrajn, mis-CEN u mill-industrija, u wara li ġew ikkonsultati l-kumitati stabbiliti bl-Artikolu 64 tar-Regolament (UE) Nru 305/2011 u bl-Artikolu 22 tar-Regolament (UE) Nru 1025/2012 tal-Parlament Ewropew u tal-Kunsill (5), jenħtieġ li jiġi nnotat li ma ġiet espressal-ebda oġġezzjoni sostanzjali kontra l-pubblikazzjoni kontinwata tar-referenza ta' dak l-istandard f'Il-Ġurnal Uffiċjali tal-Unjoni Ewropea. L-esklużjoni tal-Klawsola 4.4 mill-kamp ta' applikazzjoni tar-referenza ppubblikata f'Il-Ġurnal Uffiċjali tal-Unjoni Ewropea qajmet tħassib abbażi ta' interpretazzjoni tal-ġurisprudenza tal-Qorti tal-Ġustizzja bħallikieku tħalli lill-Istati Membri jistabbilixxu rekwiżiti li jillimitaw iċ-ċirkolazzjoni ħielsa ta' dawk il-prodotti, jekk jieħdu l-pożizzjoni li s-sikurezza ta' prodott mhijiex żgurata biżżejjed. Madankollu, il-Qorti tal-Ġustizzja stess diġà ddikjarat li interpretazzjoni bħal din se toħloq dubju dwar l-effettività [(“effet utile”)] tal-armonizzazzjoni f'dan il-qasam (6).

(14)

Jenħtieġ li n-natura allegatament inkompleta ta' dak l-istandard ma tkunx meqjusa bħala raġuni biżżejjed sabiex tiġi aċċettata l-ewwel talba tal-Ġermanja, jiġifieri t-tneħħija totali tar-referenza tal-istandard EN 14342:2013 minn Il-Ġurnal Uffiċjali tal-Unjoni Ewropea. Għalhekk jenħtieġ li dik it-talba tiġi miċħuda.

(15)

Għat-talba alternattiva dwar ir-restrizzjoni tar-referenza billi tiġi eskluża l-Klawsola 4.4 mill-kamp ta' applikazzjoni tiegħu, l-ewwel nett jenħtieġ li jiġi mfakkar li, kif diġà ntwera, dik il-klawsola ma għandhiex tiġi applikata, irrispettivament mill-eżitu ta' din il-proċedura ta' oġġezzjoni formali. Madankollu, għal raġunijiet ta' ċarezza, huwa meħtieġ li dik il-klawsola invalida tiġi eskluża mir-referenza.

(16)

Għalhekk jenħtieġ li r-referenza ta' EN 14342:2013 tinżamm, imma hemm bżonn li tiġi introdotta restrizzjoni li teskludi l-Klawsola 4.4 ta' dak l-istandard mill-kamp ta' applikazzjoni tiegħu,