EUR-Lex Access to European Union law
This document is an excerpt from the EUR-Lex website
Document 32016Q0812(03)
Amendment of the Rules of Procedure of the General Court
Emenda għar-Regoli tal-Proċedura tal-Qorti Ġenerali
Emenda għar-Regoli tal-Proċedura tal-Qorti Ġenerali
ĠU L 217, 12.8.2016, p. 72–72
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
In force
12.8.2016 |
MT |
Il-Ġurnal Uffiċjali tal-Unjoni Ewropea |
L 217/72 |
EMENDA GĦAR-REGOLI TAL-PROĊEDURA TAL-QORTI ĠENERALI
IL-QORTI ĠENERALI,
Wara li kkunsidrat it-Trattat dwar il-Funzjonament tal-Unjoni Ewropea u b'mod partikolari l-ħames paragrafu tal-Artikolu 254 tiegħu,
Wara li kkunsidrat it-Trattat li jistabbilixxi l-Komunità Ewropea tal-Enerġija Atomika u b'mod partikolari l-Artikolu 106a(1) tiegħu,
Wara li kkunsidrat il-Protokoll dwar l-Istatut tal-Qorti tal-Ġustizzja tal-Unjoni Ewropea u b'mod partikolari l-Artikolu 63 tiegħu,
Wara li kkunsidrat li l-informazzjoni jew l-annessi rilevanti sabiex tinqatal-kawża u kunfidenzjali, li jkunu ġew prodotti skont l-Artikolu 105 tar-Regoli tal-Proċedura tal-Qorti Ġenerali u li ma jkunux ingħataw lura fil-mori tal-kawża, għandhom jitqiegħdu għad-dispożizzjoni tal-Qorti tal-Ġustizzja sabiex din teżerċita b'mod sħiħ il-funzjoni tagħha ta' qorti tal-appell fil-każ li tiġi kkontestata d-deċiżjoni tal-Qorti Ġenerali li tagħlaq proċedura li matulha tkun ġiet implementata r-regola speċifika prevista fl-Artikolu 105,
Wara li kkunsidrat li, għall-kuntrarju, din l-informazzjoni jew dawn l-annessi għandhom jingħataw lura lill-parti prinċipali li tkun ipproduċiethom fil-każ li ma jkunx ġie ppreżentat appell mid-deċiżjoni tal-Qorti Ġenerali fit-terminu previst fil-Protokoll dwar l-Istatut tal-Qorti tal-Ġustizzja tal-Unjoni Ewropea,
Wara li kkunsidrat li għaldaqstant huwa meħtieġ li jiġu emendati r-Regoli tal-Proċedura tal-Qorti Ġenerali,
Bil-kunsens tal-Qorti tal-Ġustizzja,
Bl-approvazzjoni tal-Kunsill mogħtija fis-6 ta' Lulju 2016,
TADOTTA L-EMENDA SEGWENTI GĦAR-REGOLI TAL-PROĊEDURA TAGĦHA:
Artikolu 1
L-Artikolu 105(10) tar-Regoli tal-Proċedura tal-Qorti Ġenerali (1) huwa ssostitwit bit-test segwenti:
“10. L-informazzjoni jew l-annessi msemmija fil-paragrafu 5, li ma jkunux ġew irtirati skont il-paragrafu 7 mill-parti prinċipali li tkun ipproduċiethom, għandhom jingħataw lura lill-parti kkonċernata mal-iskadenza tat-terminu previst fl-ewwel paragrafu tal-Artikolu 56 tal-Istatut sakemm, f'dan it-terminu, ma jkunx ġie ppreżentat appell mid-deċiżjoni tal-Qorti Ġenerali. Fil-każ li jiġi ppreżentat tali appell, l-informazzjoni jew l-annessi msemmija iktar 'il fuq għandhom jitqiegħdu għad-dispożizzjoni tal-Qorti tal-Ġustizzja fil-kundizzjonijiet previsti fid-deċiżjoni msemmija fil-paragrafu 11.”
Artikolu 2
Din l-emenda għar-Regoli tal-Proċedura, li hija awtentika fil-lingwi msemmija fl-Artikolu 44 tal-imsemmija Regoli, għandha tiġi ppubblikata f'Il-Ġurnal Uffiċjali tal-Unjoni Ewropea u għandha tidħol fis-seħħ fil-jum tal-pubblikazzjoni tagħha.
Magħmul fil-Lussemburgu, it-13 ta' Lulju 2016.
Ir-Reġistratur
E. COULON
Il-President
M. JAEGER
(1) ĠU L 105, 23.4.2015, p. 1.