22.3.2016   

MT

Il-Ġurnal Uffiċjali tal-Unjoni Ewropea

L 75/60

(1)

Ir-Regolament ta' Implimentazzjoni (UE) Nru 391/2013 jistabbilixxi skema komuni ta' imposti għas-servizzi tan-navigazzjoni bl-ajru. L-iskema komuni ta' imposti hija element integrali għall-kisba tal-għanijiet tal-iskema ta' prestazzjoni kif stabbilita mill-Artikolu 11 tar-Regolament (KE) Nru 549/2004 tal-Parlament Ewropew u tal-Kunsill (3) u mir-Regolament ta' Implimentazzjoni tal-Kummissjoni (UE) Nru 390/2013 (4).

(2)

Id-Deċiżjoni ta' Implimentazzjoni tal-Kummissjoni 2014/132/UE (5) tistabbilixxi l-miri tal-prestazzjoni għall-UE kollha kemm hi, fosthom il-mira tal-kosteffikaċja tas-servizzi tan-navigazzjoni bl-ajru en route, espressa f'kosti unitarji determinati għall-forniment ta' dawn is-servizzi, għat-tieni perjodu ta' referenza li jkopri u jinkludi s-snin mill-2015 sal-2019.

(3)

Skont l-Artikolu 17(1)(b) u (c) tar-Regolament ta' Implimentazzjoni (UE) Nru 391/2013, il-Kummissjoni għandha tivvaluta r-rati unitarji tal-2015 għaż-żoni tal-imposti ppreżentati mill-Istati Membri lill-Kummissjoni sal-1 ta' Ġunju 2014 bi qbil mar-rekwiżiti tal-Artikolu 9(1) u 9(2) ta' dak ir-Regolament. Dik il-valutazzjoni tikkonċerna l-konformità ta' dawk ir-rati unitarji mar-Regolamenti ta' Implimentazzjoni (UE) Nru 390/2013 u (UE) Nru 391/2013.

(4)

Il-Kummissjoni wettqet il-valutazzjoni tagħha tar-rati unitarji bl-appoġġ tal-Unità ta' Eżami tal-Prestazzjoni u l-Uffiċċju Ċentrali tal-Imposti tar-Rotot ta' Eurocontrol, bl-użu tad-dejta u l-informazzjoni addizjonali mogħtija mill-Istati Membri sal-1 ta' Ġunju 2015 kif ukoll tar-rapporti tal-awtoritajiet nazzjonali superviżorji dwar il-valutazzjoni ta' kosti eżenti mill-mekkaniżmu ta' qsim tal-kosti mressqa f'konformità mal-Artikolu 14(2)(f) tar-Regolament ta' Implimentazzjoni (UE) Nru 391/2013. Il-valutazzjoni tal-Kummissjoni qieset ukoll l-ispjegazzjonijiet mogħtija u l-korrezzjonijiet li saru qabel il-laqgħa konsultattiva dwar ir-rati unitarji għall-2016 għas-servizzi en route, li saret fil-25 u fis-26 ta' Ġunju 2015 b'applikazzjoni tal-Artikolu 9(1) tar-Regolament ta' Implimentazzjoni (UE) Nru 391/2013, kif ukoll il-korrezzjonijiet tar-rati unitarji li għamlu l-Istati Membri wara li saru komunikazzjonijiet sussegwenti mal-Kummissjoni.

(5)

Abbażi ta' dik il-valutazzjoni, wara li kkunsidrat id-Deċiżjoni ta' Implimentazzjoni tal-Kummissjoni (UE) 2015/670 (6) u d-Deċiżjoni ta' Implimentazzjoni tal-Kummissjoni (UE) 2016/420 (7), il-Kummissjoni sabet, f'konformità mal-Artikolu 17(1)(e) tar-Regolament ta' Implimentazzjoni (UE) Nru 391/2013, li r-rati unitarji tal-2016 għaż-żoni ta' imposti tal-Belġju, tal-Lussemburgu, ta' Franza, tal-Ġermanja u tan-Netherlands ma jikkonformawx mar-Regolamenti ta' Implimentazzjoni (UE) Nru 390/2013 u (UE) Nru 391/2013.

(6)

L-Artikolu 11(1) tar-Regolament ta' Implimentazzjoni (UE) Nru 390/2013 jipprevedi li l-awtoritajiet superviżjorji nazzjonali tal-Istati Membri għandhom iħejju pjanijiet ta' prestazzjoni li jkun fihom miri konsistenti mal-miri ta' prestazzjoni għall-UE kollha. Skont l-Artikolu 11(2) u l-Anness IV tar-Regolament ta' Implimentazzjoni (UE) Nru 391/2013, ir-rati unitarji jiġu kkalkulati abbażi tal-kosti determinati en route u l-unitajiet tas-servizz previsti fil-pjan ta' prestazzjoni ta' Stat Membru, jiġifieri l-kosti unitarji determinati en route. Sakemm il-miri ta' prestazzjoni tal-Belġju, ta' Franza, tal-Ġermanja, tal-Lussemburgu u tan-Netherlands ma jitqisux bħala konsistenti mal-miri tal-UE kollha, ir-rati unitarji kkalkulati abbażi tagħhom ma jistgħux jitqiesu li huma konformi mar-Regolamenti ta' Implimentazzjoni (UE) Nru 390/2013 u (UE) Nru 391/2013.

(7)

Skont l-Artikolu 17(1)(e) tar-Regolament ta' Implimentazzjoni (UE) Nru 391/2013, l-Istati Membri kkonċernati għandhom jiġu avżati b'din is-sejba tal-Kummissjoni.

(8)

F'konformità mal-Artikolu 17(1)(e), l-Istati Membri għandhom, fi żmien xahar, iressqu r-rati unitarji riveduti lill-Kummissjoni.