1.8.2015   

MT

Il-Ġurnal Uffiċjali tal-Unjoni Ewropea

L 206/69

(1)

Id-Direttiva 96/23/KE tistabbilixxi miżuri għall-monitoraġġ tas-sustanzi u l-gruppi ta' residwi mniżżlin fl-Anness I tagħha. Dik id-Direttiva teħtieġ li l-pajjiżi terzi li minnhom l-Istati Membri huma awtorizzati jimportaw l-annimali u l-prodotti tal-annimali koperti minn dik id-Direttiva jissottomettu pjan ta' monitoraġġ tar-residwi li jipprovdi l-garanziji meħtieġa. Dak il-pjan għandu jinkludi mill-inqas il-gruppi ta' residwi u s-sustanzi mniżżlin f'dak l-Anness I.

(2)

Id-Deċiżjoni tal-Kummissjoni 2011/163/UE (2) tapprova l-pjanijiet stipulati fl-Artikolu 29 tad-Direttiva 96/23/KE (“il-pjanijiet”), mibgħutin minn ċerti pajjiżi terzi mniżżlin fl-Anness tagħha, għall-annimali u l-prodotti tal-annimali indikati f'dik il-lista.

(3)

Fid-dawl tal-pjanijiet li tressqu dan l-aħħar minn ċerti pajjiżi terzi u tat-tagħrif addizzjonali miksub mill-Kummissjoni, jeħtieġ li tiġi aġġornata l-lista tal-pajjiżi terzi li minnhom l-Istati Membri huma awtorizzati jimpurtaw ċerti annimali u prodotti tal-annimali, kif inhu stipulat fid-Direttiva 96/23/KE u li bħalissa huma mniżżlin fl-Anness tad-Deċiżjoni 2011/163/UE (“il-lista”).

(4)

L-Andorra ssottomettiet pjan għall-għasel lill-Kummissjoni. Dan il-pjan jipprovdi biżżejjed garanziji u għandu jiġi approvat. Għalhekk għandha tiġi inkluża fil-lista annotazzjoni għall-Andorra għall-għasel.

(5)

L-Armenja, il-Kenja u r-Repubblika tal-Unjoni tal-Myanmar issottomettew pjanijiet għall-akkwakultura lill-Kummissjoni. Dawn il-pjanijiet jipprovdu biżżejjed garanziji u għandhom jiġu approvati. Għalhekk għandhom jiġu inklużi fil-lista l-annotazzjoniijiet għall-Armenja, il-Kenja u r-Repubblika tal-Unjoni tal-Myanmar għall-akkwakultura.

(6)

Il-Marokk issottometta pjan għat-tjur lill-Kummissjoni. Dan il-pjan jipprovdi biżżejjed garanziji u għandu jiġi approvat. Għalhekk għandha tiġi inkluża fil-lista annotazzjoni għall-Marokk għat-tjur.

(7)

Il-Kummissjoni talbet lill-Perù jipprovdilha tagħrif dwar l-implimentazzjoni tal-pjan tiegħu għat-tjur u għall-prodotti tat-tjur. Minħabba li l-Perù ma bagħat l-ebda tweġiba, m'hemmx biżżejjed garanziji għall-approvazzjoni. Għalhekk, l-annotazzjoni għal dak il-pajjiż terz b'rabta mat-tjur u l-prodotti tat-tjur għandha titħassar mil-lista. Il-Perù ġie mgħarraf b'dan kif xieraq.

(8)

Għal raġunijiet ta' trasparenza tas-suq u skont il-liġi pubblika internazzjonali, għandu jiġi ċċarat li l-kopertura territorjali tal-UE b'rabta mal-approvazzjoni tal-pjanijiet hija limitata għat-territorju tal-Istat ta' Iżrael, minbarra t-territorji li ilhom sa minn Ġunju tal-1967 taħt l-amministrazzjoni ta' Iżrael, jiġifieri l-Għoljiet ta' Golan, l-Istrixxa ta' Gaża, Ġerusalemm tal-Lvant u l-bqija tax-Xatt tal-Punent. Il-lista għandha tiġi emendata skont dan.

(9)

Il-miżuri previsti f'din id-Deċiżjoni huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,