This document is an excerpt from the EUR-Lex website
Document 32012D0245
2012/245/EU: Council Decision of 26 April 2012 on a revision of the Statutes of the Economic and Financial Committee
2012/245/UE: Deċiżjoni tal-Kunsill tas- 26 ta’ April 2012 dwar reviżjoni tal-Istatuti tal-Kumitat Ekonomiku u Finanzjarju
2012/245/UE: Deċiżjoni tal-Kunsill tas- 26 ta’ April 2012 dwar reviżjoni tal-Istatuti tal-Kumitat Ekonomiku u Finanzjarju
ĠU L 121, 8.5.2012, p. 22–24
(BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV) Dan id-dokument ġie ppubblikat f’edizzjoni(jiet) speċjali
(HR)
In force
8.5.2012 |
MT |
Il-Ġurnal Uffiċjali tal-Unjoni Ewropea |
L 121/22 |
DEĊIŻJONI TAL-KUNSILL
tas-26 ta’ April 2012
dwar reviżjoni tal-Istatuti tal-Kumitat Ekonomiku u Finanzjarju
(2012/245/UE)
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 242 tiegħu,
Wara li kkunsidra l-Opinjoni tal-Kummissjoni,
Billi:
(1) |
Skont l-Artikolu 114(2) tat-Trattat li jistabbilixxi l-Komunità Ewropea, fl-1 ta’ Jannar 1999 ġie stabbilit Kumitat Ekonomiku u Finanzjarju (“il-Kumitat”). |
(2) |
Fil-21 ta’ Diċembru 1998, il-Kunsill adotta d-Deciżjoni 98/743/KE dwar il-kompożizzjoni tal-Kumitat Ekonomiku u Finanzjarju (1). |
(3) |
Fil-31 ta’ Diċembru 1998, il-Kunsill adotta d-Deciżjoni 1999/8/KE dwar l-Istatuti tal-Kumitat Ekonomiku u Finanzjarju (2); dawn l-Istatuti ġew riveduti bid-Deċiżjoni tal-Kunsill 2003/476/KE tat-18 ta’ Ġunju 2003 (3) sabiex jiġi żgurat il-funzjonament effettiv kontinwu tal-Kumitat wara l-adeżjoni ta’ għaxar Stati Membri fl-1 ta’ Mejju 2004. |
(4) |
Il-Kapijiet ta’ Stat jew ta’ Gvern tal-Istati Membri li għandhom bħala munita l-euro fis-26 ta’ Ottubru 2011 iddikjaraw li l-korp preparatorju msemmi fl-Artikolu 1 tal-Protokoll Nru 14 dwar il-Grupp tal-euro, magħmul minn rappreżentanti tal-Ministri b’responsabbiltà għall-finanzi tal-Istati Membri li l-munita tagħhom hija l-euro u tal-Kummissjoni (“il-Grupp ta’ Ħidma tal-Grupp tal-euro”), ser ikun ippresjedut minn President fuq bażi permanenti. Bħala konsegwenza, il-persuna nominata għal din il-ħatra mhux ser tibqa’ uffiċjal f’amministrazzjoni nazzjonali u ser tkun impjegata mal-Istituzzjonijiet tal-UE. |
(5) |
Il-Kapijiet ta’ Stat jew ta’ Gvern tal-Istati Membri li għandhom bħala munita l-euro ddikjaraw li l-istrutturi amministrattivi eżistenti li jipprovdu għajnuna lill-Kunsill u lill-Kumitat, jiġifieri, is-Segretarjat Ġenerali tal-Kunsill u s-Segretarjat tal-Kumitat Ekonomiku u Finanzjarju, ser jipprovdu appoġġ adatt lill-President tas-Summit taż-Żona tal-euro u l-President tal-Grupp tal-euro taħt il-gwida tal-President tal-Kumitat/Grupp ta’ Ħidma tal-Grupp tal-euro. |
(6) |
Il-Kumitat għandu jkun jista’ jagħżel il-President tiegħu minn fost il-kandidati l-aktar kwalifikati, inkluż il-President tal-Grupp ta’ Ħidma tal-Grupp tal-euro. |
(7) |
L-Istatuti tal-Kumitat għandhom għalhekk jiġu riveduti, |
ADOTTA DIN ID-DEĊIŻJONI:
Artikolu 1
L-Istatuti tal-Kumitat Ekonomiku u Finanzjarju, kif imniżżla fl-Anness għad-Deciżjoni 1999/8/KE, kif emendati bid-Deċiżjoni 2003/476/KE, għandhom jiġu sostitwiti bit-test imniżżel fl-Anness għal dan id-dokument.
Artikolu 2
Din id-Deċiżjoni għandha tidħol fis-seħħ fil-jum wara dak tal-pubblikazzjoni tagħha f’Il-Ġurnal Uffiċjali tal-Unjoni Ewropea.
Magħmul fil-Lussemburgu, is-26 ta’ April 2012.
Għall-Kunsill
Il-President
M. BØDSKOV
(1) ĠU L 358, 31.12.1998, p. 109.
(3) ĠU L 158, 27.6.2003, p. 58.
ANNESS
“STATUTI TAL-KUMITAT EKONOMIKU U FINANZJARJU
Artikolu 1
Il-Kumitat Ekonomiku u Finanzjarju (“il-Kumitat”) għandu jwettaq il-kompiti deskritti fl-Artikolu 134(2) u (4) tat-Trattat dwar il-Funzjonament tal-Unjoni Ewropea.
Artikolu 2
Il-Kumitat jista’, fost l-oħrajn:
— |
ikun ikkonsultat fil-proċedura li twassal għal deċiżjonijiet relatati mal-mekkaniżmu tar-rati tal-kambju tat-tielet stadju tal-unjoni ekonomika u monetarja; |
— |
mingħajr preġudizzju għall-Artikolu 240 tat-Trattat, jipprepara l-analiżijiet tal-Kunsill dwar l-iżvilupp tar-rata tal-kambju tal-euro; |
— |
jipprovdi l-qafas li fih id-djalogu bejn il-Kunsill u l-Bank Ċentrali Ewropew (BĊE) jista’ jiġi ppreparat u jitkompla fil-livell ta’ uffiċjali għolja minn ministeri, il-banek ċentrali nazzjonali, il-Kummissjoni u l-BĊE. |
Artikolu 3
Il-membri tal-Kumitat u l-membri supplenti, għandhom jieħdu bħala gwida, fit-twettiq tal-kompiti tagħhom, l-interessi ġenerali tal-Unjoni.
Artikolu 4
Il-Kumitat għandu jiltaqa’ taħt il-presidenza tal-President f’żewġ konfigurazzjonijiet: jew mal-membri magħżula mill-amministrazzjonijiet, il-banek ċentrali nazzjonali, il-Kummissjoni u l-BĊE, jew mal-membri mill-amministrazzjonijiet, il-Kummissjoni u l-BĊE. Il-Kumitat fil-kompożizzjoni sħiħa tiegħu għandu jirrieżamina regolarment il-lista tal-kwistjonijiet li dwarhom il-membri tal-banek ċentrali nazzjonali jkunu mistennija jattendu l-laqgħat.
Artikolu 5
L-opinjonijiet, ir-rapporti u l-komunikazzjonijiet, għandhom jkunu adottati minn maġġoranza tal-membri jekk tiġi mitluba votazzjoni. Kull membru tal-Kumitat għandu jkollu vot wieħed. Madankollu, meta jingħata parir jew opinjoni dwar kwistjonijiet li dwarhom il-Kunsill jista’ jieħu deċiżjonijiet sussegwentement, meta jkunu preżenti l-membri mill-banek ċentrali u mill-Kummissjoni jistgħu jipparteċipaw b’mod sħiħ fid-diskussjonijiet iżda ma għandhomx jipparteċipaw fil-votazzjoni. Il-Kumitat għandu jirrapporta wkoll dwar il-fhemiet tal-minoranza jew ftehimiet kontra espressi matul id-diskussjoni.
Artikolu 6
Il-Kumitat għandu jeleġġi, b’maġġoranza tal-membri tiegħu, President għal mandat ta’ sentejn liema mandat għandu jkun jista’ jiġġedded. Dawk eleġibbli għall-elezzjoni bħala President għandhom ikunu membri tal-Kumitat li huma uffiċjali għolja fl-amministrazzjonijiet nazzjonali u l-President tal-korp preparatorju msemmi fl-Artikolu 1 tal-Protokoll Nru 14 dwar il-Grupp tal-euro, magħmul minn rappreżentanti tal-Ministri b’responsabbiltà għall-finanzi tal-Istati Membri li l-munita tagħhom hija l-euro u tal-Kummissjoni (‘il-Grupp ta’ Ħidma tal-Grupp tal-euro’).
Jekk il-President tal-Kumitat ikun membru tal-Kumitat minn amministrazzjoni nazzjonali, huwa għandu jiddelega d-dritt tal-vot tiegħu lill-membru supplenti tiegħu.
Artikolu 7
Fil-każ li ma jkunx jista’ jwettaq dmirijietu, il-President tal-Kumitat għandu jkun sostitwit mill-Viċi-President tal-Kumitat. Il-Viċi President għandu jkun elett għal mandat ta’ sentejn, minn maġġoranza tal-Membri tal-Kumitat. Dawk eliġibbli għal elezzjoni bħala Viċi-President għandhom ikunu membri tal-Kumitat li huma uffiċjali għolja fl-amministrazzjonijiet nazzjonali u l-President tal-Grupp ta’ Ħidma tal-Grupp tal-euro, dment li dan tal-aħħar ma jinħatarx president tal-Kumitat.
Artikolu 8
Jekk il-President tal-Grupp ta’ Ħidma tal-Grupp tal-Euro jkunx il-President tal-Kumitat, huwa jista’ jattendi l-laqgħat tal-Kumitat u jieħu sehem fid-diskussjonijiet, sakemm il-Kumitat ma jiddeċidix mod ieħor.
Dment li l-Kumitat ma jiddeċidix mod ieħor, il-membri supplenti jistgħu jieħdu sehem fil-laqgħat tal-Kumitat. Il-membri supplenti ma għandhomx jivvutaw. Dment li l-Kumitat ma jiddecidix mod ieħor, huma ma għandhomx jieħdu sehem fid-diskussjonijiet.
Membru li ma jkunx jista’ jattendi laqgħa tal-Kumitat jista’ jiddelega l-funzjonijiet tiegħu lil xi wieħed mill-membri supplenti. Huwa jista’ wkoll jiddelegahom lil membru ieħor. Il-President u s-Segretarju tal-Kumitat għandhom ikunu infurmati bil-miktub qabel il-laqgħa. F’ċirkostanzi eċċezzjonali, il-President jista’ jaqbel dwar arranġamenti alternattivi.
Artikolu 9
Il-Kumitat jista’ jafda l-istudju ta’ kwistjonijiet speċifiċi lil membri supplenti tiegħu, lil sottokumitati jew gruppi ta’ ħidma. F’dawn il-każijiet, il-membru jew membru supplenti tal-Kumitat, maħtur mill-Kumitat, għandu jassumi l-Presidenza. Il-membri tal-Kumitat, il-membri supplenti tiegħu u s-sottokumitati jew il-gruppi ta’ ħidma tiegħu jistgħu jitolbu l-għajnuna tal-esperti.
Artikolu 10
Il-Kumitat għandu jitlaqqa’ mill-President fuq l-inizjattiva tiegħu stess, jew fuq it-talba tal-Kunsill, tal-Kummissjoni, jew ta’ mill-inqas erba’ membri tal-Kumitat.
Artikolu 11
Bħala regola, il-President jirrappreżenta lill-Kumitat; b’mod partikolari, il-President jista’ jkun awtorizzat mill-Kumitat biex jirraporta dwar diskussjonijiet u jippreżenta kummenti bil-fomm dwar l-opinjonijiet u l-komunikazzjonijiet ippreparati mill-Kumitat. Il-President għandu jkollu r-responsabbiltà għaż-żamma tar-relazzjonijiet tal-Kumitat mal-Parlament Ewropew.
Artikolu 12
Il-proċediment tal-Kumitat għandhom ikun kunfidenzjali. L-istess regola għandha tapplika għall-proċedimenti tal-membri supplenti, is-sottokomitati jew il-gruppi ta’ ħidma tiegħu.
Artikolu 13
Il-Kumitat għandu jkun megħjun minn Segretarjat taħt id-direzzjoni ta’ Segretarju. Is-Segretarju u l-persunal tas-Segretarjat għandhom ikunu forniti mill-Kummissjoni. Is-Segretarju għandu jinħatar mill-Kummissjoni wara konsultazzjoni mal-Kumitat. Is-Segretarju u l-persunal tiegħu għandhom jaġixxu fuq l-istruzzjonijiet tal-Kumitat meta jkunu qegħdin iwettqu r-responsabbiltajiet tagħhom lejn il-Kumitat.
L-infiq tal-Kumitat għandu jkun inkluż fl-estimi tal-Kummissjoni.
Artikolu 14
Il-Kumitat għandu jadotta l-arranġamenti proċedurali tiegħu stess.”.