Access to European Union law
<a href="https://eur-lex.europa.eu/content/help/eurlex-content/experimental-features.html" target="_blank">More about the experimental features corner</a>
Choose the experimental features you want to try
EUR-Lex
Access to European Union law

This document is an excerpt from the EUR-Lex website

You are here
Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search

Document 32009R1152

Regolament tal-Kummissjoni (KE) Nru 1152/2009 tas- 27 ta’ Novembru 2009 li jimponi kundizzjonijiet straordinarji għar-regolamentazzjoni tal-importazzjoni ta’ ċerti oġġetti tal-ikel minn ċerti pajjiżi terzi minħabba r-riskju ta’ kontaminazzjoni bl-aflatossini u li jħassar id-Deċiżjoni 2006/504/KE (Test b’relevanza għaż-ŻEE)

ĠU L 313, 28.11.2009, p. 40–49 (BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)

⏵Dan id-dokument ġie ppubblikat f’edizzjoni(jiet) speċjali (HR)

Legal status of the document No longer in force, Date of end of validity: 02/09/2014; Imħassar b' 32014R0884

ELI: http://data.europa.eu/eli/reg/2009/1152/oj

28.11.2009   

MT

Il-Ġurnal Uffiċjali tal-Unjoni Ewropea

L 313/40

REGOLAMENT TAL-KUMMISSJONI (KE) Nru 1152/2009

tas-27 ta’ Novembru 2009

li jimponi kundizzjonijiet straordinarji għar-regolamentazzjoni tal-importazzjoni ta’ ċerti oġġetti tal-ikel minn ċerti pajjiżi terzi minħabba r-riskju ta’ kontaminazzjoni bl-aflatossini u li jħassar id-Deċiżjoni 2006/504/KE

(Test b’relevanza għaż-ŻEE)

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabilixxi l-Komunità Ewropea,

Wara li kkunsidrat ir-Regolament (KE) Nru 178/2002 tal-Parlament Ewropew u tal-Kunsill tat-28 ta’ Jannar 2002 li jistabbilixxi l-prinċipji ġenerali u l-ħtiġijiet tal-liġi dwar l-ikel, li jistabbilixxi l-Awtorità Ewropea dwar is-Sigurtà fl-Ikel u li jistabbilixxi l-proċeduri fi kwistjonijiet ta’ sigurtà tal-ikel (1), u b’mod partikolari l-Artikolu 53(1)(b)(ii) tiegħu,

Billi:

(1)

Id-Deċiżjoni tal-Kummissjoni 2006/504/KE tat-12 ta’ Lulju 2006 dwar kundizzjonijiet speċjali li jirregolaw ċerti oġġetti tal-ikel impurtati minn ċerti pajjiżi terzi minħabba r-riskju ta’ kontaminazzjoni ta’ dawn il-prodotti mill-aflatossini (2), ġiet emendata sostanzjalment ħafna drabi. Jeħtieġ li jkunu emendati sostanzjalment mill-ġdid ċerti dispożizzjonijiet biex ikunu meqjusa b’mod partikolari żviluppi fir-rigward tal-kontaminazzjoni bl-aflatossini ta’ ċerti prodotti li jidħlu fl-ambitu ta’ din id-Deċiżjoni. Fl-istess ħin, id-dispożizzjonijiet għandhom iseħħu immedjatament u jkunu jorbtu fl-intier tagħhom, għalhekk id-Deċiżjoni 2006/504/KE għandha tinbidel b’dan ir-Regolament.

(2)

Ir-Regolament tal-Kummissjoni (KE) Nru 1881/2006 tad-19 ta’ Diċembru 2006 li jistabbilixxi l-livelli massimi ta’ ċerti kontaminanti fl-oġġetti tal-ikel (3), jistipula l-livelli massimi ta’ aflatossini permessi f’oġġetti tal-ikel. Wieħed jista’ jinnota li dawn il-livelli massimi ta’ aflatossini ta’ spiss ikunu maqbuża f’ċerti oġġetti tal-ikel ġejjin minn ċerti pajjiżi. Dawn il-kontaminati jikkostitwixxu theddida serja għas-saħħa pubblika fil-Komunità u huwa għaldaqstant xieraq li jiġu adottati miżuri speċjali f’livell Komunitarju.

(3)

Għall-ħarsien tas-saħħa pubblika jeħtieġ li oġġetti tal-ikel komposti li fihom ammont sinifikanti tal-oġġetti tal-ikel li jidħlu fl-ambitu ta’ din id-Deċiżjoni jidħlu wkoll taħt din id-Deċiżjoni. Biex ikunu ffaċilitati l-ispezzjonijiet ta’ oġġetti tal-ikel ipproċessati u komposti filwaqt li jinżamm livell għoli ta’ effikaċja tat-testijiet, ikun xieraq li jiżdied il-limitu għall-ittestjar ta’ prodotti komposti. Għall-istess raġuni, il-limitu ta’ konsenji ta’ 5 kg li joħorġu barra mill-ambitu għandu jiżdied għal 20 kg. L-awtoritajiet kompetenti jistgħu jispezzjonaw għal għarrieda għall-aflatossini fl-oġġetti tal-ikel komposti li fihom inqas minn 20 % ta’ oġġetti tal-ikel li jaqgħu taħt dan ir-Regolament. Fil-każ li jinstab mid-dejta ta’ sorveljanza li jkun hemm bosta każijiet ta’ oġġetti tal-ikel komposti, b’kontenut ta’ inqas minn 20 % ta’ prodotti tal-ikel koperti minn din id-Deċiżjoni, li ma jkunux konformi mal-leġiżlazzjoni Komunitarja dwar il-livelli massimi tal-aflatossini, dan il-limitu massimu għandu jiġi rrivedut.

(4)

Il-kodiċi tan-Nomenklatura Magħquda (NM) tbiddlet għal ċerti kategoriji ta’ ikel li jaqgħu fl-ambitu ta’ dan ir-Regolament. Għaldaqstant huwa xieraq li jinbidlu skont dan il-kodiċi NM f’dan ir-Regolament.

(5)

L-esperjenza wriet li mhumiex meħtieġa kundizzjonijiet addizzjonali għal konsenji importati mill-Brażil, ta’ ġewż tal-Brażil mingħajr qoxra li mhumiex konformi, għaliex dawn il-konsenji jistgħu jiġu ttrattati skont id-dispożizzjonijiet ġenerali għall-konsenji li mhumiex konformi, u għalhekk dawn il-kundizzjonijiet addizzjonali għandhom jitħassru. Fir-rigward tal-importazzjonijiet ta’ oġġetti tal-ikel mill-Istati Uniti tal-Amerika, ladarba li d-dispożizzjonijiet tranżizzjonali għal-laboratorji approvati għall-analiżi tal-aflatossini, iżda mhux approvati mill-USDA (United States Department of Agriculture), ma għadhomx meħtieġa, dawn id-dispożizzjonijiet tranżizzjonali għandhom jitħassru.

(6)

Ir-Regolament tal-Kummissjoni (KE) Nru 669/2009 tal-24 ta’ Lulju 2009, li jimplimenta r-Regolament (KE) Nru 882/2004 tal-Parlament Ewropew u tal-Kunsill dwar iż-żieda fil-livell tal-ispezzjonijiet uffiċjali mwettqa fuq l-importazzjoni ta’ ċertu għalf u ikel ta’ oriġini mhux mill-annimali u li jemenda d-Deċiżjoni 2006/504/KE (4) tistipula għall-użu ta’ Dokument Komuni tad-Dħul għall-avviż minn qabel tal-wasla ta’ konsenji u għat-tagħrif dwar it-testijiet uffiċjali li jkunu ġew imwettqa. Huwa xieraq li jkun stipulat l-użu ta’ dan id-dokument u li jkunu stipulati noti gwida speċifiċi dwar kif għandu jimtela’ fl-applikazzjoni ta’ dan ir-Regolament.

(7)

Fid-dawl tan-numru ta’ notifiki fis-Sistema ta’ Twissija Rapida għall-ikel u l-għalf, u tan-natura tagħhom, għandhom jiġu rriveduti: il-volumi ta’ kummerċ; ir-riżultati tal-ispezzjonijiet mill-Uffiċċju Veterinarju u tal-Ikel, u r-riżultati u l-frekwenza tal-ispezzjonijiet li qegħdin isiru.

(8)

Il-miżuri stipulati f’dan ir-Regolament huma skont l-opinjoni tal-Kumitat Permanenti dwar il-Katina Alimentari u s-Saħħa tal-Annimali,

ADOTTAT DAN IR-REGOLAMENT:

Artikolu 1

Ambitu

1.   Dan ir-Regolament ikun japplika għall-importazzjoni ta’ dawn l-oġġetti tal-ikel li ġejjin, u tal-oġġetti tal-ikel ipproċessati u magħmulin minnhom:

(a)

L-oġġetti tal-ikel li jidhru hawn taħt li joriġinaw mill-Brażil jew li ġew ikkonsenjati minn hemm:

(i)

Ġewż tal-Brażil fil-qoxra li jidħlu fil-kategorija tal-kodiċi NM 0801 21 00;

(ii)

taħlitiet ta’ ġewż jew frott imqadded li jidħlu fil-kodiċi NM 0813 50 u li fihom il-ġewż tal-Brażil fil-qoxra;

(b)

L-oġġetti tal-ikel li ġejjin li joriġinaw miċ-Ċina jew li ġew ikkonsenjati minn hemm:

(i)

karawett li jidħol fil-kategorija tal-kodiċi NM 1202 10 90 jew 1202 20 00;

(ii)

karawett li jidħol fil-kategorija tal-kodiċi NM 2008 11 91 (ippakkjat għall-konsum b'kontenut nett ta’ aktar minn 1 kg) jew 2008 11 98 (ippakkjat għall-konsum b’kontenut nett ta’ mhux aktar minn 1 kg);

(iii)

karawett inkaljat li jidħol fil-kategorija tal-kodiċi NM 2008 11 91 (ippakkjat għall-konsum b’kontenut nett ta’ aktar minn 1 kg) jew il-kodiċi NM 2008 11 96 (ippakkjat għall-konsum b’kontenut nett ta’ mhux aktar minn 1 kg);

(c)

L-oġġetti tal-ikel li ġejjin li joriġinaw mill-Eġittu jew li ġew ikkonsenjati minn hemm:

(i)

karawett li jidħol fil-kategorija tal-kodiċi NM 1202 10 90 jew 1202 20 00;

(ii)

karawett li jidħol fil-kategorija tal-kodiċi NM 2008 11 91 (ippakkjat għall-konsum b'kontenut nett ta’ aktar minn 1 kg) jew 2008 11 98 (ippakkjat għall-konsum b’kontenut nett ta’ mhux aktar minn 1 kg);

(iii)

karawett inkaljat li jidħol fil-kategorija tal-kodiċi NM 2008 11 91 (ippakkjat għall-konsum b’kontenut nett ta’ aktar minn 1 kg) jew il-kodiċi NM 2008 11 96 (ippakkjat għall-konsum b’kontenut nett ta’ mhux aktar minn 1 kg);

(d)

L-oġġetti tal-ikel li ġejjin li joriġinaw mill-Iran jew ġew ikkonsenjati minn hemm:

(i)

pistaċċi li jidħlu fil-kategorija tal-kodiċi NM 0802 50 00;

(ii)

pistaċċi inkaljati li jidħlu fil-kategorija tal-kodiċi NM 2008 19 13 (ippakkjati għall-konsum b’kontenut nett ta’ aktar minn 1 kg) u 2008 19 93 (ippakkjati għall-konsum b’kontenut nett ta’ mhux aktar minn 1 kg);

(e)

L-oġġetti tal-ikel li ġejjin li joriġinaw mit-Turkija jew ġew ikkonsenjati minn hemm:

(i)

tin imqadded li jidħol fil-kategorija tal-kodiċi NM 0804 20 90;

(ii)

ġellewż (Corylus spp.) fil-qoxra jew mingħajr qoxra li jidħol fil-kategorija tal-kodiċi NM 0802 21 00 jew 0802 22 00;

(iii)

pistaċċi li jidħlu fil-kategorija tal-kodiċi NM 0802 50 00;

(iv)

taħlitiet ta’ ġewż jew frott imqadded li jidħlu fil-kategorija tal-kodiċi NM 0813 50 u li fihom it-tin, il-ġellewż jew il-pistaċċi;

(v)

kunserva tat-tin, kunserva tal-pistaċċi u kunserva tal-ġellewż li jidħlu fil-kategorija tal-kodiċi NM 1106 30 90, 2007 10 jew 2007 99;

(vi)

ġellewż, tin jew pistaċċi, ippreparati jew ippreservati, inklużi taħlitiet li jidħlu fil-kategorija tal-kodiċi NM 2008 19;

(vii)

tqiq, frak u trab tal-ġellewż, tin u pistaċċi li jidħlu fil-kategorija tal-kodiċi NM 1106 30 90;

(viii)

ġellewż imqatta’ u mfarrak li jidħol fil-kategoriji NM 0802 22 00 u 2008 19;

(f)

Il-prodotti tal-ikel li ġejjin, li joriġinaw jew li jintbagħtu mill-Istati Uniti tal-Amerika, koperti mill-Pjan ta’ Teħid ta’ Kampjuni Volontarju tal-Aflatossina stabbilit mill-Bord dwar il-Lewż ta’ Kalifornja f’Mejju 2006 (“il-pjan ta’ Teħid ta’ Kampjuni Volontarju”):

(i)

lewż bil-qoxra jew mingħajr qoxra li jidħol fil-kategorija tal-kodiċi NM 0802 11 jew 0802 12;

(ii)

lewż inkaljat li jidħol fil-kategoriji tal-kodiċi NM 2008 19 13 (ippakkjati għall-konsum b’kontenut nett ta’ aktar minn 1 kg) u 2008 19 93 (ippakkjati għall-konsum b’kontenut nett ta’ mhux aktar minn 1 kg);

(iii)

taħlitiet ta’ ġewż jew frott imqadded li jidħlu fil-kategorija tal-kodiċi NM 0813 50 u li fihom il-lewż;

(g)

Il-prodotti tal-ikel li ġejjin, impurtati mill-Istati Uniti tal-Amerika, li mhumiex koperti mill-pjan ta’ Teħid ta’ Kampjuni Volontarju tal-Aflatossina:

(i)

lewż bil-qoxra jew mingħajr qoxra li jidħol fil-kategorija tal-kodiċi NM 0802 11 jew 0802 12;

(ii)

lewż inkaljat li jidħol fil-kategoriji tal-kodiċi NM 2008 19 13 (ippakkjati għall-konsum b’kontenut nett ta’ aktar minn 1 kg) u 2008 19 93 (ippakkjati għall-konsum b’kontenut nett ta’ mhux aktar minn 1 kg);

(iii)

taħlitiet ta’ ġewż jew frott imqadded li jidħlu fil-kategorija tal-kodiċi NM 0813 50 u li fihom il-lewż.

2.   Il-paragrafu wieħed mhux se japplika għall-konsenji ta’ oġġetti tal-ikel ta’ piż gross li ma jaqbisx l-20 kg, jew għall-oġġetti tal-ikel ipproċessati jew komposti li fihom konenut ta’ inqas minn 20 % tal-oġġetti tal-ikel imsemmijin fil-punti minn (b) sa (g) tal-paragrafu wieħed.

Artikolu 2

Definizzjonijiet

Għall-għanijiet ta’ dan ir-Regolament ikunu japplikaw id-definizzjonijiet stipulati fl-Artikoli 2 u 3 tar-Regolament (KE) Nru 178/2002 u fl-Artikolu 2 tar-Regolament (KE) Nru 882/2004 tal-Parlament Ewropew u tal-Kunsill (5).

Barra minn hekk, għandhom japplikaw id-definizzjonijiet li ġejjin:

(a)

“il-punti magħżula għall-importazzjoni” huma kwalunkwe punt, magħżul mill-awtorità kompetenti, li minnu jistgħu jiġu impurtati fil-Komunità l-oġġetti tal-ikel imsemmijin fl-Artikolu 1.

(b)

“l-ewwel punt ta’ introduzzjoni” huwa l-punt minn fejn tgħaddi konsenja biex tidħol għall-ewwel darba fil-Komunità.

Artikolu 3

Importazzjoni fil-komunità

Konsenji ta’ oġġetti tal-ikel imsemmija fl-Artikolu 1 (minn hawn ’il quddiem imsemmijin bħala oġġetti tal-ikel), jistgħu jiġu impurtati fil-Komunità biss b’konformità mal-proċeduri stipulati f’dan ir-Regolament.

Artikolu 4

Iċ-ċertifikat tas-Saħħa u r-riżultati tat-teħid ta’ kampjuni u l-analiżi

1.   L-oġġetti tal-ikel imressqin għall-importazzjoni fil-Komunità għandhom ikunu ikkumpanjati bir-riżultati tat-teħid tal-kampjuni u analiżi u ċertifikat tas-saħħa magħmul fuq il-mudell stipulat fl-Anness I, li għandu jkun mimli, iffirmat u vverifikat minn rappreżentant awtorizzat ta’:

(a)

il-Ministério da Agricultura, Pecuária e Abastecimento (MAPA) for foodstuffs from Brazil;

(b)

l-Amministrazzjoni Statali għall-ispezzjoni tad-Dħul-Ħruġ u tal-Kwarantina tar-Repubblika Popolari taċ-Ċina għall-oġġetti tal-ikel miċ-Ċina;

(c)

il-Ministeru tal-Agrikoltura Eġizzjan għall-oġġetti tal-ikel mill-Eġittu;

(d)

il-Ministeru tal-Agrikoltura Iranjan għall-oġġetti tal-ikel mill-Iran;

(e)

id-Direttorat Ġenerali tal-protezzjoni u l-Kontroll tal-Ministeru tal-Agrikoltura u Affarijiet Rurali tar-Repubblika tat-Turkija għall-oġġetti tal-ikel mit-Turkija;

(f)

id-Dipartiment tal-Agrikultura tal-Istati Uniti (USDA) għall-prodotti tal-ikel mill-Istati Uniti tal-Amerika.

2.   Iċ-ċertifikati tas-saħħa jkunu kompilati f’lingwa uffiċjali tal-pajjiż esportatur u f’lingwa uffiċjali tal-Istat Membru li qed jimporta l-prodotti.

L-awtoritajiet kompetenti kkonċernati jistgħu jagħżlu li jużaw kwalunkwe lingwa oħra li jifhmuha l-uffiċjali li joħorġu ċ-ċertifikati jew l-ispetturi uffiċjali kkonċernati.

3.   Iċ-ċertifikat tas-saħħa stipulat fil-paragrafu 1 għall-importazzjonijiet ta’ prodotti tal-ikel fil-Komunità għandu jkun validu biss sa erba' xhur mid-data tal-ħruġ tiegħu.

4.   It-teħid ta’ kampjuni u l-analiżi msemmija fil-paragrafu 1 iridu jsiru skont ir-Regolament tal-Kummissjoni (KE) Nru 401/2006 tat-23 ta’ Frar 2006 (6) jew l-ekwivalenti tiegħu.

5.   Kull konsenja ta’ oġġetti tal-ikel għandha tiġi identifikata b'kodiċi li jikkorrispondi mal-kodiċi fuq ir-riżultati tal-kampjuni u tal-analiżi u ċ-ċertifikat tas-saħħa msemmijin fil-paragrafu 1. Kull borża individwali, jew forma oħra ta’ ippakkjar, tal-konsenja għandha tiġi identifikata ma’ dan il-kodiċi.

6.   B’deroga mill-paragrafi minn 1 sa 5, il-konsenji ta’ oġġetti tal-ikel imsemmija fl-Artikolu 1(1)(g) jistgħu jiġu impurtati fil-Komunità mingħajr ma jkunu akkumpanjati mir-riżultati tat-teħid ta’ kampjuni u analiżi u minn ċertifikat tas-saħħa.

Artikolu 5

Twissija bil-quddiem tal-wasla tal-konsenji

L-operaturi tan-negozji tal-ikel jew ir-rappreżentanti tagħhom għandhom javżaw bil-quddiem id-data u l-ħin tal-wasla mistennija tal-konsenja fl-ewwel punt tal-introduzzjoni u javżaw dwar it-tip ta’ konsenja li tkun.

Għal dan il-għan iridu jimlew il-Parti I tad-dokument komuni tad-dħul (DKD) imsemmi fl-Artikolu 3(a) tar-Regolament (KE) 669/2009 u jibagħtu d-dokument lill-awtorità kompetenti fl-ewwel punt ta’ introduzzjoni, fiż-żmien ta’ mill-inqas ġurnata waħda tax-xogħol qabel ma tasal il-konsenja.

Biex jimlew id-DKD fl-applikazzjoni ta’ dan ir-Regolament, l-operaturi tan-negożji tal-ikel għandhom jirreferu għan-noti gwida stipulati fl-Anness II.

Artikolu 6

Il-Punti magħżula għall-importazzjoni

1.   L-awtoritajiet kompetenti tal-Istati Membri għandhom jiżguraw li l-punti magħżula għall-importazzjoni jissodisfaw dawn il-kundizzjonijiet li ġejjin:

(a)

li jkun hemm persunal imħarreġ biex iwettaq l-ispezzjonijiet uffiċjali fuq il-konsenji ta’ oġġetti tal-ikel;

(b)

li jkun hemm disponibbli struzzjonijiet iddettaljati dwar it-teħid tal-kampjuni u kif dawn għandhom jintbagħtu l-laboratorju, skont id-dispożizzjonijiet fl-Anness I tar-Regolament (KE) Nru 401/2006;

(c)

li fil-punt magħżul għall-importazzjoni jkun hemm post kenni fejn jistgħu jsiru l-ħatt u t-teħid ta’ kampjuni; f’każi meta l-konsenja trid tkun ittrasportata f’xi post ieħor biex jittieħdu l-kampjuni minnha, irid ikun hemm id-disponibbiltà li l-konsenja tal-oġġetti tal-ikel tkun uffiċjalment taħt is-sorveljanza tal-awtorità kompetenti mill-punt magħżul għall-importazzjoni ’l quddiem;

(d)

li jkun hemm disponibbli kmamar għall-ħżin jew imħażen fejn jistgħu jiġu maħżuna l-konsenji tal-oġġetti tal-ikel li jkunu miżmuma sakemm ikunu mistennijin ir-riżultati tal-analiżi, u jibqgħu f’kundizzjoni tajba;

(e)

li jkun hemm tagħmir tal-ħatt u tagħmir xieraq għad-teħid tal-kampjuni;

(f)

li jkun hemm disponibbli laboratorju uffiċjali għall-analiżi tal-aflatossina, li jrid ikun f’post viċin biżżejjed li l-kampjuni jistgħu jkunu mwassla hemm fi żmien qasir, u fejn l-analiżi tkun tista’ ssir f’limitu ta’ żmien.

2.   L-Istati Membri għandhom iżommu lista aġġornata tal-punti magħżula għall-importazzjoni u din għandha tkun disponibbli għall-pubbliku. L-Istati Membri għandhom jikkomunikaw din il-lista lill-Kummissjoni.

3.   L-operaturi tan-negozji tal-ikel għandhom jiżguraw li tinħatt il-konsenja tal-oġġetti tal-ikel meħtieġa biex jittieħdu l-kampjuni.

F’każi ta’ trasport partikolari jew għamla partikolari ta’ imballar, fejn it-teħid tal-kampjuni ma jistax isir bit-tagħmir tas-soltu, l-operatur għandu jpoġġi għad-dispożizzjoni tal-ispettur uffiċjali, it-tagħmir xieraq għad-teħid tal-kampjuni.

Artikolu 7

L-Ispezzjonijiet uffiċjali

1.   L-ispezzjonijiet kollha uffiċjali u l-milja tad-dokument komuni tad-dħul qabel il-ħlas tal-konsenja għaċ-ċirkulazzjoni libera fil-Komunità, iridu jsiru qabel l-iskadenza ta’ 15-il ġurnata tax-xogħol mill-ħin li l-konsenja tkun offerta għall-importazzjoni u tkun preżenti u disponibbli għat-teħid tal-kampjuni fil-punt magħżul għall-importazzjoni.

2.   L-awtorità kompetenti fl-ewwel punt ta’ introduzzjoni għandha tiżgura li l-oġġetti tal-ikel maħsuba għall-importazzjoni fil-Komunità jkunu suġġetti għal kontrolli dokumentarji li jiżguraw li l-kundizzjonijiet għar-riżultati tat-teħid tal-kampjuni u tal-analiżi u ċ-ċertifikat tas-saħħa stipulati fil-paragrafu 4 jkunu sodisfatti.

F’każ li konsenja ta’ oġġetti tal-ikel ma tkunx ikkumpanjata mir-riżultati tat-teħid tal-kampjuni u l-analiżi u ċ-ċertifikat tas-saħħa stipulati fl-Artikolu 4(1), il-konsenja ma għandhiex titħalla tidħol fil-Komunità għall-importazzjoni u trid titreġġa’ lura lejn il-pajjiż minn fejn oriġinat jew tinqered.

3.   L-awtorità kompetenti fl-ewwel punt ta’ introduzzjoni għandha tawtorizza t-trasferiment tal-konsenja għal punt magħżul għall-importazzjoni wara li t-testijiet imsemmijin fil-paragrafu 2 jintemmu b'riżultati pożittivi. Iċ-ċertifikat oriġinali għandu jmur mal-konsenja fit-trasferiment.

4.   L-awtorità kompetenti fil-punt magħżul għall-importazzjoni għandha tieħu kampjun għall-analiżi tal-aflatossina B1 u għall-kontaminazzjoni sħiħa bl-aflatossini minn ċerti konsenji, bi frekwenza kif indikat fil-paragrafu 5 u konformi mal-Anness I tar-Regolament (KE) Nru 401/2006 qabel ma tinħeles il-konsenja għaċ-ċirkulazzjoni libera fil-Komunità.

5.   It-teħid tal-kampjuni għall-analiżi msemmi fil-paragrafu 4 għandu jsir fuq:

(a)

100 % tal-konsenji ta’ oġġetti tal-ikel mill-Brażil;

(b)

madwar 20 % tal-konsenji ta’ oġġetti tal-ikel miċ-Ċina;

(c)

madwar 20 % tal-konsenji ta’ oġġetti tal-ikel mill-Eġittu;

(d)

madwar 50 % tal-konsenji ta’ oġġetti tal-ikel mill-Iran;

(e)

madwar 10 % tal-konsenji għal kull kategorija ta’ ġellewż, u prodotti magħmulin minnu, li ġejjin mit-Turkija, imsemmijin fl-Artikolu 1(1)(e)(ii) u minn (iv) sa (viii); madwar 20 % tal-konsenji għal kull kategorija ta’ tin imqadded, u prodotti magħmulin minnu, ġejjin mit-Turkija, imsemmijin fl-Artikolu 1(1)(e)(i) u minn (iv) sa (vii), u madwar 50 % tal-konsenji għal kull kategorija ta’ pistaċċi, u l-prodotti magħmulin minnhom, li ġejjin mit-Turkija, imsemmijin fl-Artikolu 1(1)(e) minn (iii) sa (vii);

(f)

minn konsenji ta’ oġġetti tal-ikel li ġejjin mill-Istati Uniti tal-Amerika, imsemmijin fl-Artikolu 1(1)(f), jittieħdu kampjuni ’l hawn u ’l hemm;

(g)

minn kull konsenja ta’ oġġetti tal-ikel mill-Istati Uniti tal-Amerika, imsemmijin fl-Artikolu 1(1)(g).

6.   Wara li jittemmew it-testijiet, għal dawk li jkunu saru mill-awtoritajiet kompetenti, dawn għandhom:

(a)

jimlew il-parti rilevanti tal-Parti II tad-dokument komuni tad-dħul (DKD);

(b)

jagħqdu r-riżultati tat-teħid tal-kampjuni u tal-analiżi;

(c)

jittimbraw u jiffirmaw id-DKD oriġinali;

(d)

jagħmlu u jżommu kopja tad-DKD iffirmat u ttimbrat.

Biex timla d-DKD fl-applikazzjoni ta’ dan ir-Regolament, l-awtorità kompetenti għandha tirreferi għan-noti gwida stipulati fl-Anness II.

7.   Id-DKD oriġinali għandu jmur mal-konsenja fit-trasferiment tagħha sakemm din tkun meħlusa għaċ-ċirkulazzjoni libera.

8.   Ladarba, fejn hu meħtieġ li jsiru l-ispezzjonijiet, dawn ikunu saru kollha u r-riżultati tat-testijiet fiżiċi jkunu magħrufa u jkunu pożittivi, ir-rilaxx tal-konsenja għaċ-ċirkolazzjoni libera jkun suġġett għall-preżentazzjoni ta’ dokument komuni tad-dħul jew l-ekwivalent tiegħu elettroniku, mingħand l-operatur tal-kummerċ tal-ikel jew mir-rappreżentant tiegħu, lill-awtoritajiet tad-dwana, mimli, kif meħtieġ, mill-awtorità kompetenti.

9.   L-Istati Membri kull tliet xhur għandhom jippreżentaw rapport tar-riżultati analitiċi kollha tal-ispezzjonijiet uffiċjali fuq konsenji ta’ oġġetti tal-ikel lill-Kummissjoni. Dan ir-rapport għandu jiġi ppreżentat matul ix-xahar li jaħbat wara kull taqsima ta’ tliet xhur fis-sena.

Artikolu 8

Qsim ta’ konsenja

Il-konsenji ma għandhomx jinqasmu qabel ma jkunu saru l-ispezzjonijiet uffiċjali kollha, u jkun imtela d-DKD mill-awtoritàjiet kompetenti kif stipulat fl-Artikolu 7.

Fil-każ li wara dan il-konsenja tinqasam, kopja awtentika tad-DKD trid tintbagħat ma’ kull parti tal-konsenja sakemm dawn jiġu rilaxxati għaċ-ċirkolazzjoni libera.

Artikolu 9

Kundizzjonijiet addizzjonali rigward l-importazzjonijiet ta’ oġġetti tal-ikel mill-Istati Uniti tal-Amerika

1.   Fir-rigward ta’ importazzjonijiet mill-Istati Uniti tal-Amerika, l-analiżi msemmija fl-Artikolu 4(1), għall-aflatossini trid issir minn laboratorju approvat mill-USDA.

2.   Iċ-ċertifikat tas-saħħa msemmi fl-Artikolu 4(1), li jikkumpanja l-konsenji tal-oġġetti tal-ikel imsemmijin fl-Artikolu 1(1)(f) għandu jirreferi għall-Pjan Volontarju tat-Teħid tal-Kampjuni tal-Aflatossini.

Artikolu 10

Spejjeż

L-ispejjeż kollha tal-ispezzjonijiet uffiċjali, inkluż it-teħid tal-kampjuni, l-analiżi, il-ħżin u kull miżura li tittieħed wara riżultat ta’ nuqqas ta’ konformità, għandhom jitħallsu mill-operatur tal-kummerċ tal-ikel.

Artikolu 11

Revoka

Id-Deċiżjoni 2006/504/KE hija b'dan irrevokata.

Referenza għad-Deċiżjoni mħassra tkun imfissra bħala referenza għal dan ir-Regolament.

Artikolu 12

Id-dispożizzjonijiet tranżizzjonali

Permezz ta’ deroga mill-Artikolu 4(1), l-Istati Membri għandhom jawtorizzaw l-importazzjoni ta’ konsenji tal-oġġetti tal-ikel imsemmija fl-Artikolu 1(1) li ntbagħtu mill-pajjiż ta’ oriġini qabel l-1 ta’ Lulju 2010 b’ċertifikat tas-saħħa mehmuż magħhom kif stipulat fid-Deċiżjoni 2006/504/KE.

Artikolu 13

Dħul fis-seħħ

Dan ir-Regolament għandu jidħol fis-seħħ fl-għoxrin jum wara l-pubblikazzjoni tiegħu f'Il-Ġurnal Uffiċjali tal-Unjoni Ewropea.

Għandu japplika mill-1 ta’ Jannar 2010.

Dan ir-Regolament għandu jorbot fl-intier tiegħu u huwa applikabbli direttament fl-Istati Membri kollha.

Magħmul fi Brussell, 27 ta’ Novembru 2009.

Għall-Kummissjoni

Androulla VASSILIOU

Membru tal-Kummissjoni

(1)  ĠU L 31, 1.2.2002, p. 1.

(2)  ĠU L 199, 21.7.2006, p 21.

(3)  ĠU L 364, 20.12.2006, p. 5.

(4)  ĠU L 194, 25.7.2009, p. 11.

(5)  ĠU L 165, 30.4.2004, p. 1.

(6)  ĠU L 70, 9.3.2006, p. 12.

ANNESS I

Ċertifikat tas-Saħħa għall-importazzjoni fil-Komunità Ewropea ta’

… (*)

Kodiċi tal-Konsenja: …

Numru taċ-Ċertifikat: …

Skont id-dispożizzjonijiet tar-Regolament tal-Kummissjoni (KE) NNN/2009 li jimponi kundizzjonijiet speċjali li jirregolaw l-importazzjoni ta’ ċerti oġġetti tal-ikel minn ċerti pajjiżi terzi minħabba r-riskju ta’ kontaminazzjoni ta’ dawn il-prodotti mill-aflatossini u li jirrevoka d-Deċiżjoni 2006/504/KE, …

…

… (l-awtorità kompetenti msemmija fl-Artikolu 4(1))

TIĊĊERTIFIKA li …

… (daħħal l-isem tal-oġġetti tal-ikel imsemmija fl-Artikolu 1)

f’din il-konsenja magħmula minn: …

…

… (deskrizzjoni tal-konsenja, tal-prodott, tal-għadd u t-tip ta’ pakketti, tal-piż gross jew nett)

imbarkata fi … (post tal-imbarkazzjoni)

minn … (identifikazzjoni tat-trasportatur)

sejra lejn … (il-post u l-pajjiż tad-destinazzjoni)

li ġejja mill-istabbiliment …

… (l-isem u l-indirizz tal-istabbiliment)

ġew prodotti, magħżula, ittrattati, ipproċessati, ippakkjati u ttrasportati b&konformità ma’ prassi ta’ iġjene tajba.

Minn din il-konsenja, ittieħdu l-kampjuni skont ir-Regolament tal-Kummissjoni (KE) Nru 401/2006 fil- … (data), soġġetti għall-analiżi fil-laboratorju fil- … (data)

fil- … (isem il-laboratorju),

biex jiġu stmati l-livell ta’ aflatossina B1 u l-livell totali tal-kontaminazzjoni bl-aflatossini. Id-dettalji tat-teħid ta’ kampjuni, il-metodi użati għall-analiżi u r-riżultati kollha huma hawn mehmużin.

Dan iċ-ċertifikat huwa validu sa …

Magħmul fi … fl- …

It-timbru u l-firma ta’ ir-rappreżentant awtorizzat tal-awtorità kompetenti msemmija fl-Artikolu 4(1)

(*)  Isem il-prodott u l-pajjiż ta’ oriġini

ANNESS II

Noti gwida għad-DKD b’applikazzjoni ta’ dan ir-Regolament f’każ ta’ importazzjoni ta’ oġġetti tal-ikel minn ċerti pajjiżi terzi, minħabba r-riskju ta’ kontaminazzjoni bl-aflatossini ta’ dawn il-prodotti.

Ġenerali:

Għall-użu tad-DKD fl-applikazzjoni ta’ dan ir-Regolament, meta jissemma d-“DPE”, dan għandu jinftiehem bħala “l-ewwel punt ta’ introduzzjoni” jew “il-punt magħżul għall-importazzjoni” kif stipulat fin-noti speċifiċi għal kull kaxxa. Kull fejn ikun imsemmi l-“punt ta’ spezzjoni”, dan għandu jinftiehem bħala “punt magħżul għall-importazzjoni”.

Imla d-dokument b’ittri kbar. In-noti jidhru ħdejn in-numru tal-kaxxa rilevanti.

Parti I   Din it-taqsima għandha timtela mill-operatur tal-kummerċ tal-ikel jew mir-rappreżentant tiegħu, fejn mhux indikat mod ieħor.

Kaxxa I.1.

Il-konsenjatur: imla l-isem u l-indirizz sħiħ tal-persuna naturali jew legali (operatur tal-kummerċ tal-ikel) li qed jibgħat il-konsenja. Huwa rrikmandat li tingħata l-informazzjoni dwar in-numri tat-telefown u l-faks.

Kaxxa I.2.

It-tliet spazji kollha f’din il-kaxxa għandhom jimtlew mill-awtoritajiet tal-punt tad-dħul magħżul kif inhu ddefinit fl-Artikolu 2. Alloka numru ta’ referenza tad-DKD fl-ewwel kaxxa. Imla l-isem tal-punt magħżul għall-importazzjoni u n-numru tiegħu fit-tieni u t-tielet kaxxi rispettivament.

Kaxxa I.3.

Id-destinatarju: imla l-isem u l-indirizz sħiħ tal-persuna naturali jew legali (l-operatur tal-kummerċ tal-ikel) li lilha hi indirizzata l-konsenja. Huwa rrikmandat li tingħata l-informazzjoni dwar in-numri tat-telefown u l-faks.

Kaxxa I.4.

Il-Persuna responsabbli għall-konsenja: (l-aġent, id-dikjarant jew l-operatur tal-kummerċ tal-ikel ukoll) imla l-isem u l-indirizz sħiħ tal-persuna li hi responsabbli għal-konsenja meta din ġiet ippreżentata fl-ewwel punt ta’ introduzzjoni u li għamlet id-dikjarazzjonijiet meħtieġa lill-awtoritajiet kompetenti f’isem l-importatur. Huwa rrikmandat li tingħata l-informazzjoni dwar in-numri tat-telefown u l-faks.

Kaxxa I.5.

Il-pajjiż ta’ oriġini: indika l-pajjiż minn fejn oriġina l-prodott, fejn kien imkabbar, fejn inħasad jew fejn kien magħmul.

Kaxxa I.6.

Il-pajjiż minn fejn intbagħtet il-konsenja: indika l-pajjiż fejn ġiet mgħobbija l-konsenja fuq il-mezz tat-trasport għall-aħħar parti tal-vjaġġ lejn il-Komunità.

Kaxxa I.7.

L-importatur: imla l-isem u l-indirizz sħiħ. Huwa rrikmandat li tingħata l-informazzjoni dwar in-numri tat-telefown u l-faks.

Kaxxa I.8.

Id-destinazzjoni: imla l-indirizz ta’ destinazzjoni tal-konsenja fil-Komunità. Huwa rrikmandat li tingħata l-informazzjoni dwar in-numri tat-telefown u l-faks.

Kaxxa I.9.

Id-data tal-wasla fil-PDM (data mistennija): agħti d-data ta’ meta hu mistenni li tasal il-konsenja fl-ewwel punt ta’ introduzzjoni.

Kaxxa I.10.

Id-dokumenti: ikteb id-data ta’ meta nħarġu d-dokumenti u n-numru ta’ dokumenti uffiċjali li ntbagħtu mal-konsenja, skont il-każ.

Kaxxa I.11.

Il-mezz tat-trasport: immarka l-kaxxa li turi l-mezz tat-trasport li bih waslet il-konsenja.

L-identifikazzjoni: agħti d-dettalji kollha tat-trasport għall-wasla tal-konsenja: Fil-każ tal-ajruplani, agħti n-numru tat-titjira. Fil-każ tal-vapuri, agħti l-isem tal-bastiment. Għall-vetturi: agħti n-numru ta’ reġistrazzjoni li hemm fuq il-pjanċa u, fejn jeħtieġ, in-numru tal-karru. Għat-trasport ferrovjarju: agħti n-numru ta’ identità tat-tren u n-numru tal-vagun.

Referenzi għad-dokumenti: in-numru tal-kont tal-ajru, il-kont tat-tagħbija jew in-numru kummerċjali tal-ferrovija jew it-trakk.

Kaxxa I.12.

Deskrizzjoni tal-merkanzija: agħti deskrizzjoni ddettaljata tal-merkanzija bit-terminoloġija tal-Artikolu 1.

Kaxxa I.13.

Il-kodiċi tal-merkanzija (kodiċi SA): uża s-Sistema Armonizzata tal-Organizzazzjoni Dinjija tad-Dwana.

Kaxxa I.14.

Piż gross: agħti l-piż totali f’kilogrammi jew f’tunnellati. Dan huwa ddefinit bħala l-massa globali tal-prodott u tal-kontenituri u l-pakketti, imma mingħajr il-piż tal-kontejners tat-trasport u tagħmir ieħor tat-trasport.

Piż nett: agħti l-piż tal-prodott waħdu, mingħajr dak tal-pakketti, f’kilogrammi jew f’tunnellati. Dan huwa ddefinit bħala l-massa tal-prodotti biss, mingħajr il-kontenituri jew il-pakketti.

Kaxxa I.15.

L-għadd ta’ pakketti: ikteb kemm hemm numru ta’ pakketti fil-konsenja.

Kaxxa I.16.

It-temperatura: immarka l-kaxxa li turi l-mezz tat-trasport li ntuża/it-temperatura li fiha nżamm il-prodott.

Kaxxa I.17.

It-tip ta’ pakketti: identifika t-tip ta’ pakketti li fihom ġew ippakkjati l-prodotti.

Kaxxa I.18.

Merkanzija maħsuba għall-użu ta’: immarka l-kaxxa r-rilevanti skont il-każ, jekk il-prodott huwa maħsub għall-konsum mill-bniedem mingħajr ma jiġi kklassifikat jew ikun ittrattat b’ xi mod fiżiku ieħor minn qabel (f’dan il-każ immarka “għall-konsum mill-bniedem”), jew jekk hu maħsub għall-konsum mill-bniedem wara t-trattament (f’dan il-każ immarka “għall-aktar ipproċessar”), jew jekk hu maħsub bħala għalf (f’dan il-każ immarka “għalf”). Fil-każ tal-aħħar, id-dispożizzjonijiet ta’ dan ir-Regolament ma japplikawx.

Kaxxa I.19.

In-numru tas-siġill u n-numru tal-kontejner: niżżel in-numri kollha ta’ identifikazzjoni tas-siġilli u tal-kontejners fejn meħtieġ.

Kaxxa I.20.

Għat-trasferiment lejn Punt tal-Ispezzjoni: jekk il-konsenja hija maħsuba għall-importazzjoni (cf. il-Kaxxa I.22), immarka l-kaxxa u identifika l-punt magħżul għall-importazzjoni.

Kaxxa I.21.

Ma japplikax.

Kaxxa I.22.

Għall-importazzjoni: immarka l-kaxxa jekk il-konsenja hi maħsuba għall-importazzjoni.

Kaxxa I.23.

Ma japplikax.

Kaxxa I.24.

Mezz tat-trasport lejn il-Punt tal-Ispezzjoni: immarka l-mezz tat-trasport rilevanti li ntuża għat-trasferiment lejn il-punt magħżul għall-importazzjoni.

Parti II   Din it-taqsima għandha timtela mill-awtorità kompetenti.

Ġenerali:

Il-Kaxxa II.1 għandha timtela mill-awtorità kompetenti tal-post magħżul għall-importazzjoni. Il-Kaxxi minn II.2 sa II.9 għandhom jimtlew mill-awtoritajiet responsabbli għall-ispezzjoni tad-dokumenti. Il-Kaxxi minn II.10 sa II.21 għandhom jimtlew mill-awtoritàjiet kompetenti tal-post magħżul għall-importazzjoni.

Kaxxa II.1.

In-numru ta’ referenza tad-DKD: uża l-istess numru ta’ referenza tad-DKD li jidher fil-Kaxxa I.2.

Kaxxa II.2.

Referenza tad-Dokument tad-Dwana: għall-użu tas-servizzi tad-dwana fejn meħtieġ.

Kaxxa II.3.

Kontroll tad-dokumenti: għandu jimtela għal kull konsenja.

Kaxxa II.4.

Konsenji magħżula għall-kontrolli fiżiċi: ma japplikax fil-qafas ta’ dan ir-Regolament.

Kaxxa II.5.

AĊĊETTABBLI għat-trasferiment: fil-każ li l-konsenja tkun aċċettabbli għat-trasferiment lejn punt magħżul għall-importazzjoni wara spezzjoni tad-dokumenti b’riżultat pożittiv, l-awtorità kompetenti tal-ewwel punt ta’ introduzzjoni għandha timmarka l-kaxxa u tindika lejn liema punt magħżul għall-importazzjoni għandha tiġi ttrasferita l-konsenja għall-possibbiltà ta’ spezzjoni fiżika (skont l-informazzjoni mogħtija fil-Kaxxa I.20).

Kaxxa II.6.

MHUX AĊĊETTABBLI: f’każ li l-konsenja mhijiex aċċettabbli għat-trasferiment lejn punt magħżul għall-importazzjoni minħabba li l-ispezzjonijiet tad-dokumenti ma’ jkollhomx riżultat pożittiv, l-awtorità kompetenti fl-ewwel punt ta’ introduzzjoni għandha timmarka l-kaxxa u tindika b’mod ċar x’għandu jsir fil-każ li l-konsenja ma tintlaqax. L-indirizz tal-istabbiliment fejn għandu jasal il-prodott għandu jitniżżel fil-Kaxxa II.7 fil-każ ta’ “Spedizzjoni mill-ġdid”, “Qerda”, “Trasformazzjoni” jew “Għal użu ieħor”.

Kaxxa II.7.

Dettalji tad-Destinazzjonijiet Ikkontrollati (II.6): Ikteb in-numru tal-approvazzjoni rilevanti u l-indirizz (jew l-isem tal-vapur u tal-port) għad-destinazzjonijiet kollha fejn huma meħtieġa aktar spezzjonijiet tal-konsenja, pereżempju għall-Kaxxa II.6, “Dispaċċ mill-ġdid”, “Għall-qerda”, “Għat-trasformazzjoni” jew “Għal użu ieħor”.

Kaxxa II.8.

Identifikazzjoni sħiħa tal-PDM u t-timbru uffiċjali: hawn agħti l-identifikazzjoni sħiħa tal-ewwel punt ta’ introduzzjoni u t-timbru uffiċjali tal-awtorità kompetenti f’dan il-punt.

Kaxxa II.9.

Spettur uffiċjali: il-firma tal-uffiċjal responsabbli tal-awtorità kompetenti fl-ewwel punt ta’ introduzzjoni.

Kaxxa II.10.

Ma japplikax.

Kaxxa II.11.

Verifika tal-Identità: immarka l-kaxxi biex turi sarux il-verifiki tal-identità u r-riżultati tagħhom.

Kaxxa II.12.

Spezzjoni Fiżika: hawn indika r-riżultati tal-ispezzjonijiet fiżiċi.

Kaxxa II.13.

Testijiet fil-Laboratorju: immarka l-kaxxa biex turi l-konsenja ntgħażlitx biex jittieħdu l-kampjuni minnha għall-analiżi.

Ittestjati dwar: indika għal liema sustanzi (aflatossina B1 u/jew għat-total) u b’liema mod analitiku sar it-test fil-laboratorju.

Ir-riżultati huma: indika x’kienu r-riżultati tat-test fil-laboratorju u mmarka l-kaxxa rilevanti.

Kaxxa II.14.

AĊĊETTABBLI biex ikun rilaxxat għaċ-ċirkolazzjoni libera: immarka l-kaxxa jekk il-konsenja se tkun irrilaxxata għaċ-ċirkolazzjoni libera fil-Komunità.

Immarka waħda mill-kaxxi (“Għall-konsum tal-bniedem”, “Għal aktar ipproċessar”, “Għalf” jew “Oħrajn”) biex turi għal xiex se tkun użata l-konsenja.

Kaxxa II.15.

Ma japplikax.

Kaxxa II.16.

MHUX AĊĊETTABBLI: immarka l-kaxxa jekk il-konsenja tkun irrifjutata minħabba riżultati negattivi tal-ispezzjonijiet fiżiċi jew tal-identità.

Indika b’mod ċar x’għandu jsir f’dan il-każ billi timmarka waħda mill-kaxxi (“Għad-dispaċċ mill-ġdid”, “Għall-qerda”, “Għat-trasformazzjoni” jew “Għal użu ieħor”). L-indirizz tal-istabbiliment destinatarju għandhu jinkiteb fil-Kaxxa II.18.

Kaxxa II.17.

Ir-raġuni għaliex il-konsenja ġiet irrifjutata: Immarka l-kaxxa rilevanti. Uża kif meħtieġ biex iżżid l-informazzjoni rilevanti.

Kaxxa II.18.

Id-dettalji tad-Destinazzjonijiet Ikkontrollati (II.16): agħti, skont ir-rilevanza n-numru tal-approvazzjoni u l-indirizz (jew isem il-bastiment u l-port) għad-destinazzjonijiet kollha fejn huma meħtieġa iktar spezzjonijiet tal-konsenja wara l-informazzjoni fil-Kaxxa II.16.

Kaxxa II.19.

Konsenja ssiġillata mill-ġdid: imla din il-kaxxa meta jkun inkiser is-siġill li kien irreġistrat oriġinarjament sakemm infetaħ il-kontenitur. Trid tinżamm lista sħiħa tas-siġilli kollha li ntużaw għal dan l-iskop.

Kaxxa II.20.

Identifikazzjoni sħiħa tal-PDM/Punt tal-Kontroll u t-timbru uffiċjali: hawn agħti l-identifikazzjoni sħiħa tal-ewwel punt magħżul għall-importazzjoni u t-timbru uffiċjali tal-awtorità kompetenti f’dan il-punt.

Kaxxa II.21.

L-Ispettur Uffiċjali: daħħal (b’ittri kbar) l-isem, id-data tal-ħruġ u l-firma tal-uffiċjal responsabbli tal-awtorità kompetenti fil-punt magħżul għall-importazzjoni.

Parti III   Din t-taqsima għandha timtela mill-awtorità kompetenti.

Kaxxa III.1.

Dettalji dwar l-ispedizzjoni mill-ġdid: l-awtorità tal-ewwel punt ta’introduzzjoni jew fil-punt magħżul għall-importazzjoni għandha tindika l-mezz tat-trasport li ntuża, l-identifikazzjoni tal-konsenja, il-pajjiż destinatarju u d-data tal-ispedizzjoni mill-ġdid, malli dawn ikunu magħrufin.

Kaxxa III.2.

Is-segwitu: indika l-unità risponsabbli tal-awtorità kompetenti lokali rilevanti għas-sorveljanza f’każi fejn l-istruzzjonijiet dwar il-konsenja jkunu: “Għall-qerda”, “Għat-trasformazzjoni” jew “Għal użu ieħor”. Hawn jiġi rrappurtat ir-riżultat tal-wasla tal-konsenja u l-korrispondenza mill-awtorità kompetenti.

Kaxxa III.3.

L-Ispettur Uffiċjali: il-firma tal-uffiċjal responsabbli tal-awtorità kompetenti fil-punt magħżul ta’ introduzzjoni fil-każ ta’ “Spedizzjoni mill-ġdid”. Firma tal-uffiċjal risponsabbli tal-awtorità kompetenti lokali, f’każi fejn l-istruzzjonijiet ikunu: “Għall-qerda”, “Għat-trasformazzjoni” jew “Għal użu ieħor”.
Top