—

F’dinja li dejjem tinbidel, il-ħtiġijiet ta' statistika se jiġu riveduti perjodikament mhux biss peress li qed jitfaċċaw ħtiġijiet ġodda ta' statistika, imma anke peress li ħtiġijiet oħra jsiru anqas importanti u saħansitra jgħaddi żmienhom. Għalhekk, se jsiru reviżjonijiet regolari tal-prijoritajiet f'koperazzjoni mill-qrib ma' l-Istati Membri sabiex jiġu identifikati dawk l-oqsma u l-karatteristiċi li tilfu l-prijorità u li konsegwentement jistgħu jitħassru mir-rekwiżiti legali. Tali reviżjonijiet jimmiraw biex jissimplifikaw ir-rekwiżiti statistiċi u biex jitnaqqas il-piż tar-rispons. Il-Kummissjoni tista’ tieħu ħsieb li jiġu mnedija studji esterni f'dan ir-rigward.

—

F’ambjent ekonomiku li dejjem jinbidel huwa importanti li jiġu definiti oqsma prijoritarji għall-istatistika bħall-kummerċ fis-servizzi, l-globalizzazzjoni u l-intraprenditorija u li jsir qbil fuq livell Komunitarju dwar ġabra ta’ indikaturi fil-mira għal kull wieħed mill-oqsma prijoritarji. Jeħtieġ li, safejn ikun possibbli, dawn l-indikaturi jiġu armonizzati ma’ l-istatistika internazzjonali.

—

L-istatistika għandha tinġabar b’mod effiċjenti u jeħtieġ tkun komparabbli. Għalhekk, l-istatistika Ewropea trid tiġi mmodernizzata b'konformità stretta mal-prinċipju tal-koerenza u l-komparabilità tad-data għall-perjodi kkonċernati. Għalhekk, għandha ssir ħidma fi ħdan is-Sistema Ewropea ta' l-Istatistika biex jinkisbu definizzjonijiet armonizzati ta' karatteristiċi u indikaturi li għadhom kif ġew identifikati.

—

Wara li jkun intlaħaq qbil dwar il-ġabriet ta’ indikaturi fil-mira u d-definizzjonijiet armonizzati tagħhom, jkun hemm bżonn ta' ħidma ulterjuri sabiex jiġu żviluppati u ttestjati modijiet għall-produzzjoni ta' statistika fl-oqsma prijoritarji.

—

Sabiex tikkontribwixxi għall-iżvilupp ta' oqsma ġodda u ġabra ta' indikaturi fil-mira, il-Kummissjoni se tniedi studji, torganizza seminars u tipprovdi appoġġ finanzjarju biex jiġu żviluppati metodi u modi biex tinġabar statistika ġdida.

—

L-istatistika Ewropea tinġabar skond il-leġiżlazzjoni Komunitarja, li żviluppat matul is-snin. Tintħieġ reviżjoni totali ta' dik il-leġiżlazzjoni sabiex tiġi żġurata l-konsistenza. Il-Kummissjoni, tista' għalhekk tieħu ħsieb li jsiru studji esterni, intenzjonati sabiex issir reviżjoni ta’ l-atti ġuridiċi eżistenti jew sabiex jiġi pprovdut qafas ġuridiku armonizzat għall-oqsma differenti ta’ l-istatistika ta' l-intrapiżi u tal-kummerċ.

—

Hemm kwistjonijiet komuni fl-istatistika. Per eżempju, bosta oqsma ta’ l-istatistika jirrappurtaw dwar l-impjiegi u jistgħu jiddeskrivu l-istess fenomenu minn perspettivi differenti. Il-Kummissjoni għalhekk ser tieħu ħsieb li jiġu organizzati studji esterni mmirati sabiex tinkiseb armonizzazzjoni tal-metodoloġiji użati fl-oqsma kollha rilevanti ta’ l-istatistika. Ser tingħata għajnuna finanzjarja għall-proġetti ta’ l-Istati Membri għal dan ir-rigward.

—

Huwa importanti li tiġi garantita l-konsistenza bejn l-oqsma differenti ta’ l-istatistika ta' l-intrapriżi u tal-kummerċ. Din il-konsistenza tista' tirreferi għar-relazzjoni bejn l-istatistika dwar il-kummerċ ta' prodotti u l-istatistika dwar il-bilanċ tal-ħlasijiet, iżda wkoll għal dik bejn l-istatistika tan-negozju strutturali u l-istatistika tal-kummerċ. Il-Kummissjoni għandha tieħu ħsieb li jiġu mnedija studji esterni u appoġġ finanzjarju għandu jiġi provdut għall-proġetti ta' l-Istati Membri f’dan ir-rigward.

—

Tnehdiet inizjattiva mill-Kummissjoni biex jiġi stabbilit reġistru Komunitarju ta’ gruppi multinazzjonali ta’ intrapriżi. Dan ir-reġistru huwa bażi kruċjali għall-produzzjoni ta’ statistika armonizzata relatata mal-globalizzazzjoni ta’ l-ekonomija. Il-Kummissjoni għandha tieħu ħsieb li jiġu mnedija studji esterni f'dan ir-rigward.

—

Mhuwiex biżżejjed li jinħoloq reġistru bħal dan, għalhekk għandu jingħata appoġġ finanzjarju lill-azzjonijiet ta’ l-Istati Membri biex jiġu żviluppati metodi iktar effiċjenti għall-ġbir tad-data għal gruppi ta’ intrapriża u biex tiġi murija l-importanza tagħhom għall-kummerċ internazzjonali.

—

Fir-rigward ta' l-isfruttament tar-reġistru Komunitarju ta’ gruppi multinazzjonali ta’ intrapriżi, l-istatistika Ewropea se jkollha tadotta perspettiva ġdida, u għalhekk se jkun importanti li jiġu stabbiliti stħarriġiet Komunitarji speċifiċi dwar gruppi ta’ intrapriża. Il-Kummissjoni għandha tieħu ħsieb li jiġu mnedija studji esterni u appoġġ finanzjarju għandu jiġi provdut għall-proġetti ta' l-Istati Membri f’dan ir-rigward

—

Biex issir enfasi fuq il-ħtiġijiet ġodda u emerġenti ta’ l-istatistika Komunitarja, jistgħu jsiru stħarriġiet Komunitarji speċifiċi fuq bażi ad hoc. Dawn l-istħarriġiet se jiġu stabbiliti permezz ta' studji esterni, li tieħu ħsiebhom il-Kummissjoni u b'appoġġ finanzjarju lill-Istati Membri.

—

Biex jiġi sfruttat l-iffrankar potenzjali mill-iskemi Komunitarji ta’ kampjunar fl-istatistika regolari, il-Kummissjoni għandha tieħu ħsieb li jiġu mnedija studji esterni biex jiġu identifikati oqsma fejn l-aggregati Komunitarji jkunu biżżejjed u biex jiġu żviluppati metodi ġodda għall-ġbir tad-data f’dawk l-oqsma. Se tingħata wkoll għajnuna finanzjarja sabiex l-Istati Membri jkunu jistgħu jaġġustaw is-sistemi tagħhom għall-ġbir tad-data. Madankollu ma hemmx tip standard ta' l-iskemi Komunitarji ta’ kampjunar u għalhekk dawn għandhom jiġu addattati għaċ-ċirkostanzi.

—

L-għan aħħari ta’ din l-azzjoni huwa li jinħolqu ġabriet integrati bis-sħiħ ta’ data għall-istatistika tan-negozju u l-kummerċ f'livell mikro - approċċ għall-istatistika ta’ “data warehouse”. Biex jinkiseb dan, l-Istati Membri se jiġu appoġġati finanzjarjament sabiex jagħqdu ġabriet ta’ data jew micro-data minn oqsma differenti ta’ statistika ta' l-intrapriżi u tal-kummerċ, bħar-reġistri tal-kummerċ u n-negozju u biex jorbtu l-istatistika strutturali tan-negozju ma’ statistika tar-riċerka u l-iżvilupp u statistika tas-soċjetà ta’ l-informazzjoni.

—

Għandhom isiru studji metodoloġiċi fuq proċessi ġodda ta' ħidma biex itejbu l-użu li jsir minn ġbir ta’ data li qed isir diġà eż. bil-ħsieb li jiġi evalwat l-impatt tat-teknoloġija ta’ l-informazzjoni u l-komunikazzjoni (ICT) fuq ir-rendiment tan-negozju billi tingħaqad data minn għejun differenti.

—

L-iktar mod effiċjenti tal-ġbir tad-data għandu l-għan li jnaqqas il-piż fuq l-intrapriżi. Għandu jiġi żgurat li l-uffiċċji ta’ l-istatistika jagħmlu l-aktar użu effiċjenti mill-informazzjoni miġbura. Għalhekk, l-appoġġ finanzjarju se jingħata biex isiru studji metodoloġiċi għall-aħjar allokazzjoni ta’ daqsijiet tal-kampjuni u l-użu kombinat tagħhom ma’ għejun oħra u metodi relatati ta’ stima. Dan l-appoġġ finanzjarju jista’ wkoll jingħata għal studji dwar il-kwalità f'każijiet fejn xi intrapriżi (eż. intrapriżi żgħar u ta' daqs medju) ikunu esklużi mill-istħarriġiet ta’ statistika, u għall-iżvilupp ta’ metodi xierqa u armonizzati ta’ stima.

—

L-informazzjoni ta’ statistika xi kultant tinġabar darbtejn: l-ewwel għal skopijiet amministrattivi, bħat-taxxi, u mbagħad għal skopijiet ta’ statistika fl-istħarriġiet. Dak il-piż doppju għandu jiġi evitat kemm jista’ jkun. Għalhekk, il-Programm MEETS se jappoġġa finanzjarjament proġetti dwar l-użu ta’ data amministrattiva għal skopijiet ta’ statistika, inkluż il-kontijiet tal-kumpanija, billi jgħin lill-Istati Membri jaqilbu minn stħarriġiet ta’ statistika għall-użu ta'-data amministrattiva filwaqt li jiżguraw data ta’ kwalità għolja.

—

Fl-intrapriżi nternament jagħmel sens li tkun promossa l-integrazzjoni tas-sistemi tal-kontabilità u r-rappurtar ta' l-istatistika, sabiex id-data tkun tista' titwassal għall-istatistika f'mod simplifikat. Il-Kummissjoni għandha tieħu ħsieb li jiġu mnedija studji esterni u appoġġ finanzjarju għandu jiġi provdut lill-proġetti ta' l-Istati Membri f'dan ir-rigward.

—

ICT ġdida toffri opportunitajiet għal rappurtar issimplifikat. Dan jista’ jintlaħaq permezz tal-kontijiet tal-kumpanija u rapporti finanzjarji oħra mfassla skond l-istandards internazzjonali tal-kontabilità, u standards tekniċi xierqa għal rapporti bħal dawn, inkluż eXtensible Business Reporting Language (XBRL). Se jittieħdu miżuri biex jappoġġaw finanzjarjament azzjonijiet li jiffaċilitaw it-trasferiment tad-data minn intrapriżi lejn l-awtoritajiet nazzjonali ta’ l-istatistika.

—

Użu iktar effiċjenti ta' l-għodod ta’ l-ICT għandu jiġi appoġġat biex jiffaċilita l-iskambju ta’ informazzjoni bejn il-Kummissjoni u l-Istati Membri. Barra minn hekk, jeħtieġ li jiġu żviluppati iktar l-għodod għall-validazzjoni, l-individwazzjoni ta’ l-iżbalji, il-korrezzjoni, l-analiżi u x-xogħol editorjali. Appoġġ finanzjarju għandu jiġi provdut għall-proġetti ta’ l-Istati Membri f’dan ir-rigward.

—

Filwaqt li jittieħed kont ta' l-iżviluppi li qed isiru fis-simplifikazzjoni tal-formalitajiet doganali għall-esportazzjoni u l-importazzjoni, appoġġ finanzjarju għandu jiġi pprovdut għall-azzjonijiet li jkollhom l-għan li jiffaċilitaw l-iskambju, l-ipproċessar u t-tqassim ta’ statistika tal-kummerċ ta’ kwalità għolja u dettaljata.

—

Appoġġ finanzjarju għandu jiġi pprovdut għall-azzjonijiet fl-Istati Membri mmirati lejn l-iżvilupp ta’ għodod u metodi għat-titjib tal-kwalità tad-data u s-sistema tal-ġbir tad-data.

—

L-appoġġ finanzjarju għandu jingħata għal azzjonijiet fl-Istati Membri li jkollhom l-għan li jnaqqsu n-nuqqas ta’ simetrija billi jevitaw il-klassifikazzjonijiet ħżiena, billi jarmonizzaw l-istima u s-sistemi ta’ ġbir u pproċessar, ir-regoli għat-trattament ta’ data kunfidenzjali, il-limiti u l-metodi għall-aġġustament.

—

L-użu mill-ġdid ta’ data amministrattiva li qed tiġi rrappurtata mill-intrapriżi għal skopijiet oħra (partikolarment ir-rapporti tat-Taxxa fuq il-Valur Miżjud u l-kontijiet) għandu jitħeġġeġ. Appoġġ finanzjarju għandu jiġi pprovdut għall-azzjonijiet f'dan ir-rigward, inkluż għall-iżvilupp ta’ għodod ta’ l-ICT u tal-proċeduri.

—

L-issuktar ta’ l-iżvilupp ta’ għodod u metodi għall-iskambju tad-data f’sistema ċentralizzata huwa kruċjali. L-għodod għall-validazzjoni, l-individwazzjoni ta’ l-iżbalji, il-korrezzjoni, l-analiżi u x-xogħol editorjali fil-qasam ta’ l-istatistika tal-kummerċ intra-Komunitarju jeħtieġu jiġu żviluppati. Għandu jingħata appoġġ finanzjarju għal dawk l-azzjonijiet li jiffukaw fuq l-aspetti ġuridiċi u tekniċi ta' l-iskambju tad-data bejn l-Istati Membri.