3.7.2008   

MT

Il-Ġurnal Uffiċjali ta’ l-Unjoni Ewropea

L 173/27

(1)

L-Aġenzija Eżekuttiva għall-Programm tas-Saħħa Pubblika (minn issa ‘l quddiem imsejħa l-“PHEA”) twaqqfet bid-Deċiżjoni tal-Kummissjoni 2004/858/KE (2), biex timmaniġġja l-programm ta’ azzjoni tal-Komunità fil-qasam tas-saħħa pubblika (minn issa ‘l quddiem imsejjaħ “il-Programm tas-Saħħa Pubblika 2003-2008”) adottat bid-Deċiżjoni Nru 1786/2002/KE tal-Parlament Ewropew u tal-Kunsill (3). Id-Deċiżjoni 2004/858/KE tipprevedi għall-PHEA li twettaq il-funzjonijiet tagħha sal-31 ta’ Diċembru 2010 sabiex tesegwixxi kuntratti u għotjiet iffirmati taħt il-programm għas-Saħħa Pubblika 2003-2008.

(2)

Id-Deċiżjoni Nru 1350/2007/KE tal-Parlament Ewropew u tal-Kunsill tat-23 ta’ Ottubru 2007 tistabbilixxi t-tieni programm ta’ azzjoni tal-Komunità fil-qasam tas-saħħa (2008-2013) (4) (minn issa ‘l quddiem imsejjaħ “it-tieni Programm għas-Saħħa Pubblika 2008-2013”) li daħal fis-seħħ fil-21/11/2007. It-tieni Programm għas-Saħħa Pubblika huwa mfassal biex ikompli l-azzjoni tal-Komunità fil-qasam tas-Saħħa Pubblika billi jiffoka fuq tliet għanijiet wiesgħa: it-titjib tas-sigurtà tas-saħħa taċ-ċittadini, il-promozzjoni tas-saħħa biex titjieb il-prosperità u s-solidarjetà; u biex jiġi ġġenerat u mxerred it-tagħrif dwar is-saħħa.

(3)

Il-programm ta’ azzjoni tal-Komunità fil-qasam tal-ħarsien tal-Konsumatur għall-2007-2013, adottat mill-Parlament Ewropew u l-Kunsill fit-18 ta’ Diċembru 2006 (5) (minn issa ‘l quddiem imsejjaħ “il-programm tal-Konsumatur għall-2007-2013”) jistabbilixxi l-qafas ġenerali għall-iffinanzjar ta’ l-azzjonijiet tal-Komunità b’appoġġ għall-politika tal-Konsumaturi għas-snin 2007 sa 2013. L-għan tal-Programm huwa li jikkumplimenta, jappoġġja u jissorvelja l-politiki ta’ l-Istati Membri u li jikkontribwixxi għall-ħarsien tas-saħħa, is-sigurtà u l-interessi ekonomiċi u legali tal-konsumaturi kif ukoll li jippromwovi d-drittijiet tagħhom għall-informazzjoni, għall-edukazzjoni u biex jorganizzaw ruħhom sabiex iħarsu l-interessi tagħhom.

(4)

L-Artikolu 51 tar-Regolament (KE) Nru 882/2004 tal-Parlament Ewropew u tal-Kunsill tad-29 ta’ April 2004 dwar il-kontrolli uffiċjali li jsiru biex tiġi verifikata l-konformità mal-liġi ta’ l-għalf u l-ikel, is-saħħa ta’ l-annimali u r-regoli tal-benesseri ta’ l-annimali (6) jippermetti lill-Kummissjoni li torganizza korsijiet ta’ taħriġ għall-personal ta’ l-awtoritajiet kompetenti ta’ l-Istati Membri u għall-parteċipanti minn pajjiżi terzi, inkluż pajjiżi li qed jiżviluppaw. L-oqsma koperti b’taħriġ simili huma l-liġi ta’ l-ikel u l-liġi ta’ l-għalf, saħħa ta’ l-annimali u kundizzjonijiet ta’ benesseri ta’ l-annimali. Barra minn hekk, l-Artikolu 2(l)(i) tad-Direttiva tal-Kunsill 2000/29/KE tat-8 ta’ Mejju dwar miżuri ta’ ħarsien kontra l-introduzzjoni fil-Komunità ta’ organiżmi li jagħmlu ħsara lill-pjanti jew prodotti tal-pjanti u kontra l-firxa tagħhom fil-Komunità (7), joffri bażi legali għat-taħriġ fis-settur tas-saħħa tal-pjanti biex l-attivitajiet ta’ taħriġ organizzati mill-Kummissjoni jikkostitwixxu strateġija ġenerali tal-Kummissjoni għat-taħriġ, kif ukoll regoli għas-saħħa tal-pjanti (minn issa ‘l quddiem imsejħa “miżuri ta’ taħriġ dwar is-sigurtà ta’ l-ikel koperti bir-Regolament (KE) Nru 882/2004 u d-Direttiva 2000/29/KE”).

(5)

Analiżi tal-benefiċċju kumparat ma’ l-ispiża mwettaq mill-konsulenti esterni wriet li jekk ix-xogħol ta’ implimentazzjoni tal-programm relatat mat-tieni Programm għas-Saħħa Pubblika 2008-2013 jiġi afdat lill-PHEA eżistenti din tkun l-aktar għażla li tipproduċi benefiċċju għall-ispiża.

(6)

Analiżi tal-benefiċċju mqabbel ma’ l-ispiża wera wkoll li l-ħidmiet ta’ implimentazzjoni tal-programm relatati mal-programm tal-Konsumatur għall-2007-2013 kif ukoll miżuri ta’ taħriġ għas-sigurtà ta’ l-ikel koperti bir-Regolament (KE) Nru 882/2004 u d-Direttiva 2000/29/KE għandhom jitwettqu b’mod aktar effiċjenti mill-PHEA eżistenti, filwaqt li jiġi żgurat li l-immaniġġjar ġenerali jsir mill-Kummissjoni għal dawk il-programmi u miżuri tal-Komunità.

(7)

Sabiex jiġu riflessi l-ħidmiet addizzjonali, il-PHEA għandha tiġi mibdula f’Aġenzija Eżekuttiva għas-Saħħa u l-Konsumaturi.

(8)

Id-Deċiżjoni 2004/858/KE għandha għalhekk tiġi emendata skond dan.

(9)

Id-dispożizzjonijiet stabbiliti f’din id-Deċiżjoni huma konformi ma’ l-opinjoni tal-Kumitat għall-Aġenziji Eżekuttivi,

(1)

Fl-Artikolu 1, il-paragrafu 2 jinbidel b’dan li ġej:

“2.   Isem l-Aġenzija se jkun ‘L-Aġenzija Eżekuttiva għas-Saħħa u l-Konsumaturi.’”

(2)

L-Artikolu 3 jinbidel b’dan li ġej:

“Artikolu 3

Tul ta’ żmien

L-Aġenzija għandha twettaq il-ħidmiet tagħha mill-1 ta’ Jannar 2005 sal-31 ta’ Diċembru 2015.”

(3)

L-Artikolu 4 jinbidel b’dan li ġej:

“Artikolu 4

Għanijiet u ħidmiet

1.   L-Aġenzija għandha tkun responsabbli għat-twettiq tal-ħidmiet ta’ implimentazzjoni li ġejjin għall-immaniġġjar tat-tieni Programm tas-Saħħa Pubblika 2008-2013 kif adottat bid-Deċiżjoni 1350/2007/KE, il-programm tal-Konsumatur għall-2007-2013 kif adottat bid-Deċiżjoni Nru 1926/2006/KE u l-miżuri ta’ taħriġ għas-sigurtà ta’ l-ikel koperti bir-Regolament (KE) Nru 882/2004 u d-Direttiva 2000/29/KE:

2.   L-Aġenzija għandha wkoll timmaniġġja l-fażijiet kollha fil-perjodu tal-miżuri implimentattivi delegati lilha fil-qafas tal-programm ta’ azzjoni tal-Komunità fil-qasam tas-saħħa pubblika 2003-2008, adottat bid-Deċiżjoni Nru 1786/2002/KE.

3.   Id-deċiżjoni tal-Kummissjoni li tiddelega l-awtorità lill-Aġenzija sejra turi fid-dettal il-ħidmiet kollha fdati lillha. Id-deċiżjoni tal-Kummissjoni se tiġi trażmessa, bħala informazzjoni, lill-kumitat stabbilit mill-Artikolu 24 tar-Regolament (KE) Nru 58/2003.”

(4)

L-Artikolu 6 jinbidel b’dan li ġej:

“Artikolu 6

Għotjiet

L-Aġenzija għandha tirċievi sussidji li jidħlu fil-baġit ġenerali tal-Komunitajiet Ewropew mill-fondi allokati għat-tieni Programm tas-Saħħa Pubblika 2008-2013 kif adottat bid-Deċiżjoni 1350/2007/KE, il-programm tal-Konsumatur għall-2007-2013 kif adottat bid-Deċiżjoni 1926/2006/KE u l-miżuri ta’ taħriġ għas-sigurtà ta’ l-ikel koperti bir-Regolament (KE) Nru 882/2004 u d-Direttiva 2000/29/KE:”