26.4.2008   

MT

Il-Ġurnal Uffiċjali ta’ l-Unjoni Ewropea

L 114/90

(1)

Skond id-Direttiva 2001/95/KE u d-Direttiva tal-Kunsill 88/378/KEE tat-3 ta’ Mejju 1988 dwar l-approssimazzjoni tal-liġijiet ta’ l-Istati Membri li jikkonċernaw is-sikurezza ta’ ġugarelli (2), kif emendat bid-Direttiva tal-Kunsill 93/68/KEE (3), il-produtturi huma obbligati li jpoġġu fis-suq ġugarelli sikuri biss.

(2)

Id-Direttiva 88/378/KEE tistipula r-rekwiżiti essenzjali għas-sikurezza li jrid ikollhom il-ġugarelli biex wieħed jiżgura li dawn jimxu ma’ l-objettivi dwar is-sikurezza tad-Direttiva. Barra minn hekk, id-Direttiva tistipula li, sabiex tiġi ffaċilitata l-prova ta’ konformità mar-rekwiżiti essenzjali għas-sikurezza, l-istandards Ewropej relatati mad-disinn u l-kompożizzjoni tal-ġugarelli għandhom jitfasslu mill-korpi ta’ standardizzazzjoni. Bħalissa, ir-riskju ppreżentat mill-kalamiti hu kopert mir-rekwiżit għas-sikurezza ġenerali tar-Direttiva 88/378/KEE, imma d-Direttiva ma tistipulax rekwiżiti għas-sikurezza partikulari li jittrattaw ir-riskju ppreżentat mill-kalamiti.

(3)

Il-Kumitat Ewropew għall-Istandardizzazzjoni (CEN) ħareġ l-istandard Ewropew EN 71-1:2005 “Is-sikurezza ta’ ġugarelli – Parti I: il-karatteristiċi mekkaniċi u fiżiċi” li huwa verżjoni kkonsolidata ta’ l-istandard armonizzat EN 71-1:1998 u tal-11-il-emenda tiegħu. Fejn jidħlu r-rekwiżiti speċifiċi koperti mill-istandard, il-ġugarelli li jikkonformaw ma’ dan l-istandard huma preżunti bħala konformi mar-rekwiżiti essenzjali tad-Direttiva 88/378/KEE. Bħalissa, l-istandard ma jinkludix rekwiżiti tekniċi għall-ġugarelli bil-kalamita. Bi qbil ma’ l-Artikolu 8(2)(a) tad-Direttiva 88/378/KEE, il-produtturi għandhom jirrikorru għal eżami tat-tip tal-KE meta standard armonizzat ma jkoprix ir-riskji kollha li ġugarell jista’ jippreżenta.

(4)

Sabiex tindirizza r-riskji speċifiċi marbuta ma’ ġugarelli bil-kalamita, bi qbil mad-Direttiva 98/34/KE tal-Parlament u tal-Kunsill tat-22 ta Ġunju 1998, li jistipula l-proċedura għall-għoti ta’ l-informazzjoni fil-qasam ta’ l-istandards u r-regolamenti tekniċi (4), fil-25 ta’ Mejju 2007 il-Kummissjoni bagħtet mandat lis-CEN (5), biex fi żmien 24 xahar jiġi rivedut l-istandard Ewropew EN 71-1:2005. Sakemm l-istandard rivedut jitfassal u jidħol fis-seħħ, jenħtieġ li jiġu indirizzati, b’mod immedjat, ir-riskji ppreżentati minn ġugarelli bil-kalamita sabiex bis-saħħa ta’ titjib fl-għarfien ta’ dawn ir-riskji jiġu mnaqqsa aktar inċidenti lit-tfal b’riżultat ta’ dawn il-ġugarelli.

(5)

Barra milli bid-Direttiva 88/378/KEE, is-sikurezza ta’ ġugarelli hi koperta bid-Direttiva 2001/95/KE li tistabbilixxi l-qafas tas-sorveljanza tas-suq għal prodotti tal-konsumatur. Skond l-Artikolu 13 tad-Direttiva 2001/95/KE, jekk il-Kummissjoni Ewropea ssir taf li ċerti prodotti jippreżentaw riskju serju għas-saħħa u s-sikurezza tal-konsumaturi, hi tista’, f’ċerti kundizzjonijiet, tadotta deċiżjoni li titlob lill-Istati Membri biex jieħdu passi temporanji intiżi li jirrestrinġu jew jissoġġettaw għal kundizzjonijiet partikolari t-tqegħid jew id-disponibbiltà fis-suq ta’ prodotti simili.

(6)

Deċiżjoni bħal din tista’ tiġi adottata jekk (a) l-Istati Membri għandhom differenzi sinifikanti fejn tidħol l-istrateġija li adottaw, jew li għadhom se jaddottaw, dwar kif jaffrontaw ir-riskju konċernat; (b) ir-riskju ma jistax, fid-dawl tan-natura tal-kwistjoni tas-sikurezza, jiġi ttrattat b’manjiera kompatibbli mal-grad ta’ l-urġenza tal-każ skond il-proċeduri l-oħra stabbiliti mil-leġiżlazzjoni speċifika Komunitarja applikabbli għall-prodott ikkonċernat; u (c) ir-riskju jista’ jiġi eliminat biss b’mod effettiv jekk jiġu adottati miżuri xierqa applikabbli fil-livell Komunitarju, sabiex jiżguraw livell għoli u konsistenti ta’ protezzjoni għas-saħħa u s-sikurezza tal-konsumaturi u t-tħaddim xieraq tas-suq intern.

(7)

Dan l-aħħar xiref riskju serju fir-rigward ta’ kalamiti fil-ġugarelli. Għalkemm il-kalamiti ilhom jintużaw fil-ġugarelli, f’dawn l-aħħar snin qed ikunu aktar b’saħħithom u jistgħu jinqalgħu ħafna aktar malajr jekk ikunu mwaħħla bl-istess teknika użata fil-passat. Barra minn hekk, minħabba s-saħħa akbar tagħhom, il-kalamiti mhux imwaħħlin jew il-partijiet manjetiċi li jintużaw fil-ġugarelli issa jippreżentaw riskju ogħla ta’ inċidenti serji milli fil-passat.

(8)

Dan ir-riskju serju ġie stabbilit b’numru ta’ inċidenti li ġew irrapurtati madwar id-dinja bejn l-2006 u l-2007 fejn tfal belgħu kalamiti li nqalgħu minn mal-ġugarelli jew partijiet tal-ġugarelli li kellhom il-kalamiti. Meta tinbela’ aktar minn kalamita waħda, il-kalamiti jattiraw lil xuxlin u jistgħu jikkawżaw tiċrita fl-imsaren, infezzjoni jew sadd, li jistgħu jkunu fatali. Anki t-teħid min-nifs ta’ dawn il-kalamiti kkawża inċidenti serji, u d-dħul minnhom fil-pulmuni jirrikjedi kirurġija immedjata.

(9)

Mill-2006, apparti każ fatali rrappurtat fl-Istati Uniti, madwar id-dinja ġew irrappurtati wkoll bosta każi ta’ tfal li belgħu mill-anqas żewġ kalamiti jew kalamita u oġġett metalliku, u li kienu jeħtieġu kirurġija serja. Dawn l-inċidenti involvew tfal ta’ bejn 10 xhur u 12-il sena.

(10)

Fl-2006 u l-2007, bosta produtturi tal-ġugarelli għamlu sejħiet kbar għall-irtirar ta’ ġugarelli manjetiċi. B’mod partikulari, waqt is-sajf ta’ l-2007 ġew irtirati ‘l fuq minn 18-il miljun ġugarell manjetiku minn madwar id-dinja, u l-proporzjon sinifikanti ta’ dawn il-ġugarelli kien fis-suq Ewropew. Bħala riżultat ta’ l-inċidenti u ta’ l-irtirar li sar riċentement, bosta produtturi ġew konxji tar-riskju u mmodifikaw id-disinn tal-ġugarelli kkonċernati, kif ukoll enkapsulaw jew rabtu sew il-kalamiti fil-partijiet li kienu fihom.

(11)

Xi pajjiżi diġà adottaw miżuri biex jittrattaw dan ir-riskju. B’mod partikulari, fid-19 ta’ April 2007 il-Kummissjoni għas-Sikurezza tal-Prodott tal-Konsumatur ta’ l-Istati Uniti (CPSC) ħarġet twissija lill-ġenituri rigward ir-riskji għas-saħħa u għas-sikurezza ppreżentati minn ġugarelli manjetiċi. Is-CPSC ipparteċipat ukoll fir-reviżjoni ta’ l-ASTM F963-2007 “Speċifikazzjoni Standard għas-Sikurezza tal-Konsumatur għas-Sikurezza tal-Ġugarelli” maħsuba taħt l-awspiċi tal-korp ta’ l-istandardizzazzjoni, l-ASTM International, biex tittratta l-kalamiti preżenti fil-ġugarelli. Fl-Ewropa, kemm Franza kif ukoll il-Ġermanja infurmaw lill-Kummissjoni bil-miżuri nazzjonali.

(12)

Fir-riżoluzzjoni tiegħu tas-26 ta’ Settembru 2007 dwar is-sikurezza tal-prodotti u partikolarment il-ġugarelli (6), il-Parlament Ewropew ħeġġeġ lill-Kummissjoni biex tuża l-poteri tagħha biex tadotta miżuri restrittivi, inkluża l-projbizzjoni, jekk jinstab li xi oġġetti tal-konsumatur impoġġija fis-suq tal-Komunità mhumiex sikuri.

(13)

Il-konsultazzjoni ta’ l-Istati Membri fil-Kumitat imwaqqaf mill-Artikolu 15 tad-Direttiva 2001/95/KE stabbiliet li l-Istati Membri għandhom differenzi sinifikanti fejn tidħol l-istrateġija ta’ kif jaffrontaw ir-riskju ppreżentat minn ġugarelli manjetiċi.

(14)

Fl-assenza ta’ regoli Komunitarji, xi Stati Membri adottaw, jew waslu biex jadottaw, miżuri nazzjonali diverġenti biex jimmaniġġaw ir-riskji ppreżentati minn ġugarelli manjetiċi. L-introduzzjoni miżuri nazzjonali bħal dawn tirriżulta, inevitabbilment, f’livell inekwu ta’ protezzjoni u f’ostakoli intra-Komunitarji għal kummerċ ta’ ġugarelli manjetiċi. Kienu bosta l-Istati Membri li talbu għal miżura Komunitarja.

(15)

Teżisti leġiżlazzjoni Komunitarja dwar partijiet żgħar f’ġugarelli magħmula għal tfal żgħar (7), iżda dik il-leġiżlazzjoni ma tittrattax speċifikament, u b’mod suffiċjenti, ir-riskji ppreżentati minn ġugarelli manjetiċi għal tfal li għandhom ‘il fuq minn tliet snin. Fid-dawl tan-natura tal-periklu, ir-riskju ppreżentat minn ġugarelli manjetiċi ma jistax jiġi affrontat b’mod effettiv skond proċeduri oħra stipulati f’regoli speċifiċi tal-liġi Komunitarja b’mod li hu kompatibbli mal-grad ta’ l-urġenza tal-każ. Huwa għalhekk neċessarju li wieħed jirrikorri għal deċiżjoni temporanja skond l-Artikolu 13 tad-Direttiva 2001/95/KE sakemm l-istandard Ewropew rivedut EN 71-1:2005 joħroġ b’soluzzjoni komprensiva għall-problema identifikata. Il-miżura mmirata introdotta b’din id-Deċiżjoni toffri biss soluzzjoni parzjali, temporanja u għal żmien qasir. Il-Kummissjoni diġà rrikonoxxiet biċ-ċar il-ħtieġa ta’ rekwiżiti dwar il-kostruzzjoni biex taffronta, b’mod adegwat, ir-riskji ppreżentati minn ġugarelli manjetiċi meta jinħareġ il-mandat ta’ standardizzazzjoni lis-CEN biex jirrevedi l-EN 71-1:2005.

(16)

Fid-dawl tar-riskju serju minn ġugarelli manjetiċi, u sabiex jiġi żgurat li jkun hemm protezzjoni konsistenti ta’ livell għoli tas-saħħa u s-sikurezza tal-konsumatur madwar l-UE, kif ukoll biex jiġu evitati ostakoli għal kummerċ, għandha tiġi adottata, b’mod urġenti, deċiżjoni temporanja skond l-Artikolu 13 tad-Direttiva 2001/95/KE. Deċiżjoni simili għandha minnufih tissoġġetta t-tqegħid u d-disponibbiltà fis-suq ta’ ġugarelli manjetiċi għall-kundizzjoni li dawn iridu jiġu mmarkati bi twissija adegwata dwar ir-riskji marbuta mal-preżenza ta’ kalamiti jew komponenti manjetiċi ta’ forma u ta’ daqs li jistgħu jinbelgħu u li huma aċċessibbli għat-tfal. Deċiżjoni simili għandha tikkontribwixxi għall-prevenzjoni ta’ aktar imwiet u inċidenti.

(17)

Fid-dawl tad-data dwar l-inċidenti u l-perikli u l-miżura permanenti pendenti fil-forma ta’ reviżjoni ta’ l-istandard EN 71-1:2005, l-ambitu ta’ din id-Direttiva għandu jkopri l-ġugarelli manjetiċi.

(18)

Din id-Deċiżjoni ma tippreġudikax l-Artikoli 3(4) u minn 6 sa 8 tad-Direttiva 2001/95, u għaldaqstant ma tipprojbixxix lill-Istati Membri milli jieħdu l-passi meħtieġa fejn hemm evidenza li ġugarell manjetiku hu perikoluż, irrispettivament mill-konformità mar-rekwiżiti f’din id-Deċiżjoni u ma’ kriterji oħra maħsuba biex jiżguraw ir-rekwiżit ta’ sikurezza ġenerali. L-Istati Membri jridu jissorveljaw is-suq u jesegwixxu attivitajiet ta’ infurzar biex jevitaw riskji ppreżentati minn prodotti mhux sikuri għas-saħħa u s-sikurezza tal-konsumaturi.

(19)

Abbażi tal-progress magħmul bis-saħħa tar-reviżjoni ta’ l-istandard Ewropew EN 71-1:2005, u b’referenza għat-tlestija ta’ l-istandard rivedut u l-adegwatezza tiegħu biex jindirizza b’mod sħiħ ir-riskji ppreżentati minn ġugarelli manjetiċi, il-Kummissjoni għandha tiddeċiedi jekk testendix il-validità ta’ din id-deċiżjoni għal perjodi addizzjonali u jekk id-Deċiżjoni għandhiex tiġi emendata. B’mod partikulari, il-Kummissjoni għandha tiddeċiedi jekk tintroduċix rekwiżiti għall-kostruzzjoni biex tissupplimenta t-twissija mitluba f’din id-Deċiżjoni.

(20)

Perjodu qasir ta’ tranżizzjoni huwa meħtieġ fl-interess kemm ta’ l-Istati Membri li jridu jiżguraw li d-deċiżjoni tiġi applikata b’mod effiċjenti, kif ukoll tal-produtturi u d-distributuri tal-ġugarelli manjetiċi li huma suġġetti għall-obbligu li jqiegħdu jew jagħmlu disponibbli fis-suq biss dawk il-ġugarelli manjetiċi li jġorru t-twissija xierqa. F’dan il-każ, għandu jiġi stabbilit l-iqsar perjodu ta’ tranżizzjoni possibbli, b’konsistenza mal-ħtieġa li jiġu evitati aktar inċidenti u biex tiġi żgurata l-propozjonalità, u dan billi wieħed iżomm f’moħħu li l-miżura tinvolvi biss immarkar u ma tirrikjedix bidliet fid-disinn tal-prodott. Għalhekk, ir-rekwiżit li titwaħħal twissija mal-ġugarelli manjetiċi għandha tidħol fis-seħħ ftit wara l-adozzjoni ta’ din id-Deċiżjoni mill-Kummissjoni.

(21)

Il-miżuri stabbiliti f’din id-Direttiva jikkonformaw ma’ l-opinjoni tal-Kumitat imwaqqaf skond l-Artikolu 15 tad-Direttiva 2001/95/KE.

—

“ġugarell manjetiku” tfisser ġugarell li jinkludi jew li jikkonsisti f’kalamita waħda jew iktar jew f’komponent manjetiku wieħed jew aktar li huma ta’ forma u ta’ qies li jstgħu jinbelgħu, li huma aċċessibbli għat-tfal;

—

“ġugarell” tfisser kull prodott jew materjal iddisinjat jew maħsub biċ-ċar biex jintuża waqt il-logħob minn tfal ta’ inqas minn 14-il sena;

—

“ta’ forma u daqs li jistgħu jinbelgħu” tfisser li joqogħdu sħaħ fiċ-ċilindru tal-partijiet iż-żgħar definit fl-istandard EN 71-1:2005;

—

“aċċessibbli għat-tfal” tfisser maħlula jew li jistgħu jinqalgħu minn mal-ġugarell mit-tfal f’ċirkustanzi normali jew f’kundizzjonijiet previsti raġonevolment, anki jekk oriġinarjament kienu inklużi, enkapsulati, moħbijin jew marbutin sew fil-ġugarell;

—

“tagħmlu disponibbli fis-suq” tfisser kull provvista ta’ ġugarell manjetiku għad-distribuzzjoni, konsum jew użu fis-suq Komunitarju matul l-attività kummerċjali, kemm jekk bi ħlas u anki jekk b’xejn;

—

“tqegħid fis-suq” tfisser l-ewwel darba li l-ġugarell manjetiku kien disponibbli fis-suq Komunitarju;

—

“irtirar” tfisser kull miżura mmirata li tipprevjeni d-distribuzzjoni, il-wiri u l-bejgħ.

(a)

b’dan it-test: “Avviż! Dan il-ġugarell jinkludi kalamiti u komponenti manjetiċi. Kalamiti mwaħħlin flimkien jew li jeħlu ma’ oġġett metalliku fil-ġisem uman jistgħu jikkawżaw inċidenti serji jew fatali. Jekk il-kalamiti jinbelgħu jew jittieħdu min-nifs itlob għajnuna medika minnufih.”;

(b)

jew bi kliem ekwivalenti li jinftiehem malajr u li biċ-ċar iwassal l-istess kontenut.