24.8.2007   

MT

Il-Ġurnal Uffiċjali ta’ l-Unjoni Ewropea

282

(1)

Il-Kunsill Ewropew irrikonoxxa l-kontribuzzjoni siewja lejn it-tkabbir ekonomiku u l-impjiegi fil-bini ta' soċjetà ta' l-informazzjoni totalment inklussiva, ibbażata fuq l-użu mifrux tat-teknoloġiji ta' l-informazzjoni u tal-komunikazzjoni (ICTs) fis-servizz pubbliku, fin-negozji żgħar u medji (SMEs) u fid-djar (2). Bl-inizjattiva i2010, il- Kummissjoni saħqet dwar kemm l-ICT hija xprun għall-kompetittività, it-tkabbir u l-impjiegi (3).

(2)

Il-ħolqien ta' suq waħdieni, miftuħ u kompetittiv għall-apparat tas-soċjetà ta' l-informazzjoni u għas-servizzi tal-medja fil-Komunità huwa kritiku għall-adozzjoni ta' l-ICT. Il-qafas regolatorju tas-servizzi ta' komunikazzjoni elettronika u apparat tal-Komunità, jista jtejjeb il-kompetittività u jrawwem il-kompetizzjoni fil-qasam ta' l-ICT, inter alia billi jiżgura l-introduzzjoni f'waqtha ta' teknoloġiji ġodda.

(3)

It-tekonoloġija ultra-wideband tipikalment karatterizzata b'radjazzjoni ta' qawwa ferm baxxa fuq firxa kbira ta' frekwenzi tar-radju, tista' tipprovdi għadd kbir ta' applikazzjonijiet fil-komunikazzjonijiet, fit-tkejjil, fil-lokazzjoni, fil-mediċina, fis-sorveljanza u fil-ħolqien ta' immaġini, li huma ta' benefiċċju għall-politiki diversi tal-Komunità, fosthom is-soċjetà ta' l-informatika u s-suq intern. F'dan il-kuntest, huwa importanti li jiġu stabbiliti kundizzjonijiet regolatorji li jinkoraġġixxu l-iżvilupp ta' swieq ekonomikament vijabbli għal applikazzjonijiet ta' teknoloġiji ultra-wideband hekk kif jitfaċċaw opportunitajiet kummerċjali.

(4)

L-użu u l-adozzjoni f'waqthom ta' l-applikazzjonijiet li jużaw teknoloġija ultra-wideband fil-Komunità se jiġu mgħejjuna billi jiġu armonizzati r-regoli ta' l-użu ta' l-ispektrum tal-frekwenzi tar-radju madwar il-komunità, u b'hekk jiġi stabbilit suq waħdieni effettiv għal dawn l-applikazzjonijiet, bil-konsegwenza ta' ekonomiji fil-kobor u benefiċċji għall konsumatur.

(5)

Għalkemm is-sinjali ultra-wideband huma ta' qawwa ferm baxxa, il-possibbiltà ta' interferenza ta' ħsara ma' servizzi ta' radjukomunikazzjoni teżisti u trid tiġi mmaniġġjata. Għalhekk, il-qafas regolatorju dwar l-użu ta' l-ispektrum ta' frekwenzi tar-radju għal teknoloġiji ultra-wideband irid bilfors jirrispetta d-drittijiet ta' protezzjoni kontra interferenza li tagħmel il-ħsara (fosthom l-aċċess għall-ispektrum ta' frekwenzi tar-radju minn servizzi tar-radjoastronomija, tas-satelliti għall-esplorazzjoni tad-dinja u tar-riċerka spazjali) u jibbilanċja l-interessi tas-servizzi importanti kontra l-oġġettiv ewlieni tal-politika, li jipprovdi kundizzjonijiet favorevoli għall-introduzzjoni ta' teknoloġiji innovattivi għall benefiċċju tas-soċjetà.

(6)

L-użu ta' l-ispektrum huwa soġġett għall-rekwiżiti tal-liġijiet tal-Komunità dwar il-protezzjoni tas-saħħa pubblika, b'mod partikulari d-Direttiva 2004/40/KE tal-Parlament Ewropew u tal-Kunsill tad-29 ta' April 2004 dwar il-ħtiġiet minimi ta' saħħa u sigurtà li jirrigwardaw l-espożizzjoni ta' ħaddiema għal riskji li jirriżultaw minn aġenti fiżiċi (kampi elettromanjetiċi) (4) u r-Rakkomandazzjoni tal-Kunsill 1999/519/KE tat-12 ta' Lulju 1999 dwar il-limitazzjoni ta' l-esponiment tal-pubbliku ġenerali għall-kampi elettromanjetiċi (0 Hz sa 300 GHz) (5). Il-protezzjoni tas-saħħa għall-apparat tar-radju hija żgurata bil-konformità tat-tali apparat mal-bżonnijiet essenzjali skond id-Direttiva 1999/5/KE tal-Parlament Ewropew u tal-Kunsill tad-9 ta' Marzu 1999 dwar apparat tar-radju u tat-telekomunikazzjonijiet u l-għarfien bejniethom tal-konformità tagħhom (“id-Direttiva R&TTE”) (6).

(7)

Skond Artikolu 4(2) tad-Deċiżjoni ta' l-Ispektrum ta' Frekwenzi tar-Radju, il-Kummissjoni ħarġet tliet mandati (7) lill-Konferenza Ewropea ta' l-Amministrazzjonijiet tal-Posta u tat-Telekomunikazzjonijiet (minn hawn 'il quddiem “is-CEPT”) sabiex tagħmel ix-xogħol kollu neċessarju biex tidentifika il-kriterji tekniċi u operazzjonali għall-introduzzjoni armonizzata fl-Unjoni Ewropea ta' applikazzjonijiet ibbażati fuq l-ultra-wideband.

(8)

Din id-Deċiżjoni hija bbażata fuq studji li għamel is-CEPT taħt mandat tal-KE. Dawn l-istudji ta' kompatibilità jinkludu, inter alia, l-preżunzjoni li l-apparat li juża t-teknoloġija ultra-wideband jitħaddem l-aktar ġewwa u li jwaqqaf it–trażmissjoni wara għaxar sekondi jekk ma jirċevix sinjal minn riċevitur assoċjat miegħu, li juri li t-trasmissjoni tiegħu qed tintlaqa'. Barra minn hekk, is-sinjali vidjo għandhom jiġu trażmessi bl-użu ta' kodiċi ta' effiċjenza għolja.

(9)

L-użu barra ta' apparat li juża teknoloġija ultra-wideband kopert b'din id-Deċiżjoni ma għandux jinkludi l-użu f'lokazzjoni barra fissa jew imqabbad ma' antenna jew ġo vetturi. L-interferenza li tista' tinħoloq b'dan it-tip ta' użu teħtieġ aktar studju.

(10)

Apparat li juża' t-teknoloġija ultra-wideband kopert b'din id-deċiżjoni jaqa' taħt l-ambitu tad-Direttiva R&TTE. Madankollu, l-użu ta' meded ta' frekwenzi minn apparat li juża' t-teknoloġija ultra-wideband għall-ġestjoni tal-komunikazzjonijiet tat-traffiku ta' l-ajru fl-ajruplani u għal applikazzjonijiet ta' salvatagg fuq il-vapuri ma taqax taħt id-direttiva R&TTE, u kwalunkwe użu ta' apparat tali f'dawn l-ambjenti ta' salvataġġ għandu jkun determinat b'regolament adattat u speċifiku skond is-settur.

(11)

Skond id-Direttiva R&TTE, il-Kummissjoni Ewropea ħarġet mandat (M/329) lill-organizzazzjonijiet Ewropej għall-istandardizzazzjoni sabiex jistabbilixxu sett ta' standards armonizzati li jkopru l-applikazzjonijiet ultra-wideband li jkunu rikonoxxuti taħt din id-Direttiva, u li jirriżultaw fi preżunzjoni ta' konformità mar-rekwiżiti tagħha.

(12)

Bħala rispons għall-mandat M/329 tal-KE, l-ETSI qed jiżviluppa standards bħall-Istandard Armonizzat EN 302 065 għall-użu tat-teknoloġija ultra-wideband li jagħti kas l-effetti totali potenzjali, jekk it-tali effetti jistgħu iwasslu għal interferenza li tagħmel ħsara, u l-istudji ta' kompatibbiltà tas-CEPT. Standards Armonizzati għandhom jiġu sostnuti u żviluppati matul iż-żmien sabiex tiġi żgurata l-protezzjoni ta' servizzi li għadhom ġodda u li għalihom għadhom ma ġewx assenjati meded ta' frekwenzi.

(13)

Barra minn hekk, meta Stat Membru jqis li xi apparat li juża tekonoloġija ultra-wideband fl-ambitu tad-Direttiva R&TTE, u ta' kwalunkwe Standard Armonizzat addottat skond din, ma jkunx kompatibbli mar-rekwiżiti tad-Direttiva hawn fuq imsemmija, jistgħu jittieħdu miżuri ta' salvagwardja skond Artikoli 9 u 5 tad-Direttiva rispettivament.

(14)

L-użu ta' l-ispektrum ta' frekwenzi tar-radju minn apparat li juża teknoloġija ultra-wideband skond din id-Deċiżjoni għandu jkun permess, abbażi li ma jkunx hemm interferenza u protezzjoni, u għalhekk għandu jkun soġġett għal Artikolu 5(1) tad-Direttiva tal-Parlament Ewropew u tal-Kunsill 2002/20/KE tas-7 ta' Marzu 2002 dwar l-awtorizzazzjoni ta' netwerks ta' komunikazzjoni u servizzi elettroniċi (8).

(15)

Bil-għan li tiġi żgurata relevanza kontinwa tal-kundizzjonijiet speċifikati f'din id-Deċiżjoni, u fid-dawl tal-bidliet veloċi fl-ambjent ta' l-ispektrum ta' frekwenzi tar-radju, l-amministrazzjonijiet nazzjonali għandhom jimmonitorjaw, fejn ikun possibbli, l-użu ta' l-ispektrum ta' frekwenzi tar-radju, b'apparat li juża teknoloġija ultra-wideband, sabiex din id-Deċiżjoni tiġi soġġetta għal reviżjoni attiva. Reviżjoni bħal din għandha tagħti kas l-iżvilupp teknoloġiku u l-bidliet fis-sitwazzjon tas-suq u tiżgura li s-suppożizzjonijiet tal-bidu dwar it-tħaddim ta' apparat li juża teknoloġija ultra-wideband fil-medda ta' frekwenzi speċifikati f'din id-Deċiżjoni għadhom rilevanti. Sabiex tiġi żgurata protezzjoni adegwata tas-servizzi eżistenti, din id-Deċiżjoni għandha tistabbilixxi kundizzjonijiet li jitqiesu adegwati sabiex jipproteġu s-servizzi attwali.

(16)

Tekniki ta' mitigazzjoni addattati (fosthom metodi ta' detect-and-avoid jew low-duty-cycle) studjati u speċifikati mis-CEPT u l-ETSI skond il mandat rispettiv tal-KE, għandhom jiġu nklużi fl-Istandards Armonizzati skond id-Direttiva R&TTE ġaladarba jkunu stabbli u żguri li jipprovdu protezzjoni ekwivalenti għall-livelli ta' emissjonijiet identifikati f'din id-Deċiżjoni.

(17)

Il-kundizzjonijiet fil medda ta' 4.2 sa 4.8 GHz għal apparat li juża teknoloġija ultra-wideband mingħajr tekniki ta' mitigazzjoni xierqa għandu jkollhom limitu ta' żmien u jiġu sostitwiti b'kundizzjonijiet aktar ristrettivi wara d-data tal-31 ta' Diċembru 2010, għaliex hemm aspettattiva li apparat ta' dan it-tip, fit-tul għandu jopera esklussivament fuq frekwenzi 'l fuq minn 6 GHZ.

(18)

Il-miżuri previsti b'din id-Deċiżjoni huma konformi ma' l-opinjoni tal-Kumitat dwar l-Ispektrum ta' frekwenzi tar-Radju.

1.

“apparat li juża teknoloġija ultra-wideband” tfisser apparat li jinkorpora, bħala parti integrali jew bħala aċċessorju, teknoloġija għal radjukomunikazzjoni b'firxa qasira, li tinvolvi l-ġenerazzjoni intenzjonali u t-trażmissjoni ta' enerġija ta' frekwenzi tar-radju li tinfirex fuq medda ta' frekwenzi usa' min 50 MHz, li tista tkun imrikkba fuq kemm-il medda ta' frekwenzi allokati għal servizzi ta' radjukomunikazzjoni;

2.

“abbażi li ma jkunx hemm interferenza u protezzjoni” tfisser li l-ebda interfernza ta' ħsara ma għandha ssir lil xi servizz ta' radjukomunikazzjoni u li l-ebda talba għall-protezzjoni ta' dan l-apparat ma għandha ssir kontra interferenza li tagħmel ħsara u li ġejja minn servizzi ta' radjukomunikazzjoni;

3.

“ġewwa” tfisser ġo bini jew postijiet fejn l-ilqugħ tipikament jipprovdi t-tnaqqis meħtieġ sabiex jipproteġi s-servizzi ta' radjukomunikazzjoni kontra interferenza ta' ħsara;

4.

“vettura awtomottiva” tfisser kull vettura kif definita bid-Direttiva 70/156/KEE (9);

5.

“vettura ferrovjarja” tfisser kul vettura kif definita bir-Regolament (KE) Nru 91/2003 tal-Parlament Ewropew u tal-Kunsill (10);

6.

“e.i.r.p.” tfisser qawwa rradjata isotropika ekwivalenti;

7.

“densità medja ta' e.i.r.p.” tfisser il-qawwa medja meqjusa b'medda ta' reżoluzzjoni ta' 1 MHz, b'ditekter ta' l-gherq kwadrat medju (RMS) u medja ta' ħin ta' 1 ms jew anqas;

8.

“l-ogħla densità ta' e.i.r.p.” tfisser l-ogħla livell ta trażmissjoni ġo medda ta' frekwenzi ta' 50 MHz iċċentrata fuq il-frekwenza fejn isseħħ l-ogħla qawwa irradjata medja. Jekk meqjusa fuq medda ta x MHz, dan il-livell għandu jitnaqqas b'fattur ta' 20log(50/x)dB;

9.

“id-densità massima ta' l-e.i.r.p.” tfisser l-ogħla saħħa ta' sinjal meqjus f'kull direzzjoni f'kull frekwenza fil-medda definita;