(1)

Fl-4 ta’ Frar 2006, il-Kummissjoni permezz ta’ avviż li ppubblikat fil-Ġurnal Uffiċjali ta’ l-Unjoni Ewropea (2) (“l-avviż tal-bidu”), ħabbret il-bidu ta’ proċediment anti-dumping li jikkonċerna l-importazzjonijiet fil-Komunità ta’ twavel tal-mogħdija li joriġinaw fir-Repubblika tal-Poplu taċ-Ċina (ir-“RPĊ”) u fl-Ukrajna.

(2)

Il-proċediment anti-dumping inbeda wara li fit-23 ta’ Diċembru 2005 ġie ddepożitat ilment minn tliet produtturi Komunitarji (“dawk li għamlu l-ilment”) li jirrappreżentaw proporzjon kbir, f’dan il-każ ta’ aktar minn 40 %, tal-produzzjoni Komunitarja totali tat-twavel tal-mogħdija. L-ilment kien jinkludi evidenza ta’ dumping tal-prodott imsemmi u ta’ ħsara materjali li tirriżulta minnu, li tqies li kienet biżżejjed biex ikun iġġustifikat il-bidu ta’ proċediment.

(3)

Il-Kummissjoni uffiċjalment informat lil dawk li għamlu l-ilment, lil produtturi magħrufa oħra fil-Komunità, lill-produtturi li jesportaw fir-RPĊ u fl-Ukrajna, lill-importaturi u lill-bejjiegħa bl-imnut li huwa magħruf li huma kkonċernati, lir-rappreżentanti tal-pajjiżi li jesportaw ikkonċernati, lill-produtturi fl-Istati Uniti ta’ l-Amerika, li għall-bidu kienu previsti bħala l-pajjiż analogu u lill-produtturi f’pajjiżi analogi potenzjali oħra. Barra minn hekk, il-Kummissjoni kkuntattjat lill-operaturi Komunitarji l-oħra kollha li kienu potenzjalment involuti fil-produzzjoni u/jew fid-distribuzzjoni tal-prodott simili/prodott ikkonċernat li d-dettalji ta’ kuntatt tagħhom kienu provduti lill-Kummissjoni wara l-bidu tal-proċediment. Il-partijiet interessati ngħataw l-opportunità li jippreżentaw il-fehmiet tagħhom bil-miktub u li jitolbu smigħ fi ħdan il-limitu taż-żmien li ġie stabbilit fl-avviż tal-bidu. Il-partijiet interessati kollha li talbu biex jingħataw smigħ, u li wrew li kien hemm raġunijiet partikolari għaliex għandhom jinstemgħu, ingħataw smigħ.

(4)

Minħabba n-numru kbir ta’ produtturi esportaturi Ċiniżi, fl-avviż tal-bidu kien previst it-teħid ta’ kampjuni għad-determinazzjoni tad-dumping, skond l-Artikolu 17 tar-Regolament bażiku. Sabiex il-Kummissjoni tkun tista’ tiddeċiedi jekk it-teħid ta’ kampjuni hux meħtieġ, u jekk iva, li tagħżel kampjun, il-produtturi Ċiniżi kollha li jesportaw intalbu jippreżentaw irwieħhom quddiem il-Kummissjoni u jipprovdu, kif ġie speċifikat fl-avviż tal-bidu, informazzjoni bażika dwar l-attivitajiet tagħhom li huma relatati mal-prodott ikkonċernat matul il-perjodu mill-1 ta’ Jannar 2005 sal-31 ta’ Diċembru 2005. Madanakollu, tmien produtturi biss miċ-Ċiniżi li jesportaw ippreżentaw irwieħhom u pprovdew l-informazzjoni mitluba għat-teħid ta’ kampjuni fi ħdan l-iskadenzi li kienu stabbiliti fl-avviż tal-bidu. Għalhekk, kien deċiż li t-teħid ta’ kampjuni ma kienx meħtieġ.

(5)

Sabiex il-produtturi li jesportaw fil-pajjiżi kkonċernati jitħallew iressqu talba għal trattament ta’ ekonomija tas-suq (market economy treatment (“MET”)) jew għal trattament individwali (“TI”), jekk xtaqu jagħmlu dan, il-Kummissjoni bagħtet formoli ta’ talba lill-produtturi li jesportaw li huwa magħruf li kienu kkonċernati u lill-awtoritajiet tar-RPĊ u ta’ l-Ukrajna. Tmien kumpaniji fir-RPĊ u kumpanija waħda fl-Ukrajna talbu MET skond l-Artikolu 2(7) tar-Regolament bażiku jew TI jekk l-investigazzjoni tistabbilixxi li ma jissodisfawx il-kundizzjonijiet għal MET.

(6)

Il-Kummissjoni bagħtet kwestjonarji lill-partijiet kollha li huwa magħruf li kienu kkonċernat u lill-partijiet l-oħra kollha li talbu dan fi ħdan l-iskadenzi stabbiliti fl-avviż tal-bidu.

(7)

It-tweġibiet għall-kwestjonarju waslu mingħand sitt produtturi esportaturi Ċiniżi, mingħand l-uniku produttur Ukrajn li jesporta, mingħand erba’ produtturi Komunitarji, mingħand żewġ importaturi li mhumiex relatati mal-produtturi esportaturi u mingħand negozjant wieħed. Barra minn hekk, importatur wieħed ressaq kummenti mingħajr ma wieġeb għall-kwestjonarju.

(8)

Waslet ukoll ċerta informazzjoni mingħand is-17-il produttur Komunitarju tal-prodott simili (li 15 minnhom appoġġjaw l-ilment, wieħed esprima pożizzjoni newtrali u wieħed opposta) u tliet kumpaniji li kulma jagħmlu huwa li jimportaw il-prodott ikkonċernat.

(9)

Il-Kummissjoni fittxet u vverifikat l-informazzjoni kollha li qieset li kienet meħtieġa għall-iskop ta’ MET u għal determinazzjoni provviżorja tad-dumping, tal-ħsara li tirriżulta u ta’ l-interess Komunitarju. Iż-żjarat ta’ verifika twettqu kif ġej:

(10)

Fid-dawl tal-ħtieġa li jiġi stabbilit valur normali għall-produtturi esportaturi fir-RPĊ u fl-Ukrajna, li l-MET jista’ ma jingħatalhomx, saret verifika biex ikun stabbilit valur normali fuq il-bażi ta’ data minn pajjiż analogu fl-uffiċċji tal-kumpanija li ġejja:

(11)

L-investigazzjoni tad-dumping u tal-ħsara kopriet il-perjodu mill-1 ta’ Jannar 2005 sal-31 ta’ Diċembru 2005 (il-“perjodu ta’ investigazzjoni” jew il-“PI”). L-eżami tat-tendenzi li kienu rilevanti għall-valutazzjoni tal-ħsara kopra l-perjodu mill-1 ta’ Jannar 2002 sa tmiem il-PI (‘il-perjodu meqjus’).

(12)

Il-prodott ikkonċernat huwa t-twavel tal-mogħdija, kemm jekk ikunu waħidhom u kemm jekk le, bi steam soaking u/jew heating top u/jew blowing top, inklużi t-twavel għall-kmiem, u l-partijiet essenzjali tagħhom, jiġifieri s-saqajn, il-wiċċ u fejn tiġi mserrħa l-ħadida tal-mogħdija li joriġina fir-Repubblika tal-Poplu taċ-Ċina u fl-Ukrajna (‘il-prodott ikkonċernat’) li normalment jiġi ddikjarat fi ħdan il-kodiċijiet NM ex 3924 90 90 , ex 4421 90 98 , ex 7323 93 90 , ex 7323 99 91 , ex 7323 99 99 , ex 8516 79 70 u ex 8516 90 00 .

(13)

Hemm tipi differenti ta’ twavel tal-mogħdija u l-partijiet essenzjali tagħhom jiddependu prinċipalment mill-kostruzzjoni u mid-daqs tagħhom, mill-materjal tal-kostruzzjoni u mill-aċċessorji tagħhom. Madanakollu, it-tipi differenti kollha għandhom l-istess karatteristiċi fiżiċi u użi baċiżi. Għaldaqstant, it-tipi eżistenti kollha jitqiesu bħala prodott wieħed għall-iskopjiet ta’ din l-investigazzjoni.

(14)

Instab li l-prodott ikkonċernat u t-twavel tal-mogħdija u l-partijiet essenzjali tagħhom li ġew prodotti u li nbiegħu fis-suq domestiku tar-RPĊ u ta’ l-Ukrajna u fis-suq domestiku tat-Turkija, li finalment serviet bħala pajjiż analogu, kif ukoll it-twavel tal-mogħdija u l-partijiet essenzjali tagħhom li ġew prodotti u li nbiegħu fil-Komunità mill-industrija Komunitarja kellhom l-istess karatteristiċi u użi fiżiċi u tekniċi bażiċi. Għalhekk, dawn il-prodotti provviżorjament qed jitqiesu li huma simili fi ħdan it-tifsira ta’ l-Artikolu 1(4) tar-Regolament bażiku.

(15)

Skond l-Artikolu 2(7)(b) tar-Regolament bażiku, f’investigazzjonijiet anti-dumping li jikkonċernaw importazzjonijiet li joriġinaw fir-RPĊ u fl-Ukrajna (fil-każ ta’ l-aħħar, għall-proċedimenti kollha li ġew iddepożitati jew li nbdew qabel it-30 ta’ Diċembru 2005), il-valur normali għandu jiġi ddeterminat skond il-paragrafi 1 sa 6 ta’ l-Artikolu msemmi għal dawk il-produtturi esportaturi li wrew li jissodisfaw il-kriterji li ġew stabbiliti fl-Artikolu 2(7)(c) tar-Regolament bażiku, jiġifieri fejn jintwera minn produtturi esportaturi ta’ din ix-xorta li l-kundizzjonijiet ta’ ekonomija tas-suq jipprevalu rigward il-manifattura u l-bejgħ tal-prodott simili. Fil-qosor, u sabiex tkun iffaċilitata r-referenza biss, dawn il-kriterji ġew stabbiliti f’forma mqassra hawn taħt:

(16)

Għall-bidu, tmien produtturi esportaturi Ċiniżi talbu l-MET skond l-Artikolu 2(7)(b) tar-Regolament bażiku u wieġbu għall-formola tat-talba għall-MET għall-produtturi esportaturi fi ħdan l-iskadenzi mogħtija. Madanakollu, sussegwentement tnejn minnhom iddeċidew li ma jikkooperawx ma’ l-investigazzjoni. Għalhekk, tqiesu biss it-talbiet għall-MET tas-sitt produtturi esportaturi Ċiniżi li kien baqa’ u li kkoperaw elenkati fil-premessa 9.

(17)

L-uniku produttur esportatur Ukrajn talab l-MET skond l-Artikolu 2(7)(b) tar-Regolament bażiku u wieġeb għall-formola tat-talba għall-MET għall-produtturi esportaturi fi ħdan l-iskadenzi mogħtija.

(18)

Madanakollu, il-produttur Ukrajn irrimarka li l-Ukrajna tneħħiet mil-lista ta’ pajjiżi b’ekonomija mhux tas-suq li jissemmew fl-Artikolu 2(7)(b) tar-Regolament bażiku, permezz tar-Regolament tal-Kunsill (KE) Nru 2117/2005. Il-kumpanija affermat li d-deċiżjoni li jingħata status ta’ ekonomija tas-suq lill-Ukrajna ttieħdet fuq il-bażi ta’ valutazzjoni tas-sitwazzjoni fix-xhur preċedenti. Għalhekk, kien affermat li għandha tingħata l-MET għaliex (i) il-PI huwa s-sena kalendarja 2005; (ii) dawk li għamlu l-ilment misshom ipprovdew evidenza li turi li l-kundizzjonijiet ta’ ekonomija tas-suq ma kinux japplikaw għall-produtturi Ukrajni kkonċernati u (iii) in-nuqqas ta’ għotja ta’ status ta’ MET lill-Ukrajna jkun diskriminatorju fil-konfront ta’ l-Ukrajna meta titqies ir-Russja.

(19)

F’dan ir-rigward, ta’ min jinnota li r-Regolament tal-Kunsill (KE) Nru 2117/2005 jiddikjara b’mod ċar li se jkun stabbilit valur normali għall-esportaturi u għall-produtturi Ukrajni skond id-dispożizzjonijiet ta’ l-Artikolu 2(1) sa (6) tar-Regolament bażiku, biss fl-investigazzjonijiet li nbdew wara t-30 ta’ Diċembru 2005, jew fuq il-bażi ta’ applikazzjoni għall-bidu li ġiet iddepożitata wara d-data li ssemmiet hawn fuq jew fuq l-inizjattiva tal-Kummissjoni. Peress li l-ilment għal dan il-proċediment kien iddepożitat fit-23 ta’ Diċembru 2005, huwa evidenti li d-dispożizzjonijiet ta’ l-Artikolu 2(1) sa (6) tar-Regolament bażiku ma jistgħux japplikaw u li l-kumpanija Ukrajna li koooperat għalhekk trid tapprova li tissodisfa l-kriterji li ġew stabbiliti fl-Artikolu 2(7)(c) tar-Regolament bażiku. Huwa evidenti mill-kliem ta’ l-Artikolu li ssemma hawn fuq li huma l-produtturi esportaturi li jġorru l-piż tal-prova dwar jekk jissodisfawx il-kriterji tal-MET u mhux dawk li għamlu l-ilment. Barra minn hekk, ta’ min jinnota li l-għoti ta’ status ta’ MET lil ċertu pajjiż huwa bbażat fuq valutazzjoni ġenerali tas-sitwazzjoni ekonomika kollha tiegħu bl-għan li jiġi stabbilit jekk l-ispejjeż u l-prezzijiet, b’mod ġenerali, humiex affidabbli għall-iskop ta’ investigazzjonijiet anti-dumping. Fi kliem ieħor, mhijiex evalwazzjoni tas-sitwazzjoni partikolari ta’ kull intrapriża individwali. Fl-aħħarnett, l-argument li l-Ukrajna tkun iddiskriminata meta titqies ir-Russja huwa bla bażi peress li r-Russja diġà ilha titqies bħala ekonomija tas-suq sa mill-2002. Għal dawn ir-raġunijiet, il-Kummissjoni rrifjutat it-talbiet li saru mill-produttur esportatur Ukrajn u ssuktat bil-proċess għad-determinazzjoni tal-MET.

(20)

Għall-produtturi esportaturi li kkooperaw, il-Kummissjoni fittxet l-informazzjoni kollha li qieset li kienet meħtieġa u vverifikat l-informazzjoni li tressqet fit-talba għall-MET fl-uffiċċji tal-kumpaniji kkonċernati.

(21)

Produttur esportatur Ċiniż, Since Hardware (Guangzhou) Co., Ltd., Guangzhou, wera li jissodisfa l-ħames kriterji kollha li ġew stabbiliti fl-Artikolu 2(7)(c) tar-Regolament bażiku u ngħata l-MET.

(22)

Safejn huma kkonċernati l-bqija tal-produtturi esportaturi Ċiniżi, li ġew elenkati fil-premessa (9), wieħed ma ssodisfax il-kriterji 1, 2 u 3, wieħed ma ssodisfax il-kriterji 2 u 3 u tlieta ma ssodisfawx il-kriterju 2.

(23)

Il-produtturi esportaturi Ċiniżi kollha li kkooperaw u l-industrija Komunitarja ngħataw opportunità biex jikkumentaw dwar is-sejbiet li ssemmew hawn fuq. Erba’ kumpaniji ma qablux mad-determinazzjonijiet li saru u talbu li għandhom jingħataw l-MET.

(24)

Safejn huwa kkonċernat il-kriterju 1, produttur esportatur Ċiniż wieħed ma weriex li jissodisfa dan il-kriterju. B’mod partikolari, fl-ebda stadju ta’ l-investigazzjoni ma wera li wieħed miż-żewġ azzjonisti tiegħu effettivament ħallas għall-ishma tiegħu li nkisbu mingħand l-Istat. Barra minn hekk, il-kumpanija kisbet l-elettriku mingħand l-Istat fuq bażi mhux kuntrattwali. Il-kumpanija kkontestat is-sejbiet żvelati imma ma pprovdiet l-ebda evidenza verifikabbli dwar dawn il-kwistjonijiet. Għalhekk, il-kummenti tagħha ma setgħux jitqiesu. Għaldaqstant, ġie konkluż li l-kumpanija ma wrietx li tissodisfa l-kriterju 1.

(25)

Safejn huwa kkonċernat il-kriterju 2, ħames kumpaniji ma rnexxilhomx juru li kellhom sett ċar ta’ rekords tal-kontabilità, li ġew ivverifikati b’mod indipendenti skond l-istandards internazzjonali tal-kontabilità. Tabilħaqq, eżami tal-kontijiet ikkonċernati wera nuqqasijiet sinifikanti fil-ħames każi kollha. Pereżempju, il-kumpaniji ma elenkawx punt punt id-dħul u l-infiq kollu differenti fil-kontijiet tagħhom imma applikaw sistema estensiva ta’ tpaċija bejn dħul u nfiq ta’ din ix-xorta fuq bażi mensili. Lanqas ma rrispettaw il-prinċipju ta’ l-akkumulazzjoni tal-kontabilità. Fil-fatt, iggruppaw it-tranżazzjonijiet li jsiru kull xahar u rreġistrawhom fil-kotba tagħhom fuq bażi sommarja mingħajr dettalji tat-tranżazzjonijiet individwali kkonċernati. Ladarba l-awdituri ma kkummentawx dwar dan il-ksur ta’ l-IAS 1, ir-rekords tal-kontabilità ma kinux ivverifikati skond l-IAS. Malli dan ġie żvelat, erba’ produtturi esportaturi komplew jargumentaw li segwew l-IAS imma ma pprovdew l-ebda evidenza biex juru li s-sejbiet kienu ħżiena. Għaldaqstant, ġie konkluż li fil-każi kollha l-kumpaniji ma wrewx li jissodisfaw il-kriterju 2.

(26)

Żewġ kumpaniji wkoll naqsu milli juru li jissodisfaw il-kriterju 3. Għal dawn iż-żewġ kumpaniji, instab fil-post li ma ssodisfawx l-obbligazzjonijiet kuntrattwali tagħhom fejn għandhom x’jaqsmu l-pagamenti tad-drittijiet għall-użu ta’ l-art lill-Istat, imma dan ma kellu l-ebda konsegwenza finanzjarja jew ta’ xort’oħra għall-kumpaniji. Barra minn hekk, instab li matul il-PI kumpanija waħda kienet tikri art li hija proprjetà Statali li għaliha ma kinitx kisbet b’mod formali d-drittjiet għall-użu ta’ l-art mingħand l-Istat. Din is-sitwazzjoni kienet korretta biss wara l-PI, imma biss bi ħlas li kien aktar baxx mir-rata normali. Malli ġie żvelat dan, iż-żewġ produtturi esportaturi Ċiniżi kkontestaw dawn is-sejbiet, imma l-informazzjoni l-ġdida li ressqu sabiex jappoġġjaw l-affermazzjonijiet tagħhom ma setgħetx tiġi aċċettata ladarba ma kinitx verifikabbli. Għaldaqstant, ġie konkluż li ż-żewġ kumpaniji ma rnexxilhomx juru li jissodisfaw il-kriterju 3.

(27)

Fuq il-bażi ta’ dak li ntqal aktar ’il fuq, produttur esportatur Ċiniż wieħed biss, jiġifieri Since Hardware (Guangzhou) Co., Ltd., wera li jissodisfa l-kriterji kollha li ġew stabbiliti fl-Artikolu 2(7)(c) tar-Regolament bażiku u ngħata l-MET, filwaqt li l-ħames produtturi esportaturi li baqa’ ma wrewx li jissodisfaw il-kriterji kollha ta’ din ix-xorta, u b’hekk, ma setgħux jingħataw l-MET.

(28)

L-uniku produttur esportatur Ukrajn, Eurogold Industries Ltd., Zhitomir, wera li jissodisfa l-kriterji kollha li ġew stabbiliti fl-Artikolu 2(7)(c) tar-Regolament bażiku u għalhekk ingħata l-MET. Il-produttur esportatur u l-industrija Komunitarja ngħataw opportunità li jikkumentaw dwar is-sejbiet tal-MET imma ma wasal l-ebda kumment.

(29)

Skond l-Artikolu 2(7)(a) tar-Regolament bażiku, għall-pajjiżi li jaqgħu taħt dak l-Artikolu, ħlief f’dawk il-każi fejn il-kumpaniji jistgħu juru li jissodisfaw il-kriterji kollha li ġew stabbiliti fl-Artikolu 9(5) tar-Regolament bażiku, jiġi stabbilit dazju mal-pajjiż kollu, jekk ikun hemm.

(30)

Safejn hija kkonċernata r-RPĊ, il-produtturi esportaturi kollha li talbu l-MET talbu wkoll TI fil-każ li ma jingħatawx MET.

(31)

Fuq il-bażi ta’ l-informazzjoni disponibbli, instab li erba’ kumpaniji ssodisfaw ir-rekwiżiti kollha għall-TI kif ġie stabbilit fl-Artikolu 9(5) tar-Regolament bażiku.

(32)

Għalhekk, ġie konkluż li m’għandux jingħata t-TI lill-produtturi esportaturi fir-RPĊ li ġejjin:

(33)

Fuq il-bażi ta’ l-informazzjoni disponibbli, instab li kumpanija waħda ma rnexxiliex turi li ssodisfat b’mod kumulattiv ir-rekwiżiti kollha għall-TI kif ġie stabbilit fl-Artikolu 9(5) tar-Regolament bażiku.

(34)

B’mod partikolari, ġie stabbilit li l-informazzjoni li tirreferi għall-bejgħ mill-esportazzjoni li sar jew direttament jew permezz ta’ kumpanija relatata stabbilita f’Ħong Kong ma kinitx verifikabbli. Il-kumpanija ma rnexxilhiex tipprovdi data sostanzjali li tirreferi għall-volumi totali ta’ l-esportazzjoni tagħha u l-fatturi ta’ l-esportazzjoni korrispondenti li kienu rilevanti minkejja talbiet għal informazzjoni ta’ din ix-xorta. Barra minn hekk, l-informazzjoni mressqa dwar il-fatturat totali, kif ukoll dwar il-bejgħ domestiku u dwar il-bejgħ mill-esportazzjoni ma setgħetx tiġi rikonċiljata mar-rapporti ta’ verifika disponibbli u mar-rekords tal-kontabilità tal-kumpanija. Barra minn hekk, il-kumpanija ma setgħetx turi d-destinazzjoni tal-bejgħ tagħha kif ġie rrapportat fil-kwestjonarju. Għalhekk, il-Kummissjoni ma setgħetx tivverifika jekk il-kumpanija setgħetx tiddetermina b’mod liberu l-prezzijiet u l-kwantitajiet ta’ l-esportazzjoni tagħha, u l-kundizzjonijiet u t-termini tal-bejgħ kif ġie stabbilit fl-Artikolu 9(5)(b) tar-Regolament bażiku.

(35)

Skond l-Artikolu 2(7) tar-Regolament bażiku, f’każ ta’ importazzjonijiet minn pajjiżi b’ekonomija mhux tas-suq u sakemm l-MET ma setax jingħata, għall-pajjiżi li ġew speċifikati fl-Artikolu 2(7)(b) tar-Regolament bażiku, għandu jiġi stabbilit valur normali fuq il-bażi tal-prezz jew tal-valur mibni f’pajjiż analogu.

(36)

Fl-avviż tal-bidu, il-Kummissjoni indikat il-ħsieb tagħha li tuża lill-Istati Uniti ta’ l-Amerika (l-“Istati Uniti”) bħala pajjiż analogu xieraq sabiex jiġi stabbilit valur normali għar-RPĊ u għall-Ukrajna u stiednet lill-partijiet interessati sabiex jikkumentaw dwar dan.

(37)

Waslu kummenti mingħand il-produtturi esportaturi li kkooperaw fir-RPĊ u fl-Ukrajna fejn kienu ssuġġeriti t-Tajlandja, l-Indja jew it-Turkija bħala pajjiż analogi li kienu aktar adattati mill-Istati Uniti. L-argumenti prinċipali li saru kontra l-Istati Uniti kienu d-differenzi fl-iżvilupp ekonomiku ġenerali, l-aċċess għal u l-prezzijiet tal-materja prima, l-ispiża tax-xogħol u l-metodi ta’ produzzjoni, imma wkoll id-differenzi f’termini ta’ kompetizzjoni fis-suq domestiku għat-twavel tal-mogħdija. Kien affermat ukoll li s-suq ta’ l-Istati Uniti għat-twavel tal-mogħdija huwa suq ferm imħares bi prezzijiet artifiċjalment għolja.

(38)

Il-Kummissjoni fittxet kooperazzjoni mingħand il-produtturi fl-Istati Uniti u f’pajjiżi analogi potenzjali oħra bħat-Tajlandja, l-Indja u t-Turkija. Intbagħtu ittri u kwestjonarji rilevanti lil ħames kumpaniji fl-Istati Uniti, lil tliet kumpaniji fit-Tajlandja, lil ħames kumpaniji fl-Indja u lil disa’ kumpanija fit-Turkija. Minn dawn il-kumpaniji kollha, produttur Tork wieħed biss ressaq fiż-żmien xieraq l-informazzjoni kollha meħtieġa għad-determinazzjoni ta’ valur normali u qabel li jikkoopera fl-investigazzjoni.

(39)

L-investigazzjoni wriet li t-Turkija għandha suq kompetittiv għat-twavel tal-mogħdija b’madwar 90 % tas-suq ikun fornut minn numru ta’ produtturi lokali u l-bqija minn importazzjonijiet minn pajjiżi terzi. Il-volum ta’ produzzjoni fit-Turkija jikkostitwixxi aktar minn 5 % tal-volum ta’ l-esportazzjonijiet Ċiniżi tal-prodott ikkonċernat lejn il-Komunità. Fejn għandom x’jaqsmu l-kwalità u l-istandards tat-twavel tal-mogħdija Torok, ma nstabet l-ebda differenza kbira ġenerali meta pparagunati mal-prodotti Ċiniżi u Ukrajni. Is-suq Tork għalhekk tqies li kien biżżejjed rappreżentattiv għad-determinazzjoni ta’ valur normali għar-RPĊ u għall-Ukrajna.

(40)

Minħabba dak li ntqal aktar ’ il fuq, qed jiġi konkluż b’mod provviżorju li t-Turkija tikkostitwixxi pajjiż analogu xieraq skond l-Artikolu 2(7)(a) tar-Regolament bażiku.

(41)

Id-determinazzjoni ta’ valur normali għal produttur esportatur Ċiniż u għall-uniku produttur esportatur Ukrajn li ngħataw l-MET għandha tkun ibbażata fuq id-data li ressqu dwar il-bejgħ domestiku u l-ispiża tal-produzzjoni. Din id-data kienet ivverifikata fl-uffiċċji tal-kumpaniji kkonċernati.

(42)

Safejn hija kkonċernata d-determinazzjoni ta’ valur normali, f’kull pajjiż li jesporta, il-Kummissjoni l-ewwel stabbiliet jekk il-bejgħ domestiku tal-prodott ikkonċernat minn kull produttur esportatur kienx rappreżentattiv meta pparagunat mal-bejgħ totali lill-Komunità. Skond l-Artikolu 2(2) tar-Regolament bażiku, il-bejgħ domestiku tqies bħala rappreżentattiv meta l-volum tal-bejgħ domestiku totali ta’ kull produttur esportatur kien daqs jew aktar minn 5 % tal-volum tal-bejgħ totali mill-esportazzjoni tal-produttur lill-Komunità.

(43)

Ġie stabbilit li matul l-IP l-produttur esportatur Ċiniż li ngħata l-MET ma kellux bejgħ domestiku biżżejjed rappreżentattiv. Għalhekk, il-valur normali ma setax jiġi stabbilit fuq il-bażi tal-prezzijiet tal-produttur esportatur rilevanti fil-pajjiż ta’ l-esportazzjoni, kif ġie pprovdut fis-sottoparagrafu 1 ta’ l-Artikolu 2(1) tar-Regolament bażiku. Sussegwentement, kellu jiġi applikat metodu ieħor.

(44)

Minħabba li biex jiġi stabbilit valur normali ma seta’ jintuża l-ebda prezz domestiku, kellu jiġi kkalkulat valur normali mibni bbażat fuq l-ispejjeż tal-produttur ikkonċernat. Għaldaqstant, skond l-Artikolu 2(3) tar-Regolament bażiku, inbena valur normali billi ma’ l-ispejjeż tal-manifattura tat-tipi ta’ twavel tal-mogħdija esportati, aġġustati fejn kien meħtieġ, ġie miżjud ammont raġonevoli għall-infiq tal-bejgħ, għall-infiq ġenerali u għall-infiq amministrattiv (“BĠ & A”) u marġni raġonevoli ta’ profitt. F’dan ir-rigward, ta’ min jinnota li l-prezzijiet tax-xiri ta’ ċerta materja prima/ċerti partijiet, b’mod partikolari l-materja prima/partijiet magħmula mill-azzar, li ġew irrapportati minn din il-kumpanija jidhru li huma artifiċjalment baxxi u b’hekk l-ispiża tal-produzzjoni jeħtieġ li tiġi eżaminata aktar u s-sejbiet provviżorji jista’ jkollhom jitqiesu mill-ġdid għall-iskop ta’ kwalunkwe sejba definittiva.

(45)

Ladarba l-produttur esportatur li ngħata l-MET ma kellux bejgħ domestiku li kien biżżejjed rappreżentattiv, l-infiq BĠ & A u l-profitt kellhom jiġu ddeterminati fuq il-bażi ta’ kwalunkwe metodu raġonevoli ieħor skond l-Artikolu 2(6)(c) tar-Regolament bażiku.

(46)

Għaldaqstant, il-Kummissjoni użat l-infiq BĠ & A u r-rati ta’ profitt mill-produttur esportatur li kkoopera fil-pajjiż analogu li kellu bejgħ domestiku fl-andament ordinarju tan-negozju. L-infiq BĠ & A u r-rati medji tal-profitt li nstabu għand il-produttur esportatur Tork li kkoopera ġew miżjuda ma’ l-ispiża tal-manifattura li kellu l-produttur esportatur ikkonċernat rigward it-tipi esportati kif ġie stipulat mill-Artikolu 2(3) tar-Regolament bażiku.

(47)

Ġie stabbilit li għall-uniku produttur esportatur Ukrajn, matul il-PI, ma kienx hemm bejgħ domestiku totali tal-prodott ikkonċernat fi kwantitajiet rappreżentattivi. Għalhekk, ma setax jiġi stabbilit valur normali fuq il-bażi tal-prezzijiet tal-produttur esportatur rilevanti fil-pajjiż ta’ l-esportazzjoni, kif ġie provdut mis-sottoparagrafu 1 ta’ l-Artikolu 2(1) tar-Regolament bażiku. Sussegwentement, kellu jiġi applikat metodu ieħor.

(48)

Ladarba l-produttur esportatur bl-MET ma kellux biżżejjed bejgħ domestiku u ladarba ma kien hemm l-ebda produttur esportatur Ukrajn li kkoopera, skond l-Artikolu 2(6)(c) tar-Regolament bażiku l-infiq BĠ & A u l-profitt kellhom jiġu ddeterminati fuq il-bażi ta’ kwalunke metodu raġonevoli ieħor.

(49)

Għaldaqstant, il-Kummissjoni użat l-infiq BĠ & A u r-rati ta’ profitt mill-produttur esportatur li kkoopera fil-pajjiż analogu li kellu bejgħ domestiku fl-andament ordinarju tan-negozju. L-infiq BĠ & A u r-rati medji tal-profitt li nstabu għand il-produttur esportatur Tork li kkoopera kienu miftiehma fuq l-ispiża tal-manifattura li kellu l-produttur esportatur ikkonċernat rigward it-tipi esportati kif ġie stipulat fl-Artikolu 2(3) tar-Regolament bażiku.

(50)

Wara l-għażla tat-Turkija bħala pajjiż analogu, kien ikkalkulat valur normali fuq il-bażi tad-data vverifikata fl-uffiċċji tal-produttur Tork li kkoopera.

(51)

Instab li l-bejgħ domestiku tal-produttur Tork tal-prodott simili kien rappreżentattiv meta pparagunat mal-prodott ikkonċernat li ġie esportat lejn il-Komunità mill-produtturi esportaturi fir-RPĊ.

(52)

Sar ukoll eżami dwar jekk il-bejgħ domestiku jistax jitqies bħala li sar matul l-andament ordinarju tan-negozju, billi ġie stabbilit il-proporzjon tal-bejgħ profitabbli lil klijenti indipendenti. Il-verifika li saret għand il-produttur Tork uriet li l-volum tal-bejgħ tiegħu, mibjugħ bi prezz tal-bejgħ nett daqs jew ’il fuq mill-ispiża ta’ unità, kien jirrappreżenta aktar minn 80 % tal-volum tal-bejgħ totali. Għalhekk, il-valur normali kien ibbażat fuq il-prezz domestiku effettiv, li ġie kkalkulat bħala medja mgħobbija (bil-komponenti ta’ medja ta’ fatturi) tal-prezzijiet tal-bejgħ domestiku kollu ta’ dak it-tip ta’ prodott li sar matul il-PI, irrispettivament minn jekk dan il-bejgħ kienx profitabbli jew le. Barra minn hekk, instab li b’mod ġenerali dawn il-prezzijiet domestiċi kienu allinjati mal-prezzijiet ta’ produttur Tork prinċipali ieħor li matul il-verifika fuq il-post fil-pajjiż analogu nkisbet ċerta informazzjoni dwaru.

(53)

Il-produtturi esportaturi għamlu bejgħ mill-esportazzjoni lill-Komunità jew (i) direttament lil klijenti indipendenti fil-Komunità; (ii) permezz ta’ kumpaniji tan-negozju li mhumiex relatati li jinsabu barra mill-Komunità u (iii) permezz ta’ kumpanija tan-negozju relatati li jinsabu barra mill-Komunità.

(54)

Fejn il-bejgħ mill-esportazzjoni lill-Komunità sar direttament lil klijenti indipendenti fil-Komunita, il-prezzijiet ta’ l-esportazzjoni ġew stabbiliti fuq il-bażi tal-prezzijiet li effettivament tħallsu jew jistgħu jitħallsu għall-prodott ikkonċernat skond l-Artikolu 2(8) tar-Regolament bażiku.

Fejn il-bejgħ mill-esportazzjoni lejn il-Komunità sar permezz ta’ kumpaniji tan-negozju li mhumiex relatati, il-prezzijiet ta’ l-esportazzjoni kienu stabbiliti fuq il-bażi tal-prezzijiet tal-prodott meta nbiegħ lill-kumpaniji tan-negozju għall-esportazzjoni lejn il-Komunità skond l-Artikolu 2(8) tar-Regolament bażiku.

(55)

Fejn sar bejgħ mill-esportazzjoni lill-Komunità permezz ta’ kumpaniji tan-negozju relatati, il-prezz ta’ l-esportazzjoni kien stabbilit fuq il-bażi tal-prezzijiet tal-prodott meta nbiegħ mill-kumpaniji tan-negozju relatati lill-ewwel xerrej indipendenti skond l-Artikolu 2(8) tar-Regolament bażiku.

(56)

Produttur esportatur wieħed kien qed ibigħ parti mill-prodott ikkonċernat permezz ta’ kumpanijia tan-negozju f’Ħong Kong. Il-kumpanija tan-negozju li kienet ibbażata f’Ħong Kong ma kinitx f’pożizzjoni li turi b’mod xieraq, permezz tal-kontijiet tagħha, li l-prezzijiet ta’ l-esportazzjoni lill-klijenti indipendenti fil-Komunità li ġew irrapportati kienu effettivament tħallsu. Barra minn hekk, ma kienx possibbli li fil-post jiġi rikonċiljat ix-xiri tan-negozjant ta’ Ħong Kong mal-kontijiet ivverifikati tiegħu għall-bejgħ lill-Komunità. Il-kumpanija kienet informata li kien hemm dubji serji dwar l-akkuratezza tal-bejgħ tagħha lejn il-Komunità permezz tal-kumpanija tan-negozju relatata f’Ħong Kong u li bejgħ ta’ din ix-xorta mhux se jitqies għall-kalkoli provviżorji tad-dumping. Il-kumpanija ngħatat l-opportunità li tikkumenta, imma ma pprovdiet l-ebda evidenza li setgħet tbiddel il-konklużjoni preliminari. B’hekk dawk it-tranżazzjonijiet ta’ esportazzjoni ma tqisux u l-prezz ta’ l-esportazzjoni kien ibbażat biss fuq il-prezzijiet għall-bejgħ li sar jew direttament lil klijenti indipendenti fil-Komunità jew permezz ta’ kumpaniji tan-negozju li mhumiex relatati li jinsabu barra mir-RPĊ u mill-Komunità.

(57)

Produttur esportatur wieħed ma kellu l-ebda bejgħ dirett tal-prodott ikkonċernat. Biegħ il-prodott ikkonċernat jew permezz ta’ kumpaniji tan-negozju li mhumiex relatati li jinsabu fir-RPĊ jew permezz ta’ kumpanija tan-negozju relatata li tinsab fir-RPĊ. Ladarba d-destinazzjoni finali tal-bejgħ li sar permezz ta’ partijiet li mhumiex relatati ma setgħetx tintwera, dan il-bejgħ provviżorjament ma tqiesx u l-prezz ta’ l-esportazzjoni kien ibbażat biss fuq il-bejgħ li sar permezz tal-kumpanija tan-negozju relatata, li setgħet turi d-destinazzjoni tal-bejgħ tagħha. Il-kumpanija kienet informata b’dan u ngħatat l-opportunità li tikkumenta. Il-kummenti ma bidlux din il-konlużjoni preliminari.

(58)

Kif ġie spjegat taħt l-analiżi tat--TI fil-premessa (33) ta’aktar ’il fuq, produttur esportatur wieħed ma setax juri u jissostanzja l-bejgħ mill-esportazzjoni effettiv tiegħu. Għalhekk, skond l-Artikolu 18(1) tar-Regolament bażiku il-bejgħ mill-esportazzjoni kollu tiegħu ma tqiesx u l-prezzijiet irrapportati ma setgħux jintużaw biex jiġu stabbiliti l-prezzijiet ta’ l-esportazzjoni mir-RPĊ lejn il-Komunità. Il-kumpanija kienet informata b’dan u ngħatat l-opportunità li tikkumenta. Madanakollu, il-kummenti ma bidlux is-sejbiet ta’ l-investigazzjoni, u ladarba ma kien disponibbli l-ebda sors ieħor sabiex jiġu stabbiliti l-esportazzjonijiet ta’ din il-kumpanija lejn il-Komunità, tqies li kien xieraq li d-data dwar l-esportazzjoni kollha tagħha ma titqiesx u marġni tad-dumping jiġi stabbilit fuq il-fatti disponibbli (ara l-premessa (65)).

(59)

Il-bejgħ kollu mill-esportazzjoni lill-Komunità ta’ l-uniku esportatur Ukrajn saru permezz tal-kumpanija relatata tiegħu li tinsab barra mill-Komunità. Din il-kumpanija relatata wettqet il-funzjonijiet ta’ l-importazzjoni kollha tal-merkanzija li ddaħħlet f’ċirkolazzjoni libera fil-Komunità, u għaldaqstant għandha titqies bħala importatur relatat. Il-prezz ta’ l-esportazzjoni għalhekk kien stabbilit skond l-Artikolu 2(9) tar-Regolament bażiku, fuq il-bażi tal-prezzijiet li bihom inbiegħu mill-ġdid għall-ewwel darba l-prodotti importati lil xerrej indipendenti. Għal dan l-iskop, saru aġġustamenti biex jitqiesu l-ispejjeż kollha, inklużi kwalunkwe dazju u taxxa, li kien hemm bejn l-importazzjoni u l-bejgħ mill-ġdid, u tal-profitti li normalment jinġemgħu mill-importaturi indipendenti li kkooperaw, sabiex seta’ jiġi stabbilit prezz ta’ l-esportazzjoni affidabbli.

(60)

Il-paragun bejn valur normali u prezz ta’ l-esportazzjoni sar fuq bażi ta’ kif joħroġ mill-fabbrika.

(61)

Sabiex ikun żgurat paragun ġust bejn il-valur normali u l-prezz ta’ l-esportazzjoni, saret konċessjoni xierqa fil-forma ta’ aġġustamenti għad-differenzi li jaffetwaw lill-prezzijiet u lill-paragunabilità tal-prezzijiet skond l-Artikolu 2(10) tar-Regolament bażiku. Għall-produtturi esportaturi kollha li ġew investigati, ingħataw konċessjonijiet għad-differenzi fl-ispejjeż tat-trasport u ta’ l-assigurazzjoni, għall-ispejjeż ta’ l-immaniġġjar, tat-tagħbija u għall-ispejjeż aniċillari, għall-ispejjeż ta’ l-ippakkjar, għall-ispejjeż tal-kreditu, għall-ispejjeż tal-garanziji u kummissjonijiet fejn kien japplika u fejn kien ġustifikat.

(62)

Rigward il-valur normali li kien ibbażat fuq il-pajjiż analogu għall-produtturi esportaturi li ma ngħatawx l-MET, l-investigazzjoni stabbiliet li t-twavel tal-mogħdija Torok fil-parti l-kbira tal-każi huma mgħammra b’sokit ta’ l-elettriku u b’cord-minder, filwaqt li dan ma kienx il-każ għall-parti l-kbira tal-prodotti Ċiniżi. Għalhekk, skond l-Artikolu 2(10)(a) tar-Regolament bażiku, sar aġġustament xieraq għall-prezzijiet Torok biex ikun eliminat l-effett ta’ din id-differenza. Barra minn hekk, instabu xi differenzi fil-livell tan-negozju. Kien stabbilit li fis-suq domestiku Tork it-twavel tal-mogħdija normalment jiġu fornuti direttament lill-bejjiegħa bl-imnut u b’hekk il-kwantitajiet f’kull ordni/konsenja jkunu sostanzjalment aktar baxxi meta pparagunati ma’ dawk li jsiru permezz ta’ l-importaturi/tan-negozjanti jew permezz taċ-ċentri ta’ distribuzzjoni/forniment tal-katini l-kbar tal-bejgħ bl-imnut, kif inhu l-każ tal-bejgħ mill-esportazzjoni Ċiniż. Għalhekk sar aġġustament xieraq skond l-Artikolu 2(10)(d) tar-Regolament bażiku fuq il-prezzijiet Torok biex ikun eliminat l-effett ta’ dawn id-differenzi.

(63)

Skond l-Artikolu 2(11) u (12) tar-Regolament bażiku, il-marġnijiet tad-dumping għall-produtturi esportaturi li kkooperaw kienu stabbiliti fuq il-bażi ta’ paragun ta’ valur normali medju b'piż differenzjat skond it-tip ta’ prodott ma’ prezz ta’ l-esportazzjoni medju b'piż differenzjat skond it-tip ta’ prodott kif ġie stabbilit aktar ’il fuq. Ta’ min jinnota li ma kien hemm l-ebda produttur esporatatur li kkoopera fiż-żewġ pajjiżi lil hinn minn dawk li ngħataw l-MET jew it--TI.

(64)

Sabiex ikun iddeterminat il-marġni tad-dumping għall-produtturi esportaturi kollha li ma kkooperawx, l-ewwel ġie stabbilit il-livell ta’ nuqqas ta’ kooperazzjoni. Għal dan il-għan, il-volum ta’ l-esportazzjonijiet lejn il-Komunità li kien irrapportat mill-produtturi esportaturi li kkooperaw kien ipparagunat mal-volum ekwivalenti ta’ l-importazzjonijiet li ġie stabbilit fuq il-bażi ta’ l-ilment u ta’ ċerta informazzjoni li nġabret minn produtturi esportaturi magħrufa oħra fil-pajjiżi kkonċernati li finalment ma kkooperawx fl-investigazzjoni. Ta’ min jinnota li ma hemm l-ebda statistika preċiża dwar l-importazzjoni ta’ l-Eurostat għall-prodott ikkonċernat.

(65)

Fejn il-livell ta’ kooperazzjoni huwa baxx, jiġifieri inqas minn 80 % ta’ l-esportazzjonijiet totali tal-prodott ikkonċernat li għalihom kienu responsabbli l-produtturi esportaturi li kkoperaw, tqies li kien xieraq li jiġi ffissat marġni tad-dumping għal produtturi esportaturi oħra fuq livell ogħla mill-ogħla marġni tad-dumping li ġie stabbilit għall-produtturi esportaturi li kkooperaw. F’każ ta’ din ix-xorta, il-marġni tad-dumping għalhekk ġie stabbilit fuq livell li jikkorrispondi għall-marġni tad-dumping medju b'piż differenzjat tat-tipi ta’ prodott li nbiegħu l-aktar tal-produtturi esportaturi li kkooperaw bl-ogħla marġnijiet tad-dumping. Dan tqies li kien xieraq ladarba kien hemm raġuni li wieħed jemmen li l-livell baxx ta’ kooperazzjoni jirriżulta minħabba li l-produtturi esportaturi li ma kkooperawx fil-pajjiż investigat ġeneralment ikunu wettqu dumping fuq livell ogħla minn kwalunkwe produttur esportatur li kkoopera. Barra minn hekk, ma kien hemm l-ebda indikazzjoni li kwalunkwe kumpanija li ma kkooperatx kienet qed twettaq dumping fuq livell aktar baxx.

(66)

Fejn il-livell ta’ kooperazzjoni huwa għoli, jiġifieri 80 % jew aktar ta’ l-esportazzjonijiet totali tal-prodott ikkonċernat li kienu responsabbli għalihom il-produtturi esportaturi li kkoperaw, tqies xieraq li l-marġni tad-dumping għall-produtturi esportaturi l-oħra jiġi ffissat fuq il-livell ta’ l-ogħla marġni tad-dumping li ġie stabbilit għal produttur esportatur li kkoopera fil-pajjiż ikkonċernat.

(67)

Fuq il-bażi ta’ l-ilment u ta’ l-informazzjoni disponibbli mingħand il-produtturi esportaturi li ppreżentaw irwieħhom u pprovdew ċerta data fl-istadju inizjali ta’ l-investigazzjoni, ġie konkluż b’mod provviżorju li l-livell ta’ kooperazzjoni kien taħt it-80 %. Għalhekk biex jiġi stabbilit marġni tad-dumping għal mal-pajjiż kollu ntużat il-metodoloġija li ġiet deskritta fil-premessa (65) aktar ’il fuq.

(68)

Il-marġnijiet provviżorji tad-dumping, li ġew espressi bħala perċentwali tal-prezz CIF ta’ fuq il-fruntiera Komunitarja, bid-dazju mhux imħallas, huma dawn li ġejjin:

(69)

Għall-uniku produttur esportatur Ċiniż li ngħata l-MET, jiġifieri Since Hardware (Guangzhou) Co., Ltd., kien stabbilit provviżorjament li l-bejgħ mill-esportazzjoni ma sarx bi prezzijiet li kienu soġġetti għal dumping. F’dan ir-rigward, ta’ min ifakkar li s-sejbiet provviżorji jista’ jkollhom jitqiesu mill-ġdid għall-iskop ta’ kwalunkwe sejba definittiva għar-raġunijiet li ġew spjegati taħt il-premessa (44).

(70)

Fuq il-bażi ta’ l-ilment u ta’ l-informazzjoni disponibbli mingħand il-produtturi esportaturi li ppreżentaw irwieħhom u pprovdew ċerta data fl-istadju inizjali ta’ l-investigazzjoni, ġie konkluż b’mod provviżorju li fil-każ ta’ l-Ukrajna l-livell ta’ kooperazzjoni kien ’il fuq minn 80 %. Fil-fatt, jidher li Eurogold Industries Ltd. huwa l-uniku produttur esportatur Ukrajn tat-twavel tal-mogħdija u ma nstabet l-ebda indikazzjoni li xi produttur esportatur b’mod deliberat naqas milli jikkoopera. Għalhekk, intużat il-metodoloġija li ġiet deskritta fil-premessa (66) aktar ’il fuq biex jiġi stabbilit il-marġni tad-dumping għal kwalunkwe produttur esportatur Ukrajn ieħor tal-prodott ikkonċernat.

(71)

Il-marġni provviżorju tad-dumping, li ġie espress bħala perċentwali tal-prezz CIF fuq il-fruntiera Komunitarja, bid-dazju mhux imħallas, huwa dan li ġej:

(72)

Is-sejbiet provviżorji ta’ l-investigazzjoni stabbilew li l-prodott simili jiġi manifatturat minn għall-inqas tletin kumpanija żgħira u ta’ daqs medju (“SMEs”) fil-Komunità. Il-parti l-kbira tal-produzzjoni Komunitarja tinsab fl-Italja, fil-Polonja u fir-Renju Unit.

(73)

Għalkemm hemm diversi produtturi fis-suq Komunitarju, il-livell ta’ konċentrazzjoni huwa relattivament għoli kif jista’ jitqies mill-fatt li l-output tal-ħames produtturi prinċipali jirrappreżenta aktar minn 50 % ta’ l-output totali stmat fil-Komunità. L-output tal-kumpaniji kollha li ssemmew aktar ’il fuq jikkostitwixxi l-produzzjoni Komunitarja totali.

(74)

L-ilment kien iddepożitat minn tliet produtturi Komunitarji li jirrappreżentaw proprozjon kbir tal-produzzjoni Komunitarja totali magħrufa tal-prodott simili, jiġifieri f’dan il-każ aktar minn 40 %.

(75)

Dawk li għamlu l-ilment u produttur Komunitarju ieħor kkooperaw b’mod sħiħ fl-investigazzjoni (ara wkoll il-premessa (9)). Dawn l-erba’ kumpaniji jirrappreżentaw aktar minn 45 % tal-produzzjoni Komunitarja totali magħrufa tal-prodott simili. Wieħed minn dawn il-produtturi Komunitarji kien għamel xi importazzjonijiet mir-RPĊ fil-PI. Madanakollu, l-importazzjoni ma kinitx il-kummerċ ċentrali tiegħu u tqies li dawn l-importazzjonijiet saru b’reazzjoni għall-influss ta’ importazzjonijiet soġġetti għal dumping bi prezzijiet baxxi, b’mod partikolari sabiex jibqgħu kompetittivi fil-firxa ta’ prodotti ta’ livell baxx. Għalhekk ma jitqiesx li huwa xieraq li dan il-produttur jiġi eskluż mid-definizzjoni ta’ l-industrija Komunitarja.

(76)

Fuq din il-bażi, jitqies li l-erba’ produtturi Komunitarji li jissemmew fil-premessa (75) aktar ’il fuq jitqiesu bħala li jikkostitwixxu l-industrija Komunitarja fi ħdan it-tifsira ta’ l-Artikolu 4(1) u ta’ l-Artikolu 5(4) tar-Regolament bażiku. Minn hawn ’il quddiem se jissejħu l-“industrija Komunitarja”.

(77)

Ta’ min ifakkar li ma hemm l-ebda statistika preċiża dwar l-importazzjoni ta’ l-Eurostat għall-prodott ikkonċernat. Barra minn hekk, ma hemm l-ebda indikazzjoni ta’ kwalunkwe kwantità sinifikanti ta’ importazzjonijiet ta’ twavel tal-mogħdija minn pajjiżi ħlief l-RPĊ u l-Ukrajna (il-“pajjiżi kkonċernati”). Il-konsum Komunitarju b’hekk ġie stabbilit fuq il-bażi ta’ l-informazzjoni li ġejja:

Fuq din il-bażi, il-konsum Komunitarju żviluppa kif ġej:

(78)

Bejn l-2002 u l-IP, il-konsum tat-twavel tal-mogħdija fil-Komunità żdied bi 28 %, bl-aktar żjieda f’daqqa tkun bejn l-2004 u l-IP. Iż-żjieda ġeneralment stabbli hija prinċipalment attribwita lill-konsum li qed jiżdied fl-Istati Membri l-ġodda, għalkemm iż-żjieda fil-IP sa ċertu punt tista’ tiġi attribwita lil żjieda fl-importazzjonijiet bi prezzijiet baxxi mill-PRC u mill-Ukrajna minn uħud minn dawk li qabel kienu produtturi Komunitarji tradizzjonali li qalbu għall-importazzjoni u b’hekk żiedu l-istokks tagħhom.

(79)

Il-Kummissjoni qieset jekk l-effetti ta’ l-importazzjonijiet li kienu soġġetti għal dumping mill-pajjiżi kkonċernati għandhomx jiġu vvalutati b’mod kumulattiv, fuq il-bażi tal-kriterji li ġew stabbiliti fl-Artikolu 3(4) tar-Regolament bażiku. Dan l-Artikolu jipprovdi li l-effetti ta’ l-importazzjonijiet minn żewġ pajjiżi jew aktar li fl-istess ħin ikunu soġġetti għal investigazzjonijiet anti-dumping għandhom ikunu vvaluati b’mod kumulattiv biss jekk jiġi ddeterminat li (a) il-marġni tad-dumping stabbilit f’relazzjoni għall-importazzjonijiet minn kull pajjiż huwa aktar minn de minimis kif ġie ddefinit fl-Artikolu 9(3) tar-Regolament bażiku u li l-volum ta’ l-importazzjonijiet ta’ kull pajjiż mhux negliġibbli, u (b) valutazzjoni kumulattiva ta’ l-effetti ta’ l-importazzjonijiet hija adattata fid-dawl tal-kundizzjonijiet tal-kompetizzjoni bejn il-prodotti importati u l-kundizzjonijiet tal-kompetizzjoni bejn il-prodotti importati u l-prodott simili Komunitarju.

(80)

Ta’ min ifakkar li ma nstabx li l-importazzjonijiet mingħand produttur esportatur Ċiniż kienu soġġetti għal dumping. Għalhekk, dawn l-importazzjonijiet ma tqiesux flimkien ma’ l-importazzjonijiet li kienu soġġetti għal dumping.

(81)

Il-marġnijiet tad-dumping li ġew stabbiliti f’relazzjoni għall-importazzjonijiet li kienu soġġetti għal dumping minn kull wieħed mill-pajjiżi kkonċernati kienu aktar minn de minimis. Barra minn hekk, il-volum ta’ l-importazzjonijiet li kienu soġġetti għal dumping minn kull wieħed minn dawk il-pajjiżi ma kienx negliġibbli fis-sens ta’ l-Artikolu 5(7) tar-Regolament bażiku.

(82)

L-investigazzoni wriet ukoll li l-kundizzjonijiet tal-kompetizzjoni kemm bejn l-importazzjonijiet li kienu soġġetti għal dumping u kemm bejn l-importazzjonijiet li kienu soġġetti għal dumping u l-prodott simili Komunitarju kienu simili. Instab li, irrispettivament mill-oriġini tagħhom, it-twavel tal-mogħdija prodotti/mibjugħa mill-pajjiżi kkonċernati u dawk prodotti/mibjugħa mill-industrija Komunitarja jikkompetu kontra xulxin ladarba huma simili f’termini tal-karatteristiċi bażiċi tagħhom, mill-perspettiva tal-konsumatur jistgħu jiġu skambjati wieħed ma’ l-ieħor u jiġu distribwiti permezz ta’ l-istess kanali ta’distribuzzjoni.

(83)

Ċerti partijiet interessati affermaw li f’dan il-każ il-kundizzjonijiet għal valutazzjoni kumulattiva ma ġewx sodisfatti għaliex hemm differenzi fundamenti bejn l-importazzjonijiet mir-RPĊ u mill-Ukrajna f’termini ta’ prezzijiet u ta’ mġiba tas-suq.

(84)

Rigward il-prezzijiet, ta’ min jinnota li d-differenza assoluta fil-livell tal-prezzijiet bejn iż-żewġ pajjiżi mhix deċiżiva fil-kuntest tal-valutazzjoni kumulattiva. Tabilħaqq tista’ tiġi spjegata minn diversi fatturi, eż. taħlita ta’ prodotti differenti. Hija t-tendenza tal-prezzijiet tul il-perjodu meqjus li hija rilevanti u t-tendenza hija paragunabbli għaż-żewġ pajjiżi. Fil-fatt, bejn l-2002 (l-2003 fil-każ ta’ l-Ukrajna) u l-IP, il-prezz medju ta’ l-importazzjoni mir-RPĊ u mill-Ukrajna żdied b’27 % u bi 12 % rispettivament.

(85)

Safejn hija kkonċernata l-imġiba tas-suq, kif diġà ġie ddikjarat fil-premessa (82) aktar ’il fuq, ma kienet stabbilita l-ebda differenza sostanzjali f’termini ta’ karatteristiċi, kanali tad-distribuzzjoni, eċċ. tal-prodott.

(86)

Fuq din il-bażi, qed jiġi konkluż b’mod provviżorju li qed jiġu sodisfatti l-kundizzjonijiet ta’ akkumulazzjoni kollha u li għaldaqstant l-effetti ta’ l-importazzjonijiet li ġew soġġetti għal dumping li joriġinaw fil-pajjiżi kkonċernati għandhom jiġu vvalutati b’mod konġunt għall-iskop ta’ l-analiżi tal-ħsara.

(87)

Il-volum ta’ l-importazzjonijiet tal-prodott ikkonċernat żdied b’mod sinifikanti matul il-perjodu meqjus kollu. Sa mill-2002, l-importazzjonijiet fil-PI żdiedu b’aktar minn 850 %.

(88)

Ta’ min jinnota li fl-2002 ma kien hemm l-ebda importazzjoni mill-Ukrajna. L-uniku produttur Ukrajn tat-twavel tal-mogħdija beda ħidmietu fl-2003. L-importazzjonijiet mill-Ukrajna żdiedu f’daqqa fl-2004, b’aktar minn 400 %.

(89)

Il-prezz medju ta’ l-importazzjoni żdied matul il-perjodu meqjus kollu. Madanakollu, baqa’ ferm taħt il-prezzijiet medji ta’ l-industrija Komunitarja (ara t-tabella rilevanti u l-premessa (99). Fil-PI, il-prezz medju ta’ l-importazzjoni kien aktar baxx b’aktar minn 40 % mill-prezz medju ta’ l-industrija Komunitarja.

(90)

Iż-żjieda fil-prezzijiet medji ta’ l-importazzjoni tista’ tiġi attribwita lill-fatturi li ġejjin.

Kien hemm ċaqliqa sinfikanti min-naħa ta’ l-esportaturi tar-RPĊ lejn it-tarf nofsani sa dak għoli tas-suq. Fil-fatt, kif diġà ssemma fil-premessa (78) aktar ’il fuq, uħud mill-produtturi Komunitarji tradizzjonali baxxew b’mod sinifikanti jew waqqfu l-produzzjoni tagħhom fil-Komunità u bdew jimportaw mill-pajjiżi kkonċernati. Il-parti l-kbira ta’ dawn il-kumpaniji huma stabbiliti fil-prodotti ta’ livell nofsani u ta’ livell għoli.

Il-parti l-kbira tal-produtturi esportaturi Ċiniżi daħlu dan l-aħħar fis-suq tat-twavel tal-mogħdija u mhijiex xi sorpriża li tiġi osservata xi żjieda fil-prezzijiet hekk kif isiru aktar stabbiliti.

Fl-2004, is-sehem mill-importazzjonijiet mill-Ukrajna żdiedu f’daqqa. Ladarba l-livell tal-prezzijiet medji ta’ dawn l-importazzjonijiet huwa ’l fuq mil-livell tal-prezzijiet medji ta’ l-importazzjonijiet mill-PRC, il-livell tal-prezzijiet akkumulati huwa ogħla.

(91)

Is-sehem mis-suq ta’ l-importazzjonijiet li kienu soġġetti għal dumping mill-pajjiżi kkonċernati żdied b’mod drammatiku matul il-perjodu meqjus kollu. Bejn l-2003 u l-2004 kważi ttripla, meta l-importazzjonijiet mill-Ukrajna ppenetraw b’mod massiv is-suq Komunitarju, u kompla jiżdied b’rata għolja fl-IP sakemm ħadu kważi nofs is-suq.

(92)

Sabiex jiġi analizzat it-traħħis tal-prezzijiet taħt il-prezzijiet normali, il-prezzijiet ta’ l-importazzjonijiet tal-produtturi esportaturi li kkooperaw kienu pparagunati mal-prezzijiet ta’ l-industrija Komunitarja, fuq il-bażi tal-medji b'piż differenzjat għal tipi ta’ prodott paragunabbli matul il-PI. Il-prezzijiet ta’ l-industrija Komunitarja kienu aġġustati għal livell ta’ qabel il-prezz tas-suq, u pparagunati mal-prezzijiet CIF fuq il-fruntiera Komunitarja, flimkien mad-dazji doganali, fejn kien japplika. Dan il-paragun tal-prezzijiet sar għat-tranżazzjonijiet li kienu fuq l-istess livell ta’ negozju, fejn kienu aġġustati b’mod xieraq fejn kien meħtieġ, u wara li tnaqqsu r-ribassi u l-iskontijiet.

(93)

Fuq il-bażi tal-prezzijiet tal-produtturi esportaturi li kkooperaw, il-marġnijiet tat-traħħis tal-prezz taħt il-prezz normali li nstabu, skond il-pajjiż, u li ġew espressi bħala perċentwali tal-prezzijiet ta’ l-industrija Komunitarja, huma kif ġej:

(94)

Skond l-Artikolu 3(5) tar-Regolament bażiku, il-Kummissjoni eżaminat il-fatturi u l-indiċijiet ekonomiċi kollha li għandhom effett fuq l-istat ta’ l-industrija Komunitarja. L-analiżi sħiħa ta’ dawn il-fatturi twettqet għal dawk li għamlu l-ilment u għal produttur ieħor li kkoopera b’mod sħiħ, jiġifieri l-industrija Komunitarja.

(95)

Waqt il-perjodu meqjus, il-produzzjoni ta’ l-industrija Komunitarja naqset bi 22 %. Iż-żjieda ċkejkna fil-kapaċità fil-PI kienet minħabba li produttur Komunitarju wieħed installa kapaċità żejda biex jibbenefika minn żjieda fil-konsum wara t-tkabbir ta’ l-UE. B’xorti ħażina, kienu biss l-importazzjonijiet li bbenefikaw minn din iż-żjieda fil-konsum. Għaldaqstant, fil-PI l-użu tal-kapaċità naqset aktar mill-output.

(96)

Bejn l-2002 u l-IP kien hemm żjieda ġenerali fl-istokks. Għalkemm bil-probabbiltà kollha l-ogħla livell fl-2004 kien parzjalment influwenzat mill-ordnijiet ikkompletati li kienu għadhom ma ġewx ikkonsenjati lill-klijenti, iż-żjieda fit-tendenza ġenerali hija evidenti.

(97)

Il-bejgħ ta’ l-industrija Komunitarja naqas matul il-perjodu meqjus kollu u fil-PI niżel b’79 % tal-volum oriġinali tiegħu. Tendenza li qed tonqos bħal din hija saħansitra aktar ta’ tħassib meta titqies fi ħdan il-kuntest ta’ konsum Komunitarju li qed jiżdied. Fil-fatt, bejn l-2002 u l-PI l-industrija Komunitarja tilfet 39 % tas-sehem mis-suq tagħha.

(98)

Ma seta’ jiġi osservat l-ebda tkabbir fl-industrija Komunitarja. Fil-fatt, l-industrija Komunitarja ma bbenefikatx mit-tkabbir tas-suq, jiġifieri miż-żjieda fil-konsum Komunitarju, imma bil-kuntrarju, fil-perjodu meqjus tilfet 21 % tal-volum tal-bejgħ tagħha.

(99)

Il-prezz medju ta’ kull unità tal-produzzjoni ta’ l-industrija Komunitarja stess naqas b’mod sinifikanti fl-ewwel tliet snin, jiġifieri b’14 %. Fl-2004 laħaq l-aktar livell baxx tiegħu u fl-IP baqa’ stabbli.

(100)

Matul il-perjodu meqjus, il-profitabilità ta’ l-industrija Komunitarja ddeterjorat. Il-marġni ta’ profitt fil-PI kien 40 % aktar baxx milli fl-2002. It-titjib apparenti fl-IP, meta pparagunat ma’ l-2004, fil-fatt inkiseb permezz ta’ qtugħ fir-remunerazzjonijiet tal-maniġment ta’ wħud mill-kumpaniji. Qtugħ fir-remunerazzjonjijiet ta’ din ix-xorta kellu impatt sinifikanti fuq il-marġnijiet tal-profitt tagħhom. Fil-fatt, fil-PI il-profitt totali gross kompla jonqos u laħaq 65 % tal-livell ta’ l-2002 tiegħu. Għalhekk huwa evidenti li ż-żjieda tal-profitt nett totali ta’ qabel it-taxxa hija artifiċjali u mhux sostenibbli.

(101)

L-investimenti naqsu b’mod sinifikanti matul il-perjodu meqjus, biex fil-PI laħqu inqas minn nofs il-livell ta’ l-2002. Barra minn hekk, il-parti l-kbira ta’ l-investimenti kienu jikkostitwixxu investimenti meħtieġa ta’ sostituzzjoni u ta’ rinnovazzjoni. Parti mill-investiment ta’ l-2004 kien ukoll konness mal-preparazzjoni għal opportunitajiet ġodda wara t-tkabbir ta’ l-UE. Madanakollu, kif intwera aktar ’il fuq, iż-żjieda fil-konsum kienet għalkollox moqdija mill-importazzjonijiet mill-pajjiżi kkonċernati.

(102)

Il-profitt fuq l-investiment, li kien espress f’termini ta’ profitti netti ta’ l-industrija Komunitarja u l-valur nett kif imniżżel fil-kotba ta’ l-investimenti tagħha ġew żviluppati skond il-marġnijiet ta’ l-investiment u tal-profitt. Rigward dak li jidher bħala livell għoli ta’ profitt fuq l-assi netti, ta’ min jinnota li l-parti l-kbira tal-kumpaniji li jikkostitwixxu l-industrija Komunitarja kienu stabbiliti 30 sena jew aktar ilu u b’hekk il-parti l-kbira ta’ l-assi tagħhom diġà ġew konsiderevolment deprezzati. Fil-fatt, fl-2004 meta saru ċerti investimenti u meta l-marġnijiet tal-profitt kienu jirriflettu r-rendiment effettiv ta’ l-industrija Komunitarja (aktar milli ż-żjieda artifiċjali fil-profitt fil-PI), il-profitt fuq l-investiment waqa’ bi 63 punt perċentwali. Dan jikkonferma n-nuqqas ta’ ħila tal-produtturi Komunitarji biex jiġbru kapital, b’mod partikolari minħabba l-volum tal-bejgħ li qed jonqos u l-prezz baxx tal-bejgħ.

(103)

Id-dħul u l-ħruġ tal-flus ta’ l-industrija Komunitarja varja. It-titjib ta’ l-2003 kien segwit minn tnaqqis f’daqqa fl-2004. L-irkupru fil-PI huwa skond il-miżuri mmirati lejn titjib fil-profitabilità, kif ġie deskritt fil-premessa (100) aktar ’il fuq. B’kollox, tul il-perjodu meqjus id-dħul u l-ħruġ tal-flus iddeterjora.

(104)

Bejn l-2002 u l-PI, in-numru ta’ impjegati ta’ l-industrija Komunitarja li kienu involuti fil-prodott simili naqas bi 33 %. L-ispiża medja tax-xogħol għal kull impjegat, li tirrifletti l-pagi, baqgħet pjuttost stabbli; it-tnaqqis temporanju fl-2004 kien ikkumpensat minn żjieda ċkejkna fl- PI.

(105)

L-isforzi biex titnaqqas l-ispiża tal-produzzjoni, ir-razzjonalizzazzjoni u t-tnaqqis fin-numru ta’ impjegati rriżultaw f’żjieda fl-output għal kull ħaddiem (żjieda ta’ 19 % tul il-perjodu meqjus). Madanakollu, minħabba l-indikaturi finanzjarji li ġew deskritti aktar ’il fuq, iż-żjieda fil-produttività ma setgħetx tikkumpensa għat-tnaqqis fil-volum tal-bejgħ u fil-livell tal-prezzijiet.

(106)

Fejn jikkonċerna l-impatt fuq l-industrija Komunitarja tal-kobor tal-marġni tad-dumping effettiv, meta jitqiesu l-volum u l-prezzijiet ta’ l-importazzjonijiet li ġew soġġetti għal dumping mill-pajjiżi kkonċernati, dan l-impatt ma jistax jitqies li huwa negliġibbli.

(107)

Barra minn hekk, ma kien hemm l-ebda indikazzjoni li matul il-PI l-industrija Komunitarja kienet qed tirkupra mill-effetti ta’ kwalunkwe dumping jew sussidjar ta’ l-imgħoddi.

(108)

Matul il-perjodu meqjus, il-preżenza ta’ importazzjonijiet bi prezz baxx li kienu soġġetti għal dumping mill-RPĊ u mill-Ukrajna żdiedet b’mod drammatiku. F’termini ta’ volum, matul il-perjodu meqjus l-importazzjonijiet li kienu soġġetti għal dumping mill-pajjiżi kkonċernati żdiedu b’aktar minn 850 %. F’termini ta’sehem mis-suq, matul l-istess perjodu iggwadanjaw aktar minn 40 punt perċentwali tat-twavel tal-mogħdija Komunitarji.

(109)

L-analiżi ta’ l-indikaturi ekonomiċi ta’ l-industrija Komunitarja żvelat li l-ħsara mmaterjalizzat f’termini ta’ tnaqqis fil-volum tal-bejgħ, fil-prezz tal-bejgħ u fis-sehem tas-suq. Dan kellu impatt negattiv dirett fuq is-sitwazzjoni finanzjarja ta’ l-industrija Komunitarja, fuq il-livell tal-produzzjoni u fuq l-impjiegi. Matul il-perjodu meqjus, il-volum tal-bejgħ ta’ l-industrija Komunitarja fis-suq Komunitarju naqas b’aktar minn 20 %, is-sehem mis-suq naqas bi 15-il punt perċentwali u l-impjiegi niżlu b’aktar minn 30 %. Il-prezz medju tal-bejgħ ta’ l-industrija Komunitarja naqas b’14 % u l-prezzijiet individwali laħqu l-aktar livell baxx possibbli tagħhom. Fil-fatt, l-indikaturi finanzjarji jikkonfermaw li l-industrija Komunitarja m’għadhiex f’pożizzjoni li tnaqqas aktar il-livelli tal-prezzijiet tagħha mingħajr ma nġarrab telf li, fil-każ ta’ l-SMEs, ma jistax ikun sostnut għal aktar minn ftit xhur mingħajr ma jkunu mġiegħla jagħlqu.

(110)

Meta jitqiesu dawn il-fatturi kollha, qed jitqies b’mod provviżorju li l-industrija Komunitarja ġarrbet ħsara materjali fi ħdan it-tifsira ta’ l-Artikolu 3(5) tar-Regolament bażiku.

(111)

Skond l-Artikolu 3(6) u (7) tar-Regolament bażiku, il-Kummissjoni eżaminat jekk il-ħsara materjali li ġarrbet l-industrija Komunitarja kinitx ikkawżata minn importazzjonijiet li kienu soġġetti għal dumping tal-prodott ikkonċernat li joriġinaw fil-pajjiżi kkonċernati. Fatturi magħrufa għajr għall-importazzjonijiet li kienu soġġetti għal dumping, li fl-istess ħin setgħu għamlu ħsara lill-industrija Komunitarja, kienu eżaminati wkoll sabiex jiġi żgurat li l-ħsara possibbli li kienet ikkawżata minn dawn il-fatturi l-oħra ma tkunx attribwita lill-importazzjonijiet li kienu soġġetti għal dumping.

(112)

L-ewwelnett, ta’ min ifakkar li l-investigazzjoni żvelat li t-twavel tal-mogħdija li ġew importati direttament mill-pajjiżi kkonċernati jikkompetu mat-twavel tal-mogħdija li ġew prodotti u mibjugħa mill-industrija Komunitarja, ladarba huma simili f’termini tal-karatteristiċi bażiċi tagħhom, mill-perspettiva tal-konsumatur jistgħu jiġu skambjati wieħed ma’ l-ieħor u jiġu distribwiti permezz ta’ l-istess kanali ta’ distribuzzjoni.

(113)

Iż-żjieda sinifikanti fil-volum ta’ l-importazzjonijiet li kienu soġġetti għal dumping mill-pajjiżi kkonċernati (aktar minn 850 %) ikkoinċidiet mad-deterjorament tas-sitwazzjoni ekonomika ta’ l-industrija Komunitarja. Matul l-istess perjodu, dan id-deterjorament inkluda, inter alia, tnaqqis fil-livelli tal-bejgħ u tal-prezzijiet tal-produzzjoni Komunitarja.

(114)

Matul il-perjodu meqjus, is-sehem mis-suq ta’ l-importazzjonijiet li kienu soġġetti għal dumping żdied bi 42 punt perċentwali, filwaqt li l-industrija Komunitarja tilfet 15 % tas-suq. Ta’ min ifakkar li bejn l-2002 u l-PI il-konsum Komunitarju żdied b’aktar minn 20 %.

(115)

L-importazzjonijiet li kienu soġġetti għal dumping kienu irħas mill-prezzijiet ta’ l-industrija Komunitarja b’marġnijiet ferm sostanzjali, allura jista’ jiġi konkluż b’mod raġonevoli li kienu responsabbli għas-soppressjoni tal-prezzijiet li wasslet għad-deterjorament tas-sitwazzjoni finanzjarja ta’ l-industrija Komunitarja. Barra minn hekk, l-industrija Komunitarja ma setgħetx iżżid l-użu tal-kapaċità tagħha, kif seta’ ġara b’mod raġonevoli meta titqies iż-żjieda fil-konsum li kienet osservata matul il-perjodu meqjus.

(116)

Minħabba l-koinċidenza fiż-żmien li ġiet stabbilita b’mod ċar bejn, min-naħa waħda, iż-żjieda ta’ importazzjonijiet li kienu soġġetti għal dumping bi prezzijiet li kienu ferm irħas mill-prezzijiet ta’ l-industrija Komunitarja, u min-naħa l-oħra, it-telf fil-bejgħ u l-volum tal-produzzjoni, it-tnaqqis fl-ishma mis-suq u fl-impjiegi u d-depressjoni tal-prezzijiet ta’ l-industrija Komunitarja, qed jiġi konkluż b’mod provviżorju li l-importazzjonijiet li kienu soġġetti għal dumping kellhom rwol determinanti fis-sitwazzjoni ta’ ħsara ta’ l-industrija Komunitarja.

(117)

Ħmistax-il produttur Komunitarju tat-twavel tal-mogħdija ħlief dawk li jagħmlu l-industrija Komunitarja appoġġjaw l-ilment. Dawn il-kumpaniji ma xtaqux jikkooperaw b’mod sħiħ fl-investigazzjoni, madanakollu pprovdew ċerta informazzjoni li tikkonċerna l-produzzjoni, il-kapaċità u l-użu tal-kapaċità, il-volum tal-bejgħ, is-sehem mis-suq u l-impjiegi tagħhom. Dawn il-kumpaniji lkoll flimkien jirrappreżentaw 30 % tal-produzzjoni Komunitarja totali magħrufa. Ta’ min jinnota li l-ebda waħda minn dawn il-kumpaniji ma importat kwantità sostanzjali tal-prodott ikkonċernat.

(118)

Is-sitwazzjoni ta’ dawn il-15-il kumpanija kienet analizzata u pparagunata mas-sitwazzjoni ta’ l-industrija Komunitarja.

(119)

Il-produzzjoni ta’ dawn il-produtturi żdiedet bi 19 % fl-2003, imbagħad naqset għal-livell inizjali tagħha fl-2004 u niżlet bi 13 % fil-PI. Iż-żjieda fil-kapaċità fl-2004 tista’ tiġi attribwita lill-aspettattivi ta’ żjieda fil-bejgħ wara t-tkabbir ta’ l-UE. Bħala riżultat ta’ żjieda fil-kapaċità, matul il-perjodu meqjus l-użu tal-kapaċità naqas aktar mill-output. L-impjiegi żviluppaw b’mod allinjat ma’ l-output, jiġifieri żdiedu fl-2003, imbagħad irritornaw għal-livell inizjali tagħhom fl-2004 u niżlu f’daqqa fil-PI.

(120)

Wara titjib temporanju fl-2003, il-bejgħ u s-sehem mis-suq tal-15-il kumpanija niżel f’daqqa. Dan l-iżvilupp jikkoinċidi b’mod ċar maż-żjieda f’daqqa ta’ l-importazzjonijiet li kienu soġġetti għal dumping mill-pajjiżi kkonċernati fis-suq Komunitarju. Ta’ min ifakkar li fl-2004 dawn l-importazzjonijiet kważi ttriplaw u fl-istess sena s-sehem mis-suq tagħhom żdied b’20 punt perċentwali. Ta’ min ifakkar ukoll li l-konsum Komunitarju tat-twavel tal-mogħdija żdied matul il-perjodu meqjus kollu.

(121)

Minħabba dak li ntqal aktar ’il fuq, jista’ jiġi konkluż li s-sitwazzjoni ta’ dawn il-15-il produttur Komunitarju tat-twavel tal-mogħdija, li appoġġjaw l-ilment, iddeterjorat b’mod simili għas-sitwazzjoni ta’ l-industrija Komunitarja. B’hekk l-ebda ħsara lill-industrija Komunitarja ma setgħet ġiet ikkawżata minn dawn il-kumpaniji.

(122)

Kif ġie stabbilit fil-premessa (8) aktar ’il fuq, żewġ produtturi Komunitarji oħra pprovdew ċerta informazzjoni imma ma appoġġjawx l-ilment. Barra minn hekk, hemm żewġ produtturi magħrufa oħra fil-Komunità li appoġġjaw l-ilment, imma li ma kkooperawx fl-investigazzjoni, u ex-produttur li pprovda ċerta informazzjoni dwar l-attivitajiet ta’ produzzjoni ta’ l-imgħoddi tiegħu. Dawn il-kumpaniji kollha kellhom importazzjonijiet sostanzjali tal-prodott ikkonċernat. Id-data disponibbli għal dawn il-kumpaniji uriet it-tendenzi li ġejjin (minħabba raġunijiet ta’ kunfidenzjalità, il-figuri effettivi ma jistgħux jiġu żvelati):

(123)

Matul il-perjodu meqjus, il-bejgħ tat-twavel tal-mogħdija li ġew prodotti minn dawn il-produtturi Komunitarji naqas b’71 %. Is-sehem mis-suq korrispondenti naqas saħansitra b’mod aktar sinifikanti b’77 %, għaliex is-suq espanda fl-istess perjodu.

(124)

Kif diġà ssemma fil-premessa (78) aktar ’il fuq, fl-2004 u matul il-PI uħud mill-produtturi Komunitarji tradizzjonali tat-twavel tal-mogħdija baxxew b’mod sinifikanti jew waqqfu għal kollox l-attivitajiet ta’ produzzjoni tagħhom fil-Komunità u bdew jimportaw b’mod massiv mill-pajjiżi kkonċernati. Fil-fatt, uħud minn dawn il-kumpaniji m’għadhomx jistgħu jitqiesu bħala produtturi Komunitarji, ladarba s-siti ta’ produzzjoni tagħhom ingħalqu fil-PI.

(125)

Minħabba dak li ntqal aktar ’il fuq, qed jiġi konkluż li dawn il-produtturi Komunitarji oħra kienu f’sitwazzjoni simili għal dik ta’ l-industrija Komunitarja u l-attivitajiet ta’ produzzjoni tagħhom ma kkawżaw l-ebda ħsara lill-industrija Komunitarja.

(126)

Ir-rendiment ta’ l-esportazzjoni ta’ l-industrija Komunitarja baqgħet relattivament stabbli matul il-perjodu meqjus. F’termini ta’ volumi, ma jista’ jiġi osservat l-ebda deterjorament. F’termini ta’ prezz tal-bejgħ, fl-2004 kien parzjalment irkuprat tnaqqis bi 15 % fl-2003 u fil-PI il-prezz ta’ l-esportazzjoni baqa’ stabbli. Ta’ min jinnota li l-prezz tal-bejgħ mill-esportazzjoni huwa konsiderevolment ogħla mill-prezz tal-bejgħ fil-Komunità u li l-volum tal-bejgħ mill-esportazzjoni jirrappreżenta biss madwar 10 % ta’ l-output ta’ l-industrija Komunitarja.

(127)

Minn din il-perspettiva, jista’ jiġi konkluż li r-rendiment ta’ l-esportazzjoni ta’ l-industrija Komunitarja ma kkontribwiex għall-ħsara materjali mġarrba.

(128)

Ta’ min ifakkar li instab li l-importazzjonijiet mingħand produttur esportatur Ċiniż ma kinux qed jinbiegħu bi prezzijiet li kienu soġġetti għal dumping u b’hekk kienu esklużi mill-analiżi ta’ l-importazzjonijiet li kienu soġġetti għal dumping mill-pajjiżi kkonċernati u ta’ l-impatt tagħhom fuq is-sitwazzjoni ta’ l-industrija Komunitarja. Għalhekk, tqies jekk l-importazzjonijiet minn din il-kumpanija setgħux qasmu l-konnessjoni kawżali bejn l-importazzjonijiet li kienu soġġetti għal dumping u l-ħsara materjali li ġarrbet l-industrija Komunitarja.

(129)

L-investigazzjoni stabbiliet li matul il-perjodu meqjus, il-volum ta’ l-importazzjonijiet mir-RPĊ li ma nbiegħux bi prezzijiet li kienu soġġetti għal dumping żdied b’467 %, meta pparagunat maż-żjieda ta’ 856 % ta’ l-importazzjonijiet li kienu soġġetti għal dumping mill-pajjiżi kkonċernati. F’termini assoluti, il-volum ta’ l-importazzjonijiet li kienu soġġetti għal dumping mill-pajjiżi kkonċernati eċċeda aktar minn 5 darbiet il-volum ta’ l-importazzjonijiet li ma kinux soġġetti għal dumping. Is-sehem mis-suq ta’ l-importazzjonijiet li ma kinux soġġetti għal dumping mir-RPĊ żdied bi 343 %, filwaqt li s-sehem mis-suq ta’ l-importazzjonijiet li kienu soġġetti għal dumping żdied b’647 % matul l-istess perjodu. Il-prezz medju ta’ l-importazzjonijiet li ma kinux soġġetti għal dumping żdied matul il-perjodu meqjus u, f’termini assoluti, baqa’ konsiderevolment ’il fuq mill-prezz medju ta’ l-importazzjonijiet li kienu soġġetti għal dumping, għalkemm taħt il-prezz medju ta’ l-industrija Komunitarja.

(130)

Meta jitqies dak li ntqal aktar ’il fuq, qed jiġi konkluż b’mod provviżorju li kwalunkwe impatt ta’ l-importazzjonijiet mir-RPĊ li ma nbigħux bi prezzijiet li kienu soġġetti għal dumping ma jistax jitqies li huwa tali li jikser il-konnessjoni kawżali bejn l-importazzjonijiet li kienu soġġetti għal dumping u l-ħsara materjali li ġarrbet l-industrija Komunitarja.

(131)

Ċerti partijiet argumentaw li l-importazzjonijiet mit-Turkija allegatament kienu qed jidħlu fis-suq Komunitarju bi prezzijiet li huma simili għar-RPĊ u f’volumi dejjem akbar biex b’hekk jikkawżaw ħsara lill-industrija Komunitarja.

(132)

F’dan ir-rigward, ta’ min jinnota li dawn l-allegazzjonijiet ma kinux ikkonfermati fl-investigazzjoni. Matul l-investigazzjoni ma tressqet l-ebda evidenza ta’ l-importazzjonijiet mit-Turkija. Barra minn hekk, il-produttur Tork tat-twavel tal-mogħdija li kkoopera li jissemma fil-premessa (10) aktar ’il fuq ma biegħx il-prodott simili lill-Komunità. B'żieda ma' dan, mill-investigazzjoni ma kien stabbilit l-ebda sors ieħor ta’ importazzjonijiet.

(133)

Meta jitqiesu s-sejbiet li ssemmew aktar ’il fuq, l-affermazzjoni li tikkonċerna l-importazzjonijiet mit-Turkija qed tiġi rifjutata u qed jiġi konkluż li l-importazzjonijiet minn pajjiżi terzi oħra ma kkawżawx ħsara materjali lill-industrija Komunitarja.

(134)

Ċerti partijiet interessati argumentaw li l-ħsara kienet awto-inflitta għaliex l-industrija Komunitarja ma rnexxilhiex tirrispondi għall-bidliet fit-tendenzi tad-distribuzzjoni u tal-konsum u għall-iżviluppi fit-teknoloġija rigward il-produzzjoni tat-twavel tal-mogħdija. Barra minn hekk, kien affermat li l-ħsara awto-inflitta kienet ukoll ikkawżata mill-importazzjonijiet tat-twavel tal-mogħdija Ċiniżi mill-produtturi Komunitarji nfushom.

(135)

It-twavel tal-mogħdija li ġew prodotti fil-Komunità normalment jiġu distribwiti permezz ta’ negozjanti jew, fil-parti l-kbira tal-każi, jiġu fornuti direttament lill-bejjiegħa bl-imnut jew liċ-ċentri ta’ distribuzzjoni tagħhom. It-twavel tal-mogħdija importati normalment jiġu distribwiti permezz ta’ importaturi/negozjanti jew permezz ta’ ċentri ta’ distribuzzjoni/forniment ta’ katini kbar ta’ bejgħ bl-imnut. Fil-każ ta’ l-importazzjonijiet, il-proporzjon taż-żewġ kanali ta’ distribuzzjoni jvarja minn produttur esportatur għall-ieħor. Fil-każi kollha, jistgħu jkunu involuti aġenti. Din it-tendenza fid-distribuzzjoni ilha stabbilita għal diversi snin u maż-żmien ma setgħet tkun osservata l-ebda bidla sinifikanti u f’daqqa. L-industrija Komunitarja tradizzjonalment kienet qed tforni kemm lill-bejjiegħa bl-imnut iż-żgħar kif ukoll lill-katini l-kbar tal-bejgħ bl-imnut. B’hekk iż-żjieda fl-ishma tal-bejgħ tat-twavel tal-mogħdija permezz ta’ katini ta’ bejgħ bl-imnut ma tistax titqies bħala fattur li jikkawża l-ħsara per se. Ma kienet ikkonfermata l-ebda bidla sinifikanti fit-tendenza tal-konsum.

(136)

Rigward il-proċess ta’ produzzjoni/it-teknoloġija, kien argumentat li l-industrija Komunitarja ma tistax tirrispondi għar-rekwiżiti speċifiċi mingħand il-klijenti/bejjiegħa bl-imnut minħabba l-livell għoli ta’ awtomatizzazzjoni tal-produzzjoni tagħhom. L-ewwelnett, ta’ min jinnota li mingħajr awtomatizzazzjoni ma jistax jiġi immaġinat kif l-industrija Komunitarja tista’ tikkompeti ma’ l-importazzjonijiet tal-prodotti li joriġinaw fil-pajjiżi li jibbenefikaw minn spiża ferm baxxa ta’ enerġija, materja prima u ħaddiema. It-tieni, il-produzzjoni awtomatizzata tippermetti lill-industrija Komunitarja li tiggarantixxi kwalità għolja u żminijiet meħtieġa qosra li l-klijenti jarawha bħala vantaġġ komparattiv. Fl-aħħarnett, ma kienet prodotta l-ebda evidenza li tappoġġja l-affermazzjoni li l-industrija Komunitarja ma setgħetx tissodisfa r-rekwiżiti speċifiċi tal-klijenti/bejjiegħa bl-imnut rigward id-disinn u l-innovazzjoni.

(137)

Rigward l-importazzjonijiet tat-twavel tal-mogħdija Ċiniżi mill-industrija Komunitarja, l-investigazzjoni wriet li fl-IP kienu importati biss xi kwantitajiet insinifikanti. Dik kienet azzjoni ta’ awto-difiża ta’ l-industrija Komunitarja kontra l-influss ta’ importazzjonijiet bi prezz baxx li kienu soġġetti għal dumping. Ikun xi jkun il-każ, dawn l-importazzjonijiet inbiegħu mill-ġdid fil-Komunità bi prezzijiet li ma jagħmlux ħsara. Għaldaqstant importazzjonijiet ta’ din ix-xorta ma setgħux ikkawżaw ħsara lill-industrija Komunitarja.

(138)

Minħabba dak li ntqal aktar ’il fuq, dawn l-affermazzjonijiet qed jiġu rifjutati, u qed jiġi konkluż li l-ħsara ma setgħetx tkun awto-inflitta.

(139)

Għaldaqstant, ġie kkonfermat li l-ħsara materjali li ġarrbet l-industrija Komunitarja, li hija kkaratterizzata speċjalment minn tnaqqis fil-volum tal-bejgħ, fl-ishma mis-suq u fil-prezz tal-bejgħ ta’ kull unità li jirriżultaw f’deterjorament tas-sitwazzjoni finanzjarja, kienet ikkawżata mill-importazzjonijiet li kienu soġġetti għal dumping mill-pajjiżi kkonċernati. Għalkemm l-importazzjonijiet mill-PRC li ma nbigħux bi prezzijiet li kienu soġġetti għal dumping bil-probabbiltà kollha kkontribwew biex ir-rendiment tal-produtturi Komunitarji jmur għall-agħar, l-iżvilupp tagħhom, il-volum u s-sehem mis-suq u l-livell tal-prezzijiet tagħhom ma kienx tali li jikser il-konnessjoni kawżali bejn l-importazzjonijiet li kienu soġġetti għal dumping u s-sitwazzjoni ta’ ħsara ta’ l-industrija Komunitarja.

(140)

Meta titqies l-analiżi ta’aktar ’il fuq li għamlet distinzjoni xierqa bejn u sseparat l-effetti tal-fatturi kollha magħrufa fis-sitwazzjoni ta’ l-industrija Komunitarja mill-effetti ta’ ħsara ta’ l-importazzjonijiet li kienu soġġetti għal dumping, hawnhekk qed jiġi kkonfermat li dawn il-fatturi l-oħra bħala tali ma jdawrux il-fatt li l-ħsara vvalutata trid tkun attribwita lill-importazzjonijiet li kienu soġġetti għal dumping.

(141)

Għalhekk qed jiġi konkluż b’mod provviżorju li l-importazzjonijiet li kienu soġġetti għal dumping li joriġinaw fil-pajjiżi kkonċernati kkawżaw ħsara materjali lill-industrija Komunitarja fi ħdan it-tifsira ta’ l-Artikolu 3(6) tar-Regolament bażiku.

(142)

Il-Kummissjoni eżaminat jekk, minkejja l-konklużjoni provviżorja dwar l-eżistenza ta’ dumping li jagħmel il-ħsara, kienx hemm raġunijiet konvinċenti li setgħu jwasslu għall-konklużjoni li f’dan il-każ partikolari mhux fl-interess Komunitarju li jiġu adottati miżuri. Għal dan l-iskop, u skond l-Artikolu 21(1) tar-Regolament bażiku, tqiesu l-impatt tal-miżuri possibbli fuq il-partijiet kollha involuti f’dan il-proċediment u anki l-konsegwenzi li ma jittieħdux miżuri fuq il-bażi ta’ l-evidenza kollha mressqa.

(143)

L-analiżi tal-ħsara wriet b’mod ċar li l-industrija Komunitarja batiet minħabba l-importazzjonijiet li kienu soġġetti għal dumping. Il-preżenza li żdiedet f’daqqa ta’ l-importazzjonijiet li kienu soġġetti għal dumping f’dawn l-aħħar snin ikkawżat soppressjoni qawwija tal-prezzijiet kemm fuq livell ta’ bejgħ bl-ingrossa/distribuzzjoni kif ukoll fuq livell ta’ bejgħ bl-imnut, jiġifieri fejn ikun hemm kompetizzjoni bejn it-twavel tal-mogħdija importati u dawk manifatturati fil-Komunità. L-industrija Komunitarja mhijiex f’pożizzjoni li tnaqqas aktar il-prezzijiet tal-bejgħ tagħha, ladarba dan kieku jeħtieġ li jbiegħu taħt l-ispiża tal-produzzjoni tagħhom. Għalhekk, u minħabba li s-suq tat-twavel tal-mogħdija huwa prinċipalment immexxi mill-katini ta’ bejgħ bl-imnut fuq il-bażi tal-prezz, qed isir dejjem aktar diffiċli li l-industrija Komunitarja tiżgura ruħha minn ordnijiet ġodda. Ta’ min ifakkar li diversi manifatturi tradizzjonali diġà waqqfu l-produzzjoni u issa qed jagħmluha ta’ importaturi/negozjanti tal-prodott ikkonċernat.

(144)

F’dan il-kuntest, mingħajr l-impożizzjoni tal-miżuri, kieku l-pożizzjoni ta’ l-industrija Komunitarja b’mod ċar tiddeterjora aktar u l-produzzjoni tat-twavel tal-mogħdija fil-Komunità, bil-probabbiltà kollha, malajr ikollha tieqaf. Ħafna mill-impatt negattiv fuq l-impjiegi ikun f’żona ġeografika waħda tal-Komunità hekk kif diversi produtturi u l-fornituri tal-partijiet tagħhom jinsabu f’dak ir-reġjun waħdani. Min-naħa l-oħra, il-miżuri għandhom jipprevjenu żjieda sostanzjali oħra ta’ importazzjonijiet li kienu soġġetti għal dumping mill-pajjiżi kkonċernati, li għandu jħalli lill-industrija Komunitarja, biex, għall-inqas, iżżomm il-pożizzjoni korrenti tagħha fis-suq. L-investigazzjoni wriet li kwalunkwe żjieda fis-sehem mis-suq ta’ l-importazzjonijiet li kienu soġġetti għal dumping mill-pajjiżi konċernati tinkiseb bi spejjeż diretti ta’ l-industrija Komunitarja.

(145)

Wara l-impożizzjoni tad-dazji anti-dumping fuq l-importazzjonijiet tat-twavel tal-mogħdija mill-pajjiżi kkonċernati, jista’ jkun mistenni li jkun aktar probabbli li d-distributuri u l-katini tal-bejgħ bl-imnut ibiddlu s-sorsi ta’ forniment tagħhom, għall-inqas parzjalment, lill-produtturi Komunitarji. Tabilħaqq, jekk il-miżuri jiġu imposti u l-livell tal-prezz ta’ l-importazzjoni jerġa’ jinġieb lura għal livelli li mhumiex soġġetti għal dumping, l-industrija Komunitarja għandha tkun tista’ tikkompeti f’ċirkostanzi tan-negozju ġusti, fuq il-bażi ta’vantaġġ komparattiv xieraq.

(146)

Għalhekk jidher ċar li l-impożizzjoni tal-miżuri hija fl-interess ta’ l-industrija Komunitarja u tal-produtturi Komunitarji li b’mod attiv appoġġjaw l-ilment, imma anki fl-interess tal-produtturi Komunitarji l-oħra li ma appoġġjawx b’mod attiv l-ilment.

(147)

Wara l-pubblikazzjoni ta’ l-avviż tal-bidu ta’ dan il-proċediment, ma waslet l-ebda rappreżentazzjoni mingħand organizzazzjonijiet tal-konsumaturi. Madanakollu, ġie analizzat l-impatt ta’ kwalunkwe miżura fuq il-konsumaturi.

(148)

Sabiex ikun ivvalutat dan l-impatt, tqiesu l-elementi li ġejjin:

(149)

Minħabba dak li ntqal aktar ’il fuq, kwalunkwe impatt finanzjarju tal-miżuri anti-dumping fuq il-konsumaturi tat-twavel tal-mogħdija bil-wisq probabbli jkun negliġibbli. Min-naħa l-oħra, jekk il-miżuri anti-dumping ma jkunux imposti, il-produzzjoni Komunitarja bil-probabbiltà kollha tisparixxi u l-għażla tat-tipi ta’ prodotti li jkunu disponibbli għall-konsumaturi tista’ tonqos.

(150)

Għalhekk qed jiġi konkluż b’mod provviżorju li mhux probabbli li l-impożizzjoni tal-miżuri tkun kontra l-interess tal-konsumaturi Komunitarji tat-twavel tal-mogħdija.

(151)

F’dan l-istadju ta’ l-investigazzjoni ma waslet l-ebda rappreżentazzjoni mingħand id-distributuri/il-bejjiegħa bl-imnut jew l-organizzazzjonijiet tagħhom. Madanakollu, huwa magħruf li llum it-twavel tal-mogħdija prinċipalment jinbiegħu minn katini kbar ta’ bejgħ bl-imnut, jiġifieri hypermarkets, supermarkets. Għalhekk huwa aktar minn probabbli li għall-parti l-kbira tad-distributuri/tal-bejjiegħa bl-imnut, il-prodott ikkonċernat jirrappreżenta biss parti negliġibbli mill-fatturat tagħhom. Meta jitqies dan, u meta titqies iż-żjieda għolja li japplikaw is-soltu (ara l-premessa (148) aktar ’il fuq), qed jiġi konkluż b’mod provviżorju li l-ebda miżura probabbilment ma jkollha impatt negattiv sinifikanti fuq is-sitwazzjoni tagħhom.

(152)

Waslu tweġibiet għall-kwestjonarju mingħand żewġ importaturi u mingħand negozjant relatat ma’ wieħed minn dawn l-importaturi. Barra minn hekk, erba’ importaturi provdew ċerta informazzjoni u/jew kummenti fi ħdan l-iskadenzi. Dawn il-kumpaniji lkoll flimkien jirrappreżentaw aktar minn 20 % ta’ l-importazzjonijiet totali fil-Komunità. Ilkoll oġġezzjonaw għall-impożizzjoni tal-miżuri kontra l-PRC, imma mhux kollha oġġezzjonaw kontra l-miżuri għall-Ukrajna.

(153)

Is-sitwazzjoni ta’ l-importaturi li għamlu rappreżentazzjonijiet tvarja jiddependi mid-daqs tagħhom u mill-importazzjoni tal-prodott ikkonċernat fl-operazzjonijiet tagħhom. Kif diġà ssemma aktar ’il fuq, uħud minn dawn il-kumpanijai huma/kienu produtturi tradizzjonali imma, b’mossa difensiva, bidlu l-kummerċ ċentrali tagħhom u qed jagħmluha prinċipalment jew esklużivament ta’ importaturi. Dawn il-kumpaniji normalment jipproduċu/jimportaw firxa sħiħa ta’ prodotti tad-dar oħra u t-twavel tal-mogħdija jirrappreżentaw frazzjoni mill-kummerċ tagħhom. Fil-każ ta’ ex-produttur prinċipali wieħed, li dan l-aħħar sar importatur importanti tat-twavel tal-mogħdija Ċiniżi, ġie stabbilit b’mod provviżorju li t-twavel tal-mogħdija fl-IP kienu jirrappreżentaw inqas minn 4 % tal-fatturat tiegħu. Barra minn hekk, din il-kumpanija esprimiet opinjoni biss kontra l-miżuri għall-PRC, imma mhux kontra l-Ukrajna ladarba ma kinux jimportaw mill-pajjiż ta’ l-aħħar. Instab ukoll li anki xtrat xi twavel tal-mogħdija mingħand produtturi Komunitarji. Meta jitqiesu s-sorsi differenti ta’ forniment tal-kumpanija kkonċernata, u jekk il-kumpanija ma tkunx tista’tgħaddi 1/3 tad-dazju anti-dumping lill-bejjiegħa bl-imnut (ara l-premessa (148), l-impatt fuq il-marġni gross tagħha għat-twavel tal-mogħdija jiġi stmat li ma jlaħħaqx aktar minn 10 %. Madanakollu, ta’ min jinnota li l-informazzjoni li waslet f’dan l-istadju ma kinitx tagħti lok għal kalkolu eżatt. Ta’ min ifakkar ukoll li ż-żjieda anki ta’ importaturi ta’ din ix-xorta tidher li hija sostanzjali. Għalkemm, l-investigazzjoni tas-sitwazzjoni ta’ importaturi ta’ din ix-xorta se tkompli, ġie konkluż li l-miżuri provviżorji m’għandhomx jaffetwaw b’mod sinifikanti l-kummerċ tagħhom.

(154)

Importatur li kkoopera wieħed jipproduċi għotjien għat-twavel tal-mogħdija u jbiegħhom flimkien mat-twavel tal-mogħdija importati. Kien argument li kwalunkwe dazju anti-dumping fuq l-importazzjonijiet tat-twavel tal-mogħdija għandu jaffetwa wkoll il-produzzjoni ta’ l-għotjien u b’hekk ikollu impatt sinifikanti fuq il-fatturat ta’ din il-kumpanija. Madanakollu, ta’ min jinnota li l-għotjien għat-twavel tal-mogħdija jinbiegħu wkoll b’mod separat u l-impożizzjoni ta’ miżuri anti-dumping m’għandhiex taffettwa bejgħ ta’ din ix-xorta. Ta’ min jinnota ukoll li l-bejgħ tat-twavel tal-mogħdija ma kienx jirrappreżenta aktar minn 10 % tal-fatturat tiegħu. B’hekk, anki l-impatt tal-miżuri provviżorji fuq il-kummerċ tal-kumpanija kkonċernata m’għandux ikun sinifikanti.

(155)

Barra minn hekk, il-parti l-kbira ta’ l-imporaturi, li huma/kienu wkoll qed jinnegozjaw fi prodotti Komunitarji, ammettew li ma jkunx fl-interess tagħhom li jsiru għalkollox dipendenti fuq it-twavel tal-mogħdija importati — f’dan il-kuntest inġibdet attenzjoni partikolari fuq il-PRC — u kkonfermaw li jippreferu li jkollhom sorsi alternattivi ta’ forniment. Dan jista’ jiġi żgurat bl-aħjar mod billi jiġu eliminati l-prattiki ta’ dumping ħalli l-industrija Komunitarja tkompli teżisti.

(156)

Minħabba dak li ntqal aktar ’il fuq, u meta jitqiesu l-elementi li nġabru fil-qosor fil-premessi (148) aktar ’il fuq, b’mod partikolari iż-żjidiet għolja u l-fatt li l-ispiża addizzjonali tad-dazju se tkun inqas minn nofs Euro għal kull unità, qed jiġi konkluż b’mod provviżorju li kwalunkwe miżura anti-dumping m’għandux ikollha impatt avvers deċiżiv fuq is-sitwazzjoni ta’ l-importaturi tat-twavel tal-mogħdija fil-Komunità li mhumiex relatati, għalkemm huwa probabbli li wħud minnhom ikollhom iġorru piż pjuttost akbar mill-bejjiegħa bl-imnut. Ikun xi jkun il-każ, se jitqiesu l-kummenti kollha qabel ma tintlaħaq kwalunkwe sejba finali.

(157)

L-analiżi aktar ’il fuq uriet li huwa fl-interess ta’ l-industrija Komunitarja li jkunu imposti l-miżuri, ladarba huwa mistenni li dawk il-miżuri, mill-inqas, jirrestrinġu l-livell għoli ta’ l-importazzjonijiet bi prezzijiet li kienu soġġetti għal dumping li wrew li għandhom impatt negattiv sinifikanti fuq is-sitwazzjoni ta’ l-industrija Komunitarja. Huwa mistenni li l-produtturi Komunitarji l-oħra jibbenefikaw ukoll minn dawk il-miżuri.

(158)

L-analiżi wriet ukoll li mhux probabbli li l-konsumaturi jiġu affettwati finanzjarjament mill-miżuri anti-dumping. Fix-xenarju ta’ l-agħar każ, se jkollhom iħallsu b'żieda ma' dan inqas minn nofs Euro għal oġġett li jdum iservi. Fuq in-naħa l-oħra, mingħajr il-miżuri l-għażla tal-konsumaturi tista’ tkun affettwata b’mod negattiv ladarba t-twavel tal-mogħdija Komunitarji jistgħu jisparixxu mis-suq.

(159)

Id-distributuri u l-bejjiegħa bl-imnut jistgħu jaraw żjieda fil-prezzijiet tax-xiri tagħhom tal-prodott ikkonċernat, imma meta jitqiesu l-marġnijiet għolja tagħhom huwa probabbli li mhux se jkunu affettwati b’mod sinifikanti mill-miżuri.

(160)

Huwa probabbli li l-importaturi tal-prodott ikkonċernat se jġorru piż pjuttost akbar mill-bejjiegħa bl-imnut. Madanakollu, ikunu qed iżommu l-benefiċċji ta’ diversi sorsi ta’ forniment u jevitaw li jsiru dipendenti fuq l-importazzjonijiet, li bil-probabbiltà kollha jkun il-każ jekk il-miżuri ma jkunux imposti.

(161)

Għaldaqstant, qed jitqies li l-impożizzjoni tal-miżuri, jiġifieri t-tneħħija ta’ dumping li jagħmel il-ħsara, għandu jippermetti lill-industrija Komunitarja li żżomm l-attività tagħha u li l-effetti avversi li l-miżuri jista’ jkollhom fuq ċerti operaturi ekonomiċi oħra fil-Komunità ma jkunux sproporzjonati meta pparagunati ma’ l-effetti ta’ ġid għall-industrija Komunitarja.

(162)

Fuq il-bażi ta’ dak li ntqal aktar ’il fuq, qed jiġi konkluż b’mod provviżorju li ma teżisti l-ebda raġuni konvinċenti ta’ interess Komunitarju biex f’dan il-każ ma jkunux imposti miżuri anti-dumping.

(163)

Minħabba l-konklużjonijiet provviżorji li ntlaħqu rigward id-dumping, il-ħsara li tirriżulta u l-interess Komunitarju, għandhom ikunu imposti miżuri provviżorji fuq l-importazzjonijiet tal-prodott ikkonċernat mir-RPĊ u mill-Ukrajna sabiex ma jitħalliex li l-importazzjonijiet li kienu soġġetti għal dumping jikkawżaw aktar ħsara lill-industrija Komunitarja.

(164)

Il-livell tal-miżuri anti-dumping provviżorji għandu jkun biżżejjed biex tkun eliminata l-ħsara lill-industrija Komunitarja li kienet ikkawżata mill-importazzjonijiet li kienu soġġetti għal dumping, mingħajr ma jinqabżu l-marġnijiet tad-dumping misjuba.

(165)

Meta jkun ikkalkulat l-ammont ta’ dazju meħtieġ biex jitneħħew l-effetti ta’ dumping li jagħmel il-ħsara, tqies li kwalunkwe miżura għandha tħalli li l-industrija Komunitarja tkopri l-ispejjeż tagħha u tikseb profitt qabel it-taxxa li jista’ jinkiseb b’mod raġonevoli f’kundizzjonijiet normali ta’ kompetizzjoni, jiġifieri fin-nuqqas ta’ importazzjonijiet li kienu soġġetti għal dumping. Il-marġni ta’ profitt ta’ qabel it-taxxa li ntuża għal dan il-kalkolu kien ta’ 7 % tal-fatturat. Intwera li dan kien il-livell ta’ profitt li jista’ jkun mistenni b’mod raġonevoli fin-nuqqas ta’ dumping li jagħmel il-ħsara, ladarba kien il-profitt ta’ l-industrija Komunitarja qabel ma l-importazzjonijiet Ċiniżi u Ukrajni fil-Komunità bdew jiżdiedu b’mod sinfikanti matul il-perjodu meqjus. Fuq din il-bażi, kien ikkalkulat prezz li ma jagħmilx ħsara għall-prodott simili ta' l-industrija Komunitarja. Il-prezz li ma jagħmilx ħsara inkiseb billi l-marġni ta’ profitt ta’ 7 % li ssemma aktar ’il fuq ġie miżjud ma’ l-ispiża tal-produzzjoni.

(166)

Imbagħad kienet iddeterminata ż-żjieda meħtieġa fil-prezz fuq il-bażi ta’ paragun bejn il-prezz medju b'piż differenzjat ta’ l-importazzjoni, kif kien stabbilit għall-kalkoli tat-traħħis tal-prezzijiet taħt il-prezzijiet normali, u l-prezz medju li ma jagħmilx ħsara tal-prodotti mibjugħa mill-industrija Komunitarja fis-suq Komunitarju. Kwalunkwe differenza li tirriżulta minn dan il-paragun imbagħad kienet espressa bħala perċentwali tal-valur CIF medju ta’ l-importazzjoni. Dawn id-differenzi kienu għall-produtturi esportaturi Ċiniżi kollha li kkooperaw li kienu ’l fuq mill-marġnijiet tad-dumping misjuba. Fil-każ ta’ l-Ukrajna, il-livell ta’ eliminazzjoni tal-ħsara kien taħt il-marġni tad-dumping misjub għall-uniku produttur esportatur.

(167)

Fid-dawl ta’ dak li ntqal aktar ’il fuq, u skond l-Artikolu 7(2) tar-Regolament bażiku, qed jitqies li l-miżuri anti-dumping provviżorji għandhom ikunu imposti fuq l-importazzjonijiet li joriġinaw (i) fir-RPĊ fuq il-livell tal-marġnijiet tad-dumping misjuba u (ii) fl-Ukrajna fuq il-livell li jelimina l-ħsara.

(168)

Fuq il-bażi ta’ dak li ntqal aktar ’il fuq, ir-rata tad-dazju anti-dumping provviżorju għall-PRC u għall-Ukrajna għandha tkun kif ġej:

(169)

Ir-rati tad-dazju anti-dumping tal-kumpaniji individwali li ġew speċifikati f’dan ir-Regolament kienu stabbiliti fuq il-bażi tas-sejbiet ta’ l-investigazzjoni preżenti. Għalhekk, jirriflettu s-sitwazzjoni li nstabet matul dik l-investigazzjoni rigward dawn il-kumpaniji. Dawn ir-rati tad-dazju (bil-kontra tad-dazju għal mal-pajjiż kollu li japplika għall-“kumpaniji l-oħra kollha”) b’hekk japplikaw b’mod esklussiv għall-importazzjonijiet tal-prodotti li joriġinaw fil-pajjiż ikkonċernat u li ġew prodotti mill-kumpaniji u b’hekk mill-entitajiet legali speċifiċi li ssemmew. Il-prodotti importati li ġew prodotti minn kwalunkwe kumpanija oħra li ma ssemmietx b’mod speċifiku fil-parti operattiva ta’ dan ir-Regolament b’isimha u bl-indirizz tagħha, inklużi l-entitajiet li huma relatati ma’ dawk li jissemmew b’mod speċifiku, ma jistgħux jibbenefikaw minn dawn ir-rati u għandhom ikunu soġġetti għar-rata tad-dazju li tapplika għall-“kumpaniji l-oħra kollha”.

(170)

Kwalunkwe talba li titlob l-applikazzjoni ta’ dawn ir-rati tad-dazju anti-dumping tal-kumpaniji individwali (eż. wara bidla fl-isem ta’ l-entità jew wara li jiġu stabbiliti entitajiet ta’ produzzjoni jew ta’ bejgħ ġodda) għandha tiġi indirizzata immedjatament lill-Kummissjoni (3) bl-informazzjoni rilevanti kollha, b’mod partikolari kwalunkwe modifika fl-attivitajiet tal-kumpanija li tkun konnessa mal-produzzjoni, mal-bejgħ domestiku u mal-bejgħ mill-esportazzjoni li huma assoċjati ma’ eż. dik il-bidla fl-isem jew dik il-bidla fl-entitajiet ta’ produzzjoni u ta’ bejgħ. Jekk ikun xieraq, il-Kummissjoni, wara konsultazzjoni mal-Kumitat Konsultattiv se temenda r-Regolament skond dan billi taġġorna l-lista tal-kumpaniji li jibbenefikaw minn rati ta’ dazju individwali.

(171)

Biex ikun żgurat infurzar xieraq tad-dazju anti-dumping il-livell tad-dazju residwali m’għandux japplika biss għall-produtturi esportaturi li ma kkooperawx, imma wkoll għal dawk il-produtturi li matul l-IP ma kellhom l-ebda esportazzjoni lejn il-Komunità. Madanakollu, il-kumpaniji ta’ l-aħħar qed jiġu mistiedna, biex meta jissodisfaw ir-rekwiżiti tat-tieni paragrafu ta’ l-Artikolu 11(4) tar-Regolament bażiku, jippreżentaw talba għal reviżjoni skond dak l-Artikolu sabiex is-sitwazzjoni tagħhom tiġi eżaminata b’mod individwali.

(172)

Fl-interess ta’ amministrazzjoni soda, għandu jkun iffissat perjodu li matulu l-partijiet interessati li ppreżentaw irwieħhom fi ħdan il-limitu ta’ żmien li kien speċifikat fl-avviż tal-bidu jistgħu jippreżentaw il-fehmiet tagħhom bil-miktub u jitolbu smigħ. Barra minn hekk, għandu jkun iddikjarat li s-sejbiet li jikkonċernaw l-impożizzjoni tad-dazji li saret għall-iskopijiet ta’ dan ir-Regolament hija provviżorja u jista’ jkun li jkollha titqies mill-ġdid għall-iskop ta’ kwalunkwe dazju definittiv,