“3.4.   Metodi alternattivi

Fir-rigward tal-kampjuni meħuda fil-bidu ta’ l-operatur, il-metodi ta’ l-analiżi previsti fl-Artikolu 11 tar-Regolament (KE) Nru 882/2004 (*), jistgħu jintużaw minflok il-metodi għall-preparazzjoni tal-kampjuni, metodi ta’ stħarriġ u tas-serotipi previsti f’punt 3 ta’ dan l-Anness, jekk ivvalidati skond l-EN/ISO 16140/2003.

3.5.   Ħżin ta’ varjanti

Ta’ l-anqas il-varjanti iżolati bħala parti mill-kontrolli uffiċjali, għandhom jiġu maħżuna għall-phagetyping jew l-ittestjar għas-suxxettibilità anti-mikrobika, bl-użu tal-metodi normali għall-ġbir tal-koltura, li għandhom jiżguraw l-integrità tal-varjanti għal perjodu minimu ta’ sentejn.”

ANNESS

L-iskema ta’ ttestjar neċessarja għall-verifika tat-twettiq tal-mira Komunitarja għat-tnaqqis tas-Salmonella enteritidis u s-Salmonella typhimurium f’tiġieġ għall-bajd adulti tat-tip Gallus gallus, kif imsemmija fl-Artikolu 1(2)

1.   QAFAS GĦAT-TEĦID TAL-KAMPJUNI

Il-qafas għat-teħid tal-kampjuni għandu jkopri l-qatgħat kollha tat-tiġieġ għall-bajd adulti tat-tip Gallus gallus (‘il-qatgħat għall-bajd’) imsemmija fl-Artikolu 1 tar-Regolament (KE) Nru 2160/2003.

2.   MONITORAĠĠ FIL-QATGĦAT GĦALL-BAJD

2.1.   Il-frekwenza u l-istatus tat-teħid tal-kampjuni

Il-qatgħat għall-bajd għandhom jitteħdilhom kampjuni fil-bidu ta’ l-operatur kummerċjali ta’ l-ikel (“l-operatur”) u mill-awtorità kompetenti.

It-teħid ta’ kampjuni fil-bidu ta’ l-operatur għandu jsir ta’ l-anqas kull ħmistax-il ġimgħa. L-ewwel teħid ta’ kampjuni għandu jsir fl-età ta’ 24 ± 2 ġimgħat.

It-teħid ta’ kampjuni mill-awtoritajiet kompetenti għandu jsir ta’ l-anqas:

(a)	f’kull qatgħa fis-sena għal kull magħlaq li jiġbor fih ta’ l-anqas 1 000 tajra;

(b)	fl-età ta’ 24 ± 2 ġimgħa fil-qatgħat għall-bajd miżmuma f’bini fejn is-salmonella nstabet fil-qatgħa preċedenti;

(c)	f’każ li jkun hemm suspett ta’ infezzjoni tas-Salmonella enteritidis jew is-Salmonella typhimurium, bħala riżultat ta’ l-investigazzjoni epidemjoloġika ta’ tfaqqigħ minn fuq l-ikel skond l-Artikolu 8 tad-Direttiva 2003/99/KE tal-Parlament Ewropew u tal-Kunsill (1);

(d)	fil-qatgħat għall-bajd l-oħra kollha fil-magħlaq fil-każ li s-Salmonella enteritidis u s-Salmonella typhimurium jinstabu f’waħda mill-qatgħat fil-magħlaq;

(e)	f’każijiet fejn l-awtorità kompetenti jikkunsidraw li dan hu adatt.

It-teħid ta’ kampjuni mwettaq mill-awtorità kompetenti jista’ jieħu post teħid wieħed ta’ kampjuni fuq l-inizjattiva ta’ l-operatur.

2.2.   Il-Protokoll għat-teħid tal-kampjuni

Sabiex is-sensittività tat-teħid tal-kampjuni tkun dik massima, kemm il-materjal tal-ħmieġ kif ukoll l-ambjent għandhom jitteħdilhom kampjuni ta’ l-anqas kif previst f’(a) u (b):

(a)

F’qatgħat li jinżammu fil-gaġeġ, 2 × 150 gramm ta’ ħmieġ magħqud b’mod naturali għandu jittieħed miċ-ċineg jew mill-barraxiet fil-barrakka wara li titħaddem is-sistema tat-tneħħija tad-demel; madankollu, fil-każ ta’ barrakki li għandhom gaġeġ b’turġien mingħajr barraxiet jew ċineg 2 × 150 gramm ta’ ħmieġ frisk imħallat għandu jinġabar minn 60 post differenti taħt il-gaġeġ fil-ħofra tal-ħmieġ.

(b)	F’barrakki magħluqa jew fil-beraħ, għandhom jittieħdu mill-buz jew mill-kalzetti żewġ pari ta’ kampjuni miġburin b’tajjara, mingħajr ma jinbidel il-buz li jintlibes fuqhom waqt t-teħid mill-buz tal-kampjuni miġburin b’tajjara.

F’każ ta’ teħid ta’ kampjuni mill-awtorità kompetenti, 250 ml li jkollhom fihom ta’ l-anqas 100 gramm ta’ trab għandhom jinġabru minn sorsi prolifiċi ta’ trab minn kull parti tal-barrakka. Jekk ma jkunx hemm trab biżżejjed, jittieħed kampjun addizzjonali ta’ 150 gramm ta’ ħmieġ magħqud b’mod naturali jew jittieħdu kampjuni miġburin b’tajjara minn par addizzjonali ta’ buz jew ta’ kalzetti.

Fil-każ tat-teħid ta’ kampjuni msemmi fl-punt 2.1 (b), (c) u (d), l-awtorità kompetenti għandha tissodisfa lilha nfisha billi tagħmel aktar testijiet kif meħtieġ sabiex ir-riżultati ta’ l-eżaminazzjonijiet għas-salmonella fit-tjur ma jkunux affettwati bl-użu ta’ antimikrobiċi fil-qatgħat.

Fejn ma tinstabx il-preżenza tas-Salmonella enteritidis u s-Salmonella typhimurium iżda jinstabu antimikrobiċi jew l-effett inibitorju tal-formazzjoni tal-batterji l-qatgħa għall-bajd għandha tkun ikkunsidrata bħala infettata għall-għan tal-mira Komunitarja msemmija fl-Artikolu 1(2).

3.   L-EŻAMINAZZJONI TAL-KAMPJUNI

3.1.   It-trasport u t-tħejjija tal-kampjun

Il-kampjuni għandhom jintbagħtu bis-servizz express tal-posta jew kurjer lil-laboratorji msemmija fl-Artikolu 11 tar-Regolament (KE) Nru 2160/2003, fil-ġurnata li jittieħdu. Fil-laboratorji, il-kampjuni għandhom jinżammu fil-friża sakemm issir l-eżaminazzjoni, li għandha ssir fi żmien 48 siegħa wara t-twassil.

3.1.1   Il-Kampjuni miġburin b’tajjara mill-buz

(a)	Iż-żewġ pari tal-kampjuni miġburin b’tajjara mill-buz (jew “kalzetti”) għandhom jinħarġu bil-galbu mill-ippakkjar sabiex jiġi evitat li jinqala’ materjal ta’ ħmieġ, miġbur flimkien u jitpoġġew f’225ml ta’ Buffered Peptone Water (BPW) imsaħħan minn qabel għal temperatura ambjentali;

(b)	Il-kampjun għandu jiddawwar sakemm jassorbih kollu u l-koltura għandha titkompla bl-użu tal-metodu ta’ stħarriġ f’3.2.

3.1.2   Materjal ta’ ħmieġ ieħor u kampjuni ta’ trab

(a)	Il-kampjuni tal-ħmieġ għandhom jingħaqqdu flimkien u jitħawdu sew u sotto-kampjun ta’ 25 gramm għandu jittieħed għall-koltura.

(b)	Is-sotto-kampjun ta’ 25 gramm għandu jiżdied ma’ 225 ml ta’ BPW msaħħan għal temperatura ambjentali;

(c)	Il-koltura tal-kampjun għandha titkompla billi jintuża l-metodu ta’ stħarriġ f’3.2.

Jekk l-istandards ta’ l-ISO dwar il-preparazzjoni tal-ħmieġ għall-istħarriġ tas-salmonella jkun hemm ftehim dwarhom, dawn għandhom jiġu applikati u għandhom jieħdu post id-dispożizzjonijiet ta’ hawn fuq rigward il-preparazzjoni tat-teħid tal-kampjuni.

3.2.   Metodu ta’ Stħarriġ

Għandu jintuża l-metodu għall-istħarriġ irrakkomandat mil-Laboratorju Komunitarju ta’ Referenza (CRL) għas-Salmonella f'Bilthoven, l-Olanda. Dan il-metodu hu deskritt fil-verżjoni kurrenti ta’ l-abbozz ta’ l-Anness D ta’ l-ISO 6579 (2002): “Stħarriġ ta’ l-ispeċi tas-Salmonella fil-ħmieġ ta’ l-annimali u fil-kampjuni ta’ l-istadju primarju ta’ produzzjoni”. F’dan il-metodu, sustanza semi-solida (is-sustanza semi-solida mmodifikata Rappaport-Vassiladis, MSRV) tintuża bħala s-sustanza selettiva unika ta’ arrikkiment.

3.3.   Klassifikazzjoni fuq il-bażi tas-serotipi

Ta’ l-inqas iżolat wieħed minn kull kampjun pożittiv għandu jkun isserotipizzat, skond l-iskema Kaufmann-White.

3.4.   Metodi alternattivi

Fir-rigward tal-kampjuni meħuda fil-bidu ta’ l-operatur, il-metodi ta’ l-analiżi previsti fl-Artikolu 11 tar-Regolament (KE) Nru 882/2004 (2), jistgħu jintużaw minflok il-metodi għall-preparazzjoni tal-kampjuni, metodi ta’ stħarriġ u tas-serotipi previsti f’punt 3 ta’ dan l-Anness, jekk ivvalidati skond l-EN/ISO 16140/2003.

3.5.   Ħżin ta’ varjanti

Ta’ l-anqas il-varjanti iżolati mill-kampjuni miġbura mill-awtorità kompetenti, għandhom jiġu maħżuna għall-phagetyping jew l-ittestjar għas-suxxettibilità anti-mikrobika ġejjiena, bl-użu tal-metodi normali għall-ġbir tal-koltura, li għandhom jiżguraw l-integrità tal-varjanti għal perjodu minimu ta’ sentejn.

4.   RIŻULTATI U RAPPORTAR

Qatgħa għall-bajd għandha tkun ikkunsidrata pożittiva għall-iskop tal-verifika tat-twettiq tal-mira Komunitarja, fejn il-preżenza tas-Salmonella enteritidis u s-Salmonella typhimurium (għajr il-varjanti tal-vaċċin) kienet misjuba f’kampjun jew f’aktar minn wieħed fil-qatgħa għall-bajd. Il-qatgħat għall-bajd pożittivi għandhom jingħaddu darba biss, irrispettivament min-numru tat-teħid tal-kampjuni u ta’ l-operazzjonijiet ta’ l-ittestjar u jkunu rrapportati biss fl-ewwel sena li fiha jinstabu.

Ir-rappurtar jinkludi:

(a)	in-numru totali tal-qatgħat ta’ tiġieġ għall-bajd ittestjati u n-numru tal-qatgħat għall-bajd ittestjati għal kull status tat-teħid ta’ kampjuni msemmi f’punt 2.1;

(b)	in-numru totali tal-qatgħat infettati u r-riżultati ta’ l-ittestjar għal kull status tat-teħid tal-kampjuni msemmija f’punt 2.1;

(c)	spjegazzjonijiet dwar ir-riżultati, partikularment dawk li jikkonċernaw każijiet eċċezzjonali.

Ir-riżultati msemmija f’dan il-punt u kull informazzjoni rilevanti addizzjonali għandhom jiġu rrapportati bħala parti mir-rapport dwar it-tendenzi u s-sorsi previst fl-Artikolu 9 (1) tad-Direttiva 2003/99/KE.

---

(1)  ĠU L 325, 12.12.2003, p. 31.

(2)  ĠU L 191, 28.5.2004, p. 1.