29.9.2006   

MT

Il-Ġurnal Uffiċjali ta’ l-Unjoni Ewropea

69

(1)

F’Lulju 2002, il-Kunsill, bir-Regolament (KE) Nru 1338/2002 (3) impona dazji definittivi ta' kontrobilanċ fuq l-importazzjonijiet ta’ aċidu sulfaniliku li joriġinaw mill-Indja. Fl-istess jum, il-Kunsill, bir-Regolament (KE) Nru 1339/2002 (4), impona dazji definittivi antidumping fuq l-importazzjonijiet ta’ aċidu sulfaniliku li joriġina mir-Repubblika Popolari taċ-Ċina u mill-Indja (“il-miżuri”).

(2)

Fil-qafas ta’ dawn il-proċeduri, il-Kummissjoni, bid-Deċiżjoni 2002/611/KE (5) aċċettat impenn ta’ prezz offrut mill-kumpanija Indjana, i.e. Kokan Synthetics & Chemicals Pvt Ltd. (“il-kumpanija”).

(3)

F’Ġunju 2003, il-Kummissjoni tat bidu għal investigazzjoni mill-ġdid ta’ anti-assorbiment skond l-Artikolu 12 tar-Regolament bażiku antidumping, li jikkonċerna l-importazzjonijiet ta’ aċidu sulfaniliku li joriġinaw mir-Repubblika Popolari taċ-Ċina (“ir-RPĊ”) (6).

(4)

F’Diċembru 2003, il-kumpanija infurmat lill-Kummissjoni, li xtaqet tirtira l-impenn tagħha b’mod volontarju. Għaldaqstant, id-Deċiżjoni tal-Kummissjoni li tilqa’ l-impenn tħassret bid-Deċiżjoni tal-Kummissjoni 2004/255/KE (7).

(5)

Fi Frar 2004, investigazzjoni anti-assorbiment dwar l-importazzjonijiet ta’ l-aċidu sulfaniliku li joriġinaw mir-RPĊ ġiet konkluża bir-Regolament (KE) Nru 236/2004 (8), li żied ir-rata tad-dazju definittiv antidumping għar-RPĊ minn 21 % għal 33,7 % (“l-investigazzjoni anti-assorbiment”).

(6)

F’Diċembru 2004, wara l-konklużjoni ta’ l-investigazzjoni anti-assorbiment, il-kumpanija ressqet talba għal reviżjoni interim parzjali skond l-Artikolu 11(3) tar-Regolament bażiku antidumping u l-Artikolu 19 tar-Regolament bażiku kontra s-sussidji rispettivament, limitat fil-firxa li jeżamina l-aċċettabilità tar-ristabbiliment ta’ l-impenn tagħha.

(7)

Il-kumpanija sostniet li x-xewqa oriġinali tagħha li tirtira l-impenn ħarġet mill-fatt li wara l-impożizzjoni ta’ miżuri fl-2002, esportaturi Ċiniżi assorbew id-dazji antidumping imposti, ħaġa li wasslet għal waqgħa fil-prezzijiet u b’riżultat li l-impenn ma kienx prattiku. Il-kumpanija għamlet referenza wkoll għall-fatt li bħala riżultat tal-konklużjoni tar-reviżjoni ta’ l-assorbiment, il-livell tad-dazju fuq l-importazzjonijiet mir-RPĊ żdied, ħaġa li wasslet biex il-prezzijiet fis-suq jogħlew. Għalhekk, il-kumpanija infurmat lill-Kummissjoni li kienet lesta li terġa’ toffri l-impenn tagħha taħt it-termini u l-kondizzjonijiet ta’ qabel, li kienu kkunsidrati xierqa biex jeliminaw l-effetti ta’ ħsara relevanti tad-dumping u s-sussidji.

(8)

Il-kumpanija pprovdiet biżżejjed evidenza prima facie li ma kienu saru ebda bidliet strutturali fil-kumpanija mill-konklużjonijiet preċedenti ‘l hawn li jista’ jkollhom impatt fuq l-aċċettabilità u l-inforzabilità ta’ impenn.

(9)

F’April 2005, skond avviż ippubblikat fil-Ġurnal Uffiċjali ta’ l-Unjoni Ewropea  (9), il-Kummissjoni tat bidu għal reviżjoni interim parzjali tal-miżuri antidumping u ta' kontrobilanċ applikabbli għall-importazzjonijiet ta’ aċidu sulfaniliku li joriġinaw mill-Indja, limitat fil-firxa għall-eżami ta’ l-aċċettabilità ta’ impenn li għandu jiġi offrut mill-kumpanija.

(10)

Il-Kummissjoni avżat uffiċjalment lir-rappreżentanti tal-pajjiż esportatur, l-applikant u l-industrija tal-Komunità bil-bidu tar-reviżjoni interim parzjali u tat lill-partijiet kollha affettwati direttament l-opportunità li jesprimu l-veduti tagħhom bil-miktub u biex jitolbu smigħ.

(11)

Il-kumpanija offriet formalment mill-ġdid l-impenn oriġinali tagħha.

(12)

Il-Kummissjoni talbet u vverifikat l-informazzjoni kollha li dehrilha meħtieġa bl-iskop li teżamina mill-ġdid jekk dan l-impenn kienx aċċettabbli jew le.

(13)

L-investigazzjoni wriet li ma kien sar l-ebda tibdil strutturali fil-kumpanija mill-investigazzjoni oriġinali ‘l hawn li jista’ jkollu impatt negattiv fuq l-aċċettabilità u l-prattiċità ta’ impenn. Barra minn hekk, l-esperjenza miksuba tul l-applikazzjoni ta’ l-impenn oriġinali wriet li l-kumpanija rrispettat it-termini ta’ l-impenn u li l-impenn seta’ jiġi sorveljat b’mod effettiv mill-Kummissjoni.

(14)

Minkejja dan, għandu jiġi nnutat li mill-investigazzjoni oriġinali ‘l hawn ġew osservati differenzi sinifikanti fil-prezz ta’ l-ingredjenti ewlenin fil-produzzjoni ta’ l-aċidu sulfaniliku, b’mod partikolari l-anilina, u l-materja prima ewlenija tiegħu, il-benżin. Fid-dawl ta’ dan, l-applikant qabel li jagħmel indiċi tal-prezz minimu offrut oriġinarjament sabiex jindirizza n-natura ċiklika tal-prezzijiet ta’ l-aċidu sulfaniliku b’mod li raġonevolment jelimina r-riskju ta’ dumping dannuż. Fid-dawl tal-fatt li teżisti bażi tad-data disponibbli pubblikament u indipendenti li tipprovdi informazzjoni affidabbli dwar informazzjoni ta’ prezzijiet internazzjonali tal-benżin imma mhux ta’ l-anilina u dan barra l-fatt li hemm korrelazzjoni qawwija bejn il-prezz tal-benżin u l-prezz ta’ l-anilina, l-indiċi ġie bbażat fuq il-prezz tal-benżin.

(15)

L-industrija tal-Komunità sostniet li l-applikant m’għandux jitħalla jagħżel il-forma tal-miżuri u b’mod partikolari m’għandux jirrispetta l-prezz minimu ta’ importazzjoni fil-każ biss li l-prezzijiet prevalenti fis-suq jaqblu għall-kumpanija. Tabilħaqq, kumpanija m’għandiex titħalla tikseb bdil fil-forma tal-miżuri li jkunu ibbażati fuq l-evoluzzjoni tas-suq. Madankollu, għandha tingħata l-konsiderazzjoni dovuta liċ-ċirkostanzi eċċezzjonali tal-każ. F’dan ir-rigward, għandu jiġi nnutat li l-investigazzjoni anti-assorbiment uriet li t-tnaqqis fil-prezzijiet tas-suq fiż-żmien li l-kumpanija rtirat volontarjament l-impenn tagħha kien imqanqal mill-assorbiment tad-dazju antidumping fuq l-importazzjonijiet ta’ aċidu sulfaniliku li joriġinaw mir-RPĊ. Għalhekk, u fid-dawl taċ-ċirkostanzi mibdula li jirriżultaw mill-investigazzjoni anti-assorbiment, ix-xewqa tal-kumpanija li tinstalla mill-ġdid l-impenn tagħha hija meqjusa xierqa.

(16)

L-industrija tal-Komunità barra dan talbet li l-offerta ta’ l-impenn għandha tiġi aċċettata biss wara reviżjoni interim sħiħa, peress li l-evoluzzjoni tas-suq li tista’ tiġġustifika l-impenn ġdid tista’ tiġġustifika wkoll reviżjoni tal-marġini ta’ dumping tal-kumpanija. F’dawn ir-rigward, għandu jiġi nnutat li l-investigazzjoni kurrenti hija limitata fil-firxa għall-eżami ta’ l-impenn li se jiġi offrut mill-kumpanija u ma waslet ebda talba għal reviżjoni interim b’firxa differenti. Għalhekk, it-talba kellha tiġi rrifjutata.

(17)

Utent talab li jitnaqqas id-dazju antidumping jew, inkella, li tiġi indirizzata d-disponibilità limitata ta’ l-aċidu sulfaniliku ppurifikat fis-suq Komunitarju billi tiddaħħal sistema ta’ kwoti. Hawn ukoll, fid-dawl tal-firxa limitata ta’ l-investigazzjoni kurrenti, it-talba kellha tiġi rrifjutata.

(18)

Fid-dawl ta’ dan imsemmi hawn fuq, l-impenn ġie aċċettat mill-Kummissjoni bid-Deċiżjoni (*).

(19)

Bil-għan li l-Kummissjoni tkun f’pożizzjoni aħjar biex tissorvelja b’mod effettiv l-osservanza ta’ l-impenn mill-kumpanija, meta tiġi ppreżentata t-talba għar-rilaxx għaċ-ċirkolazzjoni libera lill-awtoritajiet tad-dwana relevanti, l-eżenzjoni mid-dazji tkun soġġetta għall-preżentazzjoni ta’ fattura kummerċjali li tkun tinkludi minn ta’ l-inqas l-elementi elenkati fl-Anness. Dan il-livell ta’ informazzjoni huwa meħtieġ ukoll biex l-awtoritajiet tad-dwana jkunu f’pożizzjoni li jaċċertaw b’biżżejjed preċiżjoni li l-kunsinni jaqblu mad-dokumenti kummerċjali. Fejn ebda tali fattura ma tiġi ppreżentata, jew meta ma taqbilx mal-prodott ippreżentat lid-dwana, titħallas minflok ir-rata applikabbli ta’ dazju antidumping u ta' kontrobilanċ.

(20)

Biex tkun żgurata aktar l-osservanza effettiva ta’ l-impenn, l-importaturi għandhom ikunu mgħarrfa li kull ksur ta’ l-impenn jista’ jwassal għall-applikazzjoni retroattiva tad-dazju antidumping u ta' kontrobilanċ għat-transazzjonijiet relevanti. Għalhekk, huwa meħtieġ li jitwettqu d-dispożizzjonijiet legali li jipprovdu għall-impożizzjoni ta’ debitu doganali fil-livell applikabbli ta’ dazju antidumping u ta' kontrobilanċ kull darba li waħda jew iktar mill-kundizzjonijiet ta’ l-eżenzjoni ma jiġux osservati. Għalhekk debitu doganali għandu jiġi impost kull meta min jiddikjara jkun għażel li jirrilaxxa l-kunsinna għaċ-ċirkolazzjoni libera, i.e. mingħajr ma jkun inġabar id-dazju antidumping u ta’ kontrobilanċ, u waħda jew aktar mill-kundizzjonijiet ta’ dak l-impenn jinstab li jkunu nkisru.

(21)

F’każ ta’ ksur, id-dazju antidumping u ta’ kontrobilanċ, jista’ jiġi rkuprat, ġaladarba l-Kummissjoni tkun irtirat l-aċċettazzjoni ta’ l-impenn f’konformità ma’ l-Artikolu 8(9) tar-Regolament bażiku antidumping jew l-Artikolu 13(9) tar-Regolament bażiku kontra s-sussidji, billi ssir referenza għal dik it-transazzjoni partikolari u, skond il-każ, billi jiġi ddikjarat li l-fatturi rilevanti ta’ l-impenn huma invalidi. Għalhekk, skond l-Artikolu 14(7) tar-Regolament bażiku antidumping u l-Artikolu 24(7) tar-Regolament bażiku kontra s-sussidji, l-awtoritajiet doganali għandhom jinfurmaw lill-Kummissjoni immedjatament kull meta jinstabu indikazzjonijiet ta’ ksur ta’ l-impenn.

(22)

Għandu jiġi nnutat li f’każ ta’ ksur jew irtirar ta’ l-impenn, jew f’każ li tiġi rtirata l-aċċettazzjoni ta’ l-impenn mill-Kummissjoni, id-dazju antidumping u ta’ kontrobilanċ impost skond l-Artikolu 9(4) tar-Regolament bażiku antidumping u l-Artikolu 15(1) tar-Regolament bażiku kontra s-sussidji għandhom japplikaw awtomatikament skond l-Artikolu 8(9) tar-Regolament ta' bażiku antidumping u l-Artikolu 13(9) tar-Regolament bażiku kontra s-sussidji.