8.5.2007   

MT

Il-Ġurnal Uffiċjali ta’ l-Unjoni Ewropea

478

(1)

Id-Direttiva 89/668/KEE tipprevedi li l-apparat personali protettiv jista' jitqiegħed fis-suq u fis-servizz biss jekk jippreserva s-saħħa u jiżgura s-sikurezza ta' l-utenti bla ħsara għas-saħħa u s-sikurezza ta' individwi, annimali domestiċi jew oġġetti oħra, meta jinżamm kif suppost u jintuża għal-għan li huwa maħsub għalih.

(2)

Skond l-Artikolu 5 tad-Direttiva 89/686/KEE, l-apparat personali protettiv li jkollu l-marka CE skond liema l-manifattur hu kapaċi jipproduċi id-dikjarazzjoni tal-konformità msemmija u ċ-ċertifikat ta' l-eżami tat-tip KE maħruġ minn korp li għalih ingħatat notifika u li jivverifika l-konformità tiegħu ma' l-istandards nazzjonali relevanti, li jbiddlu l-istandards armonizzati, li r-riferenzi tagħhom ġew ippubblikati fil-Ġurnal Uffiċjali ta' l-Unjoni Ewropea mill-Kummissjoni, għandu jitqies bħala jissodisfa l-ħtiġijiet bażiċi dwar is-sigurtà u s-saħħa imsemmija fl-Artikolu 3 tad-Direttiva 89/686/KEE u elenkati fl-Anness II tagħha. L-Istati Membri huma meħtieġa jippubblikaw l-istandards nazzjonali billi jittrasponu l-istandards armonizzati.

(3)

In segwitu għall-Artikolu 6 (1) tad-Direttiva 89/686/KEE, il-Kummissjoni u Franza ppreżentaw oġġezzjoni formali għall-effett li l-istandard “Apparati respiratorji protettivi — Filtri tal-partiċelli — Rekwiżiti, ittestjar, immarkar” approvat mill-Kumitat Ewropew għall-Istandardizzazzjoni (CEN) fis-7 ta' Frar 2000 u li r-referenzi tiegħu ġew ippubblikati l-ewwel darba fil-Ġurnal Uffiċjali tal-Komunitajiet Ewropej fl-24 ta' Jannar 2001 (3), ma jissodisfawx għal kollox il-ħtiġijiet bażiċi dwar is-sigurtà u s-saħħa imsemmija fl-Artikolu 3 tad-Direttiva 89/686/KEE fil-konfront tal-filtri għall-partiċelli li l-effiċjenza ta' l-iffiltrar tagħhom tintlaħaq esklussivament jew parzjalment bl-użu ta' materjali bbażati fuq fibri mhux minsuġa u ċċarġjati bl-elettriku, min issa 'l quddiem imsemmija “filtri elettrostatiċi”.

(4)

Fuq il-bażi tar-riżultati tat-testijiet dwar l-effiċjenza ta' l-iffiltrar ta' tipi varji ta' filtri tal-partiċelli, hemm evidenza sostantiva li l-proċedura tat-test għall-kejl tal-penetrazzjoni tal-filtru kif imniżżel fil-klawżoli 8.7.2.4, l-aħħar sentenza, u 8.7.3.4, l-aħħar sentenza, ta' l-istandard EN 143:2000, skond liema l-kejl tal-penetrazzjoni jittieħed tliet minuti wara li jibda t-test ta' l-aerosol, tonqos milli tiżgura l-konformità mal-ħtieġa bażika dwar is-sigurtà u s-saħħa 3.10.1 (“Protezzjoni respiratorja”) ta' l-Anness II tad-Direttiva 89/686/KEE fir-rigward tal-filtri elettrostatiċi.

(5)

B'mod speċifiku, ġie osservat li l-effiċjenza ta' l-iffiltrar ta' dan it-tip ta' filtru tista' tiddeterjora malajr waqt l-użu. L-effiċjenza ta' l-iffiltrar kif iddeterminata skond il-proċedura tat-test standardizzata — tliet minuti wara li jkun beda t-test — tista' ma tfisser xejn f'kull waqt wara dawk it-tliet minuti. Il-waqgħa fl-effiċjenza ta' l-iffiltrar tista' tkun drastika u għalhekk tikkomprometti l-klassi ta' effiċjenza allokata għal filtru elettrostatiku u l-informazzjoni relatata miegħu. Meta l-allokazzjoni għal klassi ta' effiċjenza titqies bħala mhux korretta waqt il-perjodu ta' l-użu, l-esponiment potenzjali li jirriżulata għal sustanzi partikulati fl-arja perikolużi jista' jkun ta' dannu gravi għas-saħħa u s-sigurtà ta' min jużah. Ir-riżultati tat-test jindikaw telf ta' effiċjenza ta' l-iffiltrar tal-filtri elettrostatiċi anki meta jintużaw b'mod intermittenti.

(6)

Fid-dawl ta' dawn is-sejbiet, il-klawżoli 8.7.2.4, l-aħħar sentenza, u 8.7.3.4, l-aħħar sentenza, ta' l-istandrad EN 143:2000 jonqsu wkoll milli jiżguraw il-konformità mal-ħtiġijiet bażiċi tas-saħħa u s-sigurtà 1.1.1. (“Ergonomija”), 1.1.2.1 (“L-ogħla livell ta' protezzjoni possibbli”) u 1.1.2.2 (“Gruppi ta' protezzjoni xierqa għal-livelli differenti ta' riskju”) ta' l-Anness II tad-Direttiva 89/686/KEE fir-rigward tal-filtri elettrostatiċi. Barra minn hekk, il-klawżola 10 ta' l-istandard tonqos milli tiżgura l-konformità mal-ħtieġa bażika tas-saħħa u s-sigurtà 1.4(b) (“Informazzjoni mogħtija mill-manifattur”), minħabba li mhemmx ħtieġa ta' twissija dwar id-deterjorament ta' l-effiċjenza ta' l-iffiltrar tal-filtri elettrostatiċi biż-żmien.

(7)

Skond dan, anki standards armonizzati relatati oħra, li jew jipprevedu li t-testjar isir skond l-istandard EN 143:2000 jew jipprevedu proċedura ta' kejl għat-testijiet identika għal dik stipulata fl-istandard EN 143:2000, jonqsu milli jiżguraw il-konformità mal-ħtiġijiet bażiċi tas-saħħa u s-sigurtà tad-Direttiva 89/686/KEE msemmija hawn fuq fir-rigward tal-filtri elettrostatiċi.

(8)

Fuq talba tal-Kummissjoni, l-Organizzazzjoni Ewropea għall-Istandardizzazzjoni — CEN, Kumitat Tekniku CEN/TC 79 “Mezzi respiratorji ta' protezzjoni”, bdiet ir-reviżjoni ta' l-istandard EN 143:2000 sabiex tindirizza n-nuqqasijiet deskritti. Sakemm ssir ir-reviżjoni, fl-interess tas-sigurtà u ċ-ċertezza legali, il-pubblikazzjoni tar-referenzi għall-istandard EN 143:2000 għandhom ikollhom twissija xierqa li għandha titqies wkoll fir-rigward ta' l-istandards armonizzati relatati. L-Istati Membri għandhom iżidu twissija identika fl-istandards nazzjonali tagħhom li jitrasponu dak l-istandard armonizzat.

(9)

Ir-referenzi ta' l-istandard armonizzat EN 143:2000 għandhom għalhekk jiġu ppubblikati mill-ġdid skond dan.