2.12.2008   

MT

Il-Ġurnal Uffiċjali ta’ l-Unjoni Ewropea

121

(1)

Bir-Regolament (KE) Nru 2604/2000 (3), il-Kunsill impona dazji definittivi anti-dumping fuq importazzjonijiet fil-Komunità ta' ċertu polyethylene terephthalate (“PET”) li joriġina, inter alia, fl-Indja. Importazzjonijiet ta' PET esportat minn kumpaniji li minnhom ġie aċċettat impenn ġew eżentati minn dan id-dazju skont l-Artikolu 2(1) ta' dan ir-Regolament.

(2)

Bir-Regolament (KE) Nru 2603/2000 (4), il-Kunsill impona dazji anti-dumping definittivi fuq importazzjonijiet fil-Komunità ta' ċertu polyethylene terephthalate (“PET”) li joriġina, inter alia, fl-Indja. Importazzjonijiet ta' PET esportat minn kumpaniji li minnhom ġie aċċettat impenn ġew eżentati minn dan id-dazju skont l-Artikolu 2(1) ta' dan ir-Regolament.

(3)

Fid-29 ta' Novembru 2000, il-Kummissjoni adottat id-Deċiżjoni 2000/745/KE (5), hi u taċċetta impenji offruti b'konnessjoni maż-żewġ proċedimenti msemmija hawn fuq mill-esportaturi msemmija fl-Artikolu 1 ta' din id-Deċiżjoni.

(4)

Fit-12 ta' Jannar 2005, il-Kummissjoni, bir-Regolament (KE) Nru 33/2005 (6) ħabbret il-bidu ta' “reviżjoni fir-rigward ta' esportatur ġdid” skont l-Artikolu 11(4) tar-Regolament AD bażiku.

(5)

Fl-istess waqt u għall-istess raġunijiet, il-Kummissjoni tat bidu għal reviżjoni aċċellerata tar-Regolament tal-Kunsill (KE) Nru 2603/2000 (7) skont l-Artikolu 20 tar-Regolament AS bażiku.

(6)

Is-sejbiet definittivi u l-konklużjonijiet tal-investigazzjonijiet huma stabbiliti fir-Regolament tal-Kunsill (KE) Nru 1646/2005 (8) li jemenda r-Regolament (KE) Nru 2604/2000 u fir-Regolament tal-Kunsill (KE) Nru 2603/2000 (9) li jemenda r-Regolament (KE) Nru 2603/2000.

(7)

Wara l-iżvelar li permezz tiegħu South Asian Petrochem Ltd (“SAPL”) (“il-kumpanija”) ingħarrfet bil-fatti u l-konsiderazzjonijiet li fuq il-bażi tagħhom kien hemm il-ħsieb li jiġi impost id-dazju emendat definittiv ta' anti-dumping u d-dazju kumpensatorju fuq l-importazzjonijiet tagħha fil-Komunità, il-kumpanija offriet prezz b'impenn skont l-Artikolu 8(1) tar-Regolament AD bażiku u l-Artikolu 13(1) tar-Regolament AS bażiku. F'dak l-impenn, il-produttur esportatur offra li jbigħ il-prodott ikkonċernat bil-livelli ta' prezz jew b'livelli ogħla biex b'hekk jiġu eliminati l-effetti ta' ħsara ta' dumping u sussidju.

(8)

Il-kumpanija se tipprovdi wkoll lill-Kummissjoni b'tagħrif regolari u fid-dettall dwar l-esportazzjonijiet tagħha lejn il-Komunità u dan ifisser li l-impenn jista' jiġi ssorveljat b'mod effettiv mill-Kummissjoni. Barra minn hekk, l-istruttura tal-bejgħ ta' din il-kumpanija hija tali li l-Kummissjoni tqis li r-riskju ta' evażjoni mill-impenn miftiehem huwa limitat.

(9)

Fid-dawl ta' dan, l-impenn offrut minn South Asian Petrochem Ltd (“SAPL”) huwa aċċettabbli.

(10)

Biex il-Kummissjoni tkun tista' tissorvelja b'mod effettiv il-konformità tal-kumpanija mal-impenn meħud, meta t-talba għar-rilaxx fiċ-ċirkolazzjoni ħielsa skont l-impenn tiġi ppreżentata lill-awtorità doganali rilevanti, l-eżenzjoni mid-dazju se tkun marbuta ma' preżentazzjoni ta' fattura li jkun fiha mill-inqas dawk il-punti ta' tagħrif elenkati fl-Anness tar-Regolament (KE) 2604/2000. Dan il-livell ta' tagħrif huwa wkoll meħtieġ biex l-awtoritajiet doganali jkunu jistgħu jiżguraw b'biżżejjed ċertezza li l-kunsinna tikkorrispondi mad-dokumenti kummerċjali. Fejn fattura bħal din ma tiġix ppreżentata, jew meta ma tkunx tikkorrispondi mal-prodott ippreżentat lid-dwana, se titħallas ir-rata xierqa ta' dazju anti-dumping u kumpensatorju.

(11)

F'każ li jkun hemm ksur jew irtirar mill-impenn, jew jekk ikun hemm raġuni biex wieħed jaħseb li l-impenn qiegħed jinkiser, jista' jiġi impost dazju provviżorju jew definittiv skont l-Artikolu 8(9) u (10) tar-Regolament AD bażiku u, fejn ikun applikabbli, skont l-Artikolu 13(9) u (10) tar-Regolament AS bażiku.