This document is an excerpt from the EUR-Lex website
Document 32004R2053
Council Regulation (EC) No 2053/2004 of 22 November 2004 extending the definitive anti-dumping duty imposed by Regulation (EC) No 964/2003 on imports of tube or pipe fittings, of iron or steel, originating in the People's Republic of China to imports of tube or pipe fittings, of iron or steel, consigned from Sri Lanka, whether declared as originating in Sri Lanka or not
Regolament tal-Kunsill (KE) Nru 2052/2004 tat- 22 ta' Novembru 2004 li jestendi d-dazju anti-dumping definittiv impost bir-Regolament (KE) Nru 964/2003 fuq l-importazzjonijiet ta' tagħmir ta' tubi jew pajpijiet, tal-ħadid jew l-azzar, ġejjin mir-Repubblika tal-Poplu taċ-Ċina, għall-importazzjonijiet ta' tagħmir ta' tubi jew pajpijiet, tal-ħadid jew l-azzar, li jkunu ġew ikkunsinnati mis-Sri Lanka, kemm jekk ikunu dikjarati li ġejjin mis-Sri Lanka kif ukoll jekk le
Regolament tal-Kunsill (KE) Nru 2052/2004 tat- 22 ta' Novembru 2004 li jestendi d-dazju anti-dumping definittiv impost bir-Regolament (KE) Nru 964/2003 fuq l-importazzjonijiet ta' tagħmir ta' tubi jew pajpijiet, tal-ħadid jew l-azzar, ġejjin mir-Repubblika tal-Poplu taċ-Ċina, għall-importazzjonijiet ta' tagħmir ta' tubi jew pajpijiet, tal-ħadid jew l-azzar, li jkunu ġew ikkunsinnati mis-Sri Lanka, kemm jekk ikunu dikjarati li ġejjin mis-Sri Lanka kif ukoll jekk le
ĠU L 355, 1.12.2004, p. 9–13
(ES, CS, DA, DE, ET, EL, EN, FR, IT, LV, LT, HU, NL, PL, PT, SK, SL, FI, SV) Dan id-dokument ġie ppubblikat f’edizzjoni(jiet) speċjali
(BG, RO, HR)
ĠU L 153M, 7.6.2006, p. 202–206
(MT)
No longer in force, Date of end of validity: 07/06/2008
7.6.2006 |
MT |
Il-Ġurnal Uffiċjali ta’ l-Unjoni Ewropea |
202 |
REGOLAMENT TAL-KUNSILL (KE) Nru 2052/2004
tat-22 ta' Novembru 2004
li jestendi d-dazju anti-dumping definittiv impost bir-Regolament (KE) Nru 964/2003 fuq l-importazzjonijiet ta' tagħmir ta' tubi jew pajpijiet, tal-ħadid jew l-azzar, ġejjin mir-Repubblika tal-Poplu taċ-Ċina, għall-importazzjonijiet ta' tagħmir ta' tubi jew pajpijiet, tal-ħadid jew l-azzar, li jkunu ġew ikkunsinnati mis-Sri Lanka, kemm jekk ikunu dikjarati li ġejjin mis-Sri Lanka kif ukoll jekk le
IL-KUNSILL TA' L-UNJONI EWROPEA,
Wara li kkunsidra t-Trattat li jistabbilixxi l-Komunità Ewropea,
Wara li kkunsidra r-Regolament tal-Kunsill (KE) Nru 384/96 tat-22 ta' Diċembru 1995 dwar il-protezzjoni kontra importazzjonijiet li huma soġġett ta' dumping minn pajjiżi li mhumiex membri tal-Komunità Ewropea (1) (“ir-Regolament bażiku”), u b' mod partikolari l-Artikolu 13 tiegħu,
Wara li kkunsidra l-proposta preżentata mill-Kummissjoni wara konsultazzjoni mal-Kumitat Konsultattiv,
Billi:
A. PROĊEDURA
1. Il-Miżuri preżenti
(1) |
Wara r-reviżjoni ta' għeluq iż-żmien, il-Kunsill kien impona, bir-Regolament (KE) Nru 964/2003 (2) (“ir-Regolament oriġinali”), inter alia, dazju anti-dumping definittiv ta' 58,6 % fuq l-importazzjonijiet ta' tagħmir ta' tubi jew pajpijiet (għajr tagħmir fondut (cast fittings), fanġi u tagħmir bil-kamin) tal-ħadid jew ta' l-azzar (li ma jinkludix azzar abjad), b'dijametru ta' barra li ma jkunx aktar minn 609,6 mm, ta' għamla użata għall-issaldjar tarf ma' tarf jew għanijiet oħrajn, li jaqa' taħt il-kodiċi NM ex 7307 93 11 (kodiċi TARIC 7307931199), ex 7307 93 19 (kodiċi TARIC 7307931999), ex 7307 99 30 (kodiċi TARIC 7307993098) u ex 7307 99 90 (kodiċi TARIC 7307999098) u li jkun ġej mir-Repubblika tal-Poplu taċ-Ċina (“PRC”). |
2. Talba
(2) |
Fl-20 ta' Jannar 2004, il-Kummissjoni rċeviet talba skond l-Artikolu 13(3) tar-Regolament bażiku biex tistħarreġ l-allegat evitar tal-miżuri anti-dumping fuq l-importazzjoni ta' tagħmir ta' tubi jew pajpijiet li jkunu ġejjin mill-PRC. It-talba ntbagħtet mill-Kumitat tad-Difiża ta' l-Industrija tat-Tagħmir ta' l-Issaldjar Tarf ma' Tarf ta' l-Unjoni Ewropea f'isem erba' produtturi tal-Komunità. |
(3) |
It-talba allegat li kien hemm tibdil fil-mudell tal-kummerċ wara li daħlu fis-seħħ il-miżuri anti-dumping fuq l-importazzjonijiet ta' tagħmir ta' tubi jew pajpijiet li jkunu ġejjin mill-PRC, kif intwera minn żieda sostanzjali fl-importazzjoni ta' l-istess prodott li ġej mis-Sri Lanka. |
(4) |
Kien allegat li din il-bidla fil-mudell tal-kummerċ kienet qed tibda mill-ġarr ta' tagħmir ta' tubi jew pajpijiet li jkunu ġejjin mill-PRC vija s-Sri Lanka. Kien allegat ukoll li ma kienx hemm raġuni biżżejjed jew ġustifikazzjoni ekonomika għal dawn il-ħidmiet, għajr l-eżistenza tad-dazji anti-dumping fuq tagħmir ta' tubi jew pajpijiet li jkun ġejjin mill-PRC. |
(5) |
Fl-aħħar, l-applikant allega li l-effetti ta' rimedju tad-dazji anti-dumping li hemm bħalissa fuq tagħmir ta' tubi jew pajpijiet li jkunu ġejjin mill-PRC kienu qed jidgħajjfu kemm f'termini ta' kwantitajiet u ta' prezzijiet, u li kien qed iseħħ dumping f'relazzjoni mal-valuri normali li kienu ġew stabbiliti qabel għat-tagħmir ta' tubi jew pajpijiet li jkun ġejjin mill-PRC. |
3. Bidu
(6) |
Bis-saħħa tar-Regolament (KE) Nru 395/2004 (3) (“ir-Regolament tal-bidu ta' l-istħarriġ”) il-Kummissjoni bdiet stħarriġ fl-allegat evitar tal-miżuri anti-dumping, liema miżuri kienu ġew imposti fuq l-importazzjoni ta' tagħmir ta' tubi jew pajpijiet li jkun ġej mill-PRC, f'relazzjoni ma' l-importazzjonijiet ta' tagħmir ta' tubi jew pajpijiet ikkunsinnati mis-Sri Lanka, kemm jekk dawn ikunu ġew iddikjarati li ġejjin mis-Sri Lanka kif ukoll jekk le. Skond l-Artikoli 13(3) u 14(5) tar-Regolament bażiku, din ordnat lill-awtoritajiet tad-dwana biex mill-4 ta' Marzu 2004 dawn jibdew jirreġistraw l-importazzjonijiet ta' tagħmir ta' tubi jew pajpijiet ikkunsinnati mis-Sri Lanka, kemm jekk iddikjarati li ġejjin mis-Sri Lanka kif ukoll jekk le, li jaqgħu taħt il-kodiċi NM ex 7307 93 11 (kodiċi TARIC 7307931194), ex 7307 93 19 (kodiċi TARIC 7307931994), ex 7307 99 30 (kodiċi TARIC 7307993094) u ex 7307 99 90 (kodiċi TARIC 7307999094). Il-Kummissjoni infurmat lill-awtoritajiet tal-PRC u s-Sri Lanka dwar il-fatt li kien ingħata bidu għal dan l-istħarriġ. |
4. Stħarriġ
(7) |
Kienu ntbagħtu kwestjonarji lill-produtturi/esportaturi fil-PRC (ma kien hemm l-ebda produtturi magħrufa fis-Sri Lanka) kif ukoll lill-importaturi fil-Komunità msemmija fit-talba jew magħrufa mill-Kummissjoni mill-istħarriġ li kien wassal għall-impożizzjoni tal-miżuri preżenti fuq l-importazzjoni ta' tagħmir ta' tubi jew pajpijiet li jkun ġej mill-PRC (“l-istħarriġ ta' qabel”). Il-partijiet interessati kienu ngħataw l-opportunità biex jagħrfu bl-ideat tagħhom bil-miktub u li jitolbu għal smigħ fiż-żmien stabbilit fir-Regolament tal-bidu ta' l-istħarriġ. |
(8) |
L-ebda produttur jew esportatur fil-PRC ma wieġeb għall-kwestjonarju u l-ebda importatur fil-Komunità ma kien wieġeb għall-kwestjonarju. Ħadd mill-produtturi jew l-esportaturi tas-Sri Lanka m'għamel lilu nnifsu magħruf jew wieġeb għall-kwestjonarju. |
5. Perjodu ta' l-istħarriġ
(9) |
Il-perjodu ta' l-istħarriġ kopra l-perjodu bejn l-1 ta' Jannar 2003 sal-31 ta' Diċembru 2003 (“l-IP”). Id-data mis-sena 2000 sat-tmiem tal-IP kienet intużat biex ikun mistħarreġ it-tibdil fil-mudell tal-kummerċ. |
B. RIŻULTATI TA' L-ISTĦARRIĠ
1. Konsiderazzjonijiet ġenerali/il-grad ta' kooperazzjoni
(a) Sri Lanka
(10) |
L-ebda produttur jew esportatur ta' tagħmir ta' tubi jew pajpijiet mis-Sri Lanka ma għen fl-istħarriġ. Fil-fatt, l-awtoritajiet tas-Sri Lanka għarrfu lill-Kummissjoni li ma kien hemm l-ebda kumpannija fis-Sri Lanka reġistrata bħala manifattur ta' tagħmir ta' tubi jew pajpijiet kif definit fi-Regolament tal-bidu. L-uniku tagħrif li l-Kummissjoni rċeviet mill-importaturi kienu dikjarazzjonijiet li dawn ma mportawx tagħmir ta' tubi jew pajpijiet mis-Sri Lanka. Il-Kummissjoni għamlitha ċara lill-importaturi u lill-awtoritajiet tas-Sri Lanka li n-nuqqas ta' kooperazzjoni setgħet twassal għall-applikazzjoni ta' l-Artikolu 18 tar-Regolament bażiku. Dawn il-partijiet kienu wkoll konxji mill-konsegwenzi tan-nuqqas ta' kooperazzjoni. |
(b) PRC
(11) |
L-ebda produttur jew esportatur Ċiniż ma għen fl-istħarriġ. |
(12) |
Il-Kummissjoni għamlitha ċara lil dawn il-kumpanijji li n-nuqqas ta' kooperazzjoni jista' jwassal għall-applikazzjoni ta' l-Artikolu 18 tar-Regolament bażiku. Dawn il-partijiet kienu wkoll konxji mill-konsegwenzi tan-nuqqas ta' kooperazzjoni. |
2. Prodott konċernat u l-prodott li jixxiebaħ
(13) |
Il-prodott konċernat mill-allegat evitar huwa t-tagħmir ta' tubi jew pajpijiet (għajr tagħmir fondut, flanġi jew tagħmir bil-kamin) tal-ħadid jew l-azzar (li ma jinkludix azzar abjad), b'dijametru ta' barra li ma jkunx aktar minn 609,6 mm, ta' għamla użata għall-issaldjar tarf ma' tarf jew għanijiet oħrajn, li bħalissa huwa klassifikat fil-kodiċi NM ex 7307 93 11 (kodiċi TARIC 7307931194), ex 7307 93 19 (kodiċi TARIC 7307931994), ex 7307 99 30 (kodiċi TARIC 7307993094) u ex 7307 99 90 (kodiċi TARIC 7307999094). |
(14) |
Fin-nuqqas ta' kooperazzjoni mill-partijiet kollha fis-Sri Lanka u meta wieħed iqis it-tibdil li sar fil-mudell tal-kummerċ kif deskritt fit-taqsima li ġejja, wieħed jista' jikkonkludi, fin-nuqqas ta' kull evidenza kuntrarja, li t-tagħmir ta' tubi jew pajpijiet esportati lejn il-Komunità mill-PRC u dawk ikkunsinnati mis-Sri Lanka għandhom l-istess karatteristiċi fiżiċi u kimiċi bażiċi u għandhom ukoll l-istess użi. Għalhekk, dawn jitqiesu bħala prodotti li jixxiebhu fit-tifsira ta' l-Artikolu 1(4) tar-Regolament bażiku. |
3. Bidla fil-mudell tal-kummerċ
(15) |
Kif intqal fil-punt (4), it-tibdil fil-mudell tal-kummerċ kien allegat li qed jibda mill-ġarr vija s-Sri Lanka. |
(16) |
Billi l-ebda kumpannija tas-Sri Lanka ma għenet fl-istħarriġ, l-esportazzjonijiet mis-Sri Lanka lejn il-Komunità kellhom jiġu stabbiliti fuq il-bażi tal-fatti disponibbli skond l-Artikolu tar-Regolament bażiku. Id-data ta' l-Eurostat, li kienet l-aktar tagħrif xieraq, għalhekk intużat biex ikunu stabbiliti l-prezzijiet ta' l-esportazzjoni mis-Sri Lanka lejn il-Komunità. |
(17) |
L-importazzjonijiet ta' tagħmir ta' tubi jew pajpijiet mis-Sri Lanka żdiedu minn 0 tunnellati fis-sena 2000 għal 302 tunnellati fl-IP. Dawn l-importazzjonijiet mis-Sri Lanka bdew f'Lulju ta' l-2002, fi żmien meta l-istħarriġ ta' qabel kien għadu għaddej. L-importazzjonijiet fil-Komunità ta' tagħmir ta' tubi jew pajpijiet mill-PRC żdiedu minn 44 tunnellata fis-sena 2000 għal 287 tunnellata fl-IP. Madankollu, din iż-żieda fl-esportazzjonijiet mill-PRC għandha tinqara flimkien mal-livell ta' esportazzjonijiet li kien hemm fil-perjodu in kwistjoni ta' l-istħarriġ oriġinali (4). Fil-fatt, il-volum ta' l-esportazzjonijiet miċ-Ċina fl-IP kien ilaħħaq għal inqas minn 10 % tal-volum esportat fil-perjodu in kwistjoni ta' l-istħarriġ oriġinali. Fid-dawl ta' dan t'hawn fuq, u fin-nuqqas ta' kull xhieda kuntrarja, instab li l-importazzjonijiet kunsinnati mis-Sri Lanka kienu qed jikkumpensaw għal uħud mill-importazzjonijiet ta' qabel mill-PRC. |
(18) |
Mill-figuri t'hawn fuq, wieħed jista' jikkonkludi li kien hemm tibdil ċar fil-mudell tal-kummerċ. Dan kien beda mill-istħarriġ ta' qabel u wassal għall-impożizzjoni tal-miżuri preżenti fuq l-importazzjoni tal-prodott ikkonċernat li ġej mill-PRC u mbagħad żviluppa f'daqqa wara l-impożizzjoni ta' dawn il-miżuri. |
4. Raġuni jew ġustifikazzjoni ekonomika mhux suffiċjenti
(19) |
Fin-nuqqas ta' kooperazzjoni mill-partijiet kollha tas-Sri Lanka jew tal-PRC u fin-nuqqas ta' kull xhieda kuntrarja, wieħed jista' jikkonkludi li, meta titqies il-koinċidenza fiż-żmien ma' l-istħarriġ ta' qabel li wassal għal impożizzjoni tal-miżuri preżenti, it-tibdil fil-mudell tal-kummerċ beda mat-tpoġġija fis-seħħ tad-dazju anti-dumping impost fuq l-importazzjoni tal-prodott konċernat li kien ġej mill-PRC aktar milli ma' xi raġuni suffiċjenti oħra jew ġustifikazzjoni ekonomika fit-tifsira ta' l-Artikolu 13(1) tar-Regolament bażiku. |
(20) |
Għalhekk, wieħed jista' jikkonkludi li ma kien hemm l-ebda raġuni raġonevoli oħra fit-tibdil tal-mudell tal-kummerċ ħlief li jkunu evitati d-dazji anti-dumping fuq l-importazzjoni ta' tagħmir ta' tubi jew pajpijiet ġejjin mill-PRC. |
5. Id-djufija ta' l-effetti ta' rimedju tad-dazju f'termini ta' prezzijiet u/jew il- kwantitajiet tal-prodotti li jixxiebħu
(21) |
Ibbażat fuq l-analiżi ta' l-andament tal-kummerċ li sar hawn fuq, instab li l-bidla fil-mudell ta' l-importazzjonijiet tal-Komunità kienet marbuta mal-fatt li kien hemm fis-seħħ miżuri anti-dumping. L-importazzjonijiet dikjarati li ġejjin mis-Sri Lanka kienu neqsin mis-suq tal-Komunità sa Ġunju ta' l-2002. Wara din id-data, l-importazzjonijiet dikjarati li ġejjin mis-Sri Lanka żdiedu sostanzjalment, u laħqu mat-302 tunnellati matul l-IP. Dan il-volum jirrappreżenta 0,6 % tal-konsum tal-Komunità matul l-IP ta' l-istħarriġ ta' qabel. Għandu jitqies sew il-fatt li l-importazzjonijiet tal-prodott ikkonċernat fil-Komunità huma maqsumin bejn numru ta' pajjiżi esportaturi differenti. L-aktar, għall-IP, is-Sri Lanka kellha 2,5 % tal-volumi ta' l-importazzjoni kollha tal-prodott konċernat fil-Komunità, waqt li l-akbar pajjiż esportatur f'dik is-sena (ir-Repubblika Slovakka) kellu 12 %. Barra minn hekk, is-Sri Lanka huwa it-tnax-l-akbar pajjiż importatur tal-prodott konċernat fil-Komunità, minn lista ta' 36 pajjiż esportatur. |
(22) |
Dwar il-prezzijiet tal-prodotti kkunsinnati mis-Sri Lanka u fin-nuqqas ta' kooperazzjoni u ta' kull xhieda kuntrarja, id-data ta' l-Eurostat uriet li l-prezzijiet ta' l-esportazzjoni medji tal-prodotti impurtati mis-Sri Lanka matul l-IP kienu aktar baxxi mill-(i) prezzijiet ta' l-esportazzjoni medji stabbiliti għall-PRC fl-istħarriġ ta' qabel; u (ii) prezzijiet ta' l-industrija tal-Komunità. Kien ġie stabbilit li matul l-IP il-prezzijiet ta' l-importazzjonijiet mis-Sri Lanka kienu iktar minn 12 % aktar baxxi mill-prezzijiet ta' l-esportazzjoni taċ-Ċina. |
(23) |
Fuq il-bażi ta' dan t'hawn fuq, wieħed jista' jikkonkludi li t-tibdil li seħħ fl-andamenti kummerċjali, flimkien mal-prezzijiet baxxi ħafna tal-prodotti esportati mis-Sri Lanka dgħajfu l-effetti tar-rimedju tal-miżuri anti-dumping kemm f'termini ta' kwantitajiet kif ukoll tal-prezzijiet tal-prodotti li jixxiebħu. |
6. Evidenza ta' dumping f'relazzjoni mal-valuri normali li kienu stabbiliti qabel għal prodotti li jixxiebħu
(24) |
Biex ikun stabbilit jekk setgħetx tinstab xhieda ta' dumping f' relazzjoni mal-prodott konċernat li kien esportat lejn il-Komunità mis-Sri Lanka matul l-IP, il-prezzijiet ta' l-esportazzjoni stabbiliti fuq il-bażi tad-data ta' l-Eurostat intużaw skond l-Artikolu 18 tar-Regolament bażiku. |
(25) |
L-Artikolu 13(1) tar-Regolament bażiku jeħtieġ xhieda ta' dumping f' relazzjoni mal-valuri normali li kienu ġew stabbiliti qabel għall-prodotti li jixxiebħu. Fl-istħarriġ ta' qabel, it-Tajlandja instabet li kienet pajjiż b'ekonomija ta' suq li tixbah lil dik tal-PRC, u għalhekk dan kien xieraq biex ikun stabbilit il-valur normali. |
(26) |
Biex ikun hemm paragun ġust bejn il-valur normali u l-prezz ta' l-esportazzjoni, sar provvediment, fl-għamla ta' aġġustamenti, għad-differenzi li laqtu l-prezzijiet u l-komparabilità tal-prezz. Dawn l-aġġustamenti saru skond l-Artikolu 2(10) tar-Regolament bażiku f' relazzjoni mal-ġarr u l-assigurazzjoni. Fin-nuqqas ta' tagħrif ieħor dwar dawn il-fatturi, intużat id-data li kien hemm fit-talba. |
(27) |
Skond l-Artikoli 2(11) u 2(12) tar-Regolament bażiku, il-paragun bejn il-valur normali medju mwieżen kif stabbilit fl-istħarriġ ta' qabel u l-medja mwieżna tal-prezzijiet ta' l-esportazzjoni matul dan l-IP, imfisser bħala perċentwali tal-prezz CIF fil-fruntieri tal-Komunità, dazju mhux imħallas, wera li kien hemm dumping fl-importazzjoni ta' tagħmir ta' tubi jew pajpijiet li kien kunsinnat mis-Sri Lanka. Il-marġinu ta' dumping li nstab, imfisser bħala perċentwali tal-prezz CIF fil-fruntieri tal-Komunità, dazju mhux imħallas, kien ta' 34,3 %. |
Ċ. MIŻURI
(28) |
Minħabba l-evitar li nstab fit-tifsira ta' l-Artikolu 13(1) tar-Regolament bażiku, il-miżuri preżenti anti-dumping fuq l-importazzjoni tal-prodott ikkonċernat li ġej mill-PRC għandhom ikunu estiżi għall-istess prodott kunsinnat mis-Sri Lanka, kemm jekk dan ikun dikjarat li ġej mis-Sri Lanka jew le. |
(29) |
Id-dazju estiż għandu jkun dak stabbilit fl-Artikolu 1(2) tar-Regolament oriġinali. |
(30) |
Skond l-Artikoli 13(3) u 14(5) tar-Regolament bażiku, li jipprovdi li l-miżuri kollha li jiġu estiżi għandhom ikunu jgħoddu għall-importazzjonijiet irreġistrati mid-data tar-reġistrazzjoni, id-dazju anti-dumpinggħandu jinġabar minn fuq l-importazzjonijiet ta' tagħmir ta' tubi jew pajpijiet li jkunu ġew kunsinnati mis-Sri Lanka, u li jkunu daħlu fil-Komunità taħt ir-reġistrazzjoni imposta bl-Artikolu 2 tar-Regolament tal-bidu ta' l-istħarriġ. |
(31) |
L-evitar qed iseħħ barra l-Komunità. L-Artikolu 13 tar-Regolament bażiku waqt li għandu l-għan li jiġġieled il-prattika ta' evitar mingħajr ma jolqot lill-operaturi li jistgħu juru li mhumiex involuti f'dawn il-ħidmiet, m'għandux disposizzjoni speċifika li tipprovdi biex dawk il-produtturi li jippruvaw li mhumiex involuti f'tali ħidmiet jiġu ttrattati mod ieħor. Għalhekk, jidher meħtieġ li tiddaħħal possibilità għal dawk il-produtturi li ma bigħux il-prodott ikkonċernat għall-esportazzjoni matul l-IP u li m'għandhomx x'jaqsmu ma' dawk l-esportaturi jew produtturi li huma suġġetti għad-dazju anti-dumping, biex dawn jitolbu eżenzjoni mill-miżuri fuq dawn l-importazzjonijiet. Il-produtturi konċernati li jistgħu jikkunsidraw li jagħmlu talba għall-eżenzjoni minn dan id-dazju estiż jistgħu jkunu mitluba jimlew kwestjonarju biex il-Kummissjoni tkun tista' tistabbilixxi jekk tkunx tista' tingħata din l-eżenzjoni. Din l-eżenzjoni tista' tingħata wara li tkun saret valutazzjoni ta', per eżempju, is-sitwazzjoni tas-suq tal-prodott ikkonċernat, il-ħila tal-produzzjoni u l-użu tal-ħila, l-akkwist, il-bejgħ, il-probabbiltà ta' prattika li dwarhom ma jkunx hemm raġuni biżżejjed jew ġustifikazzjoni ekonomika, kif ukoll ix-xhieda ta' dumping. Normalment, il-Kummissjoni tista' tagħmel żjajjar ta' verifika fuq il-post. It-talba għandha tiġi ndirizzata lill-Kummissjoni kemm jista' jkun malajr, bit-tagħrif rilevanti kollu, l-aktar dwar kull modifikazzjoni fil-ħidmiet tal-kumpanija li jkunu marbutin mal-produzzjoni u l-bejgħ. |
(32) |
L-importaturi xorta jistgħu jgawdu mill-eżenzjoni tar-reġistrazzjoni jew tal-miżuri sakemm l-importazzjonijiet tagħhom huma minn esportaturi li jkunu ngħataw din l-eżenzjoni, u sakemm dawn ikunu skond l-Artikolu 13(4) tar-Regolament bażiku. |
(33) |
Fejn eżenzjoni tkun ġustifikata, il-Kummissjoni, wara li tkun ikkonsultat il-Kumitat Konsultattiv, se tipproponi li ssir emenda f'dan ir-Regolament kif xieraq. Wara, l-eżenzjonijiet kollha li jingħataw se jiġu mmonitorjati biex tkun żgurata l-konformità mal-kundizzjonijiet stabbiliti f'dan. |
(34) |
Il-partijiet interessati kienu mgħarrfa dwar il-fatti essenzjali u l-kunsiderazzjonijiet li fuq il-bażi tagħhom il-Kunsill ħaseb li jestendi d-dazju anti-dumping definittiv li hemm fis-seħħ, u kienu wkoll ingħataw l-opportunità biex jagħtu l-kummenti tagħhom. Il-Kunsill ma rċieva l-ebda kummenti li setgħu iwasslu għal xi bdil fil-konklużjonijiet imsemmija fuq, |
ADOTTA DAN IR-REGOLAMENT:
Artikolu 1
1. Id-dazju anti-dumping definittiv impost bir-Regolament tal-Kunsill (KE) Nru 964/2003 fuq l-importazzjonijiet ta' tagħmir ta' tubi jew pajpijiet (għajr tagħmir fondut, flanġi jew tagħmir bil-kamin), tal-ħadid jew ta' l-azzar (li ma jinkludix azzar abjad), b'dijametru ta' barra li ma jkunx aktar minn 609,6 mm, ta' għamla użata għall-issaldjar tarf ma' tarf jew għanijiet oħrajn, li jaqa' taħt il-kodiċi NM ex 7307 93 11 (kodiċi TARIC 7307931199), ex 7307 93 19 (kodiċi TARIC 7307931999), ex 7307 99 30 (kodiċi TARIC 7307993098) u ex 7307 99 90 (kodiċi TARIC 7307999098) u li jkun ġej mir-Repubblika tal-Poplu taċ-Ċina qed ikun hawnhekk estiż għall-importazzjoni ta' tagħmir ta' tubi jew pajpijiet (għajr tagħmir fondut, flanġi u tagħmir bil-kamin), tal-ħadid jew ta' l-azzar (li ma jinkludix azzar abjad), b'dijametru ta' barra li ma jkunx aktar minn 609,6 mm, ta' għamla użata għall-issaldjar tarf ma' tarf jew għanijiet oħrajn, li bħalissa huma kklassifikati fil-kodiċi NM ex 7307 93 11 (kodiċi TARIC 7307931194), ex 7307 93 19 (kodiċi TARIC 7307931994), ex 7307 99 30 (kodiċi TARIC 7307993094) u ex 7307 99 90 (kodiċi TARIC 7307999094), kunsinnat mis-Sri Lanka, kemm jekk dan ikun ġie iddikjarat li ġej mis-Sri Lanka kif ukoll jekk le.
2. Id-dazju estiż bil-paragrafu 1 għandu jinġabar fuq l-importazzjonijiet reġistrati skond l-Artikolu 2 tar-Regolament (KE) Nru 395/2004 u l-Artikoli 13(3) u 14(5) tar-Regolament (KE) Nru 384/96.
3. Id-disposizzjonijiet li hemm fis-seħħ dwar id-dazji doganali għandhom jgħoddu.
Artikolu 2
1. It-talbiet għall-eżenzjoni mid-dazju estiż bl-Artikolu 1 għandhom isiru bil-miktub f'waħda mil-lingwi uffiċjali tal-Komunità, u għandhom ikunu ffirmati minn persuna awtorizzata li tirrappreżenta lill-applikant. It-talba għandha tintbagħat fl-indirizz li ġej:
Il-Kummissjoni Ewropea |
Direttorat-Ġenerali għall-Kummerċ |
Direttorat B |
J-79 5/16 |
B – 1049 Brussels |
Fax (32 2) 295 65 05 |
Telex COMEU B 21877. |
2. Il-Kummissjoni, wara li tkun ikkonsultat lill-Kumitat Konsultattiv, tista' tawtorizza, b'deċiżjoni, l-eżenzjoni ta' importazzjoni, li tidher li ma tkunx qed tevita d-dazju anti-dumping impost bir-Regolament (KE) Nru 964/2003, mid-dazju estiż bl-Artikolu 1 ta' dan ir-Regolament.
Artikolu 3
L-awtoritajiet tad-dwana qed ikunu ordnati biex ma jissoktawx bir-reġistrazzjoni ta' prodotti importati, kif stabbilit skond l-Artikolu 2 tar-Regolament (KE) Nru 395/2004.
Artikolu 4
Dan ir-Regolament għandu jidħol fis-seħħ fil-jum ta' wara dak tal-pubblikazzjoni tiegħu fil-Ġurnal Uffiċjali ta' l-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussel, nhar it-22 ta' Novembru 2004.
Għall-Kunsill
Il-President
B. R. BOT
(1) ĠU L 56, 6.3.1996, p. 1. Regolament kif emendat l-aħħar bir-Regolament (KE) Nru 461/2004 (ĠU L 77, 13.3.2004, p. 12).
(2) ĠU L 139,6.6.2003, p. 1. Regolament kif emendat l-aħħar bir-Regolament (KE) Nru 2212/2003 (ĠU L 332, 19.12.2003, p. 3).
(4) ĠU L 84, 3.4.1996, p. 1. Regolament kif emendat l-aħħar mir-Regolament (KE) Nru 778/2003 (ĠU L 114, 8.5.2003, p. 1).