32003R2335

Ir-Regolament tal-Kummissjoni (KE) Nru 2335/2003

tat-30 ta' Diċembru 2003

li jidderoga għas-sena 2004 mir-Regolament (KE) Nru 2402/96 li jirrigwarda it-tariffi kwotati għall-lamtu mill-manjoka

IL-KUMMISSJONI TAL-KOMUNITAJIET EWROPEJ

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Kunsill (KE) Nru 1095/96 tat-18 ta' Ġunju 1996 fuq l-implimentazzjoni tal-konċessjonijiet imniżlin fl-Iskeda CXL imfassla b'rizultat tal-konklużjoni tan-negozjati XXIV.6 tal-GATT [1], u partikolarment l-Artikolu 1(1) tiegħu,

Wara li kkunsidrat id-Decizjoni tal-Kunsill 96/317/KE tat-13 ta' Mejju 1996 li tikkonċerna il-konklużjoni tar-riżultati tal-konsultazzjonijiet mat-Tajlandja taħt l-Artikolu XXIII [2] tal-GATT, u partikolarment l-Artikolu 3 tagħha,

Billi:

(1) L-importaturi mir-Repubblika Ċeka, mill-Estonja, miċ-Ċipru, mil-Latvja, mil-Lituwanja, mill-Ungerija, minn Malta, mill-Polonja, mill-Islovenja u mill-Islovakkja għandhom jibbenifikaw mid-dispożizzjonijiet tar-Regolament tal-Kummissjoni (KE) Nru 2402/96 tas-17 ta' Diċembru 1996 li jiftaħ u jistabbilixxi regoli amminstrattivi għal ċerti kwoti annwali tat-tariffa għall-patata ħelwa u l-lamtu mill-manjoka [3].

(2) Għas-sena 2004, biex jkunu evitati irregolaritajiet fis-suq, huwa neċessarju, b'deroga mir-Regolament (KE) Nru 2402/96, li l-kwoti tal-importazzjoni għall-lamtu mill-manjoka jitqassmu f'żewġ kwoti oħra.

(3) Il-miżuri provduti f'dan ir-Regolament huma skond l-opinjoni tal-Kumitat tat-Tmexxija għaċ-Ċereali,

ADOTTAT DAN IR-REGOLAMENT:

Artikolu 1

1. B'deroga mill-Artikolu 1(3) tar-Regolament (KE) Nru 2402/96, għas-sena 2004, il-kwota ta' tariffi annwali għall-importazzjoni fil-Komunità ta' 10000 tunnellata metrika ta' lamtu mill-manjoka msemmija f'dak l-Artikolu għandha titqassam f'żewġ kwoti oħra, kif huwa mfassal f'parti A ta' l-Anness ta' dan ir-Regolament.

2. B'deroga mill-Artikolu 1(4) tar-Regolament (KE) Nru 2402/96, għas-sena 2004, iż-żieda awtonoma tal-kwota ta' tariffi annwali għall-importazzjoni fil-Komunità ta' 10500 tunnellata metrika ta' lamtu mill-manjoka msejħa f'dak l-Artikolu, minn liema 10000 tunnellata metrika hija riżervata għat-Tajlandja, għandha titqassam f'żewġ kwoti oħra, kif huwa imfassal f'parti B ta' l-Anness ta' dan ir-Regolament.

Artikolu 2

Dan ir-Regolament għandu jidħol fis-seħħ fil-ġurnata ta' wara l-pubblikazzjoni tiegħu fil-Ġurnal Uffiċjali tal-Unjoni Ewropea.

Għandu jibda japplika mill-1 ta' Jannar 2004.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussel, fit-30 ta' Diċembru 2003.

Għall-Kummissjoni

Franz Fischler

Membru tal-Kummissjoni

[1] ĠU L 146, ta' l-20.06.1996, p. 1.

[2] ĠU L 122, tat-22.05.1996, p. 15.

[3] ĠU L 327, tat-18.12.1996, p. 14.

--------------------------------------------------

ANNESS

It-tqassim tal-kwoti annwali ta' l-importazzjoni tal-manjoka fi kwoti oħra fis-sena 2004

A. Il-kwota tat-tariffi annwali għall-importazzjoni fil-Komunità ta' 10000 tunnellata metrika ta' lamtu mill-manjoka, previst fl-Artikolu 1(3) tar-Regolament (KE) Nru 2402/96, għandha titqassam fis-sena 2004 kif ġej:

- Mill-1 ta' Jannar sat-30 ta' April 2004: 3333 tunnellata metrika

- Mill-1 ta' Mejju sal-31 ta' Diċembru 2004: 6667 tunnellata metrika.

B. Iż-żieda awtonoma tal-kwota ta' tariffi annwali għall-importazzjoni fil-Komunità ta'

10500

tunnellata metrika ta' lamtu mill-manjoka, minn liema

10000

tunnellata metrika hija riżervata għat-Tajlandja, previst fl-Artikolu 1(4) tar-Regolament (KE) Nru 2402/96, għandha titqassam fis-sena 2004 kif ġej:

Perjodu | Kwota tal-importazzjoni | Li minnhom huma riservati għar-Renju tat-Tajlandja |

Mill-1 ta' Jannar sat-30 ta' April 2004: | 3500 tunnellata metrika | 3333 tunnellata metrika |

Mill-1 ta' Mejju sal-31 ta' Diċembru 2004: | 7000 tunnellata metrika | 6667 tunnellata metrika |

--------------------------------------------------